رواية #لعبة_الحياة_
( خيال ممزوج بلواقع )
للكاتبة #أية
الرواية بلهجة الليبية
حلقة 2
🔥
خذت اميه وقعدت تشرب مع خشت ربيع يكلم بتلفون
ربيع : طريقك بيضا وحده وحده بس ويضحك
ضحكته كانت سمحه وساره تبحت فيه
ربيع بحت في ساره : خلاص اوكي توا وسكر التلفون
ساره فطنت الروحها حطت الميه عالطاوله وجت بتطلع
ربيع : انتي ماتبيش تريحي روحك وتهمدي في مكان واحد
سارة بحتت فيه بصدمه : نعم ؟؟
ربيع : مره نلقاه عند باب الصاله مره عند الباب البراني
سارة مصدومه و منحرجه من الموقف ووجها حمر بكل مع خشت اخت كمال الصغيره كانت فالاعدادي : حيييي ربيع نحسابك بتوصل كمال
ربيع : لالا عدا بروحه
ساره ساكته وتبحت فيه ووجها حمر وربيع يبحت في ساره
اخت كمال : انتي سارة صاحبة العروس صح
ساره هزت براسها
اخت كمال : انتو الاثنين تهنيتو علي اصحابكم اليوم وضحكت وطلعت
ساره بسرعه بدون حتي ما تبحت فيه مرت من جنب ربيع وطلعت وقلبها يدق
ربيع ضحك وطلع
.
.
.
.
.
عندي انا وكمال
وصلنا للفندق وخشينا وكنت متريحه مش مرتبكه بس متحشمه شويه
كمال : جيعانه؟
انا : بكل يا روحي ونعسانه
كمال : من اللي نعسان ؟
انا ضحكت : شن كنا نحكو نحن لنا شهر ؟
كنا نقولو بشويه صح ؟
كمال : شوية هذي من
انا : حبيبي
كمال : مانعرفش حد اانا
وكان يفتح في بطم السوريا متاعي
انا : خليني نحول الڤيلو باهي نفك التسريحه
كمال يضحك : كله تو نديره اناااا
خليكي بس
.
.
.
.
ومر تقريبا اسبوع وعدينا لمشرق وروحنا ما قدرنش نتباعدو لانه امتحانات كمال قربن ومابيتش نخرب عليه مازاله شويه ويكمل الماجستير
انا : حبيبي ليوم بنمشي الهلي باهي وجاياتني سارة وايه
كمال : تمام يا عيوني تو نشيلك بعدين
انا : تمام تريح شويه و تو نواعيك علخمسه هكي نكون واتيه
كمال : تمام
خش كمال رقد وانا فتحت التلفزون وقعدن نبرم عالحوش و مكسده بكل
حوشنا بروحنا في عمارة عندنا جيران بس مازلت منعرفش حد
.
.
.
.
في العشيه لبست ومكيجت وشلت معايا حلويات وفاكهه و عصاير جابهن كمال و مشيت لهلي هذرزت معاهم ومع خواتي و جن فالعشيه ساره وايه وقعدنا نقرمو ونهذرزو
ايه :ها تنصحيني نجوز ؟
انا : ننصحك بقوة اخري
ساره : ههههههههههه حقيرات
ايه : خطرها ماحكيتيلهش علي صار
ساره : نسييييت تعالي نحكيلك
وحكتلها علي قصة ربيع
انا: ما طحتي الا في ربيع من توا نقولها لكي ربيع ما يمشيش معاكي بككككككل انتي وياه زيت ونار
ربيع عصبي و شايط ديما كمال حايس في جرته وانتي معانديه وراسك يابس
ساره : تو حقيتيني قتلك نبيه ولا تحقي فيا غير ميته فيه موقف ونحكي في لكي
انا ضحكت : عموما ياستي هضا رفيق كمال اصغر منه بسنه ومتخرج من اقتصاد برضو ، ولد واحد دلوع امه ما تحمل فيه شي و تبي تجوزه وهو ما يبيش كمال ديما يقولي امه تكلم فيا وبعذ اجوز كمال فرحت امه قالت اكيد حتي هوا تو يجوز
ساره : وكنه ميبيش يجوز
انا : الله اعلم بس كمال قالي انه مايحبش الروتين ميحبش يربط روحه ولا يتقيد
ايه : يا سلام عليك خبر
سارة : عنه ما جوز فوتي احكيلي توا علي كمال والجو والحركات
انا ضحكت : انتي قليلك ادب هههههههههه
قعدنا نهدرزو وكانت عشيه سمحه وفي الليل روحت
.
.
.
انا >>كمال تبي عشا
كمال : لالا حطيلي حاجه خفيفه
انا : حاضر
لبست بجامة وخشيت للمطبخ درتله وقعمزت حذاه وهوا كان يقرا
انا : حبيبي خلاص قرايا عاذ
كمال : شن تبي انتي بزبط وكان مطبس علي كتاباته
انا : ههههههههههه مش قصدي هكي بس نبيك اتريح
كمال يقلد علي صوتي : نبيك اتريح
انا ضحكت : خلاص خلاص اقرا
سكر كمال لكتتاب وبحت فيا ؛ انت خليتي فيها قرايا
انا : كمااااال هههههه قتلك اقرا
كمال : مش قاري تعالي نقراك انتي
انا : لالاااا منبيش
.
.
.
.
انا : ياريتني خليتك تقرا
كمال : انتي تنابشي
انا : هههههههههه
مسك دخان وطلع يدخن واانا خشيت دوشت
كمال : صحه
انا : سلمك
كمال : راسي يسطر فيا بكل
انا : من هل قرايا صبيت جبتله بنادول وكبايه اميه
شربهن ورقدنا
.
.
.
.
مرن شهور وحياتنا عاديه بكل انا كمال كمل امتحانات ونجح وخذا الماجستير وانا ليا اربع شهور متجوزه وما حملتش وكلهم يبوني نحمل بس كمال مش معدل بكل ولا عمره حكالي عالعيال
.
.
.
.
كان كمال مكسد مع ربيع فالقهوه
ربيع : لعند امتي متبيش تحكي
كمال : مصيرها حتعرف
ربيع : انت مش حا تقول ؟
كمال : حسيت روحي حصلت والله
ربيع : انت تعرف من زمان من قبل حتي ما تجوزها بس اصريت تكمل
كمال : انت عارف انه موضوع صعب عليا وعليها وخصوصا انه مش عارف النهايه شنو
ربيع : كيف النهايه شنو بلا حركات عيال صغار مش حايصير الا كل خير
ربيع حب يغير الموضوع : خطرها ما حكيتلهش علي البنت هذكي
كمال : ساره
ربيع : اه
كمال : نسيت هههههه شن تبي فالبنت
ربيع : مش عارف حطيتها في راسي هك😂
كمال : العب بعيد هذي كيف اخت مريم مستحيل اتحمل فيها حاجه
ربيع : تم بكل تو ندير موضوعي بروحي😒
روح كمال للحوش وربيع كسد شويه وروح
.
.
.
.
ساره. كانت مكسده عالفيسبوك اتفرج جتها رساله عالخاص
فتحتها وكانت من اسم غريب والصفحه مديوره لها كم يوم بس استغربت مابتش ترد
هو : ماتبيش تردي
سارة ؛تهيالي واضح قريت وما رديتش معناها منبيش نرد😒
هو : وانك رديتي😒
ساره ؛ به تفضل😒
هو: زيد فضلك كيف حالك
سارة: والله جد 😂
هو: كيف تحسابيني نبصر
ساره :شكله دمك خفيف وحاتفضل معايا لقائمة البلوك
هو : بلا ما ديري حظر شكلك مش البنت لي ندور فيها خلاص سلام🙂
ساره قعد عندها فضول تعرف القصه شافت المسج وماردتش وقعدت تفكر شويه بعدها دزتله : كيف انت كنت ادور عليمن 🌚
هو ضحك : كنت ندور علي وحده اسمها سارة هيه سمحة ملامحها حلوات ❤️
سارة : لا يبقا مش انا لاني مش سمحه ولا ملامحي حلوات😂
هو : اه باين من اسلوبك🌚
ساره رقالها بككككككل وتعقدت سكرت الماسنجر ومعش ردت عليه بكل وفاتت الموضوع
.
.
.
.
مرت فتره وانا حياتي كويسه وكل حد ماشيه حياته عادي
بس كمال كان متغير : كان ديما يفكر و ديما برا لحوش وحتي لو يقعد فلحوش معش يعدل عليا واجد كنت دايره روحي مش فاطنه قلت بلكي مشاكل فشغل وماعدلتش واجد
كنت مقعمزه نحكي معاه وهوا سارح
كمال: اه شنو
انا :اووووف نفس القصة كل ليلة نقعد نحكي وانت في عالم ثاني مليت انا 🙂
وصبيت لدار تنهد كمال وخش ورايا وكنت مقعمزه عسرير وخانقتني العبرة
كمال قعمز جنبي :سسامحيني يعيوني انا نمر بظروف ما يعلمش بيهن الا ربي والله عقلي مش معايا
بحتت في كمال وخفت من كلامه : انا كنك خوفتني
كمال : مشاكل في الشغل وتو نحلهن انتي منبيكش تفكري في شي ولا تزعلي
انا : لا نزعل لما تكون مش معايا ونحكي معاه وعقلك مش معايا و معش تدور فيا ولا تحكي معايا زي قبل كنك تغيرت
كمال تنهد : اخخخخ
انا خفت بكل من تبحيته ومن كلامه ومن كل شي قعدت نبحت فيه : كمال احكيلي شن فيه حاتريح وتريحني والله ما تخلينيش هكي وتقعد تحكي بالالغاز🙄
كمال تنهد وضحك : كنك تحبي الدراما انتي
انا : انت الي ادير في طروح😒
كمال : بنعدي نرقد انا بكرا عندي شغل
انا : باهي ندوش ونجي
.
.
.
.
رقدت انا وكمال ونضت فالصبح انوض في كمال لقيت جسمة ساخن و وجه اصفر و منغصر
انا : كمال كمال
كمال يتنهد وما يردش
انا : حيييي عليا كمال
صبيت نجري كريت التلفون ورنيت علي خوه وقتله يجي يشيله للمستشفي
قتله خايفه و لبسه عبايتي و كان كمال دايخ لبسته تيشرت لانه كان راقد ب كت و خليته بسروال البجامه
جا علي يجري وخذينا كمال ومشينا بيه للمستشفي
علي : خليكي تو نشيله ونرن عليك
انا دفيت علي وسكرت الباب : مستحيل نقعد
وكنت نبكي و علي ماسك كمال وكمال محوتك يمشي و انا ماسكتله يده ساندته
ركبانه السياره من لاوره وركبت معاه وعلي يسوق بينا
كمال قعد يحكي بصوت واطي : شيلني شور دكتور انس فالصفوة
علي : شن قال
انا نبكي : قالك شيلني لصفوة دكتور انس
علي وجه تغير و سكت وانا ما كنتش فاهمه
انا : من دكتور انس
علي : قريبنا
ويجري علي بسرعة وكمال مره يفطنلنا ومره يغمض عيونه
وصلنا بيه للمستشفي ومن حضنا كان دكتور انس قاعد و ماسك يومها
خش بيه علي طول لطواريء و انا وعلي قعدنا برا
علي: كنه شن كان يحس
انا قعمزت عالكرسي وشابكة يديا في بعضهن : والله يا علي مانعرفش كنت امس نحكي معاه ونهدرزو وخش رقد قالي بكرا عندي شغل جيت نواعي في اليوم لقيته زي ما شفته وقعدت نبكي
علي : خلاص انا قتلك اقعدي فالحوش
ورن تلفونه
علي : يييييي هضا باتي طلعت مستعجل ماقتلش
انا : ماتشغلهمش
علي: لاوين لازم نقوله
رن علي علي باته وقاله و جا باته بسرعة و طولنا فالمستشفي والدكتور معش طلع
انا : يا ربي ليش طولو هكي شن فيه
وانا نحكي طلع دكتور انس و سلم عليه بات كمال وكان شكله في بينهم معرفه قويه وكلهم مستغربين من دكتور انس ليش ماسك حالة كمال وليش كمال طلب يمشيله
علي : شن فيه يا دكتور
دكتور انس : لا ما فيش الا كل خير ارهاق عام و ضعف فدم ركبناله و درناله كل شي واموره تمام
انا صبيت : نقدر نشوفه
الدكتور : اهو توا شويه ويصحصح خشو شوفوه كلكم
انا : تمام
الدكتور : علي شوف كمال و تعالي علمكتب
علي هز براسه وخشينا كلنا علي كمال و كان تاعب و حالته حاله روح باته بعد اطمن عليه وعلي طلع بيشوف الدكتور
انا نبكي
كرني كمال من يدي : انا كويس
انا : لالا انت مش كويس شوف وجك اصفر و كيف عيونك تعبانات
كمال : معش تبكي تو نقعد كويس
انا نبكي
كمال قربني لحضنه : مانبيكش تبكي انا خذيتك قوية ودمعتك ما تنزلش بساهل
انا حسيته مضايق عشاني نبكي مسكت روحي وزمطت ريقي وعيوني فيهن دموع ماسكتهن: خلاص هاه سكتت شفت انا كويسه بس انت خليك كويس ومعش ادير هكي ولما تتعب قول انك تعبان
كمال : انحبك
انا : نموت فيك ... خليني نصبي نجيبلك ميه شكله ريقك ناشف
وصبيت وكان قلبي مقبوض بكل ومش متريحة و مشيت بننزل وخطمت من مكتب الدكتور فتحته بشويه ونسمع في علي يحكي
علي : من امتي يادكتور هو مريض ؟؟ ومن امتي اتبع في حالته انت بذات
دكتور : تقريبا ٩ شهور هو مصاب
علي : وشن الحل و المرض وين واصل انا مش فاهم شي
وكان علي يحكي بسرعة وداهش ومش عارف يحكي
دكتور : انا جبتك نحكيلك حول القرابه لي بينا اني راجل عمتك انا كدكتور وهضا واجبي كمال رافض العلاج والمرض بدا ينتشر والصفايح بدن يتعبن والجسم يقاوم ف طبيعي اللي يصير معاه
علي : ياانس الله يربحك قولي شن اندير انا شن في يدي كمال حا يشفي
انا كنت نسمع والصدمة علي وجيييييي !!!مليون سؤال في راسي ! كمال بشنو مريض ومعقولة حالته خطيره كيف ما يحكي الدكتور ! وشن مدي خطورة حالته ؟؟؟؟ وشن هو المرض اللي كمال رافض يتعالج منه !!!!
دفيت الباب وخشيت عليهم نعيط ونبكي : كمال شن فيه انا سمعت كل شي ما تكذبوش عليااااا قولولي توا شن فيه
علي حط يديه علي راسه وساكت والدكتور صبا سكر الباب وقعد يهدي فيا
دكتور انس : صبي يا بنتي نحن نبي نعالجو الموضوع مانبوش نزيدو الطين بله ساعدوني انا حكيت العلي نبيه يساعدني انتو هكي حاتدمرو الدنيا
علي رفع راسه و هز براسه شوري : احكيلها هي اكثر حد من حقه يعرف
دكتور انس : توعدني انها تصبي وتبطل بكا وتساعدنا حا نحكي
انا مسحت دموعي و قلت ندير اي شي عشان كمال : احكي
دكتور : كمال عنده سرطان فالدم و المرض في جسمة من ٩ شهور وكل فترة وفتره كان يجي يغير في دم و نعطو في في علاج بس همل روحه اخر ثلاث شهور عشان العرس و الماجستير وكان فرحان بيك لدرجة نسا صحته ونسا انه مريض
وتوا كمال مناعته معش اتحمل و احسن له والصحته يقعذ فالمستشفي الفتره هذي عشان نتحكمو فالصفائح وعشان نديرو تحاليل ونعرفو شن نقدرو نديرو
الدكتور يحكي وانا نحس فالدنيا تبرم بيا نحس ان الدنيا وقفت العالم وقف كلام الدكتور الوحيد يزن في راسي نحق فالدار سودا و كل شي اسكر ، عارفين شعور الصدمه القويه الي من قوتها تقعدو تقولو اكيد نحن توا في حلم مستحيل اللي صار يقعد حقيقه
ما درتش اي ردت فعل طلعت من حذاهم و خشيت للحمام ضربت روحي كف عشان نستوعب اني انا مانحلمش وانا في واقع
.
.
.
.
كلم علي ربيع وربيع الوحيد لي كان عنده العلم من بداية القصة و ما بش علي يقولها الهله قال علي الاقل يومين لعند نعرف شن نحكيلهم
ربيع : قتلك من الاول انا
كمال : يارا ما تزيدهش عليا الله يربحك
ربيع : شن قال الدكتور
كمال : نفس الكلام لي يقول في ديما
لازم تقعد فالمستشفي ، لازم اتعالج ولازم تقعد تحت مراقبتنا
ربيع : وانت شن حا دير
كمال : انا نبي مريم بسسس مريم من اول وا عرفت اختفت من عليا
خش علي في يده قهوة
كمال : مريم وين
علي اهي راكبه ورايا
عندي انا قبل ما ربيع يركب الكمال شافني مقعمزه ونبكي لوطا
ربيع : عشان هكي كمال ما حكش الحد من الاول عشان عارف كلكم حاتقعدو تبكو وكلكم ما تضعفوه بدال ما تقووه
انا : ربيع كمال ما عندش زكمة !! كمال عنده لوكيميا !! اخطر نوع مرض في الدنيا
ربيع : عارف وهوا عارف كويس شن اللي فيه وهذي رغبة كمال عارفتيه انتي كيف هوا مؤمن بانه مافيش مرض يقدر ياخذه من الدنيا قبل يومه وانه ايامه حايعيشهن سوا مريض ولا مش مريض بس انتي ما تديريش هكي وخليك معاه وقويه
انا سكتت
ركب ربيع و بعدين علي ركب و انا خشيت للحمام وغسلت وجي
انا : مستحيل نخلي المرض يفرقنا و انا حانكون معاه ونقويه لاخر نفس فيا وفيه
مسحت وجي و سقمت لبستي و ابتسمت ابتسامة صفرا وركبت فوق اول ما خشيت كمال بحت فيا بنظرة كلها خوف وحزن وكسره
بحتت في وضحكت طلع ربيع وعلي وانا جيت ومسكت يده : ليش ما قتلي من لما عرفت
كمال : شن يفرق ؟ اهو عرفتي
انا : بس انت وعدتني من يوم عرفتني ما دسش عليا شي
كمال : حقك عليا وابتسم
كنت نبحت في عيونه ومسكت يده بيديا الاثنين : انت عارفه اني نموت فيك وعارف انه حياتي مستحيل نقدر نكملها بعدك لو انت يسيرلك شي انا حا ندمر عشان هكي مش حانخلي شي يصيرلك وانت حا تكون معايا وليا طول العمر ونوعدك نكون قوية ونقويك
كمال قرب منها وحضنها وقعد يمسح علي شعرها :كان نلقا الدنيا توقف عند اللحظة هذي ومعش نبي شي
.
.
.
.
مر اسبوع وانتشر خبر مرض كمال فالعيله وانا كنت مع كمال فالمستشفي ووعدت روحي اني مانزلش قدامة ولا دمعة ولا ندير قدامة اي لقطة تحسسه اني شافقه عليه قررت نتعامل معاه عادي ونقويه ماننكرش اني لما نكون بروحي ننهار وندمر بس هضا اختبار من ربي ولازم نكون قويه
عند سارة طبعا اكيد تعرفو ان الايميل لي يدزلها كان ربيع و اختفي ربيع بكل من لما كمال خش للمستشفي وسارة قعد عندها فضول تعرف هو من بس ما تبيش تخش عليه و ربيع اختفى مره وحده
كانت سارة مقعمزه تفكر : اوووف فنهاية شن فيها لو دزيت لايعرفني لا نعرفه
مسكت تلفونها ودزت علامة استفهام وللاسف ربيع ما كانش فاتح صبت سارة وخشت للحمام توضت وصلت و قعمزت تفرج عتلفزون ونعست بترقد
ربيع : خير
سارة : خير
سكتو هما الاثنين
سارة : ممكن نعرف انت من
ربيع : لانعرفك لا تعرفيني وغلطت وحقك عليا اسف
سارة استغربت كلامة لانه كان ديما يحكي معاها ويضحك و يبصر معاها
سارة : مش قصدي هكي يعني مش عارفه بس براحتك
ربيع : نقدر نرن عليكي ؟
سارة سكتت وخافت وما ردتش
ربيع : مش حاناخذ من وقتك بس بجد انا مضايق ونبي حد مانعرفش لا يعرفني نحكيله و ثاني يوم نوعدك نسكر الايميل هضا بكل و نمسح رقمك
سارة حست بيه مخنوق بكل
ربيع سكت وما حبش يكثر عليها
سارة : عطيني رقمك
ربيع تو نرن عليكي انا
عطاته سارة الرقم وقعدت خايفه وقلبها يدق يدلف بالقوووووة قريب يطلع
رن ربيع علي طول وخشت سارة للدار وسكرتها
ربيع تنهد : الو
سارة بصوت خايف وواطي : احم الو
ربيع ابتسم : كيف حالك
سارة : كويسه وانت
ربيع : تمام
اسمعي ما نبيش نقولك انا مانعرفكش ونديرلك حركات فروخ ... حانخش فالموضوع طول
انا ربيع صاحب كمال
سارة رقالها : وكيف تقولي مانعرفكش !! قصدك كنت تستغفل فيا عشان بس نحكي معاك وانا لي شفقت عليك ونحسابك بجد عندك حاجه ضرورية مخربه حياتك والله كان قلبي حاس اني لي درته غلط
ربيع : هدي هدي هدي انا ما كذبتش تو انتي تعرفي حاجه عليا خاطي اسمي ربيع
سارة سكتت
ربيع : وانا مانعرفش غير اسمك سارة واطمني مانبيش نعرف اكثر
سارة : عليش جبت ايميلي🙄
ربيع : يوم الموقف لي صار في عرس كمال سالت كمال عليكي و قالي انك صاحبة مريم وقعد يضحك عليا اني سالت عليكي و المهم مش عارفه عليش درت ايميل ثاني وماخشيتش ب ايميلي بس اهو هضا لي صار و صدقيني والله شلت الموضوع من بالي و حسيت اني عيل وحركات عيال لي درتهن لعند مبدري انتي دزيتي😒
سارة سكتت : وانا مش عارفه ليش دزيت🙂
ربيع : عادي تصير 😂
سارة : المهم انت اكيد مضايق علي موضوع كمال
ربيع : اااه لمشكله كلهم عارفين جديد انا من زمان عارف متبع معاه الالم والعذاب كله
سارة : الله غالب هكي ربي كاتب ربي يشفيه ان شاء الله ويخليه لكم
ربيع : يارب
سارة حبت تغير الموضوع وقعدت تسال فيه علي حياته وربيع كان يرد ويهدرزو و طولت المكالمة بكل وامتدت لساعات طويله
ربيع : انتي شكلك نعستي
سارة بصوت نعسان: الساعه خمسه الفجر توا خلاص حنرقد
ربيع : وانا شويه وبنمشي للمستشفي
سارة : حتي انا بعدين حانجي
ربيع : اي ساعة
سارة : عال ١٢ انا وايه صاحبتي بنجو المريم منبوش نسيبوها حنقعدو شويه ونروحو
ربيع : تمام خلااص نخليك ترقدي و سامحيني كان ضايقتك وزي ما قتلك الايميل حانسكره ونوعدك مش حانرن عليكي وحاننسا كل اللي حكيناه
سارة اضايقت بس في نفس الوقت ما بتش تبين : فرصة سعيدة وتصبح علي خير
سكر الخط و ارقدت ساره
ربيع فيه طبع لما يقول كلمة مستحيل يتنازل عليها وبما انه قال مش حا يرن فكلمة راجل
.
.
.
.
في المستشفي
.
.
.
#يتبع
الاحداث سريعة شويه في بداية الحلقات بس عشان تعرفو القصة وحده وحده وتبدا توضح