الشاعر عباس العبادي
العدهم ما يعرفن ليمت ايطگّن..
چهبت ازمورهن و وجوهن عرگن.
وخرّن من اديهم خرّة الشاهول..
أنا ابن الملحه من اخزرهن ايدنگن.
ابن المن تنخّت سنبل العاگول..
وإمن اتشيل اديها النفضن ايخفگن.
هذيچ الضامتلي ابكوسر الكاروك..
التفگه السولفن جدّامها و وهگهن.
گالتلي انتچي اعله السانها المملوح..
هذني اشما يچثرن بالحچي ايصدگن.
گتلهه وبعد گالتلي ابوك ايگول..
عينك عالثوايا البالدمه اندگّن.
عينك عالتراب الكبر عودك بيه..
التشلبه الگاع حتى اغصانك ايطگّن.
عينك على الماي السجه الغيره البيك..
الشرگ بالطين حتى امتونك ايشهگن.
گمت بإگماطي لكن من گمت رجال..
إمن اتحنحن اگبالي البكّر ايطلگن.
إمن اهد ذاك الوكت ما دفه ابعيني الطيف..
أمّهات ارموش لارمشن ولا طبگن.
تنخّيت ابعلي وفاض اعله صدري الحيل..
مِدْرِع والمنايا اويه الهوه ايخفگن.
انا الغطّيتهم گبل الدهم والبيض..
گالولي بطَن ، گلتلهم ايلحگن.
ما محتاجهن حتى اصعد اعله الخيل..
السباع ايطرّن النسناس وايطرگن.
لادگ زقّومهم حدما جذعها ايطيح..
ردف، والفوس كلما ردفن ايغمگن.
واراويهم اشجابت بت علي امن افحول..
واشجابن الچانن للهوه ايسبگن.
وياهو المن يطگ شاجورها اتناغيه..
وامْنْ ايكض خصرها اشفافها ايصفگن.
الحامل بالفشگ تطلگ ابحگ واتجيب..
امّهات ازمور من يتماشن ايحگّن.
تشرگ لو فرغ شاجورها ام الخير..
بنات الخير من ايجوعن ايشرگن.
إمحزّمها ابعلگ بيه ريحة العباس..
ترمح، والتفاگ إگبالها اختنگن.
ما مدّيتها ابباطل وأنا ابن احمود..
الإعيونه اعله كسرة خاطر ايغرگن.
بس اتطاولوا بأرگابهم للباب..
الرگاب الچهبن اعله احمود ينفهگن.