على صراط امي

٣١

مساء الخير

على صراط امي
الجزء الواحد وثلاثون والاخير

كعدوني ودخلو بحالة انذار لان طلوكي حار
بس ماجاي اساعد نفسي
ثلث مرات غمى عليه من الخوف...
اخر شي حولوني عملية..
وجبت الحمدلله..
صح وجع فضيع وماينحمل..بس اهون من الم الطلوك..

جابتلي امي ميار بحضنها وهي مبتسمة..
وج وطن باعي ثمرة حبج ولج ..
باوعتله مبتسمة بدموع..
يجنن ماما يجنن...
اي فدوة لوجهه يخبل ياربي يحفظه ويحميه..
ساعدتني رضعته شوية..
ودخل حر وبابا ..بس الابتسامة بعيون بابا اول مرة اشوفها..
فرحان طاير من الفرح ..
حر عيونه المدمعة تشرح فرحته..

بقت ماما وياي ورصا ودته ليماكة وحر هو اليعتني
بيه ويجيب الدكتور ويحي
صح اول شي الم بس المسكنات زينة والاهتمام
هم اله دور..
يوم ثاني الصبح خابرني بابا حجي وصوته تعبان
كال ..
ذول ولد الجلب محد كلي جبتي
هسه اخلي ياسر يجيبني...
لا بابا انت تعبان شيجيبك للمستشفى احنا شوية
ونطلع ..

خوش تعاي لبيت ابوج احسن مو ترحين هناك
بحدج..
اي طبعا لان بعدني ماكدر ..
خوش بوية ديربالج ع روحج وانة طالع
هسه الكم..
انشالله بابا حبيبي الله وياك...
سديته وماما حضرتني وواخذت ميار بحضنها
وبابا سندني وطلعنا ننتظر حر..
لاكانا واخذني من بابا ماقبل كله انت تعبان
وتالي ثنينهم سندوني ..

وصعدنا بالسيارة وحر يسوق بهداوة يخاف
اتوجع من الطسات..
بس ميار بقى ينعوص وبابا وحر يتلفتون
شبي ليش يبجي..
بقت ماما تضحك عليهن وسوتله ممة وسكت...
وشوية ووصلنا للبيت
ومن الباب بابا حجي واخواني وبيت خالو سلام
الكل منتظرني...

محضرلي ذبيحة وحر من شافه حجه باذني بهمس..
جدج لو شريكتي ما حايلني هيج ..
ابتسمت وهو فرحان بيه ويباوع لحر بعين ونص
خلوني ادخل يلا ذبحوها طبعا..
اخذتني ماما لغرفتها لان غرفتي صارت لعابد
يتزوج بيها
ونيمتني ولكيت بابا جايب سرير لميار مرتبه يم
سريرهم..

عدلت نومتي ماما وبابا حجي كهد ع الكرسي ويباوع
لميار كال لماما ..جيبي لو خاف يفز..
لا توه شرب ممه مايفز ..حجت وهي تحطه بحضنه..
يباوعله ومبتسم ويقرا عليه..
ويتفصحة كماطه راسه ..شكد حنين رغم قساوته..

وراها دخلت مرت خالو وبيبي والبنات شوية وطلعو
كالو خليها ترتاح تعبانة..
سالتهم عن حر كالو يم الولد بالاستقبال كاعدين..
واعرف حر ميدخل اذا بابا حجي موجود..
انة غمضت شوية لان تعبانة والم ..
غفيت وكعدت الظهر ع صوتهم يحجون ..
جابتلي سبأ ماي غسلت وصبو الغدا الي وياي بابا حجي
وبابا
والبقية برا ملتهين..اكلت اغسلت ورضعت حر ورجعت
تمددت..
وبقى يمي بابا حجي للعصر يلا طلع كال اروح اتمددلي
شىوية...

بس طلع اجه حر يضحك ..ها الحجي اخذج مقاولة
انة كلت هسه يشمرلي ميار من جوا الباب
ويكلي اخذ ابنك وانة اخذ بتي وفضت راحت..
هههههه ترى هو مو هيجي عاد..
لا مو هيجي ابد غير حنين ..حجاها ويلعب بنظراته
وبقى يمي شوية واجو اهله..

فرحانين حيل وعمو جايبلي سوار لبسنياه كال مال سلامتج
شكد نفسيته طيبة ودوم يذكرني..
امه من شافت ميار بقت دموعها تصب ومبتسمة
فرحو بي كلش
حتى يمامة تكلي هذا ميار اذا ماطلع وكيح
ويشيبج
لان كلها فرحانة بي ومامصدكة وراح يدللو
دلال يخلي يتوكح..

وفعلا كلامها تطبق..كل مايكبر ميار تزيد وكاحته
بس لوتي ومحبوب ودمه خفيف
بكل مكان نطلع عدا نظرات الناس الي انة وحر
ميار ياخذ عقل الحضور بسوالفه..
ومشى كلش من وكت عمره عشر اشهر
صار ماينلزم اكثر..
اكثر الوقت اذا عندي شي مهم اذبه بم اهلي
هو ورضا صارو صنف
وهو ينام عد بابا ويهدأ لان من الصغر بابا
ينيمه عنده...

ومرت الايام وعابد تخرج وتزوج ..
ومختار خطب شهد..
اما مرتجى مرتة صارت حامل وسقطت
مرتين..والثالثة ثبت الحمدلله..
وبعد طول انتظار صار عدهم علي..
اما عابد ورا فترة يلا حملت زوجت وصارت عدهم اسما
راد يسميها ع اسمي
بس انة اختاريتلها هالاسم
خفت تكون مثلي وتتعذب ..
صح صبرت ونلت بس عانيت ..

مختار تزوج شهد فعلا ماسوا حفلة عرس
اخذها وسافرو
ومن رجع ماما سوتلهم احتفالية بين الاهل..
وصارت ببيت بابا حجي طبعا..
سوتله مولد وورا عزيمة عشا..وطبعا الكل حاضر
من اهلنا..
واهل خالد كذلك موجودين..

شفت امه ورحت سلمت عليها ..سلمت عليه
بحرارة واخذت ميار من ايدي..
فدواته هذا طالع اشكر عليج ..
ههه اي صح حتى العيون..
اي يمه فدوة لله ولعطيته ..اندارت لبنية بصفها..
باعي نرجس هذا ابن وطن..
باوعتلي باستغراب وانة هم..
جاوبت ام خالد ببرود ..اي فدوة بس هذا عبد مولد!
جاوبتها ام خالد..اي مثلج تينة ماطلعت بجمال خالد
خذت السحنة منج وضحكت..

انة بقيت صافنة ذني جاي يشمرن وحدة ع الثانية
شدخلني
يعني ام خالد صاحتني تحنص جنتها بية..
لا وبكل وقاحة تكول عبد ههه عبالها اضوج يمكن
لو اعاركها..
ام خالد كالت نرجس مرت خالد واشرتلي براسها..
ابتسمتلها وانة ابوس بيد ميار..
اهلا وسهلا عيني فرصة سعيدة..
باوعتلي بنظرات ودها تاكلني..
النا هم عيني واخذت بتها وكامت..

ام خالد كلتلي شوفيها شلون بلا اسلوب ولا اخلاق
مخبلتني يا وطن خسرناج
وخالد لليوم يكول ضيعت وطن من ايدي..
بعد هي قسمة خالة كلمن ياخذ نصيبة..
اي وشلون نصيب اكشر وج يمه مابيها خير
وشالعة كلبك وشابعها دك
ذاك اليوم كسر رجلها وكرمها ومافاد بيها..
يا خالة مو هيج عاد شنو صدك جذب ..
حتى انة لغيت عليه يمه ومارضيتله
بس تطلع بلا ماتكله ومن يجي مايلكاها يتفشل كدامنا
من يسال وينها ونكله
خذوها اهلها عبالنا يدري بس يبقى فشلان..

الله يهديها خالة هو الضرب مو حل ويخرب حياته
بيده بهذا السبب..
شكلج يمه هي حياته خربانة طلكها ذيج المرة
ورجعها
وهسه يكول مابقى عليها لو اطلكها لو اخذ عليها
مرة..
الله يصلح حاله..حجيتها وانة احمد ربي مابقيت
ويا
حتى لو مرته غلطانة بس هو هم قاسي وصعب
المعشر كلش..

وبعدها خلصت الحفلة واجه حر اخذني رغم توسلت
ابقى يمهمبس ماقبل..
رجعنا للبيت تعبانين وانة مسطورة كلش واحس
ظهري يريد ينفصم..
ماخلاني انيم ميار هو اخذه بدله وكال راح انومه
لان تعبان...
انة الالم زاد علية وبطني هم
كمت للحمام كلت اسبح بلكي ارتاح..
سبحت وماي دافي شوية عظامي فكت
بس انتبهت لنفسي دم ينزل..

سديت الماي واخذت كلينكس انشف
بس يزيد ووجع موتني..
فتحت الصيدلية اخذتلي احتياط ولبست
وتنظفت وطلعت ..
رحت تمددت والوجع اخذني اكثر واكثر..
ردت اكوم بس من قوة الوجع
طحت بالكاع ..
دخل حر وتفاجأ بيه اجه بسرعة..

ها ها وطن شسالفة..كعد يمي وقلق ولزمني
كومني للسرير..
وانه لازمة بطني وابجي..
وجع حر وجع كطع بطني وظهري انشل عليه..
شنو خاف الشهرية؟؟
اي يمكن لان شفت هواي دم بس اول مرة هيجي
اتوجع..
هسه اجيبلج مسكن اضربج تمددي..

مددني وجابلي الابرة وضربني..وانة اون من الوجع
ثواني حسيت شي نزل..
حررر مادري شنو حسيت شي ..
امشي للحمام بس لا الابالي اووف..
اخذني ودخل وياي..
فتح عيونه بقلق وسال..خرررب ولج هذا طفل
وطاح ..
وبقى يستغفر وكومني ..كومي اخذج للمستشفى
مو زين تبقين ..

خابر على علاء وكله جيب سبأ لان ميار نايم
بقينا ننتظر حد مااجو وطلعنا..
اخذني لقسم النسائية ودزلي دكتورة..وبعد
الكشف تبين طفل وطايح
انوب انقهرت وبقيت ابجي ..صح ماادري
بي لان باعتبار اضرب ابرة منع حمل وما
متوقعة هالشي..
بس حيل انقهرت..

بعدها طلعني للبيت ومقهور اكثر مني مرة يصبر
بيه مرة يلوب ومقهور...
وصلنا ولكيت خطية سبأ متمددة بغرفة ميار
وبتها نايمة..
بقت تسولف وياي ومامقسوم وانشالله يشفعلج
بالجنة...
وانطتني الفون كالت يمامة تنتظر كالت بس
ترجع خابريني بالي يمها...

خابرتني يمامة وقلقة طمنتها كتلها مابيه شي
رادت تجي كتلها دنيا ليل وين جاية..
وسبأ يمي لتخافين عليه...
هم سبأ وبقت باتت يمي ليوم ثاني ..
وانة نمت نومة عميقة لان تعبت وتوجعت..
كعدت ع صوت ماما تحجي..
فزيت ولكيتها هي ويمامة يمي بالغرفة..

اخذتني للحمام رغم كتلها بيه امشي بس
قلقة خطية علية
غسلت ورحت للصالة بابا بس شافني كام واخذني
بحضنة وباس راسي
كلي يتعوض بابا وبعدكم شباب..
وجايبين وياهم ريوك حضرت سبأ ويمامة وياها
وكعدنا تريكنا كلنا...

بقت يمي ماما هي وبابا وميار التهى هو ورضا ..
سبأ ويمامة رجعو للبيت..
وماما رادت تروح ماخليتها كتلها عنج جنات بالبيت
بعد بيمن تفكرين
وبقو هي وبابا يوم ثاني يلا راحو...
وانة الحمدلله تحسنت..

واجو اهل حر هم تطمنو عليه وامه رادت تاخذ ميار وياها
بس ماقبلت
وزعلت علينا ..
يوم ثاني حر اخذ ميار وراحلهم حتى يرضيها
هي رضت بس بقت زعلانة مني..
وبين كل فترة تكول جيبو يبات يمي وهو مايقبل يبقى
وهي تكول انت السبب ..
وبسببها تلاغيت وي حر ورحت لاهلي وهم يعرفون
لان احجيلهم كلشي..
بس بابا وماما نصحوني اكبر عقلي ومااضوجها
وهي مرة كبيرة وتحب حفيدها
وفوك هذا عمو فخري وياي دائماً
ولخاطره اروح واواصلهم...
واخو ومرته هم زينين وطيبين....

*************************************

صفنت بذكرياتي وانة استرجع الايام المضت
واكتب بدفتر مذكراتي
بس اخذني النوم وغفيت ..
فزيت ولكيت حر حاط الدفتر
ع جهة وحاضني ونايم..
عدلت نومتي اريد ارجع انام وكعد..
رجعني بحضنه كلش ويشم برقبتي..
لكيتج نايمة ماهانلي اكعدج وابنج فر راسي يلا نام..
انداريت وصار وجهي بوجهه..

جنت اكتب وغفيت بلا مااحس..
اي قريت شوية وعرفت اشياء ماجنت اعرفها
ولو متستاهل تنذكر..
قربت شفتي ع رقبته وبستها..
ماكو  شي يستاهل ينذكر غيرك..
جرني لحضنه وهو يعبر عن شوقه وهيامه..
وبعدها يحط راسي ع صدره ويبقى يسولف..

وطن ليش ماحجيتي بالصار قبل ..
اممم شنو الصار قصدك..
تعرفين قصدي شنو ليش ماحجيتي بوكتها جان
رحت بردت كلبي وكسرته..
هههه خفت لان دوم اسمعك تكول ارجعه لبطن امه
وانة هالشي مااقبله اغااار...
هههههه لعد احجيلج الاقوى منها الاريد
اسويها بي اخاف تطلكيني..
ههههه امووووت ومااعوفك حبيبي..

جاي ياذن جنه؟
يا صدك بيس الساعة ..
اي كومي وكت اذان خل نصلي..
راح سبح وحضرتله سجادته وصلى
وبعدها صليت ودعيت ورجعت لفراشي..
خليت راسي ع صدره ونمت ...

هو ملاذي..اماني...هو اجمل ما تراه عيناي شكلاً
وقلباً وروحاً..
هو رجل..والرجال قليل..
اعتدت على نظرات الناس المتفاجئة برؤيتنا سوية
واصبحت تضحكني حين يلفت نظري هو..
لقد نال رضا ابي..وكسب حنان امي
واصبح لاخوتي خير رفيق..
اما الاخرين..فلا يهم ماذا يروه..

فأن رأوه ظلام..انا اراه قنديلا يضيء قلبي
وطريقي..
ولو تركو لي الخيار الف مرة
ماكنت اختار غيره
ولو وضعوه بين الاشقر ..والاحمر..فلن اختار الا..
الأس_____م______ر...

تمت ..الساعة 11:30
الاربعاء المصادف..2019-4-17

بقلم شقراء(قمر كانون)