لاخر نفس <3
الحلقه 9 😍
ومشيت لي كافيتريا خذيت قهوه ليا وهيا خذيتلها عصير وشوكلاطات
ومشيت وخشت عليها لقيتها .........
راقده خشيت قعمزت جنبها ع كرسي ونشرب في قهوتي ونفكر في الي قاعد يصير هذا قعدت واعي لعند سمعت اذان الفجر طلعت صليت ورديت اخره
نهي " زعمك شن صاير مع ناني توا
نور" مع معتز بروحها تقريبا واحد منهم حيقتل لاخر
مروه " بس شفتو امبدري شالها وخايف عليها
نهي " مش خوف عليها حس بالذنب بس -_-
نور" كنكن شن صاير
نهي " قعدت تحكيلها الي صار امس
نور " اووووووه ماي قاد معتز هكي قصدكن
نهي " ياراقيه انتي فكينا منها دوه هذي -_-
نور " باهي تحكي جد انتي
نهي " والله -_-
مسكينه والله ناني حاصله حصله فيه -_-
مروه " معتز طيب بس هو طبعه هكي
نهي " بارد جامد تحسي هكي كيف الساس مايحسش بكل
نور" محلاه الراجل لما يكون حنون وطيب مش هكي
نهي " العب نور تعطي في رأيها اخره
نور " حرام يعني
نهي " باهي نديرو سبله نرنو ع معتز بيش نسالو عليها
نور " بطلي براده
مروه " من وين تبي ترني انتي وتلفونك عند ناني
نهي " من فونكن ي متخلفات
مروه " هي
نور" ديما مزعجات هكي انتن
حتي الفجر اذن اكيد راقده
نهي " يااي
اختنا ونبو نعرفوا شن صارلها
نور " ماهو بابا وعمو اسلام قاللكم كويسه
نهي " لا لازم انتاكدو
نهي " ريوي فونك بس عطي ليا
مروه " امسكي
رنت ع معتز
وع طول رد
معتز " ايوه ي مروه
نهي " الو
انا نهي
معتز " كان نحسابك انتي مارديتش
نهي " وعليش ان شاء الله
معتز " من طولت لسانك
نهي " والله تغلط في اختي وتبيني نسكتلك
معتز " حاطتك هيا محامي دفاع
نهي " اها عندك مانع
معتز " شن تبي في نص هل الليل
نهي " مانبي خلقتك بكل
نبي نسال ع اختي بس
معتز " كويسه راقده
نهي " راه تكون قتلتها بس
معتز " حنقتلك انتي مغير نشوفك بكره
نهي " كان قدرت اصلا تمد يدك
معتز " سكري ي بنتي حرقتيلي اعصابي
نهي " وجك ودبالك من اختي خيرلك
وسكرت في وجه
نور " طيح والله سعدك انتي عارفه معتز مش كيف باقي الشباب مسرع ماينفصل وانتي تطلقي في لسانك
نهي " نمسح كبدي فيه قاهرني حسه
مروه " ههههههه بجد انتي من يبي يتحملك بي طولة لسانك
مر اليوم هذا ع خير
معتز " افطري قبل
انا" مانبيش شكرا
معتز "مش عناد هيا ازف
انا" مانعاندش بس مانبيش
معتز " فكينا من الدلع وكولي هيا
انا" كلمه هيا مانبيش ماعنديش نيه
معتز " استغفر الله
فنص فيا تاكلي ولا نصرف تصرف تاني
انا" امتي حنطلع مليت
معتز " تاكلي تطلعي
انا " تو ناكل في حوش
معتز " بجوك هيا
انا " املا بجوك انت
معتز " والله نوكلك بالغصب
وقرب مني
انا" جرب تقرب مني بس نعيط نلم المستشفي كلها عليك
في نفس لحظه دق الباب وخش عمو اسلام ومهند
عمو اسلام " صباح الورد ع سمحه
انا" صباح النور بالي جيت
عمو اسلام " بحت في معتز
كنك فيك حاجه
انا " مليت بس
معتز " مافيها شي ركبتلي الضغط
انا الي مرضت مش هيا
انا " محد جبرك تقعد معايا كان روحت فكيتني منك
معتز " بطلي طولت لسانك ازف هذا شنو
عمو اسلام " ههههههههه كنكم
مهند " توم وجيري
معتز " تعاند وخلاص حيجيب اخرتك العناد هذا
عمو اسلام " كنها شن دارت
معتز " نشف ريقي وانا نقوللها كولي وهيا تعاند
مهند "هههههه لا ماعندكش حق ي ناني عزو خايف عليك
انا" بحتت في مهند وفنصت فيه
عمو اسلام " نسرين هيا افطري وبعدها نشوفو الدكتور يطلعك ولالا
انا "حاضر ي عمو
معتز " ماهو كلب انا من بدري ننبح وماتسمعيش
انا" قعدت نضحك في سري
معتز " طلع وخبط الباب
مهند " كنك انتي تعاندي فيه
انا" يستاهل
عمو اسلام " نسرين مش هكي مربيك
وطلع في وراه معتز
مهند "ليش اديري هكي وتعاندي فيه وانتي عارفتي يكره امه العناد وطولت اللسان
انا" يستاهل خوك هذا بهيم خزي
مهند " ههههههه راه هكي ما يصير شي بكل
كيف تبو تحملو بعضكم انتوا
انا " احتمال شي يوم تلقاه واحد منه قاتل لاخر
مهند "مانستغربهاش بكل
انا" انت مش عارف حاجه
مهند " لا عارف كل حاجه
انا" الي يدير في خوك بس لانه حس بالذنب بس اتجاهي وانا مانبيش منه حاجه يديرها وهو مجبور عليها فاهمني
مهند " فاهم ي نصي بس انتي لازم تحمليه شويه
والله معتز ينحب مغير طبعه صعب هكي من يومه
انا " ييععع مانبيله وجه -_-
مهند " راجلك ي سخيفة
انا" هههههههه
قعدت ناكل في شكولاته ونشرب في عصير
مهند "اهو جعانة ليش تعااندي
انا" هك مانبيش نسمع كلامه
مهند " ياروحي عليك ي خويا حتنجلط
انا" مازال ما شاف شي
مهند " ايام سود باين هك
انا" اسود من التيشرت الي لابسه
مهند " ي واطيه
وين يقولو مريضه ودايرن مناحه في حوش قاعده كيف قرده اهو
انا" قرده هذي مراتك ي معفن
مهند" ماهو كان تحركي روحك نبيها قرده الي عندكم
انا" ههههههههه مافيش
مهند " مدلي الكيس
امسكي دبشك غيري واكيد حيجي دكتور تو
انا " منور
وطلع وسيبني
خشيت للحمام غيرت لبستي ولفيت اشربي وقعمزت ع السرير ونستنا فيهم يجوا
شويه وخش الدكتور ومعاه معتز وعمو
دكتور" كيف حالك اليوم
انا " الحمدالله احسن
دكتور " كتبتلك ع خروج وتحاليل كلهن كويسه بس لازم تنتبهي لي وكالك
وكتبتلك فيتامينات تاخذوهن من الصيدلية ومد الورقة لي معتز
معتز " بارك الله فيك
دكتور " حمدالله ع سلامتك
وطلع
عمو اسلام " هيا
انا" هي ومسكت فيه يده ومعتز يمشي قدامنا
كان سيارة معتز هيا الي قريبا فتحها ليا
انا" نبي نركب مع عمو
عمو " انا جاي مع مهند راه
وماشي للشغل دغري مش ماشي للحوش
انا" بصوت واطي عليك حظ
معتز " خلاص امشي انت اربح
عمو اسلام " تمام هيا اركبي وبلا عناد
انا" حاضر
مشاه عمو
وانا فتحت باب سيارة وركبت من لاوره
معتز " قعد يبحت فيا من روشن من بره ومابش يركب
انا" هذا كنه
شويه وركب
معتز " مش سواق امتاعك انا انزلي اركبي من قدام
انا" هنا متريحة اكثر انا
معتز " معناها والله ماني متحرك من هنا
انا " بلا سامطة هيا راه شمس وراسي
معتز " انزلي واركبي قدام
انا" مثقلك
ونزلت وركبت من قدام
معتز " بحت فيا كان من الاول
انا" برمت وجي للروشن وسكتت
وصلنا ونزلنا
خشينا للجنان ولقينا كلهم لوطه يفطروا
جدي " الحمدالله ع السلامة
انا" الله يسلمك
ماما " حضنتني خوفتينا عليك
انا " كويسه والله
وسلمو عليا كلهم
معتز " جاء يبي يركب
عمتي صالحه "تعال افطر
معتز" لا نبي ندوش ونرقد
ركبت فوق وانا ع دروج رن الفون وكانت مها مابيتش نرد عليها لاني بجد نعسان ونبي نرقد تعبان وكان رديت حنصل في مشكله ونقعدو نتعاركوا
ليلي " شن جوك مع معتز
انا " شن يبي يكون الجو يعني
نهي " رنيت امس عليه في ليل قالي كنتي راقده
انا" ماقالهاش ليا رقدت امس
نور " اركبي ارقدي تريحي
انا " عندي محاضرات اليوم راحن عليا كلهن
مروه " تريحي اليوم وبكره امشي
هاله رنت عليك رديت عليها وقتلها
انا " تمام نركب نرقد نعسانه بكل
نور " خوذيني معاك نركب نقرا بكره عندي امتحان
انا" ركبت فوق دوشت وطحت رقدت دغري
وفي العشية جتني هاله وهدرزنا لعند روحت
معتز " فكني من تفسير متاعك هذا
علي " مافيش حاجه مستحيل ماتقدرش تحكم في قلبك امتي يحب
معتز " بس انا نحب مها بيش تفهم انت
علي " انت تقبلتها ولا مازال
معتز "عادي ماتفرقش
علي " عليك اجابه عادي ماتفرقش
معتز " شن تبيني نقولك باهي
علي " يعني سهرت في مستشفي معاها بروحكم ماصارش حاجه
معتز " انت تفكيرك تيس كيفك
علي" ههههههههههههه ي واطي طلعت محترم
معتز " تقلب الموضوع ولانصبي نعجنك توا
علي "هههههههه لاني نحكيلك في الي انت تبي تهرب منه
معتز " تي مشكلتها عناد اشر من مها
علي " انت تقارن بيها في مها صاح
معتز " عقلي بروحه يقارن قاعد
علي " هههههه تندم هكي راه
معتز " عناد وطولت لسان
وانا نكره امهن
علي " لانك ماتحبش من يقولك لا ع حاجه انت تبيها وهيا العكس قادره عليك
معتز " لا ماتخاف نقدر نغيرهن لها
علي" تو نشوفو الايام تثبت من يقدر يتغير ياخوفي هياا الي تقدر تغيرك بس
معتز " تعرف عقلي ملخبط بكل من موضوع مها
علي " كان تسمع كلام صاحبك ورفيقك فوت امها باين انها خاشه ع طمع
معتز" مادخلنيش بي امها انا دخلني بيها هيا انا نبيها بس هيا رايحه ازف متغيره كل مكالمة لازم تختم بي عركة
علي" كان تبي تجوز اثنين من توا نقولك راه تبي تواجه واجد عرايك ومشاكل مش حتعيش متريح راه وسريب واجد
معتز " يعني تبيني نرخي بالبنت مثلا
علي " دير حل يخليك تعيش متريح
مها كان تبيك تقدر تحمل أي ظرف تحطها فيه
معتز " والله دايخ بكل وامها تضغط عليها امتي يجيب هله
علي" قوللها مازال بدري شويه يعني ماديرش غباء انت بعد فرحك تمشي تخطبها راعي مشاعر مراتك شويه ازف
معتز " اووووووووف عليك طبيخة طايح فيها
علي" هههههههههههه عجبني تشبيه
معتز " صبي هيا تمشي معايا للحوش نبي نشوف عمال شن صار معاهم
علي" هي
انا" نهي تعالي
نهي " كنك
انا " عطيتها فونها
نهي " من جددك
انا" عطيته لكي بس مش معناها تردي اديري طروحك اخره
نسمعك مره تانية اديريها نقتلك فاهمه
نهي" نجك ليا شعفه توبه خلاص
انا " ركزي في قرايتك وخلاص
نهي" حاضر في اوامر اخره
انا" ههه لا خلاص
نهي" طلعت تجري من الدار
مشن الايام بسرعه بكل وكنت حايسة في قراية ودبش فرحي
بالنسبه ليا طلعت شريت دبش لبس امتاعي بروحي اما الباقي اعتمدت ع ماما
معتز انتلاقي معاه بس كنت انتجنب نحكي معاه
خشينا في اسبوع الفرح كنت متوتره بكل ومش متحمله أي حد يحكي معايا وحايسه ومتلخبطه بكل
كان يوم الحنه وكنت في الكوافير درت تسريحة بسيطة وميك اب ولبست فستاني
كان لونه دمي وطويل وظهره مفتوح كله
هاله " بطلي توتر كنك ترعشي
انا" ياريت نقدر نلغي كل حاجه
هاله " مافيك ماتلغي ي هبله
اليوم الحنه امتاعك مازالتي تفكري تلغي اخره
انا " متوترة بكل
هاله " خليكي ريلاكس
شوفي روحك طالعه تهبلي وكل حاجه حتمشي تمام
انا " يستر الله منظري كيف طالعه
هاله " تجنني
ورن فوني كان
عمو اسلام " ناني انا بره راه
انا "خلاص واتيه انا
طلعنا وصلنا في الحوش كنه دايرن الحنه في الحوش
نهي " وصلتي
خشي اسلحي عبايتك بعدها اطلعي قعمزي
انا " وين ماما نبيها
نهي " خشي للدار تو نكلمها لكي
انا " خشيت للدار
وخشت معايا هاله
سلحت العبايه وقعدت انبحت في المرايا
انا "ههههه طالعه طرف
هاله " تعالي ناخذو سلفي
انا" تمام هيا
قعدت نصور معاها ونديرو في حركات
هاله " هههههههه زعمك تعقلي بعدين
انا " ماظني
خشت علينا ماما
ماما" مشاء الله
انا" كنت حنبكي
ماما " ماتبكيش تخربي مكياج امتاعك
انا" نطلع توه
ماما "اه خلاص اطلعي هيا
طلعت وكانوا في الصاله دايرن كرسي ليا ووفي ناس واجد ماركزتش من الي قاعد ومن الي لا
خشيت للصاله وزغاريت وانا نفكر شن يبي يصير بكره
قعمزت وجت هاله قعمزت جنبي
انا " احسن حاجه درتيها
هاله " هههههه باين عليك ترعشي راه وسعي بالك مش اليوم الزفه راه
انا " ي قليلة الادب
هاله " هههههههههه
مر الوقت وبعد العشاء
جت الحناية خشيت غيرت دبشي ومسحت الميك اب امتاعي وطلعت لقيت البنات دايرتلي فراش في الصالة وقعمزت وبدت تحني فيا
وبنات يدربكن ويغنن كان العيلة كلها فرحانه الا انا مش حاسه بيه شعور هذا بكل
عند معتز
مها" بكره ليلتك عادي
انا" سكري ع موضوع توا
مها" كيف تبي تنساه مثلا
انا" مش اتفقنا نحن
مها " مانقدرش نتحمل بكره مانرنش عليك لانه اول ليلة لكي مع مراتك
انا" سكتت
مها " من بكره نقعد لازم نحسب حساب لي مراتك قبل مانرن عليك ونسمع صوتك وقبل مانشوفك اخره
انا" مها نبي نسكر ينادو فيا الشباب
مها" تبي تهرب قصدك
تمام نحبك حطها في عقلك
انا" حتي انا
سكرت منها ومشيت للشباب لانه كنه قاعدين في حوش محمد خويا
علي " درتلكم مكرونة سمحه بكل
خالد" نعن شكلك مكرونه ساعة 5 فجر
علي" ماشبعنش ازف من العشاء امبدري
مهند " راه نلقاك تاكل منها بس
خالد " لا مانبيش
انا" جت في وقتها
مهند " اهم حاجه العريس خلو ياكل كويس
جمال " نجيبولك حوت
انا" عزقت فيه المخدة
محمد " نشرحولك ولا تعرف
انا "صقع عليك مش محتاجلك
علي" اوووووبا
مرتب اموره
انا"تي ي تيس هيا حط ازف جعان
علي " حاضر ي عروس تريحي انتي بس
انا " ههههههههههه لقنك مسخ
حطلنا المكرونه الي دارها علي وكانت سمحه
جمال " يصير منك ازف تقول وليه دايرتها
علي " احترم روحك ازح
جمال" شكرتك ي معفن
مهند "في واحد قال مانبيش ناكل حسيته هو الي مسح القصعه
خالد " سهفتني حرام يعني
انا" هههههههه نخش نرقد تصبحو ع خير
محمد " ولبز الي درتوا من يبي يغسله
علي " مش شوري
وكل واحد قعد يتهرب وحصل فيها مهند
قعد يلم فيهن
مشاه هل اليوم عادي جاء يوم الزفة من الصبح مشيت للكوافيرة ومعايا مروه
اليوم هذا كنت متوقعه روحي نكملها بكاء بس مانزلتش مني ولا دمعة كنت واثقه من روحي واجد عكس امس كنت متوترة واجد
مهند " عريس راقد وجوه سمح
خشو نوضو ازف
علي" خلو وراه ليله سمحة
خالد " اللهم ارزقنا بي هل لليلة
جمال " تي تعالو تو نوضه لكم بي طريقتي
خالد" في ثلج في الثلاجة راه
جمال" نحبك وانت فاهمني
خالد" تعال
مهند " كان انفصل عليكم مش شورنا
علي" هيا هيا
خشو وخذو الثلج وحطو في تيشرت معتز من جوا وهو راقد
معتز " نعن ............................
جمال" هههههههههههههههههههه
اهو ناض
معتز " صباه يجري وراه جمال ويمسكه
وقعد يضرب فيه وجمال ميت من الضحك
علي " صبي ي معتز خلاص
خالد"ههههههه من امبدري نوضو فيك
انا " لقنكم .........
جمال" سادك سب ازف من صبح وانت طالق فمك تسب
علي" من التوتر هذا بس
انا " في واحد ينوضو هكي يوم فرحه
مهند " سامحنا مفروض درنالك فطور وجبنا لكي ع السرير اخره دلع هذا ديره بكره ع مراتك مش علينا
علي" هههههههههههههه قصفته
انا" عزقت في مخده تحشم شويه
جمال" وين النوم هذا راه الظهر اذن وانت منخمد
انا " ويش ورايا ازف ع حلاق تو بعدين نمشي
علي " عجبني البرود الي عنده
انا" نعطيك منه عندي واجد راه
علي "لا خليه لكي فكيني منه
مر الوقت وجاء الوقت نمشي فيه للصالة جاء وخذاني من الكوافير عمو اسلام
ركبت في السيارة
عمو اسلام " مبرووووك ربي يهنيكم
انا" ابتسمت
تخش معايا انت
عمو اسلام " هههههه من عيوني
وصلنا للقاعة وخشيت
وجتني ماما وعمتي صالحة
حوللي البرنوص
وخش معايا عمو اسلام وقعدت تصور فينا مصورة
خشيت ع اغنيه ياغالية
ياغالية سمي ودخلي باليمين
يمناك يافال البنات الصالحات
ياغالية الليلة كل المسلمين
قارين لش يالغالية المعوذات
محروسة باذن الله رب العالمين
محروسة باسم الله وهب قلبك صلاة
لا يالاصيلة مافيه داعي تحلمين
الواقع بنفسه يلبي الامنيات
وش ها الوقار اللي وقفو له القاعدين
هيبه سكنت داخلها مجموعة خصال
عقل وسنع طيبه رفيع علم يقين
وما تبقى كلمة غير لله الكمال
لعند وصلنا للمسرح باسني ع راسي وطلع
قعدت المصورة تصور فيا وزعمتلي كبدي بالحركات الي تبيني نديرهن
شويه ركبتلي هاله وصورت معايا
هاله " شن جو اعصابك توا
انا " برود نازل مانحكيلكش
هاله " ماتخافيش خليكي ريلاكس
شويه هكي وجتني نور
نور " معتز وصل راه
انا " تمام نزلتلي طرحتي وقعمزت
عند معتز
وصلنا للصالة والشباب مش مقصرين معايا كنت مقرر اني مش حنخش جوا حناخذها من الباب ونطلع
خشيت قابلتني جدتي امي يسلمن ويحضنن وسريب عيت حنه
عمتي صالحه" هيا خش
انا " لالا خلوها تطلع
جدتي " شن هل الخبر هذا
خش خوذ عروستك من جوا واطلع بيها
انا " جدتي فكينا من خشه قدام الصبايا
جدتي " خش هيا عروستك تستنا فيك
عمتي صالحه " هيا ي وليدي خش
خشيت وعيوني جن عليها
نكذب لو قلت شينه طالعه كيف الاميرات بجد جمالها حلو وملفت للنظر جذابه اول مره نركز في ملامحها كيف اليوم
وصلت للمسرح سلمت عليها وقعمزت
انا" شويه ونطلعو
نسرين " بحتت فيا وسكتت
عندي انا
اول ماشفته خاش ومشيته الي مليانه غرور وااثق من نفسة شخصيته كان حلوه بكل وقويه وبارد في نفس الوقت -_-
اول ماقعمز قالي شويه ونطلعوا
نصدمت فيه بحتت فيه وسكتت حاولت نسيطر ع روحي ونقعد هادية
شويه وقعدت مصوره تصور فينا
ليلي "تعال قصو التورتة
معتز " مدلي يده بيش نصبي
هيا بسرعه
انا " في خاطري من يجري وراك
مشينا قصينا التورته وكلني وكلته
معتز " خلاص خلينا نطلعوا
طلعنا وصلنا بره
سلمت ع هلي كلهم بس مابكيتش كنت مستغربة الهدوء الي نزل عليا
معتز " مسك يدي
هيا
طلعنا من الصالة وكان هو يسوق وورانا اصحابه ومهند وجمال وخالد يمتعو بالسيارات
لعند وصلنا للحوش
نزلنا وخشينا للحوش
معتز " تفضلي
انا "خشيت
معتز " غيري دبشك وتعالي نصلو
خشيت للدار كانت سمحة
غيرت فيلووو ومسحت ميك اب ودرت ميك اب خفيف
لبست استرتش وتيشرت وخشيت توضت ولبست ملايا الصلاة
وطلعت ندور عليه جاني صوته من البلكوني
يكلم بالتلفون باين
قربت نبي نحكي معاه وسمعته
معتز " حتي انا نحبك تحملي علشاني الفترة هذي بس وبعدها انتي الي تكوني معايا
انا " قعدت متنحه وكرعيا معش شالني حسيت روحي حنطيح ماقدرتش لا نمشي نرد لي دار وندير روحي مش سامعة قعدت مصبيه كيف التمثال مش قادره
ترجمت انه اكيد يكلم فيها ويبيها بس في يوم زفتي انا وياه ماحترمش مشاعري بكل حتي الليلة هذي
معتز "برم ولقاني مصبيه وراه
فنص فيا
من امتي قاعده هنا انتي
انا " .........
يتبع
نعتذر ع التأخير بس النت مزطني واجد 😥
نبي نقوللكم حاجه بكره مش حتكون فيه حلقه ماتفنصوش فيا 😯😯نعوضكم يوم السبت ان شاء الله 😍
هيا اقرو الحلقه وعطوني رايكم :* :*