على صراط امي

٢٠

مساء الورد

على صراط امي
الجزء العشرون

فقدت بس احس بتداخل الاصوات واحس انشاليت
وانحطيت
فتحت عيوني كلهم فوكي وامي تهز بكتفي..
وطن باعيلي وطن تسمعيني ..
بس اريد
انطق اكلها مابيه شي
كوة جريت نفس كتلها اي مابيه شي بس خفت حجيت برجفة..
فتحت عيوني احسن وشربوني ماي وكعدت ماقبلت
ابقى متمددة..

كعدت وهم خطية كعدو يمي ووالولد برا ملتهين
ويمامة بصفي وتسالني شبيج ليش تخربطتي ؟
حجيت بصوت مرتبك
الخروف الدم خطية يخوف خفت ..
ضحكت بصوت عالي وهم بقو يضحكون على ضحكها
بس امي ابتسمت بسكوت ودنكت ..

وهم نصبو عليه لان خفت من الخروف وكملها فقار وعلاء
من دخلو وعرفو السبب
فقار كال اتخيلج مسويتها بعرسج من يذبحولج فدا
تطيحين يمه وتجلطين رجلج
علاء جاوبه ..لا عليمن نعصب عيونها وندخلها انوب
عيالها يخترعون عبالهم طبلهم ارهابي ..
اباوعلهم وابتسم وبداخلي اكول لو وطن مالت قبل جان
هسه كامت ملختكم ..

راحو هم للاستقبال لان عدهم خطار واحنا وي مرت
خالي وسبأ والبنات
حضرنا الغدا وكملنا
واجه بابا والولد ومن سمعو بقو يصنفون عليه وبابا
كلهم نفس من صرخت بيوم الثواب
خصم الحجي شبعوني تصنيف ومداهر في سبيل
تتغير نفسيتي
بس انة نفس الشي مجرد ابتسم واجامل ..

لحد العصر وصاح بابا تحضرو والولد سبقونا
للبيت
ودعت يمامة واحس راح افتقدها هواي وما متقبلة
فكرة هي مموجودة بعد بالبيت
حضنتها وبقيت ابجي مقهورة حيل بس هي مسحت دموعي
وكالت
عليمن البجي يومية تعاي هنا يمنا انة وسبأ خوش صرنا
حزب ولج صدك راح نتونس
ابتسمتلها وهزيت راسي واخذتني ماما وحطت ايدها ورا
ظهري وكالت
يومية عابد يجيبج تدللين ابسط منها ماكو..
وودعناهم وطلعنا...

مدنكة راسي اخاف حتى السيارة اخاف اشوفها
بسرعة ركضت للسيارة وكعدت
صعد بابا كال ..بابا شبيج تركضين ههه مستعجلة ع البيت
انة دنكت وسكتت
وماما تكله تعبانة تريد ترجع تنام ..
ولحد مامشينا وطلعنا منطقتهم وانة مدنكة ..
وكفت عقلي عن التفكير ماريد افكر بشي ابد..

وبس وصلنا اخذت مسكن ودخلت نمت
يمكن ربع ساعة ودك فوني وفزيت
باوعت رقم غريب ..النومة بعيني ماميزت بس عفته
ورجعت غمضت
دك مرة ثانية فتحت خط وحطيته ع اذني وماباوعت
للرقم اصلا ..

سمعت تمتمة هادئة ..كيف الحال دلوعتي مشتاقلج
فتحت عيوني قوي وكعدت لحيلي
بقيت اتلفت وانوب ارجع اباوع للفون بيدي يا شبيه ؟
رجعت باوعت للرقم
اي هذا رقمه صحيح جنت نايمة وما انتبهت
بقيت لازمه الفون  بيدي واباوعله
شوية وسديته وغلقت الفون
بس انصدمت منين الرقم اخذه ؟!

يلا هو اليريد شي مايصعب عليه خصوصا
حر هه..
ماعرف اجت ببالي اجاوبه وارزله واطلع عقدي النفسية
كلها بي
بس ياترى اكدر؟
ماعتقد اكدر لان يمه تنحبس انفاسي يمه احس كلشي
بيه يرتبك حتى تفكيري ...

رجعت تمددت وبس مغمضة نومتي وطيرها
الافندي
اكوم اطلع يم اهلي احسن..
طلعت محد بالصالة يمكن امي راحت نامت الولد هم ماكو
رحت للمطبخ وكت غروب
فتحت الاضوية ونورت البيت لازم وقت الغروب
البيت ضاوي ..
ورحت توضيت واجيت قريت دعاء السمات على
مااذن وصليت ..
من خلصت بقيت ساجدة وابجي اريد شوي اخفف من
ضيق صدري
عبالك طابوكة فوك صدري ثكل وملل كلش..

بس من بقيت اصلي هواي وابقى ع ساجدة وابجي احس
ارتاحيت
بقيت اكرر هالشي يومية ..
خصوصازمن افتقد يمامة واتمنى اشوفها وامي تروحلها
بس انة مااقبل اروح
من زواجها بعد ما وصلت الهم بس نتخابر
مااريد اتصادف وياه كلش...

ومرت ايام وايام وايام وانة نفس وضعي ماكو كل تغيير
بس حر يومية يتصل ومااجاوب
بيوم سمعت يمامة حامل وحيل فرحت واهلي اخذو
حلويات ومسواك وراحو الها
وشكد حاولو وياي بس ماردت اروح بقيت وحدي
والولد محد هنا بس حسين وفوك كاعد..
انة بالغرفة اتصفح بالفيس ودك حر ..
حيل حاقدة لان بسببه ماريد اروح هناك ..

بس فتحت خط جاوبته بصوت مرتجف..
شتريد؟؟؟شتريد تخابر شتريد مامليت ماتعبت؟
شبقيت بيه بعد ياحر شبقى ..؟
حجه بصوت متفاجئ من هجمتي عليه..
اوف اوف اهدي دلوعتي ليش هالاعصاب؟
لا تسال وتسوي نفسك الملاك البريء
كله منك انت..حجيت وبجيت..كله منك حرمتني
من اختي ومن بيت خالو
بسببك ماريد اوصل هناك..

تنهد وحجه بعتب..لهاي الدرجة كارهتني؟
مو كره هذا بس قهر منك
مااحب اجذب انة بس انت اذيتني وماكرهتك
بس اطلع من حياتي قبل لا اكرهك ابتعد عني
وخلي الماضي للماضي...

تنهد حيل وكال شنو اليرضيج؟
يرضيني تختفي كلش من حياتي..
بس مااكدر ااخ ..ماكدر صدكيني حاولت بهواي طرق
بس كل الطرق تؤدي الى وطن ..
حجه بقهر وبصوت بي بحة..وطن خل نتزوج
ونبدي من جديد تعبت وكلبي شيب...
نصيت صوتي وحجيت..بس انت كلت حبج مات بداخلي
وزواجك مني اسقاط فرض..
ثنينا نعرف هالحجي ساعة عصبية ومانعاتب ولا نطالب
بالصار كله
خل نبدي من جديد وماراح ااذيج لو اجرحك اقسم
بداعة ابوي وحليب امي...

اختنكت بعبرتي وجاوبته..ماريد زواج بعد ماريد
انة حياتي انتهت من ناحية حب وزواج
ولا راح ارتبط ولا تحط املك بيه روح تزوج وعيش..
حجيتها وغلقت الخط وغلقت الفون
ورجعت ابجي اكثر وعقلي المشوش من التفكير وماريد
افكر بحر بس عقلي يخوني ويفكر بي..

بقيت لوحدي لورا الصلاة يلا اجو اهلي وماما كالت
يمامة زعلت عليج
وبابا كال باجر ناخذ سمج سمج ونروح نشوي عدهم
ونتغدا..
كتلهم انشالله..ورحت خابرتها وكتلها اجيج باجر يلا شوي
ضحكت
اعرفها من تقفل طنكورة وماتفك بسرعة
وهم حقها كل يومية تخابرني وتكول تعاي وانة ارفض..

وصار يوم ثاني الي اصلا صادف جمعة وراح بابا والولد
للسوك تسوكو واجو
وانقسمنا مجموعتين ورحنا لبيت خالى..
من وصلنا للمنطقة احاجي نفسي هالمرة كون تعدي
سلامات
لان ولا مرة اجيتهم وما صارلي حادث ..

فززني صوت مختار كال..
وطن لا تنزلين انة اشيلج وادخلج
لان مااجيتي هنا الا وسويتيلج سالفة وتعوقتي
بقو يضحكون وانة لاول مرة هيج اضحك من قلبي
لان جنت افكر بنفس الموضوع
وعلى ضحكي كلهم بقو يضحكون بحيث دمعت من
الضحك .

رفعت راسي جاي امسح وجهي بالكلينكس وتقريبا احنا ببابهم
وشفت سيارته..
اختفت ابتسامتي ومسحت وجهي ودنكت ..
نزلنا انة وماما قبلهم وماما لزمت بيدي ووكفنا بالباب ودكته
بسرعة
حسيتها تريد تجنبني هالوكفة والانتظار والترقب من
طلعة حر..
وفعلا فتح الباب علاء وسلمنا ودخلنا..

اجتلي يمامة حضنتني حيل وشبعتني تكفخ ورزالة
بصوت ناصي
وسبأ تكلها اجي اساعدج خية وهي تكلها لا بعدين
نستلمها انة وياج صبري...
وانة شردت منهم يم بابا وهو يكلهن منو وي بتي
اشيلكم اليووم..
عيبت عليهن من ورا بابا وهن تفاجئن لان اول مرة من بعد
النكسة هيج اتصرف ههه..

واجو جروني من بابا ورحنا للمطبخ وهم مسوين دولمة
واحنا حضرنا السمج
البقية طلعو للحديقه يحضرون الحطب واحنا بقينا وحدنا
اندارت سبأ ع الباب تتاكد محد
ورجعت حاجتني..وج وطينة سمنانة وحليانة شكو
وغمزتلي..

جاوبتها يمامة بضحكة..اي اي امبينه مو خالية بس
لا كبلت وي رزاق ابو المولد
لو شايفته ولج سبأ شلون بشر يخببل اسمراني مملوح ..
انة فتحت حلكي بغباء وكتلهم عود مزوجات انت
تعال علااء فقاار الحكوو..
وطفرن ثنينهن عليه ويضحكن ..
بس مثل الي ما مصدكين رجعت احجي واسولف واتشاقى

وطلعنة برا يمهم مكملين الحطب وشاعلين نار والكل موجود
ماعدا فقار
كعدنا انة وسبا بالمرجوحة ويمامة يمكن راحت تدور فقار
حجت سبأ بصوت ناصي..
شخبارج حر يخابرج؟؟
اي انت ناطيته الرقم؟؟
لا ولج خالتي ..
صدك؟..

اي وهي كالت كافي انشلع كلبه الولد وهي ذبلانة وصفرة
حر بمعزة ولدي وماتحمل اشوفه هيج
من شافها من اجت للعرس دمه احترك شصاير بيها
وشلون متغيرة
ومن خطبتج المرة كدامها كالت ماريدها تروح لغيره كافي
الصار باول مرة
وهالمرة اكل لسلام يوكف بوجه كل واحد يعارض
عمي الله يحفظه يريد يمشي الدنيا كلها بزوده...

هههه طلعت خطرة خالة ام علاء وهم روحها خضرا
تشجع الحب
ماتدري بيه لعبت نفسي من الزلم ومن سيرتهم بس هذا
الحقير احبه وماريده..
دنجبي عادي ماتريده كومي وياي كومي
عندي كم بدلة اريدج تختاربن وياي
امم شعدج حفلة؟
اي عرس الخلفوج مو عرس اخوج بعد اقل الشهر شبيج
زهايمر..
هههه شمدريني بيج مستعجلة ..
هو انة بعدني مامحضرة انت المن متحمسة من هسه..
مو كالو مثلج مصنع كآبة...

وكامت وجرتني وياها وترخصت منهم ودخلنا
عبرنا من يم غرفة يمامة ونسمع صوت همس ولهفة
ودلال ودلع الخلان..
ركضت بسرعة وي سبأ ومغلسة وهي تباوعلي من جوا عيونها
صعدت الدرج بسرعة
وهي لحكتني وتكلي شبيج يحظي اصفريتي؟
الله يساعدك يافلان باجر عليها..
باوعتلها بارتباك..عفية سبأ اكره الزواج احبه لغيري بس
مو الي سدي السيرة..
سكتت بلا ماتهتملي وراحت..

رحت وراها للحمام جابت سلة ملابس جبيرة واخذتها منها
شلتها لان حامل ..
وين تردين اوديها؟
تولي وج ثكيلة هسه اصيح علاء يصعدها..
دروحي شسالفة ..فوك مو لو جو تنزليهن؟
لا لا فوك الحبل بالسطح..
الله ياخذج الدرج شطوله بس يلا ميخالف لخاطر
حفيد خالي..

وصعدت السلة وكل باية اصعدها اسب بسبأ وبعلاء
وحتى روحي سبيتها
وصلت للسطح وفتحت الباب وطلعت وهي وراي
بالبيتونة واكفة..
وديها وانة اجيب القراصات واجي عفية..
المن جاية شيصعدج مو زين عليج انة اشرهن واجي..
لا لا جايتج هسه..

اخذت الملابس وبقيت انكت واشر حسيت صوت حركة
وانة مدنكة اخذ الملابس كتلها..
خبلة مو كلنا لا تصعدين مابيج انة اشر ..
ماسمعت جواب ..جمدت بمكاني..التفتت
اباوع كاتف ايديه وواكف وراي!!!!

للحكاية بقية
بقلم شقراء(قمر كانون)

هذا الفديو من اختيار
roorQueen953
يسلم ذوقج كلللش عجبني😍

https://www.instagram.com/p/BXEZLNuF-R2/?utm_source=ig_share_sheet&igshid=1deqn1zxd8r0k

ولج حسستيني فيضان خرب يومج😂😂😂

حتى الخروف ماسلم منكم

😂😂😂

ولله انت بس الي بتفهمي يگدعة

خطيرة 😂

مخلوس وانوب مغوش😂😂😂جبتيها فت