مازلت طفلة

بارت 7

….البارت السابع….
  {#مازلت_طفلة}
#بقلم_الكاتبة_شمس

اجه ابوي وعيونه تجدح من الغضب ..
گال ماعندي بنيه تجي زعلانه ..
گومي روحي وي حماتج وحماج .

طلعت لگيت باجي وفاء ..
امي حاولت تفهمه . بس هو سكتها وغلط عليها . گالها هي هاي تربيتج تحرضيها على الغلط .

خطيه انحرجت گدام باجي وفاء ..
دور رجع عاط بيه . طفرت من مكاني من الخوف بسرعه اخذت عباتي وطلعت من غير مااحجي .
حتى مالحگت اودع امي واخواتي ..
بس الطريق كله ابجي . ماعندي احد يحميني ويخاف عليه ولازم اتحمل كل الي يصير واسكت .

باجي وفاء شگد رادت تفهم شنو الي صار .. بس غير اني بالاول افهم يله ..
وحتى لو حجيت من يصدگني ويجذب عمه نضال وهي بنتهم .

وصلنا البيت الحجي ..
واول مره اشوف معصب هيج . هو عمره يمكن نهايه الثلاثينيات وعنده لحيه وشوارب ونضراته حادة .
رجليه من يمهن گام يرجفن .
جانت الحجيه گاعده وعمه نضال .
صاحني . گال تعاي هدى اگعدي ..
گعدت بصف الحجيه .

-رضا .. منو الي سمحلج تطلعين من البيت ..

-سكتت .

-احجي اكو مره تطلع من بيت رجلها من غير ماتگله .

-هاا مو عمه نضال ..

-نضال شنو .. هي الي گالتلج اطلعي .

-لا .

-جا منو احجي .. امج تطلع من غير ماتشور ابوج .

-لا .

-اذا تعرفين لا وهي تعرف . ليش اخذتج وراحت ومن غير ماتشورني . والحجيه مجلبه بيجن وماقابله تبقين .

-باوعت للحجيه .
گالتله يمه مو هيج الحجي . اني جلبت بيها لحتى نكسر الشر لان مرتك تحجي وهنه زعلن وحقهن .مرتك طلعتهن حراميه .

-نضال .. لا على بختج عمه سمعتيني گلتلهن حراميه .
لو امها ملفلفه غراض جوه عباتها .
وخلني اشك . مابيها شي من تنطي الامها بس مو بالبوگات تنطيهن اكل وحتى صبحتها منطتها الاهلها من غير ماتگول .
غير نعلمها ونوجها احسن مماباجر نلگي غراض البيت كلها ماهنه ..

حسيت غصه بگلبي من حجيها تحجي بهدوء وهي الصبح فضحتنا واحتقرتنا بالاهاين والغلط .
وهسا تتهمني ابوگ غراضهم بعد كم يوم .

بقت دموعي تنزل على خدي من غير مااحجي .

رضا .. انتي هم غلطانه نضال المفروض تحجين بهداوه وتفهميها مو بصياح . ترى امي سولفتلي كلشي .

وباوع عليه . وانتي هدى صح اني اعزج وصرتي ام ابني بس مو معناها تتصرفين على هواج .
اني ماامنعج تساعدين اهلج وتنطيهم . بس بعلمي مو بالختلات .

حزت بگلبي حجايته .. گتله حجي اهلي صحيح ماعندهم بس مو حراميه والفلوس الاخذتهن من صبحتي دين وارجعهن ان شاء الله.

رضا .. لا هدى فهمتيني غلط . هي صبحتج وبكيفج تتصرفين بيها . بس لاتسوين شي من. وراي . مااحب التصرفات الغامضه حتى ماتجيبين شك الروحج ..

بهاي اللحظه اتمنيت الگاع تنشگ وتبلعني ..
صحيح طفله بس افهم حجيهم وتجريحهم الي بطريقه غير مباشره .

ماعندي حل غير اسكت واتحمل .. لان هم اعلى مني بكل شي بالمال والجاه . اكيد راح ابقى صفر بالنسبة الهم .
وحتى الحجي . مستحيل ينطي ببنت عمه وبنت الشيخ علمود وحده عرفها البارحه ومجرد ارنبه تجيبله اطفال يعني مااعني اي شي الة ..

كرهت روحي وكرهت الطفل الي ببطني واتمنيت بلحظه كون مايصير عندي اولاد مثل نضال حتى يرجعوني الاهلي وارتاح ..

صعدت للغرفه واني مهمومه واجر وراي خيبات الامل من ابوي وشلون انطه بيه للحجي وكلامه وتجريح نضال .
اعرف اني بالنسبه الهم لاشي ولازم اتحمل واصبر .
الى ان انطيهم ابنهم واعوف كلشي واروح لان ادري مادام هذا الطفل ببطني مايخلوني بحالي.
مااريد لافلوسهم ولاشي منهم بس يعوفوني ارجع الاهلي ..

نمت ودمعتي على خدي .. حسيت بالليل اجه الحجي وگف فوگ راسي وباوع عليه وتلمس بطني وراح .

گعدت الصبح . وكالعاده نفس الشغل والتعب ومااگدر احجي . واشوف بعيون نضال الفرحه والشماته ..
وكم مرة اجت وگالتلي لاتخلين راسج براسي تطلعين انتي الخسرانه ..
كلامها صحيح تعرف،شلون تگلب الحجي وتطلعني غلطانه ولان ماعندي ابو الي يسندني اضطريت اسكت واتحمل ..

ومرت الايام على هيج .. من تشوف الحجيه تگلي ارتاحي لاتشتغلين . ووراها تكرب عليه ..

الى ان بيوم . اني نايمه الظهر .
دخلت عمه نضال . گالت .
هدى اگعدي . هدى

فتحت عيني وشفتها گبالي . ها عمه

وعمامه . موگتلج لاتگولين عمه .
گومي الحجي عنده خطار ع العشا اكو دجاجات طلعتهن ع السنگ ملحيهن واشويهن ..
واني راح اركب تمن ومرگ ..

بقيت صافنه بوجها . بس اني مااعرف اشوي دجاج گلتلها
نضال . دگومي گومي تعلمي قابل تبقين عمرج كله ماتعرفين .

گمت . ونزلت للمطبخ .
خليت الدجاجات بالماي الحار .
حتى يحلن جامدات . وبعدين ملحتهن وخليتلهن خل وبهارات مثل ماگالتلي .

بقت شلون اخليهن بالفرن واشغله امي جانت من تحصل وتجيبلنه دجاجه لو سمجه تشويها بالتنور لان ماعدنه فرن هسا هذا شلون اشغله .

ردت اودي على توته بلكي تعرفله . بس گلت خاف تتأخر وعمه نضال تحجي عليه .
رحت للحجيه لگيتها نايمه خطيه .
رجعت گلت خلي اشعلها وامري الله .
هذا كله واني فاتحه الغاز مال فرن وماادري . ومتردده بين اشعل وبين لا .

اخر شي طفيت القنينه گلت اگل العمه نضال بس تشغله الي .
#بقلمي_الكاتبة_شمس
…………………………………………………
رحت صحتها واجت .
وگامت تحجي لو شاويتهن اني احسن الي .
بعدهي ماشخطت الشخاطه .
وطگ الطباخ بوجهها واني جنت يمها .
حسيت بس النار اشتعلت .

ومااشوف الا دشداشتي لهبت نار .
التهيت اعيط واگمز ونسيت روحي حامل .
وطلعت للطارمه اطفي بيها واصيح .
لميت الدنيا علينا .
وعمه نضال تصيح واديها محترگات وشعرها لاهبته النار .
وتگول رادت تحرگني اتعمدت صاحتني افتح النار .

والله ماادري اني اتذكر طفيت القنينه بس يمكن الغاز متگدس بالفرن والله ستر مامشتغله القنينه جان البيت كلها احترگ واحنه وياه .

التمت كلها عدنا . اني مابيه شي بس اكلت هبطه وابجي من الخوف .
وعمه نضال اخذوها للمستشفى لان اديها احترگت .

الكل يريد يعرف شنو الي صار . وبعد مااتهمتني اني حرگتها . احس الكل بنضراتها اتهام .

واني احلف واگلهم والله ماادري طفيت القنينه وصحتها لان مااعرفله وماعدنه مثله حتى اعرف اشغله .

الحجيه انطتني العذر . وگالت اي يمه مصدگيج قدر وصار وهمزين الله ستر عليجن وعلى الي ببطنج .

الحجي جان ماموجود . من اجه وگالوله تخبل .
وسألني خو ممتأذيه والطفل شلون .
گتله مابيه شي . بس هو اصر ياخذني للمستشفى يشوفون نبضه .

وكلف اخواته يطبخن العشا .بقلمي الكاتبه شمس

رحنا اني والحجي والطريق كله اتذكر وابجي.  لو صدگ محترگين وميته اني . شنو شفت من حياتي .
ياربي ليش الضيم لاحگني من صغري .

وصلنا للمستشفى .. دخلوني للطوارئ .
فحصتني الدكتورة وشافت نبض الطفل .
گالت نبضه طبيعي ومابي شي ..

طلعت . گال ها بشري . گتله ماكو شي .
دخل للدكتوره يتأكد ..
گالتله عيني بنتك زينه وطفلها زين لتخاف عليهم .

هو سكت ماحجه ولاگلها هاي مرتي .
واني هم بلعت الغصه الي بگلبي ومشينا .

گال خلينا نروح نشوف نضال شلونها .
باوعلي گال خو مامتأذيه هواي .

-اديها اتأذت وشويه شعرها من گدام لهبته النار .

وصلنا للمستشفى . گال خليج انتي بالسياره .

اخذله نص ساعه وطلعوا كلهم ..

گالها الحجي اصعدي ويانا .
شافتني گاعده بالصدر وهي اتخبلت ..

التفتت عليه .. هاي شعندك جايبها مو كافي حركتني هي جايه تتشمت بيه .

رضا .. عيب نضال شني هذا الحجي . جبتها للمستشفى نشوف الطفل ..

نضال .. هو هذا همك الطفل . بعد لو نضال تموت ماتهمك .

رضا .. دصعدي فضحتينا .

نضال . مااصعد اذا هاي بالسياره وگاعده بالصدر فوگاها ..

الحجي گالي  انزلي اصعدي وي مرتضى .
صعدت وي مرتضى . وجانت ابتهال صاعده وياه اختها .
ولزمتني بالحجي والتحقيق شلون احتركت وليش وانتي وين وكذا .

مرتضى يسكت بيها وهي ماتسكت .
تالي گالتله خايب شمالك تسكتني خايف على مشاعرها شمالكم فكيتو حلكم على هاي الزعطوطه شسوتلكم .
اختي رادت تموت من وراها وانت تگلي اسكتي .

باوعلي مرتضى من المرايا وهزلي براسه . معناها معليج بيها .
واني هم ساكته وماحجيت .

وصلنا للبيت كلها تلگت عمه نضال وخايفه عليها واني حتى محد سألني شبيج ..

گالت الحجيه روحي ارتاحي ..
صعدت للغرفه مالتي ماحسيت على روحي من غفيت .
طفرت لگيت الساعه 12 ونص . حسيت روحي خرت من الجوع ..
ومحد ذاكرني بشي .

وينج يمه جنتي ماتاكلين اذا ماتأكلينا ..
واذا نمنا بلاية عشا .. تگعدنا من نومنا وتعشينا ..
وهسا الجوع كاتلني ..

نزلت كلها نايمه ..
دخلت للمطبخ فتحت الثلاجة . لگيت دجاج بس بارد ومااعرف احميه .
لفيت لفه وخليت وياه خضره وجاي اكل دخل مرتضى .

گال اني هم جوعان ماكو لفه ..

-گتله اخذ لفتي بس الدجاج بارد مااعرف احميه .

مرتضى .. لا اكلي انتي مااتعشيتي اني راح اسوي .

اخذت گلاص ماي وردت اطلع ..
گال هدى .
التفتت .. گال شلونج هسا

-زينه
-لاتهتمين للحجي . كلنا انعرفج انتي ماغلطانه .

-هزيت راسي .وردت اطلع . صارت گبالي عمه نضال تخوزر .

ماحجيت . عفتهم وصعدت .
گعدت ع الجربايه واكل .. دخلت عمه نضال .

-شعندج ولج وي مرتضى .

-غصيت .. ماعندي شي .

-جا شني تسوين وياه بالمطبخ .

-مااسوي شي . اني نزلت جوعانه وهو هم دخل ياكل سويت لفه وطلعت .

-ولج سمعتكم تبسبسون شني ماافتهم .

-والله عمه ماعندي شي وهو مثل اخوي حاسبته .

-شوفي ولج هاي مو اول مره اشوفج تتختلين وياه المره الثانيه اذا شفتج اگل للحجي وهو يتصرف وياج ..

طلعت .. ذبيت اللفه من ايدي سدت نفسي بحجيها .
وبقيت خايفه منها لاتذب عليه تهيمه .
شلون بيه والله ابوي يموتني ..

اني نايمه من وكت بعد مااجاني نوم ..وفكره تجيبني وفكره توديني .
حسيت روحي تريد تطلع . ومعدتي اذتني .
ركضت للحمام . ذبيت كلشي ببطني .
والليل كله معدتي توجعني .
ومانمت اتگلب .. تالي سمعت صوت عياط وهوسه طفرت من مكاني من الهبطه .

نزلت اركض وشفت كلها تتراكض .
ركضت ع الحجيه عبالي بيها شي .
لگيتها تلبس بجواربها .
ارتاحيت .
گلتها يمه شكو .

گالت بسرعه روحي بدلي ثوب اسود الحجيه ام خضير توفت .

الله يرحمها هي عجوز داخله بالعمرين .. وهمه خبصوا الجو والعياط لوين وصل ..

صعدت واني حايره ماعندي شي البسه اسود.
تالي تذكرت عندي صايه البسها للمدرسه باقيه وي ملابسي .
لبستها ونزلت ..
#بقلمي_الكاتبة_شمس
يتبع…

  
………………………………… ..

مساء الفل حبايب
اعذروني لان البارحه مانزلت بس ممتواجده بالبيت
وهسا فرغت نفسي حتى انزل الكم البارت
اعذروني حبايب من التقصير
احبكم 😘😘