#الفصل_الاول_البارت_الاول
#رواية_أوكــســـجـــيـــن
#بقلم_فـجـر_الـمسـاري
#رواية_حقيقية
#قصص_نور_قلبي_
لم يكن الذنب ذنبي… لكن طرقنا كانت مختلفه…
أتذكر أول الأيّام لمّا ،، تلاقينا ، وكيف جرى الكلامُ ؟
أتذكرُ ساعةً فيها ابتدأنا ،، هوانا وابتدا معنا الغرامُ ؟
أتذكرُ كم رسمنا من خيالٍ ،، وأحلامٍ ، وكم ضحك الظلامُ ؟
وكم نطقت ضمائِرُنا بشيءٍ ،، يغلّفُهُ حياءٌ وابتسامُ ؟
سلاماً يا حبيبي لستُ أنسى ،، فنسيان الهوى عندي حرامُ… .
------;;---------;;-----;;-------------------
رجعت بذاكرتي قبل 20 سنة...
اتذكر ذاك اليوم... .وكانه البارحة...
رجعت من المدرسة للبيت... وجنت بصف الثاني
متوسط
دخلت للبيت جنت جوعانه...
فتت للبيت واشوفه مكلوب كلاب لاغراض هوسه
وبكل مكان… وماما مخبوصة... وتصيح
كتلها ماما شصاير… باوعتلي
صاحت .. ..صعدي فوك
خفت منها صعدت لغرفتي… دخلت وذبيت جنطتي
ع السرير وفتحت الكنتور وطلعت تراك
لونه سمائي فاتج لبسته… وكعدت
خفت انزل ..
سمعت صوت ماما صاحت صابرين
كمزت من مكاني…
بالبيت الامر والناهي هي ماما…
وكلشي بنظام وترتيب…
هاا ماما صحتيني
اي تعالي ساعديني نحضر الغده
بديت اساعد ماما بالاكل…
كملنه واجه بابا تقريبا ساعه 2 ونص من لدوام
وتغدينه…
وكال خلال هاليومين لازم ننتقل…
بابا وين…
كال بابا نقلوا شغلي لمحافظه الانبار
وماكدر اخليكم هنا اخذكم ويايه…
بابا ومدرستي كلي راح انقلج انتي واخوتج ..
كلش ضجت…
لان راح اترك مدرستي وصديقاتي ..
بقينه النهار كله نحضر الاغراض والاثاث الي
مانحتاجهه ..اكو عدنه بالبيت مخزن جبير
ماما خلت بي الاغراض الي مناخذهم وقفلت عليهم…
جانت عدنه مريه جبيره بالعمر اسمها ام تمارا
تجي كل اسبوع تنظف وترووح
عدهه 3 بنات يتامه وزوجهه متوفي وهي المعيل
الهم…
وماما جانت تنطيهه اسبوعيه…
بس الطبخ… ماما متقبل الا هي تطبخ بايدهه
كلش جانت حريصه على نظافة الاكل…
بيومهه اجتي وامي حجتلها احنه راح نسافر لغير
محافظه…
وانقهرت عليهه… بس ماما كالت الها راح احجي
ويه صديقتي بالدوام ام اسامة …
حتى تشتغلين يمهه…
خطيه كلش فرحت وبيومهه دعت لماما وبابا
وراحت…
يمكن البعض مراح يصدقها بس هاي قصتي…
راح نبدي قصتي من جنت بصف ثاني متوسط ..
-اسمي صابرين عمري 14سنة طالبة صف ثاني متوسط…
شكلي بشرتي حنطيه وعيوني ملونه وشعري اشقر
وناعمه وجسمي رشيق…
جنت حلوه وشاطره بالمدرسة
حالتنه الماديه كلش زينه…
اني البنت الوحيده لاهلي ..
بابا يشتغل مهندس باحدى شركات النفط وماما مهندسة
معماريه حلوه وتهتم بالمظاهر… والحياه الرااقيه
-وعندي 2 اخوان
اكبر مني علي طالب سادس علمي طموح ماما
مجموعه طبيه ويصير دكتور وياسين اصغر منه
طالب رابع اعدادي واني اصغرهم…
اول شي جنه نسكن بمنطقة المنصور من
المناطق الراقيه في بغداد
وانتقلنه للغربيه لمحافظة الانبار ..بسبب شغل بابا ..
واحداث قصتي بفترة التسعينات بزمن صدام
وامي جانت كلش عصبيه وتصيح ع اقل شي
لان راح تعوف عيشتها بالمنصورالراقيه وتنتقل
لمحافظه الانبار الغربية ..
هالشي راح يخليها ترتدي الحجاب وتلتزم بالملابس
وتترك سياقه ولازم تترك هواي شغلات…
بدينه بنقل الاغراض بسياره جبيره اسمها لوري
او تريله…
وطلعنه احنه وصعدنه بسياره بابا وسياره الاثاث
تمشي ليكدام…
طلعنه من لصبح…
وصلنه للظهر…
ضجت كلش… لان تركت مدرستي ومنطقتي
قبلها بيوم رحت لمدرسة ودعت صديقاتي
وراح بابا وياي واخذلي نقل ..
ودعتهم بدموع…
بعدهه بيومين رتبنه امورنه ومن لصبح طلعنه…
صعدت وكعدت واباوع من لجامه ع الناس
وع بغداد يمكن هاي اخر مره اشوفها…
بدت معالم بغداد تختفي وتظهر مساحات واسعه
وبيها بيوت متفرقه حلوه وجبيره
واراضي زراعيه ..
دخلنه لمنطقه وبعدهه فتنه بفرع ومشينه بي وبعد نص ساعه تقريبا…
وكفت سياره بابا… جنت سارحه بافكاري
ماحسيت غير على صوت بابا
- صاح يله بابا نزلوا…
نزلنه كلنه من السيارة ..
- رفعت راسي شفت بيت طابقين جبير حلو
وبي حديقه من كدام…
بس بيتنه الي بغداد جان احلى…
وبدو العمال ينزلون الاثاث ويدخلونه للبيت ..
دخلنه للبيت جبير واسع كله تراب
مبين عليه صار فتره طويله محد ساكن بي…
صاحت ماما صابرين ..
بدلي ملابسج خلي نظف للبيت
كله تراب شلون راح نكعد بي
رحت بدلت لبست تراك … ونزلت
وبدينه نظف من فوك ونزلنه جوه
ظهري نقسم نصين…
تعبت بعمري ممشتغله هيج شغل ..
كملنه وبابا اجه هو واخواني وجان جايب وياه
غده من المطعم كباب ومقبلات وشاورما ..
ولليل واستقرت كعدتنه وكل واحد صارت اله غرفه
جانت اكو مساحه جبيره كدام لبيت وحديقه
وطبيعه لمنطقه امان وكان سياج لبيوت ناصي
يعني ناس تكدر تشوف ناس…
بس طبيعه ناس بهاي لمنطقه لشرف والاخلاق
كلمن محترم نفسه محد اله شغله بغيره…
بعد ان استقرينه كلمن راح لدوامه…
اول يوم بابا يوصلني…
للمدرسة…
جنت متسقربه المكان والناس ماعرف احد…
دخلت لصف ودخلت لمعلمه عرفتني ع طالبات
ورحبت بيه ..بيج قصص فجر المساري
.
.
.
خجلت رحت كعدت بمكاني…
وخلص دوامي… شلون ارجع وبابا وماما
بالدوام واخوتي مدرستهم بعيده عن مدرستي
بدت لطالبات يطلعون…
واني محتاره بعدني جديده ع المنطقه شلون
ارجع للبيت اخاف اضيع…
شفت بنيه تقربت مني وكالت…
انتي لطالبه الجديده… هزيت راسي بمعنى ..اي
كالت انتووو لجيران الجدد…
اي مدت ايدهه وسلمت عليه ..وكالت نور الهدى اسمي…
اسمي صابرين … ابتسمت وكالت حلو اسمج
صاحت عليها بنيه نور الهدى ..اتاخرنا
التفتت عليه وكالت جايه ..
باوعت عليه وكالت تعالي امشي ويانه
بصراحه كيفت عبالك جنت واكعه بير وانتقذتني
مشيت وياهه ..
لبنيه ثانيه باوعت عليه من نظرتها كانما تكول
هاي منوو
نور الهدى… جيرانه الجدد… .
سلمت عليه وكالت عذراء اسمي…
شسمج كتلها صابرين…
مشينه وطول لطريق ونور الهدى تصنف ع عذراء
وصلت عذراء لبيتهم…
وكملنه طريق اني ونور الهدى ..
جانت بنفس شارع بينه كم بيت…
وصلت وكملت طريقي للبيت… وحدي
وللعصر طلعت بالحديقة…
وجان الجوو بدايه الربيع…
والجوو كلش حلووو ..طلعت بالحديقة
وكعدت بالمرجوحه وبيدي كتاب الاحياء اقرا
وجنت اقرا بالحديقه جبيره مسافه يله باب لشارع
سمعت صوت رفعت راسي…
شفت بيت جيرانه الي مقابيلنه
جان سياج ناصي… كلشي بيين وامان
والناس بطيبتها…
ومحد يباوع ع احد…
شفت باب المطبخ مفتوح لمحت مره جبيره بالعمر
صاحتلي… استغربت
ومشيت عليها سلمت عليهه ..شلونج خاله
ردت هله يابعد خاله…
انتي شلونج… الحمد لله
انتووو جيرانه الجدد…
اييي خاله…
منين انتووو خاله…
صابرين من بغداد ..بس لان شغل بابا وماما
اضطرينه نجي نسكن هنا…
هااا ياعيني…
هلا بيكم… دخلت جانت بصفهه وحده تخبز
شالت صفطه خبز حاررر.. .
هاااج يمه…
خبز حاررر هسه طلعته من تنور الطين…
بالعافيه عليكم…
-شنو هالزحمه خاله
لا ماكووو زحمه يمه…
اخذته وتشكرت منهه…
وكالت سلميلي على امج وكوليلها باجر غداكم
علينه … شكرا خاله
دخلت للبيت ..واني بيدي صفطت الخبز
لله ريحته تخبل…
فتت للمطبخ ماما جانت واكفه على الطباخ
تسوى عشه ..…
صحت ماما… كالت شبيج ..
شافتني وكالت هذا شنوو
كتلها ماما هذا خبز تنور
اي داشوف مو عميه…
منين…
ماما هاي من جيرانه حجيه جبيره بالعمر
صاحتني وكالتلي هاج هذا الخبز وباجر غداكم يمنه
اني كلت هيج…
وهي كامت تصيح وتعيط عليه وترزل بيه
ولج حقيره…
شلون تحجين ويه الجيران…
وجان تلزمني من شعري وجرتني قوي
صحت .. ااااخ ماما
والله اني معليه جنت كاعده بالحديقه على المرجوحه اقرا… وهي صاحتني… معليه
ودموعي تنزل…
حقيره امشي فوتي جوه صايره تحجين
ويه الجيران… اذا شفتج مره ثانيه الا اكسر
راسج…
بعد ان نكتلت كتله غسل ولبس من ماما…
صعدت لغرفتي واني ابجي… ليش بس اني
ترزلني ..ليش تضربني ليش بس اني من دون
اخوتي هيج تعاملني…
جانت معاملة ماما الي دائما تحسسني انو اني
ولا كانما بنتهه وتحب اخواني اكثر مني…
واني تعاملني معاملة جافة وقاسية ..
مرات جنت اتمنى اذا ضجت من شي اتمنى
اروح لحضنها وارمي روحي بحضانها…
واشكيلها… واحس بحنانها…
بطبيعة مجتمعنة بعض العوائل العراقية
اكوو عوائل تفضل الولد على البنيه…
.
.
.
ان لبنيه راح تزوج ..اما الولد هو الي راح
يكون سند ابوه وامه…
وجنت اسمع هالشي من صديقاتي بالمدرسة
تصير تفرقه…
مهتميت بس جنت انقهر من معاملة ماما لقاسية
والجامده…
وصياحها بسبب وبدون سبب…
بس بابا جان كلش يحبني وجان دائما ميقبل
على ماما اذا صيحت عليه…
يكوللهه عوفيهه شتريدين منهه…
على كيفج ويه لبنيه… تسكت
شويه وترجع حليمة لعادتهه القديمة…
حسيت الحامي الي من ماما…
اما اخواني علاقتي وياهم عادية…
وعلي جان مشغول بالدراسة حتى بالعطل
ماما تدخله للمعهد دروس تقوية ..
بس ياسين… سوالف وضحك وشقه اني وياه
وجان دائما يجرني من شعري ويضوجني
لان يعرف بيه ماحب واحد يلمس شعري
جنت كلش اهتم بي…
جان حلووو وطويل واشقر…
جنت دائما اتمنى تكون عندي اخت احجي وياهه
جنت معظم وكتي اكعد بالغرفه ..وحدي…
صعدت لغرفتي واني ابجي الى ان نمت
محسيت على نفسي…
وثاني يوم صادفت جمعة……
كعدت لصبح ونزلت شفت ماما كاعده هستوهه
طلعت من غرفتها…
تعالي صابرين…
رحت عليها… حظري ريوك لابوج واخوتج
ومن تحضرين لريوك…
صعدي وحظري ملابسهم…
حتى يرحون لصلاه الجمعة…
وراهه نظفي غرفهم فتحي الشبابيك
وغيري الجراجف…
ولمي الملابس وخليهم بالغسالة…
حسيت نفسي سندريلا… .وهي زوجه بابا بلحظتهه… .
صابرين… صار ماما ..
فتت للمطبخ واخذت لقوري غسلته على السنك وخليت بي مي
وجاي وخليته على الطباخ ..
وفتحت لثلاجة وطلعت اجبان وسويت بيض قلي
واجه ياسين بايده علاكه الصمون…
حضرت الريوك… وخليت السكر بالاستكاين
بين مخدر الجاي…
اجه بابا واخوتي وصبيتلهم…
اتريكو وطلعوا…
بعدهه لميت الاكل وغسلت لمواعين ونظفت المطبخ
ومسحته…
وصعدت نظفت غرفه علي وياسين ونزلت
وخليت الملابس وغسلتهم بالغسالة وشريتهم
بالحديقة… الورا…
كملت ورحت على ماما جانت كاعده بالهول
ماما كملت شغلي راح افوت للحمام اغسل
قبل الغدة…
صعدت لغرفتي اخذت ملابسي فتت للحمام
لبست بجامة سوده وبدي احمر…
مشطت…
وضفرت شعري ونزلت…
بالاثناء… دخل بابا واخواني اجوي من لجامع
سلمت عليهم… ردو السلام
صاحت ماما…
صابرين يولي انتي متاكده الحجيه كالتلج
الغده يمنه… خااف سامعه غلط…
والله ماما هي هيج كلتلي…
جنت احجي وجان اسمع صوت الجرس يدك…
كمزت كتلهم اجه الغده…وجان يضحكون عليه
وكلولي روحي روحي فتحي الباب…
وكان لباب يندك حيل… عبالك واحد متعارك
وهاجمين عليه…
طلعت اركض واصيح… اي اي اجيت
شبيكم كسرتو الباب…
فتحت الباب واتفاجات 😲😲😲منوو انت…
------;;;;--------;;;;;------;;;;;;------;🌺🌺🌺
يتبع…
ادمن قصص نور قلبي