.......................
احيانــا تجمعنـــا صدفـــة غريبـــة ولا ندري هـــل هي احلـــى صدفــة او لا ؟!
بعد ايام...صباحا .
. ميار" مقعمزة ع الجلسة وتحضر خشت امها
الام: ميار انا طالعة ما تفتحيش الباب لحد
ميار: حاضر ؛
طلعت الام وقعدت تحضر
...........................................
في الكلية ,,,سجى " ف المحاضرة وبجنبها مريم"
الدكتور: تو بنقسمكم مجموعتين ومن غدوة بتبدوا ف دروس العملي
طالب: دكتور يعني عملي هنا ف الكلية
الدكتور: لا ف المستشفى
مريم : لاااا اف بنبدوا والله نخاف
سجى " ضحكت عليها
الدكتور: تو بنبدا بالأسماء المجموعة الاولى ا
لمشرف عليها الدكتور محمد
والمجموعة الثانية المشرف عليها الدكتور فادي
مريم : يا رب الدكتور محمد يا رب
سجى" باستغراب " علاش الدكتور محمد
مريم: لأنه ساهل وما يدققش اما الدكتور فادي صعب وعصبي
سجى: من قلك عليهم
مريم: نسمع عنهم والدكتور فادي ما يطلعش من قروبه ناجحين الا خمسة اكثر شيء
الدكتور : هدوء بنسمي الاسماء
مريم" شدت ايديها وتدعي " يا رب الدكتور محمد يا رب المجموعة الاولى
سجى "ابتسمت ولفت لدكتور
الدكتور " بدا يسمي ف الاسماء بالحروب وصل ل(س)
سجى " حست بخوف "
الدكتور: سالمة ....(البنت جاوبت بنعم)_سجى سالم .(ماردت)عاود الاسم سجى سالم
مريم" ضربت سجى
سجي" انتبهت ولفت ع الدكتور" نعم
الدكتور "كمل الاسماء وصل ل(م) مريم بدت تدعي انه يقول اسمها : محي الدين..._مروة...._ محمد....( وأنتقل لحرف الهاء)
مريم" قعدت تستوعب ولفت لسجي, بخوف" ما قالش اسمي وله؟؟
سجى: أي
مريم" اتكت ع الكرسي بإحباط" ووف يعني ساقطة من تو
سجى: تفاءلي
مريم : أي تفاؤل وانا مع الدكتور فادي ووف
الدكتور" كمل المجموعات وكانت مريم مع الدكتور فادي وسجى مع د.محمد طلعوا الطلبة ومريم بسرعة ناضت بتكلم الدكتور
سجى: مريم وين ماشيه
مريم: لازم نكلمه يغيرني معاك ؛
مشت لدكتور؛ دكتور
الدكتور: نعم
مريم: انا نبي نغير من المجموعة
الدكتور: علاش ؟
مريم : هكا
الدكتور: لا ما فيش تغيير
مريم: علاش؟
الدكتور: المجموعات مقسمة من رئيس القسم ما فيش تغيير
مريم : بس انا نبي مع الدكتور محمد
الدكتور: قلت ما فيش تغيير
مريم: نبدل انا ووحدة من المجموعة الثانية
الدكتور: لا
مريم" اضايقت" دكتور صحة حولني نبي مع صاحبتي ما نقدرش نبعد عنها
دكتور: اولا هذه قراية مش ضروري صاحبتك اعماك
مريم " قاطعاته " لا ضروري
الدكتور: ثانيا ما فيش تغيير ابدا "خدا شنطته ومشى
سجى" مشتلها" مريم خلاص توكلي ع ربي بادن الله تنجحي
مريم : اف ما اظنيش
سجى: هيا خلينا نطلعوا ولا تفكري
................
........................
ميار حست بملل ناضت تلف ف الحوش سمعت صوت الجرس فزت من الخوف مشت لروشن لتشوف لقت خيال ولد واقف خافت ومشت قعمزت
كان صوت الجرس وطق ع الباب ما وقفش
غمضت عيونها وهي خايفة لحتى سكت ناضت تشوف اذا هوا قعد او لا
تنهدت بارتياح لأنه مشى لفت وخشت للكوجينه قعدت اتحوس تفكر شن الغداء
:اممممم شن شن اندير ,,
سمعت صوت حركة وراها ابتسمت وهي تفتح الدولاب واطلع منه صونيا : يما جيتي كيف نفكر شن نديرلكم ع الغداء
" لما ما سمعتش رد امها لفت :يم م م م
"طيحت صونيا ع الوطاء من الصدمة وانكسرت بصوت عاااالي .. حست كل جسمها يرجف من الخوف وانشلت عن الحركة .....
....................
........................
سناء " ف الكلية وتكلم بالنقال " حبيبي وانا مستاااحشاتك وااااجد عامر نبي نشوفك
عامر : مش فاضي
سناء: عموري والله نزعل منك
عامر: ما يهونش عليا زعلك لفي ليمينك
سناء" لفت و تفاجأت انه مقعمز و يشوفلها و غمزلها , خدودها بدوا حمر ولفت عنه "
عامر: سوسو شن صارلك
سناء" بخجل" انا معاك
عامر: حبيبتي لا تبعدي عيونك عني خليني نشوفك ونملي عيوني بشوفتك
سناء" لفتله. وانصدمت انه مش موجود ف مكانه لفت ادور فيه شافت لقاته مقعمز قدامها ع كرسي
عامر" مبتسم " سوسو ع من ادوري ؟
سناء" مبتسمة" اكيد ندور ف احلى شاب هنا
عامر: ومن هوا احلى شب؟
سناء" بضحكة " شوف المراية تو تعرف
عامر: ههه ربي يحفظك يا عمري يااحلى بنت ف الكون
ــــــــــــــــــــــــــــــــ
ـــــــــــــــــــــــــــــــــــــــــــــــــــــــــــــــــ
ميار وهي ع نفس حركتها واقفة ومصدووووومة وهي تستوعب ولد واقف قدامها
وخاش لحوشهم
و يشوفلها من هذا؟
اول مرة ف حياتها تشوفه مش قادرة تستوعب
؛الولد طويل وعريض عنده لحيه خفيفة عيونه لونهم سماوي شعره قصير ويميل للأصفر ,حاط ايديه ف جيوبه ,وقرب منها
(مــــــلاحظة ولد مش معناها صغير يعني عمره اظن فوق العشرين )
ميار" وهي مش مستوعبة وحاسة قلبها بيطلع من الخوف تشوفله وهوا يقرب منها لما حست انه بدا قريب غمضت عيونها صرخت بصوت عـــــــالي: ااااااااه
الولد "ببرود" شن شايفه جني قدامك !؟
ميار" فتحت عيونها و شافتله "
الولد" شافلها من فوق لتحت وكانت لابسة بدي طويل لركبة مع شورت وشعرها شاداته بتوكه و مخلياته مطلوق"
ميار" حست بالأحراج من نظراته"
الولد" رفع حاجبه ضحك بسخرية ولف وطلع
ميار" قعدة مصدومة قعمزت ع الكرسي خدت نفس عميق وحطت ايدها ع راسها : معقول نتخايل معقول انا مجنونة ونتخايل لا لا
., هزت راسها تبعد الاوهام ووقفت وشربت اميا وطلعت ماشية لدارها بتاخد الحبوب وقفت جامدة وهي تشوفه متكي ف الصالة ع الجلسة ويغير غمضت عيونها وفتحتهم بشكل متكرر تستوعب هوا خيال او حقيقة قربت وخشت وقربت منه
الولد" رفع عيونه عليها وبعدها لف لتلفزيون "
ميار" جت قدامه وهي مصدومة
الولد" رفع عيونه عليها بملل" ابعدي من قدامي
ميار" ع نفس نظراتها ليه فاتحا عيونها ع وسعهم وتتأمل فيه
الولد" مل من نظراتها زفر بقوة ووقف "
ميار" خافت ورجعت خطوتين للخلف "
الولد" بعصبية " خير بلاك؟
ميار" باستغراب" من انت؟؟؟
الولد: اف تره اخطيني احسن لك
ميار" عصبت" هي انت من وين خشيت ومن انت؟
الولد" ما عبرهاش ومشى من قدامها "
ميار" لفتله بغضب" انت هي وقف
الولد" وقف ولفلها "
ميار" بعصبية" من انت ؟ ومن سمح لك تخش لحوش مش ليك لو سمحت اطلع احسن لك
الولد" حط ايديه ف جيوبه" نعم نعم تبيني نطلع
ميار: ايه اطل وبسرعة
الولد: انت المفروض تطلعي من قدامي وبسرعة
ميار "حطت ايدها ع خصرها" والله و الله ما طلبتش نخليك ف حوشنا ونطلع
الولد: ما قلتلكش اطلعي من الحوش
ميار: وشن قلت؟
الولد" شافلها من فوق لتحت ": الاحسن تمشي تبدلي وتلبسي شيء باهي عاجبك منظرك وانت بهذا اللبس قدامي
ميار" بعصبية" انت هي خاش لحوشنا وتشرط عليا من المفروض يطلع انت العيب عليك خاش طول ما تقولش الحوش فيه بشر ساكنينه
الولد: لو سمحتي لا تكثري بالكلام واطلعي من قدامي انت ما تعلمتيش انه عيب تقفي قدام واحد بهذا اللبس
؟"وهوا يشوف للبسها"
ميار" حست بالأحراج بس ما حبتش تبين" : ومش عيب تخش لحوش مش ليك؟
الولد: يا هي انت اعرفي من انا وبعدين تكلمي
ميار" حست بالأحراج لأنه ما تعرفش من هوا يمكن تعرفه بس نساته
الولد" رفع حاجبه وقعد يشوفلها تنهد وطلع من الصالة
ميار" لحقاته بعصبية" هي انت شن الحوش حوشك وانا ما ندريش وين ماشي
الولد" وقف عند باب الحمام حشاكم ولفلها ورفع حاجبه وشاف للحمام ولفلها " شوفت عينك
ميار" فهمت عليه حست بالأحراج"
الولد" بضحكة" تبي تلحقيني؟
ميار" مـــــاتـت من الاحراج ولفت ومشت "
الولد: ههههه
ميار "حاسة بحرارة في وجهها وعصبت من صوت ضحكته مشت لدارها وبدلت دبشها ولبست قونه سودة وبدي لونه وردي ووشاح اوردي؛ وطلعت من الدار ومشت ادور فيه خشت للكوجينه وشهقت
الولد " رفع عيونه ؛مقعمز ع الكرسي وشاد طاسة نسكفيه مع بشكوط(بسكويت) : انت خيرك كل مرة تشهقي سلامات فيك شيء
ميار" عصبت ومشتله ووقفت جنبه وكتفت ايديها " هي انت نوض وين تحساب روحك في مطعم والا كفي ؟
الولد" شافلها من فوق للوطا" اممم حلو لبسك
ميار" بعصبية" هي احترم نفسك
الولد" وقف وزفر بقوة "
ميار" بعصبية" لا تحسابني خفت منك
الولد" بقلت صبر" شن تبي مني؟
ميار" رفعت حاجبها " حلو؛ انت يلي شن تبي ومن انت اصلا؟ لتخش لحوشنا وتحوس فيه
الولد : ما تعرفيش من انا؟
ميار" رافعة حاجبها " من ؟ لتكون خويا وما ندريش او لالا لتكون بويا كنت مفقود وطلعت حي او يمكن جدي أي اكيد جدي؟
الولد "بصدمة " جدك
" بغضب" هي انت احترمي نفسك شن شايفتيني ف التسعين تقولي جدك
ميار: انت يلي مش شايف ان الحوش مش حوشك تحوس فيه ع كيفك
الولد: رجاء مش فاضي لدوتك "مشي"
ميار" لحقاته " هي هي انت لو سمحت اطلع قبل ما نستخدم معاك القوة
الولد" لفلها وانفجر ضحك" ههههههههههه
ميار " بعصبية " شن يضحك فيك شايفني انكت
الولد: هههه ها الجملة من أي فلم جايبتيها او من أي ههه رسوم هههه
ميار" بعصبية " تضحك تو تشوف "مشتله وضربت بطنة بمرفقها "
الولد" شد بطنه من الالم " اااخخخخخ
ميار " لوت ايده لظهره وشداته زين"
الولد" وهوا يتألم من بطنه " اخ ابعدي احسن لك
ميار" شداته بقوة ودفاته لين الباب البراني وهوا كان يتألم من بطنه فتحت الباب ودفاته البرى "
الولد" لفلها وهوا يستوعب انه بدا برى من الحوش "
ميار " شاده باب الحوش و ابتسمت له" شفت القوة يلي حضرتك ما ندري هازي عليها او عليا هههه
الولد "حس بغضب وعروقه بدو يبانوا "
ميار " اشرت بأيدها " سلاااااام ( لما شافاته قرب سكرت الباب بقوة وهي تضحك )
الولد " فرطت اعصابه مشى للباب وضربه بقوة)
سجى " كانت راجعة من الكلية شافاته وشهقت " ايييييه
الولد " لفلها بعصبيه " شن شايفه جني شن ها اليوم يلي يشوفني يشهق
سجى "مشتله وهي تضحك" ههههه "ووقفت بحداه"
الولد " كتف ايديه غضب" علاش تضحكي؟
سجى : ههه فرحانه بشوفتك "مدت ايدها " ما تبيش تسلم
الولد" سلم عليها " هلا والله
سجى" بابتسامة " هلا رمزي شن اخبارك ؟
رمزي" كشم : زي الزفت
سجى: ههه علاش ؟ بعدين خيرك معصب شن صايرلك؟
رمزي : من اختك يلي الداخل
سجى: ههه ميار ! شن دارت لك
رمزي" شد بطنه" : قولي شن ما دارتش
سجي: هههه خطيرة البنت
رمزي: قولي جنية
سجي: ههه هيا خش( خشوا الاثنين )؛ّ
رمزي21 سنة الولد الوحيد لخالهم ؛ وخالهم سفير وهما ما عندهمش الا خال واحد ؛وخاله عندها 3 بنات وولدين اصغر وحدة عمرها 20 والباقي اكبار؛؛ و اما اعمام ما عندهمش لان ابوهم يتيم الاب وامه ماتت قبل فترة بسيطة
سجى" وهما خاشين لصلة " شن امتى جيت ؟
رمزي" وهوا يقعمز وشاد بطنه" من شوي
سجى" قعمزت جنبه ,باستغراب" خيرك شاد بطنك
رمزي: ولا شيء بس توجع فيا
سجى " وهي تنادي بصوت عالي " ميــــــار؛؛؛ ميــــــار
رمزي : علاش تنادي فيها
سجى: هههه خليني نعرفها عليك اكيد ما عرفاتكش
رمزي " كشم "
ميار" خشت لدار وشهقت وهي تشوف لرمزي " اييييه
رمزي " كتف ايديه ورفع حاجبه " نعم قلت لك انا مش جني لتشهقي والا مصابة بمرض الشهيقه الطويلة وما ندريش
ميار" كشمت"
سجى :هههه
ميار" لفت لسجى " هي من هذا وعلاش مدخلتيه
سجى: هههه هذا ر ر ههه رمزي
ميار: بجودة وشن يعني لو رمزي من هوا ومن حضرته وعلاش ادخليه
رمزي" رافع حاجبه" حضرتي رمزي ولد خالها " اشر براسه ع سجي "
سجى: هذا رمزي ولد خالنا
ميار" قعدت تشوف لرمزي وادقق ف ملامحه "
رمزي : شن تتأكدي من ملامحي شايفتيني او لا؛ لا اتعبي روحك
سجى" نخصاته ؛ سكت ؛ولفت لميار"
ميار" حست بضيق"
سجى "لفت لرمزي" علاش ما قلتش بتجي
رمزي " وهوا يشوف لميار" كنت نبي نديرلكم مفاجئة بس انا يلي حصلت مفاجئة و استقبال رااااااائع
ميار" حست بالأحراج وطلعت من الصالة ومشت للكوجينا وقعمزت ع الكرسي وهي تحس قلبها يدق بقوة ونزلوا دموعها :معقول انا ما نعرفش من هذا ؟ معقول ولد خالي وكأني اول مرة نشوفه ؟
سجى" وقفت " خليني نمشي نشوفها حاسة انها مضايقة ونبدل ونجيك
رمزي : خودي راحتك(سجى طلعت )حط ايده ع بطنه هالبنت قوية
سجى" خشت للكوجينا ولقتها مقعمزة وتبكي قربت منها " ميار
ميار " مسحت دموعها"
سجى : خيرك ؟
ميار" بعبرة " هذا ولد خالي؟
سجى: أي
ميار: بس انا مانذكرش فيه
سجى: ما في مشكلة انت علاش زعلانا
ميار: هوا ما قالي انه ولد خالي كان قال ما ساويتش يلي ساويته
سجى: شن ساويتي ؟
ميار" نزلت راتها" ضربته و لزيته من الحوش
سجى: ههههه خليه يستاهل
ميار: علاش يخش بدون اذن مش هذا عيب
سجى: هوا هكا متعود علينا
ميار" بضيق" يعني انا الغلطانة
سجى: لا هوا الغلطان
ميار" وقفت " انا بنطيب الغداء وما نبيش نشوفه
سجى: خودي راحتك؛ لفت وطلعت ومشتله وهي تضحك"
رمزي "باستغراب" شن يضحك فيك ؟
سجى: هههه ضرباتك ولزاتك
رمزي" كشم وشد ايده ع بطنه "بنت قوي
سجى: هههه الغلط غلطك كيف تخش بلا اذن
رمزي: وكأني متعود ناخد ادنكم لما نخش
سجى: عارفة تخش بلا اذن بس كيف خشيت؟
رمزي" حك راسه " اممم من السطح
سجى: ههه خلي فيك تستاهل
رمزي: له له تبيني نقعد البرى
سجى: وعلاش ما اتصلتش ؟
رمزي: نقالي تم شحنه وانت بدل ما تقوليلها يلي ساواته عيب جايا تحقق اعمايا
سجى: ههه من ناحيت نقلها اطمن هي تو ندمانة انها ضرباتك بعدين الغلط غلطك تخش عليها وانت تعرف انها ف الحوش وهي ما تدري من انت علاش ما قلتلهاش انت ولد من؟
رمزي: اولا ماكنت ندري او بالأصح نسيت انها هنا ثانيا تبي كل ما نشوفها نقلها من انا
سجى: لا مش كل مرة هي بدت معش تنسى
رمزي: و شن بدت تذكر
سجى: لا
رمزي" ابتسم بسخرية ومشى"
سجى: هي استنا
رمزي: شن
سجى: امم هي ما تبيش تشوفك
رمزي: والله وعلاش؟
سجى: يمكن متحشمة منك
رمزي: هههه متحشمة مني هههه
سجى" باستغراب" علاش تضحك؟
رمزي" قعمز وحط رجل ع رجل " ولا شيء
سجى :خليك هنا نبدل ونجي
رمزي: اوكي (طلعت سجى وهوا اتكئ وضحك) هههه متحشمة من يلي امبكري تهدد فيا ولبسها هههه ميار هاه تو تعرفي من انا لو ما أذكرتنيش انا نذكرك من هو رمزي يا هاه ميــــــار
::::::::::::::::::::::::::::::::::::::::::::::::::::::::::::::::::::::
انتهى البارت ❤
شن رايكم فيه ؟؟ القصة ف بدايتها اتمنى ان تستمروا ف القراءة ولا تملوا اوكي حـــبــايــبــي🌹
بطلتي ميــــ🎀ــار شن سبب حالتها ومرضها هل الاحلام يلي تحلم بيها ليها علاقة بالحادث وحالتها؟؟ وهل بترجعلها الذاكرة من جديد؟ وكيف بتتعايش مع الحياة الغريبة والناس يلي حولها مع فقدان ذاكرتها من بيقدر يساعدها وتذكر؟؟
علاش تحس بالخوف من الناس وعلاش عيالها ما نعينها من الطلوع وشوفت العالم الخارجي؟
من هوا جــ؟ــــواد يلي نادت باسمه؟؟ ومن رمــــ؟ــزي ؟؟
سنعرف كل هذا ف بقيت الاحداث