#عشقت_فصليتي
البارت ال 1
بقلمي #ميديا_الفهد
ليس كل ما تفقدهُ خسارة ،،، فالأستغناء عن البعض حياة جديدة
فالحياة محطات،، وكل محطة تعلمنا درساً مفرحاً او قاسياً ، وليس المهم ان نركز على المفرح كثيراً ، فالقاسي يعلم اكثر لانه لايُنسى ابداً
ملك.. مسك هااي منو وائل؟؟
مسك.. اش اش ولج نصي صوتج مفضوحة هسه ماما تسمعج تسويلي عرس
ملك.. كولي هذا منو وشنو هاي المسجات الي بينكم ع الماسنجر ؟ احجي كولشي لا اكول الماما
مسك.. هذا ابن عمي ماجد
ملك.. ولج ياعمي ياماجد ؟؟ والقرآن بس يسمعون بيج اهلي يثرموج ثرم خبله،، مو تدرين بأبويه ومشاكله ويه عمي ماجد شلون هيج تسوين ومنين عرفج صار سنين مشايفيهم
مسك.. اي ادري بمشاكلهم بس مو بيدي حبيته وتعلقت بي ،، قبل كم شهر دخلي خاص وعرفني بنفسة بالبداية انطيته حظر وبعدين دخلي من غير حساب وخلاني احبة،،
الله عليج ملوكه لاتحجين لاحد خلي سر بينه، انتي اختي الصغيرة وماعندي غيرج احجيله
ملك.. لا والله اني لو ماشوف المسجات جان لهسه محجيتيلي وكلشي مااعرف،، ع كلاً لازم تنهين كلشي لان برأيج شنو نهاية هل الحب ؟؟
مسك.. عود انتي اختي الوحيده ولازم توكفين ويايه ع الحلوة والمرة ، عبالي حالي حال البنات عندي اخت وستر وغطة عليه بس طلعت غلطانه 😢
ملك.. دروحي انتي مو مال نصيحة ، راح اسكت بس معليه بيج بس ديري بالج لا اخوتج يلزموج ويخلصون عليج 😒
مسك.. يمه فديت الحب فديت أختي اخر العنقود 😙😚
ملك.. دوخري وخري هسه صرت حب وماعرف شنو
ملك.. نسيت اعرفكم بنفسي اني ملك ،، عمري 15 سنه بشرتي بيضه عيوني جوزي كبار شعري طويل اسود جسمي زين لاسمينه ولاضعيفة ،، طالبة بالمدرسة اعيش ويه عائلتي المتكونه من ماما وبابا واخواني ستة وإني وأختي مسك وعدنه اخت كبيرة متزوجة هاي اكبر وحده بالولد والبنات وبغير محافظة عايشة احنه من بغداد، حالتنا المادية مو كلش زينه إني المدلله مال بيت لان اخر العنقود والكل يحسبلي الف حساب لان بابا ميقبل احد يحجي ويايه نص حجاية
بابا رجال جبير عمرة 60 سنة وامي 55 من همه صغار متزوجين اخواني 3 متزوجين، وواحد انخطف بالسقوط ومنعرف بي وين حته گبر ماعنده، واثنين مامتزوجين ، فالي بالبيت اني ومسك واخويه الوسطاني احمد هو ومرته وجهاله اثنين ومحمد وعبدالله وماما وبابا
نرجع لعمي ومشكلته ويه بابا من جنت صغيرة توفه جدي وصارت مشاكل ع الورث وبابا جان الجبير فعمي اتجاوز عليه وصار زعل بينهم سنين ،،عمي عنده 3 ولد وبنات اربعه، ساكنين بالديوانية
ام ملك.. هااي وينجن عايفتني وحدي انوب المسعده يم اهلها 😠
ملك.. جاين ماما ثواني ،لج يلا كومي اليوم كلشي ماسوي اليوم كل الشغل عليج 😁 بعد شيخلصج مني وكعتي بيد مترحمج 😂
مسك.. 😔 اووف ربي شمسويه بدنيتي سلطت هيج بشر عليه ،، امري لله ست ملك منكدر نحجي شي ظهرج قوي
ملك.. 😌 ههههههههه لعد شعبالج بابا اني دولة وعلم 😜
وائل.. يابة اريدك بموضوع 😐
ابو وائل ..خير ابني شبيك
وائل.. يابة انت لشوكت تضل مكاطع اخوك الجبير والوحيد ، صارلكم سنين مامليتوا هو شابقي بالعمر
ابو وائل.. وائل انت شلك بهل السالفه ، سد الموضوع
وائل.. يابة ترة انت الغلطان وانت الصغير مراح تخسر شي اذا رحت وصالحت عمي كاظم
ابو وائل.. 😠😠 انت شنو اليوم متحلم بي لو تريد تغثني وتضوجني امشي ولي من يمي الله سلطك عليه اليوم
وائل.. ع كيفيك يابة ولو هو الي يحجي الحق هل ايام يصير مو خوش بس من تفقدة الاخوك وانت متتحاجون بذاك الوقت راح تندم وخاصة عمي كاظم مريض صار فترة
ابو وائل.. شنو شبيه مريض وانت منو كالك ؟؟
وائل .. هااا محد كالي 😶
ابو وائل.. احجي ولك شبي عمك
وائل.. اني احجي ويه ابن عمي محمد وهو كالي ، ابويه مريض صار فترة گلبة مو زين
ابو وائل.. هذا كاظم الجبل يتمرض ويصير بي قلب لا حول ولا قوة الا بالله
وائل.. اي يابة لعد ليش اني اكولك صالحة والدنيا متسوة زعل يطول اكثر من هذا
ابو وائل.. الله كريم يصير خير ان شاء الله
ملك.. كعدت بالمطبخ وحاطه رجل ع رجل واباوع ع مسك تنظف وتكرب واني بيدي قوطية ببسي واشرب بالگصبة واطلع صوت 😂
مسك.. طيح آلله حظج لعبتي نفسي لاسوين هل صوت اشمئز 😖
ملك.. بعد ماكو خوف واحترام منا وهيج هههههه ،، من النهاردة مفيش احترام مفيش الوان من النهاردة حب مفيش دا كمان،، اغنيلها واضحك عليها ، وهيه كامت عليه بالماسحة
مسك.. ولج اليوم اكسر راسج الگوي اوكفيلي كلبة
ملك.. ماما لحكيني تعاي شوفي مسك شعدها
مسك.. ولج كلبة سكتي حبابه
ملك .. هاي شلون دبرتيها كلبة وحبابه بنفس الجملة اليوم الا احجي عوفيني
ام ملك.. هاي شكو شبيجن تتناكرن شوكت تعقلن وحدتجن اطول مني ، شعدها مسك يلا احجي
مسك.. 😱😭
ملك.. اباوع ع مسك راح تموت من الخوف 😂
ماما عدها ماسحة تريد تضربني بيها
مسك.. 🙂😌
ام ملك.. طاح حظجن ولن منا يلا كل وحده ع شغلها
مسك.. لا يوم خلي ملك ترتاح خطية مالها خلك تعبانه
ملك.. 😳 ولكم هاي من الي يحجي مدااعرفج لج عيني مسوك ،، الظاهر التهديد جاب مفعول🙃
مسك.. اي والله شسوي حاجتك يم الجلب كوله يسيدي
ملك.. هذا منو الجلب 😒
مسك .. اني اني ارتاحيتي ملوكه خانم
ملك .. اي عبالي 😼
ملك.. خلصت مسك تنظيف وغسلت الحوش واني افتر وراها اغث بيها خطية وهيه ساكته تخاف مني مو بيدي اني نذلة 😂😂
اجوي اخواني وابويه ابويه عنده محل مخضر واخواني اثنينهم يساعدوا ، واحمد يشتغل ويه صديقه مشتركين بمحل حلاقة،، طبعا محمد طالب كلية بس بالعطل يساعد ابويه ، وعبدالله متخرج من المعهد بس مثل مامعروف بالعراق ماكو تعيين لهذا يساعد ابويه وهم يطلع مصرف اله
صبينه الغدة اني ومسك وامي وفرشنة السفرة بالكاع ، وكعدنه جان ابويه حجة
ابو ملك.. اليوم تدرون منو دك عليه
ام ملك.. منو دك عليك حجي ؟؟
ابو ملك.. اخوية ماجد
ملك.. كلنه تفاجئنة بس خطية مسك شركت بالتمن وطلع من خشمها 😂
ام ملك.. خير شذكرة بيك بعد كل هاي السنين
ابو ملك.. من سمعت صوته استغربت سلم عليه وترجاني ماسد التلفون ، كلت اسمعه مراح اخسر شي ، كالي اريد امرلك فد يوم اشوفك مشتاقلك ومن هل كلام
ام ملك.. حجي انت الجبير وگلبك هم جبير ان شاء الله ،سامحه مهما كان هذا اخوك واصغر منك
ابو ملك.. هو هم هيج وكال نهاية الشهر راح يجي عود حظروا نفسكم
ملك.. اباوع ع مسك واضحك ، كلتلها هاي مخططكم انتي وائل مو ؟ واكرص بيها
مسك.. لج قنادر اسكتي لحد ينتبه علينه ناوية اليوم ع موتي
ملك.. سكتت ،، خلصنه اكل شلنه السفرة وخطية مسك غسلت كل المواعين الي اليوم دوري اني اغسلهم
مسك.. كاعده اغسل المواعين وتلفوني يرج بجيبي، اخاف اطلعه هاي ملك فضيحة ، اكيد هذا وائل، خلي اطلعه وشيريد يصير خلي يصير
ملك.. هاي وين مسك شو فلتي ، مجاوبتني وراحت صعدت فوك ، يبوه الفضول دمرني اصعد اشوف شبيها ، صعدت لكيتها تخابر شافتني رأسا سدته
هاي ليش سديتي الخط شنو خايفه مني ؟؟
مسك.. هاا لا عبالي امي
ملك.. لا تدرين كل زين امي متصعد فوك منورة مفاصلها ، بس انتي خفتي مني عبالج افتن عليج مو ؟ يعني اني اتشاقه واضحك وياج واخذتي الموضوع جد ، لو اريد جان رأسا فتنت من الصبح عليج بس أنتي لئيمة
مسك.. حقج عليه حبيبتي والله لو تدرين شكد اخاف مو بس منج لا من كل البيت بسبب مشاكل بابا وعمي ، تعالي كعدي هسه كدامج احجي ويه وائل لو تدرين شكد حباب وخلوق ويحبني
ملك.. كعدت تسولف ويه وائل وطلع هو الي أقنع ابوه حته يصالح بابا ، الصراحة كبر بنظرنه لان ديسوي المستحيل على مود يلم شمل بابا وعمي كل هذا في سبيل يكدر يخطب مسك بلا عراقيل ومشاكل
مرت الايام واجة يوم الي يجون بيت عمي امي دزت ع اختي المتزوجة لان طبخها طيب واني ومسك مخبوصين خبص بالبيت تنظيف وترتيب
مسك.. ولج ملك مااصدك اليوم يجي وائل واشوفه صارلي 8 اشهر بس ع الصور والاتصال ،، ولج خاف يشوفني بالحقيقه ومااعجبة
ملك.. خلي يطير هل اسود هو وين يلكة وحده بجمالج وبحلاتج
مسك.. لج نعال لاتقلدين ع حبيبي لا اموتج
ملك.. والله طلعي بس عيونه حلوة والباقي شيلي وشمريه بالزباله 😂
مسك.. 😠 مو صوجج صوج الي يسولفلج ويفضفض وياج عوبة ، خلي نشوف فارس احلامج بالمستقبل ا
ملك.. بلله بلا زحمة لاتحجين بفارس احلامي هذا شي ثاني قابل مثلج احبلي واحد اسود مزرق 😂 لاحبي اني عريس الغفلة لازم اشكر وعيونه خضر مو شلون ماجان 😍
مسك.. اي خلي نشوف ع كولتهم الماية تكدب الغطاس ،، وبعدين وائل اسمر لان بالديوانية وحارة عدهم وهيج اسمر الا هو حنطاوي
ملك.. 😂😂 ولج اجذبين ع نفسج لو عليه هو من بطن أمه اسود هيه مال دروب ، اسمر من الحر 😏
مسك.. وانتي شعليج اسود ازرك ميهم اهم شي احبه ويحبني واني مقتنعه بي 😌
ملك.. اي حبي اقتنعي براحتج وعود خلي نشوف جهالج بالمستقبل شلون يطلعون مفحميين عود هم كولي من الحر حته اخنكج 😂
منى.. هاا شبيجن تتمضحكن ضحكني وياجن
ملك.. دنضحك عليج شلون تريدين تضحكين ع نفسج 😂
منى .. 😠😠😒
مسك.. لاحبيبتي هاي ملك خبله تشاقه وياج زلكت وكامت تضحك عليه
منى.. اي عيني مو تشاقه ويايه بس لان اني غريبه الكل ميريدني ومحد يحبني بهذا البيت
ملك.. اهوووو عمي والله اشاقه قابل شعندي وياج بالعكس مرت اخوية واموت عليج حبيبتي
منى .. عود عبالي اساعدجن بس مادام هيج اروح اتمدد احسن متستاهلن
ملك.. لا الله عليج تعاي ، هو احنه خلصنه صار ساعه بعد وكت يابة 😒
منى .. يمه يمه منج ومن اللسانج محد يكدر يتقارش وياج وكحة
ملك.. 😒😒😒
مسك.. كافي والله عيب عليجن صدك جذب ، ملك زماله احترمي منى اكبر منج عيب
ملك.. يبووه قابل شسويتلها ، سكتت عمي سكتت
راح منى ،، يبوه شهل اللزكة تريد بس تسوي مشكلة
مسك.. ولي انتي الثانية هم ماقصرتي اللسانج اطول منج
محمد.. فوتن جوة فوتن اجوي بيت عمي
مسك.. يمه گلبي يمه😖
ملك.. ولج جاين يصالحون بابا وهيج صار بيج لعد لو جاين يخطبوج شسويين
مسك.. والله يمكن اموت ، مااصدك يجي هل اليوم
ملك.. دخلنه جوة ونسمعهم دخلو جاي عمي ولدة ال3 ، مسك كتلت نفسها تريد تشوف وائل بس خطية ماشافته ،
كعدوا دزينه المي بيد محمد وانوب الجاي وكعد عمي يبوس بابا وبجوا نسمعهم والله موقف مؤثر كلنه دمعت عيونة
ابو وائل.. وين البنات اريد اشوفهن صار سنين مشايفهن ،
ابو ملك.. حجية تعالي انتي والبنات
ملك.. لبسنة شالاتنه خطية مسك ترجف رجف عبالك معدوم ويمشي لمنصة الاعدام تتعثر برجليها واني اذبلها حجي اضوجها مو بيدي شريره😈
مسك.. يمه گلبي اووف راح يوكف گلبي ولج ملوك ،،
وائل .. من كال ابويه اريد اشوف البنات ردت اهلهل جنت خايف ماشوف مسك واني سويت كلشي لخاطر عيونها الحلوات ، اويلي دخلن والحب وياهن لابسة دشداشه زيتوني وهيه بيضة وشال بيجي وجها مو وجه لا كمر منور والعيون العسلي اوووف تموت😍
ملك.. دخلنه كلنه واني اباوع ع وائل خطية وجه يوزع ابتسامات وماشال عينه من مسك والاخت مدنكه عود مستحية وهيه كتلت نفسها تريد تشوفه ، عمي سلم علينه وتعجب بيه شلون كبرانه وصايرة مره مثل ما كال خجلني واني الي مااخجل ☺
بقوا يمنه يومين ومسك تبصبص منورة الباب ع وائل ،
ابو وائل.. عبدالله شعجب لهسه ممزوج وانت وابراهيم نفس العمر ، ابراهيم عنده اثنين والثالث بالطريق
عبدالله.. والله عمي العيشه صعبة وهنا بغداد المرة تريد ذهب ومهر وبيت صعب علية ، خلي شوية الم نفسي والله يفرجها ان شاء الله
ابو وائل.. لا والله تاخذ وحده من بنات عمك وتكبعوها بعباتها
ابو ملك.. متقصر اخوية والله بس حجايتك تكفي
ابو وائل.. تره ماجاملكم وبنتي ورد العبدالله حته لو تكعدوها ع الحصيرة هيه بتكم بعد
ملك.. خطية عبدالله تلبس بنت عمي اكيد تشبه اخوانها 😂
ام ملك.. لج ادب سزز ليسمعج اخوج ويصدك
ملك.. رحمة لمحمد وين اكو هيج زواج العالم وين صارت واحنه وين اكو بشر ينهدي والله عجيبه ياربي
مسك.. انتي بس اطلعي منها واحنه بخير ام اللسان
ملك.. اي عيني ميهمج اخوج اهم شي مصلحتج حته تصير علاقات ويتمهدلكم الطريق مو ست مسك
نائل.. رحت ويه أبويه البيت عمي. بغداد طبعا بلكوة رحت وياهم مااحب الطريق الطويل كله منورة وائل حب بنت عمي وسبى الدنيا لحد ماقنع ابويه يروح يصالح عمي ،،
خلي اعرفكم بنفسي اني نائل عمري 20 سنة طويل واسمر وعيوني كبار ناعسات موكف الديوانية ع تك رجل 😅 ممكمل دراسة بين قوسين صايع ،،
من دخلن بنات عمي وجنتهم اجتي عيني ع بنية صغيرة حليوة من خلال الحجي عرفت هاي ملك وصدك ملاك بجمالها وجسمها انوب لابسة تراكسود لاطش وهيه ملاينه بقيت بس صافن عليها وهيه ولا باوعتلي ولامهتمه ، بقينه يومين يمهم وهيه مطنشتني عبالك اني مموجود غير مرئي ، كاعد بالهول ويه محمد وشفتها يم المغسله كمت سويت نفسي اريد اغسل
ملك.. طول هل يومين واحد من ولد عمي الصغير نائل كتل نفسه عليه وإني مسويه روحي ممنتبه عليه ،، واكفة ع المغسلة اغسل بيها ومااحس الا واحد ورايه انداريت لكيته هو ،، يبووه شهل ابتلاء اصلا اني مو مال حب وهل خرابيط وانوب هذا شكلة ميساعد مو الي احلم بي هههههه
نائل.. وكفت وراها كلتلها شلونج ملك
ملك.. الحمد لله زينه
نائل.. ملك عندج تلفون؟؟
ملك.. لا ليش ،، طبعا جذب عندي بس ماريد انطي رقمي 😝
نائل.. لا هيج عبالي اتواصل وياج مو بنت عمي
ملك.. 😨😨
شو هذا مأخذ راحته عباله بنات بغداد مو عراقيات لا من باريس 😏 الحمد لله كلتله لا ، عفته ومشيت
راحوا بيت عمي وخلصت من اللزكة الي اسمة نائل
مسك.. اي ولج شكو بيها حته اثنينه نعيش سوة ونبقة نتناكر طول العمر الله شكد حلو
ملك.. اووع هو اني اريد اخلص منج ومن وائل مالتج انوب اخذ اخوه 😝
مسك..😒😒😒
ملك.. مرت الأيام كاعدة ودك عليه رقم غريب جاوبت
📞الووووو
📞الووو ملك ؟؟
📞اي منو انت ؟؟
📞اني نائل
ملك..😨😨
……………………………………………………
بيج #قصص_من_حياتناM& T
قراءة ممتعة،، لاتنسون اتفاعلوا وانطوني آرائكم بالقصة ، افرح من اشوفكم تعلقون ع قصصي ،، احبكم ،، تحياتي الكاتبة #ميديا_الفهد