#على جرف الذكريات
بقلم زهراء أمجد
الحلقه ٢٨
اضغط و نجمه
يوم ثاني گعدت الصبح بـ 10:00 ع صراخ نسوان وبجي گمزت نزلت جوة
يمة شكو شنو هذا العياط
اوووف يمة هذا ابن زهرة جوارينا مات بالزيارة
اتنهدت وگتلها اووف يمة والله خلص گلبنا كل يوم سامعين فلان مات وفلان انكتل وفلان سوة حادث صرنا قلة نسمع صوت زفات واعراس
هاي بعد حكم ربج يمة گومي سويلنا لگمة حتى البس عباتي واروح للفاتحة
اي يمة گمت سويت ريوگ امي تريگت وراحت لجوارينا مرجعت غير وية الغروب سبحت واكلتلها لگمة ونامت من الهوسة راسها يأذيها
بهذه الفترة ماكو كل جديد بعدها اتصل مصطفى گال باجر اني يمكم
گاله سيف هلا بيك
لليل اتصل عمي گال باجر اني وقصي يمكم
سيف گالة عمي هلا بيكم بكل وكت
بس اني گلبي انخمط من هلجمعة هذه
ثاني يوم گعدت الصبح نضفت البيت وگعدت امي ونور سويت ريوگ تريگنا واني وامي بلشنا بالغدة امي سوت دولمة علمود قصي
واني سويت برياني دجاج علمود مصطفى وكثرت البزليا واللوز علمود سيوفي يحبها گملت وصعدت گعدت مرتضى سبحته ونزلته سويتله اكل وانطيته ياكل بـ11:30
انفتحت الباب وصوت سيف يأهل ويسهل باوعت قصي ومصطفى وعمي دخلو للأستقبال واجه سيف
انطيني الماي والحگيني سلمي ع عمي وصيحي نور رحت عدلت شالي ع شعري وصحت نور ودخلنا سلمت ع عمي ونور هم باوسته وگعدت بصفه وع الجهة اليمنى گاعد قصي وسيف گعد بصف نور باوعت اني رحت گعدت ع القنفة الي گاعد عليها مصطفى بس بينا مسافة قصي رفع حاجبة بعدم رضى ابتسمت ونصيت راسي
هذا الأنسان شوكت يفك مني ويشوف حياته ماادري دخلت امي وبيدها مرتضى سلمت وگعدت بصف قصي ومرتضى خبصنا بلغوته نزل من حضن امي
وركض لحضن مصطفى حضنه وگعده ع رجلة شوية وگمت للمطبخ حضرت النواعم اذن صلو وبديت اصب بالغدة وهلمرة عمي گال
كلكم تگعدون ويانه ماكو احد غريب گعدنا كلنا سوة اخذت الماي ورحت اباوع وين اگعد ماكو مكان سيف ومصطفى ومرتضي وامي بصفهم ومنا بصف عمي قصي ونور بين امي وقصي صاحني عمي وسوالي مكان بينه وبين قصي
ارتبكت باوعت لمصطفى جان يحجي وية سيف ابتسملي بمعنى اگعدي يعني شنو صدگ هذا يحجي يعني ميغار من مخليني گاعدة يم ابن عمي
مشيت گعدت وامري لله گعدت ابتسم قصي وقدم گدامي الأكل وهمس عود رجلج هم عنده غيرة؟ !
باوعتله وگتله شنوو
مدري شيحس من مخليج تگعدين يم ابن عمج لو اني بمكانه يم اخوج مااخليج تگعدين مو عاد ابن عمج
اتبلهتت وضليت اباوع عليه
عمي يلله يبة اكلي لاتضلين فاهية من منو مستحية
هاا لا عمو ممستحية گعدت انقش بالأكل ومدنجة واذا رفعت راسي فأرفعه اباوع ع مصطفى والكاه عادي منطلق باالكلام وية نور وسيف وياكل ويوكل مرتضى واني اخر همة صدگ ضجت نزلت راسي اگلب بالأكل ومااحس اله ايد انمدت ع الفخذ مال الدجاج وبدت تفتفت وتذب گدامي
رفعت راسي قصي ابتسم
مفهمتج مستحية لو مقهورة من المگرن الي گاعد گبالج
قصي احترم نفسك لاتغلط عليه واني گاعدة
رفع حاجبة وابتسامة استهزاء ع وجهة وگال
لا يابة انقهرتي لأن غلطت عليه؟ ! دباوعليه هم تحركت بي شعرة من ديباوعلي احجي وياج هسة لو بس خازرني لو خازرج عمي يكسر عيني واگول براسه غيرة
ترة مصطفى ماعنده حركات الخبال هذه مالتك ودنجت اكل وهو غص وگام يگح والكل حجة صحة واسم الله اله اني
بأبتسامة وخنگ
سيف صاح زوزة انطي ماي انطيته گلاص الماي شرب ورجعت اكل شوية وگمت غسلت ورحت لقوري الجاي بعدها اجه مصطفى يغسل خلص وتقدم عليه وبأيدة الخاولي شمرة بوجهي
شلونه حبيبي سحبت الخاولي من وجهي
زين والله وهسة سألت
شبيج شو ضايجة
اي من برودك راح انفجر
شبيج اذا علمود گعدتج يم قصي ترة اني حاسبج گاعدة يم اخوج ماكو داعي اغار عليج
باوعتله وگتله اي عود تسلم ع الثقة الزايدة كرص خشمي بأصابعه
عفووا جيبي الجاي وتعالي عندي موضوع وياج
اي مو البنگلادش مالتك اني ضحك ودخل وقصي طلع من الأستقبال يغسل ويباوعلي من جوة لجوة كمل واجة
راح ينفتح موضوع ورة الغدة زوزة مااريدج تضوجين وتنخبصين كلشي بالهدوء ينحل ولو اني من الأول ممقتنع بكل هلخرط بس خلي اشوف لوين توصل وية ابن خالتج هذا
احس بطني لوتني وجهي انخبطت الوانه گتله قصي شصاير؟
لاتخافين ماكو شي بدة سيف ونور ينقلون بالمواعين واني رحت نقلتها وياهم بعدها غسلت ووديتلهم الجاي ووگفت دااغسل الموعين بقن شوية وصاح عمي زوزة يبة رحت
ها عمي
تعالي يبة رجلج يريد يحجي وياج بحضورنا تعالي هنا يمي رحت گعدت يم عمي وبدة يمهد لمصطفى الموضوع واني من المقدمة گلبي رجف وگلت الله اليستر بعدها مصطفى گال
زوزة انتي جنتي موجودة من تعاركت وية عمامي علمود سالفه لجين
وبصوتي رجفة ع خوف اي موجودة
وجنتي شاهدة اني مراضي ع كل الي صار الله يشهد زهراء اني ماابدلج بكنوز الدنيا كلها بس البشر يمر بضروف تجبرة يتبع طرق واساليب حتى يبعد عن المشاكل
غمضت عيوني وكأن عرفت شيريد يگول كمل عمي بمكانه وگال يبة رجلج جاي ويريد منج تتفهمي وتكونين سنده بهيج وكت صعب عليه هو حاليا واگع بين نارين نار عمامه وامه المريضة ونارج
شنو عمو ترة بديت اخاف من موضوعكم احجولي من الأخير شنو المطلوب
يبة مصطفى لازم يعقد ع لجين ماكو مكان للرفض ابدا
وگفت واباوع لمصطفى بصدمة سحب ايدي عمي وگعدني
يابة اسمعيني قبل كلشي
باوعت لمصطفى ورجعت اباوع لقصي
سيف گاله شهلحجي عمي هذا مو حجي هذا جاي تقنع اختي تقبل بمرة فوگاها وهي بعدها ببداية طريقها للزواج وين لگيتوها علينا
مصطفى :- سيف اترجاك ردتك عون لتصيرلي فرعون
شنو شنو الي غير قرارك موجنت رافض رفض قطعي تتزوجها وتمشي بحجاية عمك
زوزة عمي مخلالي حل هو وعمام لجين گلبو الإمه عليه راحو لكبارية العشيرة ودخلوهم بالموضوع والي زاد الطين بلة امي من گد ما تعبت من مشاكلهم وگعت ونمت بيها مستشفى يوم كامل ومن طلعنا طلبت مني اتزوجها حل للمشاكل
بس اني هذا الحجي ميصرفلي
اترجاج لاتسوين هيج اني مستحيل اگدر انفصل عنج
شوف مصطفى هي كلمة غيرها ماعندي لو اني لو لجين بحياتك اختار
عمي گال مو حل هذا بنيتي
عمي اني هذا الحل الي يناسبني
گام مصطفى من مكانه واني مستحيل اقبل بهيج حل
مصطفى الموضوع مو صعب اختار اني لو هي
انتي اكيد
خلص لعد انسه موضوع ارتباطك بلجين
عاط لجججج باباااا انتي متفهمين لو شنووو
بصوت عالي انت شنو ماعندك احساس هااا شلون تريد مني اوافق تشاركني وحدة بيك
عمي گال يابة ترة مرة ماتاكل مرة
گام سيف وكف وگالة لا عمي اني هذا الحجي ميصرفلي مصطفى اذا ياخذ اختي ميثني فوگاها اختي مناقصها شي حتى يجي يتزوج عليها
باوعلي مصطفى بعصبية ورجع باوع لسيف
شوفي انطيج مهلة اسبوع ترجعيلي جواب
ماعندي غير الي گلته اني او هي بحياتك تقبل اوك متقبل طلگني
عاط بية طلااااك مااطلك انسسسي وشيلي من بالج سالفة الطلاگ
وانت انسه اوافقلك تزوج وحدة ثانية واني ع ذمتك ولا مو اي وحدة لجين الحثالة الي ماكو اقذر منها
عاط زهرااء لزمي لسانج مااسمحلج
اني گالي هيج لو احس الدنيا ضلمت بعيني يعني حضرته بكل گوات عين واگف يدافعلها سكتت وضليت بس صافنه بوجهة وسكتو الباقي
وصلت بيك مرحلة تدافعلها من اني احجي عليها وخايف عليها لهذه الدرجة الأمور وصلت بيكم
مو اادافعلها بس هم مااسمحلج تهينين المرة الي بيوم من الأيام كانت راح تصير مرت اخوية
نزلت دموعي وگتله نهاية نقاشي وياك وهاي گدام الكل احجيهة مصطفى مال اقبل لجين تصير مرتك واني ع ذمتك نجوم السما اقربلك واقربلها بيوم الي تقرر و تختار منو هي الي عاجبك تبقيها بحياتك تعال وگول شنو قرارك عفته وطلعت
سيف :- مصطفى تحلم اخليها ع ذمتك لو فكرت بيوم تتزوج لجين او غيرها فكر عدل ولاتخليني اندم انطيتك اختي
عفتهم وصعدت للغرفة ونور وراية گعدت ع جربايتي وگعدت نور بصفي حضنتها وگمت ابجي
عفية زوزة حبابة لاتبجين والله ميستاهل دمعه من عينج اصلا اني ولا اقتنعت بي من اول منخطبتو لليوم بس شسوي هاي قسمتج بعد
بوسط البجي ليش هيج بس اريد افهم اني ياهو الي اتعلق بي واحبه يتركني وسط الطريق ويروح
لاتهتمين حبيبي الي يبيعني ابيعه الي ميريدج انسي ولاتفكرين بي
الي يسمع كلامج يگول اني عندي دگمة بگلبي ودماغي بس اضغطها انسى كلشي بسرعه وارجع اكمل عادي ولاكأن صاير شي نور صح تمت الخطبة بعدم رضاي نور بس بعدين وبمرور الأيام تعلقت بي وحبيته تعرفين شنو يعني الواحد يتعلق بشخص ويحبه وفجأة هيج بكل سهولة يتركة بوسط الطريق
ضليت ابجي ونمت واني الدمعه بعيني حسيت بالعشرة بليل جهاازي يدگ والغرفة ضلمة باوعت نور مو بمكانها ورقم عمو يدگ عليه فتحت خط وگلت الوو طلع قصي
شلونج زوزه
بخير قصي خير صاير شي متصل بهذا الوقت
لا بس الوالد راد يطمن عنج ودگيتله مبين عليج نايمة
اي كنت نايمة
يلله لعد كملي نومتج باي
باي سديته ورجعت حطيت راسي ع المخدة بصعوبة گدرت ارجع نومتي گعدت الصبح يمكن ساعه جانت 11:30 گمت غسلت ونزلت لگيت امي گاعدة ويمها صديقتها سلمت وگتلها يمة البارحة مرتضى انطيتي دواه
اي يمة انطيته صعدت فوگ رجعت لفراشي مالي نفس كلشي اسوي فتحت جهازي رقم قصي دازلي مسج ساعه 11:00بعدج گاعدة لو رجعتي نمتي ومكالمة ع الماسنجر حور فتحت الواتباد وگعدت اقرة قصة اتهرب من افكاري احسن منزلت اله گعد مرتضى يلله غسلتله
ونزلت سويتله اكل واني حتى الماي مااشتهي اشربة مرت 3 ايام ومصطفى ماكو منه لا اتصال ولا مسج ولا اي شي بس حور تخابرني تبجي وتتوسل مااقهر نفسي ودائما تكولي محد يستاهل دمعه من عينج من اسألها ع مصطفى
تگول مااحجي وياه زعلانه لأن مضوجج ومزعلج بيوم الرابع خابرني
شلونج
موزينه والسبب انت
انتي مصعبتها الله يخليج افهميني مااريد اخسرج
لعد عوف لجين گام يغلط ويسب بلجين وعمامها وحتى عمامه سبهم گتله عوفها عليك الله وبجيت
مااگدر لج بابا الكل ضدي ولزكولي هي اللزكة ع ابو انت حجيت بيها بالديوان
مصطفى تخسرني صدگني اذا اختاريت لجين
يعني متغيرين رجئييج
لااا
هذا هو انتضريني الخميس اني يمكم
يعني شنو
اجي وتعرفين وضليت انتضر يومين لما اجة الخميس اني اعصابي تلفت وصل تقريبا بـ 12 ووياه عمي وقصي ومحمد وواحد جبير بالعمر مااعرفة وسيف فتحلهم الباب ودخلو للاستقبال شوية وصاح سيف ع امي حجة وياها واجتني
البسي صايتج وتعالي احجي وياج گلبي انعصر واحس بلگوة سحبت النفس صعدت لبست الصاية ونزلت ونور وامي واكفات يمي دقايق وطلع سيف عيونه نار گالي تعالى زهراء احجي وياج
اريد رجلية تمشي وتروحلة ماكو متعيني حتى امشي باوعلي مااعرف شلون وگعت دمعتي وسيف تخبل ضل يلعن ويغلط ع مصطفى تقدم سحبني بهدوء للأستقبال دخلت حتى مسلمت گد ما الخوف متملكني وگفت بين سيف وولد عمي وعمي واكف بصدر الأستقبال
بين مصطفى والحجي وبين قصي ومحمد واني وسيف بدو يحجون وياي واني نص كلامهم مفتهمته بس عيني بعين مصطفى الي مبين عليه حيل تعبان ضعفان ووجهة صاير اصفر وجوة عيونه سواد كلشي مااسمع شيحجون احس اصواتهم بعيدة بس وعيت ع مصطفى من گال زهراء انتي طالك فتحت عيوني بصدمة عليه جسمي رجف وعيوني غوشت من الدمع
اقسى المواقف!!
علاقة سنين تنتهي بلحظة !!
گتله بصوت يرجف ش ش شنو مصطفى شگلت
غمض عيونه وگال انتي طالك طالك بعدها عافني وطلع هو والحجي الي هو جان السيد نفسه الي عقدلنا ضليت صافنه ع مكانه الي كان واگف بي وگف گدامي سيف ولزم وجهي بين ايده
وداعت كل دمعه نزلت من عينج هو الخسران والله.
ماادري شأسوي بس مختنگة ومااريد دموعي تنزل گدامهم مااريد اشوف الشماته بعيون قصي اي قصي قصي الي اكيد هو اول واحد فرح بكل الي صار
اندرت اريد اطلع قبل لا تخوني دموعي وابجي بس وقفني صوت عمي
زهراء بنيتي لاتنقهرين انتي الف واحد يتمناج وخسران الي ميحطج ببيته
ومحمد گال زوزه لاتهتمين والله يتندم بعدين اندرت عليهم ورسمت ابتسامة كلها وجع ع وجهي وگتلهم لا عادي ممهتمة اصلا اني ردت هذا الشي
وعفتهم وطلعت بسرعه ركضت لفوگ ودخلت للغرفة گعدت بالگاع وجسمي كله يرجف واتنفس كل قوتي وبعدها انفجرت بالبجي صرت ابجي حيل وصوتي عالي شوية واندگت الباب مسحت دموعي وبصوت يرجف گلت تفضل انفتحت الباب ودخل سيف اجة گعد يمي حطيت راسي ع جتفه
امي وين
جوة
عمي راح
هسة طلع هو والولد
سيف اروحلك فدوة ماريد كلشي بس اريد عمتي عليا
باوعلي وگال من عيوني گام طلع ودخلت امي حضنتها وضليت ابجي وهي هم محجت كلشي وياي بجيت لما گلت بس دگ جهازي باوعت قصي فتحت خط
الوو زوزه تسمعيني
گتله واني ابجي اي اسمعك گول
بس لتبجين يروح فدوة لدموعج هو وكل عشيرته
سمعت صوت عمتي يمه گتله هاي عمتي
اي هذه وياج
ها ماماتي حبيبتي
بجيت وگتلها عفية ماما تعالي
هياتني امي جابني قصي عليج
مختنگة حيل كلشش مختنگة
امي اذكري الله كلشي بالقسمة اوصل ونسولف اني وياج سديته منها وضليت بحضن امي اني وامي رغم كلشي بس مااحس نفسي قريبة منها ولا احس نفسي اگدر احجيلها كلشي بگلبي اكو حاجز بينا الي هو الخجل والخوف واكثر شي الخوف اخاف منها من ابسط الأشياء وهذا الشي احسه انبنه وياي من اني طفلة
تعودت الأم لازم تكون بينه وبينها حدود ولازم نهابها ونخاف منها ونحسبلها حساب عكس عمتي رغم بالسنه مرتين لو تلاثة نتشاوف بس احجيلها كلشي بداخلي وتفهمني وتشرحلي الصح من الغلط نمت بحضن امي وبذاك اليوم كأن رجعت مثل الطفل من يجلب بأمه ويخاف تروح منه حضنتها كل قوتي وكأن اريد اگوللها ماما لاتعوفيني خايفة خايفة من كل شي من المستقبل وخايفة من وجع گلبي
وخايفة من الأيام الي راح تكون خالية من شي اسمه مصطفى شلون راح اتعود ع غيابة شلون راح اتقبل فكرته خلص بعد ماكو شي اسمه اني ومصطفى بعد فترة يمكن ساعتين او تلاثة حسيت ع شخص گعد ع جربايتي وحضني فتحت عيوني شفتها عمتي
گتلها بصوت متقطع من البجي والشهگة ماما
ضمتني لصدرها وگالت والله هو الخسران ميستاهل وحدة ذهب مثلج والله عمره خسارة
*
*
*
*
*
*
*
يتتتتتبع
تحياتي زهراء أمجد