الشيهانة

8

مساء الامل

الشيهانة
الجزء الثامن

صفتت بوجه بابا وبقيت امتمت..منوو هذا بابا؟؟
خال بهادر عمره اربعين سنة ودستة جهال وبكل
ثقة اخته خاطبتج اله..
امي حجت يانزعاج..هذا هو لا تضوج انا سديت
السالفة وكتلها تريد تدرس ماجستير بالخارج
السنة الجاي ماننطيها..
لا اله..ولا ..لغيره..شددت ع اخر كلمات وباوعتلي..

بقيت ابلع ريك وعيوني حايرة..كمت للغرفة
بسرعة..
اخذت الفون وراسلت حنين..
معقولة تدري وماحجت ابدا ماتسويها..
اكيد لو تدري جان كلتلي من اول مااجو..
واصلا عمتها مضوجتها وانا اكلها تبين حبابة..
طلعت حاجزتني لاخوها ..انا المطفية عبالي
تريدني لابنها..هه شكد مغفلة..

ورا شوية جاوبتني حنين..ها شوش
شنو هالخبر هذا؟صدك خطبتج عمتي لاخوها؟
ها يعني تعرفين لعد ليش ماكلتي؟
لج برجعتنا من اهلي سولفو بالسيارة..
كالت خطبت شاها لابو امير بس ماقبلو..
هو مامرتاح وي مرته وهاجرته..

ومن شايفج بالكلية ميت عليج..
ماتت عليه حية لعد بكد ابوي وعنده جهال
شيريد بيه بلة..
لج الصراحة هو شخصية وجنتل يعني
بس يعجبج تحاجي..
بس حرامات متزوج..وانا من حجو كتلهم
شاها بعدها صغيرة حقهم يرفضون
وعمتي نزلت عليه دوسة ونص وبقت
ترزل..

عابتلها هسه انت شعليج قابل انت الرفضتي..
لا تكلي غير تقنعيها كتلها اصلا مادري
بيكم حاجين وي بيت عمي بموضوعها..
بس تريدلها شي تعارك بي ماتعرفيها انت كلش
طلعت ماتنحمل..
اوي الله يساعدج..

لج صدددك هذا حيادر طلع ماخاطب؟الظاهر
يريدج توصليلي الحجي..
اه زين منو كال يعني شنو تتواصلون؟؟
لا مرت ابوه حجتلي..كالت مايخطب وهو حيل
يحبج..
هه امينة!هي اصلا شمدريها امينة مايحجون
كدامها شي..
لان فتانة وحجي البيت كله تنقله لبيوت العمام..
عزا ولا امبينة..
اي مو اكلج كلهم متلونين..

المهم الله يبعدج عنهم لا تتورطين مثلي
المصبرني بهادر وحبه الي ودلاله..
الله يهدي الج اهم شي هو..
اي وهسه صار ساعة يبوس بيه يريد اعوف
الفون ههه..
يااا شكد عيب روحي ..يلا سي يوو..

هبطت معنوياتي بعد كلامي وي حنين..
يعني هسه شنو مرت ابوهم تجذب عليه!
ولو اكيد تجذب لان حنين توأم روحي ومستحيل
تجذب عليه..
هسه ودي اشوف حيادر وجها لوجه واسأله
لا وارزله بعد..
ولو فعلا لو يريدني صدك شلون يقبل خاله
يخطبني!انا هم ثولة وماركزت بهالشي!
اذا حجي حنين كله صح..

قررت من هاليوم اطوي صفحة حيادر وانهي
حكايته من قبل لا تبدي..
ولازم اصفي ذهني وابتعد عن الحب والخرابيط
حتى لا افقد ثقة اهلي بيه..
اهم شي امي تبقى تثق بيه ..

من هاليوم امي اسلوبها رجع مثل الاول..
لان اقتنعت ماعندي شي وي حيادر..ولو عندي
شي ماخطبوني لخاله..

بابا كال ورا النتائج مالاتي نسافر لتركيا ..
وبيت عمو هم يروحون ويانا..
كلنا لحنين بس ماقبلت تجي كالت خاف حامل مو زين عليه..
واكلها روحي حللي تكول انتظر يمر فد شهرين..
ولو منين تطلع هذا حابسها فد مرة..
وطبعا حيادر كالت رايح خاطب بت خالته
بس رافضة هسه ماتريد ..مادري موقفي
شنو بس من اسمع بشي يخصه اتأذى..
انانية مني او غرور ماعرف شعور ثاني..
بس احاول اسد موضوعه..

اليوم النتائج مالتنا وراح بابا استلم نتيجتي..
الحمدلله ناجحة وتقديري بالدروس عالي
عدا المقالة مقبول..
كلت ميخالف المهم ماطحت دور ثاني وصارت
مشاكل بسببي..
لان ماما كلش متحلفة بي..كالت اتمنى يطيحج
دور ثاني حتى اروح امسح بي الجامعة..
بس زين خلصت..

خابرتني حنين باركتلي وكالت سافرو ورجعو
واجي اشوفج واجيب هديتج..
لحيت عليها تجي قبل السفر ماقبلت..
ورا النتيجة بيومين سافرنا..
محمد وحسن بقو بالبيت لان عدهم شغل مااجو..
لحيت ع محمد يجي يغير جو ماقبل..

محمد طبيعته كلش كتوم..ورزن مثل بابا..
وهم حقه وضعه كلش يقهر..جان يحب بنية من
الاعدادية..
هي ويا نفس العمر..
بس من دخلت كلية وصارت بينهم علاقة..
تمرضت وسوت عملية ببطنها..بعد
العملية تركته ..
حاول وياها راد بس تبررله..كلتله ماافيدك..

اختها تتواصل ويا مرات وتوصله اخبارها
صار سنين ع هالحال..
لا هي تزوجت ولا هو يقبل يتزوج..
ومن نسأله يكول ماقبلت تكلي شنو العملية..
وهو اصلا طبعه مايحجي..ومن وقتها صار
اهدىء وابرد بالمشاعر بالاختلاط بكلشي..

بقينا اسبوع بتركيا ..بس ماحسيت بطعم الوناسة
ابدا..
كل مرة من نجي ويانا حنين وبالي فارغ..
هسه حنين ماكو وحيادر متربع بعقلي وكاعد..
كل مرة اوعد نفسي مافكر بي ارجع الكى
روحي افكر..

ثامن يوم رجعنا بي للعراق ..حسيت بارتياح
عبالك راجعة للجنة..
اول ماوصلنا جان شرجي كلش عالي..
وماما تباوعلي صفح..كتلتي نفسج ع الرجعة..
استلمي الشرجي لو باقين كم يوم مو احسن..

اباوعلها ببراءة مصطنعة..ماما بلا حنين ماكو
واهس كلش..
هي ماقتنعت بس ماناقشتني..
امي عدها سرعة بديهة كللش ..وما يمر عليها
اقل تصرف بالذات بشي يخصنا..

جنت تعبانة من الطريق بس سبحت غفيت..
فززني صوت الفون باوعت رقم غريب..
فتحت خط وانا شبه نايمة..
الو..
السلام عليكم شاها مو؟؟

فتحت عيوني عدل وركزت ..هذا صوت بنية
بس مو غريب عليه!
تفضلي نعم؟
يزيد فضلج انا امينة مرت شيخ رسن..
كعدت بسرعة ..ووكفت..اهلا بيج خالة..
اسفة ماعرفتج..
حجت بهدوء..معذورة حبيبة عذريني امبين
نايمة وكعدتج..

لا عادي اهلا بيج..
انا احذت رقمج من حنين..كتلها نريد نمشي عليج
لاخوي..
ها؟
ههه لا مو صحيح بس حطيته حجة حتى اخذ
الرقم..
لان حنين ماترتاحلي بعد حكها مدام رجلها
مايريدني هي تمشي بامره..

لا بالعكس يعني هي حنين طيبة وتحب الكل..
اي صح حبيبة هي فقيرة..
اي وين اكو بطيبها فدوة لعمرها..
الله يديم خوتجن..بس ايرد اطلب منج طلب..
الراح احجي وياج لا يطلع من بينا لاي
مخلوق..انطيني كلمة حتى احجي..

انشالله مايطلع بس شنو صاير،،؟
شاها انا حيادر كلفني احاجيج..
يمكن تستغربين وانا مرت ابوه وعبالج ماحبهم..
بس وحك ابو خيمة الزركة احبهم وماعندي
غل ولا حقد..
بس حبي ومعزتي كلها لحيادر اكثر شي..
حاسبته مثل اخوي..وانا اقربله من امه..

اخوانه كلهم مايردوني لين امهم تكرهني..
بس حيادر من يوم دخلت لبيتهم نصفني وما
ظلمني..
وصرت اخته الجبيرة وبير سره..
اها حلو ..ربي يديم خوتكم..
انشالله تدوم ..

باعي حبيبة هو مايدري مشو عليج لخاله..
بس اليوم لين حنين تريد تجي لاهلها..
ام منذر كلتلها حاجي شاها بلجن تقنعيها..
وهو سمع بسالفة وصارت مذابح..كل لامه
شلون تخطبيها اله وانا رايدها حلالي..

وهي تكله مادري غير تحجي..وبهادر كله
ماتفيدك وخالي رايدها ..
وصارت بينهم للشيطان الرجيم..
وتمالخو هو وبهادر وفزعو اخوته وكوة فكوهم..

عزاا هاي صدك تحجين!
اي وداعة عافيتي..وسودة عليه حيادر ارتفع
ضغطه من القهر..
كلهم بعد شلون احجي بيها وخالي ماشي
عليها..
وامه تكله رفضو اهلها وامها عوزها ماتكتلني
من حجيت وتريد تسفرها للخارج..
باوعلهم كلهم حسبي الله ونعم الوكيل وطلع..

تالي حاجاني كال دبري رقمها وفهميها..
كليلها احبها ومااخليها تصير لغيري ..وراح
اعوف الموضوع هالفترة واجي لابوها اخطبها..
خل تفكر هالفترة وتاخذ قرارها..بس ممنوع ترفض
ههه..

هي حجت هيج وانا رجفت..ضحكت بخجل..
شلون افكر شلون ممنوع ارفض ههه..
لان يدري بيج رايدته ترى ماعبالج مايدري..
شلون عرف يعني اصلا رفضته
من حاجاني..
شاها حبيبة الزلمة يعرف البنية الكدامه شنو..
يعرفج خام وگلبج ماراجف لاحد گبله..
ياا..

اي لا تستغربين..حيادر ذيب مايفوته
شي..
ومايهمه حجي فلان وفلان..
هو رايدج وكل همه ينولج..والاريده منج حجينا
مايطلع..
لان حلفني اكلج هالشي..
لا مايطلع بس يعني ترى اهلي رافضين
اي خطوبة الي..خصوصا هو خاله خطبني
واصلا ماما رافضة اي احد من طرفهم..

خليها لوكتها المهم هسه وصلج كلامه..
شتسمعين لا تحطين ببالج..
لا مااهتم لاحد عد اهلي..والمخوفني ماما
كلش رافضته..حتى شكت بيه ورزلتني
بس كتلها اصلا مابينا شي..

تقتنع اذا كعد وياهم وحاجاهم ..هو حيد ومعدل
ومن يعرفونه عدل ينطونه وكلبهم بارد..
مادري شكول..الله كريم..بس لتحجيله شي هسه
لا يبقى بامل..
الله ارحم الراحمين .. لا مااحجي شي..
يلا حبيبة وداعة الله..
الله وياج مع السلامة..

اول ماسديت الخط انفتح الباب..باوعت ماما
دخلت ..طاح الفون من ايدي للكاع..
اجت بلا كلام ضربتني راشدي فر وجهي فر..

للحكاية بقية
بقلم شقراء(قمر كانون)

هواي طلبو طلبج بس الايام التجي توضحلكم موقفها

شنو طباخ حتى اربع عيون هههه

اكثر تعليق راهم 🤣🤣🤣🤣

يلعن ابليسج

كللللش الله