البـ✎ـارت الحــادي عـشــر
🎀عندما اشتاق اليك اتكلم كلماتك اكرر اغانيك
اتصرف مثلك فقط لأحتوي شيء منك🎀
مـــــــســــــــــاء
ميار" مقعمزه في دارها حست بملل وقفت وطلعت من الدار ومشت لصالة لقت سجى وسناءيحضروا خشت و قعمزت"
سجى: وينك يا ميار من وقت الغداء معش شفتك شن حابسة روحك في الدار
ميار: ما في شيء
سناء: اكيد زعلانة من رمزي لأنه خلف بوعده
ميار" رفعت حاجبها" رمزي لا مستحيل نزعل منه
سناء: اهئ ومن كان يقول خاين وكذاب
ميار: انا سامحته
سناء: والله الف مبروك
ميار" طنشتها ولفت لتلفزيون بصوت عالي: سجى خلي
سجى" لفتلها: شن؟
ميار: خلي على المسلسل
سجى: اما مسلسل
ميار: المسلسل يلي يحضر فيه رمزي
سجى: اه حاضر
سناء: وانت شن تابعي فيه امعاه
ميار" طنشت وبدت اتابع في المسلسل ومندمجة امعاها "
::::::::::::::::::::
رمزي" مقعمز في الصالة ويحضر : زعمة ميار شن ادير تو والا تحضر في المسلسل امم مرات ما تبيش تطلع من دارها وتشوف حد يا رب تكون بخير "ابتسم وهو يذكر في ضحكتها وكيف لما ترتبك يبدو خدودها حمر " ياااه والله مشتااق لها مشتااااق مر نص يوم وكأنه سنة بدونها
......
جاء اعلان وقفت
سجى: المسلسل ما تمش جاء اعلان
ميار" عارفة بنمشي للكوجينه "وطلعت ومشت"
سجى" رن نقالها ردت: الو هلا مريومه .....اي والله هاني كيف شديت الكتاب..... أي والله ربك يستر..... اه أي اوكي .. يلى باي "سكرت ولفت لميار يلي خاشه وناهضة طاسة و قعمزت "باستغراب: شن هذا
ميار" ابتسمت" نسكافيه
سجى" بتعجب: بتشربيه؟
ميار: اكيد
سجى: ومن امتى تشربي في النسكافيه في طاسة كبيرة
ميار: عادي
سجى: مرات يضرك
ميار: رمزي يشرب فيه وهذه الطاسة ديما يشرب فيها
سجى" سكتت وتشوف لميار يلي شاده طاسة النسكافيه و تحضر "
ّّّّّّّّّّّّّّّّّّّّّّّّّّّّّّّّّّّّّّّّّّّ
.....
...........
جواد" نزل من السيارة ولف لمحمود: خيرك
محمود" بصوت عالي: نعســـــــــــــان
جواد: ههههههههههههههههه وارقد من شادك
محمود" مشي: والله تعبان ونعسان و زادوا صدعوا راسي الشباب
جواد: هههه خلاص تو ما في شيء شد فراشك وارقد
محمود: خايف نرقد انوض ع صوت مزعج زي يلي في الصبح
جواد: ههههههههههههههههه والله البنت تفلق ضحك
محمود" كشم: مش عارف امنين طايحه ها المخلوقة
جواد: ههههههههههههه حرام عليك والله جوها لأضحك
محمود" بغضب" والله طيرتهالي
جواد" ابتسم" هي اول مرة نشوفها شكلها امس جت مع الناس يلي هربوا من القصف
محمود" وقف ولفله: والله شكلها مش شكل وحدة هاربة من الحرب
جواد" باستغراب: علاش؟
محمود: والله شكلها هاربة من مستشفى المجانين
جواد: هههههههههههههههه حرام عليك
محمود: جواد الله يخليك تو بنخش نرقد اقعد احرس عليا
جواد: كخخخخخخخخخخخخخخخخخ شن خايف
محمود" بغضب: لا بس ما نبي حد ينوضني لين غدوة واكان حد نوضني بنرتكب فيه جريمة
جواد: هههههههههههههه حاضر .حاضر خش ارقد
محمود: تصبح ع خير " خش لتريلا "
جواد: ههههههههههههه جو عليه
[ المخيم فيه تريلات عائشين فيهم العائلات وفيه بعض الخيم احتياط للعائلات اللاجئة و مستوصف فيه معدات بسيطة ]
:::::::::::::::::::::::::::::
ميار: اوخ تمت
سجى: المسلسل عجبك؟
ميار" ابتسمت: أي رمزي يحبّه
سجى: يعني لان رمزي يحبه انتي تحبيه ؟
ميار" اتسعت ابتسامتها: أي اكيد
سجى" اكيد تحبيه اخ شن بيصير فيك كان تعرفي انه السبب في كل احزانك"
الام" خشت: تعالوا للعشاء؟
وقفوا ومشوا للكوجينه وميار مشت و قعمزت ع الكرسي يلي يقعمز عليه رمزي وبدت تأكل
سجى" تراقب في تصرفات ميار وحاسة انها تقلد في رمزي حتى في طريقك مأكلته وكأنها في اختبار ودارسة كل تحركاته وتصرفاته حتى انها تستعمل في كلمات خاصة برمــــ ـــــزي ..........
ِِِِِِِِِِِِِِِِِِِِِِِِِِِِِِِِِِِِِِِِِ
🌹قمه البهجة ان تتذكر عزيز عليك في كل لحظة وقمة الحزن الا تستطيـع رأيتــه🌹
.....
صباحــــــــــــــا
ميار " حاسة بملل فضيع مشت لداره وفتحت الباب وخشت وردت الباب لفت ع الدار كلها ومشت لدولاب وطلعت دجاكته وابتسمت وشمتها: اااه ريحت عطره عالقة فيها ويــــــــــــــــــــــنك يا رمزي حاسة الايام بدونك كأنها سنين اخ مزال ثلاث ايام وتجي و يــــا رب ما اطوّل اكثر لأني فديـــــت
ْْْْْْْْْْْْْْْْْْْْْْْْْْْْْْْْْْْْْْْْْْ
طلع ولقى الجو حلو ابتسم وتكسل: اووووووووووووووووخ
: صح النوم
محمود" لف وابتسم: الله يسلمك
جواد: صباحو شن رقدت باه وطيبت نومك
محمود: ههههههههههههه أي
جواد: كويس يلى ورانا شغل هلبة
محمود: وووك ما عندي جو
جواد" كتف ايديه : والله
محمود" هز راسه بنعم
جواد: يلى .يلى بلا كسل ورانا شغل هلبة
محمود" بدلع: جواد اعفيني اليوم تعبان واجد
جواد: نو نو نو ما في اعفاء اليوم يلى قدامي
محمود" القى التحية: حاضر معلم للأمام سر وحد اثنان " مشي"
جواد: هههههههههههههههههه
محمود" وقف ولف: معلم
جواد: شن
محمود: فيه وجبة فطور لان عصافير بطني تزقزق
جواد: هههههههههههههه أي ههههههههههههه فيه ههه برى افطر وتعال
محمود: حاضر
جواد: هاء رد بالك تهرب
محمود: امرك " مشى"
جواد: ههههههههههههههههههههههههههههه
؛؛؛؛؛؛؛؛؛؛؛؛؛؛؛؛
رمزي" في مقر الشرطة مقعمز في المكتب" حاس بفراغ بدونها والله حاس اني فاقد شيء مهم في حياتي والايام بلاها كأنهم سنين
سند" حاط ايده ع خده ومبتسم" مستاحشها
رمزي: موووووت والله مشتاااااااااااااااااااااق ليها
سند" مبتسم: تحبها
رمزي" تنهد: ما ندريش
سند: كل هذا وتقول ما ندري
رمزي: سند واضح اني نحبها
سند" ابتسم: اكيييييييييييييييييييييييييييد تحبها هذا واضح وضوح الشمس
رمزي" تأفف" اووووووووووف
سند: خيرك ؟
رمزي: ما نبيش نحبها
سند: علاش؟
رمزي" بضيق: ما نبي نعذبها اكثر ما نبي نتعلق بيها وبعدين نخسرها ولا نبيها تتعلق بي وبعدين تكتشف الحقيقة وتكرهني وتحقد عليا مش عارف وقت تعرف شن يصير فيها هي ديما تسأل فيا من دار لها الحادث ولما تتكلم عن الحادث تتكلم بألم وحقد وكره وقالت لو عرفت يلي دار لها الحادث بتحاسبه وقالت الموت فيها اشويا ااااخ لو تعرف اني انا. وفوق كل هذا عائشة كذبة كبيرة واحنا معيشينهالها ما نعرف كيف بيكون موقفي قدامها وكيف نبرر لها موقفي ومن وين بنجيب لها اعذار اااخ
سند: كل يلي قلته ما يمنعك تحبها واصلا ما تقدر تمنع نفسك من حبها ابدا
رمزي: انا حتى لو حبيتها مــــ
سند" قاطعه: انت اصلا حبيتها
رمزي: المهم حتى لو صار شيء او شيء انا نقدر نتحمل بس هي لو حبتني بتتعذب اكثر لما تكتشف اني خدعتها
سند" بابتسامة" انت ريح روحك و خليني انا نحبها وتو نخليها تحبني
رمزي" عصب: شن حست قلت
سند" بابتسامة: و نخطبها و نأخذها
رمزي" وقف ومشاله وهو معصب " شن قلت تخطبها وتأخذها
سند" وقف وهو خايف: انا قصدي عليك انت تأخذها
رمزي" رفع حاجبه بغضب"
سند: رمزي انا قصدي عليك راك تفهم غلط
رمزي" بعصبية: بري لمكتبك بسرعة
سند: ناسي ان المكتب مسكر والمفتاح عند محمد وهو ما جاش
رمزي" بعصبية: المهم برى من قدامي
سند: رمزي خيرك معصب
رمزي" بغضب: منك
سند" ابتسم: تغار عليها
رمزي" بعصبية: ما دخلكش
سند" مبتسم برواق" لا ؛ تغار عليها وتحبها وتموت فيها وما تبي تخسرها
رمزي: سند قلت اطلع من قدامي
سند" قعمز وحط رجل ع رجل وابتسم: رمزي قول الصدق شن اتحس اتجاهها يعني لما تشوف لها ولما تبتسم لك ولما تكون قريبة منك وخاصة لما تلمسها شن تحس
رمزي" بعصبية: سنــــــــــــــــــــد
سند: قول .قول احساس حلو صح لما تكون قريبة منك وتحس بأنفاسها قريبة وتقدر تحصي دقات قلبها
رمزي" كاتم عصابيته" سند نوض من قدامي
سند: رمزي قول الصراحة انت تستغل وضعها لما تكون في حالة نفسية صعبة لين تقرب منها صح
رمزي" بصوت عالي: سنـــــــــــــــــــــــــــــد نوض نووووووووض
سند: قول قول شن تحس
رمزي" شده بغضب ووقفه" اطلع من قدامي قبل ما نقتلك
سند: اوكي خلاص طالع
رمزي" طلقه بغضب: هيا بسرعة
سند" مشى ولفله: رمزي
رمزي" بنفاد صبر: شن ؟
سند" ابتسم: اذا ما تبيها خليها لي انا نحطها في عيوني "مشى بسرعة وطلع"
رمزي: اوف " مشى قعمز ع الكرسي: زعمة يا ميار شن تو دّيري مشتاق لك مشتااااااااااااااااااااق اخ امتى نشوفك
,,,,,,,,,,,,,,,,،
جواد ومحمود" ينزلوا هما والشباب في التموين والمساعدات يلي وصلوا للمخيم....
جواد: شباب حطوا هدم غادي
محمود" قعمز: اوووووووووووه
جواد: خيرك
محمود" بصوت عالي " خلاااااااااااااااااااااااااااااااااااااااص عييييييييييييييييييت
جواد: برى ارتاح
محمود" وقف: حاس اني بنمرض
جواد" ابتسم: امم تبي تتهرب
محمود: لا والله تعبان حاس كل عظامي متكسرة
جواد: ههههه برى ارتاح واكان حاس انك مريض برى للمستوصف
محمود: لاااااااااااااااااا كل شيء ولا الطبيب
جواد" ابتسم: لا عاد كيف مريض وما تمشي برى بالك يعطوك ابرى
محمود: لاااااااااا شن ابرى لا لا انا بخير هاه صحيح زي الحصان
جواد: هههههههههههههههههههههههههه خايف
محمود: لا من قال
جواد: هههههههههههههههه قال من قال قال ههههههههه انا عارفك زين
محمود" بغضب: باه خلاص اس
جواد: هههههههههههه
محمود: جـــــــــــــــــــــواد
جواد: هههههههههه برى ارتاح برى عن تمرض هههههههههههه
محمود: أي احسن ما نمرض ما نبيش لا نمشي المستوصف ولا يجيني
جواد: ههههههههه [ سمعوا اصوات عاليا وصراخ فزوا وخافوا]
محمود" بخوف: شن هذا شن صاير
جواد: علمي علمك
محمود" برجفة: مرات المستعمرين خشوا
جواد: شباب كملوا شغلكم
محمود: هيا " مشوا يجروا للمكان يلي جاي منه الصوت وصلوا ولقوا تجمع غريب قربوا وخشوا بين الناس ووقفوا قدام التجمع وانصدموا..
ياسمين" شاده صفارة وواقفة بين فريقين " هيا الفريق باء الكورة عندكم هاجموا .... [بدو يلعبوا وصوت التسجيع عالي وهي تلحق في الكورة مدايره روحها حكم وتصفر لهم ]
جواد ومحمود" شافوا لبعض وعلامات الاستفهام فوق روسهم"
محمود: شن يصير؟
جواد: شوفت عينك
محمود" بانت علامات الغضب ع وجها: بنت الذين
جواد" شد ضحكته: كل خوفنا وخلعتنا على الفاضي في الاخير طلع فيه مباراة في المخيم وما ندروا
محمود" بغضب: تو تشوف "مشي"
جواد" بصوت عالي" محمـــــــــــــــــــــــود تعــــــــــــــــــــــــــال
ياسمين" تجري وراء الكورة " هي انت انتبه زين وخلي الكورة في الخط المستقيم وانت الثاني دافع زين [حذفوا الكورة بعيد وشافت لها كانت اطير في الهواء] بسرعة شدو الكورة ايييييييييييييي[ صدمت في شيء رفعت عيونها عليه وشافت له]
محمود" مكتف ايديه ويشوف لها بغضب"
ياسمين" بغضب: شن اعمى
محمود" بغضب واضع ع ملامحه: شن يلي اديري فيه
ياسمين" كتفت ايديها: ويه زيادة على كل عيوبك طلعت اعمى مسكين
محمود" بعصبية: بلى هزؤه
ياسمين: شن تبي
محمود" بعصبية: كل ها لدوشة مدايرتيها وتقولي شن تبي
ياسمين: تره حول عني مش فاضيتلك حول من قدامي "دفاته ومشت"
محمود" عصب ولفلها ولحقها ووقف قدامها"
ياسمين" رفعت حاجبها: شن تبي ؟
جواد" جاهم: محمود
محمود" بعصبية: وقفي ها المهزلة؟
ياسمين: ههههههههههههههههههههههههههه ههههههههههههههههههه
محمود: شن يضحك فيك
ياسمين: هههههههههه مهزلة هههههه أي مهزلة تتكلم عنها
محمود" بغضب: ها الدوشة يل مدايرتيها
ياسمين: تره حول من قدامي
محمود" بغضب: احترمي نفسك احسن لك
جواد: محمود
ياسمين: يا هو انت انا محترمة نفسي شوف لنفسك قبل
محمود" عصب: هي انت
جواد" شد ايده: محمود خيرك
محمود" بغضب: شوف شن ادير ها المجنونة
ياسمين" كتفت ايديها" شن اندير يعني نلعبوا بالكورة شن حرام
محمود" بغضب: أي حرام
ياسمين: الله الله شن طلعت مفتي
محمود" عصب لدرجة من هزؤها " جواد اطلقني خليني نربيها
ياسمين" بدلع: جواد اطلقه خليني انا نربيه
محمود" بصوت عالي وهو يدف في جواد: تحول حـــــــــــــــــــــــــول خليني نوريها
جواد" بعصبية: محمود خير بلاك
محمود" بعصبية: شوفها اتهزه عليا واطوّل في لسانها
ياسمين" بعصبية: انت يلي جاي تدخل فينا بعدين شن درنا احنا نلعبوا
جواد: أي خيرك انت معصب
محمود" بغضب: شن هكا اللعب والله لما سمعت اصواتهم نحسابه المستعمرين خشوا ولا بكت نار والا اشبح شن صار والله من الخلعة قريب متت
ياسمين" رفعت حاجبها: ويه عبوا عليك
جواد" ما قدرس يشد ضحكته: ببببههههههههههههههههههههههههههههههههههه
محمود" دف جواد بعصبية: اقسم بالله لتبي قص في لسانك "لف لجواد" وانت اسكت خير لك
جواد: ههههههههههههه والله كلامها حق شن كان لعبوا
محمود: ممنوووووووووووووووووووع
ياسمين: والله و علاش؟
محمود" بعصبية: ممنوع ادير شيء بدون ادن المسؤولين عن المخيم
ياسمين: والله و الله بالك تبيني نأخذ ادنك كان بنمشي للحمام
جواد: هههههههههههههههههه كلامها حق
محمود" بعصبية: انت اسكت خير ما نفش غلي فيك بعدين يا هيه انتي امس كيف جايا وقلبتي المخيم ع راسه
ياسمين: والله جيت ولقيت الجو كئيب قلت انشطهم شوي
محمود" بغضب: وهكا هو التنشيط قالبه المخيم ومدايرتيه ملعب للكورة
ياسمين: أي هكا ومزاااااااال ما شفت شيء
محمود" بغضب: ممنوع تساوي أي شيء بدون علمنا
ياسمين: بنساوي مدام هذا الشي لصالح الاطفال
محمود" بعصبية" قلت ممنوع
جواد: كلامها صح ؛ شوف عاجبك الصغار شدين تركينا , وما يتحركوا ولا عندهم شيء يلعبوا بيه ولا حتى نشاطات ؛ يا راجل خليهم يبعدوا عن جو الحرب هما ما صدقوا طلعوا من سجن تسجنهم ثاني
ياسمين: هذا الكلام الصح شكرا اخي المحترم
جواد: ههههههه لا شكر ع حقيقة اختي
محمود" بغضب: شن وقفت في صفها
جواد: هذا الحق بعدين خليهم ينسوا الحرب ويلهوا في اللعب
محمود: انا ما قلت نمنعهم
ياسمين: ومن قال تو انه ممنوع
محمود" بغضب: انت تسكتي خير لك
جواد: كملي لعبك بس بهدوء لان فيه ناس مريضة وانت تعال نتفاهموا
ياسمين" ابتسمت ولفت لمحمود وطلعت لسانها ومشت" هيا ولوا العبوا
محمود" عصب لدرجة: هي انتي
جواد" شده وتله: هيا .هيا
محمود" يمشي ويشوف لها و معصب " اخ كان ولد لقتلتها
جواد: ههههههههههههه هيا وخليهم يلعبوا
محمود" دف جواد: حول
جواد: ههههههههههه هدي يا راجل
محمود" بغضب: كان نقيس ضغطي نلقاه راقي
جواد: هههههههههههههه عادي مبكري من الخلعة هبط وتو عدلتهولك ههههههه
محمود" بغضب: اسكت خير لك
جواد" شد ضحكته: مش قلت مريض برى ارتاح
محمود: أي احسن لي " مشى وهو معصب"
جواد: ههههههههههه هه "تنهد " اه ليا زمان ما ضحكت اخ
[مشى و قعمز في مكانه المفضل يلي يقدر فيه يشوف للمدينة وقف وتنهد: المدينة بدت دمار ما قعد فيها شيء " قعمز وتنهد" لأيام فاتوا بسرعة اخر قصف ع المدينة كان قبل 9شهور [ تنهد بحزن وطلع من جيبه صورة ميار يلي لقاها بعد ما سمع بخبر موتها فاحتفظ بيها ولما يكون بروحه يطلعها ويشوفها ويحكي معاها؛] بحزن : حبيبتي ميار والله رايفت عليك حاس نفسي ضايقه اخ ياريت ما خليتك تمشي والله لو كنت نعرف انك بتمشي ومعش بنشوفك لمشيت معاك مرات يمكن متت معاك في القصف او ع الاقل نكون معاك في اخر لحظة ونودعك " دمعوا عيونه" بس لو نقدر بشوفك ولو ثانية بس لو يرجع الزمن اشوي لنعبر لك عن شعوري او على الاقل ما نفوت لحظة بدونك لو ندري اني بنفقدك لربطت وقيدت ايدي في ايدك وكنت معاك في كل خطوة ؛ اخ بس ما نقدر نغير القدر ؛ بس انتي كنتي متهورة وما تفكري مشيتي بدون علمي مع اني حذرتك اااخ يا حبي انت بس لو سمعتي كلامي ما كان صار يلي صار ماكنت نخليك تمشي بدوني ولا خطوة بس ااااخ القدر والموت كانوا اسرع وخدوك مني يا روحي يا نبض قلبي يلي عايش بيه نحبك بجنون حتى لو كنتي غير موجودة نحــــــــبك لأخر نفس في روحي يا روحــــــــي
ِِِِِِِِِِِِِِِِِِِِِِِِِِِِِِِِِِِِِِِِِِِ
الانـتـظـار مـؤلـم والـنـسـيـان مـؤلـم أيـضـا
لـكـن مـعـرفـة أيـهـما تـفـعـل هـو اسـوأ انــواع المـعـانـاة💔
بعد ثلاث ايام صباحا
ميار" طلعت من دارها ومشت للكوجينا لقت سجى مقعمزه تفطر: صباح الخير
سجى: صباح النور خيرك نايضة بكري
ميار" قعمزت ع الكرسي : ما جانيش نوم
سجى: ميار انت معش تحلمي بأحلام مزعجة ؟
ميار: لا
سجى: اه كويس
ميار: سجى
سجى: نعم
ميار" بدت تحرك في ايديها بتوتر
سجى: ميار قولي شن تبي
ميار: رمزي امتى بيجى
سجى: آمم ما ندري
ميار" بضيق: انا نبيه يجي بسرعة طول هلبة حاسة الايام بدونه كأنهم سنين والله مليت بروحي هو قال بيقعد خمس ايام بس انا رايفت عليه واجد
سجى" وقفت ولفت بتطلع: ان شاء الله يجي وما يطول
ميار: يا رب والله ما نقدر نعيش يوم بدونه
سجى" بدون ما تلتفت لميار " بسلامة
ميار" وقفت: بتمشي للكلية
سجى: للمستشفى " مشت طلعت"
ميار" قعمزت وتأففت : وف امتى بيجي
سجى" طلعت وتنهدت بضيق: والله انها بدت تحبه بجنون وتعلقت بيه اخ كيف تو بتتصرف يا رمزي علقت البنت فيك والمفروض تخليها تكرهك حتى ما تعذبها اكثر
::::::::::::::::::::::::::::::::::::::::::::::::::::::::::::::::::::::::
جواد ومحمود" مقعمزين في المكان المعتاد "
محمود: يعني الشباب قالو لك
جواد: أي قالوا بيجوا مجموعة من المدن المجاورة و بيديروا استطلاعات
محمود" بحقد: ولاش يجو باش يشمتوا فينا
جواد: اكيد لا ؛ بس بيجو ليديروا حل للأوضاع هذه وقالوا
محمود "لف وشافها " شن جابك هنا
ياسمين" تشوف للمكان: لله جو المدينه تبان كلها من هنا
محمود : تي ولي للمخيم
ياسمين: انا نولي امتى ما نبي وما حد يتحكم فيا
محمود" فرطت اعصابه؛ بغضب: شفت كيف ترد عليك هي يا انت خليك محترمة نفسك بعدين عيب عليك جايا تكلمي في اكبر منك بهذا الاسلوب بعدين انت ما عندك عيال يسألوا عنك
ياسمين" بعصبية: اسمع يا انت انا هنا مش محبوسة وندير يلي نبيه ونتحرك ونمشي وين ما نبي لا انت ولا الاخ المحترم ولا غيركم يدخل فيا فاهمين بعدين ما ليكش علاقة عندي عيال او لا خليك في حالك " لفت ومشت"
محمود" بعصبية: هي تعالي جاي " جاء بيمشي شده جواد ؛ بغضب: حول خليني
جواد: شن بدير لها
محمود" بغضب" نقتلها نضربها ندير أي شيء المهم نفش غلي فيها
جواد" بعصبية: انت خيرك ناسي انها بنت
محمود: اااااااااااخ لو انها مش بنت لقتلتها والله لو اطول لسانها عليا لنقتلها
جواد: خلاص هدي
محمود" تنهد بغضب و قعمز"
@@@@
ميار" حاسة بملل فضيع ادور في الحوش ومش عارفة شن ادير خشت لصالة و قعمزت: اوف يا ؛ شن ندير والله كساد و فدد امتى بتجي يا رمزي امتى ؟؟ "خدت الجهاز وبدت تغير ما لقت شيء تحضره حذفت الجهاز وتأففت ووقفت: شن ندير مع ها الكساد اذا قعدت نستنا في رمزي بهذا الشكل اكيد بنحس ان اليوم طويل امم احسن شيء نلهي روحي بشي باش يفوتوا الساعات بسرعة "وقفت وطلعت تبي تلهي روحها بشي باش تتناسي رمزي ولو شوي"
...................................
.......................................
سجى" طلعت من الغرفة افت مريم ماشية لحقتها: مريم
مريم" لفتلها: هلا
سجى: اهلين شن عندك تو
مريم: بنشوف مريضة في الغرفة 8 وانت شن عندك
سجى: امم شيء صح وين الدكتور المرعب
مريم: امم قالوا طلع
سجى" ابتسمت: مليح هذه فرصة
مريم: شن بديري؟
سجى" ابتسمت: و لا شيء بس نبي نتنفس بنطلع برى في الحديقة نتلاقوا بعدين يلى باااااااااااااااااي " مشت للاصنصيل وركبت فيه وضغطت ع الطابق الثاني وابتسمت ووصل لدور الثاني نزلت ومشت وهي طايرة من الفرحة ووصلت للغرفة لقتها مردودة شافت لداخل ما لقت حد ابتسمت وخشت وسكرت الباب ولفت للأطفال يلي في الغرفة : واي يا كتاكيتي الصغار اشتقت لكم ليا زمان ما شفتكم اليوم عندي وقت بسيط ليكم لان الدكتور المرعب ما هناش وان شاء الله يطول وما يجي لأني نبي نقعد اطول وقت معكم يا كتاكيتي " بدت ادور عليهم بالواحد وتشوف فيهم وهي طايرة من الفرحة "
ََََََََََََََََََََََََََََََََََََََََََ
......
رمزي" واقف في دار التحقيق ويحقق مع متهم ؛ ومعصب لدرجة ضرب الطاولة بقوة : اعترف من معاك في عملية السرقة
متهم: انا ما سرقت شيء وما في احد اعمايا
رمزي" شده بعصبية: لا تكذب احسن لك
سند: رمزي هدي
رمزي" بعصبية: اعترف احسن ما نغير اسلوبي معاك انت ومن اشتركتوا في العملية هذه عمليه كبيرة ومستحيل تقوم بيها بنفسك وكان تعترف تو نخففوا عقوبتك
متهم: قلت لك انا ما درت شيء
رمزي" ضربه بقوة و بغضب : كيف ما درت شيء و الشرطة شدوك ملتبس اعترف احسن لك
متهم: انا بريء
رمزي" بعصبية: كيف بريء اه كيف؟ واحنا لينا مدة نراقبوا في تحركاتك اعترف من يلي كان معاك واشك انكم هلبة مش واحد او اثنين بسرعة اعترف
متهم: انا مش معترف بشي لان ما ساويت شيء
رمزي" شده بعصبية : بتعترف غضبن عنك
سند" شده: رمزي هدي واطلقه
رمزي" حذفه بقوة : خوذه وخليه يعترف غصبن عنه بسرعة بعده عن خلقتي
الضابط" شده وطلعه"
رمزي" زفر بقــــــــــــــــــــوة" وف
سند: رمزي خيرك معصب
رمزي" ضرب الطاولة بقوة وطلع وقب الباب بقوة ومشي"
سند:؟؟؟؟؟ "مشي لحقه للمكتب متعه ولقاه واقف ويدور ويزفر بقوة" رمزي خيرك
رمزي" بعصبية: رقى ضغطي
سند: هذه اول مرة تعصب لهذه الدرجة خيرك؟
رمزي" بعصبية: شن ها لمهمة يلي طلعوا لنا بيها تو وقتهم
سند: من يوم يومك تتمنى تمشي للمدينة الغربية شن قالوا تو
رمزي: مش وقتهم
سند" قعمز وابتسم: وقت من اه؟
رمزي" قعمز وزفر بقوة: انا نعد في الايام باش نولي وهما يقولوا بروا
سند" حط ايده على خده وبابتسامة: تعد في الايام باش تشوفها
رمزي" بتنهيدة: أيـــــــــــــــــــــــــــــه مستــــــــــــــــــــــــــــاحشها لها والله نبي نشوفها و ما نبيش نمشي عارف كان مشيت نطول وف منهم ما لقوا الا ها لوقت يقرروا يمشوا للمدينة الغربية
سند: يا صاحب عادي
رمزي" بصوت عالي وعصبية: شن عادي اه شن عادي
سند" سكر اودانه" بشوي طرشتني
رمزي" بعصبية: خليك ساكت احسن ما نفش غلي فيك انا مش طايق حتى روحي
سند: هدي يا صاحب ما في شيء يستأهل تعصب عليه خلاص برى وان شاء الله ما اطولوش " ابتسم بخبث: واذا مشغول عليها انا نهتم بيها بدلك
رمزي" وقف وبانت علامات الغضب عليه؛ بعصبية : تهتم بمن
سند" برواق: بالأميرة الحلوة ميـــــــــــــــــــــــــــــوره
رمزي" بصوت عالي" ســــــند اقلب وجهك من قدامي بسرعـــــــــة
سند" حط رجل ع رجل : رموز صاحبي خيرك معصب هدي
رمزي" كاتم عصابيته: والله كان تزيد كلمة نقتلك
سند: اوكي بس انت هدي
رمزي" قعمز " وف خلاص قررت
سند: شن؟
رمزي: مش ماشي امعاهم
سند: و علاش " ابتسم بخبث: والى ع خاطرها
رمزي" شاف له بغضب"
سند" ابتسم: وكيف بتقلهم انك ما تبيش تمشي لأنك تبي تشوفها ومستاحشها
رمزي" صر ع سنونه" سند انا شن قلت
سند: ههههههههههههه ان شاء الله يخلوك تقعد "وقف: باش تمشي وتشوفها عاد اكيد تستنا فيك ع نار عاد انت ما يهون عليك تزعل حبيبتك ميار " لف وطلع"
رمزي" زفر بغيض" ووووووووووف منهم تو وقتهم اخ يا ميار والله مشتاااااااااااق لك مووووووووووووووت امتى نشوفك
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
سجى" وقفت: يلى كتاكيتي الحبايب انا بنمشي ونوعدكم نجي كل ما لقيت فرصة يلى اتمنى نشوفكم بخير وكبرتوا هههههههههه أي صح كان كبرتوا بتطلعوا من هنا ومعش بنشوفكم يلى بايااااااااااات حبايبي " مشت وطلعت بهدوء ولقت الممر فاضي تنهدت براحة ومشت بسرعة لجهة الاصنصيل وقفت مخلوعة لما شافت الدكتور فادي ماشي لجهة الاصنصيل مشت اتخبت وبدت تراقب فيه خش للاصنصيل ولما شافاته اسكر تنهدت بقوة: اه الحمد لله بس شن اندير مرات يكتشف اني مهناش "مشت بسرعة لدروج ورقت تجري بسرعة ووصلت وهي حاسة ان نفسها بينقطع تنهدت بقوة و قعمزت ع الكرسي تأخذ نفس :اااااااااه "حست ان في حد واقف قدامها رفعت راسها ووقفت بسرعة من الخلعة"
د فادي" رافع حاجبه: خيرك مخلوعة؟
سجى" بربكة وتتكلم وهي دهشانه " اه ما .ما خيــ خيرني شــ شيء
د فادي" باستغراب: خيرك تقول كنتي تجري
سجى: لا ما .مـــا شيء
د فادي" بتعجب: شن ما شيء؟ بعدين وين كنتي
سجى" بلعت ريقها: هنا
د فادي: شكلك كنتي تجري في الممرات لين حتى النفس بسيف تتنفشي
سجى" نزلت راسها بخوف"
د فادي: يلى يلي بلا لعب بسرعة برى للمجموعة
سجى" خايفة: أي مجموعة
د فادي: مجموعتك يعني أي مجموعة انا قائل لكم لما نجي نلقاكم مجتميعين
سجى" بربكة: اه ما كنتش ندري
د فادي: وتو قلت لك بسرعة بري
سجى: با بـــ باه
د فادي" شاف لها باستغراب ولف ومشي"
سجى" تنهدت بقوة" اه
د فادي" وقف ولفلها"
سجى" جمدت من الخوف ولفت ومشت قبل لا يسألها "
د فادي" رفع حاجبه: والله اشك انها كانت هنا
ْْْْْْْْْْْْْْْْْْْْْْْْْْْْْْْْْْْْْْْْْْ
........
............
.........................
في اليـــــــــل....
سجى" خشت لصالة شاده كتابها ولقت امها وسناء مقعمزات يحضروا قعمزت : وين ميار ؟
الام : في دارها
سجى: من لما مشى رمزي وهي ما تحبش تقعمز معانا
سناء: احسن افتكينا من شوفت شكلها
سجى" بعصبية: سناء اسكتي احسن لك بس نبي نفهم هي شن دارت لك
سناء: انا نكرهـــــــا في الدم وبلا سبب
سجى: اكرهيها ع كيفك بس خليك بعيدة عنها ...؛ يما كلماتك سحر
الام: أي وتسلم عليكم
سجى: الله يسلمها
ميار" خشت و قعمزت وتربعت ع الجلسة وخدت المسند وضماته و حاسة بملل"
سجى: ميار خيرك؟
ميار" بوزت" كســــــــــــــــــــاد
سجى: حابسة روحك في الدار وما تبيش الكساد يجيك
ميار" بضيق: حتى كان طلعت من داري الكساد بيجيني شن نديرله ما يخلينيش بكل
سناء" بمسخرة: شكله الكساد يحبك لين لابط فيك هههههههههههههههه
ميار" تنهدت بضيق" اه
سجى" بغضب: سناء شن قلت انا
سناء" لفت لتلفزيون" ما قلتي شيء
سجى: ميار لهي روحك في شيء وتو ما تحسيش بالكساد وتلقي الوقت يفوت فيسع
ميار: حاولت نفوت وقتي بس كساد وفدد
سجى: كلنا نكسدوا شيء عادي "شدت كتابها وبدت تقرى حست ان ميار تشوف لها : ميار فيه شيء خيرك تشوفي لي
ميار: رمزي غدوة بيجي
سجى: الله اعلم
ميار: بس هو قال بيجي بعد 5 ايام
سجى: يمكن
ميار" بضيق: يعني مرات ما يجيش
سجى: ما ندري
ميار: والله كسدت
سناء: يعني رمزي بيقلع عنك الكساد
ميار" طنشت سناء: سجى هو علاش مشى لحوشهم
سجى: قال عنده عمل ضروري
ميار: يعني ما يقدرس يقعد هنا ويمشي للعمل من هنا
الام: لا ما يقدرس لان العمل بعيد انت خيرك قابضة عليه
ميار" بضيق: انا نبيه يولي بسرعة
سناء: و علاش شن تبي فيه خليه يرتاح منك شوي
الام: ميار رمزي حتى كان ولى هنا بيجي ايام ويولي لحوشهم هو مش ساكن معانا طول عمره
ميار" حست بضيق وحزن: علاش؟
الام: لان امه وبوه يبوه يعيش امعاهم
ميار: وانا نبيه امعايا
الام" بعصبية: كيف تبيه معاك شن تبيه طول عمره يقعد معاك رمزي مهما كان هو غريب عنك
ميار" بحزن: بس هو ولد خالي
الام: أي بس مش خوك والا بوك باش يقعد معاك طول عمره ميار افهمي مش لازم تتعلقي برمزي لهذه الدرجة ؛ بيجي يوم تبدي انت في مكان وهو في مكان ؛ ما تقدري تجبريه يعيش معاك لأخر عمره بيجي يوم و تتفرقوا فهمتي
ميار " وقفت بغضب: لا لااااااااااااااااااااااااااااااااااء مستحيل نخليه يخليني ؛ هو قال ما يخليني لين انا نقله وانا مستحيل نقله يبعد عني مستحــــــــــــــــيل "مشت طلعت"
الام" بغضب: قلتله انها بتتعلق فيه بس هو ما يفهمش
سناء: هو يلي يبيها تتعلق بيه وفرحان بيها
سجى" وقفت وطلعت ومشت لدار ميار وطقت وخشت"
ميار "مقعمزه بعصبية" شن تبي؟
سجى: رمزي يسلم عليك
ميار" وقفت وقربت منها" س سجى شن قلتي
سجى" ابتسمت: رمزي يسلم عليك
ميار" بفرح: وينه هو جاء
سجى: لا
ميار" بانت علامات الزعل على وجها "
سجى: هو كلمني بالهاتف ويسال عنك ؛ وقالي نقلك انه يسلم عليك هلبة ؛ ويبعث لك سلامه الحار
ميار: هو قال هكا
سجى: أي
ميار: هو كلمك؟
سجى: أي
ميار: وانا
سجى" باستغراب: انتي شن؟
ميار" بزعل: علاش ما كلمنيش
سجى: باش بيكلمك انتي ما عندكس نقال
ميار" نزلت راسها بضيق" و علاش ما عنديش
سجى: امم ميار تبي تكلميه
ميار" رفعت راسها" كيف؟
سجى" طلعت النقال من جيبها" بنقالي
ميار: ونقدر
سجى: أي انا تو نتصللك بيه "مشت و قعمزت "
ميار" مشت ووقفت قدام سجى وتشوف لها وهي تتصل وحاسة قلبها يدق بقوة"
سجى" رفعت راسها لميار لقتها تشوف لها "
ميار" بلهفة واضحة من لهجتها" كلمك
سجى" وقفت: لا
ميار" تغيروا ملامحها لزعل" و علاش؟
سجى: رقمه مقفل
ميار" بحزن: يعني شن؟
سجى: يعني ما نقدرش نكلمه
ميار" نزلت راسها بحزن"
سجى: خلاص هو تو غدوة يجي
ميار: اكيد غدوة بيجي
سجى: ان شاء الله ؛ ميار انت علاش مهتمة برمزي
ميار: لأنه الوحيد يلي يهتم بيا
سجى: ميار قولي رمزي شن يعنيلك
ميار" ابتسمت: هو دنيتي
سجى" لفت بتطلع: تصبحي ع خير
ميار: سجى
سجى" لفتلها"
ميار: لما يكلمك رمزي قله اني نسلم عليه وااااااااااااااااااااااااااااااااجد
سجى: حاضر تصبحي ع خير "لفت وطلعت "
ميار" قعمزت : اخ يا رب يفوتوا الساعات بسرعة باش نشوفك يا رمزي
'''''''''''
°°°°°°°°°°,,,,
جواد" متكي ع السرير وحاط ايديه خلفه ويشوف لسطح"
محمود" متكي ع السرير ورافع راسه وسانده ع ايده" جواد
جواد: ام
محمود: وين سرحان؟
جواد: نفكر
محمود: في شن تفكر
جواد" قعمز: في وضع المخيم احنا مش قادرين نوفروا الاشياء الضرورية ولا قادرين نغطو النقص انت تعرف ان العائلات اللاجئة للمخيم ازداد عددهم
محمود: أي والله حتى انّا ما نقدروا نسيطروا ع وضع المخيم وخصوصا لما جت البنت المجنونة المخيم بدا فوضى
جواد" ابتسم: والله بعد ما كان المخيم يعمه الكساد والملل ولا حياة فيه و بدت تدب فيه الحياة بفضلها
محمود" بحقد: واي قداش ما نكرها ها البنت
جواد: ههههههههههههه والله كويسة
محمود" بحقد : الكواسه يلي جثها والله ترفع لي في ضغطك
جواد: ههههههههههههههههه انت ديما ضغطك مرتفع
محمود: اقسم بالله خاطري نعطيها ضربة ع راسها بالك تعقل
جواد: ههههههههههههههههههه حرام عليك والله جوها فل
محمود" بغضب: فلفل في عينك انت وهي خليني نرقد احسن لي " قبل للجيها الثانية"
جواد: هههههههههههه تصبح ع خير
محمود: وانت بخير
جواد" اتكئ وطلع صورة ميار وابتسم: حبيبيتي انا بنرقد وان شاء الله نحلم بيك "حطها تحت مخدته وغمض عيونه وهو يدعي يشوفها في الحلم.
{يا ترى يجئ يوم ويشوفها في الحقيقة ؟؟؟؟ ان شاء الله يتلاقوا قريبا }
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
🌹انتظارك طال ؛ الحياة هادئة ؛ الاشياء باردة ؛ الاماكن مختلفة ؛ اين انت ؟ متى تعود؟!
..... اليـــــــــــــــــــــوم التالـــــــــــــــي يوم الجمعة صباحــــــــــــــا.....
سجى" طلعت من دارها وكانت ماشية باتجاه الحمام وقفت لما شافت ميار مقعمزه في الصالة و شاده المسند وضاماته.. خشت: صباح الخير
ميار" بهدوء: صباح النور
سجى" باستغراب" خيرك نايضة بكري
ميار: هكا
سجى" لفت لتلفزيون لقاته مطفي باستغراب: شن اديري و علاش مقعمزه وطافية التلفزيون
ميار: ما نبيش نحضر
سجى: باه تعالي للكوجينا نفطروا "لفت بتطلع"
ميار: سجى
سجى" لفتلها"
ميار" وقفت" سجى رمزي امتى بيجي تو في الصبح والا بعدين
سجى: امم ما ندري "لفت وطلعت"
ميار: اوف " طلعت وراها "
,,,,,,,,,,''''''''''
جواد ومحمود " يمشوا في ساحة المخيم"
جواد: حسان كلم وقال محمد عازمنا للعشاء
محمود: و علاش؟
جواد: شن نسيت عرسه امس واليوم عازمنا
محمود: اه اكيد نمشوا
جواد: انا مش ماشي
محمود" باستغراب: علاش ؟
جواد: هكا
محمود" شد ايد جواد ووقفه: علاش هكا ؟
جواد: ما عندي جو
محمود: علاش ما عندكش جو؟
جواد: انت عارف ما نحب ها العزائم
محمود: لأمتي بتقعد ع ها لحالة
جواد: لأخر العمر
محمود: جواد انت خيرك
جواد" مشى: ما خيرني شيء
محمود" لحقه: انت المفروض خلاص تعيش حياتك
جواد: هاني عايش
محمود" شد ايده ووقفه: لا مش عايش شوف حالتك يا راجل اطلع شوف الناس عيش حياتك اضحك افرح انبسط وخلي عنك الحزن والهم
جواد: انا هكا مرتاح
محمود: تكذب ع روحك
جواد: محمود يرحم والديك خلني في حالي
محمود: مستحيل نخليك لين تولي جواد يلي نعرفه يا راجل خلاص انساها ماتت مااااااتت افهم البنت مااااااااااااااااتت مش نافعك لا البكا ولا الحزن ولا العزلة انساها وعيش حياتك وولي جواد يلي الكل نعرفوه
جواد" بغضب: مستحيل ننساها بعدين شن تبيني نمشي لعرس وإلا مناسبة وهي ما ليهاش حتى سنة ميتة بعدين اذا هي ولت للحياة انا نولي كما كنت " مشى"
محمود" زفر بقوة: اف منه ما يتغير ابدا "لف وفز لما لقاها في وجها"
ياسمين" رفعت حاجبها" شن مجنون تتكلم بروحك
محمود" بغضب: شن دخلك بعدين شن جايا في خلقتي شن تبي
ياسمين" كتفت ايديها" منك انت ما نبي شيء
محمود" بغضب: باه انتلفي عن خلقتي
ياسمين: واذا ما انتلفت شن بدير
محمود" بعصبية: اقصري الشر و اخطيني عن نفش غلي فيك
ياسمين: شكلك ديما معصب انت ما تروق
محمود: وانت شن دخلك بيا شن علاقتك
ياسمين: انا ليا علاقة بيك لا يا ودي وانا شن علاقتي تعصب تطربق تموت ما دخلني فيك
محمود" بعصبية: باهي انتلفي عن وجهي
ياسمين: خير هدي هدى راني ماشيا واصلا ما نبي نوقف قدام خلقتك "مشت"
محمود" زفر بغيض: اووووووووووووخ من ها لبلا
""""""""""""""""""""""""""""
في الصالة
ميار" مقعمزه وسرحانة"
سناء: يما نبي رصيد لنقالي
الام: مش امس عبيتي
سناء: وتم
سجى: مسرع تم من كلمتي بيه
سناء" بغضب: صاحباتي يعني من
سجى: تم الرصيد كله ع صاحباتك
سناء" بعصبية: انت ما دخلكش
سجى" بعصبية: كيف ما دخلنيش اه
سناء: أي ما دخلكش
الام: خلاص انت واياها
سجى: يما قولي لبنتك تحترمني
سناء: يما قولي لبنتك ما تدخلش فيا
الام" بعصبية: خلاص انت واياها وانت تو نعصيك تعبي ومعش تصرفي هلبة
سناء: يما نكلم في صاحباتي وهو فيسع يتم شن بندير
الام: باه خلاص
ميار" لفت لسجى" سجى
سجى: شن
ميار: نبي نكلم رمزي
سناء: وشن تبي منه
ميار: سجى كلميه
سجى: رقمه مقفل
ميار" بضيق: شن يعني
سناء: يعني انه مسكره وما يبيس يكلمك
ميار" بحزن: هو قال انه بيجي بعد 5 ايام وتو فاتوا 5 ايام يعني اليوم بيجي
سجى: الله اعلم
ميار: يعني احتمال ما يجيش
سناء: أي بالضبط احتمال معش يولي هنا لأنه لقى روحه غادي مرتاح ومفتك منك ومن دوشتك
سجى" بعصبية: سناء
ميار" لفت لسجى: هو قال انه مرتاح غادي مني
سجى: لا هو ما قالس
ميار: امتى بجي أي ساعة؟
سجى" بنفاد صبر: ما ندريش
ميار: هو ما قلكش انه يبئ يكلمني ويسمع صوتي ؟
الام: ميار انت خيرك راك قبضتيني كل شوي تسالي عنه
ميار" بضيق: نبي نعرف امتى بيجي
سجى: ميار هو ما قال احتمال يجي واحتمال ما يجي اليوم يعني احنا ما ندروش عليه
ميار" وقفت وطلعت قبل ما تبكي قدامهم ومشت لداره وخشت وردت الباب و قعمزت ع السرير" وينك يا رمزي وينــــــــــــــــك امتى بتجئ والله مليت كل شيء بدونك ما له طعمة حتى حياتي صارت بلا معنى بدون وجودك فيها اااخ امتى تجي وتنور حياتي امــــــــــــتى؟؟؟؟ ؟؟؟؟؟
........
ليـــــــلا
محمود" يخلس في شعره ويشوف للمراية لف لجواد يلي شاد كتاب ويقرى " يعني ما تغير رايك
جواد" شاف له: لا سلم عليه و بركلي ليه
محمود" مشي ووقف قدامه" والله بايخة ترفض عزيمته ما تمشي وتبارك له بنفسك
جواد: قله مش فاضي
محمود: والله انك بايخ يعني تبيني نقله هو مش فاضي يجي لعرسك او انه ما يبيش يخش للأعراس
جواد" حط الكتاب واتكئ ع السرير وحط ايديه خلف راسه" قله يلي تبيه
محمود: جواد انا ننصح فيك لمصلحتك يعني انا عارف انك ما تبي تخش لفرح في هذه الفترة بس ع الاقل اعفس ع قلبك و ساير الناس عيب ما تمشيلهم
جواد: محمود اكيد الجماعة يستنوا فيك برى
محمود: ابد ما تتغيرش
جواد" لف للجهة الثانية وغمض عيونه: برى راك عطلت عليهم
محمود: انا ماشي بس راجعلك " مشى طلع"
::::::::::::::::
ميار " في الصالة واقفة ع الروشن وتستنا في رمزي "
سجى" خشت ولقتها واقفة" ميار شن ديري؟
ميار" وهي تشوف البرى " نستنا في رمزي
سجى" بملل" ميار قتلك انه احتمال ما يجيش
ميار" لفتلها بغضب" هو قال بعد 5 ايام بيجي مستحيل يكذب عليا ولا يخلف بوعده هو وعدني ما يطول
سجى" تنهدت: ميار هو عنده عمل ومرات يطول
ميار" مشت و قعمزت ع الجلسة وتربعت و خدت المسند وشداته وحطت ايدها ع خدها "
سجى" شافت لساعة لقتها30: 11 " ميار نوضي ارقدي ليل
ميار: بنستناه
سجى" بملل: هي هاي علينا ميار تو ليل خلاص مش جاي كان بيجي جاء مبكري
ميار" عصبت حذفت المسند بقوة ع الحيط ووقفت ومشت بغضب وطلعت وهي معصبه خشت لدارها و سكرت الباب بقوة"
سجى" تنهدت بقوة ولفت ومشت لدارها "
؛؛؛؛؛؛؛؛؛؛؛؛؛
صــــــــبـــــــــاحــــــــــا
سجى" في الكوجينا يفطروا " سناء
سناء: شن ؟
سجى: قولي الصدق انت تكلمي في ولد
سناء: لا
سجى: بس حاسة انك تكلمي في واحد
سناء" وقفت بعصبية" انا ما نكلم في حد بعدين احساسك خليه بعيد عني سامعة "مشت طلعت بعصبية"
سجى" تأففت" اوف
ميار" خشت وخدت كرسي و قعمزت"
سجى: صباح الخير
ميار" خدت طاسة وصبت الحليب وبدت تشرب"
سجى" باستغراب" ميار خيرك ما ترديش؟ بعدين خيرك نايضة بكري ؟
ميار" تفطر وما تبيش تتكلم"
سجى: شكلك ما رقدتيش واضح ع عيونك.... ميار نكلم فيك..." شافت لساعة وشهقت" اهئئئئئئئئئئئئئ وقت عليا " وقفت وخدت اكتباها " انا بنمشي سلام "مشت طلعت"
ميار" حطت الطاسة وتأففت" اوف كيف بيجيني النوم و انا نستنا في رمزي وينك يا رمزي ويــــنــــ؟ــــــــك طوّل غيابك وانا رايفت عليــــــــــــــــك واجــــــــــــــــــد
:::::::::
جواد ومحمود يمشوا في المخيم
محمود: الشباب كلهم يسلموا عليك
جواد: الله يسلمهم
محمود: الشباب كلهم جو للعزيمة ما عاداك طبعا
جواد: اه كويس
محمود: واكلهم قعدوا يسألوا فيا عليك وشن السبب يلي خلاك ما تجيش
جواد: اه باه
محمود" وقف و شد ايد جواد" وقف
جواد: شن؟
محمود: خيرك انت؟
جواد: ما خيرني شيء شني؟
محمود: انا نكلم فيك وانت اه كويس واه باه
جواد: أي وشن تبيني نرد عليك
محمود: جواد الله يربحك والله حالك ما هو عاجبني
جواد: حق بتمشي للاجتماع
محمود: أي اجتماع انت الثاني؟ ما تغيرش الموضوع
جواد: اجتماع يلي بنديروه مع الوفد يلي جاينا من المدن المجاورة
محمود" بعصبية: لأني ماشي ولا نبي نشوفهم
جواد: بس انا بنمشي
محمود: ع راحتك المهم لا تغير الموضوع انت ضروري تتغير
جواد: محمود انا هكا مرتاح
محمود: بس
جواد" قاطعه" محمود لله يخليك خليني ع راحتي
محمود: اوكي تو نخليك ويوم ثاني نتفاهموا و انا مش مخليك لين تتغير
""""""""""""""""""""""""""""""""""""""""""""
بسببك انت اصبحت سريعة الغضب
ميار "ادور في الصالة وحاسة انها فااااااااااااااااااااااااااادة خدت الجهاز و قعمزت وبدت تغير حذفت الجهاز ع الطاولة" اوووووووووووووف ما في شيء ينحضر اوف شن هذا؟ "شافت لساعة " اوف خيره الوقت يمشي ببطئ اف وينك يا رمزي وينك امتى ناوي تجي والا زي المرة الاولى خلفت بوعدك ليا تعـــــــــــــال يا رمزي تعااااااااااااااااال بسرعة
؛؛؛؛؛؛؛؛؛؛؛؛؛؛؛؛؛؛
جواد " يمشي باتجاه سيارته"
محمود: تمشي تشوف ها الناس و ما تبيش تمشي لعزيمة صاحبك
جواد: محمود بالله ما تبداش والله ما رايق لهذا الموضوع
محمود: حاضر بنسكت
جواد "وصلوا لسيارة ووقف" مدامك ما تبيش تمشي اعمايا اهتم بأمور المخيم
محمود: حاضر بس ما نوصيكش انت تهتم بالوفد يلي جاي وقلهم احنا ماناش محتاجينهم وقلهم نحنا نعرفوا كيف ندبروا امورنا وقلهم معش يجونا ولا يدخلوا فينا واذا قالوا انهم سخفين علينا قلهم لو حق حاسيين بينا كانوا جونا من زمان و دارو لنا حل وقلهم تــــ
جواد" قاطعه بعصبية" خلاص اسكت شن رايك تمشي بدلي وتقلهم يلي في خاطرك
محمود: لا ما نبيش نعكر جوي بشوفتهم
جواد: خلاص خليني نمشي راك عطلتني
محمود: باه برى بس لا تنسى تقلهم كل يلي قلته
جواد: مش مقايل شيء حول " ركب في سيارته" يلى بسلامة
محمود: رد بالك من روحك زين
جواد: باه
محمود: انتبه زين ولما تروح خلي حد من الشباب يجي معاك
جواد" بقله صبر" باه بااه خليني نمشي
محمود: اوكي برى بس زي ما وصيتكس
جواد: حاضر .حاضر يلى سلام
محمود: في امان الله " حرك جواد السيارة ومشى ؛تنهد بقوة" اه امتى بيجي اليوم يلي يهتم فيه بروحه والله تغير وبدا مش مبالي حتى بحياته الله يهديك يا جواد
:::::::::::::
رمزي" مقعمز في المكان يلي مجتمعين فيه هو والوفد يلي جاي للمدينة يلي بيجتمعوا مع الثوار والمسؤولين في المدينة الغربية ؛ كان سرحان ويفكر"
ميار زعمة شن صاير فيك زعمة مضايقة ؛ اكيد مضايقة وزعلانة مني واكيد حالتك ساءت بسببي بس اخ شن بندير هما جابوني هنا غضب عني اوف عاد كله مني انا يلي قابض ع الجي لهذه المدينة اخ يا ميار والله اسف بس يا رب ما تكونيش زعلانة مني ولا تكرهيني وف والله استاحشتك "قطع عليه تفكريه دخول ...
جواد" خش" السلام عليكم
الكل: وعليكم السلام
جواد" لف عيونه وشاف لحسان يلي اشرله يجي جنبه مشاله و قعمز: شن الاخبار؟
حسان: تمام وينك خيرك عطلت ؟
جواد: هذا محمود ما طلقني لين قريب طلع روحي
حسان: هههه وين ما جاش
جواد: بينه فكنا منا عارف كان جاء بيدير لنا مشاكل
رمزي" يشوف لجواد ومدقق فيه" حاس اني شايفه بس وين؟؟؟؟؟
المتحدث باسم الوفد: يا اخواني احنا جايين نشوفوا طلباتكم ويلي تبيوه
جواد: احنا مطلبنا واحد وطنا وحريتنا
المتحدث: تبوا توقفوا الحرب
حسان: اكيد ما حد عاجبه وضع الحرب
جواد: بس بشروطنا
رمزي: كيف يعني ؟
المتحدث: يعني تبوا اديروا اتفاقية توقفوا الحرب
جواد: شرطنا الاساسي يطلعوا من مدينتنا
واحد من الوفد: بس هما مستحيل يطلعوا
جواد: واحنا مستحيل نخلوهم في مدينتنا
رمزي: واحنا يا خوي امعاكم في كل يلي تقرروه
جواد" ابتسم لرمزي" الله يبارك فيك يا خوي
رمزي" ابتسم: ولو احنا المفروض علينا نجوا نحاربوا امعاكم نعرفوا احنا مقصرين امعاكم بس والله حاسيين بكم
شاب من الوفد: يا اخواني احنا هنا باش نساعدوكم بس المسألة تبي تفكير وهذا التهور مستحيل يدير نتيجة
حسان: شن قصدك
الشاب: قصدي اديروا اتفاقية توقفوا ها لحرب و كل طرف يتنازل عن بعض من حقوقه وديروا اتفاقات وشروط والطرفين يوقعوا عليها
حسان " بعصبية: قصدك يعيشوا امعانا ويشاركونا في ارضنا
الشاب: ما فيش حل ثاني
حسان" وقف بعصبية: مستحيل انت شن تقول
جواد" شد ايد حسان: حسان هدي
حسان" بعصبية: شن نهدي انت سامع شن يقول انتم جايين باش تساعدونا والا باش تزيدي علينا وناقص تقولولنا سلموا اسلحتكم وارواحكم للمستعمرين
المتحدث: احنا ما قصدنا ها الشي
حسان" بعصبية: وشن معنى كلامكم انّا نتفقوا كيف نقسموا عليهم ارضنا وكيف نعيشوا امعاهم هذا الشي مستحيل يصير الا على جثثنا
جواد: حسان هدي وقعمز وخلينا نتفاهموا
حسان" قعمز معصب"
المتحدث: يا خوتي خلونا نتفاهموا ونتفقوا ع شيء احنا جايين باش نساعدوكم
حسان" بغضب: احنا عندنا شرط واحد اذا انتم حق تهمكم مصلحتنا شرطنا الوحيد يطلعوا من بلادنا ويعوضونا على كل ها الدمار والحطام يلي سببهولنا وغير هالشي مستحيل نقبلوا بيه احنا صبرنا وحاربنا سنين وسنين مش باش في الاخير نستسلمولهم ونخلوهم يعيشوا معانا
جواد: شوفوا يا جماعة كلام صاحبي صح افترضوا لو احنا استسلمنا وخليناهم يعيشوا معانا تتوقعوا بيخلونا نعيشوا في حريتنا لا مستحيل بالعكس هذا وين يزيدوا ولو انا وغيري و غيري وافق بس مستحيل الكل يرضوا يعيشوا مع من دمر حياتهم ودمر بيوتهم وقتل اقاربهم احنا لينا اسنين في ها لحرب لين اسنين نعانوا في الظلم والتشريد و الاكثرية فقدوا اقاربهم تعرفوا انّ كل واحد فينا فقد حد ليه يلي فقد والديه ويلي فقد اهله كلهم ويلي فقد اصحابه ويلي فقد اقاربه ويلي فقد احبابه ويلي اطفاله ويلي زوجته ويلي و يلي كلنا فقدنا اعزاز علينا ما حد بيرضي يعيش مع ها الظلّام احنا مطلبنا واحد هو الحرية يكفينا يلي صار يكفينا واحنا مش مستسلمين لين اخر قطرت دم فينا تبوا تساعدوني على ها لشيء احنا موافقين اما غير هاشي مستحيل نوافقوا عليه
رمزي" كان يشوف لجواد ومعجب بكلامه " يا خوي
جواد: نعم
رمزي" ابتسم: احنا امعاكم قلبا وقالبا امعاكم في السراء والضراء
راجل: أي كلنا امعاكم مستعدين نساندوكم بكل شيء
جواد" ابتسم": الله يبارك فيكم
:::::::::::::::::::::
سجى " خشت للحوش ومشت ووقفت في فم الصالة لما شافت ميار مقعمزه " السلام
ميار" تشوف لتلفزيون وتهز برجلها بقلق وما تبيش ترد"
سجى" خشت باستغراب" ميار خيرك؟
سناء" خشت معصبه: هي انت وين الغداء
سجى: خيرك معصبه؟
سناء" بعصبيه: هذا مقعمزه هنا ومش مطيبة الغداء ولا ضامة الحوش شوفي كيف مقلوب
سجى: ميار خيرك مــــ
ميار" قاطعتها بعصبية: شن انا خديمه عندكم يلي يبئ يأكل الكوجينه قدامه
سجى " مصدومة من عصابيتها: ميار
ميار" بعصبية: كرهت روحي وكرهت اسمي كل شوي ميار . ميار تي انا مليت من معاملتكم انا نبي نرتاح شن ديما نخدم فيكم نبي نطلع نبي نعيش حياتي خلاص عاد يكفيني يلي تحملته
سناء" بعصبية: هي انت ما لا شن تبي الا تأكلي وتشربي وترقدي بس
ميار " بعصبية: ندير يلي يحلالي انت ما دخلكش
سناء" مشت لميار بعصبية وشدت ايدها: شن .شن
ميار" دفتها: اسمعي عاد سكت لك هلبه انا ليا حقوق وانا حرة ندير يلي يعجبني
سناء" بعصبية: هي انت
سجى" بعصبية: سناء خلاص
سناء: تو نقول لأمي تتفاهم امعاها انا ما نكلم وحدة مجنونة ومريضة " مشت طلعت"
ميار" بصوت عالي: ما فيش غيرك مجنونة ومريضة
سجى" بعصبية: ميار
ميار" بغضب: انت الثانية شن تبي مني انا مجنونة باه شن تبي مني تره اخطيني
سجى" بصدمة : ميار انت شن تقولي
ميار" قعمزت و كتفت ايديها" يلي سمعتيه تره بري خليني نحضر
سجى" لفت وطلعت وهي مصدومة من عصبية ميار"
ميار" تأففت وشافت لساعة : اوففففففففففففففففففففف منك يا رمزي اوف
::::::::::::::::::::::
تم الاجتماع وقرروا انهم يساعدوا ثوار واهل المدينة الغربية بالمعونات ويحاولوا يفتحوا معبر لخروج الاهالي اللاجئين من الحرب ومساعدة المرضى والجرحة و تقديم المساعدات بجميع انواعها
رمزي" يمشي وشاد نقاله: لازم نطمأن عليها والله خايف يكون صاير لها شيء بغيابي لا اكيد صاير لها شيء قلبي مش مطمئن "كان يمشي ويدوّر ع رقم سجى وما حس الا انه صدم بشخص وطاح منه نقاله وانكسر شهق " اهئئئئئئئئ
جواد" بصدمة: اوه ا اسف
رمزي" نزل وبدا يجمع في حطام نقاله ومضايق وقف وزفر بقوة" وفففففففففف
جواد" بأسف: اسف يا خوي والله كنت مستعجل وما انتبهتش عليك
رمزي: لا بسيطة لا تهتم
جواد: والله يا خوي ما قصدت
رمزي: لا عادي ما ادورش بس فيه محل لنقالات
جواد" ضحك بسخرية: هههههههه محل نقالات
رمزي" باستغراب: خيرك تضحك؟
جواد: يا الله نلقوا محل لمواد الغذائية
رمزي" اضايق: اه
جواد: اذا تبي نوصيلك على واحد من جماعتنا يلي برى المدينة
رمزي: لا ما نبيش نتعبك
جواد: لا عاد انا يلي كسرته
رمزي: ما ادورش بس ممكن نستخدم نقالك نبي نتصل اتصال مهم
جواد" ابتسم: اكيد تفضل "مدله نقاله"
رمزي" ابتسم له"
:::::::::::::::::::::::::::::
سجى "تمشي باتجاه الكوجينه سمعت صوت التلفزيون عالي مشت لصالة لقت ميار تحضر وصوت التلفزيون عالي " ميار واطي فيه شويا
ميار" حاطه ايدها ع خدها وحاطه رجل ع رجل وتهز فيهم بقلق " انا نبيه عالي
سجى: بس واطي فيه شوي صوته واصل لبرى من الحوش شن تبي تسمعي الجيران
ميار" بعصبية" شن حتى الحضر والصوت بتتحكموا فيه اه بعدين شن خائفين الجيران يقولوا انت والا سناء يلي معليين فيه عاد هما ما يعرفوش ان عندكم بنت مجنونة اسمها ميار
سجى: ميار شن ها الكلام يلي تقولي فيه
ميار" وقفت بعصبية: يلي قلته واضح بس تصرفاتكم عماي مش واضحة
سجى: انـــ "قطع كلامها رنت النقال شافت لقاته رقم " الو
رمزي" بعد شوي عن جواد": هلا سجى
سجى: رمزي؟
ميار" فز قلبها لما سمعت باسمه وحست ان دقات قلبها تعلى"
رمزي: كيف حالكم؟
سجى: تمام وانت
رمزي: انا بخير كيف حال ميار؟
جواد" سمع اسم ميار لف لرمزي وحط ايده ع قلبه وحاس انه ينبض بسرعة "
سجى" شافت لميار" امم تمام
رمزي: سجى طمنيني عنها هي بخير
سجى: أي انت وين معش اتصلت
رمزي: مش فاضي انتي عارفة اني مشيت للمدينة الغربية والله ما فضيت الا تو
سجى: اه أي صح انت في المدينة الغربية شن الاوضاع غادي
ميار" حست ان دقات قلبها علت من سمعت بالمدينة الغربية"
رمزي: تمام سجى طمنيني عنها والله مشغول عليها هي جنبك
سجى: أي
رمزي: عطيني نكلمها
سجى: حاضر "مدت النقال لميار: هاك
ميار" بصدمة: شن؟
سجى: رمزي يبي يكلمك
ميار" دفت ايد سجى بعصبية وبصوت عالي" ما نبيش نكلمه
رمزي" سمع كلامها وانصدم"
سجى" بصدمة: ميار خيرك؟
ميار" بعصبية: ما نبيش نكلمه ولا نسمع صوته كذاب .كذااااااااااااااااااااب خلف بوعده ليا كذااااااب
سجى: ميار عيب تقولي ها لكلام
ميار" بعصبية: ومش عيب يوعدني ويخلف بوعده مش عيب يقلي بنمشي ونجي بعد خمس ايام وهو لين تو ما جاش مش عيب يمشي للمدينة " بصعوبة نطقتها" الــ ـــغـــ ـــربــــ ــيــ ــــة وما يقليش هو عيب عليه مش انا نكرها نكرهااااااااااااااااااااا "مشت طلعت"
سجى" تنهدت : الو رمزي
رمزي" مصدوووووووووم: خيرها ؟؟؟؟؟؟
سجى: اكيد سمعت يلي قالاته
رمزي" بحزن: هي زعلانة مني صح
سجى: باين
رمزي: لا اكيد زعلانة سجى قولي بصدق كيف هي حالتها
سجى: طول الوقت معصبه و تكشخ وخلوقها ضيقات كانت تستنا فيك امتى تجي بعد ما قلتلها انك احتمال اطول اضايقت وعصبت
رمزي" تنهد بضيق: سجى اهتمي بيها زين ما نوصيك
سجى: والله يا خوي ما نقدر عليها والله ما نعرف كيف نتصرف معاها انت امتى بتجي
رمزي: انا الله اعلم امتى نجي بس انتي حاولي ما تخليها تعصب اوكي
سجى: حاضر
رمزي: يلى سلام.." سكر ولف لجواد يلي واقف ومشاله ومدله نقاله: الله يبارك فيك
جواد: خليه معاك يمكن تحتاجه
رمزي: لا اكيد انت تحتاجه اكثر مني يلى سلام نشوفك ع خير
جواد" ابتسم" ان شاء الله نتلاقوا في ظروف احسن
رمزي: ان شاء الله " ابتسم ولف ومشى"
جواد" تنهد : اه اوه نسيت نتعرف عليه ونعرف اسمه " اذكر ميار" اخ يا ميار هي اول مرة نسمع باسمك لشخص ثاني انا ما عرفت ميار غيرك ولا حتى صادفني ها الاسم " تنهد بضيق وحزن" والله مشتاااااااااااااااااااااااااااق لك مشتاق نشوفك نسمع صوتك بس اخ
حسان: جواد
جواد" لفله" هلا
حسان: وين سرحان
جواد: لا ولا شيء
°°°°°••••••••°°°°°°°°°••••••
ّّّّّّّّّّّّّّّّّّّّّّّّّّّّّّّّّّّّّّّّّّّ
مـــــــساءـ
ميار" طول اليوم كانت في دارها حتى الغداء ما تغدتش حست بملل طلعت من الدار ومشت لصالة لقت سجى وسناء مقعمزات مشت قعمزت وخدت الجهاز"
سناء: هي ما تغيريش احنا نحضروا
ميار" طنشت وغيرت"
سناء" عصبت: هي قلت ما تغيريش
ميار" ولا كأنها تسمع تغير لقت المسلسل يلي يحضر فيه رمزي ابتسمت"
سناء" وقفت بعصبية: هي انت طرشاء نكلم فيك هاتي الجهاز
ميار" مبتسمة وتشوف لتلفزيون "
سناء" مشت وقفت قدام ميار ودرقتها "
ميار" بعدت اشوي عن سناء وبدت تحضر"
سناء" وقفت قدامها بعصبية: هي انت شن انطرشتي هاتي الجهاز شن اطنشي
ميار" اذكرت كلمة رمزي {طنش تعش تنتعش} ابتســـــمـــــت"
سناء" بعصبية: هي شن تتبسمي هاتي الجــهـــــــــ" قطع كلامها رنت نقالها شافت لنقال " تو يبانلك على ها التطنيش " مشت طلعت"
ميار" شافت لسناء بربع عين ولفت لتلفزيون وابتسمت"
سجى" كانت تراقب في تصرفات ميار ؛ بهدوء: ميار ... ميار " تنهدت" ما تبيش تردي بس اكيد تسمعي فيا ها الشي يلي اديري فيه قبل ما يكون ضار بينا هو ضار بيك يعني تعصبي وتنرفزي وحتى المأكلة ما تأكليش انت في ها الشي في من تعاقبي اذا تعاقبي في نفسك فهذا بيضرك قبل ما يضر أي حد واذا انت تساوي في ها لشيء لأنك زعلانة من رمزي فاعرفي ان رمزي مستحيل يرضى بهذا الشي هو وصاك انك تهتمي بروحك صح ؟ وهذا هو اهتمامك بنفسك ؛ رمزي لو عرف بيزعل منك اكيد وانا عارفة انك ما ترضي تزعلي رمزي " وقفت" فهمتي كلامي خليه في بالك "مشت طلعت"
ميار" تنهدت بغضب" رمزي يزعل لو زعلت! هو لو فعلا ما يبيني نزعل كان جاء ولا خلاني نزعل بس هو ما يهتم بي ؛ أي وخليه يزعل زي ما زعلني انا ماني مهتمة بيه ابدا. ابدا
سناء" في دارها تتكلم بالنقال" والله طيرتهالي
عامر: سناء خليها ع راحتها ولا دققي على كل شيء تساويه ولا عاد تجي في طريقها خليها تأخذ راحتها ولا تعقبي ع كل تصرفاتها انت لازم تغيري من معاملتك ليها
سناء" بعصبية" شن قصدك انت اه
عامر: سناء خيرك معصبه؟
سناء" بعصبية: تقول ها لكلام وما تبيني نعصب
عامر: سناء انت بالفعل تخليها تتصرف معاك ها التصرفات انت لازم تغيري من معاملتك ليها لا تكوني ظالمة
سناء" بعصبية" يعني قصدك انا ظالمة وبلا قلب
عامر: لا متـــــ
سناء" بعصبية" لا قصدك هكا اسمع عاد اذا كانت تصرفاتي مش عاجباتك خلاص برى
عامر" بصدمة: شن قصدك ببرى؟؟
سناء" بغضب: يعني خلاص برى ومعش تكلمني يعني انســـــــــــــــــاني وامسح رقمي
عامر" مصدوم: انت شن تقولي
سناء" بعصبية: نقول اني فديت منك خلاص اخطاني
عامر: سناء انت عارفة الكلام يلي تقولي فيه
سناء" بعصبية: أي عارفة
عامر: والله ما قصدي نضايقك بس
سناء: خلااااااااص ما نبيش نسمع منك شيء
عامر: حبيبتي والله ما قصدك نضايقك حبيبتي بس اسمعيني
سناء" بغضب" انا لا حبيبتك ولا شيء خلاص كل حد يمشي في طريق من اليوم
عامر" بصدمة: كيف؟
سناء: يلي سمعته سلام "سكرت قبل ما تخليه يستوعب يلي صار وحذفت نقالها " اوف
: من كنتي تكلمي؟
سناء" فزت ولفت لصوت "
سجى" قربت منها بعصبية: من هذا اه
سناء" بعصبية: انت شن دخلك
سجى" بعصبية: دخلني من هذا تكلمي احسن م نوريك من هذا صاحبك
سناء: ما دخلكش
سجى" شدت ايد سناء بعصبية" انت كيف تكلمي واحد و تكذبي
سناء" دفتها" أي نكلم انت شن دخلك انا حرة
سجى" ضربتها كف بقوة" شن دخلني اه هذا غلط
سناء" بعصبية: انا حرة .حـــــــــــــــــــــرة ما حد ليه علاقة فيا ما حد
سجى" بغصب: انا كنت شاكة وسألتك علاش تكذبي؟ هذه اخر مرة تكلمي ولد اقسم بالله لو نسمع انك كلمتي حد لتعرفي شن بندير
سناء: شن بديري اه شن بديري؟
سجى: نقول لرمزي وانت عارفة شن بدير لك انا حذرتك بعدين ما تلومي الا نفسك فاهمة " لفت وطلعت"
سناء" عصبت ومشت وضربت الباب بقوة وسكراته و قعمزت ع السرير وبدت تبكي" نكرهكم كلكم
""""""""""""""""""
""""""""""""""
جواد " مقعمز في مكانه المعتاد وشاد صورة ميار ويسمع في انشودة {رحل من يسليني} ويبكي >_<
[ رحل من هو يسليني ... وصار اليوم في قبره ... رحل عني وفارقني ... حزينٍ صرت في حسرة... ذكرته يوم يحاكيني... وها البسمة من تغره ... ذكرته يوم يواسيني... اذا ما هلت العبرة...ذكرته يوم يشكيني ... عن هموم ملت صدره... ذكرته وهلت دموعي ... وصار الفكر في اسره ... حبيبك راح يا قلبي ... ولا حتى تشم عطره ... وظلك مات يا ظلي ... سكن واياه في قبره. .. هلا وينك تسولف لي تحت عنوان ها القمرة ... وتنشدني عن اخباري ... ترى عقبك غدت مره ... ألا يا راحلٍ عني ترى قلبي فقد صبره ... ولكن الامل عندي ... لقاك في جنة نظره ... ألا يا روحي يا غالي فقدك الكون من كبره ... عساه بخلد يا ربي... ويشرب عذب من نهره ... ]
جواد" دمعوا عيونه وضم صورة ميار لصدره " فقدتك .فقدتــــــــــــــــــــك يا قلبي اااخ كيف نعيش بلاك حياتي بدونك ولا شيء كيف ننســـــــــــــــــاك كـــــــــــــــيـــــف مشتـــــــــــــــاقلك مشتــــــــــــــاق نشوف ابتسامتك مشتاق نسمع صوتك مشتاق نظرة من عيونك مشتاق نشم عطرك مشتاق نكحل عيوني بشوفتك "شاف لصورة ومسح عليها" ميار حبيبتي امتى نشوفك امتى ربي يرفع روحي ونلاقيك حتى لو ما لاقيتك المهم نتخلص من تعبي وهمي كرهت حياتي ؛ حياتي بدونك مالها طعم "تنهد بضيق"
: الله يزيل عنك كل هم
جواد" دس صورة ميار ومسح دموعه ولف "
محمود" قعمز جنبه وشاف له وانصدم: اهئئئ كنت تبكي
جواد" لف القدام وتنهد"
محمود" حط ايده ع كتفه: جواد قلي خيرك ؟... جواد..." تنهد بضيق" ما تقدرش تنساها
جواد" بضيق" مستحيل ننساها
محمود: عارف بس "سكت ما عرفش شن يقول"
جواد "تنهد بضيق" تعرف اليوم كنت ماشي وكبت في واحد من الوفد يلي جاء وانكسر نقاله وعطيته نقالي يكلم بيه سمعته يكلم في وحدة وسألها عن بنت اسمها ميار تعرف قلبي بدا يدق بقوة وكل خلايا جسمي وقفت حسيت بشعور غريب هيْ اول مرة نسمع اسم ميار لشخص ثاني ما قدرت نتحمل ما نقدر ننساها ما نقدر
محمود" تنهد بضيق" اه الله يصبرك الحق ميار بنت مش بالسهل تنتسئ الحق كانت الله يرحمها طيبة وبشوشة كانت تعطينا امل وطاقة غريبة نعترف اني ما شفت بنت بشجاعتها وقوتها واخلاقها بنت مستحيل تتعوض الله يرحمها
جواد" بحزن: الله يرحمها اخ انا يلي مأثر فيا انها مشت بدون ما تودعني؛ بدون انا ما ودعها حرام يعني لو بس شفت اخر نظرة عليها حتى وهي ميتة حرام لو ودعتها براحتي وقلت لها كل يلي في قلبي اخ بس " تنهد بقـــــــــــــــــــوة" بس الله غالب
محمود: الله يرحمها
جواد" وقف: امين ويلحقني بيها عن قريب "مشي"
محمود" انصدم ووقف" جواد .جـــــــــــــواد " مشي لحقها "
"""""""""""""""""""""""""""""
انتهى البــــارت الاحــــد عــشــر طــويــل هلبـــة ولــــه؟
اندمجـــت ونــسـيــت نــوقــف
شن رايكم في الاحداث ؟؟؟ عجبتكم او لا؟؟؟ اعترفــوا😒
اليوم تبرعت بارتات هلبا يلا عاد نبي الدعم😠
اهم شي رايكم ف الصور😌