بقلمي
الكاتبة غدير الحيدري
.....
مساء الخير
لتسوون طويل وقصير ومابي احداث
عجبج اقري ما عجبج براحتج
احبكم❤
....
حينها كان اللقاء
بين الثلج والنار
بين من اختطت قواعد الحب سخطا
باردة حد الصقيع
تنشر الافق بقرب الظلام..
حينها كان اللقاء بين شرارة عينك
وحرقان قلبك الاعمى..!
....
راسيل
كان كاعد خلف المكتب
ورفع خشمة
والرتبة متغيرة
صاير مقدم
نافخ نفسة ومتكشخ
وهو اكبر انسان فارغ بنظري
اول ما شافني
فتح عيونة مصدوم
ولاحت ع وجهه ابتسامة
كأنما متأكد ان هو راح يشوفني
بيوم من الايام
نشوان سلم
لان مايعرفة منو
كان يمة كاعد ضابط ثاني
نفس الرتبة
بس ذاك يكلب بالملفات
وكفت كدامة
وهو يباوعلي من جوة لفوك
باوع ع ساعتة وكال ببرود
شهم:ماكو زيارة
باوعت ع نشوان وابتسمت
كعدت ع الكرسي اللي مقابل المكتب
خليت رجل ع رجل
وطلعت اوراق قدمتهه امامة
راسيل:اني المحامية راسيل بكر العزاوي اجيت حتى اخذ المعلومات الكاملة عن السجين عمران بكر ...
ماخلاني اكمل
كال
شهم:العزاوي هههه اخو حضرتج
الضابط اللي يمة ذب الملف
وباوعلي
شهم كال بتعجرف
شهم:وشنو المطلوب؟
راسيل:مطلبي واضح اريد اطلع ع محضر القضية حتى ابدي بعملي
شهم:والاخ اللي وياج منو؟ هم محامي هههه
كان يباوع ع نشوان ورافع حاجبة
نشوان ابتسم وكال
نشوان:اني نشوان بكر العزاوي اخو الست اللي امامك
رفع حاجبة وابتسم
كأنما ارتاح
كل ظنة هذا اخوية
كام من المكتب
جر سويجة ونظارتة الشمسية
كال
شهم:ليث التزم قضيتهم وانطيهم المعلومات الكافية بس لتنسة هالعائلة مشهورة بالنصب والاحتيال والسرقة ههههههه
خزرتة
وحسيت بكره عارم الة
كال نشوان
نشوان:عفوا بس شتقصد
شمم:والله الست اللي كاعدة امامك هي اللي تفهمك
وطلع من الغرفة
وسد الباب
نصيت راسي
والضابط نطاني المعلومات
اخذتهه
اخوية نشوان كال
نشوان:يصير نزور عمران؟
ليث:حاليا لا لكن غير وقت تدللون
اخذت المعلومات
وتشكرت منة وطلعنة
كانت اكو هوسة بالمركز
وكفت ع جهه
ونشوان راح للشارع حتى يجيب تكسي
كنت واكفة والدمعة بعيوني
مقهورة من كلام شهم على اهلي
سمعت صوتة كال
شهم:وراجع جسم ليلى علوي يبرز نفسة
التفتت
كان واكف وراية
خزرتة وضحك
شهم:صار زمااان ماشفتج سمنانة وراجع شكلج القديم
اقترب مني وهمس
شهم:ناقصج بس شهم يطبق فنونة عليج
غمضت عيوني بأشمأزاز
نترت
راسيل:وضيييع
شهم:هههه مااعرف منو الوضيع بينة بالضبط بس لازم تعرفين ان شهم يكرهج
راسيل:واني ماعايشة ع حبة
باوع لساعتة
شهم:شوفي اللي يأذيني بعمري مااسامحة واللي يخدعني مالة مكان بحياتي انتي اذيتيني بطفلي وخدعتيني بغبائج لذلك زين مني واكف كدامج واباوعلج
دمعت عيوني
همست بكره
راسيل:انت شرايد؟
شهم:تبتعدين عن خلقتي
مشى وتركني
وكعت دموعي
يلعن يومك ويلعن الحظ اللي عرفني بيك
حسيت ع نشوان يصيحني
مشيت وصعدت بالسيارة
كنت تايهه وحايرة
ومخنوكة بنفس الوقت
انت ياشهم تركت شي ماانسى
وماتزال اثارك بجسمي وبروحي عامرة
وابجي من ذلك وقهرك وطغيانك
رجعت للبيت
اتظاهر ان اني بخير
لكن الحقيقة ركام
احس كلشي التم ع روحي
ومدااكدر اتحمل
اني دفعت ثمن غلط مو اني اللي ارتكبتة
وصرت ادور وابحث بقضية عمران
لكن الالم اللي بروحي فضيع
رحت ع الرجل المسروق
حاولت اخلي يتنازل ماقبل
شوفتة اشياء تدل ان عمران نسبة الشك بي قليلة
وكالعادة ذليت روحي وماصار شي
ومر تقريب الشهر
يأست واني ادور ع طرف الخيط
لكن نشوان ما يأس
كان يدور ويدور ومااعرف شيسوي
ماكنت اسألة
تركتة ع راحتة
بالنهاية مااريد اختلط بي واقهر روحي
مر شهر ع شوفتي لشهم
وبعدهه النار تغلي بداخلي
انت ياشهم اذيت كل ذرة بية
مع هذا بعدك
تجاهر بالظلم والخبث
نشوان تقريبا يأس
واخر اسبوع كعد
واشوفة صافن ومرات يدعي
امي بعدهه ع موقفهه الحازم منة
اللي زاد الامر سوء
مجيء ابو زهراء وطلبة من امي
ان عمران يطلق زهراء
هنا بقيت محتارة
زهراء حقهه بكولش تسوي
عمران حارك الدنيا
لكن
احنة منين نجيبهه دنجيبهه
وبيوم كنة كاعدين نتغدا
رن فوني اباوع الاستاذ مجيد
كمت وغسلت ايدي
وعاودت الاتصال بي
كال
مجيد:راسيل بسرعة اخذي اخوج وروحي للمركز يكولون مسكوا الشخص السارق مكان عمران ولازم ترحين وتبدين تدونين اقوالة بسرعة
هنا احس لساني نشل عن الحركة
يعني ظهر الحق
وبين ان عمران مظلوم
بوقتهه ذبيت الفون
وسجدت للارض وصرت اشكر ربي وابجي
التموا كلهم علية
نشوان كمز
وصار يسألني بصوت عالي
نشوان:لكوا السارق موووو؟
راسيل:ولك اييييي
بوقتهه امي فرحت
وصارت تهلهل
وراحيل تضحك ومروان مكيف
اول مرة تظهر السعادة علينة بهالشكل
ماكانت الي الفرصة
ان اسأل نشوان شلون حزر الموضوع بكل سهولة
بس بدلت بسرعة
واخذني نشوان للمركز
وامي راحت ويانة
بوقتهه هواي فرحانين
وامي تبجي
خطية امي
ماشافت السعادة بحياتهه
الله لا يسامح اللي كان السبب
وصلنة للمركز
ونزلنة دخلنة جوة
دخلت لغرفة المدير
وفتحت محضر القضية
وفعلا لازمين السارق
هنا كنت مااعرف شسوي
فرحة ع احساس كبيير بالظلم
طلبت اشوف عمران
واللي اسمة ليث ماقصر
الظاهر صديق شهم
دخلنة بغرفة الانتظار
شوي وجابوا عمران
امي ركضت حضنتة وتشبك بي
اجة علية ولزم وجهي بخوف
عمران:راسييل
وكعت دموعي
راسيل:اعرف قصرنة
عمران:شلونج احوالج راسيل خو مااذاج
هزيت راسي بمعنى لا
راسيل:انسى ولا تهتم المهم انت انسى
التفت وباوع ع نشوان
نشوان كان واكف بخوف
يمكن خايف من ردة فعل عمران
وكف عمران كدامة
نشوان مثل الطفل
عمران كال
عمران:ارفع راسك
اول مارفع نشوان راسة
وما احس غير راشدي من عمران
ونشوان نزل راسة
خليت ايدي ع حلكي مصدومة
عمران ضرب نشوان
عزاا
لزمة من كتفة وهزة
كال
عمران:صفعة الاهل احلى من الغربة موو؟
نشوان هز راسة وبجة
مثل الطفل
اول مرة اشوف نشوان مكسور
جرة عمران لحضنة
ونشوان يبجي اما عمران يضحك
نفس ضحكة الشر
خرب عمران ولا يغير طبعة
لزمني واني ضحكت
راسيل:لزمت قضيتك اني
عمران:راسيل شهم
جريت نفس بقهر
راسيل:تطلقنة
جر نفس براحة
راسيل:لتخاف اني راح انقذك
عمران:اخذي حذرج الكل
هزيت راسي
دخل ابو زهراء
عمران ابتسم وسلم علية
كال
عمران:عمي اعرف فترة بقائي هنا طولت لكن مابقة شي واطلع واطلك زهراء وهذا وعد
سكت
نصة راسة ولزم ايد عمران
وبعدهه طلع
ودعنة عمران وطلعنة
وبدت من هنا ايام مختلفة
صرت اسهر وادرب روحي
اقترب موعد المحكمة
ولازم اثبت جدارتي وبراءة عمران
شعجب شهم ماكان موجود بذاك اليوم
ماشفتة!
مايهم بعد احسن
المهم ان ابقى بأمان
وبأحضان الهدوء
....
بغداد
الساعة ال8 ليلا
زهرة
بعد كل شي صار
وتغيرات هواي بحياة اللي حولي
كنت عايشة لنفسي
امتحنت وطلعت معدل عادي
كلهه كان جلال ساكت عنهه
ومايحجي شي
بعد ما شاف رفضي واصراري ع الرفض
تركني واني ارتاحيت
صار يجي ينام كبل ويكعد الصبح لدوامة
وباليوم اللي هو مو هنا
يطلع يكعد يم امة
لو يطلع وي شهم
كان يباوعلي
واكو صراع بروحة
لكن مايظهرة
اليوم
خابرتني راحيل
وكالتلي ع وجود الاستمارة
كلت يجي جلال واكلة
وفعلا اجة من برا
صار ينزع ملابسة
كنت كاعدة ارتب تسلسل الجامعات
رفعت راسي
كلت
زهرة:جلال الاستمارة طالعة اريدك تجيبلي وحدة
باوعلي بملل
كال
جلال:ماكو كلية
عقدت حاجبي
زهرة:مفهمت؟
جلال:مثل مسمعتي كلية ماكو
زهرة:شبيك جلال شو هيج تحجي
جلال:تردييين تدرسين روحي يم امج خلي هي تدرسج شو سنين يمهم جاهلة وامية واخر شي يلا عرفتي الدراسة تاليهه خارجي وهسة تريدين كلية
دمعت عيوني
بس اخفيت ضعفي
زهرة:انت ليييش تحجي هيج جلال اني مو امية ولا جاهلة مااسمحلك
صاح
جلال:هيييي تسمحين ماتسمحين هذا العندي ماعجبج الباب يوسع جمل مخليج يمي لا شغل لا مشغلة وتردين تدرسين براسي
كمت من السرير
ووكفت كدامة
زهرة:وديني لأهلي اذا ما قانعتك
جلال:اييي اوديج واكلهم عن عمايلج وتصرفاتج ورفضج الي دشوف الشروك يقبلون بهالشي
صحت
زهرة:لا تستهزأ وتكووول شروووك
جلال:مدااستهزأ
مشة وعافني
وكعت دموعي
زهرة:وديني لأهلي
جلال:اوديييج وحق الله ماابقيج هنا بس خلي يطلع صباح الله
انفتحت الباب
ودخلت اختة الكبيرة وامة
كالت امة
:جلال يمة شبيك تصيح وانتي زهرة ليش تبجين
جلال:ماكو شي
:احجي شنو ماكو شي
صاح
جلا:اخذيهه لغرفتج يوم ومن باجر اوديهه لاهلهه وهذا العندي
نترت
زهرة:وانة اصلاااا ماباقيتلك
جلال:روحي خلي يلفوج اهلج روحي يلا دشوف يقبلون بعملتج
كالت امة
:ولك جلال تأدب زهرة مابدر منهه الا كل خير
جلال:الخير يصيبج ويصيب بناتج بس مايصيب ابنج انتي تعرفين ليش ام وجه الخير مداتحمل
صحت
زهرة:جلاااال
جلال:خلييييي الغيييي
:شكو يمة خفت
جلال:اللي كدامج بعدهه بنية واني مالامسهه وكل مااجي يمهه تمانعني
صرخت
زهرة:لا تحجي الموضوع بس من صالحك
ام جلال تخبلت
واختة مصدومة
:لعد كل هالاشهر شداتسون
جلال:كل هالاشهر انام بالكاع وحضرتهه ع السرير اني بعد مااتحمل ولا اريدهه ولا اريد اتزوج
صحت ودموعي توكع
زهرة:انتو كلكم هذا طبعكم تحجون اللي يفيدكم وماتهتمووون للاسباب
التفتت ع امة
زهرة:ابنج المحترم بليلة زفتي اللي هي اجمل شي بحياة كل بنت كلب هذي الليلة ظلام تدرين لييش؟ كعد يخبرني بعلاقتة ببنت خالتة اللي تزوجت وتركتة هو ماصارحني قبل الزواج حتى اعذرة هو دمرني ورفضني
مسحت دموعي
زهرة:انة ما اقبلهه ع روحي اكون احتياط ولا اقبل تنذكر كدامي انسانة ثانية وماارضى اتقبل انسان بالة مو يمي وتفكيرة يم انسانة باعتة
امة صارت تخزر بي
هو صاح
جلال:عااادي ترا مو مصيبة اذا كنت متعب هذا مو مبرر ان تبقى رافضتني
كالت امة
:رغم مامقتنعة بس حصل خير صفوا مشاكلكم وخلي واحد يتقبل الثاني ولا تكبروهه
جلال:وج يمة بستهه مرة كامت تتقيأ اني بعد مااريدهه خلي يربوهه اهلهه
صرخت
زهرة:انة متربية وانة بعد مااريدك وراح اروح لأهلي وشتريد تسوي سوي
طلعت من الغرفة
واني ابجي
اجت ام جلال تستغفر
كالت
:يمة صفوا مايكم عيب تطلع السالفة كدام اهلج
زهرة:هو ماناسيهه ويريدني الي كسد فراغ وااانة مااقبلهه ع روحي مااقبل ينضحك ع مشاعري اكثر
بقت صافنة امة
وانة الليل كلة خلصتة ابجي
انكلب جلال فد كلبة
ع اساس كان ورد
والصبح بدلت واخذت اغراضي
واخذني هو
امة رادت تجي وهو ماقبل
الطريق كلة ساكتين
واني كارهتة وحاقدة علية
واندعي بداخلي ان يموت
خلاني بموقف مدمر
ومستحيل اسامحة علية
وصلني للبيت
نزلت واخذت اغراضي
توقعت ينزل لكن
شخط السيارة وراح
هنا احس الكره زاد
ضربت الجنطة جلاق
ودخلت للبيت ابجي واصيح
امي وبيبي انصدموا بية
ذبيت العباية ووكفت بنص الصالة
كلت
زهرة:هو هذا الزواج اللي زوجتوا الييييي هذا اختيارج وقبولج يووم الله لا ينطيكم دمرتوني
اجة ابوية يصيح
وانكلب البيت
الظاهر جلال متصل بي
ابوية اجة ضربني
صرت ابجي وامي تضرب ع وجهه
اخذتني للغرفة
بهار:لج بنت الفكر ع منو رافعة خشمج هااا ليش ماناطيتة نفسج هااا
صرخت
زهرة:انة بنت شيخ الجامع اللي شوهتوا اسمة واللي يحجي بالفكر هو الفكر
ضربتني وجرتني من شعري
بهار:شنو وجهي من العالم مو كفاية سوالف زيد اخوج ولج تسودنينيييي
زهرة:انة هالرجال بعد مااريدة فاهمة مااريدة
صرخت
بهار:حتى تصيرين مثل بنات زهرررة مطلكااات والله تحلمين اخابرة واجيبة لهنا واروح وياكم ومااعوفكم الا تتم الشغلة عيييب واستحي رتبتة اكبر من راسج
ضربت وجهي
زهرة:شسوووي بالرتبة انة وهو مايحبني شسوي بهيج زواج وهو يتخيلني بنت خااالة
بهار:غييير نسوان تلف رجولتهن لف امداج يالغبرة
ضربت رجلي وصحت
زهرة:ماااريدددة
بهار:تتقبلي غصبا عن راسج ومو بهار اللي تنفضح كدام الناس فاااهمة
طلعت وقفلت الباب علية
وبعد كم يوم اجة جلال
وصاروا يقنعوني ارجع
وانة كلبت الدنيا
وصرت اصرخ وجلال طلع
همة جايبي بالتواسيل
واني طفرتة
امي اجت شلعت شعري
زيد يدفع بيهه وانعلك البيت
ومر اسبوع ع اللي صار
نسوان خوالي اجو
سامعين بكولشي
وامي صارت بكد النملة بينهم
وكل العشيرة درت
ان زهرة بعدهه بنية ومنعت زوجهه منهه
والبعض صار يألف
اكيد بيهه شي ومنعتة
ابد ما انقهرت
ولا تحسبت ولا سويت اي شي
بس كانت بعيوني دمعة حزن
من عرفت الدنيا داتدور
وكما تدين تدان
وامي تخلت بنفس الموقف
اللي تخلت بي عمة زهرة
وانة مثل راحيل
هي هاي الدنيا
ابوية صار يحاول يلفلف الموضوع
وامي بعد ماصارت لا شيء امام الناس
صارت تضغط علية
حتى ترقع الموقف
لأخر لحظة ماقبلت اتنازل
الا من شفت زيد مكسور
ويعاني من مشاكلة وي سارة
وكل يوم زعلانة
واشتياقة لراحيل وايامهه
وكسرتة من حجوا بشرفي
وهو مايكدر يدافع
لان كولشي واضح
استسلمت
ورجعت لبغداد وياهم
وامي اجت تريد تشرف ع موت بنتهه
جلال ولا كأنما
يسوق ورافع خشمة
وانة كارهتة لدرجة عظمى
وصلنة لبغداد ساعة 9 بالليل
ام جلال استقبلتنة وكيفت بينة
امي تدفع بية ع الغرفة
واني اريد اقتل الدنيا كلهه
كالت ام جلال
:يمة اخذو زهرة وحضروهه اليوم عروس هههه
باوعت ع جلال بكره
يشرب جكاير ولا يمة
دخلت للغرفة
محضريلي سيت احمر فاضح
كلت
زهرة:مااريدة
:لالا عيني ميصير لازم تلبسي
جريت نفس
وضحكت ع روحي
انة ع كولشي انجبرت
بقت ع اللبس
شسورولي شعري
خليت مكياج خفيف
ولبست السيت
اباوع لنفسي وعيوني مدمعة
مقهورة هواي
ودااحس بشعور الكسرة
امي دخلت
جرت خصلة من شعري
بهار'عطوبج اشلعهه اذا رفضتي وشدي حيلج واحبلي واربطي بجاهل فاهمة
باوعتلهه ووكعت دموعي
عوجت حلكهه
بهار:عن العيارة بلة هسة تكومين تعشكي خلي اطلع كلبي خلصان من سوالفج
وطلعت وعافتني
دخل جلال يدخن
ويمشي ع كيفة ولا يمة الموضوع
كعد ع الكنبة
وجكارة تلحك جكارة
اختنكت وصرت اكح
استحيت من نفسي
ومن شكلي واني احاول اخفي اجزاء جسمي
لكن ما الفائدة
واني عايشة وي انسان
يفصل كلشي حتى لو كنت لابسة بطانية
استمرت دموعي بالنزول
لاخر لحظة!!
وحسيت بخسارة جبيرة
واللي كسرني اكثر
ان جلال مامهتم ومستمتع
كرهت نفسي هواي
وكرهت اهلي والزواج
ومابينها جلال احتل المرتبة الاولى بالكره
ابتعد واني ابجي
وراح فتح الباب ونطاهم التفاهه
التفاهه اللي كسرت الف بنية
وخسرتهه روحة
وقفل الباب ورجع
تمدد يمي وصار يلعب بشعري
كال
جلال:دموعج اكبر دليل ان انتي مو راضية مو؟
درت وجهي ومارديت
اقترب من اذني وهمس
جلال:هاي بزعلج هيج حلوة برضاتج شلون؟
حاول يلطف الجو
لكن الجفاف كان بروحي
لان مامتقبلتة
وكل حركة منة احس روحي تطلع
اثرهه
نمت والدموع بعيني
وراحيل ماطلعت من راسي
احس ثنينة تعرضنة لمشاعر قاسية
والاختلاف بسيط هواي
حسيت الصبح
جلال بعدة نايم
وخانكني من كل الجهات
ردت اسحب روحي ماكدرت
ومن كدرت افلت
رجع سحبني الة هو وغافي
بقيت اباوع لوجهه
وتزيد الخنكة بروحي
شكلة حيل شراني
وهو مايحبني
انة سد فراغ
واللي صار غلطة جبيرة
اتعاقب عليهه
بس مو هسة
.....
بغداد
الساعة ال8 صباحا
عمران
ليالي ومو بس ليلة وحدة
تمر واني السهر معلق امنياتة ع اهدابي
ويمنعني انام
وبكل يوم تخطر براسي الف فكرة
الف موقف الف ذكرى
ومابينهه مسلي روحي بظلام السجن
اخيرا رب العالمين استجاب لدعائي
او يمكن لدعاء زهراء
حتى تخلص مني
ولكوا صديقي السارق بمنطقة بالارياف
كان طول الفترة ضام روحة هناك
وتارك الظلم ياكل بية
شفت راسيل وامي وردتلي الروح
وشفت نشوان
اللي رجع بذاكرتي لذاك اليوم
اللي بي تقاسمنة الفلوس اني ويا
وهو سافر لعالم مختلف
واني سافرت بعالم الظلام
ضربتة لان كنت متحمل علية
ومقهور من كل الاختلافات اللي صارت بحياتنة
كل عائلة تصير بيهه المشاكل
لكن مو مثل مشاكلنة
مشاكلنة اللي باعدتنة عن بعض
لدرجة يصعب البعض تخيلها
اكون يم امي واني مو يمهه
اكون بالبيت واني مافاهم اختي
ولا اعرف شعور اخوية
مرات نكون قريبين بس بعيدين
قريبين الاجساد بعيدين الارواح
وهاي بحد ذاتهه مصيبة
راسيل التزمت قضيتي
وهي اللي صارت مسؤلة عني
والله خطية
تصرفاتهه تحسسني بالذنب تجاه روحي
اني كنت اضربهه
وماحميتهه من العالم الخارجي
صرت مااكدر ادافع عنهه لان اني ظالمهه قبلهم
ومدافعتي تعني جهل
راسيل اخت
حالهه حال هواي خوات
يحبون ويسامحون من كل قلبهم
لأخوة تافهين مثل عمران
واليوم كنت كاعد وصافن
دخل الشرطي بطلب زيارة
طلعت وشفت راسيل ورجال جبير
الظاهر هذا المحامي الثاني
ونشوان
كعدت وصاروا يسألوني
راسيل مرتبكة وتكتب كولشي اكولة
عقدت حاجبي مستغرب
عمران:يا جماعة شكو
راسيل:حددو موعد الجلسة بعد 3 ايام
ابتسمت
عمران:يعني راح اطلع موو؟
راسيل:اي بس اكو مشكلة
عمران:شنو
نصت راسهه
راسيل:الولد اللي وياك واللي سرق المبلغ يكلهم عمران شريك وياية
ضحكت
ولاحت الدمعة بعيوني
عمران:عادي تعلمت ع الظلم والسجن
كال المحامي
مجيد:شنو هاليأس؟ ناسين ان اني افر اكبر قضية بنتي راسيل بطلي خوف وكولي ياالله صدكي راح اكعد كعدة وحدة بس وي ذاك المجرم وكولشي راح يكون بخير
تشكرت منة
وانتهى موعد الزيارة
اجيت اطلع
اقتربت مني راسيل وهمست
راسيل:اتصل بينة السيد وكال ان زهراء راح تحضر بالجلسة
صفنت
عمران:وشنو يعني؟
راسيل:حبيت اخلي يمك علم
هزيت راسي وابتسمت
عمران:طلعت من نفسي وما تهم
واخذوني الشرطة للسجن
كعدت ع السرير
رفعت البدي وشفت اثر الطعنة
اكو اثار بروحي ماتنسي
عادي
الدنيا ما واكفة عليج زهراء
الدنيا بيج وبدونج تكتمل
ومن الاساس كان لازم اتجاهل قلبي
واتركج ومااجي يمج
اني وانتي شيئين مختلفين
واحترم هذا الاختلاف
لا اني من ثوبج
ولا انتي من ثوبي
ابقي طالعة من عيني
احسن
كمت للمغاسل
اباوع لنفسي تعبان ولحيتي طولانة
عيوني ذبلانة والتعب ماخذ مني حيز جبير
الحمد الله ع كل حال
ومرت الايام
لحد مااجو الشرطة واخذوني بسيارة
ابتسمت من عرفت ان هذا يوم الجلسة
وحكمت المحكمة بلقائنا
لكن..!
اي شيء سيطفئ تلك النار؟
.....
انتظروووونا
ولتنسون التصويت