لعبة الحياة (رواية ليبية )

حلقة 6

رواية #لعبة_الحياة_
( خيال ممزوج بلواقع )
للكاتبة #أية
الرواية بلهجة الليبية
حلقة 6
🔥
.
.
.
.
رغد >> كنك
مروة >> شي
رغد >> تي عيونك حمر كيف شي
مروة >> وجعتني روحي والله وقعدت تبكي

رغد خافت حد يشوفها مسكتها وخشن للدار

كان الشاليه فيه دارين ودار برا شويه صغيره بكل
وصاله ومطبخ مفتوحات علي بعضهن وحمام
امي وماما وعمتي في دار و نحن البنات في دار
وكانت في دار فاضيه الي هي الدار الصغيره

خشن وسكرت الدار و كانت ميرال فالدار عالنت شافت مروة جت شورها

قعمزت مروة >> شي والله بس هكي واجعتني روحي كيف نحبه وهوا ولا علي باله
و بنات الدنيا كلهن عاجباته ويبحت فيهن ويحكي معاهن الا اما يعامل فيا عادي بكل ومش عارفه ليش ما حبنيش كيف ما حبيته

ميرال >> مروة كنك ؟؟ كيف يحبك الحب مش بالغصب انتي بروحك حبيتيه فجاه هكي وهوا كيف بيندري عليك تحبيه ؟ بينزل علي وحي ؟

رغد >> حببيه فيك

مروة مسحت دموعها >> كيف

رغد >> عمر متعرف علي بنات اشكال الوان بس كلهن يعطن فيه لي يبيها قلة ادب ووقاحه انتي خليكي عكسهن خليكي مروة الي كلنا نعرفوها راكزه وهاديه و مش متاع وجيج واهم نقطة انك معش تعبريه و عامليه كيف ما تعاملي في خوته الاخرين تسلمي وتحكي معاهم عادي لعند هوا ينتبهلك ونحن البنات حانديرولك جو متاع في حد يبي يخطب مروه و مروة جايينها عرب والحركات هذينا لعند يحس بالخطر

ميرال >> وصدقيني لو فيه نصيب حا يجيك و حاتصير حاجه ربي يقربك بيها منه مهما كانت الحاجه هذي انتي خليكي زي ما قالت رغد بس معش تبيني انك تحبيه را والله حا يفطنلك ويقعد منظرك بايخ بكل خليه هوا لي يجيك ويقول نبيك يا مروة وزي ما قالت رغد حركات منا نحن و علي اساس بيجوك عرب وهكي ونحكو قدامه

مروة مسحت دموعها >> نجكن ليا ربي ما يحرمني منكن

رغد >> نكد بكل خلاص خليا نرقدو

وفرشن البنات رقدن ولهن في موضوع مروة وما دورنيش يحسابني رقدت مع ماما في دارها
.
.
.
.
.
.
خشيت انا للدار عالبنات لقيتهن راقدات كريت فراش وبطانيه ومخده وطلعت للدار لي برا وفرشت و اتكيت عالفراش

شويه هكي ورن عز

انا >> الو
عز >> ايوه

ونسمع في صوت الموج حذاه
انا >> كيف ما خشيتش
عز >> لا قعمزت عالشط
انا >> اهاا
عز>> باهي شن تحكيلي؟
انا >> لا اتفقنا انت تحكي لعند ننعس
عز>> قلنا نهدرزو لعند تنعسي مش نحكي بروحي
انا >> انا نوعيتي نحب نسمع
عز >> مايسير شي حتي انا نحب نسمع
انا >> حانبدوها بعركه ؟
عز ضحك >> ههههه ياستي احكيلي شن تقري

انا اذكرت الجامعة وايام الجامعة تنهدت >> اقتصاد

عز >> وعليش تنهدتي
انا >> من هنا تعرفت علي كمال
عز >> من كمال ؟
انا >> راجلي اللي توفى كان اسمه كمال
عز >> الله يرحمه
انا >> تعيش واترحم

سكتنا شويه
انا >> المهم كنت نقرا اقتصاد وما ليش فترة تخرجت كانن ايام حلوة ايام الجامعة

عز >> وليش ما تكملي ماجستير
انا >> لالا ماعنديش راس نقرا بكل خلاص
عز >> بالعكس تمشي وقتك بدال ما تقعدي فالحوش باهي اشتغلي
انا >> من لما كملت قرايتي وانا معش جا في بالي شي مرض كمال وتوفي وهكي و خلاص
عز >> كم له متوفي
انا >> تسع شهور قريب
عز >> معلش بس انتي لازم تشوفي حياتك خلاص حتي هله اكيد صبرو وكملو حياتهم والي يقرا كمل والي يشتغل واللي بيجوز ولي يجيب لعند امتي بتقعدي هكي
انا >> والله ماعندي نيه في ولا حاجه خاطري نقعد في داري و مانحقش حد يطلعو فيا بالغصب ويدهورو عشان خاطري مرات حتي ماعندهمش نيه بس عشاني لكن انا نبيهم يخلوني بس و نجامل فيهم منبيش نزعلهم نبي نبينلهم اني كويسه

عز >> كلهم عارفين لي فيك ومقدرين ويحاولو يطلعوكي بس انتي ساعدي روحك وساعديهم

انا >> ان شاء الله مخليتها للوقت بلكي نقدر

عز >> تقدري اكيد

سكتنا شويه وحب عز يغير الموضوع
عز >> وانا كنت نقرا هندسة و تخرجت طبعا قعدت نعاني في الهندسة قريب ثمان سنين كنت فاشل بكل بس هلي يزرو فيا تخرج تخرج واقرا وشهادة دارولي موضوع

انا >> واهو تخرجت ولقيت روحك
بس غريبة انت هندسة و محمود علوم يعني كيف تعرفتو
عز >> ومن قالك ان انا ومحمود نعرفو بعضنا من جامعة
انا >> من وين معناها !
عز >> تعرفنا فالثانوي
انا >> مشاء الله والله نحسابه صحبة شغل ولا جامعة لانه عمرنا ما سمعنا بيك يعني من مدة خمس سنين اربعه هكي قعدنا نسمعو بيك من محمود
عز >> عوج اصلا لما كنا فالمدرسة كنا مانطيقوش بعضنا اخر سنه وفي امتحانات نهائيه قعدنا رفقه بعدها طلعنا لجامعة مع ان كل حد تخصص بس صحبتنا قوة وبدينا في بزنس وشغل مع بعضنا واهو قريب نخشو فالثلاثين ونقعدو شياب

انا ضحكت >> ربي يدومها

وقعدنا نحكو انا وياه لعند فعلا نعست بدون ما نفطن وخذاني النوم
.
.
.
.
.
.
مرن الايام ومافيش جديد و كمال سكر سنه متوفي
وانا علي حالي ناكل ونشرب ونرقد و البنات يجني وما نطلعش من الحوش واجد غير اني ننزل العيت جدي وعز من بعد هذكي المكالمة كلمني مره وحده يطمن عليا و حس اني مش حابه نحكي معش رن عليا له ثلاث شهور

اما ايه سيبت ابراهيم بكل و فسخت الخطبة وابراهيم قرييييب انكلب وياما دار عشان ينتقم منها طلع عيل بكل ومتخلف وهيه سكرت عليه كل شي

اما مروة معش عطت عمر وجه ومعش يتلاقو واجد لانهم مايتلاقوش الا من جمعة لجمعة فحوش جدي

اما سارة فعلا زي ما قلتلها رن عليها ربيع

في هذك اليوم كانت سارة مقعمزة في دارها و تقرا طبعا سارة خشت معهد انجليزي تمشي بيه وقتها وكان عندها امتحان وتقرا
ملت من القرايا مسكت تلفونها و بتفتح نت رن التلفون وكان رقم ربيع مع انها مش مسجلته بس حافظته

قعد قلبها يدق بالقووووة ومعش عرفت شن ادير خذت نفس ومع اخر رنة ردت

ربيع >> الو
سارة بدىن نيه >> اهلا
ربيع >> كيف حالك
سارة >> كويسه تمام
ربيع >> باهي تمام
سارة >> امممم
ربيع >> وين الغيبة هذي
سارة ضحكت بهزوة >> قاعده خشيت في معهد ونقرا
ربيع >> باهي مشاء الله
سارة >> شن خطرني علي بالك
ربيع >> ديما بالي
سارة انحرجت >> والله
ربيع >> والله
اضحكت سارة وسكتت
ربيع >> بس ما كنتش فاضي كان عندنا عرس بنت عمتي وبحسبة اختي وفي حوشنا كان و معش فضيت و قبلها فالشغل

سارة >> مبروك عقبالك
ربيع >> وعقبالك خلاص نخليكي تقري وبعدين تو نرن عليكي
سارة >> اممم تمام باي
ربيع >> سلام
.
.
.
.
.
وهضا لي صار مع سارة
.
.
.
في اليوم هضا كانت جايتني اية وسارة ما قدرتش تجي عشان المعهد

كنت في داري ورن تلفوني رديت
انا>> الو

ايه >> تي افتحي ندق من مبدري
سارة>> ييييي نحساب حد فالجنان يفتحلك هيا هي

نزلت نجري وانا طالعة لقيت عمو ناصر بيطلع وفتح هوا الباب

ايه >> ساعة وانا ندق معقوله

ورفعت راسها لقاته ناصر انحرجتتت بكل اول ما جت عينها في عينه معش عرفت تصرف
وناصر زي ما تعرفو يتحشم بكل معش رد ولا دار شي 

انا >> يناعليييااا مبدري ادقي

وخر ناصر عشان تخش ايه تباعد وخشت ايه وجها حمر وانا مش فاهمه طلع عمو ناصر وسكر الباب

اية>> تي منووو عليك فضيحة فتحلي الباب نحسابه انتي طلعلي هضا
انا >> عمي ناصر هههههههه هضا الملتزم لي نحكيلكن عليه
ايه >> صححح حسيته يتحشم بكل ما ردش عليا مسكين اكيد يحسابني جالطة

انا >> لالا ناصر ما يركزش بكل و جوه سمح مش ملتزم معناها معقد
ايه >> اهااا المهم شن جوك انتي

وقعدنا نحكو ونمشو وركبنا فوق وهدرزنا وقعدت تحكيلي علي ابراهيم

ايه >> انخددددعت فييييييه والله كيف انا كنت صابره قريب سنتين بس

انا >> سبحان الله عليك قناع كان لابسه
ايه >> اين قناع عشر اقنعة هضا ربي كشفه ليا وحقارته بخيل وواطي وعيل كل العبر فيه

انا >> ربي فكك منه ويرزقك ربي بلي احسن منه

ايه >> ان شاء الله بس حاليا بناخذ هدددددنه ما نبي شي

انا >~ هههههه وخوذي ياحنه

قعدنا نهدرزو مع بعضنا وما طولتش عالمغرب جاها باتها

طلعت ايه مع الباب وروحت وخش عمي ناصر شافها وهي طالعه وانا كنت دوبني كيف خاشه فالجنان

انا >> خيرات ياعمو
ناصر >> او يا عمو وين مختفيه رايحة حتي ايام لقرايا ما اختفيتي

انا >> ههههههه قاعده انت لي منحقوش فيك من الشغل ربي يعين مراتك لي بتاخذها

ناصر >> تحشمي يا فرخه

انا >> ههههههه خطرها مبدري شن قالت لك ايه

ناصر >> من ايه
انا >> تي صاحبتي لي فتحتلها الباب
ناصر >> تي كنها تهزب خطرها
انا >> مبدري ادق وترن وماحد فتحلها
ناصر >> اهاااا صاحبتك هي

انا >> اه ما قتلك صاحبتي
ناصر حك راسه من لاوره >> باهي بنخش انا خشي صقع

انا >> هي
.
.
.
.
.
.
في الليل رن ربيع علي سارة وكانو يحكو عادي

ربيع >> شن رايك بدال المعهد تشتغلي
سارة>> ليا فتره ندور ما حصلتش
ربيع >> انتي اقتصاد صح
سارة>> قسم محاسبة
ربيع>> تمام بكل صاحبي عنده شركة ويدور علي وحده تمسكله الحسابات
سارة >> بس انا ماعنديش خبره
ربيع >> عادي صاحبي هضا مش حا يدور واجد اهم شي تكوني شاطره فالحسابات والخبره تجي مع الشغل

سارة سكتت شويه >> باهي كيف ندير نعديلهم

ربيع >> وتيلي اوراقك وتو ناخذهن منك ونشيلهن و بعد يقولي امتي تبدي نقولك

سارة >> تحكي من جدك
ربيع >> وعليش نبي نبصر
سارة>> مش عارفه لاني من زمان ندور بس شن نقول الهلي وكيف تاخذ مني الاوراق

ربيع >> ساهله بكرا عندك معهد ؟
سارة>> اها
ربيع>> نجي بكرا ناخذهن منك قوليلي الساعة كم

سارة خافت وقعدت تفكر

ربيع >> سارة كنك مرتكبه !!!؟؟ انا نساعد فيكي تلقي شغل اطمني حناخدهن منك ونعدي مش حانطول ولا لو تبي حطيهن عند الكافيتيريا لي فالمعهد وانا ناخذهن

سارة >> باهي انا نكمل الساعه ٧ المغرب

ربيع >> سبعه الا تو نجي
وبالنسبة الهلك قوليلهم بات صاحبتي خو صاحبتي ولد عمها اي حاجه وحصلي شغل

سارة ضحكت>> عنجد بات صاحبتي هههههه
ربيع >> شن تحسابيني شايب را انا كان متجوز را جايب وحده كيفك

سارة >> بطل عاد مش لدرجة
ربيع >> ههههههه امي ديما تقولي هكي
سارة>> الامهات ديما هكي من وانا عمري ١٣ سنه وماما تقولي اللي كيفك فاتحات حواشين

ربيع >> صار نفس الجو
سارة>>> هههههه نفسه

وقعدو يهدرزو ويحكو
.
.
.
.
.
.
في نفس الوقت هضا كان عز مروح بمحمود

عز >>مره اخرى تعال بسيارتك مش سواق بوك انا نجيك ونروح بيك

محمود >> تي روح يا راجل
عز >> انزل بس هويني
محمود >> مش بتخش الحمام خش تفضل سقدني وانت ما يندارلكش سريب
عز >> تي روح معش نبي

محمود >> تي انزل فكني من طروح البنات

طفي عز السيارة ونزل مع محمود

خش عز للحمام
عز >> جيبلي ميه عطشان
محمود >> عليك موضوع بطلع التوصيله من عيوني
عز >> اه جيب بس

محمود خش لقاني مقعمزه فصاله مع عميمه
محمود>> مريم جيبيلي كباية ميه
انا>> حاضر

وخشيت نجيب فيها ومديته لها
محمود >> بحتي فيه ملح
انا فيه اه عليش
محمود >> جيبي بس

انا ستغربت وخشيت جبت
محمود حط الملح فالكبايه
انا >> تي عليش
محمود مدلي الملح>> بنخلي عز يشربه قاعد برا ويتمحقن عليا

انا ضحكت عليه وطلع محمود وكرست ورا الباب بنشوف شن يدير

محمود>> هاك ميه وهويني
عز مسك وشربها مره وحده كان عطشان
عز >> ينعن جد اصصصصصصصلكككك ازح يا محمود
وانا نضحك وضحكت من قلبي علي اللقطه

ومحمود تباعد منه وقعد يضحك

عز جا بيطلق فيه الكبايه

محمود يجري >> وراس العزوز لا والنبي لا فكنا يا راجل وتباعد منه يجري

عز بيطلقها وانا نضحك طلعت صوت فطنلي عز بحت فيا وضحك بحتت فيه و انحرجت عشان شافني ابتسمت و خشيت

عز >> انقنك عيل
حط الكبايه لوطا و مشا

عز >> تو تحق كان وصلتك ولا جيتك

محمود يضحك >> روح روح

وطلع عز و ركب فسيارة دزلي رساله

>عاجباتك حركات عمك >>

وصلتني الرساله وابتسمت

>> ههههههه امسحها في وجي>>

عز << ما شور شي معقوله هكي >>

انا حسيته زعل بجد ومعش عرفت شن ندير مسكت التلفون وكتبت رساله ومسحتها وبعدها حطيت علي رقمه ورنيت عليه

عز>>الو

انا >> قصدك من جدك زعلت ؟؟ والله ضحكت عادي علي بصارتكم بس

عز ابتسم >> اه زعلت
انا >> اسفه مش قصدي محمود هوا لي حط الملح مش انا

عز >> وعليش كنتي تضحكي
انا >> عشان شكلكم يضحك وانتو تناقرو
عز >> يعني ضحكتي عليا

انا >> وقتلك اسفه مش قصدي

عز ضحك>> تو من جدك اتاسفي ؟
انتي شكلك ما شفتيش بصارتنا انا ومحمود كيف هذي عندنا حاجه عاديه مش بصاره

انا تنهدت >> خوفتني منحبش حد ياخذ مني موقف
عز >> لالا ما صار شي

انا >> ههههههههههه بس شكلك يضحك وانت تشرب ومش فاطن للملح

عز ابتسم >~ وانتي شكلك سمح لما تضحكي من قلبك

انا انحرجت >> اممممم

عز >> المهم وين مختفيه الفتره لي فاتت هذي كلها

انا >> ولا حاجه لا جديد
عز >> مازلتي ما تبيش تقري ولا تشتغلي
انا >> لالا محوله الفكره حاليا

عز >> اها المهم انا وصلت للحوش نخش ونكلمك كان واعيه

انا >> باهي

خش عز وتعشا و خش داره رن عليا وكملنا باقي هدرزتنا شويه وبعدها سكرنا ماطولنش
.
.
.
.
.
ثاني يوم عند سارة كانت مرتبكة بكل انها بتشوف ربيع وتحس بشعور غرييييب بكل كان المعهد تقريبا فاضي وسارة مصبيه تراجي في ربيع

وكانت لابسه بنطلون ضيق وبلوزه سودا وويشاح وردي

شويه ورن ربيع
سارة>>انا عند الباب
ربيع خاش عليها >>انا خاش توا

ويمشي ويحكي معاها شافاته وهوا خاش

كان ماشي ولابس اسود في اسوود و لحيته مرسومه وملامح وجه جديه ابتسمت لما شافاته رفع راسه بحت فيها

حولت ابتسامتها عشان ما تبانش باردة

ربيع قدم عليها >> خير
سارة >> خير
طلعت الاوراق من الشنطه ومدتهن له

سارة>> هذينا الاوراق لي تبيهن
ربيع مسكن وقعد يبحت فيهن>> تمام
سارة >> خلاص صح
ربيع >> اه ان شاء الله امتي مروحه
سارة >> خويا شويه ويجيني

ربيع يبحت وفي شباب مقعمزين يبحتو فيهم

ربيع>> باه خشي جوا علي ما جا خوكي 
ومسك تلفونه ورن عليها

سارة استغربت >~ ليش ترن
ربيع >> ردي

سارة فتحت الخط
ربيع >~ خلاص خشي مع البنات جوا علي ما جا خوك وحطي التلفون علي وذنك بنحكي معاك علي ما يجي

سارة استغربت و رقالها من اللقطه ومشت جوا وربيع ركب لسياره

سارة >~ الو
ربيع>> خشيتي
سارة >> نمشي قاعده

وبحتت سارة لقت شباب مصبيين يبحتو فيها فهمت لقطة ربيع

ربيع >> امتي جاي خوكي
سارة >> قالي قريب منك من شويه
ربيع >> تمام

سارة >> اهو خش عليا انتظار
ربيع >> تو نسكر و لما تروحي رني عليا
سارة>> باهي

طلعت سارة وركبت مع خوها
.
.
.
.
.
.
.
.
كنت مقعمزه في الصاله مع خواتي وخشت عليا ماما

ماما >~ سمعتي
انا >~ شنو
ماما >> خو كمال خطب
انا >> باهي مبروك عليه

ماما >> مبروك ما قلنا شي بس شفتي يابنتي حتي هل الميت فكو الحزن وكل حد شاف حياته واول ما سكر كمال سنة خطبو الخوه وسنة اخرى ويطلع عرسة والحياه تمشي لعند امتي يابنتي تقعدي لابسه الاسود و لا ليلك ليل ولا نهارك نهار وتفكري وتخممي

انا عيوني دمعن>> مش بيدي يا ماما والله نحاول بس مش قارده

ماما >> ربي يجيبلك نصيب كويس ونتريح عليك ونحق عيالك وضبطتني

انا>> مازال فيها نصيب خلاص خذيت نصيبي

ماما تمسح علي شعري >> خذيتي نصيبك الشين من الدنيا زعل وموت و مرض ... بس ربي كيف ما ينزل علينا البلاء ينزل الدوا و مازال فيه نصيبك السمح من الدنيا تاخذيه ان شاء الله وتهني فيه

انا فرحتني كلمة ماما بكل >>يارب

رغد >> عدن ابكن جوا المسلسل بدا بنتفرج

ماما >> البنت هذي قليلة ادب جيت عندك ومعش عرفت انربي

انا ضحكت

رغد >> اضحكي اضحكي خزي

.
.
.
.
.
.
.
ثاني يوم فالليل ربيع كان يحكي مع سارة عالشغل وقاللها انه خلال اليومين هذينا حا تبدا

ربيع >> المهم الشركة مازالت جديده ومافيهش موظفين واجد حايكون عندك مكتب وتشتغلي فيه دوامك من ال ٩ لل ٢ وتوكة الليل من ال ٤ لل ٨ يمسك فيها موظف ثاني تمام

سارة >> تمام شكرا بكل والله مش عارفه كيف نشكرك

ربيع >> اشتغلي كويس و بهكي تشكريني
سارة>> ان شاءالله
ربيع~~ حكيتي الهلك
سارة >> دويت الماما اني ندور علي شغل بس ما زال ماقتلهم اني حصلت
ربيع >> خلاص قوليلهم

سار>> تمام

سكرت سارة من ربيع ورنت عليا حكتلي
انا >> هابا منك انتي وانا نقول المعهد هضا مش ببلاش
سارة>> ياحيوانه هي مره وحده وخلاص تي قوليلي شن ندير
انا ~> تي عادي قوليلهم واحد من عمام مريم حصلي شغل ماعارفينك ديما تحكي معايا
سارة >> صح والله خلاص سكري ندوي الماما وبابا دابينهم مع بعضهم فالصاله
انا >> باهي

عدت سارة الهلها وحكتلهم و عشان يعرفوني ويعرفو عمامي وافقو عالشغل
.
.
.
.
.
.
خش علينا عمي ناصر كنت مقعمزه لوطا مع عميمه و امي ومكسدين

ناصر >> السلام عليكم
ردينا عليه السلام

وجا قعمز جنب امه وقعد يوشوش معاها

ناصر >> امي بنجوز
امي>> الله يربحك اخرى تريحني عليك قولي من ونخطبلك
ناصر>> لالا مافيش وحده في بالي انتي ولا زهرة تختارولي
امي >> عارفني مانحبهش الحركة هذي خوتكم كلهم اختارو بروحهم
ناصر >> وانتي عارفتيني مانعرفش نحكي اناا

امي >>خلاص ان شاء الله

وصبا ناصر من حذانا و امي حكتلنا شن قاللها

انا >> واخيرا عمو ناصر
زهرة >> بس يمي من بتختاريله
انا >> صح من

امي >> والله مانعرف شكله الموضوع بيطول شويه لانه ما فيش وحده في بالي له كان محمود هو لي يبي را دغري خطبتله يحب البنات المدلعات ولي يتنوطرن لكن ناصر اول شي ماهوش صغير ويبيها عاقله ورازنه وقالي مانبيهش صغيره واجد

زهرة >> باهي ماقالكش شن يبيها سمرا بيضا شنو
امي >~ ماقالشي اختاريلي وخلاص عارفتيه ناصر ما يعدل

كنت مقعمزه حذاهم و نسمع فيهم بعدها سيبتهم و ركبت

.
.
.
.
.
.
مرن ايام وايام ونحن علي حالنا مافيش جديد عز يرن عليا مش كل يوم يعني كل بعد يومين و بديت نتعود عليه وعلي كلامي معاه وبديت نتعود علي غياب كمال شويه شويه
صح مازلت زي ما انا لا نطلع ولا نخش ولبسي زي ما هو بس مش عارفه هل ربي نزل عليا الصبر او جابلي عز في طريقي هو لي له دور مش عارفه
.
.
.
.
كنت نحكي مع عز فالقايله وكان في المزرعة مع اصحابه ومعاهم محمود

عز يحكي بتلفون جا محمود شوره

محمود >>تي من هذي لي واخذتك منه بس حتي ايام وانت مراهق ما درتش هكي

عز ارتبك بكل وحس بموقف بايخ >> تي اجري يا راجل عدي دور جماعتك
محمود >> صار تلز فيا علي سباها ان شاء الله تستاهل بس

عز دارلي كتم وفلم علي محمود وعدا محمود يضحك

سكتت شويه انا وعزز
انا >> لو الموضوع هضا مضايقك تقدر معش نحكو عادي

عز >> عادي ؟؟
انا >> مش هكي بس نحس فيه موقف بايخ ليا ولكي وبذات انتو الشباب وتفكيركم احتمال تخسر محمود

عز >> ومن قالك اني بندس عليه اكيد حانقوله و محمود حا يفهم مني
انا >> وشن حاتقوله نحكي مع بنت خوك اصدقاء ؟ عارف انه فكرة اصدقاء هذي مش دارجة عندنا مش في اوروبا نحن ومش حا يتقبلها

عز >> ومن قالك حنقوله هكي

انا استغربت >> شن حا تقول

عز >> لوقت ما نبي نحكيله تو نعرف كيف نحكي ما تشغليش بالك بالموضوع

انا تريحت >> امممم باهي
.
.
.
.
.
.
.

ناصر يحكي مع امي علي موضوع الخطبة

ناصر >> حاجه طولتي لكي ثلاث شهور معقوله
امي >> والله ياباتي تحق فيا بروحك لا نطلع لانخش بيش نشوفلك
ناصر>> باهي وزهرة

امي >> قتلها ودورلك
ناصر >> تقول ادورو في ذره

طلع وانا كنت نازله مع البنات خواتي لوطا بنطلعو للجنان

زهرة >> يختار بروحه يا امي مالك وماله
امي >> ماني عارفه منين طلعلي بهالقصة

انا فكرت شويه وجيت قعمزت حذاهم >> عندي لكم عروس بس بشرط قبل ما نقوللكم عليها انا مادخلنيش بمشاكلهم بعدين كان صار نصيب مش تقولو مريم جابتها

زهرة >> احكي من وما عليكي
انا >> ايه صاحبتي تعرفيها صح

زهرة >> نعرفها بنيه كويسه بس مش مركزة فيها

امي >> هذي لي تجيك اين وحده فيهن ؟؟ البيضا
انا >> لالا هذكي سارة .. ايه قصيرونه شويه و شعرها اسود مش طويل واجد لعند كتوفها ملامحها حلوات

امي >> والله يا بنيتي ما نعرف جيبيها شي يوم هنا و خلي ناصر يشوفها

انا >> خلاص تو نكلمها من بكرا بيش حتي نحكيلها
بس البنت كانت مخطوبه راه من قبل وفسخت

زهرة >~ ليش

انا >> دلالة وما تعرفتش عليه كويس وفي فترة الخطبة طلعن عيوبه وسيباته

زهرة >~ معناها قبل ما نديرو شي رسمي خلي ناصر يحكي معاها
انا >> هضا لي بنقنع ناصر بيه

زهرة >~ تمام باهي

وطلعت برا انا والبنات ورنيت علي سارة حكيتلها لي صار و قتلها ما تقولش الايه و قتلهن يجني اليومين هذينا عشان ندبر موعد الايه و ناصر
.
.
.
.

طبعا سارة بدت شغل و كانت تحكي مع ربيع شبة يومي وتعلقت بيه بكككككل و شكلها بدت تحبه

كانت فالمكتب متاعها فالليل كانت ماسكة علي الموظف لي معاها توكة الليل كان عنده ظرف وكان عندهم جرد فالشغل و ماكانش فيه موظفين الا هيه و البواب و المدير و سكرتيرته

كانت في مكتبها رن عليها ربيع

سارة>> الو
ربيع>> ايوه روحتي
سارة>> لالا ساعة اخرى ونروح شغل واجد اليوم
ربيع >> باهي تمام
سارة >> انت وين

وكانت تحكي و مطبسه راسها عالاوراق وتمشي شور الادراج لي ورا الباب وتفتح فيهن بتنظم الاوراق

ربيع >> قاعد عندك

سارة سكرت الدرج ووقفت >> عندي وين

خش ربيع بسرعة و سكر الباب وخبطت سارة فالدرج لي لاوره

ربيع >> عندك هنا

سارة >> شن جاي ادير هنا انت
ربيع >> شركة صاحبي نجي امتي ما نبي
سارة بصوت واطي>> ربيع اطلع
ربيع قدم عليها شويه وهيه وخرت لصقة فالدولاب >> وعليش خايفه

سارة خافت لما قرب منها و نزلت عيونها من عليه وارتبكت >> اطلع لو سمحت مش حلو شكلي لو حد شافني هكي

ربيع حط يديه عالساس وهي بين يديه وكانت اقصر منه وهو مطبس عليها >> شفتي كيف خليتيني انتي ؟

سارة بصوت واطي و اتنفس بسرعة >> ربيييييع
ربيع >> يناعليا وخلاص
نزل يديه من عالساس ووخر من عليها وسقم جاكته و طلع

سارة خذت نفس قوي وفتحت الباب و ردت الشغلها وهي متلخبطة بككككككل ... مش عارفه هل ربيع يحبها و هي مشاعرها اتجاهه حب ولا شنو والحركات هذينا خافت يكون ربيع يلعب بيها معش فهمت شي وقررت بعد تروح تحكي معاه وتفهم منه
.
.
.
.
.
.
في حوش جدي كان عمي بات مروة مخطم يبي جدي في موضوع وكانت مروة معاه وبالصدفة عمر كان جاي يدور في عمي محمود

خش عموري وشافنا مقعمزين سلم علينا وقعد معانا

كنت انا ومروة ورغد بس برا

رغد >> بنعدي نشوف المسلسل اكيد بدا
انا >> يييي عميمه مبدري كلمتني نسيتها بكل

صبينا نحن الاثنين ومروة رقالها منه

عمر بحت في مروة>> كيف حالك

مروة اذكرت كلام البنات وقعدت تحكي معاه عادي ما تبيش تبينله شي

مروة ابتسمت>> كويسه الحمدلله
عمر >> باهي تمام لنا زمان مل شفناك
مروة>> نقرا والله مش فاضيه بكل توا بابا جا يبي جدي قلت نجي نكسد مع البنات علي ما كسد

عمر يبحت فيها  واستغرب كيف تحكي معاه عادي لما كانت اطنش عليه>> اها
مروة>> بنعدي نشوف البنات

وصبت وعدت بدون ما تعبره ولا تبحت فيه
.
.
.
.
.
.
روحت سارة من الشغل ودوشت و دزت الربيع رساله
* بعد تروح رن عليا نبي نحكي معاك •

وشويه هكي ورن ربيع

ربيع >> الو

سارة >>....
.
.
.
.
.
#يتبع
ماتنسوش اللايك