مساء الخـ،،ــيــرر
طاقة تحمُل
الـعــباديـــه
البارت //18//
كرار
إستمرت علاقتي ويه البنيه على حساب الانستا انشغلت بيهه صار كل وقتي اراسلهه وبس سوالفهه تسلي ومحبوبه تعرفت على كليتهه ببغداد واتفقنه نلتقي
قررت اروح لبغداد علمود اشوفهه لان بهـٰذي الفتره نوعاً ما نسيت ساره وانشالت من تفكيري وكلت اذا تعجبني اتقدملهه وان شاء الله تصير القسمه بعد ليش متعب نفسي ويه وحده مشايفتني ولاتحبني وفوگاهه تحب غيري
اتصلت بيهه انطتني المكان الي توگف بيه واني اجيهه خابرت محمد علمود اخذ السياره گال السيارة بالتصليح !! تفاجئت سألته
(مسوي حادث) گال لا ماكو شي بس عصبت وفرغت قهري بيهه !!! بصراحه تفاجئت والسالفه مدخلت بعقلي گتله علمود شنو ؟ غلس گلت بعدين اعرف
خليته يدبرلي سيارة صديقه وسألني شأسوي بيهه گتله رايح لبغداد بس ماگتله شنو هم غلست
ثاني يوم وقتت الموبايل على الساعه بـالـ4 الفجر علمود الطريق احتمال يستغرق 4 او 5 ساعات لبغداد
گعدت متحمس والي واهس تأنقت بكامل اناقتي وإتجهت لبغداد بعد مسافه طويله وطريق شاق وصلت للمركز اخذت استراحه وكملت اتصلت بيه علمود تطلعلي بباب الجامعه گالت اوكف بالباب الرئيسي
وصلت
شفتهه شابة جميله ومتروسة انوثه وجهه عريض بخدود بارزه وملامح رقيقه طفوليه عيونها واسعه ملونه باللون الزيتوني الغامق رموشها تطخ بحواجبها والنوب تدري برموشها طوال ترمش بهدوء وعلى كيف واني روحي انسحلت برموشها
اما حواجبها بحثاً آخر ترتيـب آلهي .. حواجب ثخان ومرفوعات وحلكهه صغير يخبل .. جسمها رشيق بخصر منحوت طولها متوسط واكفه بثبات وثقة تباوع عليه من بعيد لابسه فستان طويل بردان مزركشـه لونه تركوازي فاتح وكعب عالي باللون الابيض لمحت إيدهه مزينتها بمحبس ناعم ورقيق ووشم صغير علامة الى الابد على الاصبع الصغير
تقربت يمها عّرفتني عن نفسها وتصافحنا بالسلام !! وياهه صديقتهه ماركزت بملامحها لان جنت منبهر بالجمال الواكف كدامي دخلتني للجامعه العيون.كلهه.علينه مااعرف اذا سببتلهه كلمة بس هيَ ادرى بمصلحتهه .
ضيفتني للكافتيريا مال الجامعه ونزلت الطلبيات ،،
كعدنه نسولف مقابيل الشباك الجو مشمس ولطيف
هيَ فرحانه ولمعه بعيونهه احتارت بيه تجيب وتخلي مقابيلي واني صافن عليهه بعد تأمل دام لدقائق سألتهه :-
كرار _ شلونج
نور _ زينه الحمد لله انت شلونك
كرار _ تمام
اريد اتعرف على اهلج
_لا مو هسه لان حاليا ماعرفتهم عليك
_اني سبق وانطيتج وعد گتلج اذا التقينا اجي اخطبج ويكون كلشي رسمي امام الله ورسوله ف احجي ويه اهلج بالموضوع
_البارحه من گتلي اگوللهم مصار عندي وقت اعتذر كولش
_ عادي عادي براحتج
سولفنا وتعرفنا على شخصياتنا اكثر التقيت بيهه لنهاية الدوام ورجعت فرحان.ومنشنش
__________________________________
ساره
بقيت فتره يم ماما يوميه نتراسل اني وبلال رجعنا مثل قبل وجهي رجع ورد ورجعت للحياة صار عندي واهس واسولف واضحك بعدما كانت الضحكه مفارقتني
تأكدت سعادتي بإيد بلال ماگدر على فراقه يوم الي نتزاعل اتمرض
داومت بالمدرسه اول ماطلعت تقدمت خطوتين واسمع خطوات ورايه التفتت وشفته يراقبني أشرلي بعيونه (كملي) بقيت امشي تقدم خطوات للامام خلى شيء على حافة الرصيف ورجع باتجاهي المعاكس من رجع أشرلي بعيونه اروح اشوف شنو
تقدمت دنگت لكيته موبايل نوكيا صغير فتحته بيه رساله ((هذا الموبايل خابريني من عنده من ترجعين لااهلج ولاتخلينهم يشكون بشيء))
تذكرت من كتله اهلي سحبوا الموبايل مني ومااگدر بعد اراسلك فرحت كلش لان انحلت المشكله الي جنت أهم الهه
وصلني للمدرسه اول مادخلت لاگتني تقى بالباب واگفه منتظرة اصدقائها شافتني اني وورايه بلال
دخلت للصف اجتي ورايه كمشتني من إيدي قوي ودارتني عليهه
تقى : شنو علاقتج ببلال وليش اجه وراج
رفعتلهه حاجبي ونظرتلهه نظرة تشمتت
سارة : ليش متعرفين شنو علاقتي بيه
تقى : احسللج ابتعدي عنه بلال الي وبس
استهزأت بيهه
_طنن
خليت بنات الصف كلهه تضحك عليهه ضحكت وغمزتلهه وخليتهه واكفه بكانهه مثل المزهريه ماإلهه محل من الاعراب
رحت لصديقتي نسولف بالساحه شفناهه طلعت من المدرسه شوية ورجعت بإيدها سبريه صبغ رش
بالفرصه مال الدرس الثاني راحت ورة المدرسه وكتبت على الحايط (بلال+تقى= حب للأبد)) اجيت مريت من يمهه ضحكت بصوت عالي وگتلهه
(شگد قديمه ههههههه خرب هاي وين بياعهد انتي )
خليت البنات كلهن يضحكن عليهه عيونهه نطن من القهر خليتهه ومشيت من يمهه اتمايل واضحك حسيتهه بس اطخهه تنفجر
خلصنا الدروس وحلينا هيه طلعت اول وحده منتظرة الجرس يدگ وبيدهه السبريه اول مادگ الجرس ركضت وكتبت على الجدار الخلفي من جهة الشارع (لان هذا الجدار دائما يگعدون بيه بلال واصدقائه)
أحبك بلال
خلت العيون كلهه صافنه وتريد تاكلهه ،، تضحك وتباوع عليه بنظرات شماته اني ردت انفجر متت من الحرگه
رجعت للبيت ابجي وماما متفاحئه تباوع عليه نزعت ملابسي واخذت موبايل ماما واخابر عليه ودموعي تصب يتصل وميجاوب تخبلت اصابني الجنون ابجي ومفرفحة
مرت نصف ساعه وإتصل عليه اول مااتصل جاوبته بصراخ وعياط
_لك انته شنو صارلي ساعه اتصل ماترد عليةةةةة ليشششش
_حبيبتي سارة شبيج معصبه
سارة : لك انته ليش هيج تسوي بيه
بلال : ليش شمسوي ؟
سارة : تقى ليش إنطيتها مجال هسه كل ماتشوفني تتشمت بيه وتگول يحبني انته شنو سالفتك المدرسه كلهه تكول يحبني يحبني يحبني مليت من هالكلمةةةة ملييييتتت
بلال : يعني هنه لازگاتلي شأسوي بهاي الحاله انتي كووليلي
سارة : ككككاااافيي عذرك اقبح من فعلك .. مموجود حظر مموجود عندك لسان وترزلهن بس انته عاجبك الوضع وتريد البنات ملتمه عليك مثل الذبان
بلال : اي اتونس وياهن لان انتي مو دوم فاتحه نت اتونس وياهن بس انتي الاصل
سارة : لك شنو كمية هالحقاره العندك تف عليك
عاط بيه بصوت خلاني اخنس
بلال : اسسسسس لاتغلطين لحد الان محترمج ودابرللج تره اعرف اعيط واصرخ عود عبالج تخوفيني لو شسوين مثلا ، تره بس صوتج يروح ويتجرح واني مااخاف من اكبر واحد فاهمةةة لو لا ،، اي اني ابو بنات وسـ ..... وكل الصفات الموزينه بيه منو كاللج تحبيني منوو ؟
سارة : لك نسيت وعدك وكلامك انته گتلي ماغيرك منو جاب الرقم وراسلني هسه صار الحجي يختلف بس وعد اذا مااتندمت بكد شعر راسك على كل كلمة حجيتهه هسه فلا اتسمى سارة وراح اثبتلك اني مو مثل ذني بنات الشوارع الي تعرفهن يطلعن بالسيارات ورة الولد
بلال : ومنو يگول انتي هسه ماتحاجين غيري ؟ مثل ماتحاجيني هسه تحاجين عشره غيري شنو فرقج عنهن ؟
فقدت من كلامه الموبايل وكع مني وبقيت بس دموع مذرفه ومصدومه بكلامه خنت ثقة اهلي على موده وضحيت وكلشي سويت وهسه يجي يكول هذا الكلام التافه الي حتى الحجر اذا انحچى مقابيلة ينفلق من القساوة مال الكلام
غلقت الموبايل ودخلت بفراشي ابجي كالعاده الي صارت ملازمتني من عرفت بلال لليوم غطيت راسي حتى ماتشوفني ماما
دخلت ماما شافت الموبايل بالكاع وصوت بلال لحد الآن يعيط اخذت الموبايل وحجت وياه راد يحجي وياي بس هيه ماسمحتله اعتقد عرفت من حالتي الي اني بيهه
اندك الباب وسمعت صوت بابا بره ابد مو وقت مناسب اجه بيه حالتي متساعدني ارجع لضيم هيفاء جتي ماما عليه حضروا ملابسكم اجه والدكم ياخذكم
سارة : ماما عفيه خل ابقى يوم اضافي ماكدر ارجع بهذا حالي
زينه : شصار بينكم انتي وبلال
سارة : تعاركنا
زينه : اي عليمن
سارة : ماكدر احجي هسه بعدين احجيليج بس هسه قنعي بابا خلي يخليني يوم اضافي
زينه : مااعتقد يقبل
: سارة : دحاچيه وشوفيه بلكي ويقبل انشاء الله
زينه : ماشي
"العباديه""
سمعت صوتهه گالتله (خل يبقون يوم إضافي) كاللهه لا مايبقون البيت تايه وزهراء مموجوده لحد الان ببيت ام محمد وهيفاء مطروده عند اهلهه ولازم ارجع البيت يحتاجنه حاولت ماما وياه بس ابدد قافل
جتي ماما حضرت غراضنه اني وعلوش واني گاعده على السرير ومكرفصه وابجي وماما كل شويه تجي تمسح دموعي وتمسد على راسي والمح دمعه خفيفه على أجفانها
طلعت بعدما خفيت الدموع وآثرها بكريم اساس وسلمت على بابا وبقينا شويه كاعدين وودعت ماما ورجعنه طول الطريق بابا يسأل شسويتوا وشلون قضيتوا اوقاتكم والمسؤل عن الاجابات علوش لان اني بحالة ماتسمحلي الجواب
وصلنا للبيت لكيت البيت زباله (حشاكم) من الوصخ تحزمت وبقيت انظف بلكي انسى طلعت كل قهري بالتنظيف
سويت العشا وعشيت العائله ودخلت للغرفه اخذت موبايل بابا وفتحت بيه صفحتي اول مافتحت ماسنجر لگيت رسائل من عنده كوومه قريتهن وماجاوبت اول ماشافني فتحت نت دخللي
،،،،،،،،،،،،،،،،،،،،،،،،،،،،،،
جانت رسائله هيج
بلال: ردي ليش تشوفين ومتجاوبين
:وينج سارة فدوه احجي
'"والله مو بقصدي ومتندم على كلامي بس ردي فددوة ""
: لج تعرفين بيه احبج شعليج بالباقيات وشعليج بتقى اصلا مااطيقها ام الولد(لوما البطله لحت ما قبلت اكتب هذا اللفظه البذيئه)
: لج بس ردي انتي تعرفين بيهه شكد تصاحب وينج
:ساره انتي الاصل
،،،،،،،،،،،،،،،،،،،،،،،،،،،،،،،،،،،،،
اخر شي مليت صارن يمكن 200 رساله حظرته وارتاحيت
داومت ثاني يوم الصبح اول مداومت شفت الحايط ( على كتابة تقى مشطوبة بالاحمر ومكتوب "انجبي"" )
من شفتهه صدگ فرحت متت ضحك عليهه وجهه شلون ينطي الوان وتفشلت بقت تضم بروحهه منا لااخر الدوام
بقيت كلما امر من يمهه اصيح "" انجبي""
__________________________________
زهراء
بقيت ببيت عمتي فترة اسبوع راحه مو طبيعيه تونست حيل كالعاده كرار رجع للبيت ووجهه متفح ويضحك ويسولف ورجع لتحشيشاته بحيث مخلينه متونسين يوميه نجتمع بره بالحديقه ونسولف لحظات صدك من عمري
كاعدين اني وضحى وهيه تخابر بخطيبها ويتغزلون كتلهه خل اسمع
بقى يتغزل بيهه وهيه صارت حمرررره من الخجل واني ميته ضحك الباب اندفع ومحمد مد راسه مستغرب أصوات الضحك ! عبالك شبح بكل موقف يحط روحه بالنص .. اعتقد مراقبنه لان ممعقوله هيج صدف
اول مشافني اني يم ضحى واسمع لحجي خطيبههه عكد حواجبه بغضب وزمخ بضحى خلة وجههه يصير ليمونه من الخوف وهو شكله جاد وعصبي خلاني حتى اني اخاف
_ ضضحححى شگاعد تسويين شنو هالقلة ذوق هاي
ضحى دنگت واني تظاهرت القوه
زهراء _ ليش قلة ذوق عيني شبيهه هيه وخطيبهه يسولفون كفرت خوما كفرت
_اي گلتيهه هيه وخطيبهه انتي شكو مدخله نفسج بالنص
_ والله شيء يرجعلي بكيفي اني
_لسااااننججج
عوجت حلكي وكلت باستهزاء
_ع الاقل عاقدين محكمه وشيخ ويتخابرون مو مثل بعض الناس
اول مگلت هيج زمخ بضحى
_ضحى برررره بسسسررررعه
ضحى بقت صافنه بوجهه وبوجهي محتاره شتسوي لما سحبهه من إيدهه وطلعهه برة الغرفه
اني بقيت واگفه بمكاني وابلع بريكي النشف من الخوف اني دائما هيج احجي حجاية واتراجع خوافه مو بيدي تقرب عليه وعيونه بقمة العصبيه والغضب
يتبع .....
الـعـبـاديـه
إحتمال افجرلكم الاحداث بالبارت 20 إحتمال مو اكيد تره