#لعبة_الحياة
.
.
.
الحلقة الرابعة والعشرون
.
.
رغد >> اركبي فوق لحوش فاضي يراجن فيك ايه وسارة فوق طلعتهم كلهم
انا >> منورة
ركبت نجري فوق ودمي م ح ر و ق بكلل ومتوتررره
سارة تلبس فيا وقعمزت ع الكرسي ايه تسقملي فالمكياج وانا ساكتة ماحكيتش ولا حرف
اية >> انتي كويسه ؟
انا >> كويسة كويسة
صبيت مع البنات ونزلت صندرت لوطا 🌚😂
والبنات جنبي ويزغرتو وماكانش في حد براني
سارة>>تاكلي قبل ما تطلعي
انا من الخوف ماكانش عندي نيه حتي نحكي
هزيتلها براسي بمعني لالا
سارة>> اوكي
شوية ونسمع في تبييب هنا دقات قلبي بدو يدقو بسرعة البرققق ومعش فهمت شي خشو هل عز خذوني ومشينا للقاعة
طبعا اتفقنا انا وعز منبوش قاعة بس خالاته واخته اصرن مابيتش نكثر كلام كيدهم علي فلوسهم انا مالي 🤭
طول الطريق واغاني وتبييب وسيارات ورصاص وانا مش سامعة شي من هضا كله غير صوت دقات قلبي
وصلنا وخشيت ومعايا البنات كلهن ع المسرح وشوية هكي وقالو عزو هـ يخش
رغد >> يدك ترعش اثبتي راك اطيحي
انا >> قلبي ه يوقف والله !
رغد >> خوذي نفس بس و امسكي روحك
وقفت ونزلتلي رغد الطرحة رفعت راسي شويه وكنت نشوف فيه من تحت الطرحة
في اول قصتي رديت بيكم سنة لاورة
بس المرة هذي ه نرد بيكم سنتين
لما نزلت قدمت من عز واول كلمة قلتها له
~مش علي اساس سيبت الدخان ~
وكنت وقتها تعبانه نفسيا وجسديا و حياتي عايشتها عشان نتنفس بس
من بعد الكلمة هذي وطول السنتين وعز حرفياً ما سيبنيش لحظة ولا ثانية حتي !
قرب عز من عندي وكل الخوف والتوتر و دقات القلب والم المعده يلي كان فيا من الصبح وقف
قرب مني ومعش قعدت نحس ب شي الا بيه هوا
سلم عليا وابتسملي كنت فاقدة الشعور ونشوف بس لعيونة ❤️ كاني خايفه نفقدهن كاني خايفه يسيرلي زي ما صارلي قبل ونخسره باي شكل
غمضت عيوني ومسكت بكيتي ومسكت في يده بالقوة
عز >>ماتخافيش انا معاكِ❤️
قعدنا انا وياه شويه وما طولنش كنت تعبانه من التوتر يلي كنت فيه طول الاسبوع يلي فات
عز >> مريم يدك ترعش
انا >> متوترة بس
عز ضغط علي يدي و طلعنا
صبيت انا وياه وطلعنا للاستقبال من التوتر حتي ما سلمتش عالبنات لا شي كانت لحظة متلخبطة
ونسمع فيهن ورايا كل وحده توصي ف حاجه والس تضحك ولي تبكي ولي تسمط عليا
سارة >> طالعة مستعجلة 🤭😂
اية>> ههههههههه كلبة
ركبنا في السيارة و مشينا شور حوشنا
ومن هنا ه تبدا حياة جديدة ليا او ممكن لعبة حياة جديده معايا 🤷🏻♀️
//
//
-عندما يكون الحب بطريقة غريبة
ويستمر الي ان يتحول الي حب رائع ..
عندما تفقد شخص عزيز عليك ويأخذ محلة شخص اخر وتتغير الحياه !💛~
//
//
روحن البنات للحوش و قعمزن وجابو العشا و بدو فاللقطة المعتاده
قرمة ما بعد العرس ، احسن من العرس نفسه 🤤😂
مروة>> بس هدي اخته شكلها طيبة بكل
ميرال >> اها كويسه في حالها
رغد>>يستر الله من امه بعد مريم مش ناقصها
مروة تاكل >> م عندهش م دير اكثر من يلي داراته اتوقع ح ترضى بالامر الواقع
رغد>> كسرة بخاطر ولدها حتي عرسة م حضراتاش
معقولة
مروة>> قلبها اسود اللي كيفها ماسكة سبحتها وتدعي ل اخرتها !
رغد >> يلا قعدت سيرتها ع كل لسان 🤭
خش عمر من برا لقا البنات مقعمزات يتعشن
عمر بجدية>> رغد محمود قالك عطيني شحن التلفون
رغد>> ييي مبدري نساه عندي
عمر >> دوريه وعطيه له
وطلع عمر بدون ما يحكي ولا حرف ولا يبحت ف مروة
ومروة ماسكة اللحمة وتاكل 🤷🏻♀️
رغد>> برود اعصاب
مروة>> نقعد باردة ولا نقعد خاينة 😊
رغد>> صبي صبي لمي السفرة انا انتهيت والله مش ه نقدر نصبر دقيقه نعطي محمود الشحن ونركب ن ر قد
صبن البنات لمن كل شي وخشن رقدن
.
.
.
عندي انا وصلنا انا وعزو لشقتنا وخشيت انا وياه
عز >> نورتي الشقة 🤤
انا >> ح نبدو عاد مازلنا قدام الباب 🤭
عز >> انتي بس لو تفكي التوتر شويه بس
انا >> وانت لو تهدا شويه
عز >> تؤ تؤ تؤ قاعدين فحوش واحد ونهدا ؟
انا >> باه نغير دبشي وناخذ نفس يا بيب🙊
عز >>اوك بس البسي اللي محطوط ع السرير
برمت وخشيت للدار بحتت ع المرايا وقدمت شور السرير
انا>> عززززززززززززز
عز يضحك من برا >> ه تلبسيه مافيش مهرب
را ح نقعدو هكي لعند تلبسيه
كان هوا الروب الاحمر محطوط ع السرير و الاخ من اولها يبي يمشي كلامة
صبيت ع المرايا و فكيت الطرحه و الڤيلو و فكيت شعررررررررري اهم شي
برمت ع السرير خذيت الروب لبسته وبعدها فتحت الدولاب لقيت طرف طويل انا شاريته من قبل لل ازمات 😌👏🏻
لبسته وفتحت الدار ناديت علي عز
كان سالح الجاكة و فاك بطم السوريه
انا >> تعال ساعندي علي شعري
عز >> شن لي لابستيه هضا
ماتقدريش تخلي الروب بدون اضافات ؟ 😒
انا >> عزو عاد 💋
عز >> ناعلي تعالي
قعمزت قدامه وقعد يفكلي في شعري ويحول فالمساسيك يلي فيه
انا >> احييييه عز بشويه
عز >> تي هذي كيف مثبتتهن
انا >> مانعرفششش وهضا كله مش هذك التسريحه دايرتها
عز >> تهيالي هذي اخر وحده
كنت عاطيته ب ظهري و هوا ورايا يفك ف شعري
لمس كتفي ونزل الطرف
انا قلبي وقققققققققففففف جمدت مكاني
صبيتت بسرعة وخذيت المساسيك دروحي نلم فيهم من السرير و نجنب فيه
مسك يدي وكرني >> ارخي روحك ما تخافيش🤤
نبحت فيه وف عقلي نقول قسم بالله ماني خايفااااه
مشيت شوره زي البنت الشاطرة 🙊🤤❤️
* وين البنات يلي يندبن يبنهم ف حوش واحد ها تريحتو هكي ؟ * 😂😂
.
.
.
ثاني يوم سارة ف الشغل
خشت عليها مها
سارة انصدممممت
مها >> مافيش داعي للصدمة يلي علي وجك
مش متوقعتيني نجي صح ؟ ماتحسابينيش وقحة لدرجة هذي
تحسابيني وحده والسلام وه نسيبلك ربيع يلي ماحسيتش بالحياة الا لما وقف معايا
يبقي انتي تحلمي ... ربيع مرده ليا و ح تشوفي
بدينا في اجراءات الطلاق بس ح نوقفهن
سارة مصبية ومصدومة فالوقاحة >> لو كان ربيع مرده لكي زي ما تقولي !
فـ عليش جيتيني تجدي فيا بيش نسيبه !؟؟؟
كنتي شويه وتبوسي يدي 🤷🏻♀️😂
عالم غريبه بجد مدام انتي واثقه انه ما يقدرش يبعد عليك ف عليش من الاساس طلقك ؟؟؟
فتحت سارة باب المكتب وقعدت تنادي في متاع الامن
سارة>> عمي فرررررج عمي فرج
فرج>> نعم
سارة>> الاشكال يلي زي هذي ما تخشش هنا ! هذي اخرلها مره نشوفها خاشه مكتبي ولا حتي خاشه للشركة كلها
قدام الباب ماتهوبش ان شاء الله كانت تبي شغل ح يكسبنا ملايين
اطلعي برا اطلعي
مسكها فرج وطلعها وخبطت سارة باب المكتب و معش عرفت كيف تتصرف
خافت تحكي الربيع تصير مشكله اكبر من هكي
وبرضو خافت تسكت مها مش حاتسكت وتخرب عليها هيه وربيع
.
.
.
مروة فالجامعة و كان هضا اخرلها سمستر
وتدير في مشروع التخرج
كان المجموعة متاعها هيه وصحباتها الاثنين
و معاهم الشاب متاع الشيتات 🙊❤️
مروة >> ادم
ادم>>نعم
مروة>> تو شوف الجزئية هذي مش كانها ملهش داعي نشيلوها من البحث احسن صح
ادم >> اوكي شيليها
مروة>> البنات شكلهن مش جايات؟
ادم>> شكله
مروة>> معناها خليني انا وياك ندربو في المكتبه و بعد يجن البنات ح نعاود معاهن من جديد
ادم >> اوكي
ركبو للمكتبه وبدو يدربو عالبحث وشن الاسالة يلي ممكن تجيهم
مروة >> تو انا ح نصبي هكي اوكي
وصبت مروة وقعدت تحكي فالبحث وادم متكي ع الكرسي ويبحت فيها
مروة>> ها تمام هكي ؟
ادم >> هكي خيال مش بس تمام 🤤❤️
مروة >> ههههه صبي صبي خليني نشوف البنات وين و نعدي نشوف الدكتورة
اه بس قبل هكي ح نمشي ناكل
ادم >> اوكي بس عازمك
مروة >> تاكل معايا شاورما 🤤🙊
ادم >> ناكل معاك ❤️
ومشو شور الكافيتيريا و طلبو وقعمزت معاه
ادم>> باهي بعيد عن المشروع والقرايا احكيلي شوية علي روحك
مروة>> بتخطبني بعد المشروع ولا شنو 😂😂😂
ادم حط يده علي خده >> وليش لاء
مروة رفعت حاجبها بنظرة هزوة >> اكيد لاء
لاني قررت مافيش شي في حياتي ح يمشي بسرعة من يوم وغادي
صبت جابت الطلب و قعمزت
ادم >> وليش ؟
مروة تاكل فالسندوتش>> حاجة السرعة مافيهش خير
ادم >> نسالك سؤال ؟
مروة حطت السندوتش >> انت شكلك مش جيعان 😂 اسأل
ادم >> من يلي ج هضك اليوم للجامعة
مروة>> يوم يلي خذيت مني المذكره بتصورها
ادم هز براسه
مروة كلت من السندوتش >> ولد عمي 🙄
ادم >> ولد عمك بس ؟
مروة سكتت
رن تلفونها وكانن البنات
مروة>> البنات جن ح نعدي نشوفهن ف المكتبه
وشكرا ع العزومة
نتلاقو بكرا 🤭
.
.
.
.
ثاني يوم عند العرسان 🤤
نضت انا قبل عزو وخشيت للحمام ودوشت
طلعت كنت انشف ف شعري ع المرايا
بحتت ف ساعة لقيتها ٣ ونص 🤭
وعز راقد برمت عليه و قربت منه
كنت نلمس في لحيته بنصدق انه خلاص انا وياه ف حوش واحد 😭 وانا وياه رغم كل شي قعدنا البعضنا
مسك عز يدي وانا حاطتها علي خده
انا >> سوري يا روحي نوضتك ؟
عز >> صباح الخير
انا >> صباح النور
عز >> من مبدري نضتي
واتكا ع السرير وجيت جنبه ومازال ماسك يدي
انا >> لالا من ربع ساعة هكي دوشت بس
عز>> تعرفي اديري قهوة
انا >> ههههههه ه نديرلك صبي صحصح
عز >> مافيش حاجه ع طاير 🤭❤️
انا >>صبح صببح😂
صبيت من حذاه وعزقتله بوسة من بعيد ع طاير 💋
خشيت للمطبخ
نسمع ف عز من بعيد >> ما نبيهش من بعيد اناااا 🙄🙄😂
انا>>الجيران سمعوك صبي للحمام 😂😂😂
درت قهوة وقعمزت انا وياه شربنا وعز كلم مطعم وصى علي غدا
طبعا هله ما دزوش ولا ح يدزو شي 🤷🏻♀️💔
عز >> احنا مسافرين بعد خمس ايام مالقيتش حجز الا هكي
انا >> مش مشكله
عز >> شن تبي انديرو اليوم ؟بتطلعي
انا>> لالا خلينا فلحوش نحس فروحي مازلت تعبانه من امس
عز >> قصدك اللي امس تعب ؟ 🌚
انا>> مش اللي ف بالك انت وتفكيرك قصدي من الصاله والحوسه 🌚😂
عز >>لا باهي 🤭😂
.
.
.
روحت سارة من الشغل ولها يومين تفكر في كلام مها
رنت علي ربيع وحكتله يلي صار
ربيع >> تحكي من جدك ؟
سارة>> امالا نتبلى عليها !
ربيع>>مش هكي بس قصدي مصدوم فيها !!
سارة>> ياسلام علي اساس انها الملاك البريء؟
ربيع >> مش هكي بس ما توقعتهش هكي يعني
سارة>> باهي معش تحكي عليها وخليها اطلعني من راسها بكل
ربيع>> تغاري ؟
سارة>> لا نغار لا شي بس منبيش نسمع سيرتها
ربيع >> 😂😂😂 باهي يا ستي
//
//
سكر ربيع من سارة ومشى للحوش عند مها
مها>>عارفتك عليش جاي بس ماتوقعتهش تقولك بسرعة هكي
ربيع >> انتي شكلك ماتبيش احترام ومعاملة كويسه صح ؟؟
مها >> هضا كله عشانها ؟؟
ربيع >> نحكيلك ب ادب يا بنت الناس باعدي من طريقي وطريقها خليك في حالك وخلينا في حياتنا
مها >> مش حا نقدر ! ما نقدرش نشوفك مع وحده غيري
ربيع >> وترضي تشوفيني معاك وانا مش طايقك؟؟
مها انا مازلت محترمك ومانبيش نغلط معاك و داير خاطر لعيون عمي وباتي لو مش هكي ح يكون ليا معاك تصرف تاني !
مها ساكته
ربيع >> ياريت يكون هذي اخر مره نحكي معاكي فالموضوع هضا لانه لو حكيت مره تانيه مش ح يسير خير و لا ح نحترم لا كبير ولا صغير
كمل كلامه وبرم يبي يطلع
ربيع>> اه ورقتك ح تجيك في هل يومين وحكيت مع باتي يحكي العمي
وطلع ربيع من الحوش
.
.
.
.
عندي انا وعز لنا ثلاث ايام متجوزين
وانوض علي وجهه ونرقد علي وجهه ، هو في احلى من هكي ❤️
كل يوم كنا نتعرفو علي بعضنا اكثر و اكثر و نهدرزو ونحكو ونطلعو يا اما نتغدو يا نتعشو برا
وطبعا ولا حد من هله رفع علينا سماعة التلفون ما عدا اخته هدي
عز >> بنطلب منك طلب بس لو ماتبيش عادي مش ح نزر عليك
انا كنت نمشط ف شعري ع المرايا برمت عليه>> احكي ي بيبي
عز >> نمشو الامي اليوم ؟
انا رديت برمت وقعدت نمشط ف شعري
عز >> لو ما تبيش ح نمشي بروحي عادي
انا >> لا عادي ه نمشي معاك بس مش عارفه يعني ح تستقبلني
عز >> انا معاك ما تخافيش اي كلمة ح نطلعو دغري
انا >> حبيبي ❤️
خلاص معناها نلبس وهكي و نطلعو
عز >>تمام
في العشيه لبست و رتبت روحي و طلعت انا وعز لحوش هله
انا >> هيا نلبس كندرتي بس
عز >> اوكي تمام
وصلنا انا وياه و خشيت وانا قلبي يدلف مش متحمله نسمع كلمة ولا اي حاجه منه
لاقتني هدي اخته سلمت عليا
انا >> كيف حالك شن دايره
هدى>> الحمدلله بخير شن دايرين ياعرسان
انا>> الله يسلمك
خشيت قعمزت فصاله و طلعن خوته سلمت عليهم وقعد يعرف فيا
وامه مازالت ما طلعتش
عز >> امي وين كيف مش قاعده
هدي>> لا في دارها قاعده متكيه
عز>> اهه
طبعا انا فهمت انها ماتبيش تطلع
بحتت ف عز وقعدت ساكته
عز >> تو نخشلها
.
.
.
#يتبع