مازلت طفلة

بارت 4

….البارت الرابع….
  {#مازلت_طفلة}
#بقلم_الكاتبة_شمس

واني افكر ببنيتي وشلون منعتني اروح وياها ..
تگلي احنه موجودين يمها ماكو داعي ترحين ..

اعرف بنتي ماتگدر بدوني وعلى فراگي ..
بعدهي صغيره ع المسؤوليه والزواج ..
بس هاي قسمتها ومااگدر اعترض ..

اندگت الباب دخل الحجي ..
شلونج ام هدى ان شاء الله زينه ..

هلا بيك حجي الحمد لله بخير اذا هداوي بخير .
باوعتلي وابتسمت ..

التفت عليه . وانتي هدى شلونج اليوم .

هزيت راسي زينه ..

دزيت الولد جابوا العلاج .. اتريگي واخذيه والتزمي بي .

جاوبته ب اي ..

هو اخذ كم حاجه من الكنتور .. وترخص وطلع ..

باوعتلي امي .. مبين خوش رجال بلكي يصونج ويحافظ عليج ..

سكتت ماجاوبتها ..

اجت توته جايبه الريوگ ..
گعدنا اني وامي تريگنا . گيمر عرب ومربى وخبز حار .
امي اكلت شويه . گالت هاي الخاطرج اكلت مااگدر معدتي تهيج عليه .

خلصت اخذت علاجي . وتذكرت العلاگة مال فواكه .
گمزت من مكاني جبتهن واجيت .

هاج يمه ذني ..

شنو ذني ..

هاي فواكه الاخواتي اخذيهن . بحياتنا ماضايگيهن طيبات .

لا يمه لا .. شيگولون عليه من يشوفوني ماشايفه وجاي ابوگ منهم اكل ..

-ليش تگولين هيج يمه هاي حصتي وضميتهه الهن ..

بالگوه اقتنعت تاخذهن .. وضمتهن وهي خايفه وتتلفت خاف واحد يشوفها عبالك صدگ بايگه منهم ..

بعدين گالت .. راح اروح اخواتج وحدهن ..
حضنتها اريد اشبع منها ..

يمه حبابه ابقي اليوم يمي .

عيب يمه ناس غربه شيگولون عليه ..

يمه جا شلون تعوفيني وحدي عند ناس غربه ماتخافين عليه .

ولج يمه هذا صار بيت رجلج . يعني بيتج . لاتخافين وشفت البنات شلون يحبنج .

اي صحيح هن حبابات بس عمه نضال مو مثلهن اخاف منها .

لاتخافين هداوي صيري سباعيه وارفعي راسي بيج لاتخلين زله عليج ويحجون علينا الي ماعلمناج .

گامت توصيني وتنصحني . صار الظهر اترخصت وراحت .
الحجيه ام رضا اخرتها ع الغدا بس هي ماقبلت .

راحت امي واخذت روحي وياها .. اخذت الهوا الي اتنفسه بروحتها ..
امي ماتشبه اي ام . امي جبيره بالعمر والزمن ماكل عمرها وحيلها واديها مجرحه ومحروگه من الخبز والشغل .
بس رغم كل هذا بلمساتها الحنيه والدفو .
ابد ماحسستنا ببعدها عنا مثل الصديقه ويانا ..