سيدرا- جنت اتضايق من كلامهم وضحكه ومن يشوفني اباوعلهم متضايقه يعدل من وضعيته ويغير الموجه ايام كضت واني ويا اذا فوك احلى من العسل وي زين واذا جوه روحي تلوب واني اباوع علاقته باخته بس ماجيب سيره خليت ببالي. خلي ياخذ راحته حتى يبين شنو بينهم من اسرار ولو هو اذا سويتله هوسه مراح استفاد وراح اطلع متدخله بينه وبين اخته
والده زين بقت تلح عليه وتتوسل انه تجي تشوفه دائما وهويرفض صياح وعياط وياها كلما اتصلت
شبيك حرام عليك تحرمها
انتي مالج دخل
ضياء حرام الله يحاسبك بعدين
خلي يحاسبني عود اكوله شون شمرته وراحت
خطيه ضروفها صعبه واخوتها زوجوها
شعليه منها بابا شعليه ويطبها مرض ابني تاقلم وي كون انتي امه. اجي اخبله صاح بعلو صوته وكعد وره مكان متمدد على قنفه الهول
زين خلي تجي تشوفه بس تلعب وياه ساعه زمان وتروح
سيدرا سدي حلكج
كيفك بس حرام ومتتصور زين شون حبها من جتي وسولفت وياه ولعبت
استغفر الللللله
يابه يجوز اني على غفله ومتت اقلها عده امه ماخذ عليها ماين عليها. يعرفها
شيموتج هاي شبيج شهالتخربط
ضياء بس اسمع يعني انت لو بمكان زين وكبرت واهلك فاتحوك بهالسالفه شحيكون رد فعلك مراح تكون. مقهور انهم معرفوك عليها ليش تخليها صاحبه حق عليك بعدين يكرهك
سكت وجر حسره عافني وطلع وقفل الباب لليل يله رجع جنت محضره النركيله مال اوس طلبت من ندى تصعدها. من تجيني علمتني شون اعمرها وحضرتها الي لان دوم تسوي لابوها. وحضرت وياها كرزات وكاستر وجلي ومحضره نفسي ندى كامت كل متصعد اسشورلها شعرها وتسشورلي شكد اتونس وياها -- حضرت نفسي لبست. بنطرون وبدي انتبهت على روحي سمنانه ناحيه الورك. مدري البنطرون. هيج يبين. حضرت حتى عصير ونيمت زين. وطلعت خففت الاضاءه. وعلكت شموع وزعتهم عالهول وشغلت الفلم. طول للوحده ومااجه خفت لا ديشرب لزمت التلفون دكيت عليه راسن رد بنتره
هاا
هلو ضياء اانت وين
جوه بيت اهلي شتردين
ها لاهيج ضل بالي تاخرت
هسه حصعد فد ساعه زين نام
اي من زمان. ااموطالع فلم حلو ومحضره حبشكلات وياه
من كلت هيج بنبره هدوء هدا من حده كلامه. تنهد كال بهدوء
ديله جيت
غمضت عيني براحه شوي وصعد شافها ضلمه بس ضوه الشموع كال
لا بربج كوه مانع روحي لتسويلي واهس وجو
هههههه. لالا تعال اكعد. جمرت الجمره مثل معلمتني ندى وخليتها بالنركيله كعد بقه صافن عالطاوله مبتسم باوع للفلم وباوعلي ابتسم فر بايده
هسه شكوو حجيتها مبتسمه
خدمه سبع نجوم. والتخدمك حوريه
بقيت صافنه عليه باوعلي ابتسم بقه يتامل ملامح جسمي ويرجع شعره ليوره ذب تيشرت تراكسوده والبجامه وكعد مرتجي ومدد رجله يباوعلي
منو علمج. عالتعمير بابا
ههه ندى
عاشت اديها جيبي جيبي
طيتهيا سحب وسوه اممم
هاه
خفيفه النوب ضابطيها
هههه
تعاي تعاي خل نتفرج. بنطرونج الجديد هذا
اي ههه
غير يملخ عليج
هه دنكت خجلانه
كله شسوار ومكياج ليلي. وكرزات وحب شمس وترايفل وعصير. وتكولي اترك. بس ناقص ذاك الرحال اجيبه واحطه يحتفل بالنص
هااا هسه شكو تتذكره
لا سكتنا علي علي. البلازما بروز ويلز هذا جديد الفلم
اي ادري
خبره بالافلام خو حضرتج
حجاها وجر نفس نزل تك رجل وصعد راسه ليفوك ذب الدخان ابتسمت صافنه عليه ابتسم لزم راسه
شنو
شنو قضيتج
شكو شبيه شلت شعري النزل وعدلت البدي
عوفي شكو معدلته
كرشي يطلع ههه
خلي يطلع. خلي اووف
كعدت كباله كال
تعاي كعدي يم رجلي اتفرج عليج وعالفلم داشوف الله شخالق
ههههه كعدت باوعتله ميل راسه كال
شنو البيج متغير
شنو
شو كل يوم تحلوين اكثر.
خجلت ودنكت راسي كال وخله ايده على كصته
عيونج حيييل بريئه وبياضها صااافي والقاضيه مفاركه. كلش
ابتسمت هو ويحجي بقيت مدنكه تقرب نصه على كتفي باسني من كتفي برقه وصار اكشن بالفلم نطيت
عززه ماات كتلو
خرب حضج فززتيني اني وين رحت وهي حايره بالفلم كومي كومي
كمت اضحك كعدت كباله واخذت كرزات اتفرج كال
هسه مفهمت هذا ليش كتلو
مو هذا ابنه الوياه وثنينهم ضباط يعني بالشرطه وهذا مهرب مخدرات روسي
ها يعني جذب مو مجبور.
لا يابه الهوسه كلها بيده باوع شون حيعرفون
بقينا نتابع. بروس ويلز اكو لقطات يضحك بيها--- لحد مكمل الفلم النركيله خلصت والترايفل ونص الكررزات. نصاه كله من موسيقى نهايه الفلم
كال
وهسه احنا بده فلمنا
ههه لملمت الهوسه وهو يشيل ويايه كال
حتى متكولين عاف الهوسه
لا ماكول كملت تقرب مني حضني كال
باجر يمكن نروح لبستان عمه لسلمان صاحبي عزمنا كم مره واني مغلس
بقيت اباوعله
يعني متتغده يمي
لا مااتصور يمكن اخذ زين ويايه
ومنو وياكم
رفل وامل وبيت بهاء
بقيت اباوعله يعني حبقه وحدي بالبيت كلت بداخلي. بس شنو من خنكه حسيت بيها دار وجهه عني حس بيه. طب للحمام واني كعدت صافنه على روحي.
شنو اني هنا. جاريه. خادمه فعلا مربيه لزين ومنفذه لرغباته. وخدامه اله طلع. واجه يمي
حتبقين بالبنطرون عرفنا بي جديد. كومي نزعي لبسي شي خفيف
مباوعتله كمت من مكاني طبيت للحمام لبست دشداشه نوم بس مستره غسلت اسناني وكعدت بالحمام افكر صافنه على روحي. اريد اعرف اني هنا شنو يعني اذا صار عدي طفل راح ابقى هيج حاسبني خدامه وحيصير ابني ابن الخدامه. ليش هيج اني كرهت ذاتي تاخرت واني بالحمام بين فكره وفكره اندكت الباب
سيدرا شنو السالفه
ها
دتسوين رب الحلو
فتحت الباب ميل راسه عاكد حاجبه شافني لاايدي مبلله وراسن فكيت الباب مبينه كاعده وراها. كال
شجنتي تسوين
كاعده
اكو واحد يكعد بالحمام
هيج
شنو هيج شبيج مخبله
يمكن باوعتله بعتب كال
ديله تعاي دننام نعست ساعه 2
اوك كلتها بصوت ناصي تقدمت نمت عالجربايه افتر ونام بصفي بقه يتحارش ويريدني اتفاعل واني انضربت ببلوكه. بعد
شبيج شو انكلبت خلقتج نتر
مابيه شي جريت نفس كلشي ماكو
صدك حاجتني امي. على مود ام زين. هاهي خل تجي بالاسبوع مره بس كون اني مموجود ماريد اشوف جهرتها.
اوك كلت بلا موبالاه
سيدرا شبيييج
شبيه شكو كلتها ببرود غمضت عيني
علمود حعوفج باجر
سكتت ماريد اجاوب لعبت روحي
تقرب مني واني صرت. صخره كرهت نفسي ابتعد عني قبل ليرتاح اصلا. كال بنتره
من طاح حظ هالنومه. شبيج بومتي
مجاوبت ابتعد وفتت للحمام طلعت شفته يدخن. باوعلي رافع تك حاجب صاير نار نشفت شعري وجيت نمت بعد متقرب مني كعدت الصبح على بوسات زيون ابتسمت وكمت ريكته وشغلت كارتون كعد يتفرج حضرت الريوك لابو وبعدني مخنوكه مال قبل يوم. طلع من الغرفه يفرك براسه باوع لزين كال
ها بابا كعدت
باوعلي ودار وجهه
حضرتي ريوك
امم
افتر واجه كعد يفرك بوجهه خليت الاكل كدامه رفع راسه باوعلي مباوعتله. كال بنتره
مكلوبه الجهره ياستار ياربي
مجاوبت اجه زين يمي شلته
ها حبيبي شبيك. ضل ياشر على مكان عمليته يحكه. شلت التيشرت حكيته برهاوه ايدي ونزلته رجع عالقنفه يتفرج كعدت اتريك كال
تعلمي من تكعدين كبالي تاكلين لتكلبين خلقتج
ضحكت بتصنع. صار
وشدعوه هلكد ضايجه خاف علمود الببستان بقيت منصيه اكل مرديت
مو ويااااج صرخ بنتره
رفعت راسي بهدوء
شبيك
وشباجه. بت ال--
لتغلط كلتها بهدوء ونصيت راسي
لج انتي ششايفه روحج. خاف سويتلج قيمه وشفتي روحج. فد نوب
مرديت. الحكران يكطع المصران والسكوت احسن جواب اشتعل صار نار كام يصيح ويعيط بقيت اباوعله ببرود وزين اجه ركض يمي خاف
كلت بصوت ناصي
علكيفك الولد فز
اخلاق سز
ابتسمت مااعرف ليش ابتسمت لو انكلبت الدنيا
شنو تصتصغرينييييي جرني من شعري زين بجه خايف من صياحه
على كيفك ضياء اخخ شعري دووخر الولد اخترع
والله العضيم متنطين عين كومي لج كومييي خلك خدامه شايفه روحها على شنو يابه
مرديت بس نار صارت شلت زين اخذته لغرفته هديته وطيته التاب يلعب بي وطلعت شفته لازم موبايله
دك من طبيت رد
ها يوم اي. اي. رفل جتي. اي زين هو فد ساعتين لا متجي. اهوووووو. بطلت ماروح.
يووم داكول لا محد يتدخل
والوش متجين انتي شلج غرض
اني ادير بالي على زين
اهووو الولد تواعدت وياه عيب دينتضرون
هاهي ملازم بطلو بطلوو اني صوجي
سد التلفون وشمره عالقنفه كمت اكلب بالتلفزيون عرفت الحجيه شكالتله. عرفت بيها حقانيه وطلبت منه لو اجي اني لوهي متجي خليته عالمسلسل دااتفرج. صاح
نصيييي
اوك شبيك تدلل. جاوبت ببرود مصطنع بقه يهز برجله تراكسودي جان كصير شورت وتيشرت بس كلش حلو اصفر وشايله شعري عالي ساحبته كبه وبس خاطه الكحل طالعه جنني يابانيه ولابسه الجنجل مال ندى. قبل يوم لبسته برجلي كالت
عليج احلى رجلج مربربه
كمت سويت كهوه لان عرفته صاير نار وارتاحيت من تفركشت الطلعه خليت الجدر عالنار احضر الغده مقلوبه وسويت الكهوه صبيتله وقدمت باوعلي مياخذ الكهوه مني كصني من فوك ليجوه باوع عالجنجل داس على رجلي برجله قوي كال
منيلج هذا
آي. مال ندى اذيتني تره
ادري هو آني اريد ااذيج
مرديت جر نفس واخذ الكهوه مني رجعت كعدت كدامه خليت رجل على رجل بقه يباوعلي ويشرب كهوته سويت روحي مداشوفه كال
تعاي هنا كعدي اشر عالقنفه مالته
كمت من مكاني كعدت بصفه وعيني عالبلازما كال
ارتاحت نفسيتج من انلغت الطلعه
ابتسمت
وعيوني عالمسلسل
داحاجيج
باوعتله -- نعم كلتها ببرود
تستفزين حضرتج حتموتين عالطلعه
لا على شنو قابل حموت اذا مطلعت اصلا اني من راح ابويه بعد ابد مطلعت مو شي جديد بس عبالي تبقى لان صارلك سبوع منازل هاي كل الموضوع
اباوع وجهه تغير من الحديه. للابتسامه ارتاحت ملامحه. ابتسم مد ايده على شعري تلمسه بهدوء ويباوع ملامحي
تشتاقيلي من اروح
هزيت راسي بالموافقه.
شتذكرين مني
يعني من نسولف من نتفرج سوه. ومن تلعب زينو
ممم ومن نبقى وحدنا بالغرفه
امم كلشي اتذكر
بس البارحه. انكلبت خلقتج
كتلك ضجت
همم وهسه بعدج ضايجه
لا مو مراح تروح
هز راسه ويلعب بشعري جر راسي باسني مكدرت اتبادل وياه ابتعد باوع بعيني
متكدرين تمثلين انج مرتاحه مو خوش ممثله كومي خل اتمدد
كمت بقيت صافنه شو كلش مرتاح لان مبادلته كعدت عالقنفه الكدامه تمدد اتفرج كمت اغفي اجه زين شافنه مجطلين حك شعره. راح جاب البطانيه ويمشي ويرد. ناني ناني
غطه ابوه اني كمت عالمطبخ اباوع ضياء ابتسم ضم الضحكه باوعت لزين يغطي رجل ابوه بالبطانيه مالته يطلع صدره وبطنه يغطي بطنه تطلع رجله داخ
بطانيته صغيره ضياء خربان ضحك عليه بس ضامها ومغمض عساس نايم شوي. وجاب بطانيه لخ سواها تلزيك ويردد
بابا بارده ناني
راح زين بغرفته يلعب باوعت لضياء كام خربان ضحك
شبيك ههه شكوو
خربني ضحك يغطي منا يطلع منا هو الناني مالته شبر ونص خرب يومك زين
ضحكت لضحكته دك تلفونه كال
اهوو
الو هاسلمان. يابه ذوله كلسا بحجايه شسويلهم لك والله معليه زين صار
لك -----
وفشر عليه كومه درت وجهي كملت تحضير الغده وعفته يتهده شفته كمل تلفونه وكام جر التيشرت
ها وين
حنزل اشوف امي سلمان سواها زعله
مجاوبت
نزل واني طفيت الاكل شوي وصعد جر نفس وذبه بملل باوعلي تخوصر كال
كومي بدلي
شنو
امشي امي امرت تجين بعد قفلت وذاك كلب خلقته كومي فضيها خل اخلص
بقيت اباوعله يعني مجبور يطلعني. جاوبت ببرود
ماريد اطلع اني تعبانه
هااا صاح كومي فضيها هسه على اساس مكلبت خلقتها علمود الطلعه عبالك اني زوج
لا ابد اني ماافرض روحي على احد قابل راح اموت اذا مطلعت
اي اي زين ديله كومي من ساعه السوده القبلت بيها اطلع
روح دااكولك مااجي
امييي متقبل تجي اذا متجين فضيها الولد دينتضررر
ليش دتصيح. وكفت شبيك داكولك مااجي محملني منيه وتكعد انت واختك تتبشبش
ها. هذا الكارصج علاقتي باختي.
لا ليش مكروصه بس هي ذوق ماعدها. عبالك اني طرشه مدااسمع حجيكم بالنسوان
لج انتي شبيييج شنو بكدج اني تحاسبيني ومنو. طاج الحققققق خلك زعطوطه لسانها شطولها ومتحترم بابا دير بالج على روحج لتنسين نفسج زين لتنسيها فكري وشوفي وين جنتي ووين صرتي
باوع ضياء مو معناه بالمركز كلتها بهدوء . والشارع الكل تضربلك تحيه واحترام ويخافون منك يعني بالبيت هم هيج. اني مرتك يعني نصفك الثاني يعني نقاش ونتيجه وحل
صايره تحجين. اي اي كملي
اي والله شبيك اني صح مااطلع من البيت بس اقره هواي اباوع برامج تثقيفيه ودينيه يعني مو متخلفه
اي وبعدين كملي بله كملي
باوعلي بسخريه وجر جكاره
ليش هيج شو من تريدني يمك تصير هاديء وحنون
انتي شنو التردي
مارايده شي والله. هاهي بس ماريد اروح لان ماراح اتونس ادري بروحي
ديله ميهم امشي
دفعني
هاي شبيك مارروح
لتعلين حسج افركه لحلكج
ماريد اروح
خرب ---
سديت اذني وغمضت صحت لتغلط على اهلي
يعني فلا تنجرعين. عنادج فاق حده تحيرين اكبر واحد مخنوكه. من باب ومن باب ماريد اطلع شترررريدين
باوعت بعينه اجه زين يركض على الصباح لزمني وحضن رجلي باوعله ضياء وباوعلي كال بصوت ناصي
روحي بدلي لخاطر زين. يتونس وياج
باوعت لزين جريت حسره تلمست خده تبسم
نروح باي حبيبي
جاوبني يضحك اي اي
اوك طبيت البس طب ورايه ضياء كلب بهدومه كلبها صاح
تيشرتي الكحلي وين
هيانه معلك حضرتلك هدومك
البرموده الكابوي
هنا
ديله فضيها بقيت اباوعله نزعت تيشرت بجامتها بهدوء. بقت بالملابس الداخلي. التفتت عليه بهدوء غطت جسمها بيدها اول مره. تسويها. يمكن نست اول مره اشوفها بالضوه كالت
عفيه لتباوع
مرديت جرت هدومها ولبستها راسن تباوع بارتباك وكفت كدام المرايه
كللشي لتخلين
لا داالبس حجابي. لبست واجه زين يركض لبسته مثل ابو يكمز ويصيح بيباي. باوعلي مره اخيره ضياءبس صاير اعصاب صاحت امل
يله ضاوي كملنا
اكولك المقلوبه اخذها
اي اخذيها. شلتها كال
ذبيها اني انزلها لزمي زين
اوك. نزلت اني وزين باوعتلي امل باوعت لهدى كالت
شنو حتجي عود نصت صوتها مجاوبتها نزل ضياء كالت
هاي شنو متكفي السياره
كولي لامج
بقيت صافنه انداريت عليه باوعتله. بعتب مخلي النضاره على كصته وكالب الخلقه
انزلي فضيها نتر
مشيتها ماريد اكسر حجايته بس يجي وكتك طلعت الحجيه فدوه لكلبها بس شافتني ضحكت رحت عليها بستها وزين يكمز وي انو افتهم حنروح سوه بهاء اخذ جهاله ومرته بالسياره وهدى وياهم جلبت باوعتلي ندى ابتسمت جتي يمي
شفتيها لهدى
اي شبيها شلعت كاشي على سيارتهم
حتموت عليه هه وهو لابسها. ميت مره بسمرها. بينلها انه يحب وحده وهي ماكو ولايمها
طنش تعش تنتعش
ههه اي اكولج تعاي منين طلعت شمسه خالو ونزل الاميره ديانا
والله لو ما امي الحجيه
بركاتج بيبي والله جنت شايله هم ويامن حسولف
هاي خالتج شكت حلكي
اسكتي وخليها توها رزلتني ردت اركع الترمز براسها
هههه صاح ضياء
يللللله صعدو فضوني اني صوجي ا
سيدرا- صعدت الحجيه ليكدام وامل واوس ليوره باوعلي ضياء رافع تك حاجب يشوفني حكعد بجضنه لو لا والله يا الله الحجيه صاحت
صعدي يمه
امل نطت
متكفي السياره صعدي بالبدي بما انه متعلمه عالبدي هههه
بقيت اباوعلها نار صرت جاوبت بنتره هو اني وين صاعدته للبدي
كالت
هو انتي بمنطقتج الجتي كاعده بيها النسوان كلها تصعد بالبيكم وي الخرفان هههههه
بقيت اباوع باوعت لضياء صاح
وتالي هسه شوون
يابه لو يهدوني عليكم لا امرعدكم تمرعد صعدت ندى صدك قفلت. السياره زين جلب يريد يمي يكعد باوعت لضياء غير يتحرك صاح بعلو صوته
مو كتلج يا امييي متكفي
اي لعد انزل وروحو. وحدكم شكو لحيت عليه. جاوبت امي الحجيه بقيت واكفه ندى نزلت فشلانه. اوس كال
نزلي امل ناخذ تكسي واتواصل وي ضي. صعدي سيدرا معليج
اصعد انت هي هسه تاخذ تكسي
الحجيه كالت
خوش حجي اخذ سيدرا ونروح تكسي بقيت واكفه ضياء صار نار
تكسييييش عيني ياتكسي هذا. باوع لاوس كال
اوس يابه اخذ امل وروحو تكسي ومن نرجع وي سلمان
ماشي يله فضيها انزلي تره هسه ابطل مو كتلج مااجي
نزلت بعصبيه كالت
هي شعدها جايه والله وصارت تطب وتطلع حاسبه روحها حالها حالنا
اختنكت خنكه اخت الجذب كلسا اريد اصعد فوك بس اكول لا وامشي التريده الحيه. صعدت بس لشتي ترجف زيوني بحضني وندى بصفي صرت وره ضياء اباوع عالشباك وايدي ترجف دااعدل شالي باوعتله شفته ديباوعلي عاكد حاجبه جريت عيني بغرور كارهته كره الدم طلعنا نص ساعه ووصلنا سلمان جان واكف بالباب مال بستان فتح الباب يبتسم بيت بهاء وصلو قبلنا بشوي كمنا ننزل الغراض جتي امل ورانا لازمه زين بيدي واتفرج اني هواي رايحه بساتين الحسينيه هواي بيها بس مو مثل ترتيب هذا. امل صاحت ومشت من يمي
نزلي الغراض هييي باوعتلها اوس اشرلي يبتسم
معليج منها معليج
ابتسمتله التفتت ضياء دينزل الغراض باوعلي عكد حاجبه لان تبسمت لاوس والله وعساك بالقير
كعدت يم امه وبقت تسولف ويايه وتضحك.
شركبتي مكموعه ريحه الاكل نزلت ليجوه
سويت مقلوبه
هااا داكول معليج من ضاوي. هو من حبه الج ميريد احد غيره يباوع هالحسن
هزيت راسي موافقه رفعته شفته ديباوع متوتر زين ديكمز يلعب بالساكيه وي انو اجه عليه سلمان شاله يبوس بي باوعلي كال
شونج ام زين
الحمد لله الله يخليك هبه شونها
زينه هسه ساعه وتجي
خوش ابتسمت درت وجهي باوعت لامل كلسا مبسمره تحجي وي رفل ورفل تهدي بيها
لج كافي وهي ابد مستحت
كلسا وكايله
شنو حاسبها مرته يعني هي خلك خدامه
واني موتتها كمت بس ابتسم وي ندى اللي احمد انسطر بيها لان لابسه. احمر ولايك وي خدودها كلسا. فايت من يمها ويردد الاحمر حرك كلبي شكد سخيف يا الله
كامت ندى جرتني كالت خل نتمشى كمت وياها اشرلي ضياء بعينه اكعدي سويت روحي مشفته اذا مااخذت حقي منك مو سيدرا هي هاي اخر طلعه بقيت اتمشى اجه زين ويايه جايب كرك نايلون ويريد يحرث
تعال زين كمت اكلب بالتراب واغني وياه لازمه ايده واكلب اعلمه
يا عشكنا فرحه الطير اليرد لعشوشه عصاري ويا عشكنا من سواكيط العنب ونحوشه عصاري. اغني بهدوء وزين شبه حافظ الاغنيه لان من ينام اغنيها اله تعلم يكلب وحده وجاب انو يعلمها جان يتصرف بلهفه مثل الخاف تفوته دقيقه ونسه وممستغلها واني اراقبه طايره بي ندى بصفي. كالت بصوت ناصي
شش جتي الحكومه
هاه رفعت راسي ضياء اجه يمنا ندى واكفه بقه ساكت وايده بجيب البرموده يهز برجله متوتر راحت ندى انهزمت بقينا وحدنا كال
تعاي شوي هنا تمشينا وزين كدامي يلعب بقيت اراقبه بفرح كال
لتثخنين اللبن وي اوس
شنو ليش شسويت
داكولج اني دااحذذر باوعت بعينه بضيق. كال
شنو لازم معاجبج
كتلك مااجي
دسدي حلكج هسه
انت ليش كلسا بمزاج
اي مو مخبل
باوعت لزين ديطشر على روحه التراب
لاااا ماما لاااع نفضت ايده طب بعينه تراب نفختها بهددوء قرفص ضياء كدامه
شو ببا باوعني
جاوبه زين راحت. شاله على كتفه يلعبه وزين يصيح يضحك اجه بهاء اخذ انو واوس شايل بته مشيت وره ضياء اندار كال
رجعي يم امي نفرهم ونرجع اوك داارجع شفت اوس هم رجع وبيده بنته كال
هي هاي شكول تفرفر بالاشجار
شبيها ليش
تعورت بالغصن يمشي بموازاتي ويحجي كال
معليج من امل لتقهرج هي هاي طبيعتها تحبه لضياء لدرجه تغار عليه من الكل ودتشوفه وياج تغير مو مثل وي ام زين قبلج بقه على حاله وميبقه بالبيت
هزيت راسي مبتسمه اله
شكرا الك
على شنو يابه مثل اخوج اني وانتي ذهب صافي سيدرا
شكرا اوس التفت شفت ضياء يباوعلي من بعيد عاكد حاجبه مخوصر تك ايد تعداني اوس وذبها لبنته يم امها وصلت يم الحجيه وبقينا اني وندى نسولف احمد يكطع فاكهه ويجيبها يكول اكلو وهاي تنصي خجلانه انصب الاكل والمره التجيهم لافه جدر دولمه والله ولا طيب كلها هجمت عالمقلوبه هبه جتي وره الغده تعبانه جانت مريضه مسويه عمليه مال مراره خطيه كعدت يمي سولفت شوي وكعدت يم رفل بعد مكامت الضاهر علاقتهم قويه من قبل تكابلو وضلو يسولفون ويشكون من رياجيلهم. عطور وبهاء ضاعو بين البساتين جنهم عشاك وضياء وسلمان كدامنا يلعبون طاولي تذكرت من جنت العب وي علي بالطاولي العايفي فوك الكنتور بالغرفه الماجريها جنت دائما اخسر لحد متعلمت وضبطته كمت اغلبه داباوع لضياء سلمان صاحح
هااااه نعيما
ضحكت ضياء فرك وجهه كال
ادري شنو هالجنص العدك ابن ال--- خليني ساكت عوائل صايره
اني كتلك جيب ليفه وياك انت مسمعت كلام
كمت اضحك صافنه على ضياء اندار عليه يضحك شافني اضحك ضحك ودار وجهه باوعلي سلمان كال
شفتي ام زين سبحته لرجلج بعد شتردين سبوع ميحتاج يغسل بربر من الغسل
ضحكت اكثر صاح ضياء دلعب العب ابو الوصخ.
خلصو لعب وضياء خسر كام يقسم وي سلمان. اجه زين يركض لابو شاله على كتفه مكيف بي اجتي امل يمه
ضاوي حبيبي تعال نطك سيلفي باوعتلها ودرت وجهي طك وياها كم صوره بعدين كلها
اني وزين طكيلنا
طكتله وباوعوعالفون كالت
استغفر الله ربي. مترهم تطكون صوره سوه
ليش يابه.دروحي لج شايفه بتج جنها وحش
ههه
بقيت اباوعلهم باوعلي ضياء دار وجهه للمغرب كامو يشيلون بالغراض دنرجع للبيت رجعنا نفس مااجينا بنفس الطريقه اخذو تكسي بيت امل صعدت فوك جنت متونسه على عكس متصورت واول مطبيت ذبيت زين بجربايته نام من التعب
طلعت فتت للحمام اسبح عركت سبحت وبدلت وطلعت ضياء صاربوجهي اشرلي باصابعه بله صوت تعاي
ادري هالحركه يتحركها من صاير نار
تقدمت والخاولي ملفوف بشعري كال
بهدوء تام ووجهه عصبي
انتي شنو صنفج بله متكوليلي
شنو يعني
متعرفين يعني ها خل افهمج يعني من امل تجي عليه تكولي عفيه كول لسيدرا خانم لتثكل وي رجلي تره كللي هاي غير خفيفه مرت اخوج
صحت
كذابه خل تاكل تبن اشرررف منه بعدني ممكمله وركعني راشدي بحيث من القوه حسيت دخت واختل التوازن غير عن كل مره ضربه كلش قويه حلكي انترس دم
نصيت رفعت راسي كال.
اي لعد شعبالج اذا اريد ااذيج اعرف شون اضربج. وااذيج الجنت اسوي وياج من نتمالخ هاي ونسه. تره دا العب. وخاف نطيتج مجال لا من هسه اعرفج حدودج اني ببعيني شفتج تضحكين وياه وتسولفين واني محذرج توني
بقيت رافعه راسي اباوعله بشموخ
نتر نزلي عينج لا افكسها ششايفه روحج. شنو بت منو
مرديت
كال
طيعيني امشي وياج عدل متطيعين لا والله اشوفج نجوم الضهر شايفتهن
جاوبت
اي شايفتهن من زمان
كال
سدددي حلكج لتردين صايرتلي مررره تره اني السويتلج. قدر جنتي خلك
وسكت
بلعت ريك
كملها. عادي استقبل. خلك خدامه
اي لعد شنو كذب. نتر
لا مو كذب وانت الجيت سويتني زوجه. صح لو لا انت السويتني زوجه لو شنو اني موزوجه هسه
شتشوفين انتي بيش مقصر وياج ولج جنتي متلبسين غير بالات وملابس خواتي ساتره عليج هسه كله ماركات ومعاجبج طلعت عينج اشو
بلعت ريك احس روحي انسحلت بقيت اباوع بعينه نضرات عيونه تختلف عن نضرات قبل ايام من كان بحضني صاح متحجييييين
اني شنو بالنسبه الك
بقه يباوعلي معاجبه
احجي
خدامه ووجاريه ومربيه لابنك
امم يعني مدتشوفين روحج مرتي شتردين بعد
ششوف ضياء هاك باوع شلت ايدي حلقه مثل النسوان ملابسه
باوع لايدي هز راسه ابتسم باستهزاء كال
والله كالتلي لتنطيها عين ذوله مينطون مصدكت
الكالتلك هيج كون الله يحركها ويذلها اكثر من ذلتيي بجاه الحببيب محمد صحت بعلو صوتي ضربني نفر خشمي دم. ركضت للحمام اغسل صيح
انتي التخلين الواحد يعدم احترامه وياج انتي صوجج تجاوزتي
اغسل بوجهي والدم ميوكف وكلبي مقبووووووض اريد اصيح مااكدر سمعت ركعه الباب وطلع من البيت شوي وكطع النزف غسلت وتمددت يم زين سمعته اجه قفلت الباب مال غرفه. لل1 بليل اجه فكها شافها مقفوله راح باجر دوامه ويغيب سبوع ارتاح منه كرهته حيلل والليل كله من كل عقلي ادعي على امل بحركه الادبسز تطلع حجي عليه الله موجود----
يتبع....