صدمة حياتي

الحلقة الثامنة والثلاثون

متكي ع الحيط ويصفر ...شاد كيسة في يده .. ويده التانيه في جيبه ... وجهه ضااااعف وطالق لحيته .... حسيت بجسمي انشل ومعش عرفت الي قدامي حق ولاخيال .... وقف على حيله وهو فاتح عيونه من الصدمه!!!... طاحت الكيسه ع الأرض وقعد مستك!!!.... ماتوقعتش يجي يوم ونتلاقو ... وحتى لما كنت نفكر!!.. كنت نقول لي نفسي لما بنشوفه!!.. حانكون قويه قدامه ومش حانضعف !!!... بس للأسف !.. للأسف!!.. مانقدرش نشوف لي عيونه ونقعد بقوتي !!... دمعه !..ورا دمعه! ..ورا دمعه!.. وجهي تعبى دموع !.. لي درجه تشوشت الدنيا قدامي ومعش شفته !!.. ماكنتش نبي نبكي !... ماكنتش نبيه يشوفني ضعيفه!!... ماكنتش نبيه يعرف انه كسرني!.. وغياابه دمرني !!... بس ماااقدرتش .. دموعي نزلو من غير إرادة ومعش قدرت نسيطر عليهم !!..... كاان خاطري نسمع نبرة صوته والحنيه الي فيه !... والله !والله .. لو في اللحظه هده !والموقف هدا .. يمدلي يده! .. ويقولي هيا !.. ماكنتش حانفكر .. وحانمشي معاه طول!!!.... معامله مصطفى! ضربه! .. وتهزيبه ليا !! .. كل الأسباب هده !.. دااافع كبير لي تخليني نهرب لي المكان الي فيه راحتي وسعادتي!! ... بس ! .. يأسفااه .. كل الي خاطري فيه مصارش !! .. محمد ماتكلمش!! .. وماقاليش هيا !!... مادار شيء !! .. غير انه ! .. انه يعطيني بضهره ويمشي!💔.... قعدت واقفه وسط دموعي لي لحظات !! ... ونتفكر في الي صاار !.. باهي ليييش !.. لييش هو كدب عليا وخلاني نحبه !! .. ولما حبيته !طلق يدي وخلاني في نص الطريق!!.. سكرت الباب وخشيت للحمام !... طحت ع ركاابي ونهرت بالدموع💔

~

~

~

""موجوع قلبي 💔 والتعب بيه💔

من اباوع على روحي ينكسر قلبي عليه 💔

تعبان وجهي وعيوني قهرتني💔

دنيا شللت حال حالي 💔 وفحياتي كرهتني 💔

كرهت الحب 💔ماريده دمرني💔

طيب اني وادري طيبي لهالحال وصلني💔

موجوع قلبي 💔والتعب بيه💔

من اباوع على روحي ينكسر قلبي عليه 💔

كل يوم صدمة💔 اقوى من القبلها 💔

اني واصل بالشدايد شددة محد واصل الها💔

محمد وقفلي من جنت محتاج وقفه 💔

الصلابه بهالناس؟مدري هاي الدنيا صلبه💔

دخيل الله من الدنيا من العالم 💔

ربي خلي هدا همي بنهايه كل ظالم 💔

موجوع قلبي 💔والتعب بيه💔

من اباوع على روحي ينكسر قلبي عليه 💔"""

اول ماولع السيارة!! .. نفتحت الغنيه!!.. كانت ع الجرح طول ... خبط يده ع الستيرسو بالقوه!!.. ودموعه نزلو بغزارة !!... يااااااربي علااااش علااااش !!... ااااخ شفت دموووعها ! ..ومش قاادر ندير شيء ! مااقدرتش ماقدرتش.. نتكلم ونهداها !.. يااااربي علاااش كل هالعداااب💔

~

~

~

زكريا يكلم فيا قدام الحمام

زكريا: شيمااء!

اني مسحت دموعي وخديت نفس: نعم😢

زكريا: القيت حاجات قدام الشقه ماشفتيش من جابهم؟

اني: لالا وماسمعتش حتى الباب

زكريا: اها باهي

اكيده محمد معناها !

~

~

~

~

لبس البودري محلاه 👏كل بنيه تتمناه👏💃

لبس البودري والحنه 👏ربي مايحرمنا منه💃👏

لووووووووووووووووللللللييييييييي👏👏💃

رتاج ومها لابسين البودري ... رتاج إبتسامتها معبيه وجهها!!.. عكس مها تماما!! .. كانت طول الوقت وهي تراقب في ردينه وقلبها مكسور!!... ردينه الي نقلبت فجأة اول مابدي العرس !!... شعور غريب حاوطها فجأة !! ... ندمت لأنها كلمت لؤي!!.. هي تحب يوسف!! .. ولؤي ماهواش الا حاجه حلوه تعودت علاها في وقت هي كانت محتاجه لشخص بحنيته وبحبه لاها !!! ... كانت طول المده الي فاتت تتغاضى ع الشعور هدا !.. بس توا ! .. واول مابدي العرس ! وخلاص يوسف تجوز!! .. حنتله ! ونست لؤي بكل!! .. وكارهه روحها لأنها هكي !!

~

~

لؤي خش للمطبخ من الخلف .. لقي ردينه تعبي في اميه

لؤي: بست !

ردينه لفتله : اهلين

لؤي: خيرها عيوني مش على بعضها

هزت راسها وقلبها حاساته يوجع فاها: عادي مافيش حاجه

لؤي: متأكده

ردينه: اها

وخدت صفرة الميه وجت بتطلع

لؤي: ردينه خيرك ؟؟

ردينه بتبكي خلاص: والله مافي حاجه .. اني بنمشي الناس تستنا "وطلعت بسرعه"💔

~

~

امل خشت للدار وردت على عبدو : نعم

عبدو: هي اطلعي

امل:😳 وين نطلع ؟

عبدو: بنروحو شن وين تطلعي

امل: عبدو من عقلك انت .. تبيني انروح في عرس اختي😠

عبدو: من عقلي اي .. اني من الأول قتلك مابيت مافيش .. هيااا اطلعي 😠

امل: تي ....

عبدو قص علاها : 10 دقايق وتطلعي"وسكر علاها"

امل:😳

اميمه: هيا بيحنو البنات

امل: اني بنروح 💔

اميمه: تبصري علاش ؟؟

امل: عبدو مايبينيش نبات .. عارفتها اني امه الهم من هداكا اليوم تقول ماعندناش مرا تبات برا الحوش😠

اميمه: خلاص الله غالب بتتحملي بالسيف

امل: اووووف معقوله حتى البرانيه قعدين واني بنروح

اميمه : يالله عادي احسن ماديري مشكله انتي وياها ع سبب زي هدا

امل: وهدا الي بيصير . ..هي اني مروحه

اميمه: تعالي بكري غدوه

امل: ان شاء الله اي

ولبست عبايتها وطلعت ✨

~

~

~

~

مها: مانبيش انحني اني😭

ماما: هياا عاد بلا دلع

مها: ياماما مانحبهااااش😭

ماما: حتى شويا يابنتي .. ماتجيش ماتحنيش

مها: باهي شوي بس اهو وبنخلاها نص ساعه وبنحاها😭

ماما: باهي باهي غير مدي يدك

رتاج: كترولي اني زكريا يحبها😍

امها: عطك بكشه في هالفم معش تستحي 😬

رتاج: ياماما شن قلت اني😒

امها: اسكتي 😠

رتاج: اووووف 😒

اني: هههههههه تحشمي شوي ماتشوفيش في العزايز الي جنبك

رتاج: وشن دخلي بيهم اني😑

اني: اسكتي اسكتي 😂

سهى : ردينه عمر ينادي

ردينه مقعمزه وفي عالم تااني بكل 💔

سهى: نطلعله اني

سلمى: لا خليك تو نشوفه

وكلمت ردينه بالشويا

افردي وجهك .. تو الي صار صار .. ويوسف خلاص راجل اختك

ردينه شبحتلها ودمعتها نزلت 😢

سلمى: اني ماشيه نشوف عمر .. وتو نرجعلك

لبست عبايتها وطلعت .. لقاته واقف في الجنان من تالي

سلمى: ها شن تبي

عمر: الناس تقول نعم

سلمى: باهي شن تبي ؟؟

عمر: بنخش لي داري

سلمى: خلااص حبكت توا تبي دارك والحوش معبي

عمر: تي نباها ضروري

سلمى: شن تبي وتو نجيبلك .. الحوش معبي ماتقدرش تخش

عمر: وراق مش حاتزبطيهم

سلمى: غير وين حاطهم انت وتو نجيبهم

عمر : في دولابي القجر التالت

سلمى: نجيبهم كلهم الوراق

عمر: اي جيبيهم وتو ناخد الي نبيهم ونعطيك الباقي

سلمى: باهي

ولفت بسرعه شعرها مس وجهه عمر .. سكر عيونه وتنهد 💓

خشت لي داره فتحت القجر .. قابلتها صورها هي عمر .. من لما كانو صغاار .. دموعها حزو في عيونها وشدتهم ... قعدت تتفرج عليهم ودموعها ينزلو ... إستاحشتك💔 ... ردتهم وخدت الوراق وطلعت ... عمر قعد يقلب فيهم .. خدي الي يبي ورد الباقي لي سلمى... مد يده بالشويا ومسحلها دمعتها الي كانت ع خدها 💔

عمر: واني كل مانشوف الصور نتقطع ونموت الف موته 💔

نزلت راسها وسكتت 💔

عمر: ارحميني

سلمى: .....

عمر تنهد : براحتك بس حطاها في بالك .. تقتلي فيا بالعرق وانتي بعيده عليا

قامت عيونها وقعدت تشبحله ... إبتسملها وقرب خطوه ... كيف بتتكلم جي مراد 💔

مراد : سلمى .. وين كنتي .. من بكري نبحت عليك ؟؟

سلمى وخرت وسكتت

عمر: ياعنفيتك😠 .. شن تبي في امها تبحت علاها😠

سلمى شدت ضحكتها

مراد : نبي ندخل للحوش .. بنشحن فوني؟

سلمى مدت يدها : هاته تو نحطهولك

عمر دفها : خشي 😠

سلمى: تي اااااي خيرك 😬

عمر يفنص فاها : خشي النم وغطي شعرك 😠

سلمى: تي ...

عمر: خشيي 😠 قتتلللك خشششي😡

سلمى: به !

وخشت ... وخلت مراد واقف

عمر: وانت ياسنكوح قدامي هي

مراد : My name مراد !

عمر: ياااااربي 😠 .. راسي دخن.. بنقتله😣

مراد شافله ومشي !

~

~

~

#يوم_الخميس_الصبح ✨

مشيت اني ورتاج ومها للمزين .... ردينه طول اليومين الي فاتو تتهرب من لؤي وتتحجج بأنها مش فاضيه ...ولؤي مخلاها ع راحتها ومايبيش يضغط علاها ... مشت سلمى وردينه ونسيبه للمزين .. دارو شعرهم وروحو يمكيجو في الحوش

سلمى: ديريلي عيوني

ردينه : تعالي ..

نسيبه : وين المسكره

سلمى: هاك

نسيبه : اني كملت ننزل نشوفهم

ردينه : تمام به

~

~

ماما تنادي من لوطا : يااااردينه يااسلمى هياااا استعجلو

سلمى تلبس في خراصاتها .. لما سمعت ماما طلعت بسرعه من غير عبايه وقفت قدام بابهم

ماما: ها شن كملتو

سلمى: اي شويا بس .. بتمشو توا انتم ؟؟

ماما: مراد رفع امك ونسيبه ومرت عمك .. واني وعمتك وسهى بيرفعنا عمر

سلمى عيطططت : لااااا

عمر طلع من حوشنا وهو يضحك : كلمي لؤي ياأمي .. اني مزال شوي وتو نجيب معاي سلمى وردينه

سلمى نزلت راسها وسكتت

ماما: باهي امالا كلملي لؤي .. اني خاشه نلبس عبايتي

عمر : باهي "وقام راسه قعد يشوف لي سلمى ".. ابتسملها وحرك شفايفه : انحبك 💓

ضحكت وخشت بسرعه ... لقت ردينه قدام المرايا .. دموعها ينزلو وهي تمسح فيهم 💔

سلمى: ياااروحي "وحضنتها " .. ليش الدموع بس

ردينه : مش متخيلا يوسف تجوز غيري😭

سلمى: اسسسس .. شن فايدته توا الكلام هدا .. خلاااص

ردينه وخرت وقعدت تمسح في دموعها : من بيرفعنا

سلمى: عمر يستنا فينا هيا

ردينه: نلبس عبايتي بس 💔

سلمى: به هي

لبسو عباياتهم ونزلو .. لقو لؤي وعمر واقفين قدام السيارات

لؤي قعد يشوف لي ردينه وساكت ... نزلت راسها وركبت في السيارة بسرعه ... استغرب رده فعلها وقعد يشوفلها !!!

~

~

~

ماما : اهم صوتهم وصلو

مرت عمي وقفت جنبها : اي اهو عمر ولؤي

درسو عمر ولؤي سياراتهم ... نزلت اني ساعدت رتاج في النزول .. بعدها مشيت لي مها ونزلتها ... خشو لي دار العروسه ... حولو الكابات وقعدت نساويلهم في مكياجهم وشعرهم

رتاج ترعش : خاااايفه بكل 😣

مرت عمي مدتلها اميه رقيه : سمي بسم الله واشربي

مها واقفه وعيونها معبيات دموع

نسيبه: حبيبتي خلاص هده ليله عمرك

مها وهي تبكي: وين ردينه

اني قربت منها ونمسحلها في دموعها: اشششش لبزتي مكياجك .. معش تبكي

اتكت ردينه ع الباب وقعدت تشبح لي مها ودموعها ينزلو ... ياما تمنيت نكون في مكانك ... ياما تمنيت ناخد يوسف حب حياتي💔.. مش حاسداتك ياأختي .. ربي يهنيك .. بس .. بس اني الي نستاهله يوسف مش انتي 💔

مها تلفتت واول ماشافت ردينه دموعها نزلو اكتر ... ماما ومرت عمي يحسابوهم يبكو ع خاطر مها بتتجوز وبيسيبو بعض لأنهم قراب من بعض هلبا

مرت عمي: بكيتي اختك ياردينه ... من بعد الحوش تو تشوفو بعضكم كل يوم

ماما: خلااص ياردينه امشي .. تو تقلبوها عزي

ردينه مشت بسرعه وخشت للحمام 💔

اني: حانكلم الديجي باش تخشو

ماما: اي هي

طلعت للصاله كلمت الديجي .. فتحو الزفه .. وخشت مها ورتاج مع بعض .. قعمزو .. وبدت كل مرة تجي وحده وتسلم عليهم

ردينه سكرت باب الحمام ونهارت ... شرين فونها لقاته لؤي ... اسفه اسفه عاارفه روحي حقيرة ومانستاهلكش .. بس شن ندييير ..اني نبيك توقف جنبي .. نبي حبك وحنيتك .. لكن قلبي لي يووسف .. يوسف وبس😭😭.. داراته صامت وقعدت تبكي 💔

~

~

فات الوقت عادي زي اي عرس .. جت عمتي وابرار قعمزت جنبهم شويا ... وكل مرة نسلم ع حد✨

ام عبدو : مشاء الله هده اختك الي تجوزت معاك

امل شافتلي: شيماء اي

عمتها: حملت ولاحتى هي زيك

امل: كييييييف؟؟

عمتها: حامل ولاحتى هي لا

امل: لالا مزال بكري

عمتها: شن بكري وقريب تسكرو 4اشهور

امل: قاعد ماسخرش الحال

عمتها: لالا ماسكت الا هلبا .. من غدوا بري عايني .. بالك تطلع فيك عله

امل:😳

هدايه: ياماما 😬

ماما جت تسلم عليهم .. امل سحبت روحها ومشت

~

~

~

كلمت ردينه والبنات ...باش نصورو مع بعض جينا كلنا ... لكن ردينه مابتش 💔

مها: اني معش نبي نتجووووز😭

اني: حي على امك المكياج كله امشي

مها: بالله عليكم بالله عليكم 😭 اني معش نبي

رتاج: ياعنبو الجوازه معاك باهي

سلمى: عنشكلك😂

مها: شووفو كيف تشبحلي 😭 هي المفرووض الي تكون في مكااني مش اني 😭 ردينه هي الي تبييه يوسف

اني: اسسسس شن فايدته الكلام هدا توا .. اسكتي خلاص

~

~

شويا وقالو زكريا بيخش .. طبعا بيخش زكريا هو الأول بياخد رتاج .. وبعدها يخش يوسف ياخد مها .. نزت طرحه رتاج وسكرو الضيء ..مشيت لي الباب باش ندخل زكريا .. شديت في يده وخشينا مع بعض .. لابس بدله كحله وببيونه حمراء .. طالع زي الغزال ..

زكريا: سرعي خطوتك راهو بنمشي وانخليك😂

اني شاده في يده ونبتسم مانبيش نضحك : على شن مستعجل اهي قدامك مش حاتهرب😂

زكريا: شن فهمك انتي😂

اني: امشي امشي

ركبنا ع الستيج .. وقف قدام مها قبل .. باس راسها وابتسملها : كبرنا ياخالو ووليتي عروسه

مها تحشمت وإبتسمتله

زكريا: الله الله مانبيش نوصيك في يوسف .. ديريه في عيونك

مها نزلت راسها

~

~

قام طرحه رتاج وإبتسم .. باس جبينها بوسه طووويله .. وحط وجهه قدام وجهها وابتسم : مبروك علينا ياعمري💓

نزلت عيونها .. وقلبها بيطلع من مكانه

ضحك وقعمز جنبها 💓

جت المصورة خدت مها وقعدت تاخدلها في لقطات بروحها ... بعدها مها قعدت الداخل ...وهي طلعت لي زكريا ورتاج .. صورو مع بعض وقصو التورطه .. بدلو الدبل .. وقعدو يرقصو مع بعض

زكريا ضغط على خصر رتاج: هبا نبي انروح

ضحكت ولفت يداها ع رقبته : مزال

زكريا: لالا وين معش نصبر اني راهو😉

إبتسمت وحطت راسها ع صدره .. باس راسها وقربها منه اكتر

زكريا: معش نقدر اني .. راهو بندير العار قدام الناس😁

رتاج: ههههههه لالا خلاص هي

اني جيت ساعدتها في لبس الكاب .. وطلعت وراهم .. وصلنا قدام الباب حضنتها وقعدنا نبكو

زكريا: لالالالالا كان خايل عليا بديرو الدراما هده كلها .. راهو ماخليتكش تطلعي

اني: ديير باالك علاها رد بالك تزعلها😭😭

زكريا لف يده ع كتفها : في عيوني ولايهمك

مرت عمي وسلمى واقفين بعيد ويبكو ... خدي زكريا رتاج وطلعو 💓

~

~

~

خش يوسف بكل تقه .. والإبتسامه معبيه وجهها .. واضحه عليه الفرحه اكتر من زكريا !! .. عكس رتاج ومها ... ركب ع الستيج .. وإبتسامته زادت اول ماقام الطرحه على وجهها ... شاف لي عيونها لي لحظات .. وبعدها قدم وباس جبينها ..نزل بالشويا .. وحط فمه ع ودنها إبتسم وتكلم : واخيرا ياعمري جي اليوم الي وليتي فيه حلالي

ضحك لما حس برعشه مها وتوترها .. نزل اكتر .. واستقر فمه ع خدها .. باسها بوسه طوييييله ... ومها كل مالها وتخش في روحها اكتر ودقات قلبها يزيدو ... ومش مها وبس الي متوترة من الوضع .. وردينه الواقفه بعيد وسط دموعها وتراقب فيهم !!... قعمز جنبها ... وقعد يشوف لي يداها .. كيف مشبكتهم في بعض ومتوترة .. مد يده بالشويا وفكهم من بعض .. قعد شادلها يدها .. ويحرك في صبعه علاها ... قرب من ودنها وتكلم بصوت هادىء: ارخي روحك ياعمري💓

اتشجنجت وقعدت ساكته

جتهم المصوره قعدت تاخدلهم في لقطات .. ويوسف منسجم وعاجبه الجو ... قصو التورطه وبدلو الدبل ... وكله ومها متوتره وعيونها معبيات دموع .... كلم امه وقالها بنطلع ... لبست كابها وطلعو .. ومطلع معاها حد

~

~

~

سلمى طلعت لقت ردينه مقعمزه جنب باب الصاله من الداخل وتبكي ... ✨

سلمى: هلكتي عيووونك

ردينه: تجوز خلاااص😭 معش نحلم انه ياخدني😭 خلااص امشي لي غيري 😭

للأسف الجمله هده مش بس سلمى الي سمعتها ... ولؤي 💔... لؤي الي كان شاد ورده حمرة وخاش بيهديهالها .... لؤي الي ليه سبوع وهو يرتب في الكلام الي بيقوله ... كيف حايوقف قدامها .. يشبح لي عيونها!... يمدلها الوردة!... ويقولها تتجوزيني ؟؟... تتجوزيني يانبض قلبي !.. وسر يعادتي !!... بس .. بس بعد الكلام الي سمعها !!... مستحيل تكون نبض قلبه ! .. لانه بكلماتها وكدبها عليه ! .. وقف النبض في قلبه وقتله قتل !! .. وسر سعادته؟؟ .. هه اي سعااده يحكي علاها !! .. وهي كسراته وقتلاته بكلمااتها!! ... يالله معقوله الي نسمع فيه حق !! 💔

سلمى: اششش خلااص بس خلاااص حراام عليك انسيه خلاص هو مش ليك

ردينه تحكي وتشهق: اني 😭.. اني نبكي حتى على لؤي

سلمى: كيف لؤي ؟؟لؤي شن دخله

ردينه: 😭😭 كنا مدايرين علاقه اني وياااه😭 .. كنت محتاجاته ومحتاجه حبه 😭.. مش عاارفه كيف قتله انحبك 😭 مش عاارفه كيف طلعت مني الكلمه وقتها😭 .. بس الي نعرفهه اني انحب يوووسف وبسس😭😭 .. ولؤي مجرد إنسان جاني في وقت كنت محتاجه فيه لي اي حضن ينفتح قدامي😭 .. اني خلااص كرههت روووحي معش نقدر نكمل في الكدبه هده 😭 .. ومش عااارفه كيف نصاارحه ونقوله 😭😭

قبل ماسلمى تنطق .. وقبل ماتعبر على صدمتها وعلى حقارة ردينه والي داراته ...خش لؤي وهو شاد الورده .. ويمشي بخطوات مهزوزه .. وجها احمر وكان واضح انه سمع كل شيء !! ... فتحت سلمى عيونها بصدمه وشهقت .. تلفتت ردينه !! .. وانشلت لما شافاته!! .. وتدعي ان شاء الله ماسمع شيء!! ... وقف قدامها وقعد يشبح لي عيونها والدموع الي فيهم !! .. ضحك بقهرة ! وبهزوة! وبإستحقار ... سكت شوي وبعدها تكلم !!

لؤي: اني حانختصر عليك المشوار .. وحانبسط عليك كل شيء .. كنت غبي اصلا لما صدقت كلامك وكدبك .. خلاص ارتاحي ولا كأنه صاارت حاجه ! .. "شاف للوردة ودمعته حزت في عينه.. شد يدها وحطلها الوردة فاها .. ضغط ع يدها والورد وبعد يده .. خدي نفس وتكلم بصوت مخنوق".... عمرك ماحاتلقي راجل حبك زيي!! .. وعمرك ماتفكري انه الراجل هدا مزال حايشوفلك تاني !!

وخر ببطء واطلع من الصاله بكل هدووووووء💔

طلحت ردينه وسط دموعها .. وهي تسمع في كلمات سلمى .. وهي تلوم فاها ع الي داراته .. كانت كل مرة وحده تطلع وتحسابها تبكي على فراق مها .. وتصبر فاها وتدعيلها انه تلحقها💔

~

~

~

عمر: لؤؤؤي يااالؤؤؤؤي .. تي خيره الهم ركب في السيارة وطلع بسرعه .. خدي فونه اتصل بيه سكر عليه وقفل النقال بكل .. بسم الله شن الي صاااير؟؟

مراد : مالأمر ؟؟

غر: تراا اخطى اامي😡

مراد :؟؟؟؟؟

~

~

~

~

اني واقفه فم الباب مع عمتي وابرار

عمتي: ماكلمكش مصطفى ؟؟

اني تحشمت : لالا والله ياعميمه

عمتي تنهدت: ربي يهديه ليه قريب شهر لايقول عندي ام ومرا نطمنهم عليا

ابرار تلبس في وشاحها: مرتاحين منه ياماما .. ان شاء الله ماعد يرجع

عمتي: بعيد السو 😠 عطك قصه في هالسان

ابرار:😒

اني : يالله اصلا هو قالي لنروح قبل رمضان بسبوع يعني السبوع الجاي ان شاء الله

عمتي: باهي علي خير .. هي تصبحي على خير . وعقبال لي ردينه😘

اني: وانتي من اهله😘.. وابرار ان شاء الله

ابرار قامت يداها : ياااااارب👐👐

عمتي: شفتي قله الحشم شفتي😒

اني:😂

ابرار: هي سلام ياحبي وارجعي لي حوشك عاد ساادك 😂

اني: ان شاء الله غير نتم معاهم الحوسه بس

عمتي: هي ولد عمك جي

ابرار: هي بااي

اني: سلام ✋

سقدتهم وخشيت .. لقيت امل تحكي مع عبدو ع الفون .. إبتسمتلها ومشيت قعمزت جنب ردينه والبنات 💔

~

~

امل: بالله عليك ياعمري اليوم بس .. والله خاطري نباات 😢

عبدو: باهي واني يابيبي من بيرقد جنبي

امل: وراس عويناتي ماتردني اول واخر مرة 😢

عبدو تنهد : باهي باهي واخر مرة راهو

امل ابتسمت : حااضر

عبدو: كلمي امي وهدايه يطلعو

امل: باهي

سكرت منه ومشت لي عزوزتها وهدايه

امل: عمتي قالك عبدو هيا

عمتها: هيا وانتي البسي عبايتك فيسع تو نقعدو نستنو فيك

امل: لاأني بنروح مع خوتي بايته عندهم

عمتها: شنوو .. ومن امت عندنا مرا تبات برا الحوش احني

امل بقله صبر : بايته في حوش بوي عما اعتقد مش عيب ولاحرام .. بعدين عرس اختي ومن حقي نبات

عمتها: اي اي زيدي طولي لسانك وعلي صوتك😠.. درتاها ولعبتي في راسه وخلاك تباتي

هدايه: خلاص ياماما راجلها راضي احني مادخلناش

عمتها: اسكتي انتي .. واني تو نكلم عبدو ونتفاهم معاه😬

امل: اهو يستنا فيكم وكلميه 😒

عمتها: باهي وزيدي الوي هالشوارب😒

وخدت شنطتها وناضت .. هدايه شبحت لي امل من فوق لي لوطا وناضت حتى هي ✨

امل: مبردكم مرض😒

~

~

~

~

زكريا يفتح في الشقه ... خشي برجلك اليمين هي💓

رتاج: بسم الله "وخشت"✨

زكريا سكر الباب .. وخش وقف قدامها .. إبتسم .. ولف يديه ع خصرها وقربها منه .. قامت وجهها وقعدت تشوفله 💓

زكريا: واخيرا ياعمري 💓

ابتسمتله وحمرو خدودها .. ضحك وقعد يقرب منها بالشويا ... حط خشمه ع خشمها وهمسلها"انحبك" ... ابتسمتله وقبل ماترد..! قرب اكتر وباسها 💋 ... لفت يداها ع رقبته ودابت معاه 💓

~

~

~

يوسف وقف السيارة ولف علاها : سادك دموع

مها بصوت مش مفهووم وهي تبكي: رووووح بيا😭😭😭

يوسف إبتسملها وشدلها يدها .. قربها منه وقعد يبوس فاها : صدقيني مايصير شيء الا برضاك وقفي دموع خلاص 💓

جبدت يدها وزاادت في دموعها ... شبحلها شوي وبعدها نزل .. فتحلها بابها ومدلها يده : هي تعالي

مها: مااانبييش ماانبييش😭😢 قتللك روووح بيا😭😭

تنهد بقله صبر وطبس قاامها ... مها قعدت تعيط وتضرب فيه : نززززلللني نزززلللني😭😭

يوسف: اششش اسسس الجيران يسمعو

مها نقصت صوتها : نزلني بااهي😢

طبس راسه وقربه من وجهاا: انحبك اني 💓

لفت وجهها وقعد ساكته .. قامها اكتر وابتسم ... وصلو قدام الباب كلمها✨

يوسف : المفتاح في دجاكتي طلعيه

مها: نزلني وافتح بروحك😬

يوسف: في وحده عاقله راجلها مدلعها هكي وتقول لا

مها: اي اني نزلني

يويسف: تؤ مش حانزلك هي افتحي الباب

مها: مانيش فاتحاته

يوسف غمزلها: معناها عاجبك الجو وماتبيش تنزلي😉

فنصت فيه وضرباته ع صدره

يوسف ضحك : هيا باهي 💓

مدت يدها بالشويا وطلعاته .. قربها يوسف من الباب .. فتحت الباب وخشو 💓

مها: نزلني 😢

يوسف : اصبري بس

سكر الباب برجله .. ومشي باها للدار .. حطها ع السرير وقعمز جنبها

مها قعمزت وقعدت تمسح في دموعها .. فتح بطمه دجاكته ومد يده قعد يمسحلها في الدموع ... دفت يده وبعدت

يوسف تنهد : خودي راحتك اني برا تبي اي حاجه كلميني

مها:......

سكر الباب وقعمز في الصاله بين دواامه من الأفكار ✨

~

~

~

ماما: هي كملتو

اني: اي خلاص .. هي كان بتطلعو

طلعنا وردينه ادور بعيونها على لؤي بس ماكانش موجود .. زادت تبكي اكتر

عمر: خيركم تقول كنتو في عزي

اني ضحكت : حااااله دارو العاار تقول اول وحدات خواتهم يتجوزو😂

نسيبه: اني مش متخيلا نمشي للجامعه من غير مها😭

ردينه:😭😭😭

سلمى: واني فضي عليا الحوش😭

عمر ابتسم وقرب منها : ماتبيش حتى انتي تتجوزي وتخلي الحوش لي امك 💓

سلمى شبحتله زادت تبكي اكتر

عمر بصوت واطي: ياحبيبتي 💔

ماما: هي اركبو امالا وين لؤي

عمر: مش عاارف طلع بسرعه وسكر نقاله ان شاء الله خير

سلمى شبحت لي ردينه وسكتو

ركبت ماما ومرت عمي ونسيبه واني مع مراد

وردينه وامل وسلمى مع عمر

~

~

~

كئااابه الحووش كله كئيب .. عكس مالمفروض يكون... الكل يبكي .. الحوش كله مليان دموع ... كل حد يبكي على سبب في قلبه .. والكل كان متخبي تحت قناع انه الحوش فضي والكل شاف حياته ... وقفت ردينه ع الروشن وتستنا في لؤي ... خايفه عليه وتلووم في روحها ع الي داراته .. حاولت تتصل بيه كم مرة بس كان قافل فونه!! .... غطت نسيبه راسها وزادت في دموعها .. نقهرت وهي تشوف في بنات عمها وكل البنات الي في عمرها تجوزو ... وهي!! .. هي مستحيل تعيش الفرحه هده !! ... قعمزت ع سريري وبكييت بكييت لين قلت يااسر ... محمد! ومصطفى! .. حبي لي محمد! .. وجوازي من مصطفى!! ... نضره محمد وهو يمشي وخلاني! ... ضرب مصطفى وكلامه القااسي!! .. اني شن مدايرة في حياتي .. باش نعيش كل هالعدااب!! ... فتحت مها باب الدار لقت يوسف متكي في الصاله .. رجعت للدار بسرعه وسكرت ع روحها !! .. رقدت ع سريرها وقعدت تبكي!! .. هو شن دنبه باش يتعدب معااها هكي!! .. وهي شن دنبهاا باش ماتفرحش في ليله عمرها !! ... بس منظر ردينه ودموعها !! .. مش مخلاها تتقبل فكره انها تكون مع حبيب اختها !!

وشرقت شمس جديده ... على اول يوم في حياه العشاق 💓

زكريا يبوس في وجهه رتاح ... حطت يداها ع وجهها وقعدت تبعد فيه .. ضحك وقاعد مكمل ويبوس فاها

فتحت عيونها وهي تتكسل: خليني نرقد 😯

زكريا: سادك نووم هياا

رتاج: امممم به😪

حضنها وقعد يلعب بشعرها: صباحيه مباركه ياعروس 💓

احمرو خدودها ونزلت عيونها 🙈

زكريا: حليلي من المتحشم

رتاج: الساعه كم

زكريا: 11:30

رتاج: الساعه تلاته بنمشي للمزين

زكريا باسها : حاضر نوضي دوشي توا

رتاج: امباه مدلي الروب🙊

زكريا: تو نغمض عيوني نوضي🙈😂

رتاج غطت راسها بالورغان : لاا لاا مدهولي🙈

زكريا : ههههههه غير تعالي نقولك

رتاج: ههههههههههه بطللل لااااا

~

~

~

~

يوسف قعمز ع حاشيه السرير .. وقعد يتأمل فاها .. طبس بالشويا وباس خدها ... حست برعشه وفتحت عيونها بسرعه .. وخر وقعد متوتر ✨

مها: شن ادير😳

يوسف: صباح الخير

مها قعمزت تلم في شعرها : صباح النور

يوسف: رقدتي هلبا

مها: الساعه كم ؟

يوسف: 12

مها: اها 😪 .. ونحت الورغان وناضت خشت للحمام

تنهد وجبد المخده حضنها وقعد يشم في ريحتها💓 سكر عيونه وراح في حلمه💓

سمع صوت الباب بتطلع .. رد المخده وطلع بسرعه .. خش للمطبخ وقعد يوتي في الفطور .. صلت مها ولبست توته سروال رصالي وتوب وردي ... قامت شعرها وطلعت .. لقت يوسف يصب في شاهي ... وموتي صفرة كامله✨

مها : قصدك انت مداير الفطور

يوسف وهو يقعمز: مش خسارة فيك ياعمري

وقفت جنبه وكلت زيتونه ... جبدها وقعمزها في حجره ... جت بتوقف سكر علاها وماخلاهاش

مها:😳😳 حووول

يوسف: اششش بنوكلك بيدي

مها تحاول تفك روحها : نعرف ناكل بروحي حول

قام رجل وخلاها مقعمزه ع رجل وحده .. وحط الرجل التانيه ع فخادها كوسيله باش ماتنوضش: اهدي بس

لفت عليه وهي حاسه روحها حايغمى علاها من التوتر ... حطلها شعرها ورا ودنها وإبتسم

مها: نبي انوض

يوسف: ماتحرمينيش منك خليك 💓

مها: يوسف لو سمحت

خدي طرف جبنه وحطهولها في فمها : غير افطري وبعدين ساهل

نزلت راسها وقعدت تاكل ✨

~

~

~

~

طلعت ردينه وقعدت ادور في سيارة لؤي .. بس للأسف مالقتهاش .. خشت لي دارها وسكرت ع روحها وقعدت تبكي✨

~

~

مرت عمي تنوض في سلمى✨

سلمى سلمى ياماما نوضي نضمو الحوش ونوتو فطور الناس مع بنات عمك

سلمى مسكره عيونها وتهتري من الحرارة: صقعاااانه باماااما صقعاانه😖

عمتي حطت يدها ع جبينها: حي عليييك وااالعه ناار😳

سلمى خاشه في بعضها وكلها ترجف ... طلعت مرت عمي بسرعه دارتلها كمادات وجابتلها دواء .. قعدت جنبها لين غفت .. بعدين نزلتلنا .. ضميت اني وامل وسهى الجنانات والكوجينه .. ونسيبه وردينه الحوش من الداخل ... عمر من صبح ربي طلع ... ومع 3 مشيت للمزين ولقيت رتاج ومها وقبلي .... سلمت عليهم وبدت المزينه توتي فيهم ✨

~

~

عمر يتصل بي لؤي .. وفي اخر تشريينه رد

لؤي بصوت تاعب: هاا الهم شن تبي

عمر: وينك النم من امس قالبين عليك الدنيا ونقالك مسكر😡

لؤي: وشن تبو في امي

عمر: تي خير فيتك شن جاااك 😠

لؤي: مااجااني شيء اخطوووني ومعش تتصللو بياا😠 "وسكر عليه وقفل فونه"

عمر : يااربي خير مصيبته😓 .. وطلع من المحل وجي لي حوشنا دوش وبدل وقعد يستنا فيهم يكملو باش يرفعهم للمحظر ... طلعو وركبو في السيارات .. ومانتبهش انه سلمى مش موجوده يحساب ركبت مع عمي قبلهم ...✨

~

~

~

#الساعه_7_المغرب✨

سلمى راقده ومش حاسه بالدنيا الي جنبها ... روح مراد من صاله التدريب .. خش دوش ولف المنشف على خصره .. ومشي لي دارها ... قعمز جنبها ع السرير .. وحط يده ع جبينها وقعد يقيسلها في الحرارة

مراد: حرارتك مرتفعه ... ضروري تتعالجي✨

فتحت عيونها بتعب .. ورجعت سكرتهم .. فتحتهم من جديد .. وسكرتهم بالشويا .. تفتح فيهم بالشويا انتبهت انه مراد مش لابس شيء من فوق .. وقف الدم في عروقها .. دفت يده وقعمزت بسرعه 😳

مراد انخلع: مابيكي ؟؟

سلمى ترجف من المرض ومن الخوف: انت شن ادير هني😢

مراد: نطمن عليكي

سلمى ركزت ع جسمه وع الي لابسه وبلعت ريقها بصعوبه

مراد: مالأمر

سلمى: تعبانه خليني بروحي😢

مراد مد يده بيقيسلها الحراره .. دفتها بالقوه

مراد: حرارتك مرتفعه .. خليني نرفعك للمستشفى

هزت راسها ودموعها نزلو : لالا خليني واطلع انت بس😭

مراد: لمادا الدموع؟؟

سلمى وقفت وهي حاسه روحها بطيح

مراد: وين ماشيه

سلمى: للحمام 😢

طلعت وكلها ترجف .. خدت مفتاح حوشنا الإحتياطي الي كان عندهم .. ونزلت بالشويا .... خشت لي حوشنا .. ومالقتش روحها .. غير راقده في سرير عمر .. وهي ترجف وتبكي ✨

~

~

فتح عمر باب داره وهو يصفر ويغني .. حدف التيشرت ع السرير ... وتفاجاء بحاجه متكومه ع سريره .. ومتغطيه بالكامل مش باين منها شيء!! .. قرب من السرير وهو مستغرب. قام الورغان.. وتفجأء بسلمى وهي ترجف والدموع معبيه وجهها 💔

عمر:😳 حبيبتي؟؟ .. بسم الله تي مش مشيتي ؟؟

سلمى تبكي وخلاص

قرب منها بيمسح دموعها ... ارتجفت يده لما حس بالحرارة الي عندها

عمر: حرارتك مرتفعه😳 !!

سلمى بصوت تعباان: صقعاااانه😭

قام عمر الورغان وخش معاها ... شافت سلمى لي جسمه عيطت ودفاته

عمر:😳 خيرك

سلمى: البس ماتقعدش هكي😭😭

مد يده وخدي التيشرت لبسه : اهدي باهي خلاص

سلمى: عمر خاااايفه وتعباانه اني😭😭

إمتد جنبه وخداها في حضنه : ريته الوجع فيا ومافيك 💔

شدت في تيشرته وقعدت تبكي اكتر : خفففت هلبااا😭 خفففت تصير حاجه 😭

باس راسها وقعد يمسح على شعرها : اشش خلاص اني جنبك ومعاك 💓

خاافت هلبا .. خافت مراد يديرلها حاجه !... كانت الحرارة عااطيه دور كبير .. انها تغيب ع الوعي شوي!! .. وتهتري بحاجات لو كانت بوعيها كانت مش حاتقولهم !! ... حطت راسها ع صدره وقعدت تسمع لي دقااته وتهتري وتحكي .. بي الي في قلبها 💓

باس راسها وقعد يمشي في يده ع شعرها : احسن توا ياعمري 💓

قربت راسها اكتر من رقبته وقعدت تشم في ريحته💓

عمر: حبيبك اني ؟

هزت راسها وسكتت

عمر: تحبيني باهي

تكلمت بصوت واطي : هلبا💓

عمر: باهي امت تحني عليا وترجعيلي

سلمى: نخاف تسيبني

بعد شعرها على ودنها وكتفها .. وباسهم بحنيه: نموت ومانسيبك 💓

ضغطت ع خصره وحست برعشه في جسمها

ابتسم وهو تأكد انها مش في وعييها .. ومستسلمه بالكامل ليه .. حط خشمه ع رقبتها وقعد يشم فاها ... يمشي في يده على ضهرها .. واليد التانيه مخلله شعرها ... يتكلم بصوت واطي وكله حب ... وانفاسه على رقبتها ... 💓

ماتبيناش نتجوزو! ...نكون ملكك وتكوني ملكي! ... نفتح عيوني نلقاك في حظني! ... ونسكرهم وانتي بين يديا! ... نجيبو بيبيات هلباا !! ... بنات يشبهوك .. وو .. وحتى والولاد نبيهم يشبهوك !! ... كل شيء ياخدوه منك ! .. "قاملها وجهها وقعد يتأمل فاها وهي سارحه في عيونه .. إبتسملها وكمل كلماته " .. نفس عيونك ولون السمي الي فيهم "مسحلها دمعتها .. وباسهملها" ..." نزل يده بالشويا وقعد يتحسس في المكان الي ينطق فيه .. واول مايكمل جملته يبوسه " .. خدودك لما يحمرو 💋.. خشمك في الصقع وكيف يولي احمر💋 .. "حط صبعه ع فمها وقرب وجهه اكتر " .. فمك ، وشفايفك .. وقبل مايقرب!! .." نزلت راسها وحطاته ع صدره.. تنهدت ونطقت بكلماتها وهي في كامل وعيها " ..انحبك ماتحرمنيش منك 💓.. "إبتسم وتكلم بنفس نبره صوتها" ...واني انحبك

~

~

~

لؤي سافر ! ... وعمر وسلمى حبهم نبض من جديد ومايضيعوش في تانيه من حياتهم الا وهما عايشين في هالحب ! .... ردينه تغيرت بكلل ومش ردينه الأولا .. تكمل في يومها وهي في دارها .. وانعزلت ع الناس كلهم ! ... ام عبدو كل يوم تنق على امل وخيرك ماحملتيش وبري عايني ! ... وعبدو قاعد بين نارين ومش عارف شن يدير !.. وعلاقته هو وامل متوترة بكل!... زكريا ورتاج عايشن في العسل واحلا من هكي مافيش ... يوسف مدلع مها وغير شن تبي ... بس هي .. مش قادرة تتجاوب معاه .. وفي نفس الوقت تضعف لما تشوفه! ... مصطفى روح ورجع همي من جديد ... معش ندور فيه والي يبيه نديره من غير نقاش!! .. يمكن خوف منه ! .. ويمكن نتفادا في المشاكل ✨

#يوم_20_رمضان 💓

ابرار: غدوه بيجونا عيله عمي بيفطرو عندنا

عمتي: مرحبتين بيهم

ابرار شبحتلي وشافه لي امها: وحتى نسرين بتجي معاهم

عمتي:😳 علاش هي روحت

ابرار: اي بدايه رمضان

اني حسيت في حاجه غريبه : من نسرين عندكم بنت عم اسمها نسرين؟؟

ابرار: اي مرت مصطفى الأولا .. تجوزت وسافرت وتوا رجعت

اني: اهااا !!

عمتي تغير في الموضوع: غدوه تعالي بكري شوي باش نوتو الفطور مع بعض

اني: حاضر

وقعدت نهدرز معاهم .. لي بعد التراويح .. روحت قعدت نتفرج وزي كل ليله بروحي مصطفى مانعرفش امت يروح انوض الظهر نلقاه جتبي!! ... ومع الساعه 2 تسحرت ودرت كيكه كراميل .. طيبتها وخليتها في التلاجه .. ادن الفجر .. صليت وقريت قرأن ورقدت .. نضت مع 1 لقيت مصطفى راقد .. خشيت غسلت وجهي وتوضيت .. صليت ولبست ومشيت لي حوش عمي لقيت عمتي تقرض في الخضره ... وابرار اضم في المربوعه .. قعدت نساعد فيهم .. وبعد العصر هكي حشو عيله عمهم ومعاهم نسرين ... سلمنا عليهم .. وقعمزنا نهدرزو ... ابرار وبنات عمها التانيات خشو يوتو في الصفر .. وعمتي ومرت عمهم يهدرزو .. واني جيت وقعمزت جنب نسرين .. الحق البنت محلاها وطيوبه... انسجمت معاها وقعدنا نهدرزو !

نسرين : باين عليك صغيرة

اني: اي مواليد 93

نسرين شهقت وجهها تغير : معقوووله 20 سنه بينكم😳

اني ابتسمتلها: نصيب

سكتت وقعدت ترضع في بنتها

اني: مشاء الله كم عمرها

نسرين : 8شهور

اني: ياحياتي ربي يحفظها وتفرحي باها

نسرين: انشاءالله يارب

اني قعدت ساكته وبعدها سألتها : عارفه القصه فاتت علاها سنين .. بس في سؤال في راسي وخاطري نعرف الجواب

نسرين إبتسمتلي : شن سبب طلاقي من مصطفى

اني: اي ومعاها ولد عمك

نسرين: ومش ولد عمي وبس .. وتجوزنا على علاقه ؟

اني: باهي ليش اطلقتو

نسرين: اصلا اني جايه بنحكيلك .. رغم انه ماما مهددتني .. بس حراام لو ماحكيتش . من سكت عن الحق شيطان اخرس

اني استغرب من كلامها: شن بتحكيلي وحق شنو ؟

حطت بنتها وتلفتتلي وقعدت تحكي: درت علاقه اني ومصطفى سنتين .. بعدها جي خطبني نستنو غير امت نتجوزو .. تجوزنا وعشنا الشهور الأولا احلا مايكون .. وفيه قاريبتنا تجوزت معانا وحملت مشاءالله .. وكم وحده من الجيران تجوزو معانا وبعدنا وحتى هما حملو ... بدت مرت عمي تقولي بري عايني بالك فيه حاجه .. وماما وكلهم ينقو ع قصه الحمل .. مشيت درت تحاليل وعند اكتر من دكتورة .. وكلهم نفس الجواب .. اني سليمه وماعنديش حتى 10% ضعف او خلل ... وكل مانحكي مايصدقوش فيا ... بعدها وحده من الدكتورات طلبت تحليل حتى على مصطفى .. في البظاابه رفض وبعد محاولات مني .. داره .. وللأسف طلع عنده عقم ومستحيل يكون أب 💔

حسيت بسطل اميه سخونه تبزع عليا .. تي هده شن تقول ! .. معقووووله ! .. وعمتي ومصطفى وابرار ! .وبااابااا؟؟ ... معقوووله كلهم كدبو عليا وغشوووني .. قعدت سااكته ونسمع في كلامها .. واني عيوني معبياات دموع .. ومش مصدقه الخبر 💔

نسرين: نهاار يومها مصطفى وقعد يكسر ويسب .. ودار عركه مع الدكااترة ... وتعاارك معااي ولي اول مره كان يمد يده عليا ... وللأسف مش اخر مرة ... ومن تاني يوم سافر وقعد شهر غاايب .. والناس واهلي يسألو فيا .. واني نقلهم عنده شغل ... وبعدهاا رجع وكاان متغيير مش مصطفى الأول بككل ... كاان سكراان وخااش يقول في كلام شوارعي ومش مزبوط ضربني ضرب شنييع رغم انه مادرتله شيء وماكلمتاش حتى .. واستمرت حالته هده لي 4 شهور .. وكل مايشوفو وجهي كنت نكدب ونقول مره طحت ومرة انزلقت ... وبعدها عمتي عرفت بالقصه .. وقعدت تزن ع راسه وتقوله عااين ... هو من هالكلمه زااد خش في عقله وطلع .. تخيلي وصلت بيه الدرجه انه مد يده على عمتي "اني شهقت ودموعي نزلو " ... وبدت حيااتنا هكي ..ومرة كنت نضم في دولابه لقيت فيهم وراق ... هه طلع مريض ويتعاالج عند دكتور نفسي واحني مانعرفوش ... وعرف بابا ودارله قصه وطلب منه انه يطلقني .. في البدايه رفض .. وبعدها طلقني ... اني كملت عدتي وبعدها بفتره تجوزت وسافرت .. وكل مره نسمع انه خطبوله وتجوز ... ولما نسألهم كيف وافقت .. يقولو غاشينها وماتعرف بشيء .. كنت نقولهم كييف وحرام .. يقولو ماعندنا مانقولو ومش قاادرين عليه ...

وقفت بسرعه وطلعت من الحوش واني نرعش ونبكي ... معقووله طول هالمده نكون عايشه مع مريض نفسي ... كيف عندهم قلب يغشو بنات النااس هكي .. من شن طينتهم العيله هده ! ... ومن شن طينه بابا .. الي حدفني الحدفه هده ... فتحت الباب .. وحسيت الميه نزلت في ركابي من المنظر الي نشوف فيه ... وهني تاكدت مش غير انه مريض نفسي وبس 💔💔

#يتبع