#نجماتك_رتبه_قلبي
البارت 11
#Rehab
علي،، كاعد يم رنيم ... واحجي عليها متغيرة كلش ... حقها الي صار مو قليل ... بس لازم اخليها تتجاوز هاي المحنه
ماحسيت إلا وهي واكعه ... بيدي كمت اطكها ع وجهه ... ولج رنيم عمري ... اكعد بيها وماتكعد ... تخبلت كمت مااعرف شسوي
نسوان غربه بالبيت ... مااكدر أصيح ع امي ... شفت علبه عطر ... كدامي خليت رنيم ع الجرباية ... وكمت فتحت العلبه
رشيت شويه ع ايدي ... وشممتها فزت حست عليه ... كعدت يمها وسندتها ع صدري ... عيونها بعدهي تفتحهن وتسدهن
بعدهي مو بوعيها ... مماكله اكيد صاير ... عدها هبوط ... طلعت موبايلي خابرت ... على فاطمه كتلها ... تعاي بسرعه لغرفه رنيم
دخلت فاطمه وشافتني ... حاضن رنيم وهي مو بوعيها
فاطمه،، هااا خويه شصاير ... ولج رنيم شبيج
علي،، فاطمه مو وكتها ... تعاي لبسيها خليني ... اخذها للمستشفى يحطولها مغذي
ركضت فاطمه طلعت ... حجاب وعبايه ... لبستها كتلها تعاي سنديها وياي ... وانتي تعاي ويانه
اخذناها وطلعنه ... تلكتني امي ... يمه اسم الله ... شبيها بنيتي
علي،، يمه مو وكتها ... الله يخليج خليني اخذها ... للمستشفى وبعدين نحجي ... طلعنه ركبتها بالسيارة
كعدت يمها فاطمه ... حاضنتها وتبجي عليها ... شغلت السيارة ومشيت ... اباوعلهن من المرايه
شفت فاطمه تبجي ... لج فاطمه كافي بجي شبيج
فاطمه،، مو بيدي علاوي ... عمي راح بلمح البصر ... وهسه رنيم هيج حالتها ... تبجي الكافر عليها
علي،، استغفرالله ربي ... الحمد لله ع كل حال ... شوفيها خويه ماصارت زينه
فاطمه،، لا والله بعدهي
علي،، يلا هاي وصلنه ... طفيت السيارة نزلت ... اركض فتحت الباب ... ماتكدر تمشي ... شلتها ودخلت اركض للمستشفى
تلكتني السستر ... خليتها ع السديه ... اخذتها السستر ... للغرفه شكلولها مغذي ... وضربوها إبرة مقوي
طلعت السستر كالت ... صاير عدها هبوط ... وفقر دم ماتاكل ... وعدها انهيار عصبي ... ديربالكم عليها إذا تبقى ماتاكل ... ممكن تتأذى أكثر
علي،، ان شاء الله ... شوكت اكدر اطلعها
السستر،، بس يخلص المغذي ... وتستعيد وعيها تكدر تأخذها ... معافايه أن شاء الله
بقينه ننتظر وره ساعه ... يلا خلص بدت تحس شويه ... اجيت يمها ... هااا رنيم شلونج هسه
رنيم،، علي كاعد يمي ... ويحجي وياي ... حسيت عيوني غوشت وكمت مااشوف ... بعدها ماحسيت ع شي
إلا واني بالمستشفى ... وعلي وفاطمه يمي ... اباوع لعلي الخوف بعيونه
رنيم،، شكو شصار ... شجابني للمستشفى
فاطمه،، حبيبتي الحمد لله ع سلامتج ... حضنتها وكمت ابجي
علي،، فاطمه كافي بجي ... شلونج هسه
رنيم،، الحمد لله زينه
علي،، شفتي شصار بيج ... كله لان ماتاكلين ... هسه بس نرجع ... غصبا عليج تاكلين ... واذا سمعت ماماكله ... يا ويلج مني ... عاجبتج الحاله الي انتي بيها هسه
فاطمه،، كافي علي شبيك ... نحجي هناك بالبيت ... اباوع لرنيم كامت تبجي ... كافي يروحي مو قصده علي
بس خايف عليج ... وهيج حجه ... يلا حبيبتي تكدرين تمشين
رنيم،، اي اكدر يلا ... اريد اطلع
علي،، اخذتها وطلعنه للبيت ... ماحجيت وياها سكتت ... بس اباوعلها بالمرايه ... شلون صافنه ع الشارع
ومخليه راسها ع الشباك ... نزلت يم المطعم ... جبت كيلو معلاك ... واخذت عصير ورجعت للسيارة
وصلنه للبيت ... نزلت وفاطمه لازمتها من ايدها ... طفيت السيارة ونزلت ... دخلت وياهن
اجت امي ... هااا يمه شبيها ... شكالولك بالمستشفى
علي،، ماكو شي يمه ... فقر دم وهبوط ... لان ماتاكل ... هاج يمه هذا معلاك وعصير ... وكليها غصب جبريها
واذا مااكلت خابريني ... وجيبي سارة يمها ... خلي تاكل لا تعوفونها وحدها ... هم خطيه تكسر الخاطر
امي،، ان شاء الله يمه ... اكلك علاوي ابوك شلونه
علي،، الحمد لله ... مو هينه عليه ... اخوه يروح بسرعه
امي،، الحمد لله ع كل حال
علي،، يلا اني راجع يم الزلم ... واذا صار شي خابريني ... وإن شاء الله بالليل أمر عليكم
امي،، ان شاء الله
علي،، يلا مع السلامة ... طلعت من بيت عمي ... رحت يم الزلم ... اجه عمار وهشام
عمار،، وين جنت علاوي
علي،، جنت يم بيت عمي ... اخذت رنيم للمستشفى
هشام،، ليش شبيها
علي،، ماتاكل وحابسه ... روحها بالغرفه وبس تبجي
عمار،، الله يساعدهن ويصبرهن
علي،، الله كريم ... شفت ابوي كاعد ... ومنزل راسه ... باوعت لعمار كتله ... ابوي شلونه اليوم
عمار،، ااااخ والله ماادري ... بس نكول الحمد لله ع كل حال ... مقدر ومكتوب علينه
علي،، لليل رحت لبيت عمي ... خابرت ع فاطمه ... كتلها اريد اشوف رنيم
فاطمه،، اي خويه تعال ماكو احد
علي،، هاي اني وصلت ... تعاي فتحي الباب ... طفيت السيارة ونزلت ... دخلت كتلها اريد ... اسلم ع عمتي ... منو يمها
فاطمه،، بس امي وخالات رنيم
علي،، اخذيلي طريق اريد ادخل
راحت فاطمه شويه واجت ... يلا علي تعال ... دخلت للاستقبال لكيت امي وعمتي وسارة
علي،، شلونج عمه ... البقاء لله والله يصبرج ... رحت يمها بست راسها ... كامت تبجي
عمتي،، الحمد لله ع كل حال
علي،، رحت يم سارة ... شافتني كامت تبجي ... حضنتها واسكت بيها ... بلكوه سكتت
كمت رحت للغرفه ... دخلت لكيت رنيم كاعده ... شافتني عدلت كعدتها
علي،، شلونج هسه
رنيم،، الحمد لله احسن
علي،، الحمد لله ... اخذتلج إجازة كم يوم ... بس يخلص السابع ترحين لكليتج ... امتحانات آخر السنه بعد أسبوع
رنيم،، لا مااريد اداوم ... خلي تولي الامتحانات
علي،، انجبي مو بكيفج ... ترحين لدوامج ورة السابع ... كامت تبجي ... عمري هسه ليش تبجين
شو تعاي تعاي ... خليت راسها ع صدري ... وامسح ع شعرها ... حبيبي والله لخاطرج ... قابل اريد أذيج
أهم شي عندي مصلحتج ... وعمي الله يرحمه ... وصاني بيج وبمستقبلج ... لخاطره بس يخلص السابع ترحين للدوام
رنيم،، ان شاء الله
علي،، عفيه بالحبابه ... يلا غمضي عيونج ... اريدج تنامين بحضني ... يلا اششش لا تحجين شي
بقيت يمها نص ساعه ... حسيتها ثكلت ... رفعت راسها شفتها نايمه ... حطيتها بالفراش وطلعت
مرت الأيام وخلص السابع ... رنيم صارت احسن ... كل يوم جنت اروح يمها ... اخليها بحضني واخليها تنام
رنيم،، رجعت اداوم بدت الامتحانات ... كمت اكضي وكتي كله بالقرايه ... ومن يصير عندي مجال ... يخابرني علي
نحجي شويه ويكلي يلا ... روحي كملي دراسه ... حسيت علي تغير ... تصرفاته ويايه كام يتغزل بيه ... ويحسسني بأهتمامه وحبه
علي،، علاقتي قوت برنيم ... حبيتها وتعلقت بيها ... يومي صار مايمشي ... بدون مااحجي وياها ... اتجرأت وكمت اتغزل بيها
خلصت رنيم امتحانات ... وطلعت ناجحه الحمد لله ... مرت الايام وطلع ... أربعين عمي ... اخذنه سيارة ورحنه نزوره
وصلنه للمكبره حسيت ... كلبي انقبض وخصوصا ... واني اشوف النسوان بالسيارة ... وبدن يبجن واصواتهن علت
شلون لو يشوفن ... الكبر شراح يصير بيهن ... كاعد بالمقدمة واسمع ... صوت رنيم وبجيها ... مرد كلبي مرد
وكفت السيارة ونزلنه ... وصلنه يم القبر ... ورنيم وسارة شمرن ... روحهن عليه وزاد البجي ... واحنه نسمع عتاب
بناته لابوهن ... اصعب موقف يمر ... ع البشر من تشوف عتاب البنيه ع ... قبر ابوها 💔
بقينه فوك الساعه ... يم عمي قرينه ... سورة يس وزيارة القبور ... وادعيه خاصه بالميت
عمار،، علي يلا خلي نمشي ... اذا نبقى أكثر البنات ... يوكعن علينه شوف حالهن ... شصار بيهن
علي،، اي ادري بس شبيدي عليهن ... ابوهن هذا عمار حقهن
عمار،، اي اعرف حقهن ... بس كافي يلا ... راح اكلهن يلا نمشي نزور
اجيت يمهن ... يلا كافي بجي ... تأخرنه هم يلا نروح نزور الإمام ... يلا يمه اخذي عمتي
سارونه يلا حبابه ... كومي سلمي ع ابوج ... وخلينه نروح ... كافي حبيبتي يلا كومي
أشرت ع علي ... يجي يكوم رنيم ... لزمت سارة من ايدها وكومتها وياي
علي،، اجيت يم رنيم ... حضنتها وهمست بأذنها ... يلا يروحي كافي ... انتي مو تردين تريحين عمي
كافي بجي ... هسه بس يشوفج تبجين ... مايرتاح ولا ينام مرتاح بكبره
يلا حبيبتي كومي ... سندتها بلكوه كامت ... مشينه كلنه ورنيم بعدهي تبجي
صحت ع أحمد ... اجه يمي كتله ... أحمد احنه راح نمشي كدامك ... انت ابقى يم قبر عمي
مايصير أحد يلتفت ... لان راح نعذبه ... هسه هو يشوفنه ... ومن نمشي يضل يصيح علينه
فأنت ابنه ابقى آخر واحد ... ضل احجي وياه ... ومن تريد تمشي ... لا تلتفت ليورة ابد
احمد،، ان شاء الله ... مسح دموعه وراح ... وكف يم القبر ... طلعنه احنه مشينه مسافه ... شويه واجه أحمد ورانه
ركبنا بالسيارة ورحنه للإمام ... وصلنه وكفت السيارة ... اتفقنا ع مكان ننجمع بي وره الصلاه
كملنه زيارة وصلاه ... طلعنه بره الصحن ... لكينه سارة وامي ... والبقية بعدهن يزورن
التمينه كلنه فرشنه السفره ... طلعن الغده دجاج ودولمه وكباب ... اكلنه الحمد لله ... صارت الساعه ب 1:30
طلعنه للكراج نرجع للناصرية ... ابوي مااجه بقى بالبيت ... كال الطريق تعب مااكدر اروح ... وره كم يوم واروح ويه عمار وحدنه
وصلنه للناصرية قريب ع 6 المغرب ... أول ماوصلت رحت لغرفتي ... بدلت ملابسي صليت ونمت ... تعبان حيل واحس جسمي مكسر تكسر
وثاني يوم وراي دوام ... كعدت ب 11 بالليل ... خابرت ع عمر كتله باجر مااجي تعبان
كعدت جوعان كلش ... رحت للمطبخ فتحت الثلاجة ... طلعت خبز وطماطه وخيار ... سويت لفه وكعدت اكل ... المهم اسد جوعتي بيها
اكلت ورحت نمت ... حسيت ع صوت امي ... تكعدني اروح للدوام
امي،، يلا علي كوم ... الساعه ب 6 ماتروح للدوام
علي،، يمه مااداوم تعبان اخذت إجازة
امي،، هااا خوش يمه ... ارجع نام
علي،، يمه وياج الضوه طفي ... وسدي الباب
امي،، ان شاء الله
ثاني يوم بقيت بالبيت ... روتين عادي ماكو شي ... للمغرب خابرني نقيب حسين
علي،، هلا حسين شلونك
نقيب حسين،، هلا علاوي ... اكلك وين انت
علي،، بالبيت ليش صاير شي
حسين،، اي تعال هسه للمكتب ... ضروري اني مااكدر احضر هسه
علي،، ماشي هسه جاي ... جان كاعد يمي عمار
عمار،، هااا خير شكو ... وين تروح هسه
علي،، رايح للمكتب محتاجيني ضروري هناك ... يلا رايح ابدل واروح
عمار،، ماشي ديربالك ع نفسك
علي،، رحت لغرفتي بدلت ملابسي ... اخذت سويج السيارة وطلعت ... شافتني امي اريد اطلع ... طلعت من المطبخ تركض
امي،، هااا يمه وين رايح
علي،، عندي شغل وطالع ... لا تنتظروني مااعرف شوكت ارجع ... عفتهم وطلعت ... شغلت السيارة وكبل للمكتب
وصلت هناك وره ألاذان ... كالوا اكو جريمه ... واجانه تبليغ هسه ... طلعت لمكان الجريمه ... اخذنه كل الادله والأعترافات
بقيت بالمكتب للساعه ب 1 بالليل ... هلكت تعب وجوع ... كتلهم يلا طالع
عمر،، وين رايح علي ... انتظر كم ساعه ... ونطلع سوه
علي،، لا يمعود رايح ... مااكدر ابقى بعد ... ركبت سيارتي وكبل للبيت
الساعه فوك 1 ... والشارع تقريبا شبه فارغ ... سيارات قليله بي
مشغل قرآن واستمع ... جاي أسوق واجت سيارة ... بصف سيارتي ... وتجي عليه
حاولت ابتعد عنها ... طلعت كدامها ... اجت من الجهه الثانيه ... وتريد تدعمني
ردت أتخلص منها بكل طريقه ... ماكو اروح يسره ... تجي عليه ... اروح يمنه هم تجيني وتحاول تكسر عليه
كل شويه واطخ سيارة بسيارة ... فقدت التحكم بالستيرن ... كمت ألوف بكل جهه ... اريد اخلص روحي منهم
عرفت ذوله متقصديني ... بس منو مااعرف ... اكو سياج حديد ... ع جهه اليسره
كمت أسوق سرعه عاليه ... حتى اتجاوزهم ... ماحسيت إلا دعمت سيارتي ... حيل وانصدمت بالسياج
طخ راسي بالستيرن ... ورجع ليورة من قوة الطكه ... وبعد ماحسيت ع شي
عمار،، بالليل واحس كلبي انقبض ... علي طالع خفت ... بس لا صار شي موزين ... جانت الساعة فوك ال 1
دك موبايلي رقم علي ... ركضت فتحته وخايف ... هااا علي وينك
الغريب،، الووو انت اخو صاحب الموبايل
عمار،، اي اني اخو ... علي بي شي ... منو انت
الغريب،، اخوك سوه حادث ... شفت سيارتي داعميها ... وكفت سيارتي ونزلت ... فتحت الباب ولكيت صاحب السيارة
ينزف دم من راسه ... اخذت موبايله واتصلت عليك ... مسجلك اخوي فاتصلت عليك
عمار،، سترك يارب ... وهسه علي وين ... بي شي
الغريب،، نقلته بسيارتي للمستشفى
عمار،، سديت الموبايل وطلعت ... ماكلت لأي أحد ... وصلت سألت الاستعلامات ع حادث سير ... هسه صار وين نقلوه
كالوا بالعنايه المركزه ... رحت اركض لكيت ... رجال واكف هناك ... اجيت يمه كتله انت اتصلت عليه
الغريب،، انت عمار ... اي اني اتصلت عليك ... وهسه صار لازم اروح ... وإن شاء الله ... يطلع اخوك بسلامه
عمار،، تشكرت منه وبقيت واكف ... منتظر أحد يطلع ... طلع الدكتور رحت اركض عليه
عمار،، هااا دكتور بشر
الدكتور،، حالته خطره كلش ... صاير عنده نزيف براسه ... ويحتاج عمليه
عمار،، سترك يارب ... اي دكتور شوكت تسويها
الدكتور،، هسه بس لازم توقع ... ع الاستمارة روح للاستعلامات وقع هناك
عمار،، اي رايح ... رحت اركض انطوني ورقه وقعت عليها
حضروا للعملية ... دخلوا مجموعة أطباء ... وياهم ممرضين
بقيت افتر واستغفر ربي ... طلعت موبايلي وخابرت ع هشام ... بلغته بهدوء وكتله ع كيفك ... من تكول لاهلي
ربع ساعه واجه ... ابوي وهشام واحمد ... يتراكضون بالمستشفى
هشام،، هااا عمار بشر ... شكو شبي علي
عمار،، مسوي حادث ... وصاير عنده نزيف ... وحالته خطره ... وهسه دخلوا لغرفه العمليات
ابوي،، الله كريم ... إن شاء الله يكوم بالسلامة
عمار،، فوك ال 4 ساعات ... يلا طلع الدكتور ... رحنه نركض عليه ... هااا دكتور بشر
الدكتور،، العمليه الحمد لله نجحت ... وصاير عنده كسر بيده
عمار،، يعني هسه شلونه ... نكدر نشوفه
الدكتور،، هسه بعده ... انتظروا يصحى منا لساعه ... راح ننقله بغير غرفه
عمار،، اوووف الحمد لله ياربي
ابوي،، الحمد لله عدت ع خير ... بويه عمار خابر ع امك ... طمنها وخليها ترتاح
عمار،، طلعت موبايلي خابرت ع امي ... كتلها الحمد لله ... نجحت العمليه
رنيم،، جنت نايمه حسيت ... ع صوت الباب ... يندك حيل ... طلعنه نركض شكو ومنو
سمعنه صوت هشام ... فتحنه الباب ... تلكانه بخبر هد حيلي ... علي مسوي حادث ... وهسه بالمستشفى
رجعت ليورة انطك ... ظهري بالحايط اتأذيت حيل ... كعدت بالكاع ابجي
اجت امي وسارة يهدن بيه ... كتلهم اريد هسه اروح يمه ... طفرت ركض لغرفتي ... لبست عبايه وطلعت
كمت ابوس بديهم ... اريد اروح وياهم ... حالتي تبجي الكافر ... كافي خسرت ابوي ... هسه اخسر حبيبي
اموت وراه مااتحمل ... اعيش من دونه ... رحت وياهم لبيت عمي ... عمي ماقبل اروح ... بقيت يم عمتي
وحده حاضنه الثانيه ... ونبجي كمت لغرفه علي ... فتحت الباب ودخلت ... كعدت ع جربايته وابجي
رحت لكنتوره فتحته ... طلعت قميصه وكمت ... اشم بي وابجي بصوت عالي
اجتني عمتي تركض ... كومي يمه خلي ... نقراله قرآن ... بلكت الله يكومه بالسلامة
رنيم،، ان شاء الله عمه ... بس خليني هنا بغرفته ... هزت راسها وطلعت ... رحت توضيت ورجعت للغرفه
كمت طلعت قرآن ... وفرشت السجادة ... سجدت وكمت ابجي وادعي الله ... يرجعه إليه سالم
فتحت القرآن ع سورة يس ... قريتها وقريت كم سورة وياها
بقيت الليل كله ... اتوسل بالله وأهل البيت ... يرجعونه إليه ... نذرت اصوم 3 أيام ... قربه لله تعالى ... بس يصير زين
كملت صلاة وقراءة قرآن ... رحت اشوف عمتي ... واكعد يمها ... دك موبايلها رحنه نتراكض عليه
عمتي،، الووو هااا يمه عمار ... اخوك شلونه تحجي وتبجي ... واني ابجي وياها
عمار،، الحمد لله يمه ... نجحت العمليه ... ومنتظرين شوكت يصحى
عمتي،، ااااي الف الحمد لله ربي ... كامت تهلهل وتبجي
رنيم،، سمعت عمار يكول ... نجحت العمليه ... كعدت بالكاع من الفرحه ... وسجدت لربي شكر اله
يتبع
...................................
متابعة ممتعة 😊
انتظروني باجر بالبارت الأخير والنهاية 😘