قفلة علاقاتي .. آلفهــــد

البارت السادس عشر

#قفلة_علاقاتي #آلفهــــد
#دعــــاء

كعدت يمهم شوي .. باوعت لساعه 11 ونص كلت الها اشوف الخياطات ؟
- لا حبيبتي اجيبلهن مضمده اهم شي شفناج
- ماكو فرق ..
  طلعت الحجيه وام سعود شفت جرحها ملتأم وقسم من الخيوط واكعات وحدهن وباقي كم واحد شلتهن وصحت على الحجيه تدخل وكمت احضر نفسي حتى اروح

جان قرب السرير ميز خشبي خليت علي اغراضي جاي اشيل بيهن فنتبهت على صورة لامهم وفهد بحضنها وسلام بصفها حاضن امه ومخلي ايده ع راس فهد يشاقي وامه مخليه ايد ع متن فهد وايد ع خد سلام ويضحكون صوره كلش حلوه وعفويه بتفاصيلها .. جذبتني لزمتها ظليت اباوع عليها اشوف فهد شلون جانت الفرحه ماليه عيونه وهسه متروسه حزن وكله بسببي
الهام : حلوه ؟؟  هذول اخواني
- احمم الله يحفظهم
الحجيه : ويحفظج الله يابنيتي وربي موعارفين شلون نشكرج
خليت الصوره على الميز وكلتلها شسويت حجيه لمست خد الطفل وكلتلها يدلل سلطان 
-  اكعدي هنا استريحي
- بلازحمه .. اريد اغسل ..

اسمع صوت ضحك واغاني وطفل يكله خالو يله شفيك صفك معانا صاح ذبحتوني نزلو جوه ابي ارتاح .. جان صوت فهد 😮
يمه كلبي ..طلع موجود هنا
الهام : يمه نزلي الصبيان الفهد توه اجه من الدوام وتلكينه ماله خلك وتعبان
الحجيه صاحت ع ام سعود كلتله كليلهم ينزلون وليرحم والديج ..
شافتني واكفه كالت تعالي يمه غسلي اخذتني غسلت ايدي واشوف 3 الاطفال تنزل من الدرج رجعت للغرفه وكلتلهم يله انا رايحه واي شي تردونه بس انطيني خبر
الام : لا بالله ماتروحين تاكلين معانا
- حجيه والله مااكدر
- ابد قسمت بربي عشان تصير بينه عيش وملح
- هيج انتم تخجلوني والله اتاخر ماكدر
- لا مافي خجل الي سويتي لنه  زود عن هذا
ماتتأخرين ان شاء الله يله خوذي راحتج ماحد يجي هنا
- ماشي بس خلي اكتبلج هذا العلاج جيبو لالهام قبل لا انسه .. كتبته بورقه ونطيته الحجيه

جنت لابسه جاكيت طويل بهاري وتحته قميص وبنطرون نزعت الجاكيت والشال

جانت الغرفه حاره كالت اشغللج التكييف كلتلها زين الجو خفت ع طفل يستبرد عدلت شعري وكعدنه نسولف وتسالني عن اهلي ومن وين انا جاوبتها بس قليل ماتعمقت لان خفت تعرفني ولو هي كبيره ماتذكر دخل ولد حدود 15 شافني وطلع باوعتلي الحجيه لان حجاب ماكو ع راسي كلتلها خلي يدخل صاحت علي كالتله تعال يمه باوعلي ودار ع الحجيه - عمي فهد يكول اليوم مااكو غده ساعتين مصكوع بغرفتي الغده وين هذا كلامة هو مو انا

- الحين ..  كوله امي الكبيره تكلك صبر شوي
راح الولد انا ابتسمت كالت الحجيه
- يموت ع بطنه .. هذا ولد ابني العود ستحه منج تبين اجيبلج حجابك ؟
- الله يحفظه .. لا انا خليته هناك بلاساس انا مو متحجبه
- صج والله هلعمر كله ومومتحجبه
- ايي تصدكين 😅😅 بس ان شاء الله راح التزم بي
- عيل ليش لابسته بالمستشفى
-  احب البسه بس ماعرف ليش مالتزم بي .. بعدين يعقيني الشعر بشغلي وناس داخله طالعه تهمها المضاهر فحبيت البسه بس لهسه ماتعودت علي تصدكون مرات انسه اني متحجبه اذا اجه احد من اقاربنه ويصير مثل الي صار قبل شوي ..

ضحكت الهام كالت انتي حلوه بحجاب وبغير حجاب
- حبيبتي انتي الاحلى بس ان شاء الله التزم بي ومانزعه ابد لان حابه هلشي
الهام : اهلج مايحجون
- لا ماعليهم مرات اخويه يحجي بهلموضوع بس مايجبورني  ..
- وشعجب قررتي تلبسينه الحين
 - لبسته ع مود شخص جان يحب يشوفني بحجاب وجنت اعارضه دائما بس من راح حبيت البسه  ..
.. ..

فهد:  نزلت اشوف شصار عدهم ذبحني الجوع شفت ام سعود تحوس بالجدور كلتلها ماستوت الباجه كالت راح اصبلك ردت اروح لغرفة امي كالت عندهم خطار كلتلها من يجي يعني نيكول كدمن اكيد رفيجاتجن صحت ع امي  من مته جيت كولو تعبان هالرجال يجوع بسرعه مافي رحم عندكم
(فتحت باب الغرفه) اطك البيبان ع اكل ليل نهار دكون حنكـــ ...😟😟

هذي منو ؟؟ .... حور وفي بيتنه !! باوعت عليها مصدوم وامي كسرت صدمتي كالت ويه ويه وين داش .. مفشلنه من يوم يومه
-  ااا.. احم.. سموحه ماكنت اعرف عندكم خطار  باوعتلها .. السموحه اا..
ردت اكول اختي بس موراضيه تطلع مني كلمة اختي لو حتى تمثيل ماكدرت انطقها كانت خجلانه وتباوعلي كالت
- مومشكله انا اليوم سببت الكم احراج
- لا ..  البيت بيتك .. خوذو راحتكم ردت اروح اخذت الباب بأيدي وامي صاحت
- فهد.. لو طلعت العصر جيب معك هذا العلاج

دخلت للغرفه واخذت الورقه من امي كانت حور تباوعلي ماكدرت اخلي عيوني بعيونها
باوعت ع سلطان وكلت لالهام شلونه هم يبجي بعده ؟ البارحه ماخلانه ننام

- مابي شي بس بالبدايه تالي يطيب
باوعت جنطتها ووجاكيت وحجابها يبززها الحجاب هلبنت خزيتها صفح تركتهم وطلعت
.....

حور اباوع علي وعلى طوله وعيونه شلون تتلافاني كأني وحده غريبه عنه ... بس كلشي بي ينحب يالله
حتى تجاهله الي اعرف ان من وره گلبه ..

طلع من الغرفه كالت امه اعذري اذا مااكل بوقته يحوس البيت حوس ابتسمت وكلتلها عادي ..
صبو الاكل تغديت وياهم وجانو كلش حبابين بسرعه تاخذ عليهم

فهد : حتى الاكل تقشمرت معاه وجاملته ومااكلت شي رغم اني جوعان مومصدك هي بيتنه شجابها هنا وشفيني كل مااشوفها يرجف گلبي عليها مو كلنه خلص بننسه كلشي حجيت بصوت عالي واله انت تسايرني وتضحك علي اخزك الحين بهلسكين واخلص منك ....   يقصد ع گلبه😅

ام سعود:  اشوف فهد يكشر البرتقاله ومدري وشيكول كلتله شفيك ياولدي تبي شي

-  بسوالف مع هذا .. اشر بسكين ع گلبه وكال استغربتي ..  مومصدكه ..  مجنون  بعيد عنج
- اسم الله عليك
- عاشت ايدج .. الحمدالله شبعت
رحت لغرفتي 😒😒😒

حور : لازم اروح تاخرت
الهام : الدنيا ظهر
- ماقصرتوا الف شكر
- انتي الي ماقصرتي
ابتسمت الها ودرت البس چاكيت وجاي البس بالشال ..  دخل سلام وهو يكول ابي غده ولبن باااارد... شافني وكف هيج 😳 شكله وكال حور  ؟؟
- انا ارتبكت هلو سلام ... شلونك
الحجيه : تعرفون بعض
سلام ماعرف شيكول احتار سبقته

- ايي كان ياخذ ادويه من الصيدليه القريبه ع الجم تكدرين تكولين زبون قديم .. اشرت لسلام بحاجبي فهم الوضع كال اسف مادري انتي هنا شلونج
- الحمدالله
- عساج دوم .. يمه خالتي وايوب اجو
- هلا فيهم عيل وينهم
- شفتهم يصفون السياره ..
- اي هلا فيهم
- يله عن اذنكم

راح .. انا سلمت عليهم  وبهالاثناء دخلت خالتهم سلمت ع الكل وسلمت عليها وستاذنت
- اكعدي ليش بتروحين
- لا خاله تأخرت من زمان هنا
- يعطيج العافيه
- الله يعافيج .. مع السلامه
الحجيه : الله وياج بنيتي كرريها الزياره امانه عليج
- اذا الله راد .. مع السلامه  .. وطلعت

سلام : تفاجئت حور بيتنه شجابها رحت ع طول لفهد فتحت لباب لكيته كاعد ع حافة السرير ورجلي بالكاع وساند مرفقه على حجره وشابك ادينه تحت ذقنه يوم حجيت وياه لتفت علي
- انت هني ؟؟ تعرف من تحت
- ايي
- وكاعد هني
- شسوي عيل
- طيب شجابها
- اكو غير اختك وامك يطحون بالرگبه لو عرفو احد يفهم بشي
- شفتها قبل هاي المره مو صح
- هي الي ولدت الهام
- صج .. نصدمت
- مو كثري .. اهي راحت
- اي خليتها تريد تروح
كمت اريد انزل كال سلوم وين لزم متني
-  شفيك اتركني
نزلت بسرعه ورحت ع الباب لكيتها تمشي باتجاه السياره
صحت عليها حور لتفت علي

مشيت كم خطوه بأتجاها .. انا ليش ناديتها .. ماعندي كلام اكوله لها اصلا
خلص احنه مايربطنه شي .. كلتلها
- بتروحين
- ايي
- من مته انتي هني
- من ساعه 11
بقيت ساكت اباوع الها هزت راسها تسالني كلتلها
- مصدوم
- من شنو
- بكل الي يصير
- ابتسمت كلتله القدر جاي يلعب دور
- القدر ؟!!
- انت شتكول
- ههه خليها سكته ..

هذي كلمته جانت اسمعها منه لو زعل مني ومايريد يحجي بالموضوع  من سمعتها احس جاي استرجع ايامنه ابتسمت كال
-  في شي
- انت مامتغير ابد فهد القديم مثل ماهو بس ملامحك غلبها شي ..
- الي هو ؟

ماكدرت اكوله اشوف الحزن طاغي عليك بقيت ساكته جان كال
- بس انتي متغيره وااايد مو حوريتي الي اعرفها
- حوريتي!؟!! هههه اخذت نفس وكلتله بعده هلاسم موجود .. سكت وركز بوجهي ..
- انا لازم اروح
- راح اشوفج مره ثانيه ؟
- مادري نخليها للقدر ..
مشيت صعدت السياره بقى واكف ومخلي ادينه بجيوب التراك  ضل يباوع الى ان اختفيت من عينه ولا حرك رمش ..
تكول متغيره الي غيرني حبك الي غيرني قساوتي ع نفسي الي غيرني تمرد كلبي علي بسبب سجنك الي مااكدر احرر نفسي منه  كل هذا وعبالك متغيره لان مرتاحه .. ..؟؟
....

فهد : كنت كل مااشوفها الكلمات تضيع مني وتكتفي عيوني تلمها وتحاوطها من كل جانب شايل بكلبي  عليها بس من اشوفها يضل گلبي يدك حيل وانسى كلشي واحس كاني اول يوم شفتها في ...

يوم تقرب مني وتصير عيوني بعيونها اتمنى تختفي من كبالي لان اعرف مصيري معاها وره كل لقاء  فراگ

ويوم تبعد عني احن الها  واتمناها قربي

مشاعري متلخطبه وماعارف اسوي شي فكرت نفسي بعد كل هلسنين اني نسيتها وحاقد عليها بس تبين لي العكس ومالي مفر من حبها كأنه نفرض علي ومجبور ع هلعشكَ ما بيدي شي كلبي رافض يعشك غيرها  .....

اوووف لو بيدي ارجع ساعتي وين ارجع الياصدفه ؟ والله ابقى افر بيها لما ترجع بشر ماعرفه وانهي العلاقه من العرج كبل الدمع والونه مو انت بالواقع جذب واكظيها انا اتمنى مرات سهله طب كلب بس صعبه تطلع منه يالطيحتني من وكت مغبون احس بعشرتك والكلب طافح همه نام انت ويطبني سهر واتكلب ومااغفه بس ياهو الي يحب صدك غير ابو كلب الخالي من باب اموت بغيبتك ومن باب اموت بجيتك ولليوم مدري شتنحسب محبوبي لو جتالي يالمامقيمني عدل يالمامثمن افعالي تدري شكبرها مكابلك وادري الفراك احلالي ومو كلها تنذل بالبجي ولا كلها تشبه حالي بجي المسافر بي نفع وبجي الطفل ع الام طبع بس انت نزلت الدمع من ابو خشم العالي جنت لا من انصحك تنصح ولا يدخل براسك شرح هو انت توكع ع الجرح بس ماطيبه تلجمه صح جنت للجيه وطن بس البجن يتعلمن وخليها بذنك للزمن مو كلشي بالروحه انكسر يتصلح ويه الرجعه مو حقي لو ارد الوكت واكفر بذيج الصدفه وانعل ابو ذاك الدرب الجابك تشل احوالي؟؟

باوعت سلوم ناطرني كلتله
- خير ؟؟
- شصار
- ماصار شي شفيك واكف هنا ... اشرت ع بلعومي
دخلت للبيت .. لكيت خالتي وايوب سلمت عليهم و كعدنه يمهم كالت امي
- دشيت مابي سگاير ...
- ان شاء الله اذا ماتبينه نكعد عادي  نطلع .. لان حريم وحش افهم سوالفجن 

خالتي : اكول اكعد خلونه نشوف بعض
- نحش معاكم ماورانه شي عطوني اول اسم
امي : لاحول الله بعد لا سمعنه ولا شفنه
- خلص بنسكت
ايوب اخذ ولده گال شو ؟
يبي يعلمه ع الدواوين من الحين كلتله
- ع ساس هو ولد الفهد وماخذه لديون بس لاصدكتوا عمركم يوم سميتوا سلطان

خالتي : وشفينه مانعجب
- هاا مادري عاد
امي : يوز عن هلسوالف يالفهد
ايوب: ماسك ابنه ويكلمه ..  نروح احسن من مسخرة خالك علينه بنشوف من يضحك بلاخر

- اكول .. عبدالملك ماسك بالمشيخه بأدي ورجلي لا تحاول يا ولد عمي
- ههههههههه نشوف حظنه

ضحكوا طلعت باكيت سكاير من مخباتي وامي صاحت انا شكلت
- ماني شارب بخليهن هني عشان مايتكسرن... بس ابي اتمدد بحضنج همزي راسي
- فيك شي
- لا ...
خليت راسي ع رجلها وكعدت تمسح ع جبيني وانا مغمض عيوني اسمعهم يسولفون

- وربي هلبنت ياختي مافي مثلها بنت حلال
الهام : اي والله خاله دره من الله

- باوعت لسلام بطرف عيني وحركت حاجبي وابتسمت ع خفيف يعني ... استلم راح يشتغلونها  فهمها سلوم وابتسم كالت امي
- انت مته تعرفها
انا كمزت من مكاني كلتلها منو كالت
- سلومو طلع يعرف البنت
باوعت لسلوم اشرتله بعيوني يعني شمغبر كال
- من وين اعرفها كنت اتردد ع الصيدليه وعرفت اسمها بعد راح تسويلي قصه الحجيه

- شقصته شفتك تبهذلت احاولك يوم شفتها دارت عليه وطكتني بكف ايدها ع متني وانت بعد تسلهم لو شفتها ..  شفيكم مو شايفين نسوان صج البنت مزيونه بس مو جذي تفشلوني وكل شوي واحد داش الغرفه
فهد: وحنه شمعرفنه عندكم حريم ماعطيتونه خبر

- يمه منك يمه .. بغيت تاكل البنت بعيونك يوم كنه بالمستشفى والحين نفس الشي ..شفيك ؟؟ استح ع وجهك

ضحك سلوم وكال ماشفتي شي من فهد كالتله
اعرفه تعلمني في كالت خالتي
-  يمته اجت ؟
- امي : من الظهر وعزمت عليها تتغده معنا عاد تصدكون هلبنت دشت كلبي وربي لو كانت قرايبنه خطبتها لواحد فيكم يازينها عاد ماتفوت

فهد : ضحكت بأستهزاء وكلتلها هم زين مو قرايبكم

- شفيك .. تطنز ؟
- مافيني شي وهي مو مزوجه ؟
- ماسالتها بس ماعتقد مزوجه لان يوم سالتها تسولف عن امها وابوها ماسولفت عن زوجها
دارت ع الهام ... يمه كالتلج متزوجه ؟؟

- والله يمه ماعرف بس اشوفها تموت ع الاطفال سالتها عندج اطفال كالت لا

خالتي : بس هي لابيدها خاتم وله شي

- صار موده الحين لبس الخاتم المهم لو متزوجه الله يرزقها بصبي يملي حياتها ولو مامتزرجه الله يرزقها بولد الحلال

فهد : مات ولد الحلال

سلام طكاها ضحكه قويه رفعت عيني علي ومن شفت منظره ماكدرت اصبر ابتسمت ع خفيف امي كالت انا لو الله يخلصني من تنطنز كانت بخير

سلام سألني بكل عفويه..  شو لابسه احجاب الي اعرفه عنها ماتلبس ؟ خرزته بعيوني  ودار وجهه ع امي

ايا الثول هذا شفي .. لا ويسالني بعد .. بس محد انتبه لان بسرعه دار وجهه على امي موجهه الها السؤال كالتله امي

- مو محجبه ماتشوف اول مادخلت كطته
خالتي :  هلكبر بلاحجاب 
فهد : يعني حجاب العياره
الهام : لا تكول البسه من اطلع بس اقاربنه واهلنه ماالبسه يمهم
فهد :  وحنه اقاربها ؟

- ماتدري اكو احد بالبيت احنه كلنه لها خوذي راحتج بس منين ..؟ منكم تاخذ راحتها وبعدين هي مو ملتزمه بحجابها اعترفت بهلشي بس كالت تفادي لنظرات الناس لبسته وشخص عزيز عليها جان يبيها تتحجب وماتقبل ومن راح لبسته عشانه

سلوم باوعلي سالت الهام وين راح هلشخص

امي : شعليك انت ... تستوجبنه ماتكولي شتبي لا يكون تلعب ع بنت الناس تراها كبيره واعيه مو من ذن الي كنت نص ليل تخلصه سهر معاهن

- كنت .. هاي انتي تقولينها ...
درت وجهي ع الهام :  ودام هي تعز هلشخص ليش خلته يروح عنها

- وشمعرفني انا
- اكوم احسن كلشي ماتعرفن وجالسين تحشون بالبنت سلام تعال معاي ..

امي:  حشه مو صبي
طلعت من الغرفه واجه سلام انت شمغبر يوم شفتها

- ماكلت شي تفاجئت يوم شفتها بس كلت اسمها وهي بسرعه كالت كان زبون عندنا
- ماتعرف تتحكم بالفهاوه شوي
- عيل تحكم بعيونك انت ترى مفضوح وخالص
- مالت عليك وعلي لاني اخوك

صعدت لغرفتي حيران مادري شسوي يعني من صجها لبست الحجاب عشاني
طيب وزوجها هذا الي ماتجيب سيرته لهدرجه ثور وموحاس بشي .

افكار واساله هواي دور براسي ومالاكيلها جواب وانا مااكدر احجي وياها احس اكو عائق صار بينه حتى اذا اريد احجي يحشرن الكلمات بلعومي وهي نفس الشي ترد علي بكلمه او بأبتسامه .. اسال منو واحجي ويه منو حتى اسامه ماكدر اساله مفكر اني نسيت بعد كل هلسنين ..

بقيت ساكت حياتي هادئه رغم الضيجيج الي بداخلي اروح ادوام وارجع انام لو اروح يم الربع في سبيل انسه ماتذكرها واسولف بيها

الهام بقت 20يوم بعدها رتبت وضعها تريد ترجع لبيتها عاد تعودنه ع وجود سلطان وصراخه كلتلها
- هاا عزمتي اليوم بتمشين
- اي والله لازم اروح صرت زينه الحمدالله
- طيب عساج ع القوه
امي : فهد انا كلمت اخوك الكبير بعد كم يوم نخطب لسلوم
- بس هو مايبي الحين
- مو ع كيفه احسن ماطير منه البنت من يومين سيرت عليهم وكلمت امها وكالت مته ماتبون حياكم الله
- خبرتوا سلوم
- لا
- طيب ... عليت صوتي وصحت سلوم .. سلوم
- شفيك تصارخ
- هو صاحب القرار انا شحكه تخبريني..
اجه سلوم وكال
- هلا
- تعال امي تبيك
- هلا يمه كولي
- خطبتلك البنت الي تبيها
- ايييي دريت

ضحكت  اكيد خبرته امي سالته
امي : من كالك
فهد : العصافير 😆😆
سلام : يمه مو كلتلكم اصبروا

- مو كيفي اخوك كال نروح  لا طير البنت مثل ماطارت الهنوف
فهد : رفعت عيني الها وكلتلها
- زين تسوين كسري جناحاتها من الحينه

الهام : ضحكت ع فهد حتى لو يضوج ويعصب لازم يكول شي يخلينه نضحك رغم يحجيها بجديه ومايقصد المزاح امي كالتله
- انت بدل هلتطنز خلينه نزوجك
- زوجوني من حايشكم
- صج والله يعني اخطبلك
- زاهبه حك الردح انتي..
- صج تبي زوجه وله لا
- لااا .. بس دامج تبين انتي شلمانع يعني ..
باوعتالهم كلهم شكولهم هيج 😮😮😮
شفيكم وجوهكم ماتفسر
سلوم : تمزح وله جد
- لا بالله جد
- يعني نويت تزوج
- لا ..بس جذي .. اجه بالي اتزوج
امي : لعب هو لعب؟!
- حياتي كلها لعب بالعب بقت ع هذي
- يمه رسيني ع بر تبي حرمه؟؟ ازوجك؟؟
- اكولج ايي
- من الي تبيها
- راحت الي ابيها
- انت للحين تذكر
- ومن كالج ناسي
- عيل شحكه تبي تزوج
- انتم تبون مو انا
- طير عقلي .. يعني لو شفتلك بنت الحلال ماعندك اعتراض
- اكولج لا سوو الي تبونه
سلوم  : بنسوي عرسنه مع بعض نفس اليوم
الهام : وناااسه والله... نزفكم ثنينكم احلى عرس
فهد : لا كل واحد لحاله
سلوم : -افاا  ليش!؟
- لي تزوجت معاك ماراح اكون مستانس
- ليش !! تبي لحالك يعني ؟؟
- منو راح يركصلك سامري وشيلات  وجوبي ولصبح ركص
- مايهم انا عريس وراح اركص
- انت فرحان وتركص انا شحكه افرح
- مو معرس مثلي
- لا ماراح اكون مستانس بالعكس .. عاد خلي فرحتي فيك لحالها
الام : شتبي انت ماتكولي بضبط
- شبي يعني تبون تشوفني معرس كلت اي ماعترضت
- وفي اكثر من هلعتراض ساحبينك حك مشنقه

- حجيه خليت كلشي ع هواج تبين تشوفين حرمه زين ع زين ماتبين ابركها من ساعه شبتسوين سوي انا معاج وبكولج تم وبس .. انزين يله عن اذنكم .. طلعت عنهم

الام : انا مدري وشسوي مع هلصبي

سلام : يمه لا تضغطون علي بسالفة الزواج ترى يسايركم وبس فهد مكسور گلبه عاد حسو في

- يمه وشذنبنه حنه .. عسى الله يجازي الي كان السبب
- تدعين ع روحكم
- طمه طمك هاي سولفه اكيد تتعلم منه بوزك مع بوزه 24 ساعه

- لا ماتبون كلمة الحق اجه عندكم توسل تخطبون البنت الي يبيها بس الله يهديكم يبستوا راسكم

- ولك مو رحت معاه والبنت يبونها لابن عمها شسوي يعني
- ايي صح .. اروح اشوفه وين راح احسن ..
طلعت اشوف فهد

الهام : يمه لا تعصبين فهد وسلام جسدين بروح وحده محد ينطي بثاني ادعيلهم بالهدايه وراحة لبال

- وانا شعندي غيرهم اشوفهم واحمد الله كل يوم ع هلنعمه يمه ابي افرح فيهم  .. افرح باخوج الفهد ابي اطمن علي مع حرمه داري انا مادايمه له

- لج طولت العمر ... لا تشيلن همهم هم يعرفون يتصرفون مو صغار
- عسى الله يحفظهم

مرت ايام هادئه مابيها شي جديد نفس الروتين العادي طلعت من البيت شفت ام سعود
- ها خاله وين بتروحين
- لسوك
- عيل سعود وين
- مع اخوك الكبير
- عيل اصعدي اوصلج
- لا توكل انت
- اروح معاج بتكون الاغراض وايده مافيج حملهن
- عسى الله يحميك

صعدت واخذتها لسوك وصلنه كالت روح لو خلصت انادي عليك ..

- انا بالمول هذا ماشي لو حتجتي شي تليفونج معاج اتصلي فيني
- انزين

راحت دخلت للمول كان قريب ع السوك بقيت افتر اباوع ع محلات الملابس الرجاليه ع ماتخلص ام سعود اشتريت كم شغله عجبتني بعدها جلست اشرب كهوى .. دقايق وجان اشوف حور 😮 هي ومعاها ثنين بنات جنب محل الاكسسوارات وحاملات اكياس بقت عيوني تراقبها وتراقب تحركاتها جلسن ياكلن ايس كريم اباوع ع ضحكتها وع حركاتها حركت گلبي قريبه مني بس بعيده وايد كانت طاوله خلفها فيها شباب ثنين يباوعون  عليهن ويضحكون ومدري شيكولون انزعجت وايد
في بنت اجاها اتصال استاذنت مشت وبعد دقايق لحكتها حور وصديقتها ماحسيت الا الشباب الحكوهن عاد ماتحملت لحكتها وصلت يم سيارتها فتحتها وكفها الشاب

حور : اليوم ماجان عدنه لود مثل كل يوم
سهى رادت انروح للمول نشتري هدايا لعيد ميلاد صديقتنه وراحت ويانه هنادي اخذنه الشغلات المحتاجيها .. هنادي اتصل عليها زوجها وراحتله وبقينه انا وسهى جانت اكو طاوله ورانه بيها شباب ثنين نبهتني عليهم سهى الظاهر يتحرشون فكلتلها خلي نمشي طلعنه  جاي افتح السياره ومااحس الا الولد وراي
- العفو ممكن كلمه
- نعم تفضل
- اكدر احجي وياج
- بخصوص شنو
- خلينه نكعد شوي
- انا مااعرفك شنو اكعد وياك عيب هلتصرفات
سهى : حور خلينه نمشي
- حلوو اسمج حور ؟؟ 
- انت ماتستحي شتريد وخر يله ..
- ع كيفج لا تعصبين
فتحت باب السياره وجان يطبكه حيل وكال مو جاي احجي وياج ...

بهالحظه اجاه بوكس درت وجهي وغمضت عيوني بس من منو ماعرف فتحت عيوني وجان اشوف فهد 😲 كاله
- ايا کلب انت صج ماتستحي ع وجهك جليل الحيه ...
ماسكه من ياخت قميصه
الشاب : انت شلون تضربني
- واكسر راسك بعد ..
وضربه واحد ثاني ويغلط علي ..  کلب حقير ...
صحت علي
- فهد اتركه .. فهد ... خنزر علي وصاح
- بعدي .. اصعدي سيارتك وروحي

اتكامش هو والولد وضلوا يضاربون الولد حلكه نزف دم وخشمه ضليت اصيح على فهد حتى يتركه بس مايسمعني ملتهي .. يسب ويغط ويضرب وسهى لازمه بيه خايفه اول مره يصير كبالي هيج موقف كلتله
- فهد فدوه اتركه لا تاذي
هو يغلط ويضرب ومايهمه شكول
- حيوان ..  عبالك كلها مثل عرضك مالها احد
كان مثبته ع بدي السياره ويضرب بي
اجه الولد الثاني دفع فهد سحب صديقه
اخذه ويوعد بي يكتلوا .. فهد ظل يغلط عليهم وذوليج صعدوا سيارتهم وراحوا جان لتفت عليه معصب

فهد : التفتت عليها وانا الدنيا ضلمه صارت بعيني واعصابي تلفانه عطت بيها رغم شفت الخوف بعينها ونسيت وجود صديقتها وهي ماسكتها
- انتي شمطلعج الحالج شبتسوين هني
- انت شجابك .. ليش هيج تسوي ..
- من هذيله
- ماعرفهم
- عيل ليش تابعينكم ؟
- ماعرفهم والله ...
جان حلگه شوي مجروح تقربت اكله تاذيت؟ صاح بعصبيه
- تركي عنج ۔۔ وتالي وياج يعني ماراح تتغيرين راح تبقين شاله احاولي

- انت تلاحكني من مكان لمكان
- انا ؟!!
- اييي ۔۔  مايهمك بيه
- اشوفهم يتحرشون فيج واسكت انتي مجنونه الف مره اكولج الحالج لا تطلعين انتي ليش تسوين الي براسج
- مايخصك مومسؤل علي انت
- والثور الي مسؤل عنج وينه .. مايعرف يحمي حرمته
- لاتجاوز انت معليك لا تلحكني مايهمك بيه
سهى : حور خلينه انروح

انتبهنا ع وجود سهى واحنه نتهاوش خزرت حور وكلتلها لو تكرر هلموقف ماعرف شسوي ساعتها

- جاي اكلك ماعرفهم ومعليك بيه
- لا تكولين هلكلمه ..  اكص السانج ورب الكون
- انت شلون تسمح لنفسك تحجي وياي بهلطريقه ابويه اخويه من بقيت اهلي مثلا
- قرب راسه الي باوع بعيوني انا فهد ياحور فهمتي منو انا  ..الفهددد .. اعتدل بوكفته وكالي .. يله اصعدي وروحي على البيت ..
باوعتله بعصبيه .. صاح .. اكولج اصعدي
- ابتعد عني .. ماريد اشوفك لا اليوم ولا بعد الف سنه ابتعد عني خليني مرتاحه
- انا اريدج تبعدين عني .. شرجعج.. ليش بقيتي هنا .. 
- انت الي رجعت مو انا
- ههه ..  يعني كنتي مستانسه بغيابي
- بكد ماانا حزينه بشوفتك هسه
- مو كثري ..
فتح باب ااسياره بعصبيه واشرلي بعيونيه حتى اصعد ..  صعدت واخذت الباب منه طبكته حيل 

باوعنه لبعض بنظرات كلها حقد  شغلت السياره ورحت  ..

لهدرجه كارهتني وماحبه شوفيني يعني كنتي مستانسه بغيابي ..  انا شيخصني فيها باربي  ..
هي مامسؤله مني .. بس شسوي مااحب حد يتقربلها  يعني وتالي ماراح انساها ماراح اخلص منج ياحور

سهى : حور انتي تبجين
مسحت دموعي وماحجيت بس هنه ينزلن وحدهن شلون يعاملني هيج لهدرجه ندمان ع معرفته بيه شسويتلك وتضوج مني وتكرهني لهدرجه ..

- حور احجي وياج
- ها سهى
- منو هذا
- منو
- الي اسمه فهد
- لا جيبيلي سيرته
- احجيلي حور لا تخلين دماغي يودي ويجيب
- شحجي سهى شحجي الله يخليج تركيني بهمي

- زين ليش تبجين فهميني بس منو فهد وين تعرفي
- مسحت دموعي وكلتلها معرفه قديمه
- علاقه سابقه
- اي
- وليش تركتوا
- ضروف جبرتني اتركه
- انتي تركتي ؟؟
- عصبت من كالت هاي الكلمه كلتلها
اي انا وراح تلوميني مو
- هسه انا شعرفت حتى الومج .. اهدي وسولفيلي الله يخليج
سولفت الها بشكل مختصر بقت ساكته ....
-  ليش سكتي سهى
- ماراح تزعلين مني ؟!
- هههه لا عادي متعلمه ع اللوم

- حور مو شغلة لوم شخص يحبج كل هلحب تعيشي بجذبه ليش ؟!! كله ع مود اهله مااجوا كلهم
يخطبوج ليش هلانانيه .. وبعدين ماصورتج ضعيفه وماتكولين لاهلج هلشخص اريده .. دمرتي نفسج ودمرتي حياته

- محد مدمر غيري انا
- حور لا تخسري .. الظاهر لهسه يحبج وماناسيج

- مستحيل نرجع لبعض ماتشوفي شلون يحاجيني ومتندم ع معرفته بيه هو حجاها بلسانه
خلص سهى انسي وماريد احد يعرف بالي صار اليوم ماشي
- مثل ماتردين .. الله يهديكم ..

وصلت سهى ورجعت للبيت طالعه دنيا من عيني اتصلت ع شمس وسولفت الها كلشي تعبت من وضعي كلش الى متى وانا اتعذب ياربي ارحمني يااما انسى وماحمله ذرة حب بگلبي يااما تجمعني بي ولو هلشي صار مستحيل 😭😭😭

فهد:  اخذت ام سعود ورجعتها ع البيت وطلعت ماريد افكر بيها ابد لازم انساها وهلمره جد

بعد فترى صارت خطبة عبد السلام
نشغلنه بترتيبات وتحضيرات الخطوبه
عاد من زمان ماصاير عندنه عرس
عمامي وخوالي كل يوم يلتمون مدري على شنو بس هوستهم هوسه راحو خطبوا البنت واتفقوا على كلشي عقدوا لهم من يومين والحين اجه وقت الحفله عشان يلبسون الخواتم  حجزنا للحريم قاعه يبون يستانسون المعرس واحد والمجانين الف
كانن خواتي وحريم خواني وبناتهن مخبوصات  هذي الي تتمكيج وهذي مدري شسوي بخلقتها كلهن متجمعات بيتنه لا نكدر ندخل لا نطلع
نحبسنه بالديوان البرانيه

دخلت اخذت ثيابي وثياب سلام لبيت ايهاب ناخذ راحتنه اكثر  لان حرمته عندنا جهزنه كلشي

لبست دشداشه بيضه وعباة صحراوي واطرافها ذهبي وغترتي حمره وسلام نفس الشي ..

اخذنه حريمنه للقاعه ودخلن يهرولن بكعوبتهن وكل وحده مخليه تل فوك راسها يكولن عنها تسريحه مغطيتها بالعبايه تسريحه هالكبر 🙄

سلام كان معانا وناطر الفرج عشان ينادونه ويشوف خطيبنه ..
كنه جالسين برا ماحسيت الا ايهاب ندسني وكال فهد طالع .. كنت اسولف مع حمد ولد عمي لتفتت
شفت حور نزلت من سياره كان يسوقها جود افتحت الباب ودخلت داخل باوعت لايهاب كال
- شنو جاي يصير
-هذي  سوالف امي واختي ماغيرها

ايهاب : طيب شفيك عصبت خلي الحريم تستانس
- وشعلي انا

جد عصبت يوم شفتها داشه وخاصه بعد اخر مره تهاوشنه فيها .. يعني تتعمد دوس على گلبي ولا هامها شي ..
........
حور : خابرتني الهام ع خطوبة سلام جنت متردده بس تمنيت اجي ردت اشوف لمة العايله الي رفضت وجودي بيناتهم  وردت اشوف فهد حتى اتأسف منه هواي اذيته ذاك اليوم  ..صح احنه تركنه بعض بس ماريده يكرهني ويشيل بگلبه علي

كلت لامي وحده من صديقاتي خطوبتها اليوم كالت روحي وصلني جود لبست فستان ماروني وضيك طويل ورداناته طوال

كلش جان بسيط بس مديله حلو سرحت شعري وبرمت اطرافه برمه خفيفه وخليت مكياج قليل وحمره
 قبل لا ادخل  اتصلت بالهام دخلت للقاعه استقبلتني سلمت علي ودخلنه سويه سلمت ع امها وعرفتني بخواتها الباقيات بس انا الغريبه لموجوده بينهم احسهم يتغامزن ويترامزن لان دخلت بهلشكل

كنت مخليه شال خفيف ع راسي ومن دخلت علكته بغرفة التبديل باوعت للعروس حلوه ماشاء الله ومبينه بنت عز على لبسها الفاخر والذهب الي لابسته جان الصوت عالي ونص البنات تركص اخذت كرسي وكعدت اباوع دقايق وكالن راح يجي سلام يلبس حلقات هنه كلهن لبسن حجاب وطلعن بس وجهن

دخل سلام بأبتسامة عريضه وجان  شكله حلو بشوش  كعد وهمس بأذن خطيبته ضحكت بخجل وكل شوي محاجيها

بعدها لبسوا بعض الحلقات والذهب وقطعوا كيك واكلوا شربوا عصير وركصوا سويه وخلصوها غزل بضحك

ولان جان يحبها ماخذ ميانه وياها كلش حلوين
كامت خواته يباركن الهم وقرايبهم نسوان كبار

خواته ضلن يركصن وهو كاعد يباوع ويضحك ساعه يهمس لخطيبته ساعه يلزم بايدها ويبوسها حسيته كلش فرحان رحت اسلم علي احس الناس جاي تاكلني بعيونها مجرد ماتقربت يمه هو كام متفاجئ ....

تعليقاتكم تسعدني 😍
تصويت😊