لاخر نفس <3
الحلقه 1 😍
لاخــر نفس
أيعـقل ان أعقد قـراني علي رجل أخر
أزف لرجل لايشبهك ؟!
أتجول بغرف بيت مختلف عن بيت احلآامي معك ؟
أنجب اطفالا من رجل لآ أتنفسه عشقــآ
أيعقل أن أسمي إبنـي البكر بـاسمك !
أن أصبح زوجه خـائنة بقلبهآ .. وأحـلآمها .. وتفكيـرها !!!
قل لي بربكـ .. لأي عذاب سـأرضخ إن لم تكن لي !!
أيعقل ان أقول احبك لي شخص غيرك
في يوم 12 -12 -2013
ماما" هيا انزلي عمامك وعيت جدك كلهم لوطه
انا " نبي نقرا مش فاضيه
ماما " انزلي حتي ساعه بس جدك قال يبينا كلنا لوطه عمتك احلام جايه
انا " مشاء الله العيله كلها متجمعه شن مناسبه
ماما " عارفه جدك وتفكيره ديما يحب يلمنا هكي
انا " توا نكمل وننزل توا امتحاناتي قربن
ماما " باهي براحتك خواتك نزلن حتي هنا راه
انا " باهي اربحوا هي
طلعت ماما ورن فوني
انا" حبيبي
احمد " ياعيون حبيبك رايفتك
انا " امتي وصلت
احمد " توا كيف طلعت من المطار
انا " كيف حال خوك توا
احمد " كويس بكل احسن من قبل
انا "الحمد الله
احمد" نبي نشوفك
انا " بكره حنجي للجامعه ونتلاقوا
احمد" مش قتلك عندي مفاجاءه لكي بعد نروح
انا" مشوقه نعرف شن هيا
احمد" بكره نشوفك ونقولها لكي
انا " باهي قولي شويه عليها
احمد " بكره بكره
انا "ياسامط
احمد " تو خليني نمشي يعيطولي
انا " تم رد بالك من روحك
احمد " روحي عندك
انا " نموت فيك
سكرت وباب الشقه دق
صبيت فتحت كانت نـور
انا " كنك ركبتي
نور " تعالي جدي يبيك لوطه
انا " كنه
نور " هيا انزلي كلنا قاعدين جو سمح
انا " باهي اصبري بس نلبس جاكتي ونلحقك
استغربت جدي شن يبي فينا اليوم وعليش الاصرار هذا كله خذيت فوني ومفتاح الشقه ونزلت
خليني نشرحلكم ع العائله النزيكه قبل لانهم واجد وحتلخبطوا
طبعا كلنا نسكنوا مع بعضنا هكي قوانين جدي عياله كلهم يسكنوا فوقه ومايطلعوش بره
جدي " محمد وجدتي سالمه
عمي الكبير جبريل مراته صالحه
عياله محمد 80 مجوز ومراته ايه
ومعتز 83 \ مهند 85 \ ليلي 89
بعدها عمتي اسماء وفريحه مش مجوزات
وعمتي احلام مجوزه وعندها
طارق 90 \ خالد 93 \ هبه 95 \ سلوي 97 \ صفاء 2000
وعمتي فايزه أرمله وعندها جمال 89
وعايشه امعانا في الدور الثالث
يعني دور الارضي عيت جدي
والاول عيت عمي جبريل وبعدها نحن وبعدها عمتي احلام ^_^
بابا موسي وماما انتصار
عندي خويا ناصر موليد 90 مسافر يقرا طيران
بعدها انا 91 نقرا في الطب
مروه 93 و نهي 96 ونور 2000
وعمي اسلام مش مجوز
علي فكره ماما ومرات عمو جبريل بنات عمهم ...
خلاص الباقي تعرفوهم في القصة
انا " السلام عليكم
كلهم " وعليكم السلام
وسلمت عليهم كلهم
جدي " وينك ي بنتي
معتز " تلقها تجعب في منهج فوق
طارق" تاكل في شيتات وكال
انا" ياسامطين امتحاناتي قربن
جدي" ربي يوفقك
ع. جبريل " ع اساس انت ي معتز ماكنتش تحبس روحك وتقعمز تقرا
انا" هههههههه يعوينه تريح وقعد دكتور
معتز " تبي أي مساعده قوليلي
انا " عارفتك ماتقصرش
جدي " ماكلمكش ناصر ي موسي
بابا" مازاله 4 شهور ويرد
جدي" ربي معاه
بابا " ان شاء الله
ع. اسلام " كنك يا باتي مكلمنا كلنا اليوم شن فيه
طارق" شنو وراك شغل ع اساس
ع . اسلام " تشفط ي فرخ
جمال " مسيب شركات الي وراك
خالد " بلكي يبي يطلع يكحل
ع. اسلام " عزق فيه المخده
جدي"" خلاص اسكتوا
نهي بصوت واطي
شكله يبي يجوز
مروه " نتوقعها يصير اكشن في عيله يقعد
انا " وطن صوتكن راه تسمعك سالمه توريك اكشن كيف يكون
هبه "هههههههههه
جدي " في حاجه قررت انا نبي نديرها وحكيت فيها لي جبريل وموسي
ع. جبريل " باتي مش وقته الموضوع الي تبي تحكي فيه
جدي " انا لميتكم بيش نحكي فيه
بابا " قتلك عطيني وقت نحكي فيه انا قبل
جدي " بلكي مش موافق انت
جدتي " شن فيه شغلتنا ي حاجه
احلام " شنو فيه ياباتي
جدي " قررت نجوز معتز
عم السكوت ع الصاله كلها
معتز " علامات الصدمه ع وجه
تشفط معايا ي جدي انت
جدي" شوف كم عمرك انت
معتز " انسي الفكره هذي من راسك
جدي " اسكت واحترمني وخليني نكمل باقي كلامي
معتز " صوته قعد عالي
اين باقي كلامك شن في اخره
ع .جبريل " معتز هذا جدك احترمه
جدي" مازالت ماقتلكش من العروس
معتز " حتي العروس مختارها انت
جدي " العروس نسرين
معتز " نسرين من ؟؟
جدي " نسرين بنت عمك
معتز " قعد يبحت فيا ومنصدم
انا " نعم شنو تحكووا انتو
صبيت من مكاني
تحلم انه يصير كلام هذا
بابا " نسرين كيف تحكي مع جدك هكي
انا " سامع انت شن قاعد يقول كيف يقرر ع حياتي ومستقبلي بروحه من عطا الحق انه يقرر عليا خرفت انت ولا شنو
ومانحسش الا بي كف جاني من بابا
بابا " احترمي جدك
اركبي فوق بسرعه
انا " ركبت فوق ولحقتني ماما
معتز " انساه الفكرة هذي احسن
جدي" شنو عابي تجوز وحده برانيه ماتحلمش بيها محد من عمامك دارها واجوز وحده بره العيله
معتز " ريحلي روحك مش مجوز بكل
جدي "انا قررت وكلامي ماينزلش للوطاء فاهم
معتز " انت في أي عصر عايش بس
بيش تقرر نيابه علينا كل واحد فينا حر يختار مع من يبي يكمل حياته قوانينك هذينا خلاص انساهن نحن مش عبيد عندك كل حاجه تبيها بي عادات وتقاليد تي وين عايش بس نبي نفهم
جدي " خبط بي عكوزه ع وطاء
صوتك هذا مايرتفعش في وجودي واحترم روحك وكان ماتبيش تسمع كلامي الحوش اطلع منه
معتز " اقعدو في امها بكل هي
وطلع وخبط الباب
ع.فايزه " ياباتي الي ادير فيه غلط
ع. اسلام" استغفر الله العظيم تبي تعاود نفس القصه الي درتها معايا كنك انت
جدي " انا نعرف مصلحة كل واحد فيكم كويس
مهند" طفشتو الراجل تريحتوا
ع. صالحه " الحق خوك ي مهند
جدي" انا قررت وكلامي حيمشي ومانبي حد يناقشني فيه
سيوره حيرد ويتأسف ويوافق
جدتي " ربي يهديك
ماما " خلاص اهدي
انا " قوليلي اني نحلم مستحيل بابا يوافق صاح
مستحيل بابا يخليني نجوز غصب عني صاح ماما طمنيني وقوليلي الي سمعته مش حيصير
قعدت نبكي ونحكي بي هستيريا بجد اصعب حاجه سمعتها
ماما" مش حيصير شي خلاص اسكتي وقفي بكاء
انا" نبي نخش نرقد
ماما " خشي تريحي احسن حاجه
خشيت لي داري وسكرت عليا دموعي ماقدرتش نوقفهن معقوله انا نقعد زوجة حد غير حبيبي احمد مستحيل اصلا مستحيل معتز يوافق قعدت نفكر ونبكي
مسكت فوني ورنيت ع .....
عند معتز
انا " انت فاطن جدك شن يخرف قاعد
مهند " وسع بالك تو نتفاهمو
انا " جدك كان سكر راسه معناها انساه والي في راسه حيديره بس والله مايحلم بيها
مهند " شن تبي ادير يعني
انا " انت عارف انا قلبي مع من
مهند " انت وسع بالك وماتحولش تحكي معاه توا بكل وتوا نحلو الموضوع
انا " استغفر الله العظيم
وركب سيارته
مهند " وين ماشي توا انت
انا " لي جهنم خطاني
ناصر " اوووه ناني واخيرا سمعت صوتك وين ماتسالي ع خوك بكل
انا " ناصر
ناصر " كنه صوتك هكي
انا" مرايفه عليك بس
ناصر" صوتك باين انك تبكي
انا " لا بس ليا وين معش شفتك بس
غيابك دمرني امتي حتروح
ناصر "هانت خلاص 5 شهور ونجيكم
بس متاكد انا انه في حاجه تانيه شن صايرر
انا" مخنوقه بس ومرايفه عليك
ناصر " باتي وامي فيهم حاجه
انا" لا كويسين كلهم
ناصر" باهي كنك مضايقه
انا" قعدت نمسح في دموعي
خلاص الرصيد حيفصل
ناصر" سلميلي ع هلي كلهم
انا " حاضر
سكرت منه ماقدرتش نحكيله لانه بابا ماقدرش يدير شي هو حيقدر يعني خشن عليا خواتي
كان ناصر اقرب حتي من خواتي لانه كنه ع روس بعضنا وعلاقتنا قويه بكل
مروه " ناني شن جوك
انا" تمام بكل شن تشوفي انتي
نهي " حتوافقي ؟
مروه " شن سؤال العبيط هذا
نور " اهدي ي نوني مش حيصير شي جدي هذا خرف بدري شكله
انا" انا نحب احمد ومانبيش نجوز غيره افهمني انتن
نهي " سكري راسك ودبالك توافقي فاهمه
دبالك توافقي تجوزي معتز
مروه " نكد علينا الشايب هذا وخلاص
نور " مايبيش يموت بكل خش في 90 سنه ومازال عايش ازف
انا "تحشمي ع وجك شويه
نور" كلمة الحق هذي :/
انا" شن صاار لوطه
نور " معتز هزب وعيط وجدي لزه
انا" ياربي شن الي قاعد يصير معايا هذا
نور" شنو التخلف الي قاعد يصير هذا
الناس تطور ونحن ونوخرو لاوره
نهي " قوانين جدك هذينا
نور " هذا اسمه تخلف مش قوانين مانقص غير يجبرني اني نجوز حد بي مزاجه
مروه" سناريو اسلام حيعاود معاك ي ناني ولا شنو
نور " عادات وتقاليد متخالفه يعني ليش العيل لازم ياخذ بنت عمه
مروه " توا تريحي وارقدي احسن بكره وراك جامعه
انا" طفي الضي نبي ننخمد
نهي " احمد يرن عليك قاعد
انا" خلي مانبيش نرد
مروه " احكيله
انا" شن نبي نقوله مثلا
نور " احكي الي قاعد يصير ماتكذبيش عليه
نهي" بلكي يحرك روحه ويجيب هله
انا" ممكن تطلعن وتسيبني بروحي توا
جاء الصبح وانا مارقدتش وطول الليل احمد يرن وانا مش قادره نرد عليه ونقوله نضت لبست وخذيت شيتاتي
طبعا في الدار انا ومروه
ونهي ونور مع بعضهن
مروه" ساعه كم توا
انا " 8 وربع
مروه " توصليني في طريقك
انا" خفي روحك هي
مروه " باه
خشت توتي روحها وانا مسكت فوني لقيت عرم مكالمات من احمد رنيت عليه
يتبع ................
تفاعلو نبي رايكم كله نستمر ولالا
ديرو منشن خلي نردو تفاعل البيج كيف ما كان 😂😍