هلو حبايب .. شلونكم مشتاقه كومااات
….البارت الثامن عشر….
{#مازلت_طفلة}
#بقلم_الكاتبة_شمس
الطريق كله مانشفت دموعي . تذكرت زواجي بالحجي وشلون جانت حياتي قبل .
معقوله راح ارجع النفس المصير ..
وصلنا للبيت . ردت انزل الغراض .
حسيت بواحد واگف يمي . ويگلي عوفيهن اني انزلهن .
رفعت عيوني وصرنا عين بعين .
طبعا اول مره اشوف لؤي وجها لوجه هيج .
شكله وووجهه احلى من الحجي وحتى احلى من مرتضى استحيت وماحجيت شي .
دخلت للبيت . تلگتني اصيل حضنتني وگالت واخيرا رجعتيلنا .
گلتلها تعودت اسوي كلشي علمود جهالي مو علمود حياتي ونفسي .
گعدت يم الحجيه شويه وبعدين گالت يلة يمه روحي الغرفتج رتبي غراضج .
گمت لگيت غراضي بالغرفه .
اصيل گامت ترتب وياي الغرفه .
گلتلها انتي حامل لاتشيلين شي اني اكملهن وحدي .
اصيل .. اوووه هذا كله الشغل والركضه على هاي .اصلا ذني لاشي بالنسبه للتعب والركضه ورى علاوي ورنونه .
گاعد نرتب بالملابس . گالت ولج هدى .
ليش ماتفكرين بنفسج وعيشي حياتج .
-يعني شلون
- يعني يافهيمه حركي روحج شويه وخلي لؤي مايشوف بس هدى . واگلبي هذا الزواج المصلحتج وعيشي حياتج .
-هههه ولج هو گعد حظي وي الحجي حتى يگعد وي لؤي وبعدين اكيد هو مجبور مثلي . لان هذا قرار خالج وهو مايگدر يكسر كلمته .
-اووووف منج . انتي جنتي طفله وماتفتهمين شلون تكسبين الحجي الصالحج . ولان اكبر منج بهواي يمكن ماتفاهمتوا .وفوگاها نضال جانت واگفة گبالج .
بس لؤي بعده شاب ومامرتبط . ووحداني واكيد يريد مره الي تحبه وتدللة ..
-ولج اصيل طالعه عينج . تدرين بيه مااحب اذب روحي على احد . وهذا الزواج مثل ذاك ماتغيير شي .
ولو ماجهالي مااتزوجت اصلا .
-دمشي يحظي امشي . باجر يجيب بتول على راسج اذا ماحركتي روحج .
-بتول شنو
-جا انتي نسيتي بتول محجوزه جانت ال لؤي.
ولؤي رجع وتزوجج . هم باجر يگول الشيخ الشرع حلل اربعه ويجبره ياخذ بنت عمه .
وتجي على راسج الاضبط من نضال . وكاحه والسان ماشاء الله..
خوفتني اصيل بحجيها . جا اني ارتاحيت من نضال تجيني نضال ثانيه .
خلصنا الغرفه . وطلعنا نسوي عشا . بدلت دشداشه وطلعت .
صاحتني الحجيه .
يمه هداوي صح انتي صرتي على ذمه لؤي .
بس هنا الناس تضل تحجي .
الحجي بعده ماطالع السنه مالته وكلنا بعدنا حزانه .
بغرفتج يم رجلج كلشي البسي .
بس بالبيت ومن تطلعين لاتذبين الاسود .
-بس اني نزعته عد اهلي .
-يمه احنه فككناج حزنج علمود العقد مايصلح تلبسين اسود .
بس هسا بأعتبار اخو رجلج وابو اولادج الميت مايصير تضلين بالالوان تفترين والبنات كلها لابسه اسود ..
ماحجيت شي . رحت طلعت دشداشه سوده ولبست .
وخليت الحجاب على راسي . وضجت من گالت بغرفتج البسي الرجلج . هو بس عقد شنو يجي يمي بكيف واحد هي ..
حضرنا العشا وكملنا .
اجو الولد بيومها نضال عند اهلها ماشفتها .
گالوا السلام عليكم
ردينا وعليكم السلام .
مرتضى . يا حيا الله من جانا اگول البيت منور . لان ام حمودي هنا .
-ههههه بنورك ابو علاوي .
احنه نضحك اني واصيل وومرتضى . وهي تگلي غير بنتي الجبيره شنو تگولين ابو علاوي .
ومرتضى يگلها اني ابو علاوي مااقبل يصيحولي ابو رنين .
ويتناگرون . وانتبهت على لؤي . واكف يشرب ماي ومامنتبه علينا . يسولف وي حمودي .
حسيته مغرور وشايف حاله . شلون يربي راح اتعامل وياه هذا حتى ميانه ماكو بينا . وهاي اول مره التقي بي هيج .
گعدنا على سفره وحده . والحجيه فرحانه بجيتنه .
وهذا حمودي خبلني مايريد طماطمه باللفه .
رگعد فككها كلها . واني استحي احجي وياه .
تالي گاله . لؤي .
تعال حمودي يمي اني اسويلك .
وهذا ابني عافني وراح يمه .
والله يربي يجي بالخلاف يركب ع الجتاف .
لؤي .. من وصلنا البيت اهلي ورادت تنزل الغراض .
اجيت يمها وگلتلها اني انزلهن .
دارت وجهها ومشت حتى ماگالت شكرا .
صدگ طفله ولاتگول ام .
بس عيونها موتني من تباوع بيهن منعسات .
ساعات انسى هي جانت مرت اخوي وعبالك اول مره اشوفها واتعرف عليها .
رحنا يم الشيخ ولد عمامي باركولي . لليل رجعنا شفتها لابسه دشداشه سوده نص ردن .
وبارز بياضها . تعجبت هي غير نزعته شو رجعت عليه .
بس الاسود حلو عليها .
سلمنا وردت عادي .
مااهتمت الوجودي . وماااحسها شايفتني .
بس زين تضحك وتسولف وي مرتضى .
بسيطه اني اعلمج على هذا الغرور عبالك اني الجبرتها تتزوجني .
وع العشا هم شلعوا گلبها ومااكلت . ردت اريحها من محمد .
گتله تعال يمي .
حسيتها تنرفزت على شنو ماادري .
..خلص العشا الولد طلعوا واني واصيل نضفنا المطبخ وگعدنا نسولف ..
-گالت اگلج لؤي هسا وين ينام .
-شنو وين ينام واني شمدريني ..
-يعني مو بغرفتج .
-ياخيه شنو بغرفتي .غرفته فوگ بعدهي وينام بيها .
دخلت ولدي نيمتهم . وردت انام ..
ااندگت الباب . رحت فتحتها .
شفته لؤي استغربت .
-اخاف نايمه وگعدت .
-لا بعدني محتاج شي
-اذا متصير زحمه اريد فراش بالاستقبال تفرشيلي .
-اي هسا .(رحت تجيبله فراش . واحجي بداخلي شگد جرئ يجي الغرفتي ويگلي فراش بس لاعباله اگله تعال نام بالغرفه .)
فرشتله وطلعت گال شكرا . گتله العفو من ورى خشمي ..
لؤي .. ههههه بسيطه يهدوه .. احجي بداخلي
مرت الايام واني ولؤي مثل الفاره والبزون ..
هو شايف نفسه وبتأمر ومصدگ هو رجلي .
واني مامنطيته وجه واصده .
#بقلمي_الكاتبه_شمس
…………………………………… .
وهو صارت عنده عاده افرشيلي وهو غرفته فوگ .. لو ينطيني ملابسه ويگلي اذا متصير زحمه اغسليهن .
وكلها بجهه واولادي بجهه وين مايروح وياه .
لو هذا حمودي حتى بالليل يگلي افرشيلي يم عمو بالاستقبال .
ويحضنه وينام .
ماادري ليش احس بغيره منه . لان متعوده اولادي مايردون غيري .
حتى ابوهم قبل ماينامون يمه الا يمي .
وهسا لؤي صار بالنسبه الي منافس .وگمت اغار على جهالي منه .
نضال من اجيت للبيت بعد ماتجي . بقت عند اهلها .
واخر مرة شفتها بي وشافتني لابسه اسود .
گالت مسويه نفسج حزنانه وانتي ماصدگتي لؤي عقد عليج ..
بس صوجي اني الي خليت بنت الفلاح تستولي على ولدنا ..
دخل لؤي .. گال شكو شنو هالصياح .
نضال .. ماكو شي بالعافيه عليك مرتك .. ماادري شلون الك نفس وهي جانت مرت اخوك ..
لؤي .. احترمي نفسج شنو هالحجي .. جا شتردين نعوف ولد اخونا ..
نضال . ومنو گالك عوفهم . جيبهم هنا وربيهم الا تعقد عليها .. اخذوا الجهال وهي تشوف حياتها مالنه علاقه بيها .
اني سمعت تخبلت ..
گلتلها . ومنو گلج انطيكم جهالي . ولاعبالج اني ميته ع ولدكم لو مو جهالي مستحيل ارجع لهنا مرة ثانيه .
شنو شفت غير بس القهر والظيم وياكم .
اتهسترت ومااتحملت حجيها من گالت اخذوا جهالها .
وطلعت كل الي بگلبي وفقدت ونسيت كلها تباوعلي .
صارت عيني بعين لؤي . شفت عيونه تجدح نار من الغضب .
گال اخذي ولدج وادخلي للغرفه بنتر .
اخذتهم ودخلت وخليته يحجي وي نضال . واني مستحيه اول مره اطلع هيج صوتي گدامه .
اوووف ياربي هسا شيگول عليه لو شياخذ نضره عني .
بقيت اكل بروحي اكل .
اجت اصيل يمي . وگالت والله بيج حظ من سكتيها .
هدى . ولج شنو بيج حظ ..شگد عيب هسا شيگول عليه لؤي اوووف شلون راح اطلع گدامه بعد .
اصيل .. عيني عيني بدا الخجل .
اوووه ولي مني ادري بيج راح تبدين .
وين الحجيه مااجت .
اصيل . لا بعدها عندها واجب مااجت .
-خلينا نطلع مدام هاي راحت .
طلعت ادور على ولدي بالطارمه . ماكو . گلت بس لاطلعوا وهذا صفاوي يمشي على وجهها .
مديت راسي من الباب .
اباوع على حمودي اريد اوصي على اخوه .
مااشوف الا لؤي صار گبالي . طبي جوه .
يمه فزيت . دخلت بسرعه اجه وراي .
-شعندج ماده راسج .
-هاا ادور على صفاوي لان يمشي على وجها واخاف يروح جوه البساتين .
-الولد يمي گاعدين هناك يم المضيف . المره الثانيه اذا طلعتي راسج مايصير خير .
-ماحجيت عفته ودخلت .
-مو جاي احجي وياج ليش تمشين .
-يعني شأحجي اذا انت بس تهدد وترزل. لو صارت بيكم عاده ياهو اليجي يرزلني ونزلت دموعي مااتحملت .
اوووف يدمعاتي دومجن فاضحاتني ..
لؤي . ههههه ضحكتيني بله ام وعندج اثنين وتبجين .
جا وينها الي مطلعه السانها على نضال مساع .
هدى . لا والله اني مو هيج . بس هي من يوم الجابتني لهنا وزوجتني الحجي لسا بس تذل بيه .
واتحملت بس من توصل الجهالي لا مااسكت .
لؤي . اي طبعا ادري بيج قابل انتي بحال ولدنا ..
ضحك بمكر وراح ..
ماافتهمت حجيه بس يمكن زعل على مساع من حجيت وي نضال .
دخلت واصيل تضحك .
گلتلها دسدي حلگج تتمضحكين . على ساعه تطلگين من الضحك .
اصيل .. اي علواه هيج واطلگ وارتاح ولج متت .
هدى . اي دكافي سويتيهم واحد فوگ الثاني ارتاحي شويه .
اصيل .. جا هو بيدي . غير حماج مايشبع .
هههههههه ضحكنا اثنينا .
لؤي .. ولك موبيدي صحيح صار شهر من شفتها وعرفتها بس من اول يوم جذبتني . اني الي حلفت ماتهزني مره بعد .
بس هسا عيونها وبرائتها غير شي . رغم عندها اثنين ولد وعود كبرت بس اشوف طفله بعيونها .
ادري جانت مرة اخوي . بس هسا مرتي واني اشوفها تمشي گدامي ومامهتمتلي ولاشايفتني .
يحترگ گلبي واضوج .
(جاي احجي وي عدي . اي عدي ابن عمي وخوي الي فرقتنا مره بس بعدين بمرور الزمن عرفت ماكو داعي اخرب وياه وهو انجبر مثلي وهسا صارت مرة وصارت اخت الي ولازم انساه .)
من رجعت اتصالحت وياه وگتله انسى الماضي مثل مانسيته ومرتك صارت اختي .
ورجعت اسرارنا سوه . وجاي احجيله على هدوة الي هدت حيلي من اول نضره الها . بعيونها المنعسات والذايبات .
عدي .. يااخي احجي وي الحجيه وگلها اريدها تصيرلي مره .
لؤي .. مستحيل اسويها. اذا ماتجيني هدوه برغبتها مااوصللها ولاتصيرلي مره .
مااريد اجبرها . واني احسها مجبوره عليه وعلى رضا قبلي .
تگول الي مبقيني اولادي .
اني اريدها يجي يوم تگلي اني باقيه علمودك .
عدي .. اوووه جا انسى اكو مره تحجي هيج اذا مو انت تخليها تحجي .
لؤي . خليها عليه اني راح استوها على نار هاديه . واخليها تصير هدوتي ..
عدي .. ههههه خرب يومك شگد مستوي . هم صدگت يجي يوم واشوفك هيج ..
لؤي .. صدگ خويه صدگ . بس لو الگي ابني واجيبه يصير كلشي مثل مااريد .
عدي .. ماكو خبر عنه لسا .
لؤي .. لا والله ماكو بس مثل ماگتلك مااريد احد يدري الى ان الگاه ..
#بقلمي_الكاتبه_شمس
يتبع…