ردة فعل

الفصل التاسع

مساء الياسمين
ردة فعل
من كتابات زهراء العراقية

_______________9______________

" افعل ما شئت فالشجرة لا تقتلها رصاصة و الماء لا يثقبه الصراخ"

سارحة بين كلماتهم  و متبعثرة بعثرة ما بعدها ثبات ، واسمع اراء و تعليقات الاخوة والاخوات بعد ما  اجتمعو حتى يشوفون شلون راح نصرف ،
أطفالي بالطابق الفوك يم اولاد خالهم جابهم ابوهم الصبح و التقى ويه والدي واخوية مجيد  اكيد صار عتب اني ما سمعته وطلب منه والدي ابقى اهنا الى أن يفرجها الله و ترتاح المرة وتشوف شتريد ، الي هي اني  طبعا سمعت هذا الحديث من امي ؛وهسة كاعدة واسمع
واحد يكول خل يطلك مرته الا ترجع ميساء والثاني يكول ترجع بشروط

نهلة كالت
-شنو ترجع بابا تطلك منه و تنهي كلشي

خزرها بكر وكال
-شنو طلاق انت ، مرة كبيرة و عدها اولاد

اسلام اختي هم صدتها امي رزلتها
- لا شاركين بالحديث اذا ما تعرفين تحجين 

ظلت تحجي بصوت ناصي هي بصفي اسمعها
نهلة
- واحد طعنها شنو يغصبها تظل و ترضى وحده تشاركها بيه

ابوية كال
- حجي امج مو أصولي

كانت امي تكول خل ترجع اله بشرط يطلق ذيج

جاوبته امي
- لعد شنو  الاصول فهمني يا ابو بكر
خاف اني ما اعرفها

-حشاج ما قصدت الي فهمتي
بس احنه اهل مرته ما يحق النا نكوله طلق  يعني اجيبة واشرط عليه هاي ما اسويها الا هي الي تطلب منه

بقت يم ميساء تشوف شتريد

جاوبته
- بوية اني هسة  ناري ما مطفية

كمت ابجي وسانده جبيني بأيدي

هم لزمت كفي نهلة  ، وكالت

-ما يستاهل دمعة وحدة شكد كنت اعزة هسة كلش كرهته الرجل الي يزوج بالسر ماعنده ذرة رجولة والا كان واجه مرته وخيرها مو أجبرها

بكر- كافي  نهلة
وانت ميساء والله انكسرت روحي من يمي عليج لا تظلين مقهورة
لو يصير اروح ابطش بهذا عمر الي حسبنا منا وبينا هيج يهين بتنا

نهلة- شفت انت كلتها هانها ما صانها اشلون اتريدها ترجعله

اسلام - كافي مو وكت النقاش هسة
ما اشوفوها اشلون ذبلت

امي كومتني

- كومي يمة سودة عليهم الي خربو بيتج وكسرو گلب ابنيتي

نايمة على رجل امي راسي وعلى سريرها الاثري الي ما تغير من ٥٨ سنة !.
وبايدها الي مملية تجاعيد الزمن تقلب بشعري

-ابجي يمة أبجي

طلعي حرگةگلبج اهنا  داخل هاي الحيطان

لا تبجين كدام نسوان اخوتج