صدمة حياتي

الحلقة الحادية والثلاثون

اني: ههههههه وحق ربي ماوقت بصارتك

محمد: عندي ماندير ومش فاضي ... ربي يكتبلك الي فيه الخير ومبروك مقدما 💔

نعرف نبرة صوته لما يبصر! ... ونعرفه لما يحكي بجديه ... عقلي المشوش .. وقلبي الخايف ! ... ماخلونيش نحدد الصوت ونركز ! ... بس تسكيرته في وجهي ! .. تسكيرته قبل ماننطق ونجاوب عليه ! ... أكدلي كل الي قاعد يصير حقيقه ! ... وكل الي مريت بيه ! .. خيال! وحلم ! ووهم!... وجي الوقت باش ينتهي ونبدو في الجديه ونعيش في الواقع! .... الواقع الي أكدلي مافيش حب ! .. وكله كدب ومصالح ! ... مهما حكالك ووعدك وعيشك في حبه ! ... حايطلع يكدب عليك ! .. ومن اول فرصه ... بحححح! .. حايهرب ويخليك ... في مرة قالي أوعديني مش حاتبكي! ... وفي اكتر من مرة وقف جنبي وصبرني ! ... وفي كل يوم يعيشني في حبه ! .... حانوفي بوعده ! ... مش حانبكي ! .. ومش حاننهار ! ... مش حاتوقف حياتي ! .. وحانعيش ! ...

بكل سلاسه نزلت فوني من ودني وحطيته ع الطاوله .... شبحت للبنات ! ... والكل كان يسأل فيا !

شن قالك ؟

خيرك ساكته؟

كلم بابا وقنعه؟

امت بيجيب امه؟

تكلمي خيرك ؟

امت حايجي؟

كيف قدر يقنع عمي ؟

خيرك مصدوومه💔؟

إبتسمتلهم ورديت عليهم بجمله وحده

تخلا عليا .. وقالي شوفي نصيبك !

قلت اخر كلمه واني متوجهه للدار ... مش حانقدر نتكلم .. ومش حانرد على اسألتهم ... سكرت الباب بكل هدوووء ... قعمزت بنفس الطريقه ... وخلاص ! دمعتي مش حاتنزل 💔

~

~

~

نسيبه:😳 مافهمتش !

ردينه: كيف تشوف نصيبها ؟

مها: خيرها وشن قلها بالظبط !

سلمى: تي نبي نفهم مافهمت شيء !

رتاج: اصبرو هي تسجل في المكالمات !

خدت فوني وفتحت ع التسجيل 💔

ردينه:😳 حقييييير

سلمى: مصح وجهه كيف دار هكي

مها: وكلامه وحبه لاها هالكدااب

نسيبه: ياروحي عليك ياشيمو .. خيرها حظها هكي

رتاج : اكيدة فيه غلط .. اني نعرفه وسامعه حكيه .. شفت نظرته لاها ... مستحيل يكون الي قاله صح .. متأكده💔

~

~

~

~

زكريا :😳 محمد خيرك لام حوايجك وين ماشي

محمد: العياده قريب تفتح .. اجرت شقه جنبها بنحولها وبنجيب امي وخوتي معاي

زكريا: تي علااش ياراجل معقولة وقعدت هني

محمد: لاويين خلاص .. وبعدين إيهاب بيخش للجامعه .. وياسر امي لاها سنين وهي بروحها

زكريا قرب منه وحط يده ع كتفه : مش متخيل الحوش من غيرك

حضنه محمد بالقوا ودمعته نزلت : صحييت ياصاحبي جميلك عمري ماننساه

ضربه زكريا ع ضهره وحضنه اكتر : معش تقول هكي .. انت خوي الي ماجاباتاش امي .. وتعرف غلاتك عندي

محمد: عارف ياقدر

زكريا : ههههه حول حول .. واني على شويا بنبكي خلاص

محمد: هههههههن هو اني شبه بكيت 😅

زكريا : دارك حاتقعد مسكرة ومش حايسكنها غيرك .

محمد: كيف كنت حانطلبها منك

زكريا : من غير ماتقول

محمد: هي مد يدك وساعدني في تطبيق الدبش

زكريا : هات اعطيني شنطه

~

~

~

~

خشيت دوشت ولبست احلا توته عندي ... مكيجت مكياج بسيط ومشطت شعري ... بخيت برفاني وطلعت ... كلهم يشبحولي ! ... متوقعيني نبكي وننهار ! ... بس لاا حانكون اقوا من بنت في العشرينات خدلها الحب مرتين 💔

خشيت للمطبخ تحت انظار الكل ... طلعت حاجات الكيكه وبديت ندير فاها ✨

رتاج: شن الي قاعد يصير ؟

ردينه : متأكدين هده شيماء

مها: احسن ماتحبس روحها وتمدر

سلمى: خلوها تعبر ع الي داخلها زي ماتحب هي

نسيبه : بس حاتتعب لو كتمت في نفسها 💔

~

~

درت كيكه زينتها وحطيت فاها جميع مواهبي ... طيبت شاهي وقوه نسكافي وكاكاو ... وتيت احلا صفرة وطلعتهالهم ... قعمزنا الكل ع الصفرة .. ومافيش وحده قدرت تسألني وتفتح معاي الموضوع ... هدرزنا عادي .. بالعكس كنت نضحك حتى ع سبب تافه .. اي كلمه يقولوها نموت علاها بالضحك ..

اني: هههههههههههههههه 😂😂

ماما: شن الي يضحك في الي قلته ؟

اني: ههههههه هكي اليوم جايني ع الضحك 😂😂

ماما : شكلك فرحانه بي العريس

اني: عادي زيني زي اي بنت تفرح لما بيخطبوها

ماما: باهي ان شاء الله يطلع كويس

لني: تو غدوا يبان .. اي امل شن كملتي بتاتك والحجز؟

شبحتلي وعلامات الإستفهام ع وجهها ... فامن بعد الي صار معش حكينا .. الا حاجات رسميه ... ماتوقعتنيش نسأل سؤال زي هدا !

امل: شبه كملت وحجزت الصاله والمزين .. قعدلي الفيلو بس

اني: تو نطلع اني وياك لما بتختاريه

امل والبنات:😳😳

اني: خاطري في بيتزا نمشي نديرها

رتاج: نساعدك

اني: ياريت

اني ورتاج في المطبخ .. اني نعجن وهي ادير في الصالصه ✨

رتاج: شيماء

اني: لينا هلبا معش هدرزنا علي اسراء"بنت جيرانا وكانت تقرا معانا" .. شن رايك الليله نمشولها

رتاج: ابكي ماتحبسيش دموعك

اني: لو كانت الدموع ترجع الي مشي .. كانت رجعتلي عبدو من شهور

رتاج: شن فكرك فيه توا

اني: ماتفكرتاش بس هكي اضربتلك بيه متل

رتاج: بس حبك لي محمد اكبر من حبك لي عبدو

اني: وشن الفايده لو كانو الزوز من نفس الطينه

رتاج: نحس في محمد وراه حاجه

اني: ندير شربه مابين مارتاحت العجينه !

~

~

~

~

لؤي:😳 عمممر

وخدي فونه رد طول

عمر تي وينك ياراجل

عمر: قاعد شن حال العيلة

لؤي: تي شن ادير انت .. وين قاعد .. ووين اراضيك ... وين ساكن وعلاش اختفيت فجأة هكي؟؟

عمر: تو يجي وقته ونحكيلك

لؤي: وقته!!!! ... ليش شكلك مش ناوي ترجع

عمر: حاليا اي

لؤي: وسلمى !!

عمر: تخليت علاها في اكتر يوم هي كانت محتاجتني فيه ... وتوا مش قادر نواجهها

لؤي: علاااش باهي ؟ ... علااش ماجيتش ! .. علاش وعدتها وماوفيتش بوعدك ... خشت العمليات وهي تستنا فيك ... واول ماطلعت من العمليه اول حاجه قالتها وين عمر ! .... علاش خدلتها بعد ماسامحاتك ؟؟

عمر: سلملي على امي هلبا .. خواتي والعيله كلها "سكت شويا .. وتنهد" ... وصل الي بنقوله بالحرف لي سلمى !

~

~

~

~

لؤي: السلام عليكم

الكل : وعليكم السلام

لؤي: يسلم عليكم عمر !

حطت سلمى طرف البيتزا ... ودمعتها حزت في عينها

ماما: كيف حاله .. عطيني نكلمه

لؤي: حاله كويس ويطمنكم عليه

ماما: باهي عطيني نكلمه سلم وليدي

لؤي: ماخلاليش مجال باش نرد عليه .. قال كلامه وسكر وقفل فونه طول

ماما: هده اسماء الله لاتربحها ... سخفنا علاها ونحسابوها كويسه😠 ... رفعت الولد وشكلها سحراته معش بي يرجع

ناضت سلمى وطلعت بسرعه ... لؤي لحقها

امل: عيب عليك ياماما تظلمي في البنت .. مرات ماليهاش علاقه

~

~

~

لؤي: سلمى

مسحت دمعتها وتلفتله: نعم

لؤي: عمر وصاني نقولك الكلام هدا .....

سلمى: مانبيش نسمع اي حاجه عليه "ولفت ركبت اول درجه"

لؤي: ماتسمعيش كلام الناس .. وماتصدقيمهش ... ورحمه الغوالي اسماء طلقتها ومعش شفتها من هدا اليوم .... قاعد في حوشنا .. حوشي اني وانتي .. الي مايعرفاش غيرك ... ومش مسامحك لو تعطي النعته لي حد .... مش حانرجع الا لما تبيني انتي نرجع💔

هزت راسها بقوا ودمعاته عبو المكان ... ركبت درجتين ووقفها صوت لؤي

لؤي: وين يجي الحوش ؟

ركبت من غير ماترد عليه 💔

ردينه: لؤي 💔

سكر عيونه وهو يسمع في اسمه الي يعشقه من فمها ... تفكر وعده لي نفسه ... لفلها وتكلم بجديه : نعم

ردينه: عمر مش حايرجع

لؤي: قال هكي

ردينه: باهي ماتعرفش هو وين

لؤي: قال في حوشه

ردينه: حوشه؟؟؟

لؤي: اها شكله شاريه

ردينه: غريبه عمره ماحكي عليه 😕

لؤي: اني ماشي تبي حاجه

ردينه:😳 تصبح ع خير 💔

لؤي وهو يمشي: تلاقي الخير💔

~

~

~

~

في مرات نحس ... انه حتى الجو يحس بي الي داخلنا ... سبحان الله وكأنها السمي تبكي معانا .. والجو كئيب زينا .... لو كان امس قالولي انه هده اخر ليله ليك انتي ومحمد ... كنت قلت كدب ومستحيل .. مستحيل حبنا يتم في يوم وليله ... مستحيل كلامه وحبه ليا ينهيه بالطريقه هده .... ماقدرتش ! حاولت نحبس دموعي! .. حاولت نلهي روحي في حاجات تانيه ! ... بس مع هدا ! ... اول ماقعدت بروحي .. دموعي غلبوني ونزلو ! ... ليش اني من دونهم كلهم ! .. شن ناقصني ! وشن درتلهم ! .. باش يجازوني هكي .... والله حبيته .. وحبيته من قلبي ... علاش دار فيا هكي ! .. وشن مصلحته باش يكدب عليا ! ... ااااه يااربي ساعدني ... مش متخليه صدمه وكسره تانيه في حياتي.... كرهت الحب وكرهت الرجاله بصفه عامه ... غدوه حنقابل تالت راجل في حياتي .... باهي حايكون زيهم .. حايخدلني ويخليني في نص الطريق! ... ولا يكمل معاي ويصوني ! ...يارب لو هو خير ليا قربه .. ولو شر بعده يااارب👐

~

~

~

ردينه : صباح الخير

سلمى: صباحك ورد

ردينه: بتمشي للجامعه

سلمى: اي نلبس ع السريع بس

ردينه: ماخاطريش فاها .. وماخطريش نطلع .. ماخطري ندير شيء غير نقعمز ونبكي بس 💔

سلمى: لي امت بنكبو وبندمرو على خاطرهم ... وهما ياريت حتى يحسو بينا ... خلاص انسي ولوحي كل شيء وراك ... خلينا توا انركزو ع مشروع تخرجنا ... وخلي حياتنا لينا حني وبس ... وطززز فيهم وفي الحب

ردينه: ان شاء لله نقدرو نكونو قوا

سلمى: الحاجه هده بيدك انتي

ردينه: وانتي قلتاها .. هي اني نازله نبدل خير مالؤي يفصل علينا

سلمى: اي والله الأيامات هده معش ينطااق

~

~

~

~

اميمه: صباح الخير

امل: صباح الحب

اميمه: رايقه اليوم

امل: بنتلاقا مع عبدو💋

اميمه: واني نقول 😂... هيا باهي رضوان طالع طالع .. يحطنا في المحلات نختارو الفيلو

امل: بنمشي اني وشيماء غدوة

اميمه: كييييف؟؟ .. شيماء بتختار معاك فيلو عرسك !

امل: اي هيا قالت

اميمه : كيف صار باهي .. سامحاتك ورجعتو زي قبل ؟

امل: مش عارفه ماحكيناش هلبا ... هي اليوم جاي واحد بيشوفها

اميمه: واحد منو ؟

امل: صاحب بابا

اميمه: اها باهي كويس !

~

~

~

~

لبست سروال زيتي وسوريه بيضاء ... درت ميك اب بسيط .. لبست وشاحي وبخيت برفاني ... خديت صفره القهوه ... وجسمي بالكامل يرعش ... قداش ماحلمت واني مقعمزه مع عبدو ! ... وحلمت بمقابلتي مع محمد ! ... وااني الفرحه مش سايعتني .... بس لاحلمي الأول تحقق ... ولا الأخير تحقق! ... نصيب في يوم وليله تغير كل شيء ! ... راجل مانعرف عليه شيء حتى اسمه مش عارفاته ! ... من يكون !.. وكيف طبعه ! .. مواصفاته ! ... شيء شيء ... قلت السلام ونصدمت بي الي شفته قدامي ! ... تخيلته شاب ! .. جنتل ! شعره اسود ولحيته مرسومه ! ... بس مافيش ولاحاجه من الي قلته ... فالي قدامي ! ... شعره نصه شيب ! ... ولحيته منتفه اصلا ماتتسماش لحيه ! ... عيونه تقول يحشش ! .. وشواربه زرق ! ... شن هدا 💔 ... مالقيتش روحي غير مقعمزه في اول كنبه جنب الباب ! .. وصفرة القهوة قعده في حجري !

بابا : مدي القهوة لي خطيبك 😬

مصطفى: خلاها ترتاح تو ناخد

بابا ناض وخدي الصفره مني حطها ع الطاولة: نخليكم ع راحتكم "وطلع"✨

مصطفى: سبحان الله ملاك

اني:😳💔

مصطفى: نعرفك اسمي مصطفى ومواليد 73

اني: 😳

مصطفى: عارف فرق العمر بينا كبير ... بس متأكد الحاجه هده ماتفرقش

اني:😳

مصطفى: طبعا الحمدلله نخدم عمل حر وحالتي متريحه وهلباا .. عندك حوش ع دورين وكبيير .. اول ماتوصلي حا تلقي قدامك سيارة ... والي تبيه يكون عندك

اني: 😳

مصطفى: اسألي خيرك ساكته

اني: 😳

مصطفى: وطبعا متجوز قبلك تلاته

اني:😳😳 تلااااااااته😳😳 ؟؟؟؟

مصطفى: واخيرا سمعت صوتك ☺

اني:😳 بنسكن معاهم

مصطفى: لااا هما طليقاتي .. يعني مافيش اي وحده على دمتي

اني: وليش طلقتهم ؟

مصطفى: متفاهمناش

اني: ماتفاهمتش مع التلاته؟

مصطفى: هدا الي صار

اني: وكم قعدو على دمتك

مصطفى: اكتر وحده بنت عمي سنه ونص

اني:😳 سنه ونص ؟؟ .. ليش باهي معقولة هكي

بابا : ها شن حكيتو

مصطفى: لاتوا خير ياعمي وتو نجيب الوالدة غدوه

اني: عن جد عمي😂😂😂😂😂😂😂

مصطفى:😳

بابا: شيماء😠

اني: احم هههههه😂😂

بابا : خلاص اطلعي 😡

اني: هههههههههههههه باهي😂😂😂

طلعت واني بنموت على روحي بالضحك .... لقيتهم كلهم يستنو فيا

رتاج: 😳 خيرك

ماما: بسم الله العظيم .. هده خيرها

ردينه: كيف شكله شخصيه 😍

لني: هههههههههههههه وووه كان نحكيلك .. تخيلو مواليد 73 😂😂 يعني الفرق بينا 20 سنه 😂😂 .. وترا قولو شن قال لي بابا 😂 قاله عمي يحساب روحه صغير ههههههههه😂😂... وقالك شخصيه .. تي شكله زي عبسي ولد جيرانا😂😂😂 ... عيوونه حي كان تشوفو عيونه 😂😂 حمممر زي مصاص الديماء😂 ... وعااد شواربه حاجه تانيه 😂 .. لونهم زي قفطان امي😂😂 ... ومزااال نزيدكم من الشعر بيت 😂 .. اني رابع مراء ياخدني ههههههههههه😂😂😂

قعدت نضحك واني نشبحلهم كيف كلهم مصدومين ... ومافيش وحده قدرت تتكلم ! ... ههههه ياعليك عريس طحت فيه ... حولت وشاحي وخشيت للدار ... طحت ع السرير واني نشبح للسقف ... ضحكت ضحكت ضحكت .. بأعلا صوتي ! .. يمكن تأتير الصدمه ! ... وفجأة بدت ضحكتي تتلاشا تدريجيا ! .. شويا شويا .. لين تحولت بالكامل لي بركاان من الدموع ! ... بكيت على حظي ! .. بكيت على مستقبلي! .. بكيت على شبابي! ... بكيت على حياتي ! ... ليش باهي ! ... شن الفرق بيني وبين كل هالبنات الي يحبو وياخدو في حبيبهم ! ... ليش كل مانقول خلاص حياتي تحسنت نرجع من الصفر ! ... ليش كل مانحب يخدلوني ويتخلو عليا ! ... ويوم ماقلت خلاص ! .... جاني واحد مكمل شبابه ! ... وشكله مش طبيعي 💔 ... بكييت واني نسمع في صوت بابا عالي .. وهو يقول حاتاخده ومش حاتاخد غيره .... سكرت ودااني ! .. مانبيش نسمع شيء ! .. ياريت لو الموت تاخدني ونرتاااح ! ...

~

~

~

~

~

خش محمد للحوش .. وهو مركب اخته في غمره .. وإيهاب وراه

ام محمد : 😳 محمد امت جيت

محمد: كيف حالك يام

ام محمد: توا وليت كويسه بشوفتك

ريماس : ياماما اليوم محمد روح بيا من المدرسه😍 .. وريته لي صاحباتي 😍 .. محمد ديما انت روح بيا باهي

محمد باسها ع خدها : حاضر من هني وغادي اني نوصلك وانروح بيك

امه: خيرك جيت في نص الشهر ياولدي وخدمتك

محمد قعمز جنبها : خديت إجازة نبي نرتاح يام 😣

امه : خيرك ياولدي شكلك تعبان

حط راسه في حجرها وسكر عيونه بتعب : تعباان ياام تعبااان😢 ... كل مانقول خلاص حياتي تحسنت والدنيا نفتحت قدامي .. ترجع تتسكر في وجهي من جديد .. عيييت ياأمي عيييت .. عيييت وكبرت قبل عمري 😢 ...

مسحت ع راسه ودموعها نزلو وهي تشوف في ولدها: ارتاح ياولدي ... بطلها الخدمه لو تعباتك 😢... وربي كريم تو نلقو باش نعيشو

محمد: يااريت لو جت ع الخدمه ياأمي .. خدمتي كويسه ومرتاح

امه: امالا من شن تعبان ياوليدي

محمد: قلبي ياأمي قلللبي مااات 😢 ... نحس فيه حايطلع من صدري من كتر الوجع 😣... ياريت لو الموت تاخدني ونرتاح

امه: بعييييد السو 😭 معش تقول هكي .. والله ماناقصه الله 😭

ريماس: خيركم تبكوو 😭😭 "وبدت تبكي حتى هيا"

ايهاب: تي خيركم 😳

محمد قعمز ومسح دمعته : مانبكوش احني ياحبيبتي تعالي في حجري تعالي ... هيا عاد اني جاي باش نفرحكم .. شريتلك حوش يارموسه كبييير زي ماتبي

ريماس:😍 حااااق وفيه دار بودريه

محمد: ناخدلك دار بودريه اي

ريماس: هييييي😍👏

امه: حوش شنو

محمد: بناخدكم تعيشو معاي

امه: وعندك حق الحوش ياولدي

محمد: الحمدلله مستورة توا إيجار .. وانشاءلله عندي عياده حانفتحها عن قريب .. ولما ترد حقها نشريه

امه: باهي مشاءلله ربي يزيدك من عنده ياولدي .. ويفتحه في وجهك وين مامشيت

محمد: ياارب 👐

إيهاب: محمد نبي لابتوب الولاد كلهم عندهم الا اني

محمد: شد حيلك وجيب تقدير كويس ناخدلك واحد

إيهاب: وبنغير حتى نقالي

محمد: كل هدا بعد ماتنجح

إيهاب: باهي

~

~

~

~

زكريا: كيييف 😳 امت باهي

رتاج : امس دارت مقابله معاه

زكريا : وهي موافقه

رتاج: اني هدا علاش خبرتك .. من امس مسكره ع روحها وماردتش .. توا خليت عمي ورضوان عندها

زكريا : سكري سكري جاي حتى اني .. وتو نشوف اخرته عادل الزفت هدا 😠

~

~

~

عمي: وينه عادل هو 😠

ماما: طلع من الصبح

عمي: كييف ماتقولوليش خبر زي هداا كيف

ماما: امس انت بايت برا الحوش

عمي: وانت وين يارضووااان 😠

رضوان: ماجيتش امس نشغلت 😔

عمي: استغفر الله العظيم .. تي هدا كيف يعطي بنته لي واحد مطلق قبلها تلاته .. تي واضح العيب فيه هو مش فيهم

رضوان: خلاص ياعمي هدي روحك وتو نقولوله لا وخلاص

عمي: وين شيماء هي

اني طلعت من الدار : نعم

عمي: ماضايقيش روحك يابنتي .. والله مايقدر حد يغصبك على حاجه انتي ماتبيهاش

" شوفي نصيبك يابنت الناس .. ووافقي ع الي جاي بيخطبك 💔 "

كلماته من امس مافارقونيش 💔

سكرت عيوني .. تنهدت وخليت كل شيء ع الله : بس اني موافقه ع الراجل ياعمي 💔

عمي:😳 كييف

اني: مستحيل بابا حايعطيني لي واحد ماينفعش .. واني تريحتله لما حكيت معاه

رضوان: تي والعمر الي بينكم

اني: مش مقاس العمر عادي

رضوان: تي كييف مش مقاااس كييبف 😠 .. انتي مش ملوحه باش نحدفوك هكي

عمي: مقتنعه بي الي تقولي فيه ياشيماء

اني: ان شاء الله

عمي: ماتخافيش لو ماتبيش قولي

اني: لا ياعمي اني موافقه

عمي: معناها ماعندي مانقول

~

~

ماما: شوفو الباب

رتاج: تو نفتح

تنهدت وهي متأكدة من الي خلف الباب .. خدت نفس وفتحت

زكريا: السلام عليكم

رتاج: وعليكم السلام تفضل💔

زكريا: من فيه الداخل

رتاج: عمي ورضوان طلعو يسألو ع الولد .. وشيماء الداخل

زكريا: كيف يسألو علاش وافقو ؟

رتاج: شيماء وافقت !

زكريا: كيييف ؟

اني طلعت ع صوتهم : اهلا زيكو خش

زكريا: شن الي سمعته هدا

اني: علاش شن سمعت

زكريا: كيف وافقتي

اني: وعلاش شن فاها لو قلت باهي

زكريا: تي هو صاحب بوك اكيده حايكون نفسه مستوعبه الفكره انتي 😠

اني: تو من عقلكم تحسابو بابا حايعطيني لي من ماكان

زكريا: عارفه شن الي تقولي فيه انتي

اني: عارفه ومستوعبه ... وهده الحاجه تخصني اني .. واني موافقه 💔

ولفيت خشيت

زكريا: تييييي😠

رتاج: خلاص هدي روحك

زكريا: استغفر الله😪 .. تي من امت ولت هكي

رتاج: خلوها ع راحتها هي تعرف مصلحتها

زكريا: تو نشوفو اخرتها لي وين بتوصل

رتاج: هي خش قعدنا فم الباب

ابتسملها وقعد يشبحلها ... خدودها حمرو ونزلت راسها

زكريا : تاخدي العقل وانتي متحشمه😉

سكرت الباب وتسندت عليه .. ياريت تحس بي الي داخلي💔 ... تعدب فيا وانت مش حااس💔

~

~

~

~

اخت مصطفى: ياماما كيف تبونا نغشو النااس كييف😠

امها: اسسس نقصي صوتك شن نغشوهم مانغشوهم

اخته : تي هده رابع مراء راهو 😠 .. وحاتكون نهايتها زي الي قبلها حاتطلب الطلاق اول ماتعرف

امها: نقصي صوتك عطيك داء😠 تو خوك يسمع

اخته: لي امت بااهي مش حراام عليكم بناات الناس

مصطفى: خيركم تعيطو

امه: ااه 😅 شيء شيء ياوليدي هي واتيين كان بترفعنا

اخته : اني مانبيش نمشي

مصطفى : شن هي 😠 ماتخلينيش نبدا فيك توا 😠 .. هياا قدامي الناس يستنو فينا

اخته: به به هيا 💔

ولبسو عباياتهم وطلعو 💔

#يتبع