….البارت السادس….
{#مازلت_طفلة}
#بقلم_الكاتبة_شمس
من گال دكتور التحليل .. النتيجه ايجابيه .
مافهمت بالاول ..
بعدين گال حامل .
احس روحي راحت مني . بسرعه رفعت راسي للسما ودموعي نزلن . مدري اعاتب ربي مدري اشكيلة همي .
الك بيها ارادة يارب . بعدني طفلة واجاني حمل اني مو بگدة ..
رجعنا للبيت والحجي طاير . بعز الحصار والناس حسرة عليها الخبزة تاكل .
واهلي منهم .
وهو يطش فلوس . وحار شنو سوه ..
واشترالي اشكال حلويات واكل .. ووحدة مثلي المفروض تفرح .
لان بحياتها ماشايفه هيج دلال .
بس ماكو فرحة بداخلي . حتى من اريد اجاملهم واضحك واشاركهم فرحهم .
مااگدر ..
بيومها الحجي سوه عشا الوجه الله . وعزم اهله وعمامه كلها ..
واحنه گاعدين ع الاكل .. اشوف كلها تخطط للطفل وين يربى ووين يصير . وعبالك اني مالي دور ..
ابتهال تگل الاختها ..
ولج نضال اذا جابت انتي ربيه هاي شمعرفها تربي بعدهي طفله ..
اعاين واحجي بداخلي ..
اي صحيح اني طفله . وبعدني ماشبعت من طفولتي .
اريد العب واركض وافرح حتى بالخبزه اليابسه الي جنه ننگعها بالمي وناكلها اني واخواتي .
راضيه بكل شي . بس رجعولي طفولتي الي جاي تسلبوها مني ..
عمه نضال بداخلها ضايجه وتعاين عليه بنضره تخوف .
بس گدامهن تضحك وتخطط شتجيبله وشتسويله عبالك ابنها مو ابني ..
بداخلي .. اي ميخالف مو همه يردون طفل خلي ياخذوه مااريده بس يرجعوني الاهلي ..
جاي اكل والحجيه تفلس وتخلي گدامي .
جذبتني هديل . شلون تأكل ولد رجلها او ولد اختها .
خطيه يكسرون الگلب رغم هي خالتهم بس احسهم مثلي اني هم انحرمت من امي وحنيتها ولو كلشي يسولي مايعوضون حضن امي ..
راسي داخ من الهوسه وعمه نضال وابتهال خابصات الجو وهنه يتشابهن بالشكل والحركات والحجي .
حتى نضرتهن الي تخوف .
بس هديل لا .. مبينه هادئة . ماتحجي ودووم ساكته .
گلت الحمد لله وگمت . للمطبخ اساعد توته والبنات .
بالعزايم الامهات الكبار هنه يطبخن ويحضرن وبناتهن الي بعمري عليهن المواعين والتنضيف .
جاي اغسل المواعين دخل الحجي شافني .
هاي شتسوين هدى . عوفيهن وروحي ارتاحي منا لمن تجيبين الورد ماتشيليه فاهمه .
حجاها وهو معصب ويعاين ع البنات .
لاتخلنها تشتغل ..
غسلت ورحت . اجت نضال وراي گدام الكل .
ولج هديوه مو بدت حركات التمسكن مالتج . گدام الحجي تشتغلين وتخليه يحجي .. محد عاتب عليج . بناتنا هواي ومامقصرات .
صدگ حزت بروحي . واحس الكل عينه عليه . شگد حاولت اجمع دموعي ومااخليهن ينزلن . بس دووم مفشلاتني .نزلن غصب عني .
الحجيه گامت تحجي . البنيه ماتتحمل ليش تعامليها هيج .
نضال . ياعمه الي يشوفج يگول اگومها بسطه واگعدها بسطه . لو مااني ماصارت هي بهذا البيت وهسا تقشمركم بدموعها .
حجايه منا وحجايه منا. صارت عركه بيومها .
والحجي گام يحجي . يگول اول فرحة بحياتي ماخليتنها تكمل بمشاكلجن .
اروح وي الشيخ للمضيف احسن .
عافهن وطلع ..
النص الليل الكل راحت ومحد بقى بالبيت . والحجيه تنام من وكت .
واني بقيت وحدي ضايجه .
رحت گعدت بالحديقه ..
جانت الدنيا گمريه والگمر مكتمل وحلو .
صحيح الجو بارد . بس حرارة گلبي وشوقي الامي وحضنها دفوني .
گمت ابجي واشكي لربي واعاين ع الگمر .
سمعت حركه ..
طفرت عبالي بزونه… .
ضحك مرتضى . ههههه هيج اخوف .
-لا عبالي بزونه ..
-همزين بزونه ولا واوي .
-ليش منين اكو واوي .
-انتي وين عايشه . هنا حتى ذيابه اكو .
-لا عليك الله .
-والله شتردين حيوانات اكو يمنا . ماتشوفين من نطلع سلاحنا ويانا .
-يووووه مالي خلگ مداهرتك وياي .
-شبيج تبجين منو مبجيج .
-محد بس اشتاقيت الامي .
-اذا تردين باجر اوديج الها .
-لا مااروح عمه نضال ماتقبل .
-اذا ماترحين اجيبها الج وهم حتى تبشريها .
-اگلك انت مو عندك دوام ..
-اي بس يوم اداوم وعشره لا مالي خلگ .
-ليش انت بيا صف .
-بالخامس وصار سنتين ماطالع منه .
-هنيالك .
-عليمن هنيالي. اصلا مااحب المدرسه بس لوما الشيخ والحجي جابريني .
-حلوه الدراسه بس ابوي حرمني .
-ودور اجيتي لهنا . ماعدنه البنيه تكمل .
-ليش عود .
-هذا عقلهم . بس اني اختلف . سبورت .
-والله انتو حياتكم عجيبه . سلاح وتحجزون نسوان من هنه صغار .
-هههههه سويتنا كلش . ترى احنه بس بالليل نشيل سلاح لان منطقه مفتوحه وخاف غريب يدخلنا والدوله تدري يعني مو بكيفنا .
ماخذين رخصه نحمي گيعانه والي يحيط بيهن بأدينا ..
-يوووه ماافهم هذا الحجي خليني اروح انام احسلي ..
گمت وشفت عمه نضال تعاين علينا من شباك المطبخ .
دخلت لزمت ايدي ..
ولج شعندج بنص الليالي وي مرتضى وحدكم .
ماعندي شي گاعدين نسولف .
ماعدنه بنات يگعدن وي الزلم وحدهن فاهمه .
سكتت وصعدت الغرفتي ..
ثاني يوم گعدت الصبح غسلت ونزلت سمعت امي تحجي وي الحجيه .
اخاف اني اتخيل .
بس هذا صوت امي .
نزلت اركض شافتني ضحكت وعيونها تغرغر دموع .
بهيده يمه بهيده .. الحجيه گالت .
حضنت امي وابجي وهي تبجي .
بالمبارك يمه گالولي حبله .
ضجت من حجت كلما اريد انسى يذكروني .
گلتلها اي واني ضايجه .
اخواتي ابوي شلونه غيرت الموضوع .
گالت الحجيه . اخذي امج وروحن الغرفتج وسولفن على راحتجن .
صعدنا للغرفه وهمزين عمه نضال ماشافتنا . ماتقبل نختل وحدنا بالغرفه ..
#بقلمي_الكاتبة_شمس
…………………………………………………
گالت شبيج يمه شو مافرحانه ..
يمه مااريد هذا الطفل دبريني شسوي .
ياا يمه على بختج ماتشوفين العالم مكيفين بالطفل ليش تحرميهم .
يمه واني منو الي . اني جاي اموت هنا احس روحي غريبه بينهم . فدوه يمه رجعيني يمكم .
يمه هي لعبه وارجعج . بعد صرتي بذمة رجال .
گعدت ابجي وهي تواسيني ..
ام هدى .. يمه ارضي بنصيبج وكسبي رجلج وعيالج مالج احد غيرهم . ابوج يموتج ولايقبل ترجعين .
ويگول فگريه عايشه بالخير وتتبطر .
هدى . يمه وين لگيتي ابوي واتزوجتي من دون الناس .
عبالك مو بناته مايحبنه ويكرهنا .
ام هدى .. هذا حظي غير . والاكثر من هيج يگلي شوفي بيت الحجي اذا يردون بنيه بعد الابنهم ننطيهم انعام .
هدى .. ياعزا يمه انعام خامس ابتدائي شينطيها . وبعدين هنا مايخذون ولاينطون الا الگرايبهم .
بس حظي مدري شلون شافتني عمه نضال وخطبتني .
ام هدى .. اگلج يمه ديري بالج على روحج ضهرج رجيج وانتي صغيره . مو تشيلين ثگل . خو ما تطلعين للزرع .
هدى .. لا يمه هنا مايخلونون نسوانهم يطلعن عندهم فلح وعمال تشتغل بالگيعان ..
ام هدى .. اووووف يله يمه اني هم يله اروح بعد مناك البيت فارغ . وعندي خبز للعالم وشغل .
رادت تطلع صحت وراها . يمه يمه اوكفي .
اخذت علاگة وخليت بيها فواكه وحلويات وانطيتها الامي
-هاج يمه هاي الاخواتي .
-يا يمه والله فشله كل مرة تنطينا شتگول العالم علينا .
-يمه خليهن جوه عباتج محد يشوف والبيت فارغ .
نزلنا . وصار گبالي مرتضى . ابتسم .
ابتسمتله ..
گتله شكرا ... بقلمي الكاتبه شمس
العفو . تدللين بأي وقت گولي واجيبها .
گالها يله خاله خلي اوصلج .
طلع مرتضى قبلها . حضنتها وبستها ورادت تطلع .
صاحت ورانا عمه نضال .
اوكفي اوكفي .. التفتنا عليها .
هاي شنو العلاگة الي جوه عباتج .
امي خطيه صار وجهه اصفر .
گلتلها عمه ماكو شي هاي اني انطيتها الاخواتي…
بعدني ماكملت جرتها من امي .
امي وجها صار يخبط الوان من الفشله .وهي عندها عزة نفس .
باوعت بيها .. ياااا والله عمي زين تاخذ من خيرنا وتنطي الاهلها . الله اليعلم بعد شتبوگين وتنطيهم ..
-اني مو حراميه واخذ منكم . وهاي حلوياتي مااريدهن انطيتهن الاخواتي مابيها شي .
-نضال .. اي گولي هاي طفله وماتفتهم . بس العتب ع الام الجايه مناك لهنا علمود تاخذ اكل من بنتها .
ولو معذورين فكر وين شايفين تفاح وحلويات لو باحلامكم ماتكلوهن ..
غثتني بحجايتها وضجت . اخذتهن من امي وشمرتهن عليها . هاج عمه مانريدهن مو قحط .
امي تبجي من الفشله ولفت عباتها وطلعت .
والحجيه اجت نركض تريد تعرف السالفه شني .
گالت عمه نضال . تعاي اوكفي اخاف هم ماخذه فلوسها وياج .
عاد اني مااتحملت . گلتلها يمه اخذيني وياج .
مااتحمل اشوف امي بهيج وضع .
صعدت اخذ عباتي .
صعدت وراي گالت وين الفلوس الي حصلتيهن من الواجبات .
صفنت بوجهها ماعرفت شنو احجي . اديه يرجفن ولساني ثگل . شگلها ابوي اخذهن . هسا تطلعنا حراميه صدگ
گلتلها ضامتهن .
نضال .. وينهن طلعيهن اريد اشوفهن . مو تاخذيهن وتطلعين .
دورت بالكنتور لگتهن حسبتهن گالت ذني قليلات وين الباقي .
سكتت
احجي يفگر انطيتيهن الاهلج .
هاا لا مو ابوي محتاج وادينهن مني . من يصير عنده يرجعهن .
ولج شيرجع بعد لغفهن وماصدگ .
اخذت البقيه مني وگالت يله اطلعي مثل ماجبتج حافيه اطلعج حافيه . حتى الملابس احنه جايبيهن ماتاخذين ولا شي .
اخذت عباتي ونزلت مهضومه ومكسوره .
شافتني امي .
گالت يله يمه امشي . اني بعد مااخليج هنا للذله .
الحجيه توسلت بأمي وگالتلها احسبيها عليه بس امي ماقبلت .
ومرتضى هم بقى يتوسل .
هدى هذا هم بيتج ولاتطلعين .
بس اني ماصدگت اجتني فرصه انهزم بيها وارجع الاهلي
صعدنا اني وامي والطريق كله .
مرتضى يحجي هداوي ميصير تطلعين المفروض تگولين الرجلج .
امي .. يا خاله وينه هو رجلها شو مرته اكلتنا حاصل فاصل . هاي اني هنا هيج سوت بهدى .
كل يوم شلون .
مرتضى .. والله ياخاله مااعرف شأكلج . بس هو من البدايه زواج غلط وممتكافئ .
امي استغربت وهمستلي . ولج هذا شماله يحجي هيج شنو غلط شيقصد .
شمدريني يمه اصلا بالي مو هنا همزين خلصت .
ام هدى .. ولج ياخلصتي . شيخلصنا من ابوج اذا شافج اجيتي زعلانه .
وفعلا . وصلنا للبيت . اني جنت تعبانه گالت روحي تمددي على ما اسويلج ريوگ .
طلعتي على لحم بطنج .
سوت ريوگ وتريگنا . وبعدين التهت تخبز واني وياها اساعدها . اشنگ العجين ( اكور العجين) .
للظهر شفت ابوي دخل .
گتله الله يساعدك يابه .
هلا بويه . ها اليوم هنا شكو .
ها . لا ماكو شي بس مو اني حامل واجيت يمكم ارتاح .
اي بالخير بويه . بس اكو وحده عايفه عز ودلال عيالها وجايه لهنا .. هو وين اكو راحه بالعوز هنا
سكتت وماحجينا لا اني ولاامي . وماگلناله زعلانه .
لليل اندگت الباب وطلع ابوي .
واني فرحانه بخواتي وجاي نلعب بالغرفه حيه ودرج .
سمعت صوت ابوي يصيح .
ولج ليش ماگلتي زعلانه . گومي اجه حماج واخته يردون ياخذوج .
#بقلمي_الكاتبه_شمس
يتبع…