بقلمي
الكاتبة غدير الحيدري
....
لا تقترب مني اناا
فالجرحُ قد غفى بأضلعي
تائهاََ وحائرا متخفياََ
ايعقل للقلب ان يختفي متخاذلاََ؟
أيعقل ان يموت الصمت في اصبعي؟
وتصبح تأشيرات احساسي عليك..!
انت من اذيت قلبي المنصعِ
كم كنت منصاع لأورامرك..!
......
راحيل
هوسة بيتنة والكل موجود
ماعدا سارة الزعلانة طبعا
مامرتاحة لوجودهم بس معلية بيهم
خاصة ان زيد مصكور
ومايتحرك اي حركة لان عمران يخزر بي
كنت اريد اسوي جاي
هواي يشربون جاي
كل نص ساعة جاي
انعل اب.. لالا راحيل شبيج
اخذج الواهس اسكتي
عمران كعد يسوي البلاستيكة
خطية هو عريس بس نشوان مايعرف
لذلك خليتة هو يسويهه
اندكت الباب وراح فتحهه
ودخلت مرة جبيرة حيل
بس مبينة كوية وبعدهه بحيلهه
ماكدرت اميز شكلهه او اعرفهه
تلقائيا اول ما شافتني انصدمت
وكالت
بهيجة:راحيل بعدهه عايشة!!؟
عمران استغرب
واني استغربت
اولا هي وين تعرفني؟
حتى لو كانت جيراننة بالحلة
اني ما كنت اطلع
ثانيا لشنو اموت
خفت من شكلهه
ودخلت جوة لاكتني امي
زهرة:وييين الجاي
بهالاثناء صاح عمران ع امي
واسمعة يكول
عمران:تفضلي حجية
بقيت واكفة اباوع
دخلت المرة وباوعت لأمي
كأنما امي ماعرفتهه
او ناسيتهه
كالت
بهيجة:لج انة بهيجة اللي يم النخل بيتي من خوص شنو نسيتي
زهرة:ياااا هلا حجية والله زمان تعالي تفضلي
دخلت جوة وهي تسولف
بهيجة:شوفيني من يوم الطلعتوا من الحلة انتو ببالي ويا مكثر السنين اللي فاتت بس بقيت اتذكرج من كلتي بيتنة يم شارع .... ووصفتيلي المكان يا خية بقة ببالي انة عجوز بس ذاكرتي قوية
ضحكت امي
زهرة:والله يا حجية رجعتيني لأيام الحلة
شافت بيت جدو
سلمت ببرود
بهيجة:ذول منو يا زهرة
زهرة:اهلي
باوعتلهم ما عاجبهه الوضع
الظاهر امي مسولفتلهه عنهم
كعدت وكالت
بهيجة:بعد وكت بعد ما نجا ايوب رجعولة اهلة.. المهم يزهرة مريت لأبو الجوادين زرت وانة هناك اجيتي ببالي كلت اروحن عليهه واذا مالكيتهه اخذ اغراضي وارجع
امي الظاهر فرحانة بيهه
كالت
زهرة:هلا بيج حجية ربي يعلم بفرحتي بجيتج
باوعتلي وكالت
بهيجة:هذي راحيل لو اختهه لو انة متوهمة
زهرة:لا حجية هذي راحيل
بهيجة:اللهم صل ع النبي كبرانة وحلوة لج انة عبالي راحت البنية
امي نصت راسهه
زهرة:لا حجية الحمد الله
كال زيد
زيد:وين تروح بالضبط؟
الحجية باوعت ع امي
كالت
بهيجة:امان اذا احجي لو السر يبقى مكتوم
امي ابتسمت
وبانت الدمعة بعيونهه
زهرة:مابقة سر احجي براحتج
كالت
بهيجة:انة جدة اولد النسوان واكشف عن سوالف الحبالة وغيرهه بيتي بالحلة بس يبعد مسافة عن بيت زهرة فمرة اجت هي وراحيل بشغلة وانة للان اذكر وجه راحيل انة ماانسة
زيد باوعلي
ورجع كال
زيد:شنو الشغلة اللي اجتج عليهه
التفتت ع امي
بهيجة:اكلج شو هالملكوف مايستحي
زهرة:اخذي راحتج بالكلام حجية
بهيجة:مو ما يصير
زهرة:ذول خوالهه وذول اخوتهه وهذا طليقهه السابق وهم ابن خالهه
فتحت عيونهه
بهيجة:راحييل تطلكت
اني بقيت اباوعلهه
واتذكر ذاك اليوم اللي فحصتني بي
احس الخنكة حاوطتني
وتذكرت كفخة امي
وهي تجرجر بية وتبجي
حسيت ع الواقع
من كالت
بهيجة:راحيل تعرضت للاغتصاب وانة فحصتهه شفت مابيهه امل وصدك يزهرة وراج ب6 اشهر تجيني مرت المختار جايبة بتهه وتبوس بأيدي تكلي افحصيهه واستري علينة البت كانت بكد راحيل والله فحصتهه وهم ما بيهه امل
امي خلت ايدهه ع كلبهه
وزيد مصدوم
بهيجة:ودرى المختار
زهرة:عزااااا خو لا قتل بنتة
بهيجة:لا خية لا عرفوا للعار اللي مسوي هالسواية طلع رجال مو خوش وجبير بالعمر وبي حالة نفسية النوب المختار تولاه ضرب وسحلة سحل بالمنطقة وصخم وجهه بصخام الكدور واخذوه الشرطة واعترف ان هو مغتصب اكثر من وحدة
وكعت دموعي
وخوالي يباوعون بصدمة
وبهار منصية راسهه
بيبي تباوع ع زيد اللي صار مايعرف شيسوي
امي كالت بخنكة
زهرة:وبنت المختار شصار الهه
بهيجة:تزوجت ابن بربماني مدري برنماني وكف بنص الديوان وكال اتشرف بيهه وع راسي وروحي شوفيهه بألف سعادة خلفت ولد ثنين وحامل بالثالث
نزلت دموعي
واني اسمع لأختلاف المصير
كال عمران
عمران:والعار بعدة بالسجن
بهيجة:لا انتحر ومات قبل سنة والمختار ماقبل احد يشيعة نطاه للدفان دفنة بكاع مابيهه بشر وتفلو ع كبرة ومشوا جا شعبالك ذول الاهل اللي ينشد بيهم الظهر
باوعت ع خوالي
كالت
بهيجة:الا راحيل ليش تطلكت
امي ضحكت
زهرة:لنفس السبب حجية
بهيجة:شنهووو يعني ما صدكوا بيهه
زهرة:الحمد الله ع كل حال دشوفيهه جنهه ورد
بهيجة:وليش مااجيتيني انة اشهد ه برائتهه
زهرة:مااجت ببالي وما يفيد يلا حجية الحمد الله ع كل حال يلا راسيل انتي والبنات حضروا الغدة
بقة الكل ساكت ما نطق بحرف
وزيد طلع برا
اما بهار وجهه صرت مااشوفة
ضمتة وصارت ما تعرف شتسوي
وبيبي صافنة
بهيجة حقرت خوالي بكلامهه
عن بيت المختار
وصارت تتبادل الحديث وي امي
دخلت للغرفة
قفلت الباب وصرت ابجي
من مرارة الظلم ومن الفرق
شنو اختلافي عن بنت المختار؟
بس هو اللي يعز الاهل
واللي يذل الاهل
يلعن ساعتكم السودة
يلعن حظكم وبختكم
كسرتوني الله يكسركم
صرت ابجي من كل قلبي
اسمعهم تغدوا بس ما صاحوني
يمكن امي تعرف حالتي
لذلك تركتني
وللعصر راحت بهيجة
لان عدهه بنت بنتهه حامل
وراحت
بدلت وطلعت
شفت الكل كاعد
كعدت ع الكرسي
اباوع بهار مخبوصة بأبن زيد
وهو يبجي وماتعرف شيريد
اباوعلهه شلون الله شالع كلبهه
راسيل اخذته منهه تسكت بي
ماسكت
مديت ايدي ونطتة الي
كان يبجي وعيونة متروسة دموع
خزرتة ونترت بي
راحيل:ششش
سكت
مسحت دموعة وخشمة بالكلينكس
وهمة يباوعون
صرت افتر بي وانطي العاب
كان طفل صغير
ومعاملتة صعبة
بس هدأ وسكن يمي
كلهم يباوعون
وزيد دخل
شاف ابنة ساكت يمي
جر حسرة وكعد يم بيبي
كال خالي سجاد
سجاد:زهرة ترا احنة ماندري بكل هالشي
زهرة:تقصد عن شنو
سجاد:يعني عن موضوع راحيل
التفتت علية
نترت
راحيل:وانت تكول هالكلام داتبري ذمتك لو تعتذر لو تبض صفحتك لو شنو؟
سكتوا
راحيل:من ظهر الحق سكتوا بس بالباطل كان لسانكم يكص كص موو؟ لو بهيجة ما جاية كان بقيتوا بشككم وظلمكم ومااعتقد انتو صدكتوهه اصلا
كال نشوان
نشوان:راحيل سدي الموضوع عرس عمران هالفترة لتكلبوهه عزا
راحيل:ماكالبتهه عزا بس شوفوا شعور الظلم شكد مرررر وفوك كل اللي صار خالو يكول ما كنت ادري ليش انتو خليتوا احد يشرح او يفسر
كال زيد
زيد:المشكلة بية مو بأهلي عاتبيني الي
راحيل:انت كلك ع بعضك مشكلة وما تهمني حتى اعاتبك او احاجيك
مروان:يعني شلون ماراح تخلص هاي السالفة يكفي ان ظهر الحق وهمة انخذلوا يكفي ان خوالج نزلوا روسهم وزوجة خالج ما عادت تتفسر ملامحهه اما زيد مااحجي عنة
ضحكت بأستهزاء
راحيل:واكف بنص الديوان وكايل اتشرف ببنت الشرف اما اني انفضحت بالعشيرة يلا احجوا شييييي كولوا ان راحيل عار راحيل مو شريفة هه انتو ذليتوني وتركتوا الست سارة تفضحني وتتعارك وياكم وذابة ابنهه عليكم وتريد تطلك وانتو ساكتين اني ماسويت سوايتهه بس الدنيا مقامات
ابن زيد صار يبجي
اخذنة وطلعت بي
اشوفة العصافير واحجي واسكت بي
طلعت بهار وراي
حتى تاخذة
يمكن عبالهه راح اذي
نطيتة الهه وكلت
راحيل:اني ماانتقم من طفل ولا انتقم منكم لان الله انتقم وهالشي كافي
دخلت وتركتهه
وصوت ابن زيد براسي
صار زيد بوجهي
درت وجهي ومشيت
ودخلت للغرفة وسديت الباب
بعد مااتحملهم
ولا اتحمل وجودهم الزائف بحياتي
.....
زهراء
كنت افتر بالبيت
واحضر لعرسي واني فرحانة
اروح منا واجي هنا
ونسوان اخوتي مخبوصين
سويت جسمي وحضرت ملابسي
واجة يوم الحنة
اخذوني للصالون
يتألفون ودمهم حلو
استغرب من اشوفهم مطلقات
ويقهروني هواي لان حلوات
كشخنة كلنة
وراسيل كانت كاعدة بنهاية الصالون
تخلي خافي عيوب لرقبتهه
استغربت منهه
شفتهه ضاجت وذبت الدهن
وطلعت سلسلة بيهه سلاسل هواي
خلتهه ع رقبتهه من فوك
ونزلت وغطت الباقي من الرقبة
هي حلوة ليش تسوي هيج؟
ليش تخفي جمالهه؟
مااعرف
كملنة ورجعنة لبيتنة
نشوان يتعارك وي مرتة
كلبوهه الدنيا مصايح واني صافنة
اخيرا وصلنة للبيت
اهلي فرحانين بية
واستقبلوني بهلاهل
واني مثل الفراشة بوسطهم
بالبدلة البنفسجية والتسريحة الراخية
والمكياج الحلو
ركصت وفرحت هواي
ولليل اجة عمران حتى يحنيني
دخل وهو لابس اسود وبيجي
منسقهه وطالع هواي حلو
اول ماشافني غمز
والنسوان يضحكون
خو ذول شغلتهم الضحك وبس
كعد يمي وهو كل شوي يطخني
ويباوع ع جسمي
اخير شي همس
عمران:شيجيب باجر شيصبرني يابة
زهراء:كافي عمران عيب شبيك
عمران:يعني شبية صخام بية اكلج ذول النسوان شوكت يرحون
زهراء:ينتظروك تروح يلا
باوع ع ساعتة
كال
عمران:لا اني ابات اليوم هنا
زهراء:كاافي عيب
ضحكت ع تصرفاتة
خلالي حنة بأيدي
وبوسني من خدي
راد ياخذة الواهس بس ابتعدت
رغم الاختلاف مابيني وبينة
وكل النسوان يتهامسون
العروسة احلى منة
لكن كنت اشوفة اجمل شي
واحلا شي شافتة عيني
عيونة تلمع بالشر
بس احسة بريء هواي
راسيل تجرجر بي حتى يطلع
وهو باقي كاعد
اخير شي كال
عمران:مااطلع شبيج دعوفيني كاعد
اخيرا اقتنع وراح
وهو يأشر ويكول باجر
اي باجر يمعود بس روح انفضحنة
وخلصت الحنة واجة بابا
شافني وصارت عيونة تدمع
حضنتة واني ابجي
يعز علية اعوفهم
بس عمران هم خطية
صار يبوس راسي ويتمنالي السعادة
والليل كلة يدعيلي
اهلي وعماتي خلص الليل وهمة ياكلون
دولمة وطرشي وعلكوهه علك
واني افتر بالبيت
وكأن اودع كولشي بي
واجة الصبح
ورحت للصالون
ولبست البدلة البيضة
اللي شعورهه كان مخليني اطير بالهوى
بس اكو خجل بداخلي
اكو اثر العملية ببطني
وكتفي هم بي اثر
بس كنت اتغاضى واكابر ع خجلي
المكياج زاد جمالي
وشعري لويتة ورفعتة بس
ماسويت تسريحة
عمران حذرني مايقبل
حتى لا يتعب وهو يفتح الماشات
وام الصالون تحجي علية
:هذا رجلج كذاب مايحب شعرج مفلول بس مستعجل عيني
راسيل:ترا حقة وهي مرتة كمر
وجهي صار احمر من الخجل
وشوي وكالت راسيل اجة عمران
احس كلبي صار يخفق بقوة
وطلعنة للبيت
اكلت شوي ورجعت كعدت بالصالة
اجو اهل عمران وخوالة
هوساتهم غريبة بس حلوة
فرحت هواي بس الخوف استولى قلبي
دخل عمران مكيف ويهز كتف
استغربت هذا شبي
شو هذا ما مرتبك
كعد يمي ياكل جكليت ويضحك
همسلي ورفع حاجبة
عمران:يابة اليوم ناكل كيك هواي
زهراء:عمران شبيك دااخاف شو انت ما مرتبك
عمران:لج شبيج بابا اني نفسة المجرب ما عبالج حكيم
انقهرت من كلامة
ودمعت عيوني
هو حس وكال
عمران:ها شبيج حتكلبيهه علينة سم
زهراء:مابية شي
عمران:يلا اراضيج بيناتنة عود هههه
تبادلنة الحلقات
وكملنة باقي العادات
وودعت اهلي كلبتهه مناحة
اخيرا طلعت من بيت اهلي
ودعاء والدي يمشي وياية
صعدنة بالسيارة
عمران شد ع ايدي بقوة
واخذ نفس براحة
كال
عمران:اخذتج اخيرا
باوعتلة
كنت مقهورة منة
ابتسم ولزم وجهي
عمران:زعلانة
زهراء:تتعمد تذكرني بماضيك
عمران:اني مااكدر اكلج شي اقنعج بي بس اكدر اكلج انتي صح مو اول مرة بحياتي بس اكثرهم ثبات وجمال وعفة وانتي الاصل مابينهم
ابتسمت
ودمعت عيوني
وصلنة للفندق ودخلت للغرفة
حيل حلوة
ومرتبة
مابين توصيات وحجي هواي
وكلهم يفترون منا ويرحون هناك
وكل وحدة تكلي كلام شكل
دخت واخذتني الخوفة
واول ماطلعوا ودخل عمران
فقدت وعيي
حسيت علية يذب مي ع وجهي
ويدردم
عمران:يمعودة بعدنة ما كلنة يا الله هم خربتي علينة رفعة البركع مال العكيد ابو شاب
زهراء:عمران مخنوكة
عمران:ولج كنت محضرلج كلام حلو زين هسة شكلج الله لا يخنكج
زهراء:لا كلي بعيد الشر عنج واني اضحك بخجل واكلك تسلم ابن عمي
ضحك
عمران:وبعدين اكلج والله ونورتي بيتج لالا فندقج يا زهيرة ع وزن شريفة واكلج ليش خايفة
زهراء:واني اكلك المشكلجي عمران
عمران:واني اكلج تؤ تؤ تؤ اسمي عمران
زهراء:واني ع اساس اخجل
عران:واخذج بأيدي ونطفي الضوة وطم طم طحطح
ضحكنة من كل قلبنة
وعمران حضني بقوة
لزمت وجهه واني اضحك
وهو يكلي
عمران:طبقنة المسلسل
زهراء:بس ع طريقتنة هااا ههههه
عمران:دشوفي وين كاعدين
اباوع اني متمددة بالكاع
وراسي ع كتف عمران
وهو كاعد وبعدة مانازع الحذاء
رجعنة نضحك من جديد
كال
عمران:دكومي عاد
زهراء:وين
عمران:حتى نسوي طم طم طحطح
زهراء:هههههههه لا
عمران:شبيج راح بالج بعيد لا نريد نصلي ونعبد الله
زهراء:يلا نكوم
ساعدني بنزع البدلة
ولبست السيت وغسلت وجهي
توضيت ولبست الجادر
طلعت لكيتة كاعد بالكاع
مبين تعبان
باوعلي وضحك
عمران:تعالي جريني حتى اكوم اصلي
جريتة وصلينة
كل شوي يلتفت
عمران:ما كملتي شو صارت صلاة الليل عبالك
زهراء:بعد بس ركعتين
عمران:واللي سماج زهراء اذا داتقشمريني اكلبهه ليلة مصخمة عليج
زهراء:ههههه لا والله صدك
ضحكلي
وكملت الصلاة
وكفت بنهاية الغرفة
وهو عقد حاجبة
عمران:هاي حركة جديدة
زهراء:عمران جوعان مو
عمران:اي راح اكل كيك هسة
زهراء:لا وعلي اكو فد دجاجة تجنن بس انت يعني ريلاكس شوي
جر نفس بغضب
عمران:اللهم طولج ياروح
زهراء:والله جوعانة
عمران:تعالي يلا قهرتيني بي ذبي الجادر
زهراء:لا خلي مرتاحة بي
عمران:لا اريد اشوف شعرج
رحت يمة
وذبلي الجادر
وفتح القراصة ونزل شعري
وصار يلعب بي ويضحك
عمران:الله يجنن
زهراء:انت الاحلى
عمران:تعالي ناكل دجاجة😂
زهراء:ليش اكو غير شي ناكلة غير الدجاجة
عمران:بالنسبة الي اي كيك
زهراء:اهووو
كعدنة بالكاع
ناكل ونسولف
واني اخذت راحتي وهو انطلق وياية
نسيت الخوف
مع هذا كنت افز من اشوف نظراتة الطويلة
اللي تتنقل ع جسمي وشكلي
نصيت راسي
كلت بأرتباك
زهراء:عمران اريد اكلك شي
عمران:امم كولي
زهراء:انت تعرف ان اني انجرحت ببطني بالانفجار
عمران:اي وشنو يعني
حكيت خشمي
زهراء:يعني اكو اثر للان ويمكن اثر مو حلو
ابتسم
عمران:شوفي
نزع الفانيلة واشرلي ع بطنة
اباوع اثر
كال
عمران:هذا الاثر صار بية بالسجن
زهراء:نفس المكان شوف
بدون مااحس فتحت الروب
وهو صفن
حسيت ع روحي ودمعت عيني
خجلت هواي وهو ضحك
عمران:شبيج؟
زهراء:بدون مااحس
عمران:لا تخلين حواجز بينة زهراء اني زوجج
ابتسمت بخجل
التفت ونطاني ظهرة
كال
عمران:شوفي ظهري
فتحت عيوني مصدومة
بي اثار جروح
همست
زهراء:هاي شنو
عمران:اغلبهه عركات كنت شقاوجي هواي واكو اثار ضرب ابوية ههه
مديت ايدي وصرت اتلمسهه
زهراء:توجعك؟
عمران:لا هاي بس اثر بس وجعهه بالروح
التفت علية
صار وجهه قريب ع وجهي
عمران:شوفي اني دائما اتلقى الطعنات بالظهر لان كنت سبع ومايكدرولي الا غدر بس بالسجن هبطت هواي واجتني الطعنة ببطني
زهراء:احسك مو ناسي هالايام
صفن
عمران:والله هاي عاد بقت يمج اذا تحنين علية انسى ابو الايام
ضحكت بقوة
وهو هم ضحك
زهراء:مو كنة مسوين دراما حزينة
عمران:مااريد هالعيون الحلوة تنقهر
زهراء:راح الم الاكل
عمران:واني راح اغسل
لميت الاكل وخليتة ع جهه
وعمران كاعد ع جهه
يهز برجلة
عمران:ساعة داتخلين المملحة بمكانهه ادري شبيييج؟
زهراء:عمران ع كيفك وياي شبيك
عمران:مو اني اعرفج بس كاعدلج للصبح لو اني لو انتي
دخلت للحمام غسلت
خليت حمرة وعدلت شكلي
تعطرت وطلعت
ومشيت ع كيفي
وهو كاعد يقلد
عمران:بعد بعد امشي مثل النملة اني كاعدلج للصبح
زهراء:عمران اني احبك
عمران:اي دتعالي
زهراء:عمران قاري عن الحب العذري هيج حب يصير بالارواح
هز راسة
عمران:وتردين اطبقة موو
زهراء:عمران انت حباب
عمران:تعالي
زهراء:عمران عمران عمرااان
وصرت اركض وهو وراي
اخيرا لزمني وصار يهدأ بية
اخيرا هديت
عمران:زهراء كافي ترا موتيني
زهراء:عليك الله عمران
عمران:علية الله بشنو
دمعت عيوني
عمران:ترا اني احبج
زهراء:وحتى اني
عمران:زين اني ماادري وسائل اقناع العكيد ابو شاب
زهراء:ههههههه
ومرت الليلة بضحك وجد وهزل
كانت ليلة مليئة خوف ومشاعر
وتكللت بالأمان
حسيت ع عمران الصبح
وهو يتغزل بية
كان فرحان ويضحك
كال
عمران:صباح السادة عمي
زهراء:هههه صباح الحب
عمران:خابرني نشوان عكر علية الجو
زهراء:بيش الساعة
عمران:ماابيع
زهراء:هههههههه
سبحت ورتبت ملابسي
ورجعنة للبيت واستقبلونة بالهلاهل
وذبحو خروف
ومرت الايام بكل سعادة وحب
واكتشفت روح عمران النقية
وبراءتة وحنيتة
كان يباوعلي بمكر
بعد كل مرة يغلبني بيهه ويكول
عمران:شوفي خبرتي شسوت
زهراء:عملت العمايل بزهرااااء وخلتهه مخبلة بيك هههه
وتمر الايام بتلك السعادة
التي ظننت انها لا تأتي يوما ما
واتت
....
راسيل
الايام تمر بكل هدوء
ماعدا وجود شهم وملاحقتة
اللي ما تخلص ابد
وهو يركض وراي من مكان لمكان
ومن اوكف بوجهه واكلة شكو
يرفع خشمة بتكبر ويكول
شهم:انتي الي
يابة دروح
خلصني من ضيمك
صرت مااروح للمحكمة
واخذت استراحة
بيتنة انخبص بوجود بيت جدو
وصرنة نشيل وجبة نخلي وجبة
ماعدا التقديم والهوسة
شمم كانت وراية وين مااروح
احسهه ضايجة ومحبوسة
ومااستلطفت وجود خوالي ونسوانهم
واجت بهيجة
وتغيرت المواقف
ودارت الدنيا واني اشوف موقفهم الضعيف
كان اضعف واوهن من بيت العنكبوت
للاسف خلوا نفسهم بهذا الموقف الضعيف
ووصلوا للحد اللي ماكدروا يحجون كلمة
ورجعت التحضيرات لعرس عمران
وراحيل مخبوصة وتمشي
احسهه تمشي بدمهه
طلعنة للسوك واشترينة ملابس
طاحت عيني ع فستان اسود
عجبني حيل لكن تذكرت شهم
واحس لعبت نفسي
ومشيت اختاريت فستان ذهبي
لان لون شعري كان ذهبي
واكيد راح يطلع حلو
راحيل اشترت فستان ماروني
وشمم اسود
وزهرة راحت ويانة هم
اخذت ثوب حوامل لونة مشمشي
يجنن عليهه طلع (ادري بيكم تذكرتو راكان😂)
رجعنة للبيت
وكعدنة نحضر لحنة عمران
سوينة دولمة ورتبنة البيت
وثاني يوم من الصبح
وكبل لبيت زهراء
اخذناهه ورحنة للصالون
ومكياج وشعر وخبصة
ماكملنة للعصر
اجانة نشوان حتى ياخذنة لبيت زهراء
وتعارك هو وشمم بالسيارة
وهو يصيح وهي تصيح
واني صافنة عليهم
نشوان:خلييييي الشال ع وجهج انتي مو بالسويد فاهمة
شمم:اني ما مسوية شي غلط نشوان لتصيييح
نشوان:راح اكلب السيارة بيكم
التفتت اباوع زهراء خايفة
وراحيل تفر ايدهه
راسيل:كافي نشوان اسكت
نشوان:علميهه
شمم:معلمة من كااااعي
نشوان:يااااامحمد شلون راح اخربط شعري وكشختي
راحيل:خربطهه داد الدنيا متسوة
نشوان:سدي حلكج
وصلنة لبيت زهراء ونزلنة
الديجي والخبصة والهلاهل
زهراء طلعت تجنن
عبالك باربي
وجسمهه ونزاكتهه وبياضهه كانت بكفة
وشعرهه اللي تركتة بتسريحة راخية
بكفة ثانية
والله عمران راح يسوي ضيم من يشوفهه
اخوية واعرفة ملكوف
تألقت ببدلتهه البنفسجية
ومكياجهه الهادئ الحلو
وصاروا يحجون بجمالهه
راحيل تفتر هي وشعرهه
والنسوان يباوعون عليهه
واني يعوفون وجهي يباوعون ع جسمي😂
يابة دعوفوا جسمي شنو هاي
ماكو احساس ابد
ركصت وكمزت وراحيل كذلك
الكل يباوع ع شمم
كلنة ان هاي خطيبة نشوان
تعجبوا بثقافتهه وجمالهه
واجة عمران بالليل
واحتفلنة بفرحتة
وثاني يوم الزفة
لحظات عشناهه بفرح
واول مرة نتونس هيج
كنة راجعين للبيت المغرب
بعد ما ودعنة العرسان
وتركناهم بالفندق
نشوان يصفك ويهوس
يوم الالي واذبح طلي
وامي كلبت وجهه
نزلنة يم البيت
خوالي وهوسة وابن زيد يبجي
نطوه لراحيل حتى تسكتة
كنت اساعد بيبي حتى تمشي
ولازمة السترة مالتي بأيدي
رفعت راسي شفت سيارة شهم صافة ع جهه
فتحت عيوني مصدومة
كان كاعد بالسيارة يباوع
جريت نفس بقهر
ودخلنة للبيت
سديت الباب واني مقهورة
انعكست هواي وضجت
لكن الحمد الله ع كل حال
وثاني يوم اجو عمران وزهراء
يخبلون وفرحانين
ذبحنة خروف وصاروا يطبخوه
وحضرنة الغدا
والغريب بهار صارت تشتغل
وراحيل تسكت بأبن زيد
كان الوضع ما عاجبني لكن سكتت
مااعرف ليش هالطفل تعلق براحيل بكثرة
مسكينة راحيل
تسكت بي وتهتم كأنما ابنهه
وزيد كاعد ع جهه يباوع
تغدينة واحنة فرحانين
مروان يوثق الاحداث بالصور
وسوينة حركات وكذا
كانت ايام حلوة
اخيرا خلصنة من عرس عمران
وخوالي صار لازم يروحون
وكفنة بالباب نودعهم
وابن زيد قتل نفسة ع راحيل
والمصيبة زيد اخذ هالشي حجة
وكام يسوي
زيد:الطفل تعلق بيهه يحبهه حرام عليكم تبعدونة عنهه يعني
راحيل دخلت جوة ومااهتمت
وودعناهم وراحو
زهراء وعمران مثل العصافير تسحبوا للغرفة
ونشوان وشمم ابتدت الحرب بينهم
بالصالة وواحد يشمر كلام للثاني
مثل توم وجيري
اخير شي امي كامت تصيح
وسكتوا
واني دخلت للغرفة وصرت اضحك ع روحي
والله ايااام
وين كنة ووين صرنة
الحمد الله دائما وابدا
رجعت لعملي
ورحت للمركز بشأن قضية مسجون
طبعا الاستاذ مجيد وياية ويساعدني
شفت شهم كاعد هناك
عاملني بأحترام وما قلل ادب
وكل مااحجي شي بشأن القضية
يباوعلي بندم
تغاضيت هواي لدرجة كبرى
واخذت كل اللي احتاجة وطلعت
مااريد ارجع لذاك الحلم الواهم
لذاك القفص الظالم
لذاك الذل
تعبت هواي وحياتي توقفت يمة
صح بعدني اعاقب نفسي ع غلطتي
ولا ممكن اسامح روحي
ومرات انطي الحق لشهم بكل شي سواه
حياتة كانت رهن اغلاطي
وفجأة راد يموت بسبب غبائي
شنسى حتى انسى
وحدهه اثار الجكارة اكبر علة
ولدت بروحي دمار
واني احاول اخفي واخفي
والحمد لله ع نعمة الحجاب
سترني وغيرني هواي
كنت بالمحكمة امشي
شفت شهم يكلم ضباط هواي
واكو هوسة
اكيد اكو مجرم او شي
مشيت ومااهتميت
هو لحكني وجرني ع جهه
كال
شهم:ما تعبتي وانتي ترفضين محاولاتي لو تردين تذليني اكثر
راسيل:هي مو سالفة مذلة بس اني ماارهم الك وجربت حظي وياك ما رهمت هاهية تعبت
شهم:راسيل شوفي
جريت نفس بقوة
راسيل:شهم غلطت بحقك وتلقيت عقابي وبعد ما مسؤلة اذا انت داتتلقى عقابك ترا اصعب شي ع الانسان يعيش وهو فاقد لوجود كيانة انت شتسوي بية واني مااحمل بعد
شهم:انتي رب العالمين؟ شو رحمج وموجود ليش حتى متحبلين
ضحكت
وبانت الدمعة بعيوني
راسيل:والانبوب اللي انكطع
شهم:راسيل شنو اللي اسوي ويرضيج؟
راسيل:اتركني وشوف حياتك
مشيت وعفتة
وتلاشت دموعي بضياع
اجرت تكسي ورجعت للبيت
اني دااعاني ومعاناتي جبيرة
جبيرة للحد اللي مدااتحمل
ومحاولات شهم داتقضي علية
ماعندي ذاك القلب اللي يسمحلي اشوف
شخص يتأذى كدامي واصمد
حتى لو اذاني اني مو نذلة
مستحيل اسوي نفسي بنذالتة
زين الحل شنو؟
مااعرف!
وبيوم كنت تعبانة هواي
ومخلصة ليلي ابجي
كنت امشي بالمحكمة بعدم توازن
اجة سلام كان قلقان
لزمني ع جهه كال
سلام:كان لازم ما تعترفين عن وجودج وي العصابة المشكلة داتتعقد خاصة ان عصام رافض يعترف ان انتي متورطة ومو مذنبة
ضحكت
راسيل:وشنو يعني
سلام:اني وعدتج اوكف وياج
راسيل:سلام انت مثل اخوية شيريد يصير خلي يصير ماراح يصير اكثر من اللي عشتة وشفتة ومريت بي
مشيت وتركتة
واني الخذلان يتساقط مني
من كل جهه
شفت شهم من بعيد مخبوص
وويا هواي ضباط
رجعت ذاكرتي للجكارة
احس الارض افترت بية
كنت لابسة كعب عالي
ماسيطرت ع روحي
وفقدت الوعي..!!
وماذا؟؟
....
هالمرة نهاية البارت الصدمة خفيفة
خفت عليكم والله هههه
.....
انتظروووونا
ولتنسون التصويت