الشيهانة

5

مساء الامان

الشيهانة
الجزء الخامس

لزمت ايدي قوي ماما ونزلنا..
مع السلامة خالة مشكور تعبناك..
بخدمتج حجية العفو..
خادم ربك ..حجتها وهي تعصر بيدي ودخلنا
للبيت..
وبقية البنات راحو لبيت عمي ..

اول مادخلنا للبيت فتحت باب المطبخ ماما
ودخلت..
دخلت وراها وهي سدت الباب ومدت راسها جهة
الصالة خاف احد موجود..
ورجعت باوعتلي وحجت بصوت ناصي..
شاها صارحيني وجاوبيني بصدق ..عندج
شي وهذا؟؟

انا فركت عيوني وهزيت راسي..منوو ماما..
حيادر الي وصلنا هسه !
مستحيل ماما تدرين شنو انا ماتعرفيني يعني..
لان اعرفج اسألج..اعرف بيج نقية وماتعرفين
هيج ناس شتفكر ..

طول الطريق هو عينه عليج ويتنفس بحسرة
واخر شي من نزلنا اعتقد شفتي نظرته؟
معليه بي ولا انتبهتله تعرفين انا بيا حال..حجيتها
وبرطمت..
جرتني بحضنها وبقت تهدي بيه..
كافي بجي ذبلت عيونج حبيبة امج كافي ..

ولا تضوجين لان سالتج تعرفين اريد مصلحتج..
وخصوصا سمعت من نسوانهم يردون يخطبوج
واشوف امه تحوم عليج وانا مستحيل انطيج
لهيج عائلة..
بيت عمج عادي عدهم يمكن هم لخاطر حنين
تنازلو هواي..
بس انت وحيدتنا نريدلج واحد يناسبج..

اكيد ماما اخذ التختارو الي اعرف تريدولي
احسن رجال
واصلا تدرين بيه الزواج هسه ابدا ماريد ..
ماكدر ع مسؤولية هسه احس نفسي
مو كدها..
انشالله ماما كلشي بوقته حلو..

بعدها رحت لغرفتي اخذتلي ملابس
سبحت ودخلت بفراشي..
اريد اهرب من الواقع كلش احس نفسي مخنوكة..
خليت هيدفون بأذني وفتحت قرآن وغمضت
عيوني..
شوية حسيت نفسي وانا اسمع ارتاحيت
والضيق بصدري انزاح..

باوعت للساعة تعدت الثمانية..بقيت
بقلق عليها اريد اخابرها بس استحي..
تالي خابرت مرت عمي كالت اي خابرتني
قبل شوية الحمدلله امورها تمام..
تطمنت عليها وارتاحيت..

دزيتلها مسج..مبروك يااغلى الخوات
شنو الاخبار استحي اتصل ..
شوية وجاوبتني..يروحي وتوأم روحي
يوم الج وافرح بيج كل اخباري تمام
بس هسه ماكدر اخابر باجر تعاي وياهم..
واذا مااجيتي ازعل عليج للابد..
لج استحي بس لخاطرج رح اجي ..اعشقج
انا..

مجرد راسلتها ارتاحيت وكدرت انام بسهولة..
يوم ثاني العصر ماما وامها وهند وانا تحضرنا
حتى نروح ..
بس ماما متضايقة تكول ياريت ماتروحين
بس عيب من حنين..
انا فهمتها اصلا ماعاجبني اروح ..
بس هذا موقف ينذكر طول العمر اذا
مارحتلها.:

لبست قميص ابيض وبس ورد اصفر
شوية نازل من الورك
وبنطرون بيجي وترانشوز ..باختصار
بدلت مالي خلك هيج كاجول..
وصلنا محمد وكال انا راح اروح هنا للشط
ع ماتخلصون وخابروني..

دكينا الباب فتحه ولد عمره بالطعشات
بس نفس شمرتهم عاقد حواجبه ومن شافنا
نسوان ابتعد وومشى كدامنا..تفضلو
تفضلو ..
هند تكله ولك اوكف مانكهرب احنا..
مدري سمعها او لا بس خلتنا داخلين
وكاتمين الضحكة..

هم نظام بيتهم باب كلش واسعة عبالك
باب حصن ..
من تنفتح حديقة شاسعة وكراج ع جهة..
وبصف الكراج ديوان كلش كبير بي باب
ع البيت
وباب ع الشارع ..بس جان باب
الي ع البيت مفتوح والظاهر بس خطار..

دخلنا جوا بصالة مفروشة جلسة عربية
بيتهم كلش نظيف وريحة بخور وحرمل
طيبة..
اول ماكعدنا ..دخلت امهم ووياها بنية
شايلة صينية ..

ياهلا بالحبايب شلونجن بعد عمري..
كمنا وسلمنا عليها..وانا تشمني شم
وسألتني..شلونهن بلاعيمج..
لا الحمدلله حجيت بصوت واضح
صح مو مية بالمية..بس كلش فرق
واصلا ارتاحيت المهن راح..
عساج دومج طويبة حبيبة..

البنية سلمت علينا مرت اخو الجبير
منذراسما ام عادل..
كالو حنين بغرفتها هسه تنزل ..وبقو يسولفون
وامي عين على امهم وعين عليه..
شوية ودخلت حنين لابسة دراعة بيضا وبيها خرز
وتطريز احمر من كدام..
هي حنين جان ذوقها زين بس اشو هسه
صايرة تخبط ..يعني معقولة بشر
لخاطر اليحبه يتخلى عن ذوقه..

سلمت عليهم كلهم وانا اخر شي..
شبكتني حيل وانا بس شبكتها بقيت اشهك
بالبجي..
وامهم تكول مهو زين لا تبجن انشالله
تجرج وراها وتعرسين..

كعدنا انا وحنين وحدة الثانية ونسولف..
شكلج مفرفش ولج لئيمة ع فراكي لو عندج
بهادر بعد شلج بيه..
ههه لا ثنينكم احبكم مووت ..
اسم الله عليج حقيرتي باعي اريد اسألج..

قاطعتنا امهم ..شجاي تبشبشن جنجن فناجس..
ابتسمت مرت عمي..من صغرهن هيجي
وحدة ترهم ع ثانية..
اي واذا ربج راد يضلن طول العمر
مترافگات..
رحم الله والديج حجية..

بقينا نسولف شوية وخابرنا محمد اجالنا..
وماقبلو نطلع يردونا نتعشى بس كنالهم محمد
عنده شغل لان هم رادو يلزمون بي..
رجعنا للبيت وماما تكلي اخير مرة تروحين
بعد مانروح..
وانا اجاوب ماما انا مثلج هم مقررة هالشي
ليش تشغلين بالج..
مادري من شنو خايفة هي وهلكد تفكر تعرفني
ممفكرة بزواج..

مر هالاسبوع وجان عطلة حتى تبلش امتحانات ..
درست المواد والي ممسيطرة عليه لحيت بي..
يومية اخابر حنين لو اراسلها..بس مااطول بسرعة
واسده..
اكول عيب لان هي تةول خطار طول اليوم والاقارب
كل شوية يجون..

اليوم اول يوم امتحان جان عدنا نحو (grammar)
مادة اساسية وصعبة..
درستها وكعدت من ثنتين بالليل ومانمت جريتها
للصبح..
انا طبعي بالامتحانات انام بالنهار وادرس المادة
من الليل واروح بلا نوم..من ارجع انام..

المفروض اليوم حنين تداوم لان امتحانات
بس خابرتها ماجاوبت..
بلشنا امتحان وجاوبت جواب تمام..
وناوية بس اطلع اروح احاجي بهادر ع درجتي
لازم يغيرها لان هيجي ماراح انجح
وهم بطريقي اشوف حنين ليش مااجت..

تمشيت للقسم مالتنا..
رحت لغرفة بهادر ماموجود..سألت العاملة كالت
قبل شوية شفته يمكن راح لغرفة اللجنة
الامتحانية..
اشتريت منها عصير ووكفت اشرب
وانتظره..
شوية واجه..شافني من بعيد عقج وجهه..

تقرب..انا ذبيت العصير وسلمت..
مرحبا استاذ شلونك..مبروك..
عليكم السلام شكرا..

استاذ اجيت احاجيك ع درجتي ..
شاها كلمن اخذ استحقاقه ترى..
بس انا بالاشهر ناجحة..يعني ال١١ حتى مو نص
درجتي..
تجذبيني؟؟وبعدين شنو قابل غابنج؟؟
انت اليومي مالتج صفر لان ماعندج سلوك..

عفوا؟؟يعني شنو قصدك استاذ؟؟
شاها وكفتج هيج وتراددين راح تعم عليج..
احولج لمجلس تأديبي..ويلا روحي متيصير
تجين للغرف لا تتعودين ع هالشي..
عافني ودخل لغرفته!!
انا بسرعة دمعتي طاحت..

مو ضعف مني بس انصدمت ..حتى رجولة
ماعنده وكال بت عم مرتي شلون اهينها
هيج..
واصلا انا ماغلطانة لان طالبت بحقي..
بس الظاهر لازم اصير احقر منه
واروح لرئيس القسم اشتكي..
بالاول كلت عيب اقلل من قيمته واشتكي
بس امبين هو يريد واحد يقلل من قيمته..

مسحت دموعي ورحت للسكرتارية..
سلمت ع البنية وسالتها ..كالت عنده ضيف
خل يطلع ودخلي..
بقيت منتظرة يمها واحل بأسئلة النحو ..
شوية وسمعت صوت واحد سلم..وانا مدنكة عرفته
حيادر..
بقيت مدنكة سويت نفسي مشغولة..

رحبت بي البنية وكلتله تفضل استريح
اكيد تعرفه لان هم الاستاذة يعرفو
هو مقاول ومن يصير عدهم شغل بفترات
يجي للكلية باستمرار لحد
مايخلص شغلهم..

كعد هو وانا نفس وضعي مدنكة وادور
بالكتاب..
شلونج اليوم مجاوبة؟
صعبة اسئلتكم ..
رفعت راسي..جان كاعد وظهره مستقيم..
هو كلش طويل ورشيق ..
واصابعه اذا يسبح بيهم مرتين يطب للجنة
كد ماايده طويلة..

لازم السبحة بيدة وييفرك بالخرز..
جاوبته بخنكة لان اصلا مقهورة وحاصرتني
بجية..
لا مو صعبة بس مركزة ..الحمدلله مجاوبة..
موفقة ..
ابتسمت ورفعت كتفي بمعنى شكراً..
ورجعت دنكت ع الكتاب..

طلع الضيف من غرفة رئيس القسم..
باوعتلي البنية وكالت..
شغلتج تطول لو بسرعة؟لان هو ينتظر
استاذ حيادر..
ها ماعرف ..بس انا جاية اعترض ع درجتي..
يعني سعيج قصدج؟
اي بمادة المقالة عندي ١١ وانا شهرين ناجحة..
استغربت وكالت..راح انطي خبر انتظري
شوية..

بس راحت السكرتيرة..حيادر كام وكف..
شاها اكدر احاجيج شوية؟؟
نعم..
عوفي سالفة الشكوى مالها داعي لان راح
يشد وياج الاستاذ
انا اخلي بهادر يحاجي..
هو اصلا استاذ بهادر ابو المقالة..حجيتها ولزمتني
البجية..

مشى كدامي وكال تعاي تعاي..
طلعت وراه بالممر..
شنو بهادر وليش اذا ناجحة هيجي يسوي؟
بهادر ميطيقني ماعرف ليش..ويكلي
ماعندج سلوك حتى انطيج عليه يومي..
ليش هيجي يسوي وياي..

اولا لا تبجين ..وبهادر حاجيتي وشنو
كلج؟؟
كلي هذا استحقاقج وماكو غيره..انا اصلا
كلت عيب اشتكي عليه هو رجل اختي..
بس هو طردني من شافني انتظره
يم غرفته..

لا تنتظرين استاذ يم غرفته..انتظري
يجي للقاعة وحاجي ..حتى شنو يصير
الطلاب يكونون شهود وينصفونج ويشهدون..
مادري بس هي اول مرة اجي وحسبته
مو غريب يعني..
ماكو غريب انشالله وانت بتنا واعتبري
حقج راجعلج ودرجتج تغيرت..
شنو تردين تعاي واحجي وحاجتج مكضية..
امم ..شكرا هواي الك ..
باوعلي واومأ براسه بابتسامة..

ترخصت منه ونزلت..شكد فرق
بينه وبين ذاك الحقير المبهذل ..
لا اسلوب ولا جهرة ولا لبس جنه جنطة
مفتوحة وطايحات منا ملابس..

رجعت للبيت وبس اكلت نمت ..
كعدت تالي الليل كلش..
تعشيت وسبحت واخذت كتابي طلعت
بالحديقة..
فتحت فوني لكيت حنين مراسلتني..
راح تاجل امتحاناتها للدور الثاني..
لان هسه تعبانة وخطار وماتكدر..رجعتلها
براحتج والله يسهل ..ماردت اكتب هواي
خاف هذا يمها واسببلها احراج..

ورا امتحانين جان عدنا مقالة ..واحنا
كاعدين بقاعة الامتحان اجه بهادر..
كال العنده سؤال يسأل ..بس جانت الاسئلة
ماتنفهم اصلا..
الطلاب كلهم ضاجو وكاساع يحجون والمراقبين
يكولون كافي حجي..

تقرب يم الاستيج مالتي..درجتج تغيرت..
حجاها وتعداني يفتر يباوع للدفاتر مالت
الطلاب..
كلت بداخلي ع اساس مسوي فضل انت ..
اول مرة تلبسلك بنطرون مكوي عدل مابي
كسرتين..

كملت امتحاني وطلعت بوجهي للكافتريا
كلش عطشانة..
واكفة اشتري وشفت حيادر اجه..
تقرب وبس كملت الاشياء الاشتريتها
مد ايده ودفع فلوس..وباوعلي بنظرات
بمعنى لا تحجين شي..

اخذت علاكتي وكعدت ..هو جابله
كوب جاي وتقرب..
اكدر اكعد؟
تفضل..حجيتها وانا افتح العصير..
شلونها المقالة؟
تدوخ الاسئلة بس حليت ومجاوبة ..
تنجحين انشالله ودرجتج تغيرت..
اي كلي اليوم..حجيتها وشربت العصير
فد مرة لان كلش عطشانة..

هو صافن ولازم كوب الجاي بيده اليمنى..
لابس محبس بالبنصر ..شذرته حمرا مثل الدم
متموجة..صارت عيني عليه هو والسبحة
نفس الحجر جنها..

شاها..
خليت بطل العصير ع جهة واخذت الكاكاو فتحته..
نعم..!
متضايكة من كعدتي يمج؟
رفعت اكتافي..لا بالعكس..اصلا قبل جنت اضوج
منك ..حجيتها وخليت ايدي ع حلكي..

هز راسه مبتسم..ادري ادري ههه المهم هسه..
ماتضوجين مو؟
لا يعني طلعت حباب حيل وراقي..
باوعلي بنظرات احسه يكول يلهوي ههه بحيث
نظرته حيرتني..
كملت الكاكاو وشريت ماي..
بالعافية ..
الله يعافيك ..

شاها انا كايم لان عندي شغل ..بس عندي
حجاية من ثلث سنين هي براسي..
فتحت عيوني باستغراب..
يابت الحلال شعرج يجيب التايه وانت حلوة..
وكل نظرة لو نغزة بكلب احد انت تاخذين
ذنوبها..
يابت الناس اليشوف شعرج مايع ويلاجي
الليل ..هذا ذنبه جيير وسالني انا عن هالشي..

كمت وكفت..رفع ايده بمعنى اوكفي..
لا تحسبينه تدخل ولا تحسبينه تحكم..بس
دامج صرتي بتنا يعني نمون..
وانت حرة والراي رايج..
من رخصتج وداعة الله..

راح مشى وانا رجعت كعدت..
اباوع الكافتريا قليل طلاب همزين
ولا اكيد منظرنا ملفت كمنا وهو راح وانا كعدت ..
بس زين ملتهين بكتبهم
ظاريد اخذ كتابي وانتبهت سبحته ع الميز..
شلتها ضميتها بالجنطة وبقيت صافنة..

حجي حيادر وياي مو طبيعي..
وتقبلي اله مو طبيعي..
مو انا الي جنت اموت منه واكره كلشي
يخص بهادر..؟
بس هو اصلا ماقصده شي يعني نصحني من باب
قريبتهم صرت..
زين يعني هيجي الشعر يغري ويكلي ضمي؟
استغفر الله يعني سببي الناس تتحمل ذنب..
بس اذا ضميته خاف يكول طاعتني!
لا لا معليه باليكوله المهم ماتحمل ذنب بعد..

للحكاية بقية
بقلم شقراء(قمر كانون)

ذولا لازم يحطون يمهم شاش وقطن خاف نص الليل
ينفشخون😂

ههههه فدوة الله يحفظها بنتج مدمرة اللغة