لكن اسي خلاص واصلي قرايتك وشدي حيلك م تيأسي لسه وانتي لسه صغيرة والطريق قدامك طويل ولا انتي رايك شنووو؟؟قولته ليها والله ي خالتي علويه انا م عندي مشكله لكن الناس فاتوني كتيير في الدراسه م أظن ألحق تاني،قالت لي بالعكس ي دوووب المقررات في بدايتها وم مشو كتير وبتلحقي الناس انشاءالله انتي بس شدي حيلك وانا انشاءالله م بقصر معاك ي بتي،قولته ليها وانا اللحقهم كيف اركز مع الدروس الجديدة ولا القديمة؟؟قالت لي تقري الجديد درس اليوم باليوم ومعاهو درسين من القدام وم تجتهدي بس لازم تجتهدي شديييد كمان ،قولته ليها انشاءالله ،وبالفعل خالتي علويه وعمتي خديجه م قصرو معاي ،وعمتي خديجه دي م بتخليني اشتغل شي بس بتقول لي ركزي في قرايتك لدرجه انو الأكل والشراب بتجيبو لي في محلي ،ومن اذان الصبح الأول بتصحيني عشان اقرا،قبل م اتم الأربعه شهوور امي راجلها طلقها ومشى عرس ليهو مرة تانيه وسكنها في بيت اهلو وبقى م شغال بي امي شغله،قولته ليها هو زاتو اخير عدمو لا بقدم لا بأخر دة ياهو الراجل الكنتي ماليه يدك بيهو؟؟هههههه😊طبعا بعد م طلقها امي بقت زي الخدامه في البيت،تشتغل تغسل وتكوي وماسكه شغل البيت كلوو ابدا قلبي م وجعني عليها اساسا دي نهاية المرة البتملى يدها بي راجل وم بتفكر في نفسها وبتعيش حياتها كلها عشان حضرة سيادتو يرضى عليها،ومرت خالي كانت مستغلهه الوضع كل يوم مشكله مع تمي ونقاش علشان الشفع وم الشفع ووجع راس م ليهو اول ولا اخر،بالي كان مشتت م بين امي واخواني وم بين قرايتي وامتحاناتي،اي نعم انا م بتفق مع امي وعمرها م ادتني احساس انها امي بجد بس انا مشاعري تجاها متناقضهه مرات بقول كل شي بحصل معاها هي سببو لأنو هي سبب مشاكلها م بتعرف تحل شي عشان كدة تستاهل ،بس تاني برجع بحن عليها وبقول ي شهد في النهايه هي امك ،عديت الأربعه شهور وعشرة يوم حقتي واصلي م رجعته بيت اهلي فضلته قاااعدة ومجتهدة بقرا برااي واحيانا بتجيني فاطمه بتساعدني وبساعهدا،طاقتي السلبيه كانت كبييرة وكنت كل م افكر انو انا م حأنجح كنت بخاف وبزيد ساعات القرايه والتركيز،الحمدلله استاذة علويه كانت متخصصه فيزياء ورياضيات دي الحاجه الكانت كويسه معاي ،وطبعا كنت شايله احياء واستاذة علويه م كانت بتقصر معاي بتجيب لي ورق الامتحانات القديمه والجديدة وبتقول لي حليهم واحيانا بتحلهم معاي❤عدت الأيااام لغاااية م جا زمن الإمتحانات كنت خاااايفهه شديد بالزات اول جلسه بس كنت بقول لي نفسي ي شهد دة تعب وسهر وارهاق كم شهر م تخليهو يضيع ساااي رغبتي في اني ادخل الامتحان وانجح كانت قويه شديد الحمدلله دخلته كل الامتحانات وكنت متفائله شديد ايوة متفائله ،متفائله علشان نفسي وعلشان كنت عايزة اغييير اتجاه حياتي،وعلشان نفسي ابدأ حياة نضيفهه وبعيدة كل البعد عن دكتاوريه خالي وراجل امي وكل الحاولو يتملكوني ،كنت عايزة اعيش حرة لي نفسي وبس،بعد م خلصته الامتحانات في يوووم عمتي خديجة طلعت ،وانا كنت قاعدة برااي في البيت جا ابوطالب ود خالي حمد واصلا هو شكلو عااارف انو عمتي خديجة ماف،جا وم دخل بالب نطة بالحيطه براااحهه ،انا كنت مرهقه من الامتحانات وراقدة في المظله وشبه نايمه ،فجأة حسيت بي جلبابي بترفع قمته على حيلي لقيتو قاعد وبرفع لي في جلبابي،قولته ليهو بي خلعه بسم الله انت جيت متين؟قال لي اسي دة،قولته ليهو مالك داير شنوو؟😳قال لي دايرك انتي انتي،قولته ليهو شنوو؟ي ابوطالب هوووي زح مني و احترم نفسك واطلع من البيت دة سووورعهه،قال لي لو م طلعتة بتعملي شنوو؟قولته ليهو لو م طلعته الحيحصل ليك م خير فاهم؟وجا عايز يمسكني جريت منو،قال لي انتي خايفه من شنوو؟انا والله نفسي فيك من زمااان لكن م كنت بقدر اعمل معاك حاجه في البيت عشان ناس البيت قاعدين لكن اسي نحن برانا وانتي بفرق معاك في شنوو؟كدة كدة انتي متزوجه وراجلك ميت يعني عاادي انا وانتي نعمل اااي شي زي المتزوجين،وانا بعد كم شهر كدة بعرسك عليك الله اعملي معي الحاجه دي😷قولته ليهو انت متخلف وشلته ليهو مفراك العصيدة كان قاعد جنبي،قال لي م تخافي عمتك المخرفة دي م بتعرفنا ولو دايرة انا يوومي بجيك هنا بالنهار لما عمتك تمشي الحواشات وبالليل بعد تنوم اها قولتي شنوو؟قولته ليهو شنينه ام قرينات ي معفن امشي اعمل كدة مع امنه اختك والله الا اكلم ليك ابووك اصبر بس 😡جا عايز يمسكني ضربتو بالمفراكه في يدو وراسو ،م عارفه ضربتو كم ضربه بس المهم م قصرته معاهو ،اثناء م انا بضرب فيهو كدة جات عمتي خديجه داخله ،من غير م تسألني ولا تفهم مني اي شي وقعت فيهو ضرب بالله كفتتو كفيت وم خلت لبعهه م لبعتها ليهو ومسكتو من جلابيتو قالت ليهو اسي تمشي معي بيتكم ي قليل ادب ي م نافع،اتفكه منها وجرة مشى،بعد م مشى وشبعتو ضرب جات قالت لي مالو المعفن دة معاك؟اتخيلو😂حكيت ليها بأي شي 💔قالت لي عافيه منك دقيتيهو الله يأزاهو المعفن ااسي بمشي بشكيهو لي ابوهو ،قولته ليها لالا خلي ي عمتي،قالت لي لا جاي ناطي في بيتي وبقل ادبو؟والله م اخليهو،لبست توبها وطلعت،،،
عمتي خديجه ادتني احساس بالأمان طووول قعدتي معاها ،كانت كل تصرفو بتتصرفو معاي بثبت لي انو الدنيا لسه بخيرها،وانو انت حتى ولو اتخزلته من اقرب الناس ليك حتلقى لسسسه في ناس عندها قلووووب بتحس وبتحن،وانو لسه في ناس فيهم روووح الانسانيهه❤
عمتي خديجه مشت لي خالي حمد وحكت ليهو بي عمايل ولدو وقلهه ادبو،خالي قال ليها هي ان لفت ولفت في النهايه بت خالو وحتى لو غلط عليها بنعقلها ليهو بس الموضوع بسيط،وقام نادى ولد ابوطالب قال ليهو اسمع انت بت عمتك دي دايرها؟موافق تعرسها يعني؟عمتي خديجه قالت ليهو تفوووو عليك وعلى رجالتك اسي انت في زمتك راجل مع الرجال ي المانافع ي السكاري،الله لا جاب عقابك لا انت لا اولادك،مرت خالي قالت ليها م تغلطي ساااي هي زاااتها شهد لو م ادتو فرصه م كان بجيها ،شهد م بتسألينا منها انتي نحن بنعرفها اكتر من نفسنا،في النهايه هو راااجل والراجل م عندو عيب ولاغلط،عمتي خديجه قالت ليها هووي هاا انتي ي ام لسان برة ي بتاعه الرجال انتي كمان عندك خشم تتكلمي؟م ياها سمعتك وسمعة بتك فاااايحة وماليه البلد كان على بتك بمسكوها من البحر بلقوها في الجنينه،وكان عليك انتي م فاضيه لي من اللف في السوق وكل يوم مسكه بتاع دكان وفاكه بتاع بوتيك ،انتي عندك خشم تتكلمي بيهو؟ابوطالب شال العكاز وجاي يضربها شختت ليهو شخيت في الأرض قالت ليهو كان راجل وابوك راجل اقطع الشخيت دة وتعال اللحقني هنا ،انتو ناس وسخين والوساخة طالعه من ابوكم المابشبه الرجال دة،،،خالي حمد قال ليها اتفضلي اطلعي لينا من البيت دة عليك الله م ناقصين مخرفين نحن ومش شهد دي انا بكرة ببجي بسوقها وبعرسها لي ابوطالب وانتي م تتدخلي لانو شهد بتنا،قالت ليهو اقسم بالله ي حمد تجي تعتب عتبه بيتي بالغلط استحمل البجيل ،م تشوفني وتقول المرة دي مسكينه قسما بالله لو م حرقتك حي ابوي يطلع من التراب وانا ياهو كلمتك وحزرتك ،وطلعت مشت خلتو،خالي حمد مرتو حرشتو وملت ليهو راسو زييييين بعدها جا لي امي قال ليها بكرة تمشي تجيبي لي بتك دي ترزعيها في البيت دة والجمعه الجايه انا بعرس ليها ابوطالب كفايه فوضى لحدي هنا،امي قالت ليهو هوووي هاا لعبه هي؟تمسكها من خايب وترميها في خايب تاني؟ابوطالب منو البتعرسها ليهو؟ولدك دة تامي راجل هو اكان تامي راجل م كان مشى ليها هناك في بيت عمتها وحاول يقل ادبو،شوف ي حمد لحدي الان انا كنت بعاين ليك بي عيني بس خلاص تاني شهد دي خطين حمر اوووعى تحاول ولو بالغلط تعرس ليها ولدك دة ياهو كلمتك انا😡 معاها،مرت خالي قالت ليها كييف تقولي على ولدي م راجل وقعدت تتناقش وتنبز في امي وامي زاتها م قصرت منها ردت ليها وحصلت المشكله بيناتهم لحدي م اتشبكو في بعض وقعدو يتضاربو،بس خالي جا مسك امي وقعد يضرب فيها بالعكاز بعد ضربها تمام طردتها من البيت قال ليها وشكك دة م داير اشوفو في البيت دة ،والزمن داك الساعهه كانت 9مساء ،قال ليها سوقي شفعك ديل واطلعي لي من البيتدة سرعه زاتكم غير الفقر م جايبين لينا شي،امي قالت ليهو بتطردني انا اختك عشان مرتك ي حمد؟قال ليها م اختي ولا بعرفك يلا طيري من هنا ،راجلك طلقكك لمن مسكتك كمان دايرة تقلي ادبك شيلي حجاتك ديل وغووري محل م ماشه امشي ومحل م دايرة تلفي امشي لفي،انا طبعا كنت قااعدة في البيت جاني احمد اخوووي قال لي امي قالت لي تعالي ضروري،قولته ليهو اسي؟قال لي اااي،لبسته عبايتي قولته ليهو في شنوو؟قال لي ماف شي يس قالت ليك تعالي،قولته ليهو طيب،عمتي خديجه قاالت لي م تمشي براكي،قولته ليها لالا انا بمشي وبجي اسي دة خليك قاعدة انتي،قالت لي لو غلطوعليك تعاليني جاريه سمح؟قولته ليها سمح ومشييت في نص الشارع لقيت امي واقفه لي ومعاها شفق اختي وشايله ليها شنطه ،قولته ليها في شنوو؟قالت لي نحن مسافرين،قولته ليها وين؟قالت لي اااي مكان لكن تاني بيتنا دة لو بقى قبله م راجعين ليهو،قولته ليها ليه في شنوو؟قالت لي خالك ضربني وطردني واسي انا ماشه جيت عشان اسوقك💔قولته ليها لكن ي امي بالليل دة نمشو وين تعالي ارح بيت ناس عمتي خديجه وبكرة انشاءالله بحلها 1000حلال،قالت لي والله وانا اقسمته وم بصوم تلاته يووم البلد دي انا بكرة كان اصبحته فيها احمد يكون م جايبني💔م عرفته اقول ليها شنوو ،ختتني أمام الأمر الواقع،قولته ليها سمح خلي نكلم عمتي خديجه،قالت لي لأ ارح هي مصيرها بتعرف،قولته ليها اها بالليل دة نمشي وين؟قالت لي اااي مكان انشاءالله بلدا طيرة عجمي المهم نطلع من البلد دي ،بالفعل اتحركنا مشينا الساعهه كانت عشرة،مشينا مسااافه طويله لغايه م وصلنا طريق الظلط ،امي دي كانت بتقيف في نص الظلط علشان توقف لينا عربات وبعد دة كلوو م بقيفو والدنيا ضلام بعد مسااافه وقف لينا بتاع سياحي فاااضي ،بعد م ركبنا الكمساري قال ليها ماشين وين بالليل دة ي اختي؟قالت ليهو انتو اتجاهكم وين؟قال ليها نحن اتجاهنا الخرطوم انتي ماشه وين؟قالت ليهو خلاص نحن زاتنا ماشين الخرطوم لكن م عندنا قروش💔قال ليها عديله اصلا البص ماشي فاااضي وم فيهو شي،كنا خايفين وم عارفين نعمل شنو ولا حنعمل شنو ولا لمانصل حندق باب منوو،امي قالت لي اضرب لي خالتك مرام عشان اكلمها تلاقينا بعد م نصل هناك؟قولته ليها ممكن،امي قالت للكمساري ي اخوي عليك الله اديني تلفونك دة دايرة اضرب بيهو لي اختي عشان تلقانا في الموقف بعد م نصل،قال ليها سمح اداها التلفون،ضربت لي خالتي مرام واتكلمت معاها وحكت ليها الحصل قالت ليها اها نحن اسي جاين الخرطوم انتي تعالي اتلقينا في الموقف عشان نحن م بنعرف مكانكم الساكنين فيهو،خالتي مرام قالت ليها خلاص بعد م تصلو اضربو لي انا بوصف ليكم،بالفعل وصلنا الخرطوم بتاع السياحي نزلنا في الميناء البري،وامي بعد م وصلنا اتصلت على رقم خالتي مرام لقتو قافل،احترنا نعمل شنو بقينا واقفين في نص الميناء والساعه كانت 4صباحا،جا بتاع تاكسي وقف ،واظن هو انتبه لينا واقفين ،قال لينا دايرين مشوار؟سكتنا خليناهو م ردينا عليهو،مشى رجع لي تكسيهو،تاني جانا راجع قال لي امي ي اختي م تخافي انا م داير اعمل ليكم حاجه غلط لكن وقفتكم دي هنا كدة م صح خصوصا انو انتي معاك شفع صغار كدة م خايفه عليهم؟امي قالت ليهو منتظرة اختي تجينا لكن إتأخرت،قال ليها لو عارفه محلها ساكنه وين انا بوصلكم ولو م عندك قروش م تخافي ،،،قالت ليهو والله ي اخوي م عارفه تقريبا ساكنه في حته اسمها الصافيه ولا شنوو م عارفه،قال ليها اختك م عندها تلفون؟قالت ليهو عندها لكن مقفول،قال ليها كدة احاولو انا،ادتو الرقم اتصل فيهو لقاهو مقفول برضو،قال ليها اختك م عارفاك حتنتظريها؟قالت ليهو عارفه لكن م عارفه يمكن تلفونها قفل كهربه،قال ليها سمح تعالي انا بوصلكم لحدي الصافيه مع انها بعيدة لكن بوصلكم لزمن نصل داك تلفونها لو قافل كهربه بتفتحو،،،انا شخصيا خفته وم ارتحته ليهو بس تاني اتكلنا على الله وركبنا معاهو،قال ليها ي اختي امتي جايه من وين؟امي قالت ليهو من النيل الأبيض،،قال ليها بت بلدي يعني انا زاتي منها اهلي في كوستي❤قالت ليهو اهاا كويس طيب،قال ليها لكن ي اختي نصيحه اديك ليها اعتبريها من اخو لي اختو البلد دي م ساهله زي النيل الابيض ،هنا النفوس وسخانه وانتي وقفتك دي كانت غلط خصوصا انو عندك بت بالعمر دة معاك ماف أمان هنا ابدا فهمتي؟لما وصلنا ،قال لينا اها دي الصافيه كدة احاول في رقم اختك دي ،حاول فيهو كدااا ولسسه مقفول ،امي قالت ليهو امشي انا بعرف البيت جيت ليهو قبل كدة،قال ليها متأكدة ؟قالت ليهو اااي،بالفعل نزلنا ومشى،مشينا وقفنا لينا جمب جامع كدة شويه كدة اذان الصبح الأول أذن ،جا ولد طالع من الجامع سلم علينا قال لينا انتو ضايعين ولا شنوو؟امي قالت ليهو لالا ي ولدي لكن م عندنا محل ننوم فيهو للصباح بس،قال ليها خلاص تعالو ارقدو في الجامع هنا لي بكرة،دخلنا رقدنا في البلاط سااي،انا طبعا ابدا م كنت قادرة انووم محتارة في حياتنا العبارة عن مسخرة دي،شويه كدة الولد جانا قال لينا اسي الناس بجو بصلو الصبح ارح فوووق في مبنى فاضي هو عبارة عن مدرسه لكن بكرة الجمعه الطلبه مؤجزين في غرفه فوق اقعدو فيها ،طلعنا فوق دخلنا الغرفه م كان فيها سراير ولا اي شي ،رقدنا في الأرض لحدي الصباح جا وجاب لينا حجات الشاي،شكلها دي غرفتو لانو فيها بوتجاز وتلاجه مويه صغيرة وحجات زي دي،امي قالت ليهو ي ولدي لو عندك تلفون اديني دايرة اضرب لي اختي عشان اوصف ليها تجي تسوقنا،ادتو الرقم في البدايه الرقم دخل واي شي،اول م ردت امي وقالت الوو،الخط فصل،تاني رجعنا اتصلنا برضو التلفون فصل،عدنا المكالمه كم مرة وحصلت نفس الحركه،ااخر مرة انا شلته التلفون واتصلته والولد فتح لي مكبر الصوت،الخط فتح فچاة سمعنا خالتي بتقول :اقفل الخط دة اقفلو سرعه سرعه،....
بعد كدة ممكن نقول من هنا ابتدأ المشوار😌
يتبع....