TUMAWAG siya sa mansiyon. At napag-alaman niya sa mag-asawang Julio at Aning na tinamaan ng malaking sanga ng bumagsak na puno si Robb. Dalawang araw ito sa ospital sa Puerto Princesa at nang humupa ang bagyo ay nagpadala ito sa Maynila. Sa pamamagitan ni Dr. Romero ay napag-alaman niya ang ospital na pinagdalhan dito sa Maynila.
"I am not an orthopedic surgeon, hija, pero naniniwala akong hindi ganoon kadali upang makalabas ng ospital si Robb..." ani Dr. Romero na bagaman nasa mga mata ang kuryusidad ay hindi nagtatanong kung bakit hindi niya alam ang nangyari sa asawa. "Ayon sa kasamahan kong doktor dito, baka mangailangan ng operasyon ang binti ng asawa mo..."
Nagpasalamat siya sa doktor at sa oras ding iyon ay sumakay ng barko patungo sa Maynila.