مازلت طفلة

بارت 1

مساء الگاردينيا حبايب ..
ورجعت الكم بقصه جديده ..
اتمنى تعجبكم ..

للتنويه .. حبايب راح انزل كل يوم بارت طويل ..
لان كنت انشر اربع بارتات قصيره متقبلون ..

#والقصه حقيقية لكن لاتخلو من الخيال ..

البارت الاول
{#مازلت_طفلة}
#بقلم_الكاتبة_شمس

ترى في أي قاطرة تركت طفولتي ونزلت أواجه هذه الحياة وحدي ...؟!
سؤال غالبا مايراودني .. لكن للاسف لم اجد له اجابة .
كانت الحياة قاسيه علي منذ نعومة اضافري ..

اليوم هو. 1993/11/25 . يوم الخميس .
يوم زواجي .مستحيل انسى هذا اليوم الي انسرقت بي طفولتي وحياتي ..

البيت هوسة من الجيران والاقارب الي كلها متجمعه عدنا حتى تشوف الحجي رضا .. ووسامته وغناه ..

كان معروف بالولاية والناس كلها تتمنى تناسبه ..
اتعجبت ع الناس الفرحانه والترگص ..

اشو اني مفرحانه والخوف كاتلني والدمعه بطرف عيني
اعاين على امي .
تأشرلي وتهزلي براسها ..
معناه لاتنقهرين .. بس هي الي تفهمني من غير مااحجي ..

من اروح اني وامي واخواتي للاعراس . ابقى عيني ع العروس .. اشوفها تضحك وبحلگها علج وتتماوع واضافرها طوال ومصبغتهن .. والفرحة تريد تطلع من عيونها ..

بس اني غير .. احس روحي مخنوگة وماكو فرحة احس بعدني اريد العب واسابق اخواتي بالتوكي وحية ودرج .
هاي جانت العابنا المفضلة ..

شبسرعة خلصت طفولتي وراح يزوجوني ..
مو ذني بنات خالي گدامي يلعبن ويرگصن ويگمزن ..
وهن بعمري ليش بس اني لابسه بدله اكبر مني وامي صغرتها بالدنابيس .
ولبستني حذاء عالي مااعرف امشي بي ولا لابسته بحياتي وكل ساع يخرط من رجلي .

اضافري صغار وممصبغات .. وشعري ماصبغوه مثل العرايس .
واجت عمتي حطتلي مكياج وسوتني مهرج بالالوان .
تالي امي مسحته وخلتلي مكياج خفيف ..

شويه ودخلت جيرانه ام احمد . هاي جانت معلمتي بالابتدائيه ..

يااا على بختج ام هدى .. صدگ بله من كل عقلكم ملبسيهن هاي الطفله بدله وتزوجوها ..
شني ماعندكم لگمه وتردون تخلصون منها ..

حسيت بأمي ضاجت وجرتها حسرررة . لان مابيدها شي

عمتي ردتهة . خايبه انتي جايه تباركين لو تخربين العرس بتنا واحنه بكيفنا نزوجها ونخليها انتي ياهو مالتج .
لو غايره جيف انطوها الواحد غني ويدللها ..
خاف عندج بنات ومامزوجتهن وغرتي ..

ام احمد .. يااا عزا . عيني عليمن اغار . بس لأن جانت طالبتي واعرفها شاطره انقهرت على مستقبلها ..
والا اني شعليه بيكم انتو احرار .
وتركت العرس وطلعت ضايجه .
وامي طلعت وراها من باب المطبخ تتعذر منها ..

سمعنا صوت الطلق .. والطبل والدمام يدگن .. وصارت هوسه ..

اجت الجهال تتراكض .. اجو اجو ..

اني الخوفه اخذتني وگمت اتراجف .. ومنا صوت الطلق والرمي اخذ روحي تگول داخلين على حرب مو عرس ..

النسوان كلهن تطافرن ويردن يشوفن العريس ..
هو اني اصلا لسا ماشايفته بس خفت من هسا .
سمعت يگولوله الحجي .. فأكيد جبير بالعمر ويخوف ..

انتضرنا ومادخل العريس ..
اجت عمتي نضال ووياها كم مرية .. وگالت ..
يله بسرعه لفلفوا البنيه الحجي يگول مااريد شي يطلع منها .. وخلينا نروح الناس منتضرتنا ..

الكل بقى صافن وساكت ..
عمتي .. يا جا غير العريس. يجي ياخذ مرته انتي ياهو مالتج مدخله روحج ..

خزرتها عمة نضال .. اني مرته للحجي وهو الي طلب اخذها فاهمة ..

عمتي سكتت وبقت تعوج وتدردم بينها وبين روحها ..

سحبتني عمة نضال من ايدي واخذتني واني مغطايه ومااشوف شي ..

صعدتني بالسياره ..
وطول الطريق ابجي على امي واخواتي مالحگت اسلم عليهن وابوسهن ..عمة نضال جرجرتني بسرعه ..

الطريق كله اسمعها تحجي وتسولف وي رجال يمكن هو الي يسوق ..

گلها .. اول مرة اشوف عريس مايجي ياخذ عروسته وين صايره هاي ..

نضال .. مو تدري ياعيني اخوك بالگوه قبل ازوجه ..
والاجل عيني ولان ميقبل يزعلني ..

الولد .. اي ليش تورطون بنات الناس اذا مايقبل ..

نضال .. مو وكتها هسا .. والحجي مشغول ..
الاستقبال مليان زلم .
قابل يتركهم ويجي ..

الطريق كله ابجي . واسمع بس ماافهم كلامهم وشيقصدون حتى مااشوف شي من الغطوه الي مخليها ع وجهي ..بقلم الكاتبة شمس
بقى بالي يم امي واخواتي .
وشلون راح يكون مصيري بعد هذا اليوم ..

اخذتني افكاري واسترجعت ايامي ..

راح ارجعلكم شويه واتكلم عن حياتي قبل هذا اليوم .
اسمي هدى . كنت ناجحه من صف اول متوسط للثاني ..
وبدرجات جيدة جدا .
كنت محبوبه من قبل المدرسات والمديرة .
لان شاطره ومواضبه ع الدوام وبحياتي مغايبه ولا يوم حتى لو كنت مريضه اصحي نفسي واروح للمدرسه .

كانت الدراسه طموحي الاول والاخير .
بالاضافه الى اني كنت احب اللعب . يعني من اخلص دراستي . اخذ العابي ونلعب اني واخواتي .
مكنت حارمه نفسي من لعب ولهو الطفوله .

امي مرة كبيره بالعمر . تساعد ابويه بالشغل .
تخبز للناس . مصار عندها اطفال الا بعد كبر .
صرت اني وسمتني هدى لان تگول انتي هدية الله الي بعد هذي السنين ..
وبعد اخوات اثنين وراي . انعام وفرقان .
شگد تمنت يصير عندها ولد مصار .

وهذا الي خله ابويه يضوج واحسه يحقد علينا .
ويدور اي خطأ صغير حتى يطلع قهرة بينا ..

علاقتي بي قليله . من يجي للبيت تختفي الضحكه من وجوهنا من الخوف والتوتر .

امي تحاول تكمل كلشي نيابة عنا حتى مايضوج ويعصب علينا .

كان دايما يگلها . شيسون بالدراسه خلي يبطلن ويساعدنج بالشغل .
لو يطلعن يشوفن اي شغله يشتغلنها اني ماالحگ ع البيت وحدي .
لو عندي ولد بدل هاي الصخله .. عليه يقصد .

كان ارتاحيت هسا .. وشال الشغل عني ..

ابويه يشتغل .. فلاح .
يعني يطلع للحدايق مال بيوت الناس . يرتبها ويحرثها ويزرعها وينطوه هالمقسوم ..

وهو رجال كبير يعني الشغل تعبه .. بس يحاول يطلع .
لكن يوم بعد يوم قل شغله والناس بطلت تدز عليه لان تعب وكبر .

وگام يتدين منا ومنا الى ان زادت ديونه ..

وصار يجي على امي يضربها ويطلع حرگته بيها ..

كنت خايفه لايجي يوم .. ويبطلني من صدگ ويشغلني ..

وصار الي كنت خايفه منه ..

اجه بيوم گال . ام هدى اسمعيني .
سمعت بيت الحجي يردون وحده تساعدهم بشغل البيت .
واني گلتلهم عندي بنتي نادره بشغل البيت .

وگالوا دزها تساعد مرت الحجي بالشغل ..

ام هدى .. يااااا عزا . بيت الحجي رضا .

ابو هدى . عزااا العزاج اي بيت الحجي رضا. شبيج فكيتي حلگج .

ام هدى.. لا بس شلون تأمن تخلي بنتك بعدهي صغيرة تشتغل عندهم وهمه عندهم هواي ولد بالبيت .

ابو هدى .. اي قابل ياكلوها . ونسيتي ام الحجي ومرته هناك . هي تكمل شغلها وتطلع ..
لاتتحججين اني ماعندي ومطلوب .. واذا عاندتي ابطلها من المدرسه . ماعايز مصاريف زايده .

ام هدى .. لاعيني لاتعصب هاهي اني اخذها بيدي وارجعها لتخاف ..بقلم الكاتبة شمس

امي في سبيل ابقى ادرس .. كانت خطيه تاخذني كل يوم الصبح .. للمدرسه وبعدها تروح البيت الحجي تنضف وتطبخ حتى ابويه مايحجي ..
والظهر ترجع تاخذني من المدرسه للبيت حتى ابويه ميحس . وهو عباله اني اروح انضف ..
وبعدين اروح للمدرسه ..
مااعرف شلون يفكر .. وهو اصلا دوامنا صباحي بس يمكن عبرت عليه ..

وبيوم العطل اروح وياها البيت الحجي بس مااشتغل اخذ كتبي واقرأ يمها بالمطبخ .
ومن تكمل شغلها نرجع ..
وهكذا الايام مشت . بس التعب الاكبر على امي خطيه بين بيتنا وبيت الحجي .
وتگعد من الفجر تخبز للناس ..
وهي كبيره تأذت هوايه ..
وگمنا احنه نشيل شغل البيت عنها كله من نرجع من المدرسه ..

واني صافنه . انقطعت افكاري بصوت عمتي نضال يله گومي وصلنا ..

نزلتني من السياره وبدء الطلق والرمي ..
واني گمت اگوم واوگع من الهبطه ..
دخلوني بسرعه للبيت ..

#بقلمي_الكاتبه_شمس
يتبع... ..