نوافذ الشعر الشعبي مجموعة قصايد من شعراء العراق

الشاعر عبد الحسين الحلفي (تسوه الدنيا عندي من اگعد وياك)

الشاعر عبد الحسين الحلفي
أنشع من اشوفنك علي جاي
واسكر حيل اذا اشبكك اطوطح
ويصير العيد ماتم لون ما جيت
وبيوم الطبك لو جيت افرح
          ............
واكول اربحت واني وياك خسران
واكول اخسرت لو وي غيرك اربح
مرجوحه الكلب ومحبتك عيد
وبما انك طفل حقك تمرجح
حلو .. وتلمع .. وتكتل انت اذا سيف
اذا عذرك وياك وانت تجرح
وما افكر خاف انت تذبحني
افكر خاف اتعبك وانت تذبح
اعرفنك غلط بس مستعز بيك
وكمت لخاطرك حته اكره الصح
..........................................
تسوة الدنيا عندي من اكعد وياك
وبدونك كلشي ما تسوه دنيتي
من اطب لبيتكم اشبك على الباب
ويشبكك بابنه من تطب بيتي
فرق مابين عمري وعمرك هواي
وكمت لخاطرك اصبغ لحيتي
اتأذه اذا وي غيرك ارتاح
وحيل ارتاح اذا منك اذيتي
عليك العين تبجي ليل ونهار
واكلهه اشعطلج شو ما بجيتي
يوصي اهله بجهاله الرايد ايموت
وبس اسمك لكو اهلي بوصيتي