الحلقة الثانية :
نوفل حبس في سنة 4متوسط و بدأ يخدم على خواتاتو الي كان يشوفهم أيتام و مسؤولية في رقبتو كان صغير بصح حس بالمسؤولية ....مات والدو و خلاهم هذا على راس خوه 4بنات و طفلة الكبيرة فيهم 14سنة و نوفل 13... رجعت أمهم لدار باباها و في رقبتها 5صغار من غير مدخول ولا مأوى ...دار جداتهم مجرد بيت قصديري في حي شعبي ما يبانو الي ساكنين فيه حيين ولا موتا .....صبرت امهم عام و تحطمت... البيبان تاع الحلال كل تغلقت في وجهها و أبواب الحرام كل تشرعت ...شافت معاها امها العجوز الكبيرة الي عايشة على التسول زوجتها لأول واحد قصد الباب ...تزوجت أم نوفل و خلاتهم عند امها خلات أصغر وحدة فيهم 3سنين ملايكة صغيرة تبكي على امها كل يوم ...الله غالب راجلها ماقبلش بأولادها كان كل ما يشوف نوفل جاء عندها يضربو و يسحتو و يقلو مانزيدش نشوف وجهك هنا ...
نوفل من الفجر يخرج يسترزق يخدم في الشوانط يهز يكنس يسيق ...يعمل أي حاجة المهم يجيب غير حق الكيلو تاع البطاطا لجداتو المريضة تقليه و لا تطيبو في الماء و الملح .....جدة نوفل كيما قلتلكم خدمتها التسول ...كانت تبعث خواتاتو الي يقراو للمدرسة و الصغيرة تهزها تطلب بيها ...نوفل كان نهار يقرأ و عشرة لا الله غالب محتم عليه يخدم .... قرأ للشهادة و حبس .
حتى جاء النهار الي دخل للدار على 10 تاع الليل بعد تعب تاع نهار طويل لقى خواتاتو يتباكاو وحدهم في الدار ...
نوفل : واش كاين ؟؟ مريم : ماني مارجعتش لدرك و معاها مرام ...
نوفل : مارجعتش ؟؟ كانو يبكو و الخوف مالي عينيهم ...خرج نوفل كي المهبول يدور في الطرق و الزنق الي موالفة تقعد فيهم جداه ...سقسى الناس الي تعرفها كل لا السماء قالت شفت و لا الأرض ....رجع للدار على أمل تكون رجعت لقى ليجوندارم قدام الدار قلت أكيد لقاوها ...دخلت نحوس عليها في نص الدار غير 3 من ليجوندارم واقفين ...
الدركي : انت هو حفيدها ؟؟ نوفل : ماني وينها ؟؟ الدركي : هيا أمشي معانا ..
نوفل : واش كاين فهموني ....
حط واحد يدو على كتفي و خرجني ركبوني معاهم و انا غير نسقسي واش كاين واحد ما رد عليا ...
وصلنا للسبيطار ..
خزرت مع الدركي و قتلو ...ماني مريضة ؟؟ دركي : امشي معانا و تشوف هذي جداتك ولا لا ؟
دخلوني لشومبرة في السبيطار فيها جثة مغطية من راسها لرجليها كان الدركي يهدر مع الطبيبة و هي قالتلو صغير مانخليهش يشوفها .. نوفل : خليني نشوفها مانيش صغير ...
وصلت قدامها و هزيت الغطاء على وجهها ....و كان منظر الله لا يشوفكم فيه كانت ملامح وجه جداتي خاسرة ....لدرجة ماتعرفتش عليه ....