#لعبة_الحياة
.
.
.
.
الحلقة السادسة عشر
.
.
.
صبيت خشيت للمطبخ قعدت نبرم مش عارفه شن نبي عقلي يشيل ويجيب ونسمع في تلفوني يرن
مشيت للدار لقيتها ايه
انا>> الو
ايه >> وينك ماتقول عايشين في نفس الحوش ليا يومين ما شفتكش اركبيلي
انا >> ناصر وين!؟
ايه>> نزل مع محمود لوطا
انا >> هي جايتك
خذيت شوكلاطة من المطبخ وطلعت
انا >> ماما بنركب الايه فوق
ماما>> باه
طلعت وركبتلها
ايه>> مكسده بكل باهي لي جيتي بننزل لوطا بس تحشمت
انا >> شن تحشمتي هذي انزلي عادي كسدي مع عميمه لوطا وكلميني ننزل انا والبنات ولا تعاليلنا فالشقه دقي في اي وقت مرات اصلا تلقي الباب مفتوح خشي طول فكيني النبي من الطروح معقوله نعزم فيك🙄🙄
ايه>> تي عارفه بس قصدي انا بعد ناصر يعدي ناخذو راحتنا فالحوش نهدرزو براحه
خشيت للمطبخ >> بندير نسكافيه
ايه>> ديري تلقيه فالرف فوق
طلعت ايه ولعت التلفزون ودرت نسكافيه وجيت قعمزت حذاها
ايه بحتت فيا و حطت الريموت>> باهي كنه مودك !؟
انا >> كني ؟
ايه >> انا سالت انتي جاوبي مش تردي السؤال ب سؤال 🙄
انا >> ولا حاجه بس مليت من الحوش اولا
ثاني شي من هضك اليوم لي بابا حكالي فيه علي موضوع فتحي ولد جيرانه وانا القصه مضايقتني 🙄💔
ايه>> باتك معش حكالك فالموضوع
انا >> لالا لها في جية حاتم خويا و هكي معش حد دورني
ايه>> لو فتحلك الموضوع قولي لا
انا >> اكيده ناقص عليا غير فتحي 🙄😂
.
.
.
.
.
عند مروة
كان عمر يرن كل يوم لدرجة كرهت انها تمسك تلفونها
مروة>> حفظته الرقم من كثر ما ترن 🙄
عمر >> مش حا نريحك لعند تقوليلي الجواب
مروة>> حفلة هيه ؟ ما قتلك لاء اظن صح ؟
عمر>> مش من قلبك تقولي فيها انا عارف الجواب بس انتي في شي مخوفك ما تبيش تقوليه
مروة >> عمر ما تضغطش عليا
عمر >> اوكي انا مش هـ نضغط عليك بس تعطيني مجال نحكي معاك ولما نرن عليك تردي ! لعند تحولي فكرة عمر الصايع من بالك وتوثقي فيا وتقولي لي في بالك !
مروة سكتت شويه >> بس بشرط !
عمر>> الي هوّا؟
مروة>> لو في الفترة هذي حسيت روحي ما تريحتش ه نقولك معش ترن وتخليني في حالي ، ديل؟؟
عمر >> خلاص ديل !!
سكرت مروة من عمر وعلي قد ماكانت تراجي في لحظة لما عمر يعترفلها بحبه لها وتعيش معاه قصة و يكون لها ... علي قد ما كانت مش متريحه للموضوع وحاسه في حاجه ناقصه
غريبة عمر يعترف بسهولة هذي وبالسكنان هضا وبدون اي مقدمات ولا اي تلميحات !
.
.
.
.
كانت ساره تفكر ترن علي ربيع او لا مع خشت سفيان
سفيان>> ساالت عالعرب و قالولي انهم عيله كويسه بس سالتهم علي ربيع هضا قالولي انه مايجيش للمنطقه واجد يعني ما يباتش فحوشهم بس ك اخلاق سالت اكثر من حد في المنطقة ومكان شغلة وقالولي انه كويسه
سارة>> كيف يعني ما يباتش في حوشهم ؟
سفيان>> بلكي عايش مع عيت جده عيت خاله مش عارف
سارة>> باهي انت في رايك نوافق
سفيان>> سارة ليش متردده هكي قولي يا اها يا لا
سارة>> بنقول اها بس في حاجه موترتني 😭💔
سفيان>> صلي استخارة وبعدها عطينا الجواب
.
.
.
.
.
كنت نهدرز مع خواتي فالدار
انا >> قررت نسجل ماجستير
رغد >> وكنك ؟ انا مش مصدقة امتي نكمل سريب الجامعه 😭💔
انا >> قعدت الحوش طلعتلي روحي والله بنشم هوا ربي عالاقل 🙄
رغد >> قولي الباتك وسجلي
انا>> بنشوف ايه بلكي تسجل معايا حتي هي
خذيت تلفوني وحكيت الايه وقالت لي حتي هي خاطرها تسجل وح تحكي مع ناصر بعد يروح
.
.
.
.
ايه >> نصوري
ناصر >> ايوا
ايه >> قتلك مبدري حكت معايا مريم وتبي تسجل ماجستير
ناصر يحول في الساعة>>باه وتسجل
ايه>> يعني انا قلت بما انك رديت شغلك ومن الصبح لعند العصر وانت برا فبدال ما نكسد بروحي فالحوش نبدا نقرا
ناصر بحت فيها>> يعني مش تعب ؟ حوش و قرايه ومرات تحملي فنص القرايا؟
ايه >> كان حملت نوقف !
ناصر >> براحتك شوفي لي تبيه
ايه >> خلاص تمام حنقول المريم 😍
ناصر >> جيبي اوراقك انتي ومريم تو نسجلكن
ايه >> اوكِ
.
.
.
.
خذت ايه اوراقي واوراقها وعطيناهن الناصر وكان اصلا السمستر بادي لحقنا عليهم خير ما نراجو للسمستر الجاي وعلي اساس بكرا نبدو
عز>> شنو بكرا تبدي ؟
انا >> اه سجلنا ناصر انا وويه
عز >> تمام
انا>>خساره لو سارة معانا ☹️
عز>> قولولها بلكي تسيب الشغل و تقرا
انا>> لالا سارة اصلا بكالوريس وماحوتك كملتها بالدف 😂😂
عز>> لا خليها معناها 😂
سكتنا شويه
عز >> ما فكرتيش في كلامي ؟
انا >> هو انا عندي حاجه غير اني نفكر في كلامك !
عز >> وشن قررتي ؟
انا >> شن راي امك !!
عز >> مافيش داعي نكذب عليك ونقولك انها موافقه وكلام فاضي ! حكيت معاها ومش موافقه بس حا تقتنع .
انا >> لوقتها ساهل
عز >> مريم ! خليني من امي انا نبي نعرف انتي شنو ! فكيني من اللف والدوران
انا >> تبي الصراحة ولا بنت عمها ؟ 🌚
عز >> كان الصراحة مش حلوة عطيني بنت عمها 🌚😂
انا >> بطل حناطة خليني نحكي
عز >> المايك عندك 🌚
انا >> شوف ما ننكرش اني نتريحلك واني يومي ما يكملش بدونك وانت الوحيد لي قعدت معايا في فترة كنت محتاجه فيها اي شي يردني للحياه
عز >> كملي
انا>> مشاعري من جوا لكي مريحات و مشاعر حلوة ... بس يا عزو مانبيش نخش في توتر مع امك و قصه و مشاكل ! 😞 نبي نعيش حياة متريحة عارفة انك راحتي هـ تكون معاك ومتأكدة بس لو هلك مش موافقين مش هـ نقدر ☹️
عز >> خليلي موضوع هلي علي جنب وخلينا في حياتنا ! وكل شي حايجي متسهل
انا >> ماشي 🤷🏻♀️
.
.
.
.
عند سارة مسكت تلفونها ورنت علي ربيع
وحكت معاه وخشو في نقاش طوييييل بكل
سارة >> ما تقعدش تقلب فالكلام ماقلتش مش موافقه
ربيع >> وبرضو ما قلتيش موافقه
تهيالي تعرفيني من سنة ي سارة سنه مش يوم
سارة>> المشكلة مش في مشكلة سنه ولا وقت كنك ماتبيش تفهم !؟
ربيع>> سارة انتي شن تبي من الاخر 😪
سارة >> حنوافق بس بشرط!
ربيع >> شنو ؟
سارة >> ما تستعجلش عليا بالعرس
ربيع >> بس انا اول ما دزيت امي قلت نبي العرس بدري لاني واتي ومعنديش عليش ناجل
سارة>> فاهمه بس خلي فترة خطبه شويه
ربيع >> يعني ندز رجاله 🙄؟
سارة >> دز 😒
اتفقو سارة وربيع و طلعت سارة حكت الامها و قالت لها ترد تقوللهم موافقه
.
.
.
.
مشينا انا وايه لجامعة اول يوم بعد ما سجلنا ناصر
ايه ~> ياريت معانا سارة
انا >> حيوانه قلنالها ما بتش 🙄
كانت عندنا اليوم بس محاضرة وحده
خشينا انا وويه للكافيتيريا ورنيت علي عز
عز >> الطير
انا>> شنجوك
عز>~ تمام وانتي
انا>> تمام فجامعه قاعدين
عز>> باهي تمام ماتبي شي ؟
انا>> لاء 🌚
عز>> الناس تقول سلامتك 😒
انا >> و انا بنقول لاء 🙂😂
عز >> تو نتفاهمو خليك فمحاضراتك توا🙂
انا >> اوك😂
سكرت منه وبحتت في ايه
انا >> تعالي كوليني ؟
اية>> نحس فيك مبسوطة معاه اول وهكي كيوت مع بعضكم انتو الاثنين
انا >> هضا كله حسيتيه في مكالمة دقيقتين ؟ 😪
امشي قدامي عالمحاضرة
ايه >> اوووف 🙄
.
.
.
.
.
روح بينا محمود عساعة تقريبا ٢
خشت ايه بدبشها بكل حولت بس الايشرب ولفت شعرها ودغري للمطبخ حطت طنجرة الغدا عنار ولمت الحوسه و طلعت من المطبخ لمت الدار لقت الساعه ٣ ونص
خشت بتغير دبشها خش ناصر
ناصر >> السلام عليكم
ايه >> وعليكم السلام
ناصر >> كيف هذي الترويحه؟
ايه>> لا من ساعتين بس خشيت درت غدا طول
ناصر >> وعليش مستعجله علي مهلك
ايه>~ لا خلاص كملت
خش ناصر للحمام وايه للدار تغير في دبشها وقعمزت عالسرير اتكت
ايه >> تعباااانه بكل
ناصر >> حتي انا والله
ايه>> نعدي نحط الغدا بيش تاكل ونرقدو
ناصر >> تم
صبت حطت الغدا ومن التعب ما كلوش واجد حطت ايه السفره زي ما هيه فالمطبخ وخشت للدار
ايه >> بنرقد ماحدش يواعيني
ناصر>> مره اخرى لما تروحي تعبانه يا ننزلو نتغدو لوطا يا نجيب من برا يا مديريش غدا بكل خفيف عادي
ايه >> ماهو قلت نخليك من اول يوم بلا غدا 🌚😂
ناصر>> ناويه شكلك الايام الجايه
ايه >> لا معقوله 😂🌚
.
.
.
يوم الجمعة ملتمين في حوش جدي كنا وتغدينا وبعد الغدا كلمني بابا
انا >> نعم ؟
بابا >> العرب يبو رد
انا >> نحسابك نسيت الموضوع !
بابا >> قتلك العرب يبو رد 🙂
انا >> لالا ما نبيش مش موافقه
بابا >> وشن اعتراضك
مع خشت عمو محمود
محمود >> خلي البنت علي راحتها بلا هبال بكرا تجيك مطلقه وتقول ياريت ما عطيتها
بابا سكت
انا >> اللي عندي قلته رد عليهم قوللهم لا 🙂
طلعت من حذاهم وحسيت بابا يأس مني
//
//
رغد>> شنجوك مع عموري؟
مروة>> يعني نحكو مره مره ونهدرزو منسجمين مع بعضنا
انا>> لا يخلو الامر طبعا من الجلاطة علي بعضكم🌚😂
مروة>> طبعا لازم كل تكليمة بعركة
رغد>> يعني توا انتو الاثنين مرتبطين رسمي
مروة>> تقدري تقولي هكي 🌚❤️
خش علينا عموري ونحن نحكو
انا >> سبحان الله حماتك شكلها تحبك بكل
عمر بحت في مروة>> لا تحبني اطمنو 🤭
مروة>>اوف ع الثقه
عمر>> تو تعرفيها انتي ولا بدكي خشمك وخلاص 😒😂
مروة >> لا نعرفها ولا نبي نعرفها 🙂
انا>> عمررررررر اطلع برا مكثر دوتكم 🙄
رغد>> صداع لعند خلاص
عمر>> ديرن قهوة نطلع
مروة>> حركات اطفال
انا >>عمررررر برا ! 🙄
طلع عمر ودرنالهم قهوة وطلعنا قعمزنا برا
.
.
.
.
.
طبعا مازلت ما حكيتش الحد علي علاقتي ب عز
وانه حكينا في موضوعنا 🌚❤️
عز >> ايوا ركبتي ؟
انا >> اه من شويه
عز >> وانا وصلني محمود توا للحوش
انا>> اه مازال ما جا
عز>> غريبه مفروض يكون واصل
انا >> بلكي فطريق
عز >> اه
وقعدنا نهدرزو انا وياه
عز >> الفتره الجايه مرات عندي سفرة حاجة الاسبوع هكي
انا>> وين ؟😒
عز >> تركيا بنجيب حاجات من غادي
انا>>> اهاا امتي ؟
عز>> مازال ما نسقتش فيها
انا>> باهي تمشي وتجي بسلامة😪💔
عز >> محمود روح ؟
انا >> لاء سيارته ما سمعتش صوت القراج انفتح خليني ننزل نشوفه بلكي درسها برا
سكرت من عز ونزلت لوطا مالقيتش في داره انشغلت عليه
جيت بنطلع من الدار سمعت صوت سيارته خشت
طلعت برا
محمود يسكر فباب السياره>> شديري برا الساعه ١
انا >> شي كسدت فوق نزلت بنهدرز
محمود>> بتكسريلي راسي يعني🌚
انا>> اصلا نعست بنركب نرقد 😒كنك طولت خطرها
محمود>> تكيت علي واحد صاحبي نبي منه اوراق
جا بيكمل كلام سكت وبحت فيا
انتي شن دخلك 🙄😂اركبي خليني نرقد تعبان
انا >> الحق عليا نسأل عليك 😒😂
جيت بنركب رن تلفونه
محمود>> ايوه
عز >> روحت للحوش !
محمود>> اه كنك شن تبي
عز >> نطمن عليك يا بيبي 🌚❤️
محمود>> هوبلا 😂 كنكم اليوم مهتمين مشاء الله
وبحت فيا 🙂 انا طلعت وسكرت عليه الدار
عز >> لا مهتمين لا شي بيش اتكي عليا بكرا عال ١٠ نعدو للمصرف
محمود>> شحوره 🙄
عز>> وجك
\\
//
ركبت فوق ورنيت علي عز وطول رن عليا
عز>> اهو رروح
انا>> اه كنت حذاه لما رنيت
عز>> اها
ونحن نحكو خشت ام عز عليه
عز >> شويه
انا >> اوك
امه >> هذي لي حكيت عليها ؟
عز >> اه 🙂
امه >> اتشقي في روحك
عز >> خليني والله نشقى مافيش شي يجي بساهل
امه>> لدرجه هذي تكسر كلامي عشانها
عز >> امي شن الجو هضا شن دخل كسرة الكلام البنت انا لي بنعيش معاها 🙄انا مش فاهم عليش دايره موضوع
امه>> ربي يهديك
عز>> تقول لقيتيني نسكر ولا نحشش 🙂
طلعت امه وسكرت الباب ورد عز عاود عليا بس ما حكاليش شن صار
.
.
.
.
مرن كم يوم وكلنا اوضاعنا مستقرة مافيش حاجات جديده صارن
عند سارة كانت فالشغل وخشت علي المديره كان حاط اوراق عالمكتب واول ما خشت ساره مسك الاوراق بسرعة وحطهن فالدرج
سارة>>>....
.
.
.
#يتبع
بالنسبة لرواية هذي ف هي مستمرة فالصفحة ، ونراجي ف الادمن الثانيه ترد عليا عشان نتفاهم معاها تلغي روايتها لعند نكمل روايتي 🤷🏻♀️ وماتنسوش اللايك ❤️