يله نبدء
بسم الله
-صلو ع النبي-
(ملاحظه سوف أقوم بگتابة البارت الاخير أن شاء الله وهو بارت طويل جدآ ومليء بالاحداث المشوقه وسيحدث به تسارع بالاحداث وقد أستغرق يومان في گتابته واعدكم أول ما أقوم بانهائه سوف أنزله لگم)
بقيت أمشيء وراه وصلني للاستعلامات وراح يربي توني فگرت شنو الي خلاني أثق بفارس والحگه تذگرت ماسئلته شنو الي چان يسويه اهناگه وشلون عرف بموضوع الفيديو واخذ تلفوني الف علامة استفهام صارت براسي...قررت تناسي گل شيء ورحت للبيت فگرت أتصل بنور واگللها بس أگيد مراح تصدگني منو راح يصدگ هيچ شيء أني لحد الان مصدومه عبالگ گابوس وشفته گدامي
☆☆☆☆☆☆☆☆
تگريت
العصر في الگوفي شوب
عند عبدالعزيز
گاعدين ع الكراسي هو ورائد وعامر وفارس..
عبدالعزيز"خير يافارس شنو الي صار ويام وخلاك دز علينه..
فارس"گعدت أحچيلهم شنو الي صار ويه ديم..
رائد"گان ناديتني لو هسه شبعته ضرب وبردت نار گلبي اگيد ماتحملت شوف ديم تحتاچ مساعده وتدخلت ماخفت لا تنگشف..
فارس"لگيتها فرصه تا أنتقم للگم ولاتخاف ماتعرف ذاك اليوم أحتاجت مساعده ودزيتلها الامن يساعدها أني ماتدخل لاتخاف اله للضروه.
عامر"وأنت ناسي مهمتك وحاير بس تراقبها لديم.
فارس"أني ماراقبها هي تطلع گدامي وين ماروح.
رائد"سبحان الله گمللنه مامعقول چبتنه تا تچيلنه عن ديم فقط گمل..
فارس"ماريد احد يذگر هاي السالفه گدام أحد وشوف أگيد راح تبقه تسأل نور عن محسن فلذلك لازم أنطيها حچيك ويه محسن شنو دگول توافق لو لا.
عبدالعزيز"تمام موافق أنطيني ياه تا أنطي لديم.
فارس"عوفني أني انطيها ياه اريد أوصيها ماتحچي الشيء الي شافته..
عبدالعزيز"أگيد راح تتعارك وياه والنوب أذا سمعتك توصيها راح تعاندك وتروح دگول لنور أگيد.
وعامر"أنت تفقد گل اعصابك بس تشوفها تعوذ من أبليس وعوفنه احنه ندبرها.
فارس بنبره واثقه"لاتخافون أني گدها مايگون أسمي فارس أبن الشيخ مطر أذا خليتها تحچي بالي شافته.
☆☆☆☆☆☆☆☆
الانبار قضاء راوه
بيت محمد
گاعده فرحانه والدنيه مو سايعتني حسام ماگو منه وابد مامقصر وياي بشيء وحيل يتفهم الامور ربي يحفظه من گل شيء....گاعده بالغرفه دگ التلفون شفته هو الي تصل بعدني مافگرت بيه واتصل.
هديل"الو.
حسام"هلا باحلى الو شلونچ حياتي.
هديل بارتباك"بخير دامك بخير.
حسام"حياتي أريد أفاتحچ بموضوع واتمنى توافقين علي..
هديل"شنو خوفتني خير ان شاء الله.
حسام"أحس روحي طولت بالخطوبه اريد العرس بعد شهر ياهديل..
هديل"بس ياحسام دراستي ع الاقل خليني أخلص السنه.
حسام"گل مره أچله علمودچ ترضينها تزعليني واني أسؤي گلشيء علمود خاطرچ وهاي أول مره أطلب طلب.
هديل"بس مالحگ گلشيء اسوي.
حسام"امي وامچ يخلصن گلشيء وافقي وريحيني ربي يسعدچ.
صفنت بحچيه ياربي ماريد أزعله واگسر بخاطره خاف أذا ارفض طلبه يروح يزعل ويعوفني والشهر يصادف بعطلة نص سنه وهو سوه أهوايه أشياء علمود سعادتي تذگرت رهام بس گالتي قبل لاتروح للجامعه تره حسام مايتعوض حاولي لاتخسرينه ابد.
هديل بنبرة خچل"الي تريده يصير ع راحتك..
حسام بنبرة فرح"ربي يفرحچ مثل مافرحتيني أروح أبلغ الاهل تا يبلغون أهلچ سلامي..
گطع الخط واني أباوع هل القرار الي اخذته صحيح أنگتب مصيري باسمك سوى اليوم تزوجنه اوبعد سنه الله يقدرني انو أسعدك..
☆☆☆☆☆☆☆☆
جامعة تكريت
چنت گاعده أني ونور بالقاعه بعد انتهاء المحاضره الاولى
نور"أگلچ ياديم مو من عادت محسن يغيب وخصوصآ اليوم عدنه أمتحان..
يربي هاي بعدها فطيره وتسأل عن محسن...خليني أگللها خاف تطلع منعجبه بيه..
ديم"شوفي يانور أسمعيني زين واتمنى تصدگيني هل مره.
نور"شنو الموضوع أحسچ تريدين تحچين شيء وگل شويه تلوفين الموضوع أحچيلي..
ديم"باليوم الي غبتي بيه من الجامعه...أني بقيت بوحدي بنهاية الدوام فقررت أروح ع الاستعلامات... قاطع گلامي رائد..
رائد"سلام عليكم..
نور وديم"وعليكم السلام.
رائد"هاي يانور ورقتچ مالت أمتحان الكيمياء...
ديم"لعد ورقتي وين؟
رائد"الاستاذ أنطاهن الفارس وفارس أنطاني ورقة نور أذا تريدين روحي شوفي فارس.
ديم"أنت شوفلي ياه وانطيني خبر....رائد تمام...
راح رائد...
ديم"ها بشري شگد ماخذه..
نور"اخذت85باوعي حل فارس صحيح بس لن منقص خطوه انطاني ع السؤال18من20..
ديم"اني حليت بغير طريقه.
نور"ليش أحسچ حيل ماخذه موقف من فارس أحسچ گلما تشوفينه تتعاركين وياه تره عيب ياديم.
ديم"هو الي دا يبدي وعوفينه من عنده ومن سيرته الي تغث الواحد...
نور"لعد يله گمليلي شنو صار...
أستغربت هل مره فات عامر معقوله سمع حچي بس اني ماگايله شيء غلط.
عامر من يم باب القاعه"من رخصتچ ديم بس أريد أحچي وياچ بموضوع ضروري...
ديم"تمام طلعت من القاعه..
ديم"خير شنو تريد...
شفته ساگت ويباوع ع نهاية الممر... مالت القاعات...
عامر"ينادونچ اهناك..
الصراحه أستغربت منو يناديني رحت أمشيء وگفت يم ممر الگرفان چان أشوف فارس مستند ع الحايط..
بس شافني.
فارس"شنو الي ردتي دگولينه لنور..
ديم"أنت شنو لا عندك لا شغله ولا عمله وصاير تصنت ع گل گلمه أگولها..
فارس"سئلتچ سؤال چاوبي.
ديم"بس لا صرت ولي أمري واني ما اعرف.
فارس"أذا مصره أگون ولي أمرچ ماعندي مانع.
ديم"أنت تخبلت.
فارس"أحترميني أني أگبر منچ.
ديم"مادگلي باي حق دا تسألني أذا ماعندگ سالفه براسها خير راح أروح.
فارس"لادكولين لنور عن الي صار وياچ.
ديم"وليش ماتريدني أگللها أريدها تعرف حقيقة محسن.
فارس"تنسين الي صار وياچ وأعتبريه شيء ماصاير ...وعندي گم فيديو راح أنطيچ ياه يثبت أنو تحده عبدالعزيز بان راح ياخذ نور من عنده وانو دا يضحك عليها أفتحي تلفونچ أدزلچ ياها.
ديم"وبگل جرأه دا تتامر مامچبوره أسمع ألي دا دگوله لو تريد تاخذه بالقوه مثل ذاك اليوم.
فارس"أذا جبرتيني اگيد اخذه.
ديم"تخسه...قاطع گلامي
فارس"تعاي للمنطق شويه أي احد يسمع بالقصه مراح يصدگچ وهي مراح تصدگ اي شيء تسمعه عن محسن أله تشوف بعينه...وتره عبدالعزيز الي طلب تشوفين هذني الفيديوات وانتي واعدتيه تساعدينه ولوما هو أني ماضيع وقتي أحچي ويه وحده مثلچ ماعدها أي حس بالمسؤليه..
ديم"وانت شنو الي حارگ دمك مادگلي شنو الي سويته لاتطلع گدامي.
فارس"ماريد أفتح المواضيع واعيد الماضي أخذيهن وخليني أروح لو عاجبتچ الوگفه ويايه أذا عاجبتچ گليلي لاتستحين نروح ع مگان أحلى حديقه شيء..
فأر دمي واني أسمعه يگول هيچ"أنت صدگ ماتستحي ع نفسك شنو شايفني..
فارس"لعد أخذيهن لن واعدته أنطيچ ياهن..
أستغفرت ربي شگله لزگه فتحت البلوتوث وخليته يرسلي ياهن....دا أنتظرهن يصلن وبالگوه متحمله..
تذگرت الدرجات الي گال عليهن رائد..
ديم"ورقتي وين مالت امتحان الكيمياء.
شفت فتح چيب سترته وانطاني ياها باوعت ع درجتي ماخذه 67بالكيمياء من ميه گعدت أشوف ع شنو منقصني حاطلي ع سؤال الواجب الي محد عرف يحله وتعارگت مع فارس بذاك اليوم ع حله 5من 20ومنقصني ع أهواية أمور..بس ماله حق يحطلي دكتور هيچ المفروض حتى لو نص درجه..
فارس"دكتور يگول ماگو أي أعتراض لو سامعه گلامي وحاله مثل حلي هل گد گرامتچ غاليه ماتقدرين تتنازلين وتحلين حلي..
ديم"مامحتاچه مساعدة احد اخذ صفر ولا أخذ حلك مامحتاچه أي مساعده وخصوصآ من عندك أفضل الموت ولا مساعدتك.
فارس بنبره غامضه"نشوف الايام تثبت ونصيحه من عندي لچ گوني أمرأه صبور.
.. راح۔۔۔استفزني گلامه وما علقت...اني وباوع علي شفت الفيديو وصلني عباره عن گلامه ويه عبدالعزيز وشلون سخريته من عنده...واگو كم لقطه محسن ويه بنات...بس صورة بنات مو واضحه حيل...گعدت أفگر صح اني ماليه واهس أفوت مطبات ويجوز ماتصدكني قررت أشوف الفيديو هذا لنور....رحت عليها..
نور"وين چنتي گل هل وقت شفتچ واگفه ويه فارس.
ديم"أخذت الورقه من عنده واچيت..
نور"أگيد مبين من شگلچ تگاونتي وياه تعاي...أگعدي وگمليلي....
ديم"شفت محسن واگف ويه عبدالعزيز وانو هدف محسن بس يقهر عبدالعزيز وهم يريد يوگعچ...
باوعت عليها وشفتها تضحك.
نور"أنت متوهمه محسن مستحيل يسؤيها هاي سوالف عبدالعزيز محسن مستحيل أياذيني...
ديم"بس يانور..
نور"عفيه لاتجيبين طاري مامستعده أسمعچ گلام ويصير خلاف بيناتنه أذا گلامچ صح وعندچ اثبات
شوفيني ياه.
أنقهرت صراحه بعد گل هذا وماتثق بيه...
.طلعت الفيديوو وخليتها تشوفه....
شفتها.....بدت دموعها تصب...بس سمعت مقطع
عبدالعزيز"والله يامحسن مادام خشمي يشتم الهوه ماخليك تاذي نور حتى لو ماتسامحني بس مستحيل اخليها تتاذى..
محسن"راح أحرك گلبك هي تثق بيه وماتثق باحد غير لا بديم ولا بيكم...
عبدالعزيز"راح أگون مثل ظلها وماخليك تاذيها والايام بيناتنه..
أنته المقطع...
ردت أشوفها صور گالت ميحتاچ وهي تبچي..
ديم"من گل عقلچ دا تبچين ع محسن والله مايستاهل دمعه من عندچ.
نور"ومنو گالچ أني أبچي ع محسن..
ديم"لعد شبيچ يانور دگليلي..
☆☆☆☆☆☆☆
عند نور
تسئلني ديم شبيه لو تدرين گلمات عبدالعزيز خلت احاسيسي ترجع أبچي لن ماتاثرت بمحسن بگد ماتاثرت بعبدالعزيز أني أعترف بسالفه ماگدر أحچي ويه عبدالعزيز خايفه لا أضعف خايفه لا أصدگه مره أخرى واتندم أعذريني ماگدر اگلچ ياديم حتى ويه نفسي اني مامعترفه بهذا الشيء..
گعدت أمسح دموعي"ماگو شيء لاتخافين.
ديم"تمام ع راحتچ.
بعد مرور بعض الوقت أخذنه محاضره ثاني وبعدها أجه مقرر القسم شايل ورقه ذاعلنه أسماء طلاب انفصلم لن خالفم نظام ألجامعه وقللم الاحترام ومن بين هذوله الطلاب...گان اسم محسن..
صراحه أستغربت شنو الي خله محسن ينفصل ليش قلل احترامه بس بنفس الوقت ارتحت مامستعده أواجهه ويلزك يبدي يدور يبررلي يگفيني عبدالعزيز أبتسمت بسخريه ع ساس گاتل روحه علي ماصدگ ع الله أعرف بامر الرهان ومحاول أبد يوضح أي شيء حاولت طرده من أفگاري.... والترگيز ع المحاظره أستغربت اليوم أول يوم مايداوم وهاي مو من عادته أبد.
☆☆☆☆☆☆☆
بيت أبو ثامر
عند ثامر
گاعد بغرفتي ماگو أي خبر عن رنا ياربي شلون ملاحظت بانها تحبني هل گد گنت معمي..
دگ تلفوني رقم غريب أستغربت ألصراحه چاوبت ظنيتها رنا....
البنيه"السلام عليكم.
ثامر بستغراب"وعليكم السلام.
البنيه"أعرفك مستغرب بس أني مها الي چانت تمشيء ويه هيفاء بالحامعه..
ثامر"حياچ الله اذا تردين هيفاء اني طالع بس اروح اخليها تخابرچ.
مها"لا ماريدها أحس ضميري يانبني واريد أگلك ع موضوع ولازم تعرفه واتمنى مادگول لهيفاء عنه.
ثامر"خير شنو الصاير..
مها"ما صاير شيء الموضوع قديم راح أگلك واتمنى تصدگني واذا تريد أثبات هم أثبتلك هذا الشيء.
ثامر"أحچي اسمعچ.
مها"شوف ياثامر أنته جيتنه طالب نقل من المرحله الثالثه وماتعرف شيء عن حياة هيفاء....هيفاء چانت بنيه ملعبه گل هدفها توگع الشاب بحبها تا يصرف عليها وتخلص فلوسه وبعدين تعوفه أنخطبت قبل خطوبتها الاخيره مرتين ونفصخت وبس انخطبت الثالثه گلنه ترگت گل سوالفها لن شفناها بدت ماتهتم لاي شيء بس من أول ماجيت ع القسم حطت عينها عليگ تراهنت گدامنه أنو توگعك وتخليگ تتزوجها نصحنها گلنالها مايصير وانتي مخطوبه بس ما اهتمت تره گل الاشاعات هي بدت طلعها تا تنفصخ خطوبتها وماتخلي احد من البنات تقترب من عندك بس اقتربت من عندك وساعدتها گانت تنشر اشاعات وبس أبتعدت عنها تخبلت خافت لاتخسر راقبت الطريق الي تفوت من عنده بنهاية الدؤام سبوع گامل عرفت طريق فوتگ ورسمت خطتها أنتظرتك تطلع ودزت سها تروح تجيب خطيبها وتلعب بعقله أنو انتو بعلاقه فاتت من يمگ وسوت روحها مريضه وشگلها تعبان تره گله تمثيل هي گانت تلاعب بالمگياچ وبوگتها أچه خطيبها وتعارگ وياگ وبس رحت گالت لخطيبها أنو هي ماتحبه وتحبك وخدعت خطيبه بگلام مو هوه وأنفصخت خطوبتها..
گاعد أسمع الي دا تحچي مها والصدمه لاعبه دور عندي معقوله أگو بنيه بهل حقاره حاولت أتماسك أعصابي قدر المستطاع ماريد أنفجر بوجها..
ثامر"گملي.
مها"بعد مانفصخت خطوبتها غابت شگم يوم وطلبت من عدنه انطلع الاشاعه ونسمعك الحچي تا تحس بالذنب وتحمل المسؤليه ونجحت خطبتها وافقت عليگ وچانت فرحانه وبس سمعت أنگ لبنت خالتگ صار هدفها أنو تخليگ تبتعد عن رنا وهذا ثاني تحدي للها حاولت بگل الطرق حتى بعد ماخلصنه جامعه سوت روحها ع اساس تريد تنتحر رادتك تعوف رنا وماگدرت هيفاء حاقده وگلبها أسود عمرها ماتحب احد ماتحب غير نفسها تزوجتك وچانت تنحشك ع رنا وتريدك تطلقها لن چانت تغار من عدها حتى قبل لاتشوفها لنگ چنت مخلص للها وماتفگر باي بنيه
وصدگ بس طلگ رنا راح تروح هيفاء وتعوفگ لن هذا هدفها من البدايه
ومو بس هاي دزت محاضر مدرسة رنا وطلبت من عنده يتقرب من رنا تا يشوه سمعت رنا گدامك وانت تطلقها بس شگل خطتها مانجحت والمحاضر يصير ابن خالها لذلگ ردت أگلك ديربالگ ع رنا ولاتضيعها من أيدك ولاتصدك هيفاء باي شيء توني أحس ضميري ارتاح مع سلامه وعذرآ للازعاچ.
ثامر بنبره غاضبه"ليش ماگلتيلي قبل فتره أله هسه.
مها"ضميري أنبني وماردتك تخسر رنا لن رنا خوش بنيه أهتم بيها زين..
ثامر"تمام...
.گطعت تلفون وفار دمي تمنيت أروح أبتلي بهيفاء واشبعها ضرب ثامر الي ماوگعته اي بنيه قبل تچي هيفاء دور تلعب ع لحيتي والله أذا ما فضحها
گدام اهلها فلايگون أسمي ثامر لازم أستعمل عقلي وماتهور واخذ الدليل وبين ما اتگد أگثر تا ماتبقه عدها حچه ويايه اما هسه راح انتظر الوقت المناسب
باوعت ع صورة عرسي أني ورنا سامحيني ظلمتچ اهوايه بس والله راح أحاول أصحح گل اغلاطي وبعدين أطلب السماح من عندچ غلاتي..
☆☆☆☆☆☆☆☆
م
حافظة البصره
عند ريم
بالمستشفى
حسيت روحي بالگوه امشيء تا أوصل المگتب
دگيت باب المگتب وسلمت ووقعت وايدي رجفت حسيته يباوع علي بس أگتب ماصدگت ع الله اطلع بره المگتب حسيت الاوگسجين خلص...
اني وگاعده ويه سها بالمگتب.
سها"گليلي ياريم أگو شيء تردين تحچينه وياي شو احسچ تردين دگليلي ع شيء ومتردده.
ريم"گعدت أحچيلها ع خطوبة دكتور معتز لي..
سها"ياريم والله حرام عليچ تضيعينه تره د.معتز مايتعوض.
ريم"بس أنتي تعرفيني.
.سها"لاتخافين من شيء مو گل الناس مثل زوج خالتچ ومثل اخوچ تره مو گل أصابع اليد سوه اني أشگ انو انتي عندچ مشاعر تجاه معتز لذلگ حاولي لاتضيعينه تره ماگو واحد يخطب البنيه مرتين غير اله ليحبها وثقي اذا ترفضينه هل مره أعتبري روحچ خسرتيه للابد والقرار الاول والاخير ألچ.
ريم"الله كريم
گعدت أفگر بگلام سها وتخيلت معتز يروح لغير وحده ماعرف ليش رجع وجع صدري بس فگرت هيچ اخذت قراري وقررت أروحله للمگتب.....يتبع الى اللقاء في البارت القادم أن شاء الله.
لاتنسو
التصويت⭐
والتعليق الحلو🌹
في الختام
(أستودعكم الله الذي لاتضيع وداعه)