صباح الخير حبايب
# الشيخ & العشگ
° بسبس
. . . . . . . . . . . . . .
مها
خابرت ماما على ابوية وكلتله احنه طالعين
ماما هي وعمه رحاب لبسن شال عباية اني لبست فستان عادي شويه بي عرض لونه وردي مطفي وشال
وكعب مو كلش عالي وطلعت اخذنه حيدر اخويه على المستشفى الي يشتغلون بيه عمر حلا من وصلنه
حيدر . . انتظركم بالكوفي من تكملون رمشولي اجيكم
طبينه للمستشفى رحنه لقسم النساء سئلنه على حلا عده عملية ولادة كعدنه ننتظره عشر دقايق كملت وطلعت
اخذته للمكتب الخاص بيه كالت حجتله امي على الدوخه وتقىء كالت خلي نسوي تحليل دم بالاول ونشوف
سويت تحليل نتظرنه لما طلع صاحت اسمي و اخذتني للغرفة مال سوناركشفت عليه كملت كالت كومي رجعنه للمكتب
حلا . . اممم ياجماعة هو اكو شي
خولة . . يعني شنو
حلا . . يعني
قاطعته رحاب . . دحجي يابنتي
حلا . . اي عمه دحجي . . مها حامل . .
خولة . . اووف الحمدلله الف الف مبروك بنتي انشالله ينترس حضنج جهال
حلا . . اوكفي عمة بعدني مكملت كلامي
مها . . ليش اكو شي بعد
حلا . . انتي حامل بتؤام صارلج شهر واسبوع . .
رحاب . . يمه ردنه واحد جانة ثنين الحمدلله . . الله يسعدج يروح عمتج
حلا . . راح اكتبج شوية فيتامينات وادوية تاخذيهن بلتزام ومبروك كلبي كومين بسلامة
مها . . الله يبارك بيج
كتبتلي على الدوا والفيتامينات خذتهن وطلعت رمشت على حيدر جاه اخذنه
حيدر . . هاا شصار وياكم
رحاب . . بارك الخيتك عمه حامل بتؤام
حيدر . . صدك تحجون
مها . . اي حبيبي
حيدر وباس راسه . . فدوه لج يكلبي من هسه اكلج اذا واحد بيهم ولد تسميه حيدر
خولة . . شلون تسميه حيدر ابوهم حيدر
مها ورحاب . . ههههه
حيدر . . اهووو هسه الى تزوجين واحد اسمه حيدر
مها . . ههههه شسوي يله وعد اي اسم تختارة راح اسميه
حيدر . . انشالله . . هسه يله اركبو خلي نروح
مها . . اني ودوني لبيتي اروح افرح رجلي
حيدر . . مو تدللين
. . . . . . . . . . . . . . .
جاسر
لزمت المركز خليته واكف على تك رجل الكل يشتغل ماكو واحد كاعد وطلعت الرئيس مال مركز
لان بس اعوفه يكوم يدخل بأشياء ويحط نفسه بموافق احنه بغنى عنه
دزيت حسن يسأل على هذا الولد الي كالت عيه فرح اخو صديقته وجاي نبحث عن معلومات تخص الدكتور
الي يساعدهم بالمستشفى صارلنه تقريبا نص نهار اندور الي يدور على الحاسبة الي بالملفات والي ماخذ
قوات واكف كدام المستشفى يراقب وهم منتظرين خبر من حسن ما جا لحد هسه
تعبت صارلي يومين تقريبا منايم ومامحصل شي بس متاكد انو حسن جايني باخبار طيبة خابرت عليه
جاسر . . الوو هاا حسن وين صرت
حسن . . اي سيدي نص ساعة اني يمك واكلك على كلشي
جاسر .'. اي يله منتظرك لتتأخر
سديته من جان يجيني اتصال من سما
سما . . الوو جاسر
جاسر وكف بعيد عن العساكرالي يشتغلون
. . هلا ياروح جاسر انتي
سما . . حبيبي شبي صوتك
جاسر . . تعبان شوية من الشغل معليج بيه انتي شلونج
سما . . تمام حبي الحمدلله بس والله خايفة عليج جاي تتعب هواي
جاسر . . حبيبي لا تخافين مجرد تعب مابيه شي متعود على هل شي كليلي بديتي تجهزين للعرس
سما . . من باجر ابدي اروح اني وماما ان شاءالله
جاسر . . اي انشالله دزيتلج لفلوس ويه بكر وصلن
سما . . اي وصلن تسلم حبي
جاسر . . مادري شي ينقصج كلشي تحتاجي اشتري ولتنسين اي شغلة
سما . . اي ماشي حبيبي
جاسر . . اي حبيبتي والغرفة باجر تجهز ويدزوه للبيت يركبوه
سما بصدمة . . جاسر اكلك
جاسر . . كولي يروحي
سما . . انت مو جنت ويه بكر بالمستشفى وبعدين رحت للمركز شوكت لجكت تسوي هذا كله
جاسر . . ههههه شكلج بعد ماتعرفين حبيبج اكدر اني وبمكاني اتحكم بكلشي
سما . . نزوج واعرفك اكثر
جاسر . . اووف شوكت هل يوم
سما . . قريب انشالله شسويت بشغلة فرح
جاسر . . بعد نشتغل بيه انشالله خير
سما . . انشالله
جاسر . . حبيبي اني رايح عندي شغل
سما . . ماشي حبي باي
جاسر سديته منه توني دحطه بجيبي دك شفته سما
. . الوو
سما . . جاسر نسيت اكلك شلون شكل الغرفة اذا مصوره دزلياه
جاسر بمكر . . ليش مستعجلة حبي بالعرس شوفيه وشبعي منه
سما بخجل . . جااسر
جاسر . . اعشقج هسه حبي ادزلج الصور ادللي
سده منه دزله الصور وسد التلفون وحطه بجيبه
جاسر بصوت عالي . . يله همه شباب اذا نضل على هل حالة منجيب اي نتيجة
ودك تلفونه مره ثانية جاسر . . عفية تلفون ميعرف يلصم كم دقيقة شهل قهر
. . الوو . . اي . . . اي . . وين . . متأكد . . خليك عندك على ما اجيك فاهم
سده و طلع يركض على سيارته اخذه ونطلق للمكان الي كله عليه
هو طلع من المركز منا وحسن وصل منا طب يركض ( الشعب كله يركض )
يصيح جاسر . . جاسر
واحد من العساكر . . اضابط جاسر طلع
حسن . . يمته وين راح
العسكري . . قبل دقايق جاه اتصال شكله مهم كملة واخذ سيارته وطلع
حسن يخابر جاسر . . سيدي وصلت للمركز وينك
جاسر . . تعال على المستشفى ال . . . بسرعة
حسن . . حاضر سيدي
سده واخذ السيارة وراح على المستشفى
كدام المستشفى وبداخل سيارة حكومية بيضة عالية
معتز (الشخص الي خابر جاسر )
. قبل شويا جا الدكتور وطب للمستشفى خليت واحد من القوات يلحكه ويراقبة من دخل للمكتب خاص بي
وره خمس دقايق جاه اتصال للبنيه الي اسمه فرح اتبعنه رقم المتصل جاه منا من نفس المكان بهل لحظة طببنه
واحد من قواتنه بزي عامل نظافة عساس يسئلة محتاج شي وكال من طبيت جان لازم التلفون يحجي بي من طبيت
سده بسرعة وجان يحجي بلاقطة (سماعة سودة توضع على الاذن وتوصل لحد الفم لتغير صوت المتكلم )
وهنا عرفنه الي يخابر لبنيه هو نفس الدكتور لان حسب كلام العسكري نقطع الاتصال بين المتصل ولبنيه بنفس الوكت
الي قطع الدكتور المكالمة
جاسر . . بس هذا مو دليل قوي يخلينه نمشي وراه
معتز . . اعرف سيدي لهذا كلت اسمعك المكالمة الي دارت بين الدكتور وبين لبنيه يمكن تساعدنه
فتح معنز تسجي المكالمة يسمعه ال جاسر وال حسن والي هي كال أتي
( الدكتور . . الوو وينج مختفية صارلج يومين
فرح . . مريضة
الدكتور . . الحجي يفيدج اليوم اكو عملية اذا مجيتي باجر الصبح جثة اخوج تلكية معلكة باب بيتكم
فرح . . لا لا اجي والله
الدكتور . . ساعة وانتي بالمستشفى وراها راح توصلج الجرعة بنفس الطريقة الي فاتت بظرف تنتظرين
الليل وتجيج التعليمات بعد فاهمة
فرح . . فاهمة وسده )
جاسر . . هيج لازم نخابر فرح ونطيه أوامر
معتز . . والي هي
جاسر . . الجرعة الي تستلمه منهم تقلل من قوته
معتز . . ليش يعني
جاسر . . لا انت اسئلتك كثرت خليه بعدين تفهم كلشي
حسن . . وهسه
جاسر . . شصار وياك انت
حسن . . اي سيدي رحت على بيت لبنيه مثل مكتلي حجيت وياها تكول اخويه مو خارج العراق وقبل
يومين جان بيتهم من سئلته على شغلة بالاردن كالت صحيح هوراح بس شهر ورجع ماطول سئلته هم
على اخو فرح كالت انو ميت
جاسر بصدمة . . شنو ميت
حسن . . مع للأسف سيدي كاتلي الانذال قبل فتره وجاي يستغلون فرح بي وهو ميت واهله ميدرون
جاسر . . زين واخوه شلون رجع
حسن . . متدري كل الي تدري بي انو شهر ورجع واخذت منه صورة له كلت يمكن تفيدنه بشي ونطاه لجاسر
جاسر . . عفية عليك بس كلتله متكول الاحد عن اي شي جاي يصير
حسن . . اي سيدي هي تدري بكل الموضوع من اخوه لهذا خايفة منه كتلة لتحجين لاحدد واحنه نحميكم وخليت كم جندي
حماية من بعيد خاف احد يتعرضلهم
جاسر. . زين سويت هسه بقت عدنه بس فرح وهل دكتور نفكر زين باجر همه بيدنه واكعين
خابر جاسر على بكر كله نفد وسده
جاسر ويه حسن ومعتز . . يله بداية الشغل الحقيقي معتز تروح للمركز تحضر اكبر الفرق الموجوده هناك تجهزة وتضل
هناك لحد متستلم مني الاشارة مندري بيم شكد حسن تضل هنا تراقب لحد ما بكر يوصل فرح تطب فرح تخابر بكر
يجي يضل يمك لحد ما ارجع
حسن . . عفوا من سؤال بس وين رايح
جاسر . . عندي شغلة نص ساعة وجاي . . يله كل يشوف شغلة
تفرقو معتز للمركز وحسن يراقب وي كم شخص المستشفى وجاسر اخذ سيارته ورجع للمركز اخذ كم ملف وطلع بسرعة
. . . . . . . . . . . . . . . .
مها
وصلوني اهلي لبيت عيالي وراحو دكيت الباب طلعتلي حماتي لصغيرة هي الوحيدة الحبابة بين خواته هنه 3 بنات ثنين
مزوجات وبيوتهن قريبة على بيت عيالي ف اربعة وعشرين ساعة موجودات غداهن عشاهن يمنه بس نومتهن هناك حته
مرات هنه وزلمهن وكله براسي يصير جهالهن يوصخون اني الي انظف وراهم وكحين نار على امهاتهم سلمت عليه طبيت
لكيت حماتي الجبيرة موجوده سلمت وكعدت
زينب (اخت حيدر الجبيرة ) . . زين والله تذكرتي عندج بيت ورجال تجين تشوفيهم
مارديت كمت رحت العمتي وكعدت يمه جانت كاعده كدامنه
. . عمه جيت وعندي بشارة لج والحيدر
ام حيدر . . بشارة خير بنتي كولي
مها بخجل . . اني حامل
ام حيدر . . صدك تحجين يمه
مها . . اي عمه قبل لا اجي جنت بالمستشفى حللت وسويت سونار وطلع عندي حمل صارلي شهر واسبوع
ام حيدر وتبوس بيه . . الف الحمد وشكر ياالهي والله حيدر من يعرف يطير من الفرحة
زينب . . اي زين لحكتي على نفسج قبل لا يزوج عليج
ام حيدر . . زينب
كامت وعافتنه . . معليج بيه لتضوجين نفسج بنتي اصعدي لغرفتج ارتاحي
مها . . ماشي عمة بس اطلب منج طلب
ام حيدر . . كولي بنتي
مها . . عمة عمة لحد يكول لحيدر اني حامل اريد اني افاجئة
ام حيدر بحنيه وبتسامة . . حقج يمه تدللين مراح اكله . . مها باست ايده وراسه
ام حيدر . . الله يرضه عليج كومي ارتاحي يجي حيدر اني ادزله لج
مها . . اي عمة كايمة
اخذت جنطتي وصعدت رتبت الغرفة وزينته حطيت شموع ونفخت بالونات تضحكون عليه اذا كللكم انو مرات
اطلب من حيدر يجيبلي بالونات ألوان احب انفخهن واضل ألعب بيهن طبعا بس بغرفتي وحته مرات هو يلعب وياي
شويه المهم رتبته للغرفة واخذت هدومي وطبيت سبحت وطلعت ضليت محتارة شنو ألبس ادور بالكنتور اخير شي
طلعت فستان اسود قصير يوصل للركبة تقريبا وبي نفشه خفيفة واني بيضة اطلع توب رحت لبسته وكعدت على الميز
مال مراية خليت ايلاينر وكحلة خفيفة حمره ورديه رشيت عطر رحت على تلفون بعد مو هسه يجي ضليت اطك صور
وكلب بالتلفون جان يدك عليه سما
مها . . الوو هاا سماوي
سما . . لج بذاته بس تأكتي من الحمل ركض على بيت عيالج بس لتراب وراج دتعاي نباركلج ونفرح وياج لو حبيب الكلب اوله منه
مها . . استوب استوب اكلتيني بكشوري دطيني فرصة احجي
سما . . والج عين تحجين بعد
مها . . لا انتي ابد مو تمام لج لتمشين وي جاسر هواي شكلة مأثر عليج وصايره شيخة
سما . . لعد ليش ماصير جا مو زوجي حبيبي شيخ ويحلالي اصير شيخة
مها . . جا ولعد بكلمة وحده خوش شيخة
سما . . شيخة والي ميعجبة افشخه
مها . . ههههي هاي هناك يمهم من تزوجين مو يمي وبعدين أكلج شسوي اجي يمج رجلي اوله بيه وبهل فرحه شو سدي يمكن جاه حيدر
سما . . اي عيني رحي شوفي وعوفيني
مها . . هههه خبلة
سما . . ولي لج
سديته منها واني اضحك على سوالفة تريد تصير شيخة خرب حظي رحت على الشباك شفت سيارة حيدر اي جاه
رحت ركض على الميز اشوف شكلي . . كمر كمر . . عدلت الفستان وكعدت على السرير انتظر يجي ضليت كاعده
يمكن بالخمس دقايق شو تأخر عمتي كالت بي يجي اخلي يصعد كمت من السرير تجهت على الباب حطيت ايدي على
المقبض مالته دفتحه جان تنفتح من بره وفات رأستن الباب صارت بوجهي ردت اوكع بس لزم ايدي
حيدر . . الله الله
مها . . شبيك مستعجل طاب تركض ياعيني لو واكعه
حيدر . . هههه غير مستعجل اشوف مرتي
مها . . احم الله يساعدك
حيدر . . ويساعدج حب بس شهل جمال اليوم طالعه كيكة
مها . . هههه عندي الك مفاجئة
حيدر . . اممم راح تكوليه على الباب مثل الخطار لو تفوتيني
مها . . هههه لا فوت
فات حيدر شاف لشموع وبالونات اندار عليه وحجه . . شهل اجواء اليوم لا عيد زواجنه ولا عيد ميلادج ولا
عيد ميلادي وحته ولا ذكرى خطوبتنه شكو اليوم . . كمل حجي وكعد على السرير وخله ايده وراه وسنده نفسه عليه
جتي كعدت يمه . . مو كتلك مفاجئة
حيدر . . اي يله احجي
مها وخدوده صار حمر من الخجل . . اني حامل
كالته وغمضت عينه ضلت شويه مغمضتهن لحد ماحست بهدوء بالغرفة فتحت عيونه باوع على حيدر لكته صافن بيه
مها . . حيدر
حيدر . . اششش خلي استوعب الموضوع
مها . .هههه خلت ايده على لحيته وباوعت بعينه وكالت . . حبيبي اني حامل يعني انت حتصير اب واني ام راح يجينه نونو صغيروني
حيدر . . مهاوي حبي تحجين صدك لو تشاقين
مها . . لا صدك اليوم جنت بالمستشفى سويت تحليل وطلعت حامل
حيدر كام من السرير وكعد بالكاع يم رجليه خله ايده على بطنه . . اووف ابويه انت شكد جنت منتظرك مادري منتظرج
مها . . قصدك منتظرهم
حيدر . . شلون يعني
مها . . يعني اني حامل بتؤام
حيدر . . هههه يعني يعني راح يجيني طفلين الف الحمدوشكر لك يارب
كام ولزم ايده وكفه يمه بعدين شاله ضل يفتر بيه
مها . . حيدرر نزلني هههه لك نزلني والله ادوخ
حيدر نزله وحضنه . . احبج يا احلى هدية من ربي
مها . . واني هم احبك حبيبي
حيدر وخره من حضنه وكعده على السرير وكعد كدامه . . ماريدج تشتغلين ولتشيلين شي ثكيل اريدج
هيج بس ارتاحي واي شي تريدي يجيج لحد يمج
مها . . هههه هيج راح تطلع عيني بدلالك
حيدر . . تستاهلين اكثر والله . . وباسه براسه . . راح اسويلهم غرفة خاصة بيهم و اشكال العاب اجيبلهم وهااا
الملابس بالبداية خلي بس ابيض احسن علمود اذا طلعو ولد هي راهمه واذا بنات كذالك واكيد بالبداية نيمهم يمنه
بس اجيبلهم كاروك واحد جبير لو ثنين هااا شدكولين . . باوع عليه لكاه صافنه بي . . هاا حبي شو صافنه
مها . . مجنت متخليه هيج راح تفرح حبيبي انت فرحان اكثر مني
حيدر . . لج متتخيلين شكد جنت متشوق وملهوف ان اسمع هل كلمة منج تجين تكليلي انج حامل كل يوم كل اسبوع كل
شهر جنت اصبر نفسي اكول كل تأخيره وبيه خيره الله ماينسي عبده لحد مرزقني بتؤام انشالله يجون بخير وسلامة
مها . . انشالله حبيبي . . لحد هسه اتذكر من كلي
حيدر . . مها تدرين من اول مازوجنه جنت احلم بجاهل بنيه جانت او ولد متفرق عندي اربي واكبره وحته اسهر وياج
بليل لحد مينامون واعلمهم احسن تعليم واربيهم احسن تربية يعني يكون من يشوفوهم الناس يكلولي ونعم من تربيتك تعبت عليهم
مها ودموعه نزلن . . انشالله حبيب نربيهم ونكبرهم اني وياك وانت تصير احسن اب بالدنيا
حيدر . . لج ليش لدموع كلب حيدر ماريد اشوف دموعج
مها . . هاي دموع الفرح
حيدر . . هههه حتلو ماريدهن امي تدري
مها . . اي شلون لعد كتله اول مجيت بس منعرف بتؤام
حيدر . . اممم اني اكلله عود هسه ممكن اخذ قطة من هل كيكة الي كدامي . . وباسه بخده
مها . . هههه خلي الكيك وره العشه
حيدر . . شوي بالعشه اني احب الكيك وباس خده الثاني
مها تدفعه من صدره . . حبيبي خلي انزل اسوي عشع حباب
حيدر . . اممم يله هل مره اعبره بس وره العشة اذا ماكو كيك انزلج تنامين يم امي هااا
مها . . هههه وشبيه عمتي عادي انام يمه
حيدر . . امشي ام عمتي عود اني الي جاي اهدد بيه وخري وخري وراح للحمام
مها بصوت عالي . . احبك
حيدر طلع راسه من باب الحمام . . اني هم
. . . . . . . . . . . . . . . . . .
جاسر
اخذت كم ملف من المركز تخص الدكتور عنوان بيته كم طفل عنده وهل معلومات رحت على العنوان منطقة
رافية والبيت جبير وحلو دكيت الباب وجرس محد طلعلي رديت دكيتهن مره ثانية طلع ولد بعد شاب بكد ياسر
تقريبا سلمت عليه وحجيت وياه عن الدكتور طلع اخو طلبت يطببني ماكال لا فتنه للمضيف او الاستقبال مالتهم
وصار حجي بينه ومشاحنات بالكلام و اخير شي تفقنه سلمت وطلعت
. . . . . . . . . . . . . . . . .
فهد
اليوم اخر يوم بالمستشفى طبعا ضليت يومين بس طكت روحي باجر من الصبح اطلع انوب جاسر ماكو من جيت
للمستشفى اجه شافني شويه وراح بعد ما شفته مو من عوايده ميسئل او يجي عليه جان حته بس يدك تلفون باوعت
ياسر وسرمد يمي كاعدين بالغرفة يلعبون شطرنج ومكيفين عبالك بيتهم ماخذين راحتهم
فهد . . اكول يا ولد
سرمد . . اي فهد
فهد . . جاسر هل فتره ماكو ماشفته بس بيوم الي تصاوبت اجه للمستشفى وبعد مابين تعرفون وين غاب
ياسر وعينه على شطرنج يلعب . . جاسر بغداد صارله يومين تقريبا
فهد وعكد حواجبة . . شسوي بغداد
سرمد . . ما رادله عالم اكيد يم خطيبته
ياسر . . ياخطيبته انت الثاني خطية هو لاحك
فهد . . شنو السالفة فهمنه
ياسر . . جاسر بمهمه بغداد تخص واحد كرايب خطيبته
فهد . . شوكت هل حجي شو مكلي يعني
ياسر . . اول شي انت جنت متصاوب شلون يكلك ثانيا هو اخذ حسن زميلك بالشغل شعجب هذا مكلك
فهد ويكوم من مكانه ويتجه عليهم وضرب سرمد على راسه . . لا تغش عيب
ياسر . . هاا سرمد مو انت خوش ولد
سرمد . . هو اني لحكت احرك شبيكم عليه
فهد . . هسه عوفك من هل غشاش وحجيلي شتعرف عن هل مهمة
ياسر وحرك الوزير . . وكش ملك وسد اللعبة وباوع على فهد . . شوف فهد كل الي كلياه جاسر انو خطيبته
ابن عمته نسيت اسمه جان رايده بموضوع مهم وبي خطورة هذا الحجي هو جان هنا بالمستشفى لهذا خذ
حسن وياه خابرته بالليل كلي الموضوع خطير بي بيع الاعضاء البشرية بمستشفى جبيرة بغداد متورطه بيه بنيه
تخس هذا ابن عمته وجاسر هناك علمود يحل الموضوع بمعرفته ولبنيه هم متضرر او يحكم عليه
فهد . . اي كمل
ياسر . . اي هاي كل الي كلي عليه وحته جاب كم حارس على الديره والمضيف يحرسو
فهد وتذكر كلام سجى عن الحراس . . اي اعرف بهل شغلة
ياسر . . اي . . صفن شويه . . منين تعرف وانت هنا اربعة وعشرين ساعة
فهد ونتبه لزله لسانه باوع على سرمد وغمزلة . . سرمد كلي اليوم الصبح وهسه تذكرت
ياسر . . اي الصبح همه جوي
فهد . . اطلعو اريد اخابر
ياسر وغمزله . . خابر كدامنه عادي منطلع صوت
فهد باوعله صفح . . اخابر اخوج يا. استغفر الله اطلعو مابيه حيل لسوالفكم
سرمد . . امشي ايسر امشي نروح نفتر شويه ونرجعله
طلعو منه فهد فتح تلفونه وخابر جاسر مرد خابره مره ثانية شويه يله رد
فهد . . الوو شيخ
جاسر . . اي فهد وياك
فهد . . ياسر كلي على السالفة بغداد
جاسر بتنهيده طويله . . اي والله مثل مكلك
فهد . . تريدني اجيك اساعدك
جاسر . . لا فهد خليك انت متصاوب وبعدين خلصت السالفة تقريبا بس بقه نقبض عليهم
فهد . . اي انشالله اكلك على شغلة اي صارت وياي
جاسر . . شصار وياك
فهد . . على الجماعة الي تهموني
جاسر . . اي اي شبيه
فهد . . اريد اكلك اني احله من يمي انشالله ترجع لهنا تلكاه خاصة وياهم
جاسر . . تدري اكون ممنونلك والله
فهد . . صدك جذب دومك انت شايل علينه خلي احنه نشيل عليك
جاسر . . اوووف والله لو هيج العضيد لو بلا
فهد . . اخذ راجتك هسه غي امان الله
جاسر . . الله وياك
سده منه وصفن بالسالفة الي ورطوه بيه اذا هي عائلة كاعدين جديد اني وين راح اشوفه ضل صافن جان يتذكر اخته
اي يمكن صديقته وجايه بيتم باوع على الساعة 6 خابرت على ابو الفضل ( اخو) كتله جيب رهف ( اخته ) وتعال سديته
فهد بنفسه . . اكيد جانت تفوت بيتنه يعني اختي تعرف همه كم معلومة واذا هل معلومات تفيدنه نكدر نحل هل شغلة كبل
لا يرجع الشيخ جاسر
ربع ساعة وجوي ابو الفضل ورهف طبو على فهد غرفة المستشفى
فهد . . ابو الفضل اطلع وعوفنه
ابو الفضل . . اخوبه بس
فهد بحد . . ابو الفضل اطلع وتسوي فضل اذا ترجع للبيت رهف مو هسه ترجع
ابو الفضل بستغراب . . ماشي اخويه رايح اني . . طلع وسد الباب وراه
فهد . . تعاي اكعدي
رهف بتوتر . . حاضر . . كعت كباله على السرير
فهد . . رهف راح اسئلج سؤال واريدج شنو تعرفي تحجي ومتضمين شي عليه ماشي
رهف . . اي اسئل و اوعدك ماضم شي عليك
فهد . . عفيه بخيتي احجيلي كلشي ترعفي هن بت ام حارث
رهف . . الي عساس حامل منك
باوعله فهد بحد . . شلون عرفتي
رهف بتوتر من عصبيه اخوه . . اب ابو الفضل كلي . . رفعت راسي . . بس والله مكلنه الامي متدري
فهد . . عال والله ليش ناويه تكوليله تردونه تنجلط
رهف . . لا خويه
فهد . . احجي هسه الي تعرفي
رهف . . شوف اخويه علاقتي مو كلش قويه وياه بس هي جايه هواي لبيتنه اكثر من خمس مرات بس مره جتنه
جانت حيل تعبانه حته مكعدت هواي امي بوكته سئلته شبيج كالت مريضة ومكعدت حته شويه وطلعت وراها
باسبوع جتي جنت اشر ثياب على السطح هي جتي يمي اتذكر بوكته امي صاحتني نزلت شفته وهي بقت على
السطح رديت صعدت يمه لكيته مكملة شر لثياب كتله ليش تعبتي نفسج كالت لا عادي اساعدج شوي وكالت
يله اني رايحه وطلعت تركض حته مسلمت على امي قبل لا تطلع وجانت هاي اخر مره جتي بيه لبيتنه وبعد
ماشفناه يمكن اسبوع كامل هي ماكو لحد ماسمعت من ابو الفضل بالسالفة
فهد . . ماشي
رهف . . اخويه اسئلك سؤال
فهد وعرف شني تريد . . رهوفه انتي مصدكه انو هي حامل مني
رهف . . لا خويه ممصدكه حته من كلي ابو الفضل ستغربت انت لاتعرفه ولا مره شايفة حته شلون تحبل منك
فهد . . والله ياخويه لو اشوفه هسه كدامي ماعرفه
سكتو صفن فهد تذكر شغلة وكام يربط الاحداث باوع لرهف . . يول رهف اخير مره من جتي للبيت من طلعت
جانت شايله شي
رهف . . مثل شنو
فهد . . قماش قميص ثياب
رهف . . لا خويه
فهد . . زين سؤال
رهف . . اي
فهد . . من غسلتي لثياب مو وراها قميصي ضاع حته بوكته رزلتج عليه
رهف وتذكرت . . اي صح تذكرت بوكته اني غسلته ويه لثياب بس من نزلتهن جان ماكو وياهن
فهد وعرف السالفة شني . . اني اعرف وينه
رهف . . وين
فهد . . بوكته من نزلتي على امي هي استغلت الوضع وخمطته بدون احد ميدري وهاي شغلة شرت لثياب
واساعدج جانت لعبه منه عمود لحد يشك بيه
رهف . . وشسوي بقميصك هي
فهد وضربه على راسه . . يعني صايرتلي فهيمه وتعرفين الموضوع من ثول الدليل عساس هي حامل مني
القميص تكول نسى يمي
رهف وشهكت . . صخام الصخمه على هل كوله
فهد . . اووف هسه مرتاح وباوع على رهف انشالله باجر السالفة محلوله وخابر على الشيخ ابو الجاسر
فهد . . الو شيخنه . . الله يسلمك لا بخير . . ما عليك زود والله . . اي والله . . اني خابرت عمود هل سالفة
. . اي . . اي شيخنه بعد امرك باجر انشالله الكعده عندك بالمضيف . . افه عليك اني فهد تربايتك محلوله بعون الله
. . اي كتله . . انشالله انشالله الله وياك الله وياك . . وسده
رهف . . هاا خويه ابشر
فهد وضرب راشدي بالشقة . . ابشر شنو كاعد بديوان
رهف . . اوي فهد ايدك ثكيله شبيك
فهد . . هههه غير احبج
رهف . . عمي اذا هيج حب منك ماريد
فهد . . كومي لج كومي عود محترمج بس فعلا مو مال احترام كومي خلي انام تعبت
رهف . . عااا
فهد . . وسم ادبسزز بالمستشفى احنه مو بالبيت خلي تفض السالفة اني اراويج
رهف . . وين تنام خابر ابو الفضل يجي ياخذني
فهد . . ولي تلكي بره ادري بي ميروح هسه اطلعي وسدي الباب وراج
رهف طلعت صدك لكيت ابو الفضل منتظرني بره
ابو الفضل . . هااا
رهف . . يله مشي نرجع
ابو الفضل . . يله مشينه
. . . . . . . . . . . . . . . . .
بسبس