مازلت طفلة

بارت 29

…البارت التاسع والعشرون ….
       {#مازلت_طفلة}
     #بقلم_الكاتبة_شمس

هناك خيط رفيع . بين الشعور بالامان والخوف..

شايفين لما تعيش براحه وطمأنينه مع اشخاص تحبهم .
وفجأة تجي موجه تاخذك نحو هاوية الخوف ولاأمان .

هذا حالنا .. من طلعنا الصبح . من القريه .
تقسمنا كل مجموعه بسياره .
ضلمنا بيتنا وتركنا الجدران الي مليانه بضحكاتنا ودموعنا واسرارنا ..
رغم كلشي صار الي .
بس اني قضيت اغلب طفولتي بهذا البيت .
وكبرت وصرت ام وزوجه وحبيبه . بهذي القريه .
وماجان من السهل اگدر اشوفها تتهدم او نتركها بهذا الشكل .
ترجيت لؤي يوصلنا بس ماقبل .
گال احاول بأقرب فرصه اجيكم .

مشيت واني عيوني عليه تترقبه .
حالته حاله .
جان لابس بنطرون وتشيرت ولابس حزام مال عتاد ورشاشته بيده .
عيونه حمر من التعب والنعاس .
والشباب كلهم محاوطين البيت والبساتين .
بس النسوان طلعن من القريه .

احنه اخذنا مرتضى. وطلعنا البيت اهلي بالناحيه .
رحبت امي بينا وگالت .
البيت بيتكم اخذوا راحتكم .
وحضرت الفراشات والريوگ .
گالت اكيد تعبانين ومانايمين ..

بس الحجيه ماقبلت . وگالت وين الي خلگ انام وارتاح وولدي هناك ..
وصدگ كلنا بحاله ماتسر لاعدو ولاصديق ..

اصيل گالت راح اروح البيت اهلي ..
گلتلها جا گولي الباجي وفاء ورجاء يجن لهنا خاف بيتكم مايكفي .
لان كلها راحت لهناك ..

للضحى . واجت باجي وفاء وبناتها ورجاء وولدها ونور .
گالت راح انزحم امج وهي هم شعندها خطيه .

گلتلها . صدگ تحجن خلي تسمعجن غير تكتل روحها .
حالجن من حالنا ماكو فرق ..

رجعتلي معاناة الحرب وانتضاري اللؤي ..
وخوفي عليه ..

اما فرقان .. گامت تبدع . من خبز وطبخ وتتفنن بالاكل .
بعدين تذكرت باجي وفاء عدنا .
طبعا تريد تراوي شطارتها العمتها ..
وفعلا باجي وفاء. انبهرت بيها .
وحتى گامت تگول شحلاته طبخ جنتي .
وهاي عود تستحي وتگوم من الاكل ..

ههههه هجم بيتها للباميه . هم تستحي عود ..
جاي احجي وياها بالمطبخ ودخل لؤي ..

گال .. جا يگولون مرتك تبجي وضايجه وتريد تموت شو تضحك وشمحلاها ..

طفرت وركضتله . حضنته . يمه هسا ردت روحي .
والله حتى اكل مااكلت .
وهسا من ورى هاي ضحكتني تتفنن بالطبخ الوفاء .

لؤي .. اي حقها ليش تضحكين غير راح تصير عمتها ..
فرقان .. هلا بالنسيب بس انت رافع معنوياتي ..
لؤي .. ولج شنو نسيب گولي اخوي ..

سمعت الحجيه صوته . طفرت . يمه هذا لؤي اجه .

كح وطب . محمل سوده عليه اشكال المسواگ .
گال واذا احتاجيتوا شي هاج فلوس خليهن عندج.
بعز الهوسه وحالهم يفكر بينا .

سلم على امي وامه والبنات وگال اني اروح .
بالگوه بقيته شويه .
تغدا وهو واگف وطلع .
رحت وراه للطارمه وانطاني المقسوم وراح .
بعد ماطبع ريحته ولمساته بيه .

ياربي ليش هيج كلما اگول خلصت وهانت . تصعب اكثر ونتفارگ ..

اني ماادري شبيه گمت اگوم واگوع . فراگ لؤي موتني وحتى الاكل مااشتهي .
واحس روحي رايحه ..ومالي خلگ ..

استمرت الايام ..
والولد وحدهم .. وكبر الخلاف بين العشيرتين .
لان ماخذين منهن ثلاث ولد .
وواحد منهم معدوم ..
يطلبون ثار .من الشيخ ورضا .
وكبر شكنا بأن همه الي ورى اغتيال الحجي ..

تدخلت هواي عشاير بينهم حتى تحلها .
وبعد بقت يم الله .
بس الي مضوجني فراگ لؤي عنا .
اشتاقيت البيتنا وغرفتنا .
وضحكاتنا ولمتنا ..
اووووف يربي انت الي تخلصها من يمك ..

حسين افندي . سوا الدرب زلاطه كل يوم رايح وجاي .
بحجه خاف محتاجين شي .
لو يشوف امه واخواته .
واني ادري بي يجي يشوف فرقان .
واخواته صافات وياه .
توته تقشمرني بالسوالف .
وجنات تاخذها للطارمه . وتوگف حرس وهذا يگعد يثرد سوالف وياها ..

بس لمن تكررت الشغله عرفت وراهم سالفه .
وهو من شافني طفر وبعد قلت جياته .
معقوله هيج اخوف .. هههههه

الشيخ بعدوه عن القريه .
وودوه الكربلاء يم عمامه هناك على ماتخلص سالفة الثار هاي ..

مر شهر واني حالي زادت . وشكيت بروحي حامل بس ماحجيت .
معقوله يعني صارلنا شگد متزوجين . وهسا يله اطلع حامل وبهاي الضروف ..

ماگلت الاحد.  وكل اليسألني .اگلهم لان مااكل .
وضايجه على لؤي ..

منا لمن فضت السالفه . والعشاير تدخلت .
والشيخ فصل يله سكتوا ..

اجه لؤي وخبرنا.  فرحنا حيل .
واجو اخذونا ..
امي خطيه تعودت على وجودنا . ضاجت من رحنا ..

رجعنا البيتنا .. وتعجبنا ببيت الشيخ مهدم ومضروب هواي .
گالوا يتقسمون ع البيوت بين مايرمموه .
واجت باجي وفاء النا .
والبقيه راحو البيت عمهم كاظم .
وابن عمهم هناك .
واخوت جدهم همات .
كلها رجعت لبيوتها .
بس اكثر بيت متأذي بيت الشيخ خضير .

رجعنا للبيت سوينا عليه حملة تنضيف وشغل .
تعبنا حيل .
جنت متلهفة التقي بحبيبي الليله .
رتبت غرفتي وعطرتها عبالك ليله عرسي .

دخلت اسبح . وشفت وگعت عليه ماده بنيه وكم قطرة دم .
خفت . وظهري وبطني موتني .
خابت امالي . گلت اذا مو حامل . ويمكن تأخرت من الهبطه والي صار .
ضجت بيومها كلش .

بس لليل الالم زاد .
ومااتحملت . گلت الباجي وفاء .
گالت هم وگع شي بعد .
گلتلها لا هو من العصر وبعد ماكو .
گالت دمشي نتأكد خاسرين خسارة .

دزينا على لؤي . وگلناله عندي مغص ببطني ونريد نروح للدكتوره .
ماگلناله شاكين حامل . ماردت يتأمل خطيه ..
گال حظري روحج بسرعه .
بدلت ونزلت ورحنا للدكتوره.
سوتلي تحليل ..
وبقينا منتضرين ..
#بقلمي_الكاتبة_شمس

…………………………………
طلعت النتيجه وگال ايجابي . طرت من الفرح . وهاي اول مرة افرح بحملي هيج .
ولؤي . دمعت عيونه من الفرح گال
هدوتي . منتظر هذا اليوم من زمان وكل يوم اگول باجر انقهرت عليه كل هذا وماحسسني فد يوم ع الطفل .
والي قهرني اكثر ..

الدكتوره . گالت الحمل مهدد بالاسقاط ولازم ترتاح .
وماكو لافراش . لادرج.  لاتعب .
خلال الاشهر الاولى وانطتني مثبت وعلاج .

ورجعنا . ولؤي الطريق كله يلوم بيه .
اذا تدرين بروحج حامل . ليش تتعمدين تشيلين ثگل واجيتي حاميه ع البيت .
وجبتيه من فوگ لجوه. ..ووووووو .
خبصني خبص واني ساكته ..
اخر شي ختمها . ادري بيج ماتردين طفل وتعمدتي تسوين هيج.

انقهرت حيل . صحيح بالبدايه ماردت . بس من عشگته تمنيت اجيب طفل منه ويشيل ريحته واسمه .

گتله . شكرا اذا هذا ضنك بيه ..

وضجت وماحجيت وياه . ضيع فرحتي بالطفل ..
وصلنا وبشر الحجيه . وفرحت.
وانطاهم تعليمات الدكتوره .
ويمشي ويوصي ..

حس علينه زعلت من حجايته .. واجه يراضيني .
بس اني بعت ثگل بالبدايه .
بس مشكلتي بسرعه ارضه مااتحمل على زعله .
بس عاتبته .
وگتله . لو اريد جان موتت الاطفال الي حملت بيهم من رجال مااحبه .وماسويتها وجبتهم وربيتهم وصاروا اغلى من روحي .. مو عاد طفل منك انت .

-ضحك گال يعني هيج تحبني .

اني .. شنو. احبك اموت عليك .

لؤي .. اويلي يااااابه 😘😘😘😘

الاشهر الاولى ماتعبت روحي .
لان اصيل وياجي وفاء والبنات موجودات .

وجنت كله ابقى جوه . بس بالليل اصعد من يجي لؤي .
ومرات هو يشيلني بسكته .
ومن يصعد . يقهرني يگلي يمكن سمنانه كتلتيني ههههه
ويدري بيه اضوج اذا گالي سمنانه ..
بعدني باول الاشهر ولااكل ولاشرب شبسرعه سمنت .

مشت الايام .. وبيت الشيخ كمل وكلمن رجع البيت .
واستقرت الاوضاع ..
والشيخ گال بعد هذا الحزن كله نريد نفرح .
فلازم نعجل بزواج حسين ..

استغربت من رجعوا مره ثانيه .
وخاصه من گالوا نريدها كلها خلال هذا الشهر . الخطبه والعرس .

امي ماعرضت ولاتشرطت .
وباجي طبعا ماقصرت . جابتلها كلشي حلو وراقي .
وخاصه بعد ماالسوگ نزلت بي شغلات حلوه ..

اني ماتركت فرقان .  وياها بكل شي ونعوش هم ويانا .
وگدرنا نلحگ ..
ولؤي يمشي ويوصي ديري بالج على روحج ولاتعبين ومن هذا الحجي خبلني ..

وكل ساعه يدعي على حسين . ويگله اذا صار شي بمرتي انت السبب ..

خلال شهر تزوجوا . وجان شرطنا تكمل دراستها .
ومايبطلوها ..
واجت فرقان يمي .
بس امي خطيه صار البيت موحش وحدها .

بليله عرسهم .. جانت نضال مگابله الغرفه وگاعده مدري شعندها .
ومسويه روحها هي امه وهي ابوه .
واول ماطلع حسين هي وابتهال . هجمن ع الغرفه .
ودخلنها بتحقيق .
الى ان باجي طلعتهن . وگالتلهن ليش تحرجن البنيه هيج مارضت عليهن .
حتى هديل مارضت عليهن . مدري هاي البنيه مااحسها اختهن ..

ماگلتلگم . هديل عندها اثنين صار من عدي ..
وي اولاد اختها صار عندها اربعه . والحلو بيها ماتفرق بينهم . وهادئه بشكل .
ماتشوفون ماذكرت الها احداث هواي .
ماتحب الطلايب ..
رغم هي وابتهال ببيت واحد بس ماتحس هاي اخت هاي .
وبدأت تتقرب الي وتحجي وياي بعد ماكانت مبتعده ..
جنت خايفه لايسون مشكله بيوم العرس .
بس الحمد لله عدت .

اني اخذت سونار وعرفت بيه بنيه . رغم خفت خاف لؤي يضوج .
بس عجبني من گتله باس ايده وخلاها على گصته وگال الحمدلله المهم تمام الخلقه ..

كبر بعيني كلش ..

بيوم اجاني .. لؤي . گال .
هدى اني قررت شي . بس من يجي وكته اگلج .

كتلني الفضول اعرف شكو .
گال مو هسا . جيبي بالسلامه واني اگلج .
خلاني حايره . وهو من يگول هدى بدون ميدلعني يعني شغله جديه وتخوف .
گامت حسبه تاخذني وحسبه تجيبني ..

فرقان تأقلمت ع الوضع .وهي من النوع الاجتماعيه بسرعه تاخذ ع الناس وتعاشرهم .
بعكسي ..

بس هي من النوع الماتسكت وترد ..
وهنا المشكله .
نضال تدورلها على زله .
وهي ماتسكتلها .
واحسبوا كل يوم البيت مشتعل بالمشاكل ..
واسمنا اني ولؤي هناك .
صحيح هي نضال ماتگعد راحة ..
ومع انه هي كبرت ولازم تعقل وتلتفت لزياراتها وصلاتها وقرأنها .
بس الظاهر اكو من يشعللها .
يجي يوز ويطلع مثل الشعره من العجين .
جانت اكو حيه خفيه تلدغ وتضم راسها .

بتول ..
الي جانت سبب المشاكل كلها .
ومره شافتها جنات تطلع من غرفه نضال ..
وبعدين نضال تهمت فرقان بايگتها .
لو ماجنات تشهد وبعد ماعدي ضربها البتول .
جان مااعترفت ..

من كثرت المشاكل . حسين قرر يطلع من البيت .
والشيخ رفض .
وكلها تلوم بفرقان بأنه هي تريد تعزل ببيت وحدها ..

وخاصه بعد ماحملت فرقان . وصارت الروحه والجيه صعبه عليها للناحيه ..
لان مدرستها هناك ..
اتفقوا يگعدون هاي الفترة عند امي ..
على ماتجيب وتخلص الدوام ..

وبعد حجي وكلام يله وافق الشيخ . لكن بصوره مؤقته مو يستقر هناك للابد .

وهنا الفرحه ماسايعه امي ..
رتبت مكانهم .
وجابوا غرفتهم نصبوها . واستقروا .
واني هم ارتاحيت لان .امي ماتبقى وحيده
واكو رجال يحميهم ..

اني الحمل متعبني كالعاده . وشقاوة لؤي متعبتني اكثر
خاصه بعد ماوضعي تحسن .
وسمحتله الدكتوره يتقربلي ..
جان فرحان ومامصدگ ..
وفرحته الاكثر من وضعي استقر وراح تجي بنته .
اقصد شريجتي من هسا مفضلها عليه 😔
#بقلمي_الكاتبه_شمس
يتبع ..