#نـصـيـبـي_فـيـك
الـحـلـقـة الـعـاشـرة
اتصلت نهى بسالمة
سالمة ردت:ايوا نهى
هنا نبيل وجعاته روحه ان كان ايرن عليها وتبيش اترد عليه
نهى;سومة نبي انقولك شي
سالمة:تفضلي حبيبتي شنو
نهى:مش عارفه شن انقولك بس نبيل حاب ايقولك شي سالمة:لا يانهى توا كان ايرن عليا ولو كنت حابة نحكي راه رديت
نهى:عارفه الشي هذا ومقدرة انك توا بتكوني باسم شخص ثاني والشي هذا عيب
سالمة:ايوا يعني لما نحكي مع نبيل تعتبر خيانة له
نهي:عارفه بس هو حاب ايقولك كلام ووعدني انها اتكون اخر مكالمة بينكم
سالمة:بس يانهى
نهى:عشان خاطري سومة قتلك أخر مكالمة
سالمة:ماشي وينه
نهى:اهو امعاك ومدت الفون النبيل وطلعت
نبيل:الو
سالمة:ايوا نبيل
نبيل:صح اللي سمعته بكرا بيانك
سالمة:اها بكرا
نبيل:مش انتي قلتي بتسيبيه
سالمة:انت عارف اني انحبه ولما رن عليا قالي بكرا هلي جايين بيخطبوكي وانا طول عمري نرجا في اللحظة هذي
نبيل:وأنا
سالمة:وانت شنو
نبيل:انا اكثر من مرة قتلك بنخطبك وترفضي فيا
سالمة:نبيل لازم تعرف ان فيه فرق بينكم كبير واللي هو ان قلبي امعاه مش امعاك
نبيل:بس انا انحبك انحبك ياسالمة مش متخيل بتكوني الراجل غيري
سالمة:هذا نصيب وكل شخص ماياخد الا نصيبه وانت طيب صدقني اي بنت تتمناك وحتلقى وحدة احسن مني بواجد
نبيل يبكي;ومن قال نبي احسن منك نبيك انتي يعني بعد مافرحت وحسيت انك بتسيبيه وبتكوني ليا صار هكي ليش قلبي مش مكتوبله تطفى النار اللي فيه بكل
سالمة ارتبكت من بكا نبيل:انا اسفة نبيل مش في يدي شي انديره لكي
نبيل:انهي كل شي ومن بكرا اتكوني عندي هنا واتكوني حلالي
سالمة:اسفة بس مانقدر اندير هكي انت عارف قديش قلبي متعلق بيه يعني لو درت حتقعد انا حالتي زيك انت توا
نبيل:اخترتيه هو يعني
سالمة:اها قلبي امعاه عارفه انك احسن منه في حاجات واجدة بس الحب مش بيدي لا بيدك هدا شي ينزرع فينا من دون ماانحسو
نبيل;كيف بنتحمل فكرة انك بتكوتي الراجل اخرى مستحيل نرضى بالشي هذا مستحيل نسمحله ياخدك مني ولا ايتهنى بيك
سالمة بخوف:لا نبيل لو سمحت ماادير شي يقهرني وايبكيني
نبيل:لو منعت زواجك منه تنقهري يعني
سالمة تبكي:اكيدة نبيل هو حياتي كلها واني انكون حلاله هذا اكبر حلم ليا
نبيل:يعني بتعيشي سعيدة امعاه هو مايستحققك ولا ايحبك زي ماانا انحبك
سالمة;لما انعيش امعاه بنكون اسعد وحدة في الدنيا لو سمحت انساني يانبيل
نبيل حط يده علي قلبه ويبكي:وانا اكثر شي ايهمني في الدنيا سعادتك صدقيني اهم شي عندي اتكوني بخير ودبين سعادتك امعاه ربي ايهنيك
سالمة:سامحني نبيل انا عارفه ان اللي انت فيه توا بسببي بس مانقدر انديرلك شي
نبيل:مش بسببك انا حبيتك في الله من غير حتى مااتحاولي اتخليني انحبك هذا غلطي انا انتي مالكيش ذنب فيه ربي ايهنيكي امعاه وصدقيني مستحيل انضايقك مرة اخرى
سالمة:وربي ايجيبلك اللي احسن مني واتخليك تنساني نهائي
نبيل:نبي انقولك شي واحد وخليه في عقلك ديما
سالمة:شنو
نبيل:ان حتى بعد 30سنة لقدام وبعد زواجك منه بعيال او بلا عيال سمحة او شينه وماتفاهمتيش امعاه وجيتي وسيبتيه وانفصلتو او اي شي صار امعاكم حتلقي حبك مازال في قلبي ومازال نرجا فيك وحنرد ناخدك من جديد
سالمة سكتت ومعش عرفت اترد
نبيل:وتوا معش فيه الا اني انتمنالك انك اتهني امعاه وانشاءلله ايقدرك وايحافظ عليك ويقدر يسعدك لان بحد خذا احسن بنت في الدنيا وخذا حلم عمري صحة له انا حلمت وهو نفذ ونزلو ادموعه سلام توا
سالمة:سلام وسكرت
نبيل قمعز عالسرير وحاس بوجع في قلبه وادموعه ينزلو من غير ماايحس علي حب حياته اللي اصلا ماعاشش فيه وحلم عمره اللي مالحقش حتى يوصله
اما سالمة فوجعها حال نبيل وقهرها لكن ماكان في يدها شي حتى هي نفس وضعه اتحب وليد زي ماهو ايحبها ودعت في قلبها ان ربي ايشيل حبها من قلبه ويلقى البنت اللي تستاهله
بعد اشوي ردت نهى علي نبيل ولقاته مازال مقمعز عالسرير
نهى;خلاص حكيت اللي بتحكيه
نبيل:اها حكيت
نهى;انشاءلله بعد المكالمة ماغيرت رايك
نبيل:لا ماغيرتش خلاص زي ماقتلك اخر مكالمة امعاها وانحاول اني معش انفكر فيها خلاص هيا اختارت شريك حياتها وانا ماليا حق ندخل في قرارها في الاخير هي ماوعدتني بشي انا حبيتها بروحي وهي ماحاولت اتخليني انحبها وتوا معش عندي ماانقول الا انشاءلله ربي ايهنيها امعاه ويسعدها
نهى:ايوا هذا خويا اللي نعرفه خلاص ساد ماجاك من ورا حبها وايجي يوم وتقعد ذكرى
نبيل:انشاءلله
نهى:ابعد الايام هذينا من هنا وسافر مع اصحابك وغير جو
نبيل:انشاءلله المهم انا توا طالع وحاولي اتلمي الدار مانبيش امي اتشوفها هكي
نهى:خلاص تم مااتشيلش هم حنلمها ومش حنخليها اتشوفها
نبيل طلع وقعد طول اليوم برا وماروحش الا الساعة4في الفجر وخش الداره رقد دغري
"""
صباح ثاني يوم وكان بالنسبة السالمة اسعد يوم عليها وبالنسبة النبيل اتعس يوم عليه وعى من الصبح ومن قبل حتى مايوعى حد من هله وطلع من الفيلا
اول وحدة فقداته هي نهى لما خشت الداره ومالقاتش ورنت عليه
نهى;وينك نبيل
نبيل;قاعد عند محمود كنك
نهى:لا بس فجعتني عليك
نبيل:ماتفجعيش حبيت نبعد اليوم اشوي وحتى في الليل مش مروح
نهى:باهي هكي احسن حتى نحنا اليوم نبوش نمشو للبيان
نبيل:لا كيف لازم تمشن مهما كان سالمة صاحبتكم واتعز عليكن كيف ماتمشن
نهى:والله ماعندنا نية نمشوله بكل
نبيل:لا لازم تمشن لو مامشيتن والله نزعل منكن
نهى:بس يانبيل
نبيل:لا بس لا شي لازم اتعدو خلاص كل شي نصيب
نهى:حاظر توا نمشو
نبيل:تمام خلاص سلام توا
نهى:سلام
"""
اما سالمة وعت فرحانة ومش مصدقة انها اليوم بتكون الحبيبها بعد كل هالسنين نزلت وفطرت مع هلها واشوي وجتها مرام عشان بتمشي امعاها للكوافير بعد معناه واجدة مع هيثم هي وسالمة عشان ايوافق واخيرا وافق وجابها وشالهن صهيب للكوافيرة
"""
نبيل قاعد في شقة محمود وغامتله بكل وباين عليه الحزن محمود قاعد امعاه بس مش عارف شن اللي صاير امعاه
محمود:احكيلي نبيل كنك
نبيل:شي غامة اشوي
محمود:اللي ايحقك الايام اللي فاتن وجوك سمح مايعرفك توا قولي شن صاير امعاك
نبيل;والله يامحمود ماعندي جو نحكي بنقعد بروحي اشوي
محمود:تمام ياصاحبي براحتك حتى وانا مش عارف كنك لكن بنقولك شي واحد مافيش حاجة في الدنيا تستاهل زعلك دبينك بخير وهلك بخير معناها انت في نعمة
نبيل:الحمدلله علي كل حال
محمود:يستاهل الحمد وعموما خود راحتك الشقة شقتك وانا طالع عندي شغل
نبيل:تمام بس خود سيارتي وعقبلي سيارتك
نبيل باستغراب:تمام باهي
طلع محمود ونبيل امتد عالكنبة بيرقد بس تفكيره في سالمة امطير منه النوم
"""
في الكوافيره سالمة كملت مكياجها وتسريحتها وتلبس في فستانها
مرام فرحانة:اتهبلي ياسومة طالعة اتجنني
سالمة:نجك ليا ياقلبي العقبالك
مرام:انشاءلله
سالمة:مرومة فرحانة فرحانة بكل مش مصدقة ان خلاص وليد قعد ليا بعد كل هالسنين
مرام;دوم عليك فرحك وانشاءلله اتهني
سالمة:يارب انشاءلله خطرها هيا صوريني ولودي قالي بعد اتكملي دزيلي صورتك
مرام:هيا هاتي خليني انصورك وصورتها مرام
مرام;وين بدزيها له
سالمة:بندزها عالوتس
مرام:اها باهي نحسابك عالفيس انتي عارفه سريب الهكر
سالمة:لالا عارفه وفتحت النت وبدز الصورة جتها رسالة من نبيل سالمة تغيرو ملامح وجها
مرام:كنك وجك تغير
سالمة;هذا نبيل دازلي رسائل عالوتس
مرام;باهي افتحي عليهم شوفيهم شنو
سالمة;فكيني حالتة اتوجع في قلبي وانا مقهورة عليه والله لكن مش بيدي شي زي ماهو ايحبني انا انحب وليد
مرام:عارفتك ياسومة ونبيل ربي ايكون امعاه اكيد حيجي يوم وينساك بس توا حرام اقل شي افتحي عاالرسائل شوفيه شن يبي
سالمة:باهي وفتحت لقت كاتبلها ربي يسعدك علي قد ماحبيتك وربي ايهنيك امعاه لما انتي اتكوني سعيدة صدقيني انا انكون سعيد وانشاءلله ايحبك زي ماانا حبيتك وايحافظ عليك وهذي اخر رسالة توصلك مني ولو سمحتي واعتبريه اخر طلب مني الاغنية اللي جاتك توا انتمنى منك تسمعيها واللي فيها كله احساسي حاليا وطول العمر سلام ياحلمي اللي ماقدرتش انحققه 😢
(وكانت الاغنية تونسية واسمها #حيرة_وغيره نزلتلكم المقطع امتاعها اسمعوها عشان اتحسو باحساس نبيل)
سالمة اول ماسمعت الاغنية ادموعها نزلو تلقائي لانها حست باحساس نبيل وقلبها وجعها عليه صح هيا مااتحبش لكن مواقف نبيل امعاها ومعاملته الها وحنيته عليها كل هذا خلاها تقعد اتعزه
مرام تمسحلها في ادموعها:خلاص سومة عليش تبكي توا
سالمة;واجعني نبيل واجد
مرام:انتي حبيتيه سومة
سالمة;مش قصة حب بس نبيل ايعز علي
سالمة;مش قصة حب بس نبيل ايعز عليا عمره ماخلاني بروحي حتى في وقت حزني كان يسمع فيا برغم ان مافيش راجل ايتحمل ان اللي ايحبها تحكله علي حبيبها بس نبيل كان يسمعلي في اي وقت وشوفي انا رديتها له بكسرة قلبه
مرام:خلاص سومة الدنيا نصيب وماعندش نصيب فيك وتوا افرحي اليوم يومك وانسي الحزن ونبيل اكيد ايتعذب اشوي بعدين ينساكي
سالمة:انشاءلله يارب خلاص خليني انرن علي صهيب ايجينا
رنت سالمة علي صهيب وقاللهن اشوي وانجيكن بعد اشوي وصل صهيب لبست سالمة عبايتها وكانت ناسية الخمار
مرام:فيه وحدة تنسى الخمار في يوم زي هدا
سالمة;والله عقلي مش امعايا بكل ماخطرش عليا
مرام:كيف بنديرو توا
سالمة;خلاص انحط الوشاح علي وجي وخلاص
مرام;وتخيلي صهيب ايهزبك
سالمة:لالا صهيب ماعليك فيه
سالمة;اهو ايرن خلاص خلينا نطلعو مازال بنمشي انصور مع وليد
وطلعن سالمة ومرام السيارة صهيب وركبن وكان نبيل راكب في سيارته وايراقب فيهم من بعيد جمد في مكانه اول ماشاف سالمه وشاف جمالها وخانوه ادموعه اللي حلف معش بينزلهم عليها حس بقهرة في قلبه 💔وولع سيارته وطلع وقرر ان هذي اخر مرة بيشوف سالمة فيها(واللي بتعرف نبيل كيف عرف مكان الكوافير نبيل جا الشارعهم وشاف سيارة صهيب مازال قاعدة قعد يستنى فيه يطلع وبعد طلع صهيب نبيل طلع وراه وطبعا لان في سيارة محمود ماانتبهلش صهيب)
صهيب شال سالمة للمصوراتي وصورت هيا ووليد
ووليد كان مبهور بجمالها وقعد طول الوقت وهو ايقوللها في كلام حلو ويتغزل فيها وسالمة طايرة من الفرح امعاه
وبعدين طعت ركبت في السيارة ومشو للحوش
"""
وصلت سالمة الحوشهم وكانت طالعة اتهبل(بفسان احمر طويل وميك اب فاقع وحلو وتسريحة حلوة )
خشت وسلمت عالناس اللي عندهم وبنات عمها وخوات نبيل اللي حاولن ماايبيننلها انهن متضايقات صح ايحبنها وكانن ايتمننها النبيل بس مقتنعات بالقسمة والنصيب
اشوي وجو هل وليد وطبعا كانو قايمين بالواجب وكل حاجة جايبينها امعاهم حلوة وراقية وماقصروش في شي بكل عطوها قدرها وام وليد كانت بتنهبل علي سالمة وكل الوقت اتقول السالمة انها فرحانة وان وليد عنده ذوق واختار اختيار ايفرح القلب وسالمة حبت عمتها واجد وانسجمتلها
"""
في المطبخ امال وامعاها خوات نبيل وبنات سيدها ايجهزو في اضيافة اهل وليد
صهيب خاش بسرعه من الباب الخلفي بيستجل امال علي اضيافة الرجالة برا وماانتبهله حد الا وهو في المطبخ وهو كان مستعجل ونسى البنات اللي جوا
صهيب اول ماخش اينادي الامال انتبه الوحدة من الخلف كانت لابسة فسان وردي قصير وشعرها طويل اول ماحقها ومن دون ماايشوف وجها حس بأحساس غريب
البنات انتبهن الصهيب طلعو كلهم وصهيب طلع يجري
امال لحقاته بصدمة;كنك صهيب خاش لا احم لا دستور فجعت البنات
صهيب;والله خلطت عليا وانسيت ان فيه بنات جوا
امال;شن تبي توا
صهيب:بنستعجلك علي اضيافة الرجالة الشايب سكنلي عليها
امال:خلاص واتية كلم الشباب وتعالو خوذوها
صهيب:تمام بس بنسالك من اللي كانت لابسة وردي وشعرها طويل شفتها من الخلف وماعرفتها
امال:مش وقتك توا صهيب البنات كانن واجد في المطبخ
صهيب:تمام وطلع وهو حاس باحساس غريب الاول مرة ايحسه في حياته وخاطره يعرف من البنت اللي شافها
#يتبع
الحكاية تعقدت اكثر واكثر ونبيل قرر ينسى سالمة زعمك يقدر ينساها ولا حيصير شي ايغير كل حاجة وزعما من اللي حقها صهيب وحركت مشاعره وبرغم ان هو الوحيد اللي ماكانت عنده قصة حب انتظروني الحلقة الجاية عشان نعرفو مع بعضنا😊
اسفة لو فيه اخطاء في الاسماء واكيد رايكم ايهمني😉
گـتـابـتـي Koka Saleh 😊
منقولة💖