#نجماتك_رتبه_قلبي
البارت 9
#Rehab
رنيم،، رجعت من الدوام ... صليت وتغديت رحت لغرفتي ارتاح ... فتحت الفيس اشوف شكو ماكو
دك موبايلي اتصال ... ع الماسنجر من علي ... اتفاجأت صارلنه 4 أيام ع عقدنه ... ما متصل عليه ولا محاجيني
فتحت الخط ... وكلبي يرجف ودكاته زادت ... جاوبته الووو
علي،، اتصلت عليها ... واكو نزاع قوي بين عقلي وكلبي ... عقلي يكلي لا توثق بأحد ... وكلبي يجبرني احجي وياها
ضل يدك رنه رنتين اتلاثه ... ردت اغلقه وانفتح الخط ... سمعت نفسها الخايف ... من كالتلي الووو ... حسيتها خايفه
علي،، الووو هلا رنيم شلونج
رنيم،، أهلا علي ... الحمد لله تمام ... انت شلونك ... احجي وياه والرجفه واضحه عليه
علي،، الحمد لله تمام
رنيم،، دووووم يارب
علي،، تسلمين ... سكتنه اثنينه ضاع الحجي عندي ... وهي هم سكتت ... بس اسمع نفسها ... اندك الباب دخل الشرطي
تحيه سيدي ... عندك غرفة رقم 6 تحقيق
علي،، تمام هسه اجي ... طلع الشرطي ... رجعت احجي وياها ... يلا زهراء احجي وياج بعدين ... 😳خرررررب جفصت
رنيم،، 😳😳زهراء منو
علي،، سكتت مااعرف شجاوبها ... هو أني جفصت ... وهاي راح تبقى ابالها ... تريد تعرف منو زهراء
رنيم،، ليش سكتت علي ... منو زهراء هاي ... ليش ماتحجي
علي،، خلاص رنيم هسه عندي تحقيق ... ارجع احجي وياج بعدين
رنيم،، تريد تتهرب من الجواب ... شوكت بعدين ... هسه اريد اعرف منو زهراء
علي،، عصبت عليها وصحت بصوت ... كافي شبيج تلحين ... اسم وغلطت بي مايصير يعني اغلط
رنيم،، سكتت وكمت ابجي
علي،، اوووف هسه ليش تبجين ... عمي اسف مو قصدي اصيح عليج ... كافي بجي حبابه ... واليوم بالليل أمر عليكم ونحجي ماشي
رنيم،، ماشي انتظرك
علي،، يلا مع السلامة ... اتأخرت ع شغلي ... وكافي بجي
رنيم،، الله وياك ... سديت الاتصال ورجعت ابجي ... مو لان صيح عليه ... اريد اعرف منو هاي زهراء ... كامت الأفكار توديني وتاخذني
معقوله يعرف وحده ... لا لا مامعقوله علي مايسويها ... اوووف ياربي بس لو اعرف منو هاي
النومه طارت من عيني ... والتفكير اخذني صار عندي أرق من كد ماافكر ... ماكدرت انام كمت طلعت كتبي أقره
أقره وبالي مو يم الماده ... اووف هسه لو كايلي منو هاي ... ومريحني اوووف ياعلي شلعت كلبي
طلعت بالصاله افتر وكتابي بيدي ... اذا ابقى وحدي يمكن التفكير يكتلني ... لكيت سارة واحمد كاعدين يتابعون فيلم اجنبي على قناة mbc2
كعدت يمهم اتابع وياهم ... خلص الفيلم وكلنه مندمجين ... بحيث محد يحجي بس من تطلع اعلانات
سارة،، شعجب مانمتي ... مو كلتي تعبانه وأريد انام
رنيم،، مااجاني نوم طلعت كتبي وماكو واهس للدراسة
سارة،، يااا شعجب صاير شي وياج اليوم
رنيم،، لا ماكو شي ... ماكدرت اكلها ع حجايه علي ... اجت امي يمنه ... باوعتلها كتلها ماما اليوم علي يجي بالليل
امي،، هلا بي بأي وقت مو غريب هو حتى يستأذن
سارة،، 😉😉هنااا السالفه واني اكول شبيج ... وليش ماكدرتي تنامين
احمد،، 😁اي ولج غير راح يجي علي ... اكيد تفكر بي 😂😂
رنيم،، ماما تعاي لولدج 😒
امي،، هههههههه عادي ماما مابيها شي ... هذا خطيبج ليش تستحين
رنيم،، اكلج ماما من يجي شنقدمله
امي،، بكيفج اذا تردين ... سوي كيك ووياه عصاير
رنيم،، اوك هسه اكوم اسوي ... رحت للمطبخ طلعت الغراض وبديت اشتغل ... كملت طلعتها من الفرن ... خليتها تبرد حتى ابدي اقسمها
اجت امي سوينه عشه اني وياها ... إذن ألمغرب صلينه ... صبينه العشه خلصت رحت لغرفتي ابدل ملابسي
طلعت فستان نازك كلش ... جديد قبل فترة اخذته ... الي امي كالت خاف يجي علي البسي
لونه بصلي وهادىء كلش ... شسورت شعري ... خليت مكياج خفيف ... اندك الباب ... دخلت سارة كالت اجه علي
حطيت شال ع راسي وطلعت ... لكيته كاعد ويه بابا وماما بالاستقبال ... سلمت من بعيد
حطيت صينيه الكيك والعصير كدامه ... ورحت كعدت يم امي
شويه وامي أشرت لابوي يطلعون ... بقينه بس اني وعلي بالاستقبال
استحيت من عنده هاي ثاني مرة نبقى وحدنه ... بقيت مدنكه راسي
علي،، بعد ماغلطت بأسم زهراء ... لعنت روحي مية مرة ... اني احاول أنساها شذكرني بيها ... وانوب هاي كامت تبجي
استحقرت نفسي حيل ... لان وحدة مثل زهراء ... تفكيري بيها راح يخرب حياتي الجديدة
الي قررت ابديها ويه رنيم ... بالكوه سكتتها كتلها ... راح اجي بالليل واحجي وياج
كملت تحقيق خلص الدوام ورجعت للبيت ... سبحت وصليت واتعشيت وطلعت لبيت عمي
كعدت ويه عمي بالاستقبال ... شويه واجت رنيم ... سلمت وكعدت ... طلع عمي ومرته بقينه اني وياها وحدنه
علي،، شلونج رنيم
رنيم،، الحمد لله تمام ... انت شلونك
علي،، الحمد لله بخير
باعي رنيم خلي نحجي الصراحه ... مااحب ابدي حياتي ... ع كذب أو اضم عليج شي
رنيم،، رفعت راسي من حسيت ... كلامه صار جدي ... كتله اوك اسمعك
علي،، بس بشرط ماتبجين ابد ... مااحب اشوف دموعج
رنيم،، ان شاء الله
علي،، قبل 3 سنوات ... رحت ويه اهلي ... لبغداد صادفت عرس خالي الزغير
هناك التقيت ببنيه ... الصراحة اول لقاء النه جانت كلش جريئة وياي بأسلوبها
رنيم،، الي هي زهراء
علي،، جريت حسرة ظيم ... كتلها اي زهراء ... زهراء بنيه حيل حلوه ولبسها جان مغري بشكل
بدت تتقرب مني ... جنت من اشوفها اخدر ... مو بيدي هالشي ... كلبي كام ينجذب الها ولتصرفاتها
ضليت افكر بيها ليل ونهار ... اخذت رقمي بالعرس ... كالتلي انتظر منك اتصال
رنيم،، اسمع كلامه ... وعبالك مثل السجاجين تنغز بصدري ... عيوني غوركت بالدموع ... حاولت اكتم دمعتي ماكدرت
مو بيدي احبه ... وصعب تسمع حبيبك ... يحجيلك عن حبه الأول ... كمت ابجي سكت علي
علي،، احجيلها عن زهراء ... شو هاي كامت تبجي ... خرررررب اني شسويت
كمت كعدت يمها ... رفعت راسها ... رنيم شو باعيلي ... ليش تبجين ياعيني ... كافي يلا بعد مااحجي
رنيم،، باوعت بعيونه ... كتله لا كمل اسمعك ... اريد اعرف كلشي
علي،، اوووف رجعت من العرس ... خابرتها رقمي مخزن بجهازها ... من اول رنه جاوبت
ضلينه نحجي فوك الساعتين ... ورة يومين رجعنه لبيتنه ... كمت كل يوم اخابرها واحجي وياها
اشتاقلها هواي بوقتها جنت ملازم ... أكمل تحقيق بسرعه ... واجي لمكتبي متلهف ... ع صوتها وسوالفها
مرت على علاقتنا سنه ... حبيتها كلش وحاجيت عمار ... يقنع ابوي نخطبها
جنت من اشتاقلها اروح لبغداد اشوفها وارجع ... اخذلها هدايا كومه ... كلشي تريده انفذه
بيوم خابرتها كتلها حاجيت اخوي عمار ... وراح يقنع ابوي واجي اخطبج
ضلت تتهرب وتأجل ... لا مو هسه بعدنه ... خلي نتعرف أكثر ... لاحكين ع الزواج
كمت كل مااخابرها ... ماتجاوب أو تطلع أعذار ... ومرات نتعارك ع المكالمه
لو تكلي مشغوله احجي وياك بعدين ... لو صديقتي يمي لو امي دتصيحني ... ومرات اتصل عليها خطها مشغول
دخل الشك عندي ... حاجيت عمار هيج وهيج السالفه ... كالي خويه هاي ماترهم الك زوجه عوفها
تخبلت عليه شلون اعوفها ... واني روحي معلكه بيها ... ردت اتأكد من شكوكي ... واكول بلكت اطلع غلطان
دزيت رقمها لصديقي ... وانطيته اسمها ع الفيس ... كتله شوفلي شكو ماكو
الرقم بحكم علاقاتي ... كدر يطلع كل المكالمات ... والرسائل الي تجيها
اتفاجأت هي تحجي ويه أكثر من واحد ... ماصدكت جذبت روحي وصديقي كلت متوهم أو غلطان بالرقم
رحت لصديقي الثاني ... ع الفيس وحسابها ... وره ساعه خابرني كالي راح توصلك كلشي
اجت الرسائل تركع ... 😳😳معقوله هاي حبيبتي ... تحجي ويه أكثر من واحد ... وصورها ادزهن الهم
تخبلت كسرت كل الغراض بغرفتي ... اجه عمار وامي يركضون ... شافوني متهستر واسب واغلط عليها
امي خطيه كلشي ماتعرف ... بس تبجي عليه ... وتحاول تهديني ... طلعها عمار بره ... وبقى هو قفل الباب
واجه لزمني من اديه ... ضليت اصرخ عليه ... طكاني راشدي ... سكتت كعدت ع فراشي ... كتله عوفني وحدي
ضليت يوم كامل بغرفتي ... ثاني يوم اجه عمار ... يحجي عليه هاي مو سوالف زلم هيج تسوي
اتعوذت من الشيطان ... وكتله مو مرة التكسرني ... خابرتها حجيت عليها ... كتلها بعد ما اعرفج ولا تعرفيني
كسرت السيم كارت حتى ماتخابر ... وغيرت حسابي على الفيس ... ونهيت علاقتي ب زهراء
كملت حجي ... اباوع لرنيم هاي شبعانه بجي ... عبالك أحد ميت الها
علي،، ولج رنيم كافي بجي ... لخاطري يعمري كافي
رنيم،، يحجي علي وابجي عليه وعلى حاله ... حقه اعذره اذا ماكدر يحب مرة ثانيه
رنيم،، علي بس اني مو نفس زهراء
علي،، اعرف انتي مو نفسها ... ومره ثانيه لا تقارنين روحج وياها
رنيم،، زين أسألك سؤال ... عمي جبرك تخطبني
علي،، مو قصه جبر ... بس ماجنت اريد ارتبط ... بس بعدين اقتنعت بيج ... وكمت اشوفج رنيم بت عمي ... الي ممكن تصير زوجتي
مااباوعلج ع اساس ... أختي شلت هاي الفكره من راسي ... ماشي واسف اذا الظهر غلطت باسمج ... بعد ماتنعاد ... ضحكتلها وكرصتها من خدها
يتبع
.................................
متابعة ممتعة 😊
بارت زغيروني لعيونكم تعويض عن بارت اليوم 😘😘 واشكر كل واحد سأل عليه جنت مريضه وماكدرت اكتب شي 😍😍فديتكم