نجمه والخلخال

ج 29

مساء الورد

ج 29

واخذت الوقه جانت عيوني تاكل الاحرف
اريد اقرا

هدية اني ما اتحمل كل الي صار بحياتي
عفت كل شي.. وطلعت..
وذولي جهالي تريدين بقيهم يمج او كتبتلج عنوان اهلهم شمريهم عليهم..

اريد اسيطر ع نفسي واقرا الكلام عدل ماكدر
عطت بعمتي انتي وين جنتي لعد..شلون تخليها تطلع
عمتي بخوف..
طبيت سبحت والله وكتلها هديه خدري جاي بين ما اسبح
عفت كل شي وصعدت فوك ع غرفتي

فتحت كنتوري من دون الايام كلها اني مقافله الكنتور
من هوستي وخبصتي طلعت..
بسرعه

فتحته اني خاله الذهب مال امي بمخدتها القديمه
اقلب اتلمست المخدة مابيهةخرخشتها
حسيت الذهب موجود
اكو علبه اذب بيها ذهبب من اسبح او ابدل بي
فتحتها لكيتهتا فاىغه
نزلت بسرعه
ع الكاونتر مال مطبخ اخلي فلوسي بي

اكو قوري فرفوري
اذب بي

جريته.. شفته فارغ عمتي من شافت هيج
ركضت ع غرفتها
الظاهر عدها كم فلس
اني كعدت بالكاع وجهال هدية يتباجون يم الباب الخارجيه بالطرمه
طبت عليه عمتي وضربت ع وجهها ولج انبهت نجمه

بقيت اباوع عليها..
حسيت نفسي راح انهار او انهاريت تماما
كمت اصيح اختي هالمرة باكتني بالعلن
سوتها مرة ثانيه بيه..

عمتي/اعصابج نجمة فدوة المهم صحتج

كمت ع حيلي..
كتلها امشي طلعي برة البيت

اخذي الجهال وطلعي برة اني بعد ما اتحمل ما اتحمل
ابد

اخذي جهال هديه وطلعي برررررة
ممجبورة اتحملكم بعد شنو يربطني بيج وبالجهال

اخذيهم وطلعي..

لا تكوليلي فدوة راح عمري وياكم اطلعو

عمتي بسرعه

جرت جهاال هديه
كالت يمه نجمة ذولي جهال اختج اني وين احير بيهم.. وشنو ذنبهم

جنت منهارة
الي وجعني اكثر هو دكه اختي مو الجهال
احس طاقه هم ماعندي اتحمل الكل
ع حساب نفسي صعب اعيش واني اربع
جهال
صح اخواني كبرو ودخلو مدارس بس بعدهم يردون احد فوك راسهم
اما جهال هديه صغار
اني شلون اتصرف وياهم يعني اكضي عمري كله
اربي واكبر
اني وين..

من هذا كله اني وين.

بسرعه طلعت وتوجهت للاسواق الي ببها هذا الولد جاسم

دخلت شفته كاعد.ورة الميز . ويباوع تليفزيون..

جان اكو كدامي حلويات وعلوجه
شلت منها وشمرته عليه كتله اختي وين

فز ونفض نفسة

ب استغراب يا اختج.. انتي منو؟؟؟

كتله هسة تسأل اني منو داكولك اختي هديه وين

بنفس النضرةهديه منو

غمضت عيوني بعصبيه وفتحتها هديه او هديل متعرفنها..

بقى يباوع عليخ وكام

كال اختي اختج ماعرفها اصلا

كتله شنو متعرفها وهي تعرفك وتسولف وياك

بعد كلام طويل
جاسم /والله ماعرفها وماعندي اي علاقه بيها كل مافي الامر عرفت جهالها ايتام وجنت انطيها حلويات
واكثر من مرة اشوفها تصعد ويا واحد ابو سيار بي ام نيلي.. ومرة من المرات نصحتها بأن تخلي عينها ع جهالها بس..

غير شي ماعرف وعندي شهود ع هذا كلامي

اذا متصدكين واسالي عنه احنا شنو..

من بعد ما سمعت هالكلام رجعت مكسورة نفسها هاي اختي الي دمرت حياتنا بالاول و هسة رجعت دمرت الباقي منها... ماعرف هي باكت ابويه لو مرمر

اريد اعرف شي كل انسان يستحق الحياه
الي يعيشها اني سويت وهذا استحقاقي

اريد اعرف شنو ذنبي من هذا كله

رجعت دخلت للبيت شفت عمتي مبدله ودتاخذ الجهال

طبيت كعدت

كتلها وين رايحه واني وياج وذولي نفس الحال

ابقي.. عمة الغلط مو من هديه الغلط مني دخلتهت لهذا البيت والغلط الاكبر من هذا كله

عشت ورضيت ومرت هاي سنيني كلها بضعف

هسة اطلكت شسوي

عمتي/ماعرف شكولج بس غير الله يساعدج ع ما بلاج كلنا غلط والدنيا ضدج نجمه

ماعرف شكول الج والله ابني حقير والاحقر منه احنت رضينا بهذا كله
وسكتنا..
بس اني صح مريضه بس بعدني بحيلي اكدر اطلع وهل جهال خليهم يمي

وارجع اسوي طرشي واعيش اني راضيه ع حكم ربي الي
اما انتي شوفي حياتج
صدكي ابد ما الومج بيوم عسا ما ضربيني اخذناج وردة مفتحه ومحصلتي منه غير
الظلم

انتي حرة نفسج نجمة..

كتلها اكعدي  عمة وين ترحين
اكعدي هي بقت بس عليج
ومنا لباجر الله كريم خلي اشوف اهلهم...

الجهال يبجون يردون امهم وعمتي حايرة ببهم

احس بضغط مو طبيعي ع حياتي..
وشي يدك براسي من الصبح لليل..

بنفس اليوم اجانه غزوان بليل جان شارب
طبك سيارته بابنا وضرب الباب..

وبقاها مفتوحه بحيث ع الطبه مال باب طلعنا..
نزل يترنح من السيارة..

اول مرة اشوفه هيج..

اني وامه واكفين بلباب.. نزل وعاف ىباب سيارته مفتوحه وباوع علينا هاي شنو شجابكم هنا

واندار ع سيارته ضحك هاي ياطرن هيج طابك سيارتي
.....
وكام ياشر بايدة والله اليوم اكسرة
وضرب ع راسه هاي منو داعمها للسيارة

عمتي طلعت جرته...

باوع عليها يمه شلونج يمه وحضنها..
ويباوع عليه ويرجع يحضنها جانت دنيا لليل
و
من بعيد شفت واحد ديمشي كتلها عمه عالم برة..

بسرعه جرته دخلته للبيت..
اني بقيت واكفه باب السيارة مفتوح..
والاضويه
انتظرت الولد يصير قريب علينه

باوع عليه ودنج مشى
كتله ياولد..
مشى
عليت صوتي ياااولد عفيه

اندار اني..
كتله اي عفيه تعرف تطبك السيارة عدل..

كال اي ادللي..

عاد دخل السيارة بالكراج ووانطاني السويج..
تشكرت منه وراح قفلت الباب وطبيت جوة..

شفت عمتي بالهول وغزوان..
نايم..
اندارت عليه..

كالت  شسوي اله فهميني شسوي..

حجاله حجايتين ونام مثل الميت..

عفتها وصعدت فوك جنت متاكدة مو بسهوله راح اخلص من غزوان

......

ثاني يوم..نزلت دزيت الجهال للمدرسه وشفت جهال هديه نايمين وغزوان بعدة نايم بس واكع بالكاع
اكلت لكمه بسرعه و  اخذت الورقه واتوجهت..
للعنوان الي كاتبته هديه بالورقه...
من الشارع اخذت تكسي..

وصعدت وياه..
جان رجل جبير بالعمر وشعرة كلة شيب الطريق كله
يسولفلي عن الوضع التعبان واحتمال يدخل حرب جديدة...
وهل الحرب تخوف مراح يبقون احد يضربونا كيمياوي كلنا.. اني جنت بس اهز براسي

علما وصلنا اني راسي صار طبل...
وكف
كال هاي المنطقه الي ردتيها بس ماكدر ادخل جوة لان الشوارع ضيقه
من كثر الكلام ما ركزت ع شي.. بالطريق

فتحت عيوني شهل مكان التعبان والكاع محفرة
والبيوت اكثرها بيبانها تنك
يعني مبينه منطقه فقيرة

كتله عفيه متاكد هذا المكان نفسه
كال بنتي والله ع نفس الي كلتي..
باوعت منا منا كتله عفيه تكدر تنتظرني ماتاخر
وشكد متريد من عيوني

السايق/ادللي بنتي واذا تحبين انزل وياج

نجمة /والله ياريت

وكف سيارته.. ونزلنه اكو برأس للفرع محل مال دوشمه مال سيارت

وكفت جان اكو رجال ديشتغل بسيارة
وبنطرونه نازل.. وديشتغل ولايمه
خجلت يالله شلون

عاد السايق صااح السلام عليكم

الرجال اندار علينا ورفع هدومه..
وعليكم السلام ورحمة الله وبركاته

كول

كتله بيت ابو عدي هنا..

بقى صافن عليه ياعدي..

ارتبكت بالبدايه كتلع عدي ابو سجاد

هنا جانو ساكنين..

صفن كال هاااا عرفتهم ذولي الي يبيعون بالفايز

دباعي ادخلي هاي الدربونه كلها ومن تخلص روحي ع اليمنى اسالي عن سليمة الدلاله كلها تعرفها

انداريت ع السايق وخايفه اتقدم اكثر
تقرب مني الرجال...

كال بنتي شنو جايه تاخذين فلوس..

كتله لا والله عمو بس عندي شغله مهمه..

كال امشي انروح..

مشى ومشيت وراه جان يعرج برجله ندار عليه

ضحك كال دشوفيني شلون اعرج مو

كال هاي وسام حرب..

جنت جندي بالحرب الايرانيه وهاي الي طلعت منها رحل مبتورة..

بصراحه.. عقلي من كد ما قرا قصص اتخيل
الموقف كلة شلون جان يقاتل و انبترت رجلة وشكل الدم وغيرها..

اخذت نفس..
وابتسمت اله كتله.. الحمدلله ع كل حال

فات من يمنا جاهل السايق وكفه

كله وين بيت سليمه الدلالة اشر النا

طلعنا متعدين البيت.

رجغنا

يم باب بيضة مزنجرة.
ومبينه مشلوعه وخاليها بس هيكل  من النرمادات كلها واكعه

دكينا الباب..

ورجع سالني بنتي شكلج ابد مو مال هيج مناطق..

شكلج..؟

هاي الكلمه خلتني الزم وجهي واتحسس ملامحي الي نسيتها؟

اني حلوة لو لا؟

يمكن شكلي عادي كلش
ويمكن لا حلوة

بس اذكر جنت حلوة بهذا العمر ١٣ ١٤
بحيث من اطلع كلها تتغزل بجمالي

هسة شصفيت اني عجوز..

وعيت ع نفسي والرجال يحجي..

شفت بوجهي مرة سمينه ولابسه دشداشه كودري
مشجرة... ولافه ربطتها

نعم عيني اتفضلو

ارتبكت اكثر كتلها مرحبا خالة

انتي.. وسكتت يالله انتي شنو..

المراة /شنو عيني شيردون هالايام غراض مداجيب

اكو فلوس بس اخذ عليهم نص القيمه واريد بطاقه السكن والتمونيه الاصلي

قاطعتها لا خاله تعرفين هدية

صفنت عليه.. وهيج بدات تغمض بتك عين

يا هديه تقصدين هديل مرت ابني

كتلها اي هي...

كالت شبيها خير يارب..

جاوبتها تعرفين وينها..

اندارت غالب غالب بصوت عالي
ولزمت السايق من هدومه ولك غااايب وتعيط

الرجال يدفع بيها

وهي تكول منو انتو والله ما اهدكم اذا مترجعولي فلوس الي باكتها هديل..

بقيت اكولها خاله عوفي
من بعيد طلع رجال وشايل توثية
من خوفي ركضت والرجال ورايه ركض

بس شنو سوينه الدرب شبرين
وطلعنه بسرعه

من خوفنا تيهنا السيارة

بحيث السايق رجع عليها شغلها وعافني وراح
جنت اركض وهاي المحلات والعالم تباوع عليه

لحد ما عبرت مسافه وحيلي انهد كوة اجر النفس

وكفت..

اكو واحد من المحلات مطلع حب مال مي زين كدرت اشرب شويه مي واغسل وجهي
والعالم تباوع عليه
وراها وعيت ع نفسي من الخوف والركض حتى الجنطه الي بايدي ماكو

اجرت تكسي وكلت اوصل للبيت وانطي الفلوس
بس شنو. صعدت واني ارجف من الخوف
وشلون شكل المراه
هاي عمه هديه وبيبيه الجهال

زين ياربي اذا اكولها هديه ذبت الجهال شتسوي بيه

ماعرف اضحك ماعرف ابجي

رجعت وصلت للبيت

وطلعت فلوس..
للتكسي وطبيت تعبانه بحيث مالي خلك شي
ابد..
ياهو الي يحجي ويايه ماجاوبه بس لعمتي كتلها
انسي سالفه الجهال..

بعدين من ارتاح اشولف الج

داطلع من الممر..
شفت بوجهي غزوان جان ديمشي وينشف راسه بخاولي.

من شافني كال ها نجمة رجعتي.
لا تفكرين بالجهال ابد سهله اما هديه اني اعرف اجيبها الكم.. وغصبا ما عليها انطيني بس اسبوع

عفته وامشب جان واكف ويباوع عليه
انداريت عليه..

غزوان اطلع من البيت وبعد لا ترجع لهنا هالمرة استقبلتك علمود لا تسويلنا فضحية بالمنطقه
مرة الثانيه اجيبلك الشرطه..
وبديت اصعد الدرج

اسمعه يكول مو بكيفج.. اجي وغصبا ماعليج انتي مرتي لحد هسة

وكفت فوك كتله لا والله اخاف مرتك وتزعل ترة اطلكت خلص بعد

غزوان /هذا كلام يفيدج الج تدرين ليش لان طلكت غصبا عليه وهذا شرعا حرام

كمت اضحك كتله شكد حلو تعرف الحلال من الحرام

رووح غزوان.

وعفته ورحت طبين للغرفه وقفلتها

وبديت ابدل هدومي
دانزع القميص وافتح الدكم

اندكت الباب

صحت منو

جاوب اني غزوان افتحي بس اححي وياج والله

كملت فتح الدكم..

كتله..
رووح غزوان ماكو كلام بينا.. ينكال..

غزوان /بس اسمعيني اني ممرتاح بدونج والله وكرهت حتى روحي..

ارجعو اليه للبيت.. ارجعي انتي وامي اني متندم والله وحتى هذا زواجي غلطه

نجمه اني يمكن احبج.. من عفتج ماشفت راحه

تقربت من الباب..

كتله روووح وعساك ما اتهنيت بيوم ولا شفت طعم الراحه

انضربت الباب فزيت ورجعت ليورة
غزوان /سهلة نجمه بنت الراعي خليها ابالج دام اني عايش ما تزوجين.. افتهمتي..
واني رايح.. الا اندمج

......

مرت هاي الايام حلوة رغم مرارتها جنت اطلع يوميه
شغل عندي مازن وكف ويايه وخلالي محامي كلش زين
مو بس قضيه الطلاق لا جانت قضيه شلون اشرف ع املاكنا الي هي ورث من اب وام وجد..

يعني نهاري كله مشغول..
وارجع اللتهي شويه بالجهال ومدارس هم

وشويه اسولف وانام
واكعد اكل وابدي اللتهي بالهوسه

هيج مرت هاي الايام..
عرفت من عمتي غزوان كايل الها ع مرمر
انس ماخذ فلوسها ومهزوم.. وتريدة يساعدها
بس غزوان ماسوة شي غير ساعدها بمبلغ
واتفاجئنه بعد مدة.. باعت البيت الي يمنا لان جان باسمها صرف..
باعته واختفت
هدية اختفت.. واني ما ردت احد يدور عليها..
احسن
اما عمتي الي جانت تحاربني هسة ساندتني وتقريبا كل شي عليها
رغم مرضها.. بس جانت تريدني اضحك وانسى كل الايام الي مضت
جهال هديه يكسرون الخاطر لا ام ولا اب ولا احد بس اني
لهذا جنت كلش حنونه وياهم
ورضيت بقسمة رب العالمين الي

هذا قدري ومكتوب..
سبحان الله مثل غيمه سودة ومرت ذيج الايام
من اطلكت وشالت مرمر من يمنا
دخلنا بهدوء داخل نفسنا...

اكو شي جان حلو بس جنت ابعدة عني
ابسطها نظرات مازن الي
واصعبها.. هي.. تنتهي بآخر اليوم مافكرتي

هذا الاهتمام الي يبدي بشلونج شبيج شو ضايحه
ويتهي باكل بايدة لو عصير
هاي التفاصيل الصغيرة الي جنت ماعرفها ولا عشتها

من اغير لبس يكولي كلش لايك الج
او لون حمرة..

هاي خلقت داخلي انسانه جديدة انسانه
تحب كل شي ابدي يومي.. بابتسامه..

رغم منغصات غزوان المستمرة بس جنت ما اهتم ما عندة شي يمي غير امه وهي الي رافضه ترجع اله
جنت
يوميه اطلع
لحد ما اقترح عليه مازن افتح مشروع هم التهي بي وهم   استثمر بي فلوسي

شتو المشروع احتاريت بي
اقترح عليه عدة اقتراحات
صالون
او معهد رشاقه
او معهد خياطه.
روضه اطفال
كل شي سهل نجمة... بس اختاري
حياتج استقرت

المهم شي نسائي واني بي حتى انشغل
واطلع من الجو الي بي اني

وجود مازن المستمر بحياتي ونصائحه  ترك شي حلو
حلو الانسان يرفع بيك ويقويك رغمم العثرات
وخلو يعلمك القوة وانت بداخلك محطم
فرق كبير بين الاثنين
بين الي عشته والي داعيشة هسة

بين انسان جان ينتقدني ع الهوى الي اتنفسه وبين انسان

رغم اخطائي يعلمني

ويسندني..
اووو شكد ظالمه بحق نفسي جنت مالوم احد غير نفسي فقط وابويه الي راضه اكون لا شيئ
والتمس حب محرم و كلام حلو من انسان نذل

من بين ذني كلهن اختاريت روضه للاطفال اهليه

افتح مشروع
ومازن رتب الي كل شي من الادارة الى العلمات والموظفين الي بيها
جان كل شي بيها فرحه

من اختيار المكان الى الغراض..
وترتيبها
ايام حلوة. مرت وانت ساندك انسان وياك بكل شي
بس لو اسال نفسي اني احبه

ماعرف شيكون الجواب
بس من بجي طاري الحب

يجي ابالي وليد.. ودائما جنت اسال عليه من تروح عمتي او من مازن يرجع لشغله او يشوفه
وبكولي هو بخير

ضغط غزوان وجياته المتكررة للبيت وصياحه الفارغ
وجان عندة معارف بحيث ياثر ع شغلي والموافقات

خلاني بين قرارين
اقبل بمازن كزوج
او ارجع اله
والثانيه مستحيل أقبل بيها

اتشاورت مع نفسي ايام ولليالي
رغم اكو جزء مني يحب وليد بس لا بلدنا ولا بحياتنه شفنا وحدة تزوج حماها
جانت صعبه.. حيل
حسيت وليد مثل الروايات القديمه روميو وجوليت قيس و ليلى من تنذكر توجع..
ولازم اعديها وانسى وما اضعف لخاطر الي بركبتي

اتصلت بمازن وجان بدوامه وكتله اني موافقه ع طلبك للزواج..
وكال بس انتظر اجيب اهلي

فديوم جنت كاعدة بلبيت ودزيت ع  حدقجي يرتبلي
الحديقه ويزرعها زرع جديد

جنت اطلع اباوع شغله وارجع

الى ان اجه دك الباب مال مطبخ

فتحتها نعم

جان شايل بايدة علاكة كلها طين

كال ست لكيت هاي العلاكه واني اكلب الثيل
وقربها الي

شكل حديدة مو واضحه

جنت خايفه منها

طلعها ووضحت
كال

هذا سلاح مدفون بالحديقه
وللحكاية بقية
شهرزاد