#عشقت_فصليتي
البارت ال 7
بقلمي #ميديا_الفهد
ام مازن.. ارتاحيتي هسه من ضاج
ملك.. بگلبي واني شنو سويت ، اوف ياربي
ام مازن.. شوفي اكولج تره مازن اكله وطبعه نحس شويه ، يعني الكبب واللحوم مياكلهن ،ملابسه لازم دائما نظيفات ومكويات ومرتبات، باجر الصبح اصعدج عليها واشوفج
ملك.. ان شاء الله، بگلبي بس خليني اروح انام مو حيلي انهد صار يومين منايمه زين
طبيت للغرفه حارة وخنكه وشهر ال 9 يعني الجو حار ، طلعت باوعت منا منا ماكو احد اخذت المخده ونمت ع التخم الي بالهول مشغلين مولد يعني بس ع البنكه ظلمه الدنيا نزعت الصاية والشال ونمت
مازن.. متعشيت طكني الجوع ساعه ونزلت للمطبخ حته أكل شي ، واني ع الدرج البيت أظلم ،مشغل ضوه التلفون وشفت خيال ع التخم نزلت ع كيف شفت الفصلية نايمه ونازعة صايتها ، لابسه جنز وتشيريت وجسمها مليان وابيض والشعر صاير ع وجها ، بقيت اتفرج عليها شكد جميله
ملك.. نايمه بسابع نومه واحس ضوه بوجهي عبالي اتحلم بس بقى الضوة فتحت عيني وكلشي ماشوف بس ضوه قوي بعيني غطيت وجهي وكعدت عدل
مازن ..من كعدت رحت شغلت الضوة ، شافتني ارتبكت وكامت ادور ع صايتها بقيت واكف اباوع عليها
ملك.. نايمه ومطفيه ومازن كبالي اريد اندل شالي ماكو انعميت عمي وهو واكف بس مبين عليه معصب وعيونه تجدح نار ،،
تريد شي ؟؟
مازن.. ليش نايمه هنا؟؟ مو نطوج غرفه
ملك.. هاا اي بس حارة وشفت ماكو احد نمت هنا
مازن.. تدرين بالبيت غيري سبع زلم هنا وانتي نايمه بهل وضع ، اذا شافج احد من اخوتي بلا شنو موقفي إني بعتبارج ع ذمتي
ملك..ماعرف شجاوب بقيت مدنكه ،
مازن .. ليش مجاوبين من احجي وياج ، ليش لابسه هيج شنو وين كاعده مثلا بلندن ؟
ملك.. ما عندي غيرهن
مازن.. ليش شنو مجايبه هدومج وغراضج ؟
ملك.. لا جبتهن بس
مازن.. بس شنو ليش سكتي ؟
ملك.. ابوك ماقبل افوت جنطتي وشمرها بوجه اهلي
مازن.. اممم لبسي صايتج وبعد لاتنزعيها ودخلي غرفتج
ملك.. فشلت فشله من هاي الزينه طبيت للمخزن لان مستحيل اسميه غرفه ، وبقيت للصبح كاعده من الحر مكدرت انام
مازن.. كعدت بالمطبخ اكلت جبن وزيتون وشربت جاي ، طلعت لكيتها ماكو اكيد صعدت لغرفتها ، مبين هل بنية مو راحة الا شعدها نازله للهول بهل وقت وبهيج ملابس ، شو الهول بي بس بنكه حته السبلت طافي ، استغفر الله من ذنبها
ملك.. طلع عليه الصبح واني اتگلب من الحر من السته الصبح دكت الباب ميري وكلشي مافتهم عليها الي افتهمته انو لازم نبلش نسوي ريوك ، ياربي شكو يشتغلون عماله وكاعدين من الصبح
حضرنه ريوك عبالك العشيرة البيض والجبن والمربة والكيمر وكومه اصناف وكل واحد وشيحب ياكل ، الجهال نزلوا مبدلين تريكوا وراحوا المدارسهم ، وانوب الاخوة والاب والام ، واخر شي نزلن الجناين من السته لل9 احنه واكفين اني وهل مكروده انحظر هاي شلون متحمله إني بس ساعدتها شويه طاح حظي
مازن.. كعدت بالعشرة لكيت امي والفصليه وياها فوك بست امي من رأسها وصبحت عليها
ملك.. ورة كرب الرييوك انوب التنظيف واني كلش تعبانه اصلا منايمه الليل كله ، صعدنه فوك اني والحجية لان ممنوع اكوللها خاله ،، ومستمرة بالاوامر عبالك ضابط بالجيش مو مرة جبيرة
وصلنه لغرفة مازن ، جان يطلع وسلم ع الحجية ونزل ،،
ام مازن.. شوفي ملك هاي غرفة مازن كلشي متحركين منها ماعده تنظفينها وترتبين ملابسه لان يتخبل اذا احد حرك شي من مكانه يلا بلشي
ملك.. دخلت للغرفه تخبل بلا هاي غرفه والي اني كاعده بيها غرفه الحمد لله والشكر،
الاثاث يجنن بيجي وابيض الميز عبارة عن عطور ومعطرات الكنتور فتحته نظيف ومرتب ، فتحت الجرارات حته الجواريب مصفطه اول مرة بحياتي اشوف هيج ولد مرتب ونظيف بالعاده احنه نركض نلملم وره اخوتي يشمرون بكل مكان ،، شنظف منها شو هيه تلمع لمع معقوله هاي الغرفه تتوصخ ، الغرفه جبيرة وبداخلها حمام سديت الباب وبحجة ارتب طبيت سبحت اويلي من الحر جسمي مدبك
مازن .. تريكت ودااطلع اتذكرت محفضتي فوك صعدت اجيبها ،سمعت صوت مي بالحمام معقوله اني ناسي المي مفتوح ، فتحت الباب لكيته مقفول استغربت
ملك.. مندمجه بالمي البارد والشامبو ومااحس الا الباب يندك عزة بعيني اكيد هاي الحجية اليوم تلعب بيه طوبه يارب شسوي ،، سديت المي بسرعه والشامبو بعده ع راسي ، متت خوف لا اكدر اكمل سبح ولا اكدر افتح الباب ،،
مازن.. ادك بالباب محد يجاوب ردت اكسر الباب ، رجعت دكيت قوي
ملك.. عزة راح تكسر الباب عليه ،، لحظه راح اطلع ثواني ،، وجان حظي المصخم كملها عليه طب الشامبو بعيني وكمت اكمز عيوني احتركت
مازن .. سمعت صوتها هاي الفصلية شجابها لغرفتي وشسوي بالحمام ، تخبلت بقيت كاعد ع القنفه انتظرها تطلع
ملك.. كملت بسرعه وعيوني صارو دم ، لبست هدومي نفسهن والشال وطلعت ولكيت مازن كبالي ،من شفته راسا رجعت للحمام وسديت الباب عزة كاعد وحاط رجل ع رجل
مازن.. ليش رحعتي اطلعي اطلعي
ملك.. اويلي طلعت ،،
مازن.. شعندج هنا ؟ يعني صارلج يوم واحد وماعرفتي تثبتين كل شويه كامزة بمكان
ملك.. اسفه عبالي طلعت
مازن.. ماكللوج اني مااحب احد يلزم غراضي شلون دخلين للحمام مالتي ولج اني ميري ماخليها تدخل لغرفتي مو انوب انتي
ملك.. هو يحجي واني ابجي شكول شحجي مالي حق حته اتنفس ، ، والله من الحر شفت الحمام ومتحملت سبحت راسا
مازن.. المهم هل مرة سويتيها مرة ثانيه متتكرر اكو حمامين جوة استخدميهن ، واخذي كل المناشف خلي يغسلوهن
ملك.. والله مستخدمتهن استخدمت بس الشامبو ،
مازن.. اني متعلم يوميه ينغسلن المناشف واكو بالحمام ميز بداخله مناشف طلعي منه وخلي بالحمام وذني القمصان يرادلهن كوي خلي ميري تكويهن
ملك.. ان شاء الله بس اني راح اسوي كلشي يخصك هاي تعليمات الحجية اذا مااعندك اعتراض ، باوعلي صفح وسكت ونزل جوة
مازن.. يوم انتي مو تدرين بيه اضوج احد غيرج يدخل الغرفتي ،بيج قصص من حياتنا M&T
ام مازن.. يمه تره اني مرة جبيرة وبعد مابيه حيل خدمتك اتعلم ع ملك هيه راح تسوي كل الي تحتاجة
مازن .. بكيفج يمه يلا اني طالع تريدين شي
ام مازن.. لا يمه سلامتك
مازن.. ركبت سيارتي وداروح للشغل وفتت من الكرادة داخل شفت محلات الملابس وكفت مااعرف ششتريلها لا اعرف قياسها ولا شنو اشتري دخلت للمحل بيي ملابس بيت تراكات ودشاديش كلتله لابو المحل سويلي تشيكله بيها كل القياسات مال دشاديش سويهن درزن وخليلي من ذني هم اشرتله ع الملابس الداخليه استحي اكوله اسمهن هههههه
ملك.. غسلت ملابسه وكويتهن ورجعتهن لمكانهن ونظفت الغرفه وعطرتها ونزلت لكيت مواعين وكعدت اغسل بيهن ، يعني من الأظافر الطوال والايد الحلوة والدوام للخدامه والكراب طكت روحي احس اريد اهج ،
شلت التلفون واريد اخابر ع اهلي بلكي ارتاح ،بس هو الحظ الاغبر دومه معاكسني ، لكيت الموبايل طافي مخلص شحن والشاحنه بجنطة الملابس شهل الحظ العگر ،، بقلمي ميديا الفهد
مازن.. اشتريت ملابس ودكت منار عليه ، اويلي بس لا عرفت بالسالفه
📞الووو هلو حياتي شلونج
📞مازن صدك الحجي الي سمعته
📞شنو حبيبي شسمعتي ؟؟
📞انت تغشم نفسك ، منو هاي البارحة العقدت عليها واني اخر من يعلم
📞حبيبي ماكدر احجي هسه دااسوق من اوصل ادك عليج وافهمج
📞لا مااصبر وكف السيارة واحجيلي ، والقرآن تره بعد متسمع صوتي ابد
📞انتي بس ع كيفج لاتعصبين، اي صح الي سمعتي بس وغلاتج غصبا عليه تعرفين ابويه اذا كال حجاية بعد هاي هيه يقفل ، والنبي حالها حال ميري حته مشايفها
📞مادري گلبي ممطمن ، واصلا مداصدك معقوله هسه انت متزوج وحده غيري 😭
📞لج خبله ممزوج هيج بس ع الورق ولج اني الج وماصير الغيرج ولج من عمري 8 سنوات كالولي منار الك واني انتظرج تكبرين و تخلصين دراستج حته اتزوجج
📞شوكت اطلكها انطيني جواب ووقت محدد
📞انطيني وقت اقنع ابويه اخلي يرضه اطلكها وارجعها لا اهلها، اهم شي عندي رضاتج
📞خلي نشوف شوكت يصير هل حجي ويتنفذ ، يلا اني اروح بااي
📞باااي ياعمري
ملك.. بقيت بهدومي متت احس نفسي اقذر وحده بالعالم رغم سبحت بس احس روحي وصخة منورة هل ملابس 😞
واحنه من الريوك للتنظيف من التنظيف لغسل المواعين ماكو راحه بهل البيت مدري هل القلعه
صار الليل واني هلكت كمت اغفي بالمطبخ وكل شويه ميري دكعدني تدري الحجية ترزلني اذا تشوفني نايمه ، صارت ب10 بالليل والسهرة بعدها مستمرة كمت ابجي من التعب وكل شويه جاي واحد من الجهال يريد شغله
كعدت ع الكرسي وخليت راسي ع الميز ونمت 😴
مازن.. طبيت للبيت من باب المطبخ لكيت ميري تتصفح بتلفونها شافتني وكفت اشرتلها اكعدي ،
اباوع ع الفصلية نايمه خطية مبين عليها التعب خليت العلاليك مال ملابس ع الكاونتر وكلت الميري تنطيهيا من تكعد
ملك.. صارت ب11 و نص ميري كعدتني
ميري.. ملك نام بغرفتك يلا ، هاي ملابس مالتك بابا مازن جاب
ملك.. ترطن كل عاده ماافتهم عليها ، باوعت شفت علاليك بيها ملابس كيفت واخيرا راح اخلص من الي لابستهن ، اويلي شكد عيب حته ملابس داخلية 👙 جايب 🙈
دخلت للحمام سبحت وبدلت ، شويه ارتاحيت
مازن.. مرت الأيام وبديت اتعلم ع فصليتي قايمة بكل أموري واكلي وملابسي ، وابد مالها صوت
منار اذتني هواي اتغيرت مو مثل قبل بس تستجوبني وتحاسبني واي كلمة حلوة مااسمع منها ، مع هذا عاذرها لان اكيد تغار عليه
،
ملك.. عشت اسوء ايام حياتي بهذا البيت محبوسه والشغل عليه ومحد يكول شكراً أو كلمة طيبة زهكت روحي كمت اشحن تلفوني يم ميري بالختله لان ممنوع اتواصل ويه اهلي هاي تعاليم الاب الجبير ابو مازن هذا الرعب مالتي بس اسمع صوته مااعرف شيصير بيه اكوم ارجف من الخوف
مازن.. يوم جمعه كلنه نلتم سوة ونكعد نسولف ، وهوسه
ملك.. كاعده بالمطبخ ماعدنه شي مكملين الغدة بس انصبه ، ودك تلفوني امي تتصل ، كلت مدام ماكو احد اطلع للحديقه الي ورة البيت اجاوبها
📞الووو هلو ماما شلونج احجي بسرعه ماكدر اطول
📞والله حرام انتي عايشه بخوف ورعب وهاي المسعده كاعده كبالي ومسويه نفسها عروس
📞منو تقصدين
📞منو يعني الي انفصلتي من وراها ، جابها يمي وكعدها معززه مكرمه
📞شنووو 😭 حسبي الله ونعم الوكيل عليها وع ابنج الصكط
📞اي والله بس مو ابني هذا تبريت منه ليوم يبعثون
📞يلا ماما ماكدر احجي اكثر يلا بااي
ملك .. سديت الخط ونداريت ولكيت ابو مازن واكف ورايه 😱
……………………………………………………
شنو توقعكم شراح يصير شاركوني تنبائتكم للبارت الي بعده ، تحياتي الكاتبة #ميديا_الفهد
بيج #قصص_من_حياتناM& T