Estudyante
Isinulat ni Aymadrimer
"Oh! Nandito ka ulit, hija? Gumawa na naman kayo ng proyekto, ano? Hay nakung eskwelahan n'yong 'yan, napakaraming proyekto! Magastos na nga, mahirap pang gawin. Kawawa naman ang mga estudyante ngayon. 'Yong anak ko nga, hindi na nakatutulog dahil sa rami ng ginagawang takdang aralin. Ayon, nakakulong lagi sa kwarto at puyat. Eh ikaw, hija? Nahihirapan ka na siguro 'no? Basta talaga matatalino, laging puyat. Hayaan ninyo't magagamit ninyo rin 'yang pagod na 'yan para sa kinabukasan n'yo. Oh siya, kumain ka na ba? Tapos na ba kayo?" mahaba-habang litanya ni Aling Mira sa nakasalubong niyang kaklase ng kaniyang anak. Kahabag-habag ito dahil halatang pagod na pagod habang bitbit ang napakalaking bag na may lamang mga aklat at kuwaderno. Pauwi na siya mula sa tahanan ni Aling Mira.
"Ah, opo. Katatapos lang po. Mauuna na rin po ako," nakangiting pahayag ng dalaga.
"Napakasipag talaga! Pero ayaw mo bang hintayin muna ang miryenda?"
"Hindi na po, kakakain ko lang din po kanina lang."
"Mabuti naman. Akala ko'y hindi ka pinakain ng anak ko. Oh siya, sino ba ang magdadala ng nagawa ninyo?"
"Ako po."
"Napakasipag talaga! Napakarami mo na ngang bitbit, ikaw pa magdadala. Mabigat ba 'yan? Dapat ipinadala mo na lang sa anak ko. Patingin nga! Ano ba 'yang nagawa niyo?"
"Ito po," sagot ng dalaga sabay turo sa tiyan niya. "Apo n'yo po."
#KarakathaEstudyante