#لعبة_الحياة
.
.
.
الحلقه الواحدة والعشرون
.
.
.
كنا انا ورغد وايه و ميرال كارسين جنب باب الصالون ونصنتو
ام عز >> بصراحة انا ماكنتش بنجي عز زرني
طبعا ماما مش عارفه كيف اسكتتلها 🙂
ام عز >> بنقولك شكلك وليه كويسه و انتو عيلة مشاء الله عليكم ما قلنا شي
بس بنتك مش الولدي
ماما >> في حاجه صارت لا سمح الله ؟ 🙂
ام عز >> لا ما في شي بس انتي عارفه وضع بنتك و ولدي شاب ومازال في شبابه و نبيله بنت صغيره تهنيه
ماما معش قدرت تتحمل
ماما>> ليش بنتي لقيتوها ممسوكة في قضية شرف مثلا ؟؟
ام عز سكتت >> ولله هضا كلامي
ماما>> هذي لي جايبتك ؟؟ كان قعدتي في حوشك ووصلتي كلامك مع. ولدك
انا والبنات كنا واقفين ونسمعو
البنات يبحتن فيا ويبحتن في بعضهن
سحبت روحي وخشيت لداري وسكرت عليا بدون ما نحكي ولا حرف الموقف كسرني كسر !!!! كلام امه رغم انه كلام حد متخلف و مش فاهم بس اثر فيا بكللللل
طلعت ماما وسيبت ام عز بروحها و هيه شويه وجاها عز وروحت
//
//
وصل عز امه للحوش و رن عليا مرتين ما رديتش
دزلي مسج * اكيد حايسه بعد تفضي رني عليا*
شفت المسج وقعدت نبكي 😭😭😭 نزلن دموعي ماتمنيتش هكي يسير بكل معش عرفت شن ندير كيف نرد شن نقول قعدت متكتفه ودماغي انشل معش عرفت حتي نفكر ولا حتي شويه
//
//
في الليل رد عز ورن عليا اخري وبرضو ما رديتش
خشن عليا البنات وحاولن يحكن معايا بس ما كانش عندي اي نيه ناخذ ونعطي بكللللل
قعدت ساكته وهنا يحكن
بعدها خشن للمطبخ دارن عشا وتعشن ونزلت ايه الحوشها
خشيت للحمام غيرت دبشي وصليت و مسكت دموعي ورنيت علي عز
عز >> هضا كله حوسه يا بيب
انا >> لالا مافيش حوسه
عز >> كنه صوتك !
انا>> ولا حاجه
وين قاعد روحت ؟
عز>> لالا فسيارة قدام الحوش
انا ~> باه بنحكيلك حاجه قبل ما تخش
عز استغرب >> احكي شن فيه ؟؟
انا>> عز ما فيش نصيب بينا مش حا نتريحو مع بعضنا نحن واخذين بعضنا عشان نتريحو مع بعضنا بس الواضح ان مش حا يسير !
عز >> انتي فاطنه الروحك شن تحكي ؟؟
انا >> فاطنه كويس بكل اخرى !
عز سكت شويه وتنهد >> امي شن قالت ؟؟
انا سكتت
عز بنبره حادة و بصوت عالي>> ردي عليا راه وديني نخش نطربق الحوش
انا >> اهدا شويه عشان نعرف نحكي را ولله مش متحمله كلمة
وقعدت نبكي
عز وطا صوته شويه >> باه احكي شنو في ومعش تبكي والله مانعرفش شن ندير انا هكي
انا >> ولا حاجه امك وماما علقن ف بعضهن و امك من اول شي قالت انه ما تبينيش لكي وتبيلك بنت شباب و مافيش نصيب
وماما طبعا ما سكتتش ! و اكيد بعد ما يروح بابا حا تحكيله و بابا حا يكلم باتك وينهي كل شي
عز >> امي قالت هكي !؟
انا سكتت
عز >> احكي الامك قوليلها ما تحكيش الباتك شي بس وسكري تو نعاودلك
انا >> تي عز اسمع
صكر وما سمعنيش صبيت طلعت الرغد وحكيتلها يلي صار وقالت لي ان هي لي ح تحكي الماما
انا ماعنديش وجه بعد الي صار نحكيلها ولا حاجه
//
//
خشت رغد علي ماما قبل ما يجي بابا وحكتلها يلي صار
ماما >>انا مش حا نحكي شي بينها وبين باتها بس الجوازه هذي مش صاير منها وحتي كان صار امه متخشليش حوش
طلعت رغد من ماما بعد ما حاولت تقنعها شويه
//
//
عند سارة كانت تكلم في ايه وتسال فيها شن صار وحكتلها ايه
سارة>> كنه حظنا هكي استغفر الله مافش ولا حاجه ماشيه صح
ايه >> كان تشوفي مريم والله نزلت وسيبتها مقهورة بكل
سارة>> خزي عليها امه
ايه>> شنصار بس فيك انتي
سارة>> ماقتلك ما فيش ولا حاجه ماشية صح
ما فيش ولا شي صار ولا حايصير شي خلاص نهيتها بكل
ايه >> قبل بنجوك بكرا تهدرزيلنا علي رواق شوي قالو جايين عيت عم ناصر بكرا وعمي بيذبح ف قلنا ناجلوها
سارة>> عادي تعالن ف اي وقت
//
//
عند عز
خشيت علي امي بعد ما حكتلي مريم يلي صار
عز>> شن لي صار عند الناس
امي >> الي كان مفروض يسير من الاول
عز >> كنك معايا والله ما طلبت حاجه مستحيله هذي حياتي وانا حر فيها انا يلي بنجوز وانا يلي بنعش معاها ان شاء الله نجوزها من الصين انا حر
امي >> مدامك حر معناها ليش تخلي فيا نمشي
عز>> زمري .. انا من الاول قلت بنقعد عاقل ومانبيش ندير طروح مراهقين
بس انتو شكله هضا يلي ينفع معاكم
مع خشت باته وخوه اللي اصغر منه
عز عروقه بيطلعن و فاصل عالاخر >>اسمعو اقسم بالله العظيم لو ما خذيتهش هيه وديني ماني واخذ غيرها و شوفو كيف بديرو عاد
وطلعت من الحوش بكل وولعت السياره ومشيت شور المزرعة
.
.
.
ثاني يوم
نضنا فالصبح بدري عشان عيت عم بابا
لبسنا ونزلنا لوطا وخشينا للمطبخ وايه معانا وبدينا نديرو فالغدا ، وع الساعة ٢ ونص هكي وصلو
خشو البنات وهكي وسلمنا عليهم وحطينا الغدا وتغدينا
وضمينا حوسة لمطبخ والحق البنات خشن معانا
وطلعنا كلنااا برا و قعدنا نهدرزو كل حد يحكي مع الاخر وانا عقلي مش معايا
نورهان >> رايفة عليكن يا بنات
انا>> حتي نحن والله
نورهان>> سامحينا والله ماقدرنش نجو للعزا بكل الطريق اسكرت و زعلنا بكل والله
انا>> ولا يهمك عادي
نورهان بحتت في يدي وشافت الدبلة
انا فطنت وبحتت فيها رفعت يدي>> انخطبت من جديد
نورهان>> حييييي مشاء الله الف الف مبروك
انا>>الله يبارك فيكي ... بس شكلها حاتنفسخ
نورهان>> ليشش
رغد>>من العقرب امه
انا >> رغدددد
نورهان>> عليك قصة لو هو كويس ماتعدليش علي امه
انا>> وانا كنت مش معدله برضو بس هي مصره
قصة طويله بعدين فالليل تو نهدرزو دابينك بايته معانا
.
.
.
في الليل قصاد الساعه واحد فتحت تلفوني كان مقفل
طبعا مروة باتت معانا كانت لها فترة ما جتنش وعمر كذلك و ايه وناصر معانا لوطا ونورهان واختها
كلنا كنا مقعمزين ونهدرزو
مع خشت محمود
محمود>>السلام عليكم
كلنا >> وعليكم السلام
حط تلفونه لوطا وقعمز
ناصر>> باتي منفصل عليك عشان ماجيتش للغدا
محمود>> يارا باتك حشيشته زقوب تو عيت سيدي جايينه مش جاييني
ناصر فنص فيه
محمود بحت فطن النورهان و نورا مقعمزات 🙂
رغد>> ههههههههههههههههه
محمود>> سكري فمك كذا
انحرج معش عرف شن يقول >> مافيش عشا
انا كنت بندور اي سبلة ونصبي معنديش نيه نقعمز
انا>> تو نصبي انا
رغد ونورا صبن معايا
ناصر >> بنركب نرقد انا
ايه >> هيا
محمود >> اه ترقد قتلي 🌚
ايه >~😂😂
ناصر >>فمك ما يسكرش
محمود>> سكتنا 😂🤷🏻♀️
ركبو ايه وناصر و قعدو نورهان و محمود وعمر ومروة
مروة>> عمو نبيك في موضوع
عمر بحت فيها
محمود>> احكي مافيش حد براني
مروة>> لا مش هكي بس تو نحكيلك بكرا بنركب نرقد توا نعست
محمود>> تمام
مروة ماكانتش بتحكي شي بس بتحرق دم عمر
صبت مروة ولحقها عمر
وقعدو نورهان و محمود
محمود >> نور ولا نورهان ؟
نورهان>> لا نورهان
محمود>> انتي الكبيره ولا الصغيره
نورهان>> الكبيره 😂 تقول مش عيال عم بكل
محمود>> ماه انتو لما مشيتو لطرابلس عشان شغل سيدي معش نشوفو فيكم
حتي في عرس مريم جيتو بس ما شفتكمش
نورهان>> تقريبا لنا اكثر من ١٠ سنين مش متلاقيين صح انا وياك
محمود>> اهه صح
باهي شن تقري
نورهان >> ههههههه تخرجت من علوم
محمود>> باهي مشاء الله وانا طبعا متخرج
نورهان>> لانعرف
محمود>> كيف
نورهان>> يعني عارفه انك متخرج وتشتغل من زمان
محمود>> باين عليا اني كبير لهدرجه 🌚😂
نورهان>> مش هكي بس يعني سامعة 😂
محمود >> ماشي 😂
وقاطعتهم رغد >> محمووووووود
محمود بحت فرغد>> مافيش حتي احترام قدام الناس تقولي عمي محمود عالاقل ؟ 😒😂
رغد>>نورهان مش برانيه خش تعشااا
محمود>> باهي ماتسكنيش 😒
نورهان تضحك
محمود >> تصبحي علي خير
نورهان>> قدامك لخير
//
//
ركبنا فوق كلنا وقعدنا نهدرزو وهدرزت انا ونورهان وحكيتلها قصتي مع عز
نورهان>> لو هو يبيك ومتمسك بيكي يبقى خلاص ماتعدليش والله وخليكي معاه و امه ماتبيش تقاطعه
انا>> المشكلة توا في ماما بعد التتش لي صار بينهم معش ضامنه اي شي
نورهان>> انتي تحبيه؟
انا>> مش كل شي حب
نورهان>> عارفين مش كل شي حب في احترام وفيه ثقة وفيه حاجات واجده بس فيه هوا يعني لو هوا كل شي فيه كويس تخربي علي روحك ليش
انا >> مش عارفه
ورن تلفوني وكان عز
انا >> خليني نرد
طلعت للصالون لي برا ورديت عليه
انا>> الو
عز >> ايوا
انا >>كيف حالك
عز >> ماشي
ونسمع فصوت ريح حذاه
انا >> وين قاعد
عز >> فالمزرعة
انا >> الساعة ٢ بايت ؟
عز>> من امس هنا
فهمت انه في حاجه صايرة فحوشهم وطلع
انا >> عز مانبيلكش مشاكل والله خلاص خلي كل حد يعدي في حاله بلاش تعب وحرب نفسية
عز >> اه ولما كل حد يعدي في حاله هكي حانتريحو نحن ؟
سكتت
عز >> انا عطيتك كلمة ونقعد عيل كان رديت في كلمتي ودابينه باتي واقف معايا يبقى ما فيش شي حا يخلينا نبعدو
امي علي عيني وراسي بس هذي حياتي وانا نبي نكملها معاكي
انا>> وتقدر تبعد علي امك ؟
عز>> من قالك حنبعد حندير الي عليا معاها
انا >> نحبك
عز >> يا روح عز ❤️
وكانت هذي اول مرة نقوله فيها الكلمة هذي
-
يُهزم المرء بالاشياء اللتٰي يُحِبُّــها 💛~
.
.
.
مرن يومين
وفاليومين هذينا عز مازالت علاقتة ب امه متوتره
بس كان باته واقف معاه وحكى الاخته انه تجينا عشان نتفقو علي موعد العرس
.
.
فاليومين هذينا كلنا كنا مستقرين نفسيا وعاطفياً ما عدا محمود 🙊 كان في تضارب فالمشاعر جواه
كنا كل ليلة نطلعو نسهرو انا والبنات نجيبو في شوكلاطات وهكي ونكسدو برا ومروة طبعا طياح عندنا 😂😂
خش محمود ومعاه عمر كان عندهم شغل مع بعضهم
مروة >> بنصبي نخش صقعت
قعمز محمود مقابل نورهان
عمر >> نجيب اميه ونجي
//
//
مروة خشت للمطبخ
عمر >> وراس امك تفهميني وتسمعيني اقسم بالله تعبت يا بنت الناس
مروة>> وقاحه كيف هكي ماشفتش تي خطاني المره لي فاتت ماحكيتش المحمود بس المره هذي حانحكي والله
عمر>> احكي حتي الجدي بس اسمعيني
وكان صوتهم عالي مع خشتي انا ورغد
رغد >> تي هيه كنكم شن فيه
انا>> تبو الحوش كله يسمعكم ؟
عمر ما بحتش فينا >> مروة اسمعيني
مروة>> اطلع من ر ا س ي
وعدت مروة لحقتها اناورغد صبت مع عمر
رغد>> عمر خطاها خليها في حالها ماتجيش يلي ادير فيه
عمر>> ماحدش فاهم شي ! والله افهموني ماتقعدوش كلكم عليا
وقعمز عمر ع الكرسي والدنيا مسكره في وجه
رغد >> احكي قول شن فيه ونوعدك لو اقتنعت حانساعدك
عمر ماكانش قدامه الا ان يحكي الرغد
عمر >> مش حانكذب عليكي فالاول عشان عنادها كنت بس نبي نطيحها ونفوتها ! بس والله حبيتها اقسم بالله من وسط قلبي حبيتها معش عرفت حتي نسيطر علي روحي معاها
رغد>> مدامك حبيتها ليش تحكي مع غيرها ؟
عمر >> نعترف اني حقير فاللقطة هذي البنت لي كنت نحكي معاها نعرفها من زمان ومكالماتنا كلهن بصارة وضحك والله مافيش بينا شي
رغد>> اه يعني وحده ساقطه 🙂
عمر سكت
رغد>> خلي الموضوع شوري بس اسمع غلطة ثانيه و مروة ما نضمنلكش رد فعلها شن يكون
//
//
محمود >> شنجوك
نورهان>> تمام
محمود سكت
رن تلفون نورهان
محمود بحت فيها
بحتت في محمود و ردت عالتلفون وكانت مرات خوها تطمن عليهم
نورهان>>مرات خويا
محمود >> اهه .. امتي مروحين انتو ؟
قصدي يعني نبيكم تقعدو ماتفهميش غلط🌚
نورهان>> علي حسب عمي امتي يطلق بابا
محمود>> ان شاء الله ما يطلقش 😂🙂
نورهان>> كيف ؟
محمود>> ولا حاجه 😂
قعدو يهدرزو فالجنان لعند الساعه ٣
نورهان>> الساعة ٣
محمود>> اه وجعت
نورهان >> نديرلك حاجه تاكلها !
محمود >> ياريت
نورهان >> عدي غير دبشك وتلقاني فالمطبخ
خش محمود غير دبشه وخش علي نورهان فالمطبخ لقاها توتيله
قعمز علي حاشية المرمر وقعد يبحت فيها
نورهان>> توتر فيا يا احكي يا اطلع متقعدش تبحت هكي 🙊😂
محمود نزل من المرمره وقرب منها
نورهان وخرت >> شن فيه 😳
محمود مد يدة من حذاها و كر الكبايه>> بنشرب اميه 🙂🌚
دارتله عشا و بعدها ركبت للبنات فوق
.
.
.
كنا مقعمزين نهدرزو
طبعا الحوش قعد حوش بنات 😂 بابا تحشم من البنات قعد يرقد لوطا وماما فدارها ونحن زايطين فلحوش
رغد>> محمود وين
نورهان>> درتله عشا
انا>> يناعلي معلش تعبناك
رغد>> لا علي قلبهاا زي العسل🙊❤️
نورهان بحتت فرغد
انا>> كيف شن فيه 🙂
رغد>> تطورات وحركات وعشاوات وهداريز
انا >> قصدك محمود معقوله😂
نورهان>> بطلن يا بنات والله ما في شي
انا >~ والنبي تحكي شن فيه 😂😂
نورهان >>والله مافي حاجه ولد عمي نحكي معاه عادي
مروة ضحكت >> كنت نقول فيها قبلك
ضحكنا كلنا ونورهان مش فاهمه
نورهان >> باردات 😭😂😂
رغد>> مروة تعالي لمي معايا المطبخ
مروة>> اوكي
//
//
طلعن رغد ومروة للمطبخ
مروة>> تو شن تبيله من لم
رغد>> قعمزي بس بنحكي معاكي
مروة>> شن فيه؟؟
رغد>> فكيني من الطروح النبي وخليني نحكي
مروة ردت باب المطبخ وقعمزت
رغد>> بنحكي معاك فموضوع عمر
مروة جت بتحكي
رغد>>سكري فمك واسمعيني
وبدت رغد تحكي فلي فهماته من عمر
رغد>> والله واضح ان يحبك بجد وواضح انه ناااااادم علي داره بكككل لدرجة قاعد يحاول معاكي
تو النبي فهميني لو انتي فعلا ماتهميش وانه بس بيضحك عليكي عليش مازال يحكي معاكي ؟؟
مش خلاص ضحك عليكي مفروض يفوتك
بس فهميني ليش مازال يحاول معاكي
مروة>> مافيش داعي نشرحلك موقفي بس ثقتي فيه صعب تنرد والله
رغد >> وهو مايبيش شي الا انه يرد الثقة هذي صدقيني لو حسيت انه كلامة يلي قاله ليا فيه ذرة كذب ما كنتش جيتك وحكيتلك اصلا !
مروة>> ان شاء الله خير
طلعت رغد ومروة قعدت حايره فالنص
يا بتفكر يا بتحس 🤣🤣😂
.
.
.
نضت ثاني يوم لقيت البنات واعيات قبلي ونازلات لوطا والحوش فاضي
صبيت خشيت للحمام وطلعت صليت وغيرت دبشي
ودزيت العزو رساله و جيت بننزل علي رنة تلفوني نحسابه عز
.
.
.
#يتبع
الصوب يريد تريس بوادي
كانك ياي ادنا غاااادي 💁🏻♀️
دورن علي واحد يوقف ضد امه عشانك
مش واحد يوقف مع امه ضدك 😌