البارت العشرين
❤الكلمات الصادقة لا تحكى ,, فقط تحس,, والمشاعر الصادقة لا توصف ,, بل نشعر بها❤
وصلوا الشباب لاحمد وجماعته يلي يستنوا فيهم ونزلوا من السيارات
جواد: ها شباب شن الاخبار
احمد: جماعتنا يراقبوا فيهم ونص ساعة ويصلوا هنا
عمر: اها
محمود: باهي كيف نهجموا وشن الخطة
جواد: والله فكرت طول الطريق ف خطة مالقيتش خطة كويسة
محمود: الافضل نهجموا عليهم من اربع محاور
احمد: لا هذه الخطة ماتنفعش
محمود: وعلاش
احمد: لانا يمكن انوشوا بعض أو ينصاب حد فينا وهكا تكون خطر علينا كلنا
جواد: اممم احمد معاه حق
محمود: باهي بسرعة فكروا شن انديروا
رمزي: شن رايكم نهجموا من محورين والثالث نخلوا فيه مجموعة بسيطة يعني احتمال هما يهربوا منه
محمود" رفع حاجبه: وكيف هذه خطرتك يا شاطر بتجي احتمال يهربوا من الجهات التانية
رمزي: انا قعد ماكملتش
محمود" كتف ايديه: كمل ورينا شطارتك
جواد" عصب: محمود خلي الراجل يتكلم
محمود: كمل كمل
رمزي: ونخلولهم منفد وحيد
جواد: والي هو
رمزي: طريق الموقع
محمود" عصب: انت هبلت كيف نخلو طريق الموقع منفد ليهم اسمع يا انت احنا نبوا نقضوا عليهم كلهم مش نبوهم يهربوا منا فاهم
رمزي" تنهد: اسمعني انا ماتميتش كلامي
محمود" تأفف: اف هيا تكلم فيسع قريب يصلوا
رمزي" خدا عصا وبدا يرسم بيها: شوفوا هنا اربع اتجاهات وهما جايين من جهة " شاف لجواد: من اي جهة
محمود" بهزوة: يخطط ومش عارف الاتجاهات
جواد" شاف لمحمود بغضب: هما جايين من الجنوب
رمزي" كتب ع جهة {ج}: هذا الجنوب هما هنا " رسم دائرة واشر ع الشمال : ومتجهين لشمال يعني هنا " رسم دائرة ووضع فيها حرف {ش}: وهذه جهة الموقع " شاف لجواد: صح
جواد" هز راسه بنعم"
رمزي: وقعدوا جيهتين الشرق والغرب " اشر ع اتجاهين شرق وغرب: يعني احنا لازم نتمركزوا ف الشرق والغرب والجنوب اما الشمال فالطريق نخلوها مفتوحة
جواد: قصدك نحاصروهم من ثلاث جهات والطريق الرابعة مفتوحة
رمزي: اي , اسمعوا زين لازم نتقسموا اربع مجموعات الاولى ف الشرق والثانية جهة الغرب اما الثالثة هي جهة الشمال
محمود" كتف ايديه: مش قلت تو الطريق بتكون مفتوحة
رمزي: اي المجموعتين يلي ف الشرق والجنوب بيهجموا اما مجموعة الغرب لازم تكون بعيدة شوي يعني بعيدة بمسافة اذا هربوا منها نتصدولهم
احمد: ومجموعة الشمال
رمزي: احنا لازم نستدرجوهم لشمال علما اظن الشمال فيه جبال
جواد: اها اي
رمزي: يعني نستدرجوهم لموقع يلي فيه جبال وهكا يا نقضوا عليهم أو نأسروهم وما اظن ف حد منهم بيهرب, يعني يلي بيهجموا الشرق والجنوب اما الشمال فبيكون مهربهم ومجموعة الشرق بتتبعهم لين موقع الجبال وهناك مجموعة الشمال تقضي عليهم , ها شن رايكم
جواد: ممتاز فكرة كويسة
احمد: وانا موافق
سند: وانا شوري من شوركم
رمزي" شاف لمحمود"
محمود : نشوفوا الخطة تنجح والا لا " مشى"
جواد: اكيد عجباته لا تهتم
عمر: انا طبعا مانفهمش شيء ف المعارك اهم شيء تقولولي وين موقعي بالضبط
جواد : انت اسبقنا للموقع عند حسان , وخليك مستعد يمكن يتصاوب حد
عمر: اوكي انا ماشي " ركب ف سيارة ومشى"
احمد: يعني نقسموا المجموعات
جواد: اي , انت ف مجموعة الجنوب وانا ف مجموعة الشمال ومحمود ف مجموعة الشرق , اما المجموعة الرابعة يلي هي ف الغرب خلي عبد المهيمن هو ومجموعة يمشوا غادي
احمد: اوكي " مشى لشباب يلي واقفين"
رمزي: وانا وسند مع من
جواد: امم انفضل انكم تكوني اعمايا
محمود" جاهم : ها وين انا موقعي
جواد: ف الشرق
محمود: اوكي
جواد: وانتم اعمايا
محمود: سند خليه اعمايا
سند: موافق
جواد: اوكي بس انتبهوا زين
محمود: وانت انتبه زين " مشى
سند: الله يحميكم " لحقه"
جواد" لف لرمزي: انت لازم تحاديني وما تبعدش عني ابدا
رمزي: ههه لا تخاف انا نعرف نتصرف
جواد: انا عارف ومش خايف عليك بس ف حد موصيني عليك
رمزي" باستغراب: من هالحد
جواد" ابتسم: ميار
رمزي" ابتسم بحب: ميار
جواد" اختفت ابتسامته: اي ميار
رمزي" اتسعت ابتسامته: الله يحفظها , هيا الشباب سبقونا لمواقعهم "مشى"
جواد" وقف ف مكانه حاس انه ضايع فيه افكار غريبة ادور ف راسه حاس انه يبي تفسير لكل شي "
رمزي" ف السيارة: جواد هيا
جواد" تنهد ومشى ركب ف السيارة "
""""
ميار " ف المستوصف مقعمزة وتدعي لشباب : يا رب انصرهم يا رب احفظهم يا رب
ياسمين" خشت : السلام
ميار" لفتلها: وعليك السلام
ياسمين: باين مكسدة
ميار" وقفت وقربت منها: اي بروحي و مافيش مرضى اليوم
ياسمين" رفعت حاجبها : واضح بروحك من بيجيك لو الدكتور عمر هنا لتلقي المستوصف ملياااااان
ميار: وشن قصدك
ياسمين: قصدي يا ماما انت مش دكتورة من بيسلم روحه ف ايدك
ميار: اها وانت جاية تسلمي روحك في ايدي والا جاية تتهزي عليا
ياسمين" كتفت ايديها: انا يا شطورة مش مريضة وكان نموت مانسلم روحي في ايدك
ميار: اها ولاش جاية
ياسمين" ارتبكت: اه جاية جاية
ميار" شدت ضحكتها: اي شن
ياسمين" لفت بغضب: بس جاية نشوف فيك كيف تتصرفي مع المرضى وانتي بروحك
ميار" ابتسمت: مش قلتي تو من بيسلملك روحه
ياسمين" عصبت ولفت ومشت بتطلع وقفت ولفت لميار"
ميار" ابتسمت: باين عليك تبي شيء
ياسمين" بهدوء: كلهم مشوا
ميار: من قصدك ؟
ياسمين: اصحابك
ميار: اها قصدك جواد ومحمود
ياسمين: ورمزي والشرطي
ميار" تنهدت: اي مشوا كلهم الله يحفظهم, والله خايفة عليهم
ياسمين: ومن شن خايفة
ميار: هما مشوا للحرب يعني احتمال ينصاب واحد منهم أو لا قدر الله يموت
ياسمين" بصدمة: يموت
ميار: اكيد هذه حرب مش لعبة
ياسمين: وانت ع من خايفة اكثر
ميار: كلهم
ياسمين" رفعت حاجبها: كلهم
ميار: اكيد هذم اصحابي واعزاز عليا واجد وكلهم خايفة عليهم
ياسمين: بس اكيد ف حد خايفة عليه اكثر
ميار" ابتسمت: لا ما فيش حد نخاف عليه اكثر من الثاني كلهم اصحابي ونعزهم واجد
ياسمين: اها " سكتت"
ميار: وانت على من تخافي اكثر
ياسمين" رفعت حاجبها: وانا شن دخلني بيهم لين نخاف عليهم
ميار: يعني عندك عادي ينصاب واحد منهم او يموت واحد منهم
ياسمين: اه
ميار: ياسمين تعالي قعمزي خلينا نهدرزوا
ياسمين" اشرت بايدها بهزوة: انا نقعمز معاك
ميار: ما فيها شيء انا بنت وانتي بنت خلينا نهدرزوا
ياسمين: سوري مش فاضيتلك
ميار: ياسمين انت علاش تكرهيني
ياسمين: هكا مزااااج
ميار" ابتسمت: بس انا نحبك
ياسمين" بهزوة: تحبيني ههههههه
ميار: والله بجد نحبك وعماما انا ما عمري كرهت حد , وانا نتمنى نصيروا صحبة انا وانتي
ياسمين" كتفت ايديها: و علاش تبينا صحبة
ميار" ابتسمت: انا ما عنديش صاحبات
ياسمين: و مش عندك هذم الشباب يلي مصاحبتيهم , هما يكفوك
ميار: بس انا نبي صاحبة بنت , تفهمني ونفهمها ونتكلم معاها من دون احراج
ياسمين" بهزوة: والله ما شاء الله عليك انتي الصراحة مكفية وموفية مع الشباب ضاربتيها تيروا ولا هامك اصلا ما عندك شيء اسماه احراج معاهم فماليهش داعي تصاحبي بنت لأنك مسترجلة " ضحكة بهزوة وطلعت"
ميار" تنهدت: اه اوف هذه خيرها
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
بعد ساعتين انتهت المعركة وفانتصروا الشباب بعد مانفدوا خطت رمزي , مافي حد هرب من المستعمرين يلي مات ويلي انجرح والباقي اسروهم ,
اما الشباب فكلهم بخير في بس 6 اتصاوبوا بجروح خفيفة , بعد ما انتهت المعركة مشوا لموقع الشباب لقوا حسان يستنا فيهم
حسان: يا هلا الحمد لله ع سلامتكم
جواد: الله يسلمك
حسان: كلكم بخير
محمود: اي الحمد لله
احمد: الاسرى ف السيارة , وين نحطوهم؟
حسان: نزلوهم وحطوهم ف السجن
احمد: حاضر شباب هيا نزلوهم " مشالهم"
حسان: هيا تفضلوا ارتاحوا
رمزي: جواد خلينا نرجعوا للمخيم
حسان: لا وين ترجعوا لا مافيش تغدوا وارتاحوا بعدين بروا
جواد: هيا تفضلوا .." خشوا "
سند" يشوف للموقع: واو شيء رائع " طلع نقاله ويصور"
محمود: هههه شن عجبك تصور فيه
رمزي" قعمز: هذا دلاله التصوير اي شيء بيصوره , لا تقول حتى الحرب صورتها
محمود" قعمز: والله انا نحارب وهو يصور
سند" حك راسه: هو يعني قلت خلي نصور هذه اول مرة نحضر حرب مباشرة
الشباب: هههههههه
جواد: ها ان شاء الله بس ما خفتش
محمود: ههههه خاف لا ابدا هات نقالك خلي نشوفوا الصور
سند: لا بينهم
محمود: هههه خايف تسمعوا صوته وهو مع كل طلقة أو رصاصة يقول واك
الكل: ههههههههههههههههه
سند: امم انا اصلا نجرب ف صدى صوتي
الكل: ههههههههههههه
جواد: انا طالع البرى شوي "طلع ومشى بعيد شوي وقعمز ف مكان مرتفع طلع نقاله لقى رسائل واتصالات من ميار ابتسم واتصل بيها "
ميار" ف المستوصف تنظف فيه رن نقالها مشت بسرعة وخداته وردت بسرعة : الو جواد انت بخير طمني عنكم
جواد" ابتسم: احنا بخير اطمني كلنا تمام
ميار" تنهدت براحة وقعمزت: اوه الحمد لله , قلي انتصرتوا
جواد: اي انتصرنا
ميار: والكل حالهم كويس
جواد: اي والكل كويسين بس ف اثنين من الشباب جروحهم بسيطة عالجهم عمر وتو هما تمام
ميار: الحمد لله والله طول الوقت خايفة عليكم وندعيلكم
جواد: الحمد لله انتصرنا وقضينا عليهم كلهم ويلي قعد منهم اسرناهم
ميار: الحمد لله , قلي رمزي بخير
جواد: اي رمزي بخير
ميار: هو جنبك
جواد: لا انا بعيد عليه شوي
ميار: اها قلي بتجوا تو
جواد: لا حسان شدنا للغداء بعد الغداء بنجوا
ميار: الله يحميكم
جواد: امين
ميار: تو سلام
جواد: سلام " سكر و ابتسم وحط ايده ع الزمالا وخدا طرف منها وشمها : الله هذه من ريحتها لو بايدي لنتبتها فوق راسي " حط ايده ف جيبه وطلع صورة ميار وابتسم: انحبك والله انحبك " حس بحركة وراه سكر ايده ع الصورة ولف"
محمود" جاء قدامه ومد ايده: طلعها يلي دسيتها
جواد: ما دسيت شيء
محمود" قرب وشد ايد جواد: انا شفتك طلعها
جواد: قلت ماعندي شيء
محمود" فتح ايد جواد وخدا الصورة وشافها وابتسم وغمز لجواد: اها حبيبة القلب
جواد" وقف بعصبية وخدا الصورة: انت خيرك حشري
محمود" قعمز: والله انت عارفني زين
جواد" قعمز وتأفف: اوف منك انت لاش لاحقني
محمود: هههه عارف انا زي ظلك وين ماتمشي وراك , قلي علاش قعد محتفظ بصورة امزقة , والاصل رجعت لعندك
جواد: هذه نقدر نرفعها معايا وين ما نبي اما الاصل ما نقدر
محمود: اها " غمز له: يالرمنسي انت , حاطها ف الجيب يلي من جهة قلبك
جواد" سكت ولف وشاف لبعيد"
محمود: ها شن فيك
جواد: ولا شيء
محمود: واضح ولا شيء
جواد" شاف لمحمود بجدية : محمود انت تحبني
محمود: ههههه توقعتك تقلي ميار تحبني أو لا مش تسأل كان انا نحبك
جواد: جاوب تحبني
محمود: اكيييييد وشن انت شاك ف حبي ليك انت اغلى شخص ع قلبي انت بويا وخويا وصاحبي يلي نحبه
جواد: علاش تحبني
محمود: وهذا سؤال ينسأل
جواد: ينسأل والا ما ينسألش انت جاوب عليه
محمود: لأنك صاحبي ولاني نحبك , انت كل شيء بالنسبالي , انا مانقدرش نعيش بدونك ومانرضى ع زعلك
جواد: وعلاش كل هذا انا شن فيا مختلف عن غيري
محمود" ابتسم: انت كلك مختلف وخصوصا قلبك الابيض والطيب والكبير فيه الحب يلي يكفي كل الناس , انا الصراحة نحبك واجد اكثر حتى من نفسي انت كل شيء ف هالدنيا بالنسبالي بعدين لا تنسى ان مالياش حد غيرك , ولا تنسى ان لما كنت صغير كل الناس تخلوا عني حتى خوتي وانت الوحيد يلي ماتخليت عني مع اني ماننحبش ومزاجي وعصبي ومزعج وشكاك ومتهور ومعاندي و و و مع كل شيء فيا عافن تحبني وماعمركش زعلت مني مع اني واحد ماننطاقش ومجنون
جواد" ابتسم: انا نحبك مع كل هالصفات يلي فيك نحب عنادك ونحب عصبيتك ونحب تهورك وجنونك ,. بعدين وانت اغلى شيء عندي ف هالكون كله
محمود" ابتسم: حتى اغلى من ميار
جواد: ههه يعني الاثنين نحبكم انت صاحبي وخويا
محمود: وهي حبيبتك صح
جواد" هز راسه بنعم و بعد عيونه عن محمود"
محمود: انت علاش تسأل فيا في هالاسئلة شاك ف حبي ليك
جواد" وقف: لا " مشى"
محمود" وقف ولحقه : جواد والله انت هاليومين صاير غريب شن فيك
جواد: ما فيا شيء , هيا نمشوا لشباب
محمود: اوكي بيجي وقت ونعرف شن صابك
"""""""""""""""""""""""""""""""""""""""""""""""""""""""""""""""""""""""""
سجى وامها يتغدوا
الام: وين سناء ؟
سجى: اكيد ف دارها
الام: بري ناديها تتغدا
سجى" وقفت ومشت لدار سناء وطقت الباب وفتحاته لقت سناء مقعمزة وحاطة السماعات ف اودانها قربت منها: تعالي تغدي ... هي سناء نكلم فيك تعالي تغدي..." خدت السماعات وسلتتهم "
سناء" لفتله بعصبية: هي خير بلاك
سجى: انت خير بلاك نكلم فيك ليا ساعة
سناء: شن تبي
سجى: تعالي تغدي
سناء: مانبيش " خدت السماعات وردتهم ف اودانها"
سجى" لفت ورجعت للكوجينا وقعمزت"
الام: وينها
سجى: قالت ماتبيش
الام: خيرها مريضة والا شن
سجى: ما فيها شيء
الام: لكن مامشتش للكلية ولا حتى الصبح فطرت شن صابها
سجى: الله اعلم
سناء" تبكي : حتى اليوم ماتصلش يعني خلاص سيبني وخلاني بروحي كذاب قلي ماتعيشش بلاك هو كذاااااااب كلهم مايحبوني لا هو ولا رمزي ولا خواتي حتى امي ماتحبنيش الكل افضل مني اااااه يا عامر والله حبيتك والله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
الشباب بعد ماتغدوا وارتاحوا شوي رجعوا للمخيم
جواد" نزل من السيارة هو والشباب : الحمد لله انهينا المعركة بسرعة
رمزي: اي والله
جواد: ها محمود شن خطة رمزي عجباتك
محمود: اهم شيء عندي نفوزوا مش مهم من يدير الخطة " مشى"
جواد: لا حول الله , رمزي ما ادوراش محمود هكا طبعه مع ان قلبه ابيض
رمزي" ابتسم: عارف والله عارف
سند: اي والله قلبه طيب بس راسه كاسح
الكل : ههههههههههههههه
محمود" وقف ولفلهم: هي انت واياه شن يضحك فيكم
سند" بهمس: اولي يا رب ماسمعنيش
محمود: هيا عجلوا
ياسمين" شافت ميار تمشي ف الساحة مشتلها ووقفت قدامها: هي انت
ميار" ابتسمت: نعم
ياسمين" ارتبكت: اه بس نبي بس يعني
ميار" ابتسمت: اي شن
ياسمين" تنهدت بقوة : اه اتصلوا بيك
ميار: من هما؟
ياسمين" بعصبية: لا تتغبي انت عارفة من نقصد
ميار: لا والله مش عارفة من تقصدي؟
ياسمين" بعصبية: نقصد اصحابك رمزي والشرطي والسيد المحترم والبطريق
ميار: اها اي اتصلوا
ياسمين" بهدوء: شن صار معاهم
ميار: لا الحمد لله انتصروا وشوي بيجوا " شافت الشباب جايين : هاه هاهم جو
ياسمين" لفت لشباب"
محمود: وف هذه شن واقفة بتستقبلنا
سند" ابتسم: قصدك ياسمين
محمود" بغيض: اي وفي غيرها
جواد" ابتسم لميار واشر بايده"
ميار"ابتسمت اشرت لجواد"
رمزي" حس بغضب , حلو تأشله وتبتسم ناقص تجي اضمه "
قربوا الشباب من ميار وياسمين
الكل: السلام
ميار: وعليكم السلام , الحمد لله ع سلامتكم
الكل: الله يسلمك
ميار" شافت لجواد: ها جواد كيف الشباب
جواد: لا الحمد لله كلهم بخير
ميار" ابتسمت: الحمد لله " شافت لرمزي: ها كيف كانت معركتكم
رمزي" ابتسم: تمام
محمود" شاف لياسمين وفع حاجبه: ها سمينة شن لا تحمدي ف السلامة ولا تردي ف السلام تبكشتي مثلا
ياسمين" طنشت عليه ولفت لرمزي وابتسمت : رمزي الحمد لله ع سلامتك
محمود" بغضب: رمزي ماهو بروحه كان يحارب
رمزي" ابتسم: الله يسلمك
ياسمين: اي الحمد لله انك بخير " شافت لمحمود باستحقار ومشت"
محمود" عصب بصوت عالي: اطنشي تو يبانلك
ميار: محمود لا تعصب
محمود" بغيض: هذه وحدة لا تستحي ولا تعرف الواجب
ميار: لا تظلمها هي اصلا كانت خايفة عليكم كل شوي تجي تسألني عنكم بس هي ماتبي تبين انها مهتمة
رمزي: اي لا تظلمها
محمود" بغضب: انت لا تدخل واهتم بروحك احسن " مشى"
جواد" تنهد: ربي يهديهم
ميار" لفت لجواد وقربت منه: كيف حالك تو
جواد" ابتسم: بخير
ميار" قربت ايدها وحطتها ع جبهته"
جواد" انصدم من حركتها وحس دقات قلبه تزيد"
رمزي" قعد يشوفلهم وحاس بنااااار تشعل داخله"
ميار" بعدت عنه وابتسمت: لا تمام بس في شوية حرارة
جواد" بخجل: لا انا بخير لا تهتمي
ميار: اذا ما اهتميت بيك بمن اهتم , انا عندي صحتك هي الاولى مانبي يصيبك شيء
جواد" ابتسم: الله يخليك ليا يا رب
ميار" ابتسمت: ويخليك ليا
رمزي" حاس بغضب , بنبرة حادة: انا نستأذن
ميار" لفتله "
رمزي" شافلها بنظرة حادة ومشى"
سند: وانا ماشي "لحقه"
ميار" حست ان رمزي فيه شيء نظرته نبرة صوته كل شيء فيه مش طبيعي"
جواد: هي وين سرحتي
ميار" لفتله: اه
جواد" بهدوء: خيرك سرحتي وتشوفي لرمزي
ميار" ارتبكت: اااه ولا شيء
جواد" ابتسم: هيا ماتبيش تسمعي شن صار ف الجبهة
ميار" ابتسمت: اكيد
جواد: اسبقيني لاطلالة المدينة نبدل دبشي ونجي
ميار: اوكي
جواد" ابتسم لها: بس ترى هذه "اشر ع الزمالا: ماني سالبها
ميار: و علاش
جواد" قرب منها وبنبرة حب: لأنها من لمساتك
ميار" حست بخجل ونزلت عيونها عنه "
جواد" ابتسم: ثواني ونكون عندك "مشى"
ميار" رفعت عيونها وشافت لجواد يلي ماشي : نظرته كانت غريبة حتى نبرة صوته "لفت ومشت لاطلالة المدينة"
سند" يلحق ف رمزي يلي يمشي بغضب : رمزي وقف هي رمزي "سرع وجاء قدامه : رمزي
رمزي" وقف بعيض: شن تبي
سند: خيرك معصب
رمزي: ولا شيء "مشى"
سند" لحقه وخش وراه لتريلا : معصب لأنها لمست جبهته
رمزي" وقف ولفله بغيض : وزيادة تأشرله وتبتسم لا وتاني يخليك ليا و اذا ما اهتميت بيك بمن نهتم ,وعندي صحتك هي الاولى ، شن ناقص ادير اه شن ناقص
سند: كلامها عادي
رمزي" بعصبية حادة: عادي كيف عادي اه كيييف عادي هذا الكلام كله والتصرفات وتقلي عادي هالبنت زودتها مع هذا جواد
سند: انا عارف انها مزودتها ف تصرفاتها بس سبق وقلتلك هي يمكن متعودة ع هكا بعدين جواد صاحبها من زمان
رمزي"بغيض: متعودة مش متعودة صاحبها متعرفة عليه ولد عمها حتى كان خوها المفروض تصرفاتها ما تكونش هكا
سند" تنهد: اه رمزي لازم تعرف العيشة هنا مش زي العيشة ف مدينتنا هنا حياتهم مختلفة بعدين كل يلي ف المخيم متعودين ع بعض وعايشي نكانهم عيلة وحدة فلا تقعد ادقق ع ابسط تصرف منها بعدين ميار تحبك وهذا هو المهم
رمزي" قعمز ع السرير: اووف
سند" قعمز جنبه وحط ايده ع كتف رمزي: اسمعني يا صاحبي لا ادقق ف تصرفاتها ولا اضايقها ولا تزعل من هذه التصرفات لأنك وقتها بتخسر ميار
رمزي" تنهد: ما نقدرش انا نغار عليها
سند: انت بس حاول اكيد تقدر
رمزي: نحاول
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
في الـــــيـل
رمزي وسند طلعوا من التريلا
سند: الجو ف اليل مش عادي
رمزي: اي حتى المخيم يبدأ هادي
سند" شاف للقمر: والقمر مكتمل اليوم
رمزي" شاف للقمر: اي منظرها رائع
سند" وقف"
رمزي" وقف باستغراب: خيرك
سند: استاحشت مدينتي
رمزي" ابتسم: مسرع تو عاد كيف جيت
سند: اي صح بس استاحشت جدي والعويلة
رمزي: ههه وانا استاحشت جدك
سند" رفع حاجبه: ومن امتى انت تحب جدي
رمزي: له له شن قصدك نكرها
سند: اي تكرها ناسي شن كان يدير فيك لما تجينا
رمزي: هههههه لا مش ناسي بس والله جدك ينحب
سند: احم احم ماهو طالعيلي
رمزي: يالواثق انت ,من يطلع لمن , هيا قدامي خلي نمشوا لشباب اكيد مقعمزين ومولعين النار ....
مشوا ووصلوا للمكان يلي ديما يقعمزوا فيه الشباب ويولعوا ف النار كانوا مقعمزين {جواد وعمر ومحمود وميار}
رمزي" وقف بغضب: شوف شوف مقعمزة معاهم وتضحك لا وثاني بين جواد ومحمود وقريبة منهم
سند: ياراجل انا شن نرحي مبكري هيا وحاول تمسك اعصابك " وصلوا لعندهم "
الاثنين: السلام
الكل: وعليكم السلام
رمزي" شاف لميار كانت لابسة كالعادة بدي طويل وسروال حاول يتجاهل تعصيبه منها ومن تصرفاتها ولبسها وقعمزجنب عمر مقابل ميار "
ميار" تشوف لرمزي تصرفاته غريبة ونظراته اغرب"
رمزي" بعد عيونه عنها ولف لعمر: ها عمر كيف الشباب حالهم تو
عمر: لا الحمد لله تمام التمام
سند" مقعمز جنب محمود: ها حمدي طيبتوا شاهي
محمود" ابتسم: اكيد سنودي طيبنا وطاب
سند: صب صب طاسة , والله مافي احلى من طاسة نسكافيه ف اليل
محمود: نسكافيه
الكل: ههههههههههههه
سند: لا قصدي شاهي
رمزي" ابتسم: والله فكرتني ف النسكافيه ليا وقت ماشربتاش مش عارف كيف صبرت عليه
جواد: تحبه
رمزي: اكيد ومدمن عليه
عمر: هو ضار ومش كويس كان تكثر منه
رمزي: عارف بس هذاك زمان مدمن عليه بس تو لا يعني ثلاث طيس اكبار ف اليوم
محمود: وي وي هذا كله ومش ادمان مالا قبل كيف
الكل: هههههههه
جواد: ههههه اي والله قبل كيف
رمزي" حك راسه : اممم يعني قبل 6 , 8 , يعني ع حسب مزاجي
جواد: وانا نحبه بس عاد مش بكل زيك
رمزي" ابتسم ولف لميار: انشدوا ميار كيف كنت نشرب فيه لو يوم يفوت بلاه نبدا عصبي
ميار" ابتسمت: اي وكنت تقلب الحوش كله ع روسنا
سند: اسكتوا يا جماعة شهيتونا فيه
محمود: نساووه مافيش مشكلة
رمزي: لا لا خلي ميار هي تساويه
محمود: وش معنى ميار قصدك خايف نساويه عافن راه انا نعرف نساويه ومش صعب عليا
رمزي: بس حاب نشرب النسكافيه من ايدين ميار "شافلها وابتسم"
ميار" قلبها بدا ينبض بقوة ونزلت عيونها "
جواد: وانا حاب ندوقه من ايدها
ميار" شافت لجواد وابتسمت : حاضر تكرم عيونكم " وقفت وشافت لرمزي وابتسمت بخجل: اصبروا شوي بس
رمزي" ابتسملها: نصبروا اليل كله اذا تبي
ميار" ابتسمت بخجل: لا مش معطلة
رمزي" قعد مبتسم ويشوفها"
ميار" تشوفله وحاسة قلبها يدق بقوة"
جواد: رمزي , هي رمزي "حس ان رمزي سرحان ف ميار , لف لميار لقاها تشوفله: هي رمزي
سند" ضرب رمزي ع الخفيف: هي انت
رمزي" لف بغضب: شن تبي
سند" ابتسم: جواد من امبكري يكلم فيك في من سرحت
رمزي" ارتبك وشافله بتهديد ولف لجواد وهو مرتبك: اه نعم
جواد: بس بنقلك احنا خصصنالكم انت وسند ومجموعة يلي تبي تشتغل معاكم مكان خاص بيكم يعني تقعدوا فيه
رمزي" ابتسم: بارك الله فيكم
جواد" ابتسم: احنا يلي لازم نشكروكم لانكم بتعاونونا
سند: ولو هذا واجبنا احنا ف خدمتكم
ياسمين: ف خدمت من؟
الكل فزوا وانخلعوا
محمود: اهئ اسم الله انت امنين طلعتي
ياسمين" شافتله بربع عين : من الوطاء
محمود" بهزوة: اي ماك جنية لا احم ولا تستور
ياسمين" طنشت عليه لفت لرمزي وابتسمت: رمزي مساء الخير
رمزي" ابتسم : مساء النور
محمود" بغيض: لما تقولي مساء الخير عمميها ماتخصصيهاش لحد بروحه شن ماكش شايفتينا
ياسمين" شافتله بربع عين: انا مانشوفش لاشكالك
محمود" عصب : هي هي انت "جاء بيوقف شده جواد"
جواد" بحدة: قعمز ف مكانك
محمود" قعمز وهو معصب"
ياسمين" ضحكت بهزوة ولفت لرمزي وابتسمت: تقعميزتكم حلوة هنا
رمزي" ابتسم: حياك قعمزي
محمود وميار بدوا يغلوا
ياسمين" ابتسمت : وهذا يلي بنديره " مشت قعمزت جنب رمزي"
محمود" بعصبية: هي هي مش ديما تحسابي روحي بتقعمزي هيا نوضي بالك
ياسمين" رفعت خشمها: والله انا حرة نساوي يلي نبي مش انت تحكم فيا "لفت لرمزي وابتسمت: تعرف رمزي ف اليل المخيم يبدا هادي
محمود: لان الصغار يلي حظرتك مجندتيهم يرقدوا ف اليل
رمزي" لف لميار لقاها تشوفله وهي معصبة شد ضحكته"
ميار" بغيض: انا ماشيا "مشت "
ياسمين: رمزي
رمزي: نعم
ياسمين: سمعت انهم بيفتحوا مركز شرطة ليكم هذا صح
رمزي: اها صح
ياسمين: يعني نقدر نشكي ف حد
محمود: ومن هالحد يلي بتشكي فيه
ياسمين" شافتله بربع عين: انت
محمود: ههههاااااي خوفتيني اذا انت بتشكي فيا انا بنشكي فيك واظن نص المخيم اذا ماكان كله بيشكي فيك من ازعاجك يلي كل يوم
ياسمين" طنشاته ولفت لرمزي : نقدر نشكي
رمزي: ع حسب الشكوة
ياسمين: كيف يعني
رمزي: يعني مثلا سرقة أو مضايقة
ياسمين: اوكي نجي غدوة لعندك ونقلك شكوتي
محمود" لف لسند: وانا ياسند غدوة نجيك ونقلك شكوتي " شاف لياسمين بربع عين"
ياسمين" طنشت عليه ولفت لسند: ياشرطي انت
سند" ابتسم: نعم " بهمس يسمعه محمود: ياعيون الشرطي
محمود" عصب وضربه بقوة"
سند" شد كتفه ولف لمحمود: اي خيرك
محمود" من بين اسنونه: تو يبانلك
سند" ابتسم ولف لياسمين: نعم
ياسمين: بس بنقلك لا تكون حيادي وتقول حد صاحبي والا نعرفه لأنك لازم تكون مخلص لعملك
محمود: ههههه خايفة يقف معايا ضدك وتنحبسي
ياسمين" رفعت حاجبها: لا خايفة يحبسك انت ننصح فيه يكون مخلص لعمله لا يدافع عن حد ولا يظلم حد
محمود: ههههههههاااي عليك تلفيقة
ياسمين: تو نشوفوا من يضحك ف الاخير "ولفت لرمزي : صبلي الشاهي صب حسه ضغطي ارتفع
محمود: يا حرام هههه
جواد: محمود يرحم والديك خلاص
سند: محمود صح انت وين عيالك
محمود" تنهد بضيق: اه
سند: اسف كان ضايقتك بسؤالي
محمود: لا عادي , انا الصراحة امي وبويا ميتين وخوتي تخلوا عني من زمااان يعني نسوا ان عندهم خو قاعد هنا "بنبرة حزن : بس لا تفكرو اني وحيد انا عندي اغلى منهم كلهم
سند" بضيق : هو فيه اغلى منهم اغلى من الام والبو والخوت
محمود" ابتسم بضيق: اي عندي يلي عوضني عنهم
رمزي: من يلي يقدر يعوض عن كل هذا
محمود" لف لرمزي وشاف لياسمين يلي تشوفله وباين نظرات الحزن ف عيونها بعد عيونه بسرعة عنها مايبي يزيد يتأثر , لف لجواد وابتسم وحط ايده ع كتف جواد: هذا يلي عوضني عنهم عن حنان الام وعطف الاب وعن غلاوت الاخوه هذا عندي اغلى من روحي " بغصه وحزن : كان يموت نموت انا بعده ع طول
جواد" بنبرة حزن : وانا نفديك بروحي يالغالي , وكان تموت ندفن روحي جنبك حياتي ماتسوى بلاك
ميار: وانا وين رحت
الكل لفولها
ميار" شاده صفرة وفيها النسكافيه , دمعوا عيونها : انا يلي حياتي ماتسوى بدون وجودكم فيها
جواد" وابتسم: انتي روحنا يلي بلاها نفقدوا الحياة
ميار" قعمزت وحطت الصفرة ولفت لجواد بنبرة حنان : تعرف اني الان حاسة اني عايشة لأني جنبكم "دمعوا عيونها: لا عاد تجيبوا سيرة الموت يكفي يلي فقدناهم انا مانبي نفقد حد خاصة انتم " بدت تمسح ف دموعها يلي ماقدرت توقفهم"
جواد" بحزن: ميار خلاص يكفي مانبوش دموع
ميار" بعبرة: مش بيدي مانقدرش نخاف عليكم نخاف نخسركم
جواد" بنبرة حب وحنان : ميار خلاص لا تبكي احنا جنبك ع طول ماحد يقدر يفرقنا الا ربي
"ابتسم: ميار لازم تعرفي ان ماحد يقدر يبعدنا عن بعض الا الموت , والموت كان جت ماحد يقدر يبعدها عنا كل واحد وربي كاتبله عمر بس اهم شيء نقعدوا جنب بعض طول العمر
ميار" هزت راسها بنعم"
جواد" ابتسم : خلاص يكفي حزن
محمود" بضحكه : بكيتونا "شاف لياسمين"
ياسمين" بسرعة بعدت عيونها عنه "
محمود" لمح نظرة الحزن ف عيونها"
جواد" ابتسم: مافيش دموع بعد اليوم مدامنا مع بعض
سند: الله يخليكم كلكم ويحفظكم من كل سوء "لف لرمزي لقاه يغلي , بهمس: خيرك
رمزي" بغيض : ولا شيء
محمود: اووه ميار ساويتي النسكافيه سريعة والله
ميار" ابتسمت: نستوني فيه لين برد "خدت طاسه ومدت لجواد : جواد ذوق وقلي رايك
جواد" شد الطاسة وابتسم: مدامه منك اكيد بيكون تمام
محمود" مد ايده وخدا طاسة"
ميار: لااا محمود هذه لرمزي
محمود" استغرب: اش معني لرمزي
ميار" ابتسمت: هذه طاسة كبيرة لرمزي لأنه يحب النسكافيه ف طاسة كبيرة "شافت لرمزي وابتسمت"
رمزي" ردتلها ابتسامة باردة"
محمود" خدا طاسة اخرى بغيض : لا تقولي بعد هالطاسة لحد اخر
ميار" بضحكة: لا خوذها " مدت لسند: لا تنسى الطاسة الكبيرة لرمزي
سند" خدا منها الصفرة: اوكي "خدا طاسة ومد لرمزي وابتسم: هاك وادلل
رمزي " خدا الطاسة ومد لياسمين"
ياسمين" شافت لميار: كويس انك حسبتيني كان ماحسبتينيش نوريك
ميار" ابتسمت: مدامك بديتي من الشلة اكيد بنحسبك
ياسمين" بعصبية: انا ماني منكم ايوه
ميار: المهم تو اعمانا
ياسمين" خدت طاسة ومدت لعمر "
جواد" مد الصفرة لميار بعد ماعمر خداها: تفضلي
ميار" خدت طاسة وابتسمت: تنكيو
جواد" ابتسم: صحيتي ع النسكافيه
ميار: ها عجبك
جواد: اكييييد وخاصة لأنه منك
ميار" لفت لرمزي: ها رمزي عجبك
رمزي" هز راسه بنعم وبعد عيونه عنها"
ميار" استغربت مش بالعادة مايتكلمش"
ياسمين: اسمع يا سيد المحترم
جواد: انا
ياسمين: اظن عارف لقبك
جواد: ههههههه عارف عارف
سند: وانا انا شن لقبي
محمود: الشرطي واضح
ياسمين: ولا تنسى انت البطريق
محمود: وانت السمينة والصغنونة هههههههههههههه
ياسمين" بعصبية: ماحد صغير غيرك يالبيبي
محمود: هههاااي معروف من البيبي فينا
سند: صح كم عمرك?
ياسمين: ما دخلكش
محمود: ههههه متحشمة من عمرك
ياسمين: تحشم انت قبل من عمرك ف العمر كبير والعقل يا حسرتي مهناش بكل
محمود" ابتسم: اهزي لين تعييى مش معبرك لأنك صغيرونة بيبي
سند: قلي كم عمرها
محمود: 16 قعدة صغينونة هههههاااي
ياسمين" بعصبية: سكر فمك بلا هزوة
سند: صح محمود كم عمرك؟
محمود" ابتسم: 21 سنة وانت كم
سند: وانا زيك
جواد: رمزي كم عمرك
رمزي: 21 وانت
جواد" ابتسم: وانا 20
سند: يعني اصغر واحد فينا , وانت ياعمر كم عمرك؟
عمر: انا اكبر واحد فيكم عمري 25 سنة
سند: وميار انت كم
ميار: 17
محمود: ههههااي يعني اصغر وحدة فينا هي انتي يالبيبي
ياسمين" رفعت حاجبها: الصغر والكبر مش بالعمر ينحسب بالعقل الواحد ينعرف كبير أو صغير وانت عاد عارف روحك
محمود: انا يلي عارفه انك صغيرة وبلا عقل
ياسمين: معلوم من الصغير وبلا عقل
محمود: تره بلا تلقيح و اسكتي بعدين لو سمحتي مانبوا اطفال ف شلتنا
ياسمين: ومن قلك اني يشرفني نكون من شلتكم
محمود: هههه ضحكتيني مدامك مايشرفكش تكوني من شلتنا علاش مقعمزة بينا
ياسمين: والله انا ماني جاية باش نقعمز جنبك والا نقابل شكلك انا جاية نبي رمزي
محمود" بغيض: وشن تبي منه رمزي
ياسمين" ابتسمت: مادخلكش "لفت لرمزي بدلع: رمزي
رمزي" ضحك : نعم
ياسمين: ننصحك ماتخالطش زي هالشكل يعديك
محمود: ياروحي ماتخافيش عليه وكانك تبيه ارفعيه وفكينا منك ومنه
ياسمين: واااي ع الحسد
محمود: الحمد لله والشكر انا حاسدك وعلى شن
ياسمين: انت عارف روحك ع شن
محمود" بغيض: تره يابنت انتي احترمي نفسك
ياسمين: تره ياولد انت ماتدخلش فيا
جواد: تره انت واياها سكروا سكروا افامكم خلاص عاد فدينا كل دقيقة متناقرين
رمزي" شاف لميار لقاها معصبة بعد عنها ولف لياسمين وابتسم"
ميار" بصوت منخفض ومن بين اسنونها: يتبسملها ومايستحي ابدا
محمود" بهمس: لا وهي زيادة تتبسمله وتتغزل فيه ثاني " يقلد ف صوتها : رمزي
ميار: غير شوف شوف يهدرزوا ويضحكوا كان ماجنبهم حد
محمود: ناس ماتستحي, اخ بس كان يطلقوني عليهم نعدمهم هما الاثنين
ميار: هما اصلا يغيضوا فينا
محمود" لفلها: شن يعني يغيضوا فينا
ميار" ارتبكت: اه يعني ماندري هكا يبوا يعصبونا
محمود" رفع حاجه: يعصبونا من قصدك؟ انا وانتي صح ؟
ميار" مرتبكة: اه ماندري يعني يمكن
محمود" بنظرات شك: وعلاش رمزي يبي يعصبك ويغيضك
ميار" زاد ارتباكها: ااه ما نعرفش ماندري قلت يمكن
جواد: خيركم شن توشوشوا
محمود: ولا شيء "بعد عيونه عن ميار"
ميار" تنهدت ف داخلها"
ياسمين" ضربت جبهتها: اووه قريب نسيت
محمود" يقلد فيها: اووه شن هو يلي قريب نسيتيه
ياسمين" بغيض: كله منك قبل بنتكلم لين حضرتك نسيتني
محمود" بهزوة: اووه سوري ما قصدت تره شن هو يلي نسيتيه
ياسمين" طنشاته ولفت لجواد: يا سيد المحترم
جواد: نعم
ياسمين" بغيض: انا وفريقي وين بنلعبوا مش قلت بيديرلنا ملعب
محمود" بهزوة: اي عرقك كان يكذب عليك
ياسمين" بعصبية: كنت تكذب
جواد" ابتسم: لا ماكنتش نكذب لقيتلكم مكان انتي وفريقك ولكل من يبي يلعب
محمود" باستغراب: وين هالمكان بعدين علاش ماقلتليش
جواد" وهو يكلم ياسمين: غدوة الصبح نوريهولك
ياسمين" وقفت: اوكي تصبح ع خير رمزي
رمزي"ابتسم: وانتي بخير
محمود" بغيض: كوابيس تعيسة ان شاء الله
ياسمين" ضحكت بهزوة: ما اتعبش روحك راني مانحلمش بكل
محمود: وان شاء الله اليوم تحلمي
ياسمين" طنشت عليه ومشت"
محمود" بغيض: بنت مااتحشمش ع وجها "لف لرمزي بعصبية: انت هي شن تبتسملها لا وادلع فيها ثاني
رمزي" شد ضحكته: وشن فيها
محمود" بعصبية: شن فيها اه شن فيها , فيها انك ولد وهي بنت غريبة عنك, انت كيف تخليها تقعمز جنبك وتضحكلك وانت تبتسملها لا وزيادة ادلع فيها وحاضر ومش عارف شن انت ناسي انها بنت ماتقربلكش بكل
رمزي: وشن فيها هاهي ميار بنت وتصرفاتها عادي معاكم "شاف لميار بنظرات حادة: تقعمز جنبكم تضحكلكم"بعد عيونه ولف لجواد: تسلم عليكم ادلع فيكم "شاف لمحمود: وهي غريبة عنكم
محمود: ميار غير عنها واحنا غير عنك
رمزي: وشن معنى غير مدام ميار بنت وياسمين بنت مدامي شب وانتم شباب شن الفرق مثلا
محمود: الفرق ياشطور ان ميار من صغرها معانا وهي متعودة علينا واحنا متعودين عليها هي صح مش قريبتنا بس عمرنا ماحسينا انها غريبة عنا ميار كبنت عمنا اما انت وهذيكة ماتعرفها ولا تعرفك بعدين لازم تذكر انك من مدينة وهي من مدينة هذه حطها ف بالك سوى مع ياسمين أو غيرها فاهم
عمر: خلاص شباب ماصار شيء لا تتناقروا
سند: شباب يكفي
رمزي: راه انا ماقصدي شيء بس تصرفاتي كانت عادية
محمود: لا مش عادية ولازم ماتكررهاش
جواد: شباب خلاص صدعتوا راسي
رمزي: اسفين "لف لميار"
ميار" تشوفله بنظرات تعجب من تصرفاته وكلامه"
رمزي" بعد عيونه عنها: انا فاهمك يامحمود زين , بس كنت اظن انه عادي عندكم اذا الشب كلم البنت وهدرز معاها
محمود: لا ممنوع عندنا
رمزي: بس لأني شفت ميار عادي معاكم
محمود: ميار غير عن الكل
رمزي: وعلاش غير عنهم
محمود: تو مستقبلا تعرف
رمزي: واحنا عندنا البنت ممنوع تكلم شب أو تبتسمله أو تطلع معاه أو حتى تشوفله "شاف لميار: وعندنا ممنوع البنت تطلع ف لبس غير محترم أو سروال أو حتى قونة عندنا البنت تطلع بس بعباية قدام اي حد غريب "لف لجواد: وعندنا الشب لا يضايق بنت ولا يكلمها ولا يضمها ولا حتى يسلم عليها ولا اي شيء البنت ف اتجاه والولد ف اتجاه اخر
جواد: احنا عندنا كل يلي قلته عادي بس ف حدود المعقول يعنى لضرورة احكام زي مايقولوا يعني مش ممنوعات بس محدودات حتى الكلام عندنا محدود بين الشب والبنت ومايتجاوز هذه الحدود
رمزي: وعادي الشب يضم بنت عندكم
جواد: لا ماعندنا هاشي
رمزي: يعني ممنوع
جواد: اكيد
محمود: بس راه احنا وميار مش بينا هالحدود يكون ف علمك بس
رمزي: علاش
محمود: قلتلك لان ميار مختلفة عن اي بنت أو اي حد هنا فاهم
سند: شباب خلاص غيروا السيرة والله نعست وانتم عندنا وماعندنا خلاص عاد
ميار" وقفت: انا نعست تصبحوا ع خير "مشت بسرعة"
جواد: مشت بدون ماحتى نلحقوا نردوا عليها
محمود: يمكن زعلانة
عمر: من شن بتزعل
محمود" شاف لرمزي: ابصر يمكن من كلام رمزي
رمزي: انا ماقصدت شيء بس نبي نوضح وجهت نظري
جواد: لا تهتم ميار ماتزعل من كلامك يمكن ف شيء مضايقها أو هي بالفعل نعسانة
سند: شباب شن رايكم يقول كل واحد نكتة
محمود: نكتة ههه احنا نسينا النكت هنا
سند: اوكي انا نقلكم وانتم عليكم بس الضحك
الكل: هههههههههههههه
سند: اسم الله قعد مابديتش
محمود: هههههههه اصلا انت كلك نكتة
رمزي: هههه وانا اشهد هههههههههههه
سند: احم احم راكم اطقوني بعين
رمزي: نوض بالك مصدق روحك
سند: نزعل راهوا ومانحكيش ولا نكتة مرة فيه واحد
الكل: هههههههههههههههههههههههههههههههههههه
سند: يا ربي خلوني نبدا
جواد: هههههههههههه ابدا ابدا
؛؛؛؛؛؛؛؛؛؛
انتهى العشرين
قصيره عارفاته😶 ومافي حدث مهم لكن باذن لله يكون البارت 21 ارووع منه💝
متابعين
تصويت+ تعليق+ رايكم =❤