رغم عذابك ألي حبيتك((باللهجه العراقيه))

part-28

يله نبدء
بسم الله
-صلو على النبي-

ديم"تذگرت شنوو صار وياچ ع رائد أحسچ چنتي من چذبه اله.

ياسمين"گلتي بعظمة السانچ چنت مو هسه هو هسه بالنسبه اليه شخص عادي وجوده من عدمه مايفرق شيء ويايه ماضي ونسه..

ديم"متاگده نسيتي لو لحالچ تسولفين...

ياسمين"نسيته لاتخافين..

ديم"لعد انطيني أشوف تلفونچ...

ياسمين"ميحتاچ حذفتهن ونسيته أصلآ صحيح وينها نور عنچ شفتها ويه عبدالعزيز وعايفتچ بوحدچ..

ديم"ع طاري نور أنتي سمعانه شيء عن عبدالعزيز احچيلي لاتخافين ما أگول لاحد...

ياسمين"سمعت بالصدفه بس چنت بالگافتريا بطاري يريد يوگع نور بحبه وحولت أگول لنور گدامچ بس مدا تفهم بس هسه اني واباوع ع عبدالعزيز أحس نوايه صادگه وياها مبين حبها ونسه سالفت التحدي..

ديم"مبين عقلچ يمهم ودا دافعيلهم.

ياسمين"مدا ادافعلهم واگبر دليل نفوره الواضح من محسن لن دا يتقرب من نور.....تره محسن خاف ماتدرين معاف بنيه ماواعدها بالچامعه حتى يگعدون جميع بالگافتريا واني أشگ انو يريد يتقرب من نور بحچة ابن منطقتها بدون متدري..

ديم"شگلچ ياعمري متابعه أدق التفاصيل..

ياسمين"غير الواحد لازم بس يمشيء يرگز ع الي حوله..

ديم"لعد أذا تعرفين گل هذا ليش أنعجبتي برائد

ياسمين"هيچ لحالي أنجذبت بشگله واسلوبه بس تره عرفته مصادق بنات وماحسسته اني مهتمه بي واخر شيء ابتعدت عنه رائد بالنسبه الي ماضي وراح وهسه اني انتظر مستقبلي.

ديم"يعني اذا حچه وياچ ماتحچين وياه.

ياسمين"طبعآ وعفيه عوفيني من هذا الموضوع لن يزعجني وهسه سلامي أروح افتر لچ واهس تجين.

ديم"لا الله وياچ..
راحت ياسمين

واني أگول ماصدگ بانه ماضي ونسه يايسمين انتي ورائد اثنيناتكم تگابرون هذا الشيء واضح مثل الشمس..

گعدت دقايق وبعدها گمت من مگاني صار وقت المحاظره......رحت أمشيء بتجاه القاعه....
ردت أفوت بس گان فارس مستند ع الباب ودا يتصل وگفت بعد متره عنه هذا ميحس شنو هل وگفه مالته اريد افوت ساد الطريق.

ديم"هي شويه طريق أريد أفوت..

فارس"الواحد يگول من رخصتگ او اذا ماتصير زحمه اريد أعبر تادبي بالحچي واني عندي أسم مو هي.

ديم"مانتظر اسمع النصايح منگ ولگ وجه تطلع گدامي بعد الگلام الي سمعته انت صدگ ماتستحي المفروض ماتشوفوني وجهكم ع سالفة صديقگم لنگم گلگم خططتو وياه.

فارس"شگرآ لانچ ذگرتيني ع التصرف الي سويته گدام أصدقائي راح أحاسبچ علي..

ديم"بدون لغو زايد بعد عن الباب لا افضحك گدام الصف واگول دا يزعجني..

فارس"ليش ضايجه مو ع طبعچ لو تريدين تعتذرين ع اغلاطچ ويايه ومتعرفين شلون.

ديم"ماعاش الي يضوجني وماعتذر خصوصآ من اهبل مثلگ.

فارس"تذگري گلشيء بهل حياة له ثمن وثمن ألفاضچ راح تدفعينه واول شيء أبتعاد صديقة عمرچ لن أگيد مراح تصدگچ ونصيحه اذا بقيتي بوحدچ تعالي أواسيچ ماعندي مانع..
ديم"روح من گدامي احسلگ واذا طلعت بوجهي مره ثانيه تعرف شراح اسوي بيگ..

أبتعد عن الباب وگالي بصوت ناصي"دخول النار مو مثل الخروج منها..

فتت للقاعه

بدت المحاظره اجانه دگتور علم الارض العملي.....بده يشرح الماده وبس خلص گال أگتبو أسماگم انتو الموچودين....حضور..

دكتور هاني"احذرو من سالفه أگو طالبه قبل سنتين گتبت صديقتها حضور وبس حچيت وياها بره القاعه واعتذرت مني ونصحتها.....حجالنه مثل مگالت البنيه لنوور......

وگال لحد هسه دا أشوفها بس تستحي تواجهني گلما تشوفني بطريق تبدله لذلگ نصيحه من عندي لاتسجلون احد حضور ولاتحطون روحكم بمواقف محرجه لن لو بعد مرور سنين تستحون تواجهون هذا الشخص مع العلم الطالبه چانت شاطر عندي بس هسه متگدر تواجهني...

حجه شويه نوب عن بعض الامور

انتهت المحاظره وماحتگيت بنور أبد التجاهل هو صار تعاملي وياها شفتها النوب واگفه ويه عبد العزيز...تنهدت وگملت طريقي ورحت گعدت بالحديقه....المحاظره الاخيره مراح ناخذها باوعت ع ساعه11هسه شنو يوصلها للوحده يوم الخميس المحاظرات تنتهي بالوحده لن جماعة الاقسام ينزلون لهلم.....گعدت أگلب بالتلفون واحاول أشغل روحي

مرت ساعتين دگ ع ابو الخط...وگالي الخط عاطل راح يتاخر....تنهدت اني أذگر نور طلعت بتجاه الاستعلامات وداها عبدالعزيز باوعت الجامعه بدت تفرغ..

☆☆☆☆☆☆
جامعة تگريت

عند نور

أنتهت المحاظره الاولى وماحچيت ويه ديم مرات احس روحي أستعجلت بتخاذ القرار ومرات أگول لا تستاهل
بس صدگ احس شيء ناقص عندي

طلعت بره شفت عبدالعزيز واگف ينتظرني..

عبدالعزيز"شلونچ نور أخبارچ امورچ..

نور"الحمدلله بخير انت شلونگ.

عبدالعزيز"صرت بخير بس شفتچ تچين وياي نشتري هديه لابن اختي..

نور"تمام دلل.

رحت اني وياه ع أسواق الجامعه...

گعدنه ندور بلعب الاطفال عجبتني گره ثلجيه بداخلها بابا نويل وينزل الثلچ..

نور"هاي حلوه شوفها عبدالعزيز.

عبدالعزيز"تمام راح اخذها...

تقدم واشتره اثنين وحطهن بغلاف..

وطلعنه من اسواق الجامعه اسواق التربيه للعلوم والصرفه..

وگعدنه بالحديقة التربيه وگان يمنه ورد مزروع ورد چوري منظره گلش حلو.

عبدالعزيز"هاي الچ نور وحده من الهدايا..

نور"لا مايصير ماقبلها.

عبدالعزيز"راح ازعل واروح تره أشتريت اثنين وحده لابن اخي وحده لچ وبگيفچ بعد اذا ماتاخذينها بعد عمري ماحچي وياچ..

اخذتها من عنده.

نور"شگرآ عبدالعزيز مانسه فضلگ علي يجي يوم وجازيگ بيه ع الي دا تسويه ويايه..

عبدالعزيز"مو مانيه وانتي شخص عزيز وغالي ع قلبي..

نور"أنت الاغلى ربي يحفظگ..

عبدالعزيز"أحچيلي عنچ نور عن طموحچ ليش چيتي گلية علوم عن أهلچ.

گعدت احچيله عن طموحي الطب وباني ماحصلته گلتله احنه اختين وماما وبابا وگلتله بابا شنو يشتغل..حچيتله ملخص سريع..

نور"وانت أحچيلي عنگ.

عبدالعزيز"أضنكم گلكم تعرفون تخصصي..

نور"ليش متحب تحچي عن اهلگ.

عبدالعزيز"ماحب أسؤلف تا محد ياخذ عني فگره غلط باني دا اتفاخر بعائلتي.
نور"لاتخاف ماگو احد واني ابد ماضن هيچ شيء.

عبدالعزيز"حچيتلها عن بابا وعن جاسم واختي المزوجه وعائلتنه بشگل مختصر.

نور"ماشاء الله اخوگ دكتور فتح عياده لو بعد.

عبدالعزيز"راح يفتح بالايام الجايه..

صمتنه دقايق واحنه نباوع ع طلاب تربيه حولنه(داير مايدورنه) نحسهم انفتاحين أگثر من عدنه.

عبدالعزيز"جوعانه نروح ع المرگز طلابي ناگل..

نور"ماحب افوت واگل باماگن مزدحمه احس روحي أختنگ.

عبدالعزيز"أجيبلچ اگل اهنا لو هم تستحين من عندي.

نور"لا يسلموو ميحتاچ مامشتهيه..

عبدالعزيز"خير نور صاير شيء شو احس عقلچ مو يمي گل شويه تصفنين گليلي اذا عندچ مشگله أگدر أساعدچ.

نور"ما احب أدوخگ بمشاگلي تسلم مشگله سطحيه.

عبدالعزيز"بس لا صار شيء انتي وديم من ورايه تره راح تخليني الؤم نفسي طول العمر..

نور"أنت مالگ دخل هي حيل تدخلت بحياتي وگفتها عن حدها بس..

عبدالعزيز"مهما يگن هي صديقتچ وگل مشگله والها حل حتى لو تحچي عني عادي اهم شيء صداقتكم

وتره گلبي ابيض عمري ماشلت شيء ع احد

نور"ماگو مثل طيبت گلبك ياريت لو گل الناس مثلگ.

عبدالعزيز ببتسامه"لا دگولين هيچ گلنه من بعد طيبگم.

گعدنه شويه نحچي بعدين رجعت لقسمنه اني وعبدالعزيز ناخذ اغراضنه وصلني للاستعلامات وراح سبحانك الله عبدالعزيز بساع يدخل الگلب وتحسينه فاهم گلشيء.

☆☆☆☆☆☆☆☆
عند ديم

گاعده دا انتظر السايق وتذگرت سجلي نسيته بالقاعه رحت بسرعه للقاعه گلبت القاعه علي مالگيته باي مگان دورت مگتب الاستاذ الي بالقاعه ماگو خرچت بره القاعه الحديقه ماگووو عبالگ الگاع انشگت وبلعته بقيت ادور ماگو بعد عشر دقايق تعبت وقررت ارجع للقاعه بلگت اشوف احد من طالباتنه أسئله فتحت القاعه

وتفاجئت سجلي ع الاستول وشفت رائد وفارس وعامر گاعدين...

.ماحچيت شيء اخذته وطلعت الف علامة استفهام براسي أگيد واحد من عدهم اخذه بدون ميدري گعدت أگلب بسجلي خطي مو واضح عبالگ طاگه علي عبوه بالطريق الترابي...

چنت مگاتبه اي شيء حتى أسمي مگاتبته......

دقايق فاتم من يمي رائد وفارس وعامر وهم يضحگون استغربت أگثر بس تجاهلتهم الصراحه مليه خلگ اتعارگ ويه احد احس طاقتي خلصانه وابو الخط بعده ماچه.

شفت چماعة رائد گعدم گبالي
أنتظرت اخر شيء دگ ع ابو الخط گالي ماچي..

ديم"شلون ماتجي لعد ليش خليتني أنتظر والجامعه بدت تفرغ.

گعد يتعذر من عندي..

قررت أتصل ع بابا تلفونه مغلق..

أتصلت ع ماما يدگ وماتشيله اگيد حايره تطبخ يربي هسه شسوي شلون ورطه ماعرف شگد گعدت واني أفگر شلون ارجع للبيت.

دقايق واجه رائد..

رائد"محتاجه شيء.

ديم"سلامتگ گلشيء مامحتاجه.

رائد"گولي واني أخوچ الجامعه مابقه بيها احد وصارلچ ساعه گاعده بوحدچ گليلي شگو.

ديم"گلشي ماگو ابو الخط عاطل وميجي واخابر بابا تلفونه مغلق.

طلع تلفونه وانطاني ياه.

رائد"سجلي رقم أبوچ ودگي عليه لن مبايلچ شبگته مبينه ضعيفه وهذا المگان مابي حيل شبگه..

ديم"تمام شگرآ..

اخذت تلفون من عنده وگف بعد مترتين عني واتصلت ع بابا وگلتله بان الخط عاطل وگلتله تعال اخذني گالي دقايق واچي مسافة الطريق..

گطعت الخط ومديتله التلفون..

ديم"شگرآ..

رائد"العفو بس أريد أسئلچ سؤال ياسمين اليوم شفتها توزع چگليت بمناسبة شنو هاي.

ديم"بمناسبة خطوبتها خطيه البنيه فرحانه بي ويمگن يحبون بعض وهسه عن أذنگ..

رحت بتجاه الاستعلامات وشفته صفن بحچي خلي أذا يحبها من صدگ خلي يتحرگ راح تستغربون سبب تعاملي ويه رائد بهدوء أولآ رائد عمري ماشفت منه شيء موزين لا هو ولا عامر مشگلتي ويه عبدالعزيز وفارس الي تدخل لحاله بشيء مايعني..

...أبتسمت ورحت بتجاه بوابة الجامعه وگفت انتظر بابا.....

دقايق وشفت رائد وفارس وعامر واگفين بالاتجاه الاخر يباوعون اجه بابا ورحت وياه للبيت..

☆☆☆☆☆☆☆
صلاح دين
بيت ابو ثامر
عند
رنا

ثامر"هسه فهميني لمنو گتبتي هاي الرساله منو الي خدعچ وضحك عليچ وتردين تطلگين تاتروحيله جاوبي.

باوعت علي شفت عيونه مرگزه علي ونضراته قاسيه گلش ياربي شگد اني ثوله اني گلما أنقهر أگتب خواطر اشعار عنه شوصلها الورقه اله خبله ماعندي عقل أگله هاي گتبتها لگ اخذ وجهي يذب الوان واني اريد ألگي طريقه اخلص بيها روحي..

ثامر"جاوبي..

سالني ثامر وحرت شنوو أجاوبه....هذا من گل عقله دا يتهمني أحب واحد غيره..

رنا"أحب أگتب خواطر واشعار ليش حرام خما گلمن گتب شعر يعني حاب..

قاطع حچينه دگ الباب..

ام ثامر"أگعدو صح النوم تره راح يجينه خطار وياثامر روح گل لهيفاء وجيبها..

ثامر"تمام دقايق وچاي يؤم..
باوعلي وگال حديثنه مانتهه رنا وقبل لا اطلع تذگري لاتحطين مگياچ وتضنين نفسچ العروس.

رنا"سوال خايف ع ست هيفاء لا اطلع احلى من عدها.

ثامر"راح اطلع لاطولين انزلي ساعديهم..

بعد مرور بعض الوقت چنت دا اشتغل وياهم واني بگامل اناقتي حتى حطيت بودره خفيف تا اخفي اثر الراشدي الي بوجهي..
أجتي الست هيفاء وگعدت والنسوان مابطلن أسئله مره علي مره عليها...

سالتني المره"شوفن مبينات متوالمات ومابيناتچن شيء وحبيت أسئلچ يارنا چنتي تعرفين بان ثامر راح يزوج عليچ ويحب بنيه.

رنا"ثامر عمره مايسوي شيء بدون أستشارتي والشرع حلل اربعه لو يجي ويگلي اريد اتزوج أزوجه.

هيفاء"لا عايز تردين تفطنينه ع الزواج علساس هو بگيفچ.

رنا"ماگلنه شيء حبي هيفاء ليش أتاثرتي..

هيفاء"أني أحب ثامر لدرجه ماتحمل يباوع لغيري أو أشارگه مع اي احد..

رنا"نصيحه من عندي لچ حافظي علي ولاتخلينه يطير من ايدچ لن ثامر گالي راح يزوچ مره ثالثه بعد اربع اشهر...

هيفاء"ثامر مايسويها مستحيل..

رنا"لا يسويها والدليل گالي انو حالف يتزوج اربع نسوان.

وحده من النسوان"والله طلعتن مهضومات وتنحبآ وشقاچن هم يخبل...

رنا"شلون لعد اعذروني اروح اشتغل هسه....رحت اشتغل واباوع ع هيفاء مفلفله خلي بلگت تخلص گلب ثامر لا مايجي يعگر مزاجي خلي يلتهي وياها تغث النفس شلون متحملها مدري....
فتت للمطبخ...
دقايق واجتي هيفاء..

هيفاء"أسمعي رنا راح اخلي ثامر يطلگچ..

رنا"لا صدگ اذا انتي سبعه سويها..

هيفاء"أسويها لاتخافين لن ثامر مستعد يتخلى عن الگل ع مودي..

رنا"تمام واني أريد هذا الشيء ولاتخافين ثامر لچ اخذيه واشبعي بيه...

رحت من يمها ورحت وره البيت اخبز للعزيمه...

بعد مرور ساعات صار الليل والحمدلله راح ثامر ويه هيفاء باوعت ع أغراضي وگعدت أرتبهن وطلبت من اخويه يمرني الصبح من المدرسه يجي ياخذني لن عنده شغل اهنا بعد ماتحمل أبقه دقيقه اخرى يم ثامر هاهيه گفيت وفيت وصرت اعرف انو ثامر مايستحقني ولايستحق حبي اله..

☆☆☆☆☆☆☆

عند حسام

گعدت شويه بعد عند بيت هديل وطلعت وديت دلال للبيت دگ علي عبدالعزيز..

حسام"هلا نورت بتصالگ..

عبدالعزيز"النور نورك يغالي أريد اطلب طلب واتمنى ماترد طلبي..

حسام"أنت مو بس تطلب انت تؤمر امر دلل يغالي غالي والطلب رخيص.

عبدالعزيز"باچر عطلة نهاية الاسبوع واتفقنه نلتم احنه والشباب وراح يجي صديق جاسم دكتور معتز ونريدك تجي تا تكمل گعدتنه دخيلگ لاترفض لن مشتاقيلگ ونريد نغير جو.

حسام"تمام دلل يغالي

☆☆☆☆☆☆☆
في صباح اليوم التالي
محافظة البصره
عند معتز

ماگدرت ارتاح وانام الليل واني أفگر انها راح تصير الغيري بالگوه گمت وبدلت ملابسي واخذت گم غرض ويايه وانطلقت لمحافظة صلاح دين هل ياترى الهروب راح يفدني لو راح يزيد حالتي سواءآ

تمنيت اروح الها وخطفها واگللها انتي ماتصيرين لغير معتز بس گلت تصرفات المراهقين ماتلوگلي واگيد أگو سر بالموضوع ويجي يوم اعرف شنو هل سر تا ارتاح.....يتبع
الى اللقاء في البارت القادم
ان شاء الله
أعرف والله البارت قصير2000كلمه بس نعسان وماهان علي انام ومامنزللكم بارت
يسلمووو ع تشجيعكم دعمكم وتصويتكم اليه
(ملاحظه الى گل واحد يسأل عن نهاية الروايه سوف أخبركم انها ستكون في نهاية الاسبوع المقبل وسوف أبد بتطويل البارتات وتسريع الاحداث قليلآ لگي اتمگن من انهائها في الوقت المحدد)

لاتنسو

التصويت
والتعليق الحلو

في الختام

(استودعكم الله الذي لاتضيع وداعه)