البارت الثالث
وراء كـل شـخـص عـصـبـي قـلـب حنـــون💚
فتحت عيونها بتعب وفيه اصوات ما خلتهاش ترقد وحست بانه صبح ناضت وعدلت سريرها وشافت لساعة لقتها 7:33
سمعت صوت سجى وباين انها ادور ع شيء طلعت من الدار واذكرت رمزي ورجعت بسرعة وخدت وشاحها وطلعت ومشت للكوجينه
سجى "واقفة بعصبية " انا من الصبح ندور فيه وهوا عندك
سناء" مقعمزة تفطر ,بملل" باه بشوى "مدتلها نقالها " هاك
سجى" خداته وشافت لرصيد وشهقت وشافت لسناء بعصبية" هي وين الرصيد انا امس عبيته
سناء" وقفت" كنت نكلم ف صاحبتي
سجى: كل هذا كلام مع صاحبتك
سناء: أي
سجى" شافت لساعة وشهقت " ايييه وقت "لفت ولقت ميار واقفة"
ميار" كعادتها ما تتكلمش الا لما تحس انهم انتبهولها بابتسامة" صباح الخير
سجى: صباح النور كيف حالك اليوم؟
ميار: بخير , لفت لسناء" صباح الخير
سناء بتطنيشة: انا بنمشى وقت عليا ."مشت وطلعت
سجى: ما ادوريهاش اليوم لا اديري شيء خليك مرتاحة امي قالت اشوي وترقى واطيب الغداء ما اديري شيء اوكي
"شافت لساعة وشهقت " ايييييه وقت عليا بنمشي سلام"مشت وبصوت عالي :ما اديري شـــ
" حست انها كبت ف شى شدت جبهتها بالم: اخخخخ
ميار"ما قدرتش تشد ضحكتها " هههه
سجى" رفعت عيونها ع رمزي يلي واقف ويضحك"
رمزي:هههه وين عيونك باهي يلي خشيتي فيا مش ف الحيط
سجى" كشمت " حسيت ما فيش فرق بينك وبين الحيط هههههه
رمزي:له له شن قصدك انا زي الحيط
سجى: ههه احرف وستر ربي ما اندمغت
رمزي : ههه صباح الخير
سجى: صباح النور
رمزي" لف لميار "
ميار" نزلت عيونها بخجل " صباح الخير
رمزي" ماعبرهاش ولف لسجى " علاش هالقبيضة ع الصبح
سجى" عيونها ع ميار يلي مضايقة من تطنيشت رمزي " اه ,لفت بسرعة "
حول حول من قدامي
رمزي: شن فيه
سجى: تاخرت هلبه وقت عليا
رمزي: هيا نوصلك
سجى: اوكي "لفت لميار" ما تساويش شيء خليك مرتاحة هيا "طلعت"
رمزي" خلا سجى تطلع ولف لميار" اسمعي زيما قالتلك ماتساوي شيء وخصوصا الغداء
,طلع
ميار" حست بالضيق من كلامه : اه
.
.
.
سجى" وصلوا للمستشفى " صحيت
رمزي: الله يسلمك
سجى: رمزي ما اضايقش ميار
رمزي: لما تروحي كلميني
سجى: لا تو نروح مع صاحباتي رد بالك اضايقها باه
"فتحت الباب ونزلت مشت بسرعة ولحسن حطها لقتهم ف الممر: صباح الخير
مريم: صباح النور متاخرة اليوم؟
سجى : أي شن وين الدكاترة
مريم : المشرف كان هنا وقال مجموعة الدكتور محمد يرقوا لدور الرابع
ومجموعة الدكتور فادي المكروه يرقوا لدور الثالث
سجى:ههه اوكي نتلاقوا بعدين نخليك مع الدكتور فادو ههه
مريم: اف يارب استر سلام
سجى" بضحكة" سلام , لفت لطالبة يلي ف مجموعتها :صفاء الدكتور امتي بيجي
صفاء: قال بيعطل بس لازم نقعدوا ف الدور الرابع لين يجي هيا نرقوا
سجى" ابتسمت " انا بنمشي شوي ونجي
صفاء : وين؟
سجى: اشوي هنا عندي قريبتي مريضة لما يجي الدكتور رني عليا اوكي
صفاء: اوكي
سجى" مشت وهي مبتسمة ما عندهاش أي حد ف المستشفى بس تبي ادير استطلاع طلعت من شنطتها البالطوا (لبس الممرضات ) باش تقدر ادور ف كل مكان ع راحتها ومشت تستكشف
ميار" ف الكوجينه مقعمزة تفطر حست بحد خش لفت لقاته رمزي
رمزي" ماعبرها ش وفتح الثلاجة وطلع حليب وثمر مشى خدا صفرة وحط فيها رجع فتح الثلاجة وخدا منها الطن والزيتون وحطهم ف الصفرة خدا خبزة طاسة للحليب وطاسة شاهي وقرب من الطاولة
ميار" كانت تراقب ف تحركاته لما قرب منها حست بتوتر ووقفت ع طول لما شافت ايده ممدودة لناحيتها
رمزي" رفع حاجبه وقرب ونهض براد الشاهي وشافلها وهوا كاتم ضحكته ولف وطلع
ميار" تنهدت و قعمزت وضربت جبهتها "
غبيه اف هوا المجنون مش حتى يقول نبي الشاهي خاش ويحساب الحوش حوشه
" كملت فطورها وقفت وغسلت الطيس وطلعت خطمت ت ع الصالة ووقفت شافت رمزي مقعمز ويفطر: والله ياخد راحته هنا مكان ياكل فيه هوا
رمزي" لفلها واستغرب وقفتها ؟؟؟!!!
ميار" انتبهت وخدودها بدو حمر نزلت راسها وطلعت
رمزي" ابتسم وكمل فطوره
ميار" خشت لدارها وقعمزت وحطت ايديها ع خدودها حستهم نار" اه شن صابني ؟!
.
.
.
سجى" كانت ادور ف كل المستشفى ما خلتش مكان وما شافاتاش كانت تستكشف ف كل شيء
حست انها تعبت قررت ترجع لمجموعتها لفت بترقى لدور الرابع و قررت ترقى بالدروج
مع انه متعب بس هي ما تحبش الاصنصيل وهي كانت ف الدور الثاني بس تبي تغير جو مشت لناحيت الدروج سمعت صوت
ولد صغير يبكي مشت وتحس ان الصوت يعلى قربت اكثر فتحت باب الغرفة يلي جاي منها الصوت وقفت مصدومة وهي تشوف ف الاصفال الصغار ف الحضانات كانو تقريبا 8 اطفال ردت الباب وقربت وابتسمت كانوا صغار لدرجة
قعدت تشوفلهم حست ان فيه صوت جاي لناحيت الدار ارتبكت وما عرفتش وين تمشى شافت لسرير وبجنبه ستار مشت وكمنت وراه سمعت صوت الباب انفتح غمضت عيونها تدعي ما حد يشوفها بعد اشوي حست ان الباب اسكر شافت وتنهدت وحمدت ربها ما حد شافها طلعت ولفت ع الاطفال
وابتسمت : يوم ثاني نجيكم
,طيرت بوسة ف الهواء ليهم وفتحت الباب بشوي وطلعت بهدوء وشافت ما حد ف الممر تنهدت وطلعت ولفت نظرة اخيرة للطفال حاسة انها ما تبيش تبعد نظرها عنهم سمعت صوت طفل يبكي كانت تبي تولي بس ماعندهاش وقت وردت الباب ولفت وصدمت ف حد رفعت عيونها وهي ترجف
وفزت وبعدت وهي تشوف ف واحد طويل وضعيف ولابس نظرات عنده لحيه خفيفة عيونه عسليه شعره طويل اشوي وناعم عمره تقريبا 28 او 29 لابس لبس دكاترة حست بخوف لفت ومشت وقفها صوته لما قال : هي انت وين ماشية
سجى" لفتله وهي مرتبكة: أ أ أنا
الدكتور: أي شن فيه غيرك ف الممر
سجى" بلعت ريقها من الخوف" ن نعم
الدكتور: وين ماشية؟
سجى" ارتبكت وما عرفتش شن تقول"
الدكتور: ما تسمعيش ف صوت العيل يبكي شوفيه خيره
سجى" مش مستوعبه " ك كيف؟
الدكتور" بعصبية" بري سكتيه مش هذه خدمتك بعدين انت لازم ما تطلعيش وقت دوامك هدم صغار ما تخليهمش ولا لحظه هيا بسرعة
سجى" واقفه وجامدة ما تدريش شن ادير ووين تمشى"
الدكتور" بعصبية" هي انت بسرعة ولي لمكانك
سجى: بس بس أ أنا
الدكتور" قاطعها بعصبية " قلت لمكانك
سجى" نزلت عيونها بخوف ومشت و تحس انه نظراته ما بعدتش عنها خشت للغرفة وسكرت الباب وقعمزت حاسه انها ما تقدرش توقف من الخوف لفت ع الاطفال لقتهم ساكتين تنهدت :
اه شن اندير اف يا ربي شن الحل؟؟؟ وقفت وفتحت الباب بهدوء وشافت لقاته مقعمز ف نهاية الممر ويتكلم بالنقال تأففت وسكرت الباب :افففف ,شن هالحالة شكلي بننحبس اليوم هنا مع ها الصغار
"ابتسمتلهم" والله احلى حبسة مع ها الكتاكيت الصغار
...
.....
ميار"ملت و هي محبوسة ف دارها وقفت وطلعت خطمت ع الصالة لقاته متكي ويحضر مشت وخشت للكوجينه شربت اميه واذكرت كلام رمزي : علاش كذب وقال اني مريضة من صغري
"حست انها معصبة تنهدت بغضب وشوي وابتسمت ع الفكرة يلي جتها طلعت من الكوجينه وخطمت ع الصالة ووقفت
رمزي" لفلها وما عبرهاش ولف لتلفزيون حس انها مشت اندمج مع المسلسل ولف للباب وهو يشوف فيها خاشه وناهضه منظف القزاز
ميار" مطنشة وجوده خدت المنظف وبدت تمسح ف الطاوله وتحاول انها تزعجه وما تخليش يحضر
رمزي "عصب منها كلما يحاول يبعد هي تجي عمدا قدامه " هي انت نبي نحضر
ميار" ما عبراتاش وكملت تنظيف لفت ومشت لروشن وبدت تنظف"
رمزي "طنشها ولف يحضر"
ميار" مشت لتلفزيون وبدت تنظف"
رمزي" عصب منها ما يشوف ف شيء ,بصوت هادي" تره ابعدي
, حس انها ما سمعتش بصوت اعلى ,: حولي بنحضر .
حس انها مطنشاته , بعصبية " قـلـت حـولــي
ميار" تمت من التنظيف لفت وطلعت بدون ما تشوفله "
رمزي" تنهد بقوة ....اشوي وشافها خاشه وناهضة المكنسة الكهربائية علقتها ف الضي و ولعتها وبدت تنظف حس ان صوت المكنسة يزن ف راسه , بصوت عالي: طفيها ... هي ... انت طفيها
ميار" تسمع فيه بس مطنشة تبي تخليه يعصب زي ما كذب عليها وعصبها
رمزي "حس ان اعصابه انفرطت وقف ومشالها وسلت المكنسة من الضي ولفلها بعصبية" انت ما تسمعيش
ميار" طنشاته وولعت المكنسة"
رمزي" طفاها بعصبية"
ميار "لفتله بملل ومدت ايدها بتولعها
رمزي" عصب وشد ايدها بقوة خلاها تتألم
ميار: ااااه
رمزي" بعصبية" تي ما تفهميش والا تبي ترقيلي اعصابي
ميار" تتألم" اخ اطلق ايدي
رمزي" طلق ايدها : انا لما نقول كلمة ما نعاودهااااش هذه خليها ف بالك
ميار" شادة ايدها من الالم, بعصبية"
انا نبي نضم دور مكان تفوت وقتك فيه بعدين والله ياخد حريتك ع الاخير تأكل وتشرب وين يحلالك وتبيني نبعد انا انضم مش نلعب
"لفت عنه ورفعت خيط المكنسة" معليش اقلب وجهك عني "ولعتها"
رمزي" فرطت اعصابه معش يقدر يتحمل كلامها الاستفزازي اكثر سلت الخيط بقوة وضرب المكنسة برجله
ميار "فزت من الخوف وهي تشوف كيف بدا وجهه كله عروق من الغضب ويقرب منها حست انها جــــامدة ما تقدرش تتحرك من الخوف"
رمزي "قرب منها بصوت عالي: انـا نـقـلـب وجـهـي اه انــا
ميار" حاولت ما تبين خوفها" أي انت
رمزي "تنهد بغضب معش يقدر يمسك اعصابه قرب منها وهي تبعد لين وصلت للحيط ومعش عرفت وين تهرب بحركة سريعة شد اكتافها بقوة خلاها تعيط من الوجع
لزقها (لسقها؛لصقها) ا
مم ايهم الاصح لأني لما نكتب نكتشف ان فيه كلمات مش معروفة باي حرف😅 هههههه؟؟؟ المهم
لصقها ف الحيط وكان معصب لدرجة
بعصبية وبصوت عالي: انا تقوليلي هالكلام ما تعرفيش من انا اه
ميار" تتالم من شدت ايديه يلي حاستهم بينغرسوا ف اكتافها بس تحاول تتحمل" : اه أي ما نعرفش من انت
رمزي" بقمت العصبية" انا رمزي وكان ما تعرفينيش تو مع الايام تعرفي وكان هذا اسلوبك انا نعرف كيف نعلمك الاحترام
ميار: انا ما نعرفكش وما نبي نعرف
ناسي اني فاقدة الذاكرة
"بهزوة" وعلى قولتك من صغري, يعني لو مرة ثانية تبي تكذب الاحسن تكذب ع غيري صح فاقدة الذاكرة بس نعرف تصرفات الناس وما يمشي عليا كلام الكذابين يلي زيك
رمزي" هنا وخلااااااص حاس عروقه بيتفجروا حذفها بقوة ع الجلسة"
ميار" صرخت من الالم" اااه
رمزي" قرب منها" والله العظيم لما نوريك ع هالكلام انا تقوليلي كذاب سكتلك هلبه
ميار" لما شافت ايده ممدودة لناحيتها غمضت عيونها و صرخت بقوة" ااااااااااه لااااااااا
رمزي"وقف جامد ومستغرب من صراخها الغريب كل هذا خوف"
ميار" فتحت عيونها ولقت ايده قعدة ممدودة وقفت بخوف وهي تشوف اليده"
رمزي" تنهد بقوة يحاول يهدي روحه "
اه اقسم بالله لو "قطع كلامه صرخه قوية منها انصدم وهو يشوفها مقعمزة ع الوطا وضامه رجليها ومنزلة راسها وتبكي "باستغراب"
خيرك؟!
ميار" بصوت يكاد ينسمع من البحة" : ما تضربنيش والله والله ما قصدت نضربك
رمزي" باستغراب من كلامها " كيف ؟
ميار" ببكاء طفولي" مش قصدي والله حذفتها جت عليك والله ما قصدي نجرحك
رمزي" فهم وشاف لأيده المجرحة وكان دم ع الشاش المربوط ع ايده شافلها كان منظرها طفلة تبكي خايفة تنضرب بصوت هادي: خلاص نوضي مش ضاربك
ميار" وهي ع نفس تقعميزتها" لا انت تكذب عليا وبتضربني
رمزي" ابتسم ع كلامها نزل لمستوالها ,بنبرة هدوء: لا مش ضاربك خلاص اهدي
ميار" رفعت عيونها وهي تشهق من كثرة البكا : ماتضربنيش
رمزي" ابتسم ونسى غضبه من منظرها" مش ضاربك
ميار" بدموع" قول والله
رمزي" شد ضحكته" والله ما ضاربك بس انت عصبتيني
ميار"بنبرة طفوليه" اسفة
رمزي"من دون شعور مد ايده ومسح دموعها"
ميار" غمضت عيونها حاسة بربكة من قربه"
رمزي" بعد ايده وهو مبتسم"
ميار" فتحت عيونها بخجل"
رمزي" ابتسم ووقف: يلا اقفي
ميار" وقفت ومسحت دموعها وشافت لأيده المجروحة وغمضت عيونها بقوة"
رمزي" استغرب من تصرفاتها :خيرك قلتلك مش ضاربك
ميار" بصوت مخنوق" دم ايدك
رمزي" ابتسم" ما فيها شيء افتحي عيونك
ميار "بصوت عالي": لااااااا
رمزي "باستغراب" خيرك؟
ميار: دم لا ما نقدرش
رمزي" حط ايده وراه" افتحي عيونك درقت ايدي
ميار" فتحت عيونها ببطئ وشافتله"
رمزي" ابتسم" خلاص اهدي ما صار شيء وبري ارتاحي تو يجو يكملوا التنظيف
ميار" لفت بهدوء ومشت"
رمزي" ابتسم : والله تصرفاتها طفوليه تخاف من الدم هههه وخافت نضربها وين كانت قوتها لما كنت كانت تكلم فيا ههه
"قعمز" ههه شن صابني مش تو كنت معصب ههه اول مرة تصير معايا قبل كان عصبت ما حد يهديني ههه بس تصرفاتها تخليني غصب نضحك هههههه
.
.
.
.
سجى" ادور ف الغرفة ومتوترة اوووف ليا قريب نص ساعة وانا مع ها الصغار اف شن ها الحالة يارب مشى " فتحت الباب وشافت وهي خايفة وابتسمت لأنها مالقتش حد وفزت لما رن نقالها سكرت الباب وردت بصوت منخفظ :
الو صفاء ... أي... كيف؟ جاء باهي تواني ونجي سلام, سكرت وفتحت الباب ومشت بسرعة تبي توصل قبل ما يسمي الدكتور الاسماء
.
.
وخشت للاصنصيل ما عندهاش وقت ورصت لدور الرابع حست ان الباب انفتح من جديد حست بخوف لفت ع جيها حست ان فيه حد خش ويتكلم بالنقال رفعت عيونها عليه وقريب اطيح من الصدمة كان نفس الدكتور يلي شافها
لما حست انه سكر نقاله وبيلتفلها خدت وشاحها وتلتمت بيه( ساواته خمار) ونزلت عيونها
الدكتور" لفلها ولف لجيها ثانية وما عبرهاش وبدا المصعد يرقى
سجى" تنهدت بشوية باش مايحسش وحاولت ما ترتبكش قدامه..اول وصلوا لدور الرابع )
حست بفرح ماصدقت انفتح الباب مشت بسرعة بتطلع بس فجاة عترت ف عتبت الاصنصيل وحست انها بطيح غمضت عيونها
الدكتور" انتبهلها وشدها قبل ما اطيح "
سجى" حست بايديه محاوطتها فتحت عيونها وحاسة ان جسمها يفور من الحرارة ولما توازنت ووقفت بعد عنها لفتله وخدودها حمر
الدكتور: الحمد لله ما صرلك شيء
سجى" انتبهت ان اللتام طاح وبانت ملامح وجها بسرعة لفت لباب الاصنصيل يلي بدا يسكر"
الدكتور" لما حس انها بتطلع بسرعة قال: لا
,بس طلعت قبل ما يكمل كلامه وقف مستغرب من تصرفاتها بس تذكر انه شايفها :
أي هذه الممرضة يلي كلمتها شن هاربة من عملها وادور والله مستشفى بلا قوانين ولا انضباطات
, انتبه للمصعد يلي يتحرك نازل لتحت بسرعة رص ع الدور الثالث وانفح الباب ونزل
سجى" كانت تمشى وتتلفت خلفها خايفة يكون الدكتور لحقها وصلت للغرفة يلي مجتمعين فيها مجموعتها وخشت بهدوء ما تبيش الدكتور ينتبهلها ووقفت جنب صفاء
صفاء" بهمس" وين تأخرتي
سجى" بهمس" قولي سمى اسمي؟
صفاء: أي قال اسمك مرتين
سجى: اف شن اندير!
صفاء: بريله وقوليله انك قلتي نعم وما سمعكش
سجى: والله فكرة بما انه ما يسمعش نقله...بعد ما تم الدكتور الاسماء مشتله وسجلها حضور بما انه عارف روحه ما يسمعش
>>>حبايبي نصيحة مني استخدموها مع الدكاترة يلي ما يسمعوش يعني الطرش هههه <<<
بعدها خداهم الدكتور جوله ف المستشفي وعرفهم ع الادوات والاجهزة
.
.
.
رمزي" حاس بتوتر ويفكر ب ميار وحالتها الغريبة خايف يكون صايرلها شيء وقف ومشى ووقف قدام دارها وتردد يطق عليها تنهد بقوة ومد ايده وانفتح الباب وفز
ميار" رفعت عيونها عليه كانت بلا وشاح وشعرها نصه مشدود لقت ايده ممدودة تراجعت بخوف "
رمزي" نزل ايده : لا تخافي بس كنت ...كنت ( سكت ما عرفش شن يقول)
ميار" قعدت تشوفله ومدققة ف ملامحه"
رمزي" حس بربكة من نظراتها " احم هي يا انت
ميار" تشوفله وسرحانة
رمزي" حس بتوتر ,بصوت عالي : هي شن تشوفلي
ميار"حست ع روحها"
رمزي"يدعي العصبية" شن فيا شيء زايد او شيء ناقص وما ندريش قولي
ميار" عصبت" أي فيك شيء
رمزي" باستغراب" شن؟
ميار" بعصبية " ما عندك عقل بلا تفكير
رمزي" نفس الاستغراب" كيف؟؟
ميار: خاش لداري وخلعتني وتقول شن فيه
رمزي" حس ان سؤاله غبي"
ميار: بعدين من يلي يشوف لثاني ملاحظ يامحترم انك واقف ساعة تشوفلي وانا بلا حجاب
رمزي" حس بالأحراج من كلامها
ميار" كتفت ايديها" تره اطلع
رمزي" عصب من كلامها وهوا يلي كان مشغول عليها حاول يكتم عصبيته ولف بيمشي" انا بس كنت جاي نطمن عليك والحق عليا يلي زيك المفروض ما نسألش عليها .مشى وسكر الباب وراه وطلع وركب سيارته ومشى
ميار" الاول مرة حاسة انها غلطت معاه خدت وشاحها وطلعت ادور عليها ما تعرش شن تقله بس تبي تشوفه وتكلمه مرات تعتذر المهم تشوفه حست بضيق لما ما لقاتاش : افــــــف
؛؛؛؛؛؛؛؛؛؛؛؛؛؛
سجى "بعد ما تم دوامهم ف لمستشفى حست بتعب قعمزت ف ممر المستشفى واتصلت برمزي :
الو رمزي انت ف الحوش .. اه اوكي مدامك قريب نبي نروح ... لا تعبانة ...
اوكي نستنى فيك سلام"سكرت ولفت لقت مريم تمشي ف الممر وشادة نقالها ,بصوت عالي: مريم
مريم" ابتسمت ومشتلها وقعمزت بحداها " اوووخ
سجى" بابتسامة" شن صار مع الدكتور فادي
مريم: ههه الحمد لله الحمد لله ما جاش وشكله بيقعد فترة مش جاي
سجى : مالا من يلي جاكم؟
مريم: الدكتور المشرف ويارب ما نشوفوش خلقت الدكتور فادي
سجى: هههه والله اليوم بالذات حمدت ربي ما جيت ف مجموعة الدكتور فادي الشبح ع قولتك
مريم: علاش شن صار اليوم
سجى" شافت لنقالها يلي يرن: تو غدوة نقلك انا بنروح رمزي جاني "وقفت" يلا سلام
مريم:سلام
سجى" لفت بتمشي بس جمدت ف مكانها وهي تشوف نفس
الدكتور مقعمز قريب منهم ويشوفلها بغضب حست برعشة ف كل جسمها يعني سمع كل كلامهم
مريم" باستغراب" خيرك واقفة؟
سجى" لفتلها " ولا شيء بسلامة "لفت وشافتله لقاته نفس النضرات كلها غضب نزلت عيونها ومشت طلعت وشافت لسيارة رمزي ومشت ركبت وتنهدت بقوة" اوووه
رمزي" باستغراب" خيرك ؟
سجى: اه لا بس الحمد لله يلي طلعت من هالمستشفى
رمزي: علاش؟
سجى: هكا تعبت هلبه.....
وصلوا للحوش وخشوا
سجى "بصوت عالي" ميار... ميار
رمزي" كان يلف بعيونه ف جميع الجهات يبي يشوفها"
سجى : اكيد ف الكوجينه ,مشوا للكوجينه ولقوا ميار والام "السلام
الاتنين : وعليكم السلام
رمزي" ع طول وجه نظره لميار وهي نبعدت عيونه عنه"
الام: قعمزوا تغدوا وانا تو انادي سناء وسحر "طلعت الام"
ميار" واقفة وتحط ف الصواني "
سجى: اخ والله جيعانه
رمزي" خدا الكرسي وقعمز" بنبرة برود: من طيبه؟
ميار"رفعت عيونها عليه "
رمزي" شافلها بنفس النبرة" من يلي طيبه؟
ميار" بنبرة قاسية " طمن روحك مش انا امي طيباته ونزيد نطمنك انا مش ياكله معاااكم باش مـــا نســــدش نــيـــتــك "مشت بسرعة وطلعت "
رمزي " انصدم "
سجى" باستغراب" خيرها شن صابها؟؟
رمزي" ما ردش وخدا الكاشيك وبدا ياكل"
سجى: رمزي انت ضايقتها؟؟ قول شن درتلها؟؟ رمزي "حست انه ما يبيش يرد" و خشت سحر وسناء وامها
الام: وين ميار؟
سجى: قالت ما تبيش تأكل معانا
الام: تو نرفعلها غداها
سجى: انا نبدل ونجي " طلعت"
سناء: يما بينها تو تجي بعدين وتاكل لاش ادلعي فيها
الام: لا انا عارفتها ما تأكلش كان فات وقت الغداء
رمزي" حس بانه مضـــــايـق ما يبيش يزعلها ماكانش قاصد"
سجى" طقت الباب ع ميار و خشت لقتها مقعمزة وشادة كتاب وتقرى مشتلها" ميورة هيا تعالي تغدي
ميار" ما رفعت عيونها " ما نبيش
سجى: ميار حد مزعلك؟
ميار: لا
سجى:رمزي قالك شيء؟
ميار" اضايقت" لا
سجى: شن تقري؟
ميار" رفعت عيونها " كتاب طب لقيته ف دولابي
سجى" لفت بتطلع ووقفت لما سمعتها"
ميار: من وين جاء هالكتاب؟ انا نعرف نقراه و لما نقراه نحس اني قارياته من قبل لمن هالكتاب؟
سجى" لفتلها بربكة كانت واضحة لميار" اه هذا هذا ليا
ميار" باستغراب" ليك وكيف نعرف نقراه؟
سجى: لأنك كنت تحبي تقريه تو امي تجيبلك الغداء لدارك " لفت وطلعت وما خلتش المجال لميار تتكلم, وتنهدت بقوة" اه
ميار" ما فات عليها تفويتت سجى للموضوع شافت للكتاب : علاش
كنت نقرا فيه ؟ غريب علاش هالاكتاب بالذات كلما نفتحه نحس بشعور غريب " قطع تفكيرها امها خشت وناهضة الصفرة فيها غداها
.
.
.
في العشية الكل كانوا مقعمزين ف الصالة ما عادة الام ويحضروا
رمزي" خش" السلام
الكل: وعليك السلام
رمزي" قعمز جنب سجى" وين عمتي؟
سجى: ف المحل
رمزي" لف لميار يلي جنب سجى, وهي كانت تشوفله بعدت عيونها طول لف لسناء" سناء شن اخبار قرايتك؟
سناء: تمام التمام
رمزي: اذا احتجتي شيء انا نساعدك؟
سناء: اكيد لما نحتاجك نقلك (وقفت وطلعت)
سجى: وانا ما تساعدنيش
رمزي" بضحكة" لا لا مانبيش
سجى" بزعل" ما نبيش مساعدتك
رمزي: يوه زعلتي لا نبصر بااه يلي تبيه انا جاهز بعدين انا عارف انك انت يلي بتساعديني مش انا
سجى: طبعا انا ادكى منك
رمزي: هههه البنت واتقة
سجى: اكـــيد
رمزي" لف لسحر يلي مقعمزة وشادة نقالها" وانت سحر شن اخبارك
سحر" وهي تشوف لنقالها" تمام
رمزي: واخبار خطيبك؟
سحر: بخير
رمزي: تواضعي وشوفيلنا والا مش ممليين عينك
سجى: اكيد مش املي عينها
رمزي: اه حبيب القلب ع الخط
سحر" حست بالأحراج وخدت مسند وحذفاته عليها
رمزي" تفاداه وهوا يضحك" هههه بشوي
سحر" خدودها حمر وقفت" سخيف "وطلعت"
سجى: ههه البنت
رمزي: هههه هههه
ميار" تشوفله ومصدومه اول مرة تشوف ضحكته ومزحه كانه شخص ثاني ابتسمـــت
رمزي" شافلها لقاها تشوفله ومبتسمة "
ميار" حست ع روحها بعدت عيونها طول
رمزي" تجاهلها وخدا الجهاز وبدا يغير وحط ع الاخبار"
سجى: صح شن زعمه صار ف المدينة الغربية قعدة محتلة
رمزي" بضيق" أي
ميار" حاسة قلبها يدق بقوووووووة"
سجى: ربي يعينهم ,,,
جابوا ف الاخبار تقرير على المدينة الغربيه مباني مدمرات وحياش شبه مختفية من الدمار الناس ف المخيمات
اطفال متشردون
ميار" حست برعشة ف كل جسمها ضمت ايديها لصدرها تحاول تهدي نفسها....
جابوا مراسل داخل المستشفى ووروا الجرحه والموتى ميار ماقدرتش تتحمل المنظر غطت وجها بايديها صرخت باعلى صوت:لاااااااا " الكل لفولها بخوف"
سجى" بخوف" ميار بسم الله شن صارلك
ميار" ترجف من الخوف " لا لا لا لا
سجى: ميار شن صارلك شن يلي لا
ميار" فتحت عيونها ببطئ وشافت لتلفزيون وصرخت مرة ثانية وغطت وجها وبدت تبكي" اااااه
سجى" باستغراب" ميار شن صار خيرك
ميار" بصوت مخنوق" دم ماتوا مــــاتـــوا " قربت من سجي وضمتها بقوة وبدت تبكي
سجى" حطت ايدها ع راسها" بسم الله
رمزي" كان يشوفلها وهوا مصدوم ومستغرب من تصرفاتها
ميار" حست انها هدت بعد عن سجى لفت لتلفزيون لقت الاخبار تمت
سجى: ميار خيرك؟
ميار" لفت لسجى وشافت لرمزي
رمزي" يشوفلها باستغراب"
سجى: ميار
ميار" وقفت وطلعت"
سجى:؟؟؟؟ شن زعمة صارلها
رمزي" بهدوء" الاخبار؟
سجى" باستغراب" كيف؟
رمزي: لما شافت الاخبار والدم تغيرت حالتها
سجى: شن يعني
رمزي" وقف" هي تخاف من الدم
سجى: وشن عرفك
رمزي" طلع بدون ما يجاوب"
سجى: والله غريـــب؟؟ّ!!!
؛؛؛؛؛؛؛؛؛؛؛؛؛؛؛؛؛؛؛؛؛
؛؛؛؛؛؛؛؛؛؛؛؛؛؛؛؛؛؛
رمزي" فز من النوم وهوا يسمع ف صوت ميار وهي تبكي بقوة طلع من داره بسرعة مشى لدار ميار وحس ان مامعاها حد مشى لدار سجى وسحر وطق الباب
سجى" فتحت الباب عيونها نصهم مغمضات" شن في
رمزي" بخوف" تبكي صوتها تبكي
سجى: قصدك ميار
رمزي: أي ما سمعتيش صوتها
سجى: سمعت بس شن بنديرلها هي ديما تبكي
رمزي: بري شوفيها
سجى" تنهدت بتعب ومشتلها ورمزي مشى وراها ووقف ع الباب
سجى" قربت من ميار وقعمزت ع السرير" ميار
ميار" تبكي " دم دمـــــم
ناس
اصغار
جرحه
موته
اشلاء
سجى" بتعب" ميار خلاص هذه احلام مش حق
ميار" بصراخ" بس والله والله شفتهم والله ماتوا انا نهضتهم
سجى: ميار بسم الله خلاص اهدي "بدت تقرا عليها "
رمزي" واقف وحاير من تصرفات ميار بعد ما رقدت وطلعت سجى وولت لدارها رجع لداره واتكى ع السرير : اه شن هالاحلام يلي تحلم بيها والله غريبه هالبنت؟؟؟؟
::::::::::::::::::::::::::::::::::::::::::::::::
اكبر سعادة حين يسأل عنك شخص وتحس انه فعلا مهتم بك
اليوم التالي
سجى" وصلت للمستشفى وخشت ومشت للمصعد وانفتح لقت قدامها الدكتور نفسه يلي هذاك اليوم كان يشوفلها بغضب وفات حست برعشه وخوف من نظراته مشت للمصعد
ميار" طلعت من دارها ومشت لناحية الكوجينه وقفت قدام دار رمزي فجاة انفتح الباب وطلع وانصدم انها قدامه ,
ارتبكت: صباح الخير
رمزي" ما عبرهاش ولف ومشى
ميار" حست بالغضب من تصرفه ومشت للكوجينه لقاته مقعمز يفطر ما عبراتاش وساوت فطورها وحطاته ف صفرة ولفت بتطلع وقفت لما سمعاته
رمزي: وين ماشيه ؟
ميار" لفتله ورفعت حاجبها باستغراب" علاش تسال
رمزي" وهوا يشوف لطاست الحليب يلي ف ايده" قعمزي افطري هنا
ميار" بتعجب" وعلاش؟؟
رمزي" بعد ما شرب الحليب شافلها " هكا
ميار" واقفة ومستغربة منه"
رمزي: قعمزي
ميار" مشت وخدت كرسي وقعمزت وتشوفله وهي مستغربة "
رمزي: افطري
ميار: غريب تبيني نفطر بحداك وانت يلي ما تحبش نكون معاك ف مكان واحد
رمزي" بدون ما يشوفلها" شن الحلم يلي تحلمي بيه ؟
ميار" استغربت من سؤاله الغريب " شن؟؟
رمزي" شافلها" : شن تحلمي؟
ميار" نزلت عيونها بضيق"
دم وناس اتموت واصغار ومباني تتفجر
"رفعت عيونها وتبكي" فيه ولد صغير كان يبكي ع امه وبوه يلي ميتين بحداه وانا نبي بنعده قربت منه بس بس " بصراخ افزع رمزي" مــــات طاحت قنبله وفجرت الحوش ما ندريش شن صار بس انوض ونلقى ظلام ونطلع نحلم كل هذا حلم "بدت تبكي بقوة"
رمزي" مصـــــدوم من يلي يسمع فيه منها حلم زي هذا يفزع اشجع الرجال لبال بنت صغيرة ما قدرش يتحمل دموعها وقف" خلاص انسي هذا حلم مش حق كملي فطورك وانا بنطلع ومش جاي لين الغداء "طلع
ميار" مسحت دموعها وهي تحس براحة مع ان الخوف من الحلم معشش ف قلبها بس يمكن الراحة الان فيه حد سمعها وسالها عن سبب فزعتها ف اليل
.. بعد ما فطرت وضمت الكوجينه طلعت ومشت لدارها اف الحمد لله يلي مشى نحس فيه يكرهني وكأني عدوته مع هذا هو الوحيد يلي سألني,,
فتح الدولاب بتبدل استغربت ان ما عندهاش دبش هلبه كل يلي عندها بس اتوت و3قونات ببديات ووشاحات وعبايه بس :
غريب هذا بس دبشي تو كيف ركزت عليه بس خواتي عندهم هلبه حاجات حتى دبشهم زمان قعدين محتفضين بيه "ابتسمت بسخريه"
هاه اكيد انا حرقت كل دبشي لما فقدت الذاكرة مدامني شركت اصورايا فاكيد حتى دبشي وكل شيء زمان محيته ,,خدت دبشها ومشت تبدل ف الحمام ,,وقفت وهي تشوف للمرايه وتفكر
:انا درت حادت بس وجهي ما فيه لا جروح ولا شيء ولاجسمي شافت لايدها اليمين فيها جرح عميق مداير حفرة باين من شيء اخر مش من الحادث شن زعمة الحادث بس جاء ع راسي وفقدت الذاكرة لان باين ما فيا شيء والحادث ما ليهش هلبه
,.افكار واسئلة ادور ف راسها ما تعرفش جواب لاي سؤال بخت وجها بالميه تحاول تنسى
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
الغريب ان يتحول صديقك الي عدوك ولكن الاغرب ان تجد عدوك يقف معك ويدافع عنك ضد صديقك
بعد ايام يوم الجمعة صباحا الكل كانوا يفطروا
رمزي" خش" صباح الخير
الكل: صباح النور
الام: قعمز افطر
رمزي" خدا الكرسي وقعمز وشاف لميار يلي مقعمزة مقابلاته
ميار" نزلت عيونها بدت ما تحتكش برمزي ومعش تشوف فيه هلبه لما تنوض ما تلقاهش ووقت الغداء تتغدا ف دارها وتتجنبه ولما تكون ف مكان وهوا يخشله تطلع وهكذا
سحر: الجو حلو اليوم
سناء" بدلع" رمزي شن رايك اطلعني والله ملــيت من الحوش
رمزي" ابتسم" اوكي ونطلعكم كلكم
سناء: ياي صحيت
رمزي" بابتسامة" الله يسلمك يلا افطروا ووتوا بنطلعوا ليل ووين ما تبوا نرفعكم
سجى: أي والله محتاجين نطلعوا ونريحوا روسنا
ميار" كانت تراقب فيهم كيف علامات الفرح باينه ف وجوههم كل هذا فرح بالطلوع وهما ديما يطلعوا ؟؟؟؟!!!!
ابتسمت:واخيرا بنطلع بنشوف العالم برا بنشوف الشجر والطيور والبشر "شافت لرمزي كان يضحك ابتسمت اخيرا بيتحقق حلمي
رمزي" لفلها وشاف ابتسامتها كانت رائـــعـــة بمعنى الكلمة وكانه اول مرة يشوف ابتسامة بنت
ميار" انتبهت ع نظرات رمزي و خدودها بدوا حمر نزلت راسها
رمزي" ابتسم" هيا باش ما يفوتش علينا النهار
سحر: خلينا نكملوا فطورنا ونمشوا
سناء" وقفت " انا بنوتي روحي
رمزي: أي انت من تو وتي روحك وان شاء الله اتمي قبل الكل
سناء" بزعل" شن قصدك
رمزي: ههه قصدي بطيئة يابطة
سناء" بغضب" انا بطة
رمزي: هههه واحلى بطوطة ولا يهمك
سجى: ياريت تغضبي وما تطلعيش معانا رمزي لا تراضيها
سناء: انا ما نزعلش من رمزي
رمزي: ههه أي عارف انا شخصية من يلي يزعل مني
سجى: يالواتق انت
رمزي: احم احم يلا يلا عن نغير رايي
سناء: لاااا ما صدقنا ادير راي باش تغيره
رمزي: يلا استعجلوا واولهم انت
سناء: اوكي
الام: وميار
الكل سكتوا وكأنهم الان وقضوا بهذا الشيء وكانت صدمت ميار الاكبر شن يعني هي ما تشمل قرار رمزي يعني هي برا هالقرار يعني لما قرر يطلعهم هي مش معاهم بيخلوها هنا
قطع تفكير الكل
سناء: اكيد ميار بتقعد ف الحوش
سحر: أي احنا مش معطليين
سناء: حتى لو عطلنا هذه مش اول مرة تقعد ف الحوش مايصيرلها شيء اطمنوا
الام: ميار تقدري تقعدي
ميار" كانت ف قمة الصدمه انهار كل شيء فجاة ماعرفتش شن ترد
لااااا نبي نطلع انا اكثر وحدة فيكم محتاجة لطلوع 6 اشهور وانا محبوسة ومرات اكثر لا تحرموني من الطلوع"قطع تفكيرها
سجى: ميار ما تخافيش وله احنا مرات نقعدوا للمغرب تقدري تقعدي
ميار" لفت عيونها ع الكل امها
سجى
سحر
سناء
وبعدهم رمزي
ركزت نظراتها عليه الوحيد يلي كان ساكت تبيه يتكلم يقول يلي عنده بس اكتفي بسكوت وقفت ومشت وقفها صوت امها
الام: ميار ما تفتحيش الحوش لحد
ميار" ضحكت بسخرية وحاولت ماتبكيش قالت بصوت خافت بدون ما تلفلهم"
اطلعوا وادهوروا وغيروا جوكم كان بتباتوا عادي انا ما نخافش "جت بتطلع بس وقفها صوت رمزي
رمزي: ميار
ميار" جمدت هذه المرة الاولى يلي يقول اسمها واول مرة تسمع اسمها من ولد
كان اسمها ليه رنة غريبه يمكن من صوته الخشن يلي يختلف عن صوت خواتها وامها لفتله
رمزي" بمجرد ان جت عينها ف عينه بعد عيونه ولف لعمته" بنبرة هاديه: ميار بتطلع معانا
,كانت الصدمة واضحة ف عيون الكل ,كمل كلامه: ما حد بيقعد هنا الكل بنطلعوا
الام: بس ميار
رمزي" قاطعها" بتطلع حتى هي
سحر: رمزي انت مجنون ما تقدرش تطلع معانا
رمزي: من قال هي تقدرش
سناء: لا ما تقدرش هي ما تطلعش بعدين انت ناسي ال
رمزي" قاطعها" انا قلت بتطلع
سجى: رمزي انت لازم تفهم ميار ممنوعة من الطلوع
رمزي" بعصبيه مفاجئة : من مانعها اه من؟
الام: ياولدي الاحسن ليها تقعد ف الحوش
سناء: والاحسن لينا ما نبوا حد يعكر مزاجنا
رمزي" لف عيونه لميار يلي واقفة ع الباب ومصدومة من كلامهم " ميار
ميار" فز قلبها ولاول مرة ما تعرفش من الخوف او شيء ثاني "
رمزي: هيا وتي روحك
الام: رمزي
رمزي " قاطعها" هيا استعجلوا "ووقف"
سجى" وقفت" رمزي ميار بتقعد هنا
رمزي: لا بتطلع
سجى" بعصبية" لا بتقعد
رمزي: انا قلت كلمة وانتهى هيا استعجلوا بيفوت اليوم هكا
سجى: و ميار بتقعد ف الحوش
سناء: أي خليها هي مش ميته كان قعدت بروحها
سحر: أي كلامهم صح
الام: كان تبي انا نقعد معاها
رمزي: ما فيش داعي ميار بتطلع معانا
سجى "بعصبية" رمزي انت ما تفهمش
ميار" بصوت عالي: خلااااااص
,الكل لفولها: انا مش طالعه وما نبيش حد ابدا ابدا "طلعت بسرعة
رمزي" بعصبيه" انا قلت كلمه ما نغيرها ميار بتطلع معانا يعني بتطلع ولا مافيش حد بيطلع
الام: بس ياولدي انت عارف
رمزي: ياعمتي حرام عليكم هي بنادم وتحس لازم تطلع وتشوف العالم الخارجي عاجبكم حالها وهي محبوسة من اشهور ومانعينها تطلع وتشوف الناس
سجى : رمزي هذا لمصلحتها
رمزي: خرافات زايدة المفروض كل يوم تطلع باش نفسيتها ترتاح
سجى: بس م
رمزي" قاطعها" هيا بسرعة والا نغير رايي "طلع "
سحر: شن انديروا
الام :خلوها تطلع
.
.
.
.
رائع جدا ان ترى ابتسامة شخص وتعرف انك السبب
رمزي "اتجه لدار ميار وهوا حاس بضيق كلما يذكر ملامحها كيف كانت فرحانة وفجاة انقلب الي حزن طق الباب مرة واثنين سمع صوتها :
بروا وانا تو ندبر روحي بسرعة لاتعطلوا ع رمزي , ابتسم لأنه سمع اسمه منها طق الباب مرة اخري"
:انا رمزي
ميار" فزت من مكانها وهي كانت متكية ع السرير وقعمزت بصوت خفيف" شن؟
رمزي: نبي نكلمك
ميار "حست بالاستغراب وما جاوبتش"
رمزي: راه بنخش
ميار" بسرعة مسحت دموعها وعدلت وشاحها ومشت للباب وفتحاته وهي منزلة راسها
رمزي" ابتسم" ما وتيتيش روحك يلا انا مستعجل والا تبي تعطليني
ميار" نزلت راسها بضيق" ما نبيش
رمزي: انا قلت هيا
ميار" شافتله" وانا قلت ما نبيش
رمزي" بشويت حدة" انا يلي قلت هيا
ميار" دمعوا عيونها" بس هما
رمزي" قاطعها وهو مبتسم"
ما ادوريش انا قلت بتطلعي يعني بتطلعي ما حد بيعارض والا كلهم بيقعدوا ما حد بيطلع
ميار: يعني نطلع
رمزي" ابتسم" أي
ميار" شعورها كان لايوصف شدت ايد رمزي وهوا جمد من الصدمة :صحيت والله والله فرحتني "بعدت ايدها" رمزي صحيت
رمزي" ابتسم ولف" هيا ماتعطليش "ومشى"
ميار" حست بالسعادة ولاول مرة بسرعة مشت وفتحت دولابها وطلعت عبايتها لبستها حست انها مش ع مقاسها مااهتمتش لان نص دبشها واسع ومش ع مقاسها وغيرت وشاحها لبست وشاح وردي وطلعت لصالة لقت رمزي
رمزي "لفلها وابتسم" والله انك سريعة اسرع من الكل
ميار "حست بالخجل الانه يمدح فيها
رمزي "ابتسم ع خدودها يلي بدوا حمر " ميار
ميار" بخجل" نعم
رمزي: بتقعدي واقفة تعالي قعمزي لين يجو
ميار" مشت وقعمزت بعيد عنه"
رمزي" ابتسم ولف لتلفزيون جو الكل بعد ما وتوا كل شيء لزردة
سحر: هيا
رمزي" وقف" وين البطة
سجى: عارفها اكيد ما تطلعش لين تشيب روسنا
رمزي : هالبنت ما تتغيرش
سناء" خشت مكشمة" سمعتك سمعتك
رمزي: هههه هيا ومرة اخرى اعرفي كيف توتي روحك فيسع شوفي ميار "شافلها وابتسم" اول وحدة وتت
ميار "ابتسمت بخجل "
سناء"بعصبية" شن قصدك تقارن فيها بيا انا
ميار" انصدمت من عصبية سناء المفاجئة "
سناء : انا مانتقارنش بيها ابدا
رمزي"شاف لميار وتنهد"
هيا "ومشى والكل مشو بدون كلام وميار كانت اخر وحدة وصلت لسيارة وبدت تشوف للمنطقة يلي جنب الحوش حتى هالمنطقة ممنوعة عليها كان المكان رائع شجر وورود وجبال كانت المنطقة يلي هما فيها ف الريف فوق جبل ما كانتش اتشوف الا من الرواشن او من فم الباب كانت تلف بعيونها ع كل مكان سمعت صوت رمزي يناديها لفت لقاته قدامها
رمزي : هيا اركبي "فتحلها الباب يلي خلف السواق"
ميار" ابتسمت وركبت"
رمزي"ابتسم وركب وحرك السيارة وكان يمشي ببطئ ويشوف ف ميار من المراية وهي منبهرة ف كل المناظر وتشوف لكل شيء بفرح
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
انتهى البارت ان شاء الله يكون عجبكم بطلتي
الحبوبة ميار واخيرا طلعت من سجنها اكيد هالشيء
بيحدث تغير كبــــيـر ف حياتها تابعوا الاحداث
القادمة اكيد فيه تغيير وتطورات تابعوا شن بيصير
تعليقاتكم وتصويتكم رجااااءا والا معش بنزلها