قزومتــي المــسودنة 💕

مرحلة جدیدة🙏 p.16

نتالیا (بتعجب) : والله !!

ابو سیف : اي والله ..

نتالیا : یعني انته فاتحت عمي بالموضوع ؟؟

ابو سیف : ايي ...

نتالیا : و شنو گال ؟؟

ابو سیف : گال شکو بیها  ،،، هو ابن عمها و اولە  بیها ،،، مراح نلگي احسن منه ...

نتالیا : اهاا ،،، و شوكت راح نعقدلهم ؟؟

ابو سیف : بهالشكم یوم  ..

نتالیا : اممم ،، ماشي الله كریم  ..

ابو سیف : اييي يصیر خیر  ..

نتالیا : اگول بابە ..

ابو سیف : عیوني ..

نتالیا : شویه شویه ویه یوسف لا تضغط علیه ،،، تره هو هم  حقه یتزوج ..

ابو سیف : الله كریم بس ازوج سیف ازوجه هو هم....

نتالیا : اييي هاي الفتره عدنه هواي اعراس ....

ابو سیف : ايي خیر من الله ..

نتالیا : ههههههه ...

ابو سیف : فدوه للضحكه ..

نتالیا (وهي تفرك عیونها ): فداك الكون ..

ابو سیف : شکو بزونتي نعست ..

نتالیا (بنعاس) : اممممم ..

ابو سیف : لعد خلي نروح ننام ..

نتالیا (بنعاس ) : ماا

ابو سیف : شنو ما اگلچ گومي !!

نتالیا (بنعاس) : لا لااا ... (و تممدت عالمرجوحه و خلیت راسي بحضنه ) ..

ابو سیف (بضحك ) : لچ نونو ،،،، نونو ،، نونو ..

باوعت علیها ،،، ههههه غفت اخخخ یا تمبل ...

شلتها بحضني و صعدتها لغرفتها و غطیتها و بستها ،،، سدیت الباب و رحت لغرفتي و نمت ...

❃❃❃❃❃❃❃❃❃❃❃❃❃❃❃❃❃❃❃❃❃❃❃   ❃❃❃❃❃❃❃❃❃❃❃❃❃❃❃❃❃❃❃❃❃❃❃ 

الانبار ... یوم الاحد .... الساعه 9  صباحا ... بیت اسامه

( اسامه )

فتحت عیوني و باوعت ساعه 9 فگعدت من النوم و سبحت و بدلت ،،، وگفت امام المرایە اباوع لنفسي و احچي ...

اسامه : وليي یولي شصایر بیه معصعص ،،، حتی عضلاتي  راحن ما بقه بیه شي  .... چني بریعصي ... بس والله لازم اعوض و ارجع اسمن ،،، و اصیر حلو حتی افیك شویه گدام نتالیا ...

و اندگ باب غرفتي ...

اسامه : منو ؟؟

ــــــــ : هاي اني اماني ...

رحت و فتحتلها الباب ،،،

اماني : بوووووه

اسامه : شنو هاي ؟؟

اماني : علساس اخوفك بس انته  عیونك طالعه ما تخاف من شي ..

اسامه : اەەە هاي علیمن عیونك طالعه !!!

اماني (بتوتر) : علیە علیە فدیتك انته عاقل و حباب ..  

اسامه : اهااا عبالي ..

اماني : لا لا عبالك حبیبي ... تسمحلي اطب یمك ..

اسامه : تعاي ...

طبت و سدت الباب وراها ...

اماني : اييي اسوم مشتاقین  ..

اسامه : چذابة لو چنتي مشتاقتلي چان اجیتي يمي و گعدتي تسولفین ویایه بدل ما تروحین لآدم ...

اماني :ايي هیاتني اجیت هسه ...

اسامه : لا اني ما اریدچ هسه ..

اماني : لااا اسومي حبیبي ،،، والله اني رحتله علمود  احچي وياه شویه و افرحه انته تعرف اني علاقتي بآدم كلش متوتره .... فما ارید اطلع من ابیت و اي احد منكم زعلان مني

اسامه : لا تگولین هیچ انتي مراح تروحین لاي مكان ...

اماني : لا اسامه ماكو داعي بعد اچذب علی نفسي علساس اني ما اروح و ابقه ویاكم .... كلنه نعرف بیت خالد مراح یعوفونه اذا ما اخذو الي يریدوه ...

اسامه : خلیهم مایعوفونه  عساهم یمتوني و اذا یعني ،، اهم شي انتي ویانه ...

اماني (گامت من مکانها و تقربتله ) :  ويييي سملی اسومي ،،،، مستحیل اقبل اي احد یتقرب منكم ،،، ما اگدر اموت بدونك اني واللە ...

اسامه (حضنها و گال ) :  اني هم ما اگدر بلیاچ یروحي انتي ..

اماني (و هي تبچي) : یصیر اگلك شغلە ...

اسامە : گولي ..

اماني (ببچي ) : احبك ... دیر بالك علی نفسك و علی نتالیا اذا تزوجتها ... لا تزعجها ماشي ... فدوە لگلبك صدگني هي بگلبها تحبك ....  اي و سویلك عرس یخبل ،،، حتی الكل یگول بیت حجي مسلم سوو عرس ما ینوصف اوك ..

اسامه : شبیچ لیش تحچین هیچ ...

اماني (ببچي) : مو اگلك راح یاخذوني ،، یعني مراح اگدر ارگص بعرسك ،،،  انته ارگص بدالي ماشي  ..

اسامه :یعني كل الي مقهرچ انچ مراح ترگصین بعرسي ... !!

اماني(ببچي) : اييي و شكم شغله الخ ...

اسامه (بضحك) : شگد فاهیە انتي ..

اماني ( وهي تمسح دموعها ) : هههههههه

و سمعنه صوت صیاح و عیاط جوه ...

اماني (بخوف) : بسمله شصایر  اسامه !!؟؟

اسامە : ما ادري خلي نروح نشوف ....

بساع ركضنه اني و اسامه جوه .... لگینە ایاد و عمي ابو صهیب و عي ابو سعد واگفین و دیحچون و امي تعیط و تبچي و تگول ...

ام ایاد (ببچي) : حرام علیكم لا تاخذوها لبنتي ،،، لا تحرموني منها لااااا ...

ابو صهیب (بصیاح) : عجل شتردین انتي یموتونه كلنه !!

اسامه : شكو عمي شصایر ؟؟؟

ابو سعد : كل المصایب الي تجینه من وراك انته الله لا ینطیك ورطتنه ویاك ...

اسامه : لیش شكو ؟؟ ایاد شصایر ؟؟

ایاد :  بیت خالد كاتبین علی صیدلیه عمي ابو سعد مطلوب دم و مخلین رصاصه بضرف وشامریها جوه باب بیت عمي  ابو صهیب ...

ابو صهیب : ارتاحیت هسه یا استاذ اسامه ،،، هیاته ناوین یموتوني من وراك ...

اسامه : شبیكم تلوموني كلكم قابل اني من تقصد ادعمه للرجال ...

ابو سعد : اماني روحي لمي غراضچ بساع یلااا  ....

ایاد : عمي اسمحلي  اماني مراح تروح لاي مكان  ..

ابو سعد (بصیاح ) : شبیك ایاد لا تخبلني !!! الجماعه مهددینه و یمکن بٲي وكت یجون و یموتونه ،،،، و ذیچە الوکت راح تصیر  الدم للرکاب .. خلینه ننطیهم الي یریدوه و نخلص من المشاكل ...

ایاد : لیش عبالك هیچ راح تنحل المشکلە ...

ابو صهیب (بصیاح) : اي راح تنحل ،،، هو هذا مطالیبهم ...

ایاد : عمي اني ما اگدر اتخلە عن اختي بهاي السهوله ،،، هي امانه برگبتي ابویه وصاني علیها ...

ابو سعد(بصیاح) : اییااااد لا تطلعني من طوري گتلك ننطیهم یعني ننطیهم و كلمتي مراح تصیر اثنین ...

اسامه : و شنو یضمن راح یعوفونه اذا انطیناهم الي يریدوه ..

ابو سعد (بعصبیه) : انته تسد حلگك نهائیا ما ارید اسمع صوتك ،،،، كل هاي المشاكل دتجینه من وراك  ...

اسامه (بصیاح) : مستحیل اسكت و اخلیهم یاخذوها لاختي ..

(بهاي الاثناء طب آدم للبیت و قمیصه مشگگ و  خشمه ینزف )

ایاد : شبیك آدم شصایرلك ؟؟؟

ام ایاد (بصیاح) : وليييييي الله یاخذني لك شصایرلك ولیدي احچي

آدم (بتعب) : ما ادري جماعه هجمو علیه و لزموني دگ ضرب و اخذو موبایلي و محفظتي و سیارتي هم ...

ابو صهیب : یعني همه حرامیه ؟؟

آدم : ما اعرف ..

ایاد : شلون شكلهم ملثمین لو شنو ؟؟

آدم : لا ما ملثمین ..

ابو سعد : شكم واحد چانو ؟؟

آدم : اربعه ...

(قاطع حچیهم صوت موبایل ایاد یندگ )

(ایاد) باوعت مكتوب آدم ... صحت ..

آیاد (بصیاح) : لكك  هذولي الحرامیه دیخابروني بتلفون آدم  ...

ابو صهیب : صدگ دجاوب بالله !!

جاوبت و فتحت المایك و گلت ..

ایاد : الوو ..

ــــــــــ : عجبك چتلە اخوك ؟؟ لا تستعجل تره هاي المقبلات ...

ایاد : اخخخخ یا النگس هذا انته ..

ـــــــــــ : ايييي اني ،،،، اسمعني زین ان ما سلمتني ال 30 دفتر و الفصلیه الظهر راح احرگ اهل اهلك ...

و سد التلفون ....

آدم : هذا چان خالد مو ؟؟

ابو صهیب : لیش اكو غیره ..

ابو سعد (بصیاح) : سمعت شدا یحچي سمعت ایاد !!! هسه عرفت ان الله حق ؟؟

ایاد : لا حول و لا قوە الا باللە ..

ابو صهیب : ماكو اي حل غیر ننطیهم الي یریدوه و نخلص ..

وطب سعد علینه بسرعه ...

سعد (بتوتر) : السلام علیكم ..

الكل : و علیكم السلام ...

سعد (بتوتر ) : آدم وینها سیارتك ؟؟

آدم : لیش ؟؟

سعد (بتوتر) : جاوبني بساع و گلي وینها سیارتك ؟؟

ایاد : باگوە بیت خالد ...

سعد (بتوتر ) : یعني هاي سیارتك الي دا تحترگ براس الفرع !!!

ابو صهیب : شنوووووو !!

(ایاد ) بساع ركضنه كلنه بره .... و شفنه سیاره ادم صایره فحم منتهیه ..

ابو صهیب : لاااا حول و لا قوه الا بالله ....

آدم : ایبااااە سیارتي ...

سعد : ولا یهمك آدم اهم شي سلامتك

ابو سعد : خویه ابو صهیب تره والله الوضع مدا یبشر بالخیر هیچ کلنە راح نروح بیها ،، خلینە ننطیهم الي يریدوه و نخلص ...

ابو صهیب : صحیح ایاد لازم ننطیهم الي يريدوه ،، و بعدین احنه مو اول و اخر ناس ننطي فصلیه ..

ایاد : لا حول و لا قوه الا بالله ... الصبرمن عندك یا رب ...

اسامه : مو اهنا الحچي عمي خلي نرجع عالبیت و نحچي ..

ابو صهیب : اي احسن  یلا  ...

و رجعنه عالبیت و گعدنە بالهول ...

ابو صهیب : خلص ایاد ادري  الشغله صعبه بس لا اني و لا انته نگدر نغیر اي شي لازم نفض السالفه قبل ما یسوولنه مصیبه اكبر لا سمح الله ..

ایاد (دنگ راسە و گال ) : الي تشوفه عمي ...

ابو سعد : اي هیچ فضوها ویانه من البدایه .. یلا ابني آدم انطي خبر لاختك خلي تتحضر ..

آدم (بحزن ) : ماشي ..

(آدم) طبیت للمطبخ لگیت امي و اماني گاعدات و یبچون ..
حسیت كلشي بداخلي انهار ،،، و الدمعه بعیني بالگوە مسیطر علیها ... گلت ..

آدم : یوم خلي اماني تتحضر ...

ام ایاد (ببچي) : عمت عیني علیچ یا بنیتي راح تروحین و تعوفیني ،،،، اخخخخخ یا گلبي اخخخخ ...

اماني (ببچي) : ماشي اخویه هسه راح اتحضر ...

صعدت لغرفتي و ما ادري شنو الم و شنو اخذ و شاسوي كلشي ما اعرف گعدت بالگاع و بدیت ابچي بحرگە .... شویه و اجتني  امي و ویاها ساره و ام سعد هم ....

ام ایاد : گومي يا بنیتي گومي هو هذا قسمه رب العالمین شنسوي بعد ،،، لازم نشكر الله ...

ساره : صدگیني یا اماني الله راح یرحمچ و ما راح یظلمچ لان انتي حبابه و گلبچ ابیض و علی نیاتچ انتي بس گولي يا الله و كلشي راح یسهلچ باذن الله ..

اماني : یا الله ..

بدیت ابدل و لبست هیچ ...

امي طلعتلي جنطه چبیرە مالات السفر ،،، و حطتلي ملابسي و احذیتي و جنطي و اكسسواراتي و عطوري و كلشي ،،، و بالاخیر انطتني علبه حمره و گالت ..

ام ایاد : هاچ یا بنیتي هاي گلادە ذهب ابوچ اللە یرحمە وصاني انـطیها الچ من تتزوجین ... چان یتمنی هو یلبسهالچ بیوم خطوبتچ ... بس شنسوي هي هیچ الدنیا ...

اخذت العلبه و فتحتها لگیت بیها هاي الگلادە ...

كلش عجبتني و من الفرحه دمعت عیني ،،، تذكرت ابویه من شفتها .... حضنت امي و باستني و گالت ...

ام ایاد : فدوة لگلیبچ یا وردایە امچ ... اسمعیني انتي هسه راح تتزوجین ... سمعي كلام زوجچ و لا تراددیە ترە الریاجیل
یموتون من البنات الوكحات ... صیري عاقله و اكلي زین و دبري روحچ و لا تسکتین عن حقچ .. و دائما صلي و ادعي ربچ یرحمچ ابد لا تنسین صلواتچ بعدین ازعل منچ ماشي ...

اماني (ببچي) : تدللین یا عمري انتي ...

(وبست ایدیها )

ام ایاد : الله یحمیچ یا بنیتي و یحفظچ یا ربب ...

ام سعد وساره : آمین ...

ابو سعد (بصیاح) : یولي ما خلصتو ؟؟؟

ام سعد : بلي هیاتنه دننزل ..

ام ایاد : یلا امونه خلي ننزل ..

اماني :  يوم بس الف شالي و انزل ..

ام ایاد : عجل اني و ام سعد راح ننزل لبین ما تخلصین خلي ساره تضل یمچ ...

ساره : اي عمه اني راح انزل ویاها ..

امي و ام سعد نزلو جوه بقینه اني و ساره ...

اماني : ساروو ما اوصیچ دیري بالچ علی آدم بغیابي ماشي ..

ساره : ههههههه هم بدینه انتي ما تتوبین ..

اماني : لچ یا ثوله دا احچي صدگ اهلي راح یخطبوچ لادم ..

سارە : گولي والله !!

اماني : والقرآن ...

ساره : لچ واللە ما اصدگ ...

اماني  : بلي والله ،، اووف یاریت چنت اگدر اجي لعرسكم ،، بس یلا میخالف مبروك من هسه ..

ساره : فدوە لگلبچ الله یبارك بیچ احله خبر اسمعه بحیاتي .... الله یبشرچ بالخیر (و حضنتي و باستني)

اماني : هههههه فداچ الكون مرة اخي ...

ساره : هههه

ام ایاد (بصیاح) : امونه بنیتي ما كملتي ؟؟

اماني (بصیاح) : بلي یوم جایه ...

نزلنه جوه ،،، كلهم واگفین ،،، سلمت علی عمامي و علی ادم و ایاد ،،،، وصوني ادیر بالي علی نفسي و من هاي السوالف ،،، بس اني بالي كله یم اسامه ما دري وینه ،،، معقوله اطلع من البیت بلا ما یودعني ... !!!!

اماني : وینه اسامه

اسامه (بحزن) : اني هنا ...

اماني (انداریت و شفته واگف و منتچي عالباب و عیونه تلمع ،،، رئسا حضنته و هو هم حضني )

اسامه : دیري بالچ علی روحچ ،،، و انتبهــي لصحتچ و لا تخافین ابد صیري قویه مو اي كلمه یگلولچ تروحین تبچین ،،،  تره انتي طابه ببیت ناس ما تعرفیهم و لا شایفتهم و یمكن ما یكونون زینین ویاچ ،،، بس انتي لا تهتمیلهم و اسمعي كلام زوجچ هو الوحید الي راح یفیدچ ... تمام ..

اماني (ببچي) : تدلل ...

اسامه : ها هسه شحچینە مو گلنە ما تبچین ..

اماني (مسح دموعها و گالت ) : سوري نسیت ...

اسامه : هههه فدوة ..

ایاد : آدم حطیت غراضها بالسیاره

آدم : ايي ..

ایاد : عجل یلا خلي نروح ..

اماني : یلا معا السلامه ...

كلهم : الله ویاچ ...

طلعت من البیت و صعدت بالسیاره ماله ایاد ،، عمي ابو صهیب صعد لي گدام و ایاد یسوق ...

ضلیت اباوع لبیتنه ،،، راح اشتاگ لهذا البیت الي گضیت بیه كل حیاتي من و اني عمري يوم لحد الان .... بس خلصت هاي المرحله و راح ابدي مرحله جدیده و حیاة جدیده ،،، ما اعرف اي شي عن هاي الحیاه الجدیده بس اتمنی انها تصیر حیاه سعیده .... 🙏🙏

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

شنو تتوقعون یصیر ؟؟؟ ، انتضرو البارت الجاي ... ❤❤❤

#قــزومتي_المســودنـە