جمعت لفطور ونصبت الغدا .. وجمعت حوايجي ومشيت للعين نصبن .. هاد العين كانت بعيدة شوية على دار وسط شجر كانت على شكل قوادس عالين ديال الحديد خارجين من واحد الجدار ترابي كايكبو فواحد جهة (ديال الشرب) داير عليها طين و وهاد جهة كتكب فجهة اخرى ديال تصبين وماجاوره والما منها بارد متلج ومع كان لبرد صافي كمالت ..بقيت فرك فرك فرك فرك تا طابو جنابي أه يالطيف تقول كانو مغمسين فالزفت والقطران..بقيت شي ساعتين وانا كنصبن عاد ساليت .. عصرتهم وحطيتهم فسطل .. ويالاه جلست نرتاح شوية باش نمشي بحالي وانا نسمع شي صوت بحال ديال بنت صغيرة كيعيط : دنيا دنياااا .. بديت كندور نشوف شكون وااالوااا مبان ليا حد ... شوية بديت كنسمع شي ديال زطامي .. هزيت سطلي ومشيت لجهة صوت وياللمفاجئة كان با بجلابتو المعهودة كان راد بظهرو وغادي ... بقيت تابعاه بجرى باش نوصلو ولكن كل مكانزيد فسرعة تاهو كايزيد
- با تسنى ..تسنى عافاااك ... كنت عارفاك غاتجي ومغاتخلينيش فهاد جبل ... باااا جيتي تردني ياك ؟؟.. والله أبا مانعاود من ليوم غير هضرتك لي نسمع .. عافاك ماتخلينيش راني تبت ودوزت أسوء أيام حياتي .. با توحشتك انت ومي .. عاد عرفت بقيمتكم فحياتي .. من ليوم برضاكم غانعيش .. عافاااك سمحليا
واخا هكاك كاع مضار عندي .. بقيت تابعاه تا وصلنا للبير ووقف قدامو ...يالاه بغا يدور وانا سمع داك الحقير كيغوت من لور أو درت كان بعيييد
- بنت شااااارفة ... أجـــــــــــــي تشوفي شنو جبت
- تجيك فراس ..من ليوم مانعاود نشوف خنشوشك ..(درت عند با ) ياك أبا هه ؟؟؟ ..( لقيت غير ريح أما لواليد مابان ليه الأتر) بااااا فينك
بديت كندور فجنابي كي الحمقة ومالقيت حد .. ماحسيت غير برجليا خواو بيا وطحت الأرض ماعرفت فاش نفكر تصدمت .. هزيت يدي غطيت وجهي وبديت نبكي على زهر المنحوس.. ماحبست تا حسيت بشي حد واقف حدايا .. بديت كنطل من بين صباعي وهو يبان واااااحد مولاي الكلب قدو قد الخلا ريوكو مزلعين.. رجلي لي كانو فاشلين رجعو روايض ... واعلااااااااق .. أنا كنجري وهو تابعني وكايهوهو من الفوق .. وداك البعر غير ضحكو لي كايتسمع .. هو شبع ضحك .. وأنا شبعت خلعة .. وماحبست تا عيطليه بسميتو وحبس .. عاد تنفست الصعداء
- هههه جيتو مع بعضياتكم والله لي يشوفكم يقول طوم ودجيري
- تشوف العمى واجمع عليا كلبك
- ماتقوليش ليا كاتخافي من الكلاب؟؟
- ههه لا مكانخافش من الكلاب .. أما هاد الوحش ديالك تبارك الله عليا ملي ماطلقتهاش فسراولي
- ههههه ... من ليوم انتي وزاهية وأنا كارلو تانشوفو شكون لي يغلب
- أخويا الغالب الله .. أستسلم .. غير بعد مني انت وكلبك
الخلا والقفار ماقلنا باس ضريب جنون دوزناه .. مسينا على هاد بنادم وصبحنا على زاهية تاهي دوزناها .. ولكن الكلاب أرفع رايتي البيضاء · · ·
من بعد الفقصة ديال با والخلعة ديال الكلب يكونو طاحو مني 4 كيلو .. مع داك جوايه 2 عاد جات زاهية من سوق بعكازها كاتعرج ... مسكينة صكاناها لكلب ومولاه .. ملي مالقاو عندها والو دوزها وخا هكاك هددها بالكاميرات إلى شاف عليها شي حاجة غاتمشي خلا...من بعد تغدينا .. وضربتها بواحد النعسة نرجع فيها غير النفس ... ضرباتني الفيقة مع 4 على صوت ديال الحيدوس .. نضت كي شي مهاوشة كنقلب منين .. سولت زاهية وقالت ليا كاين واحد العرس فالدوار لتحت .. سمعت عرس وبديت نحزر ونرغب ومع دموعي غا على سبة ليوم استاغليتهم تاهما وبديت كندمع ليها تديني نحضر ليه .. ولكن رفضات رفضااا قااااطعاااا بحجة صحاب دوار كاع مكايحملوها وهي جنونها مكايخليوهاش تسكت إلى شافت الباطل ... وخا هكاك عييت ما نحاول معاها ولكن سدات فوجهي كاع البيبان تا يأست .. وهو يبان ليا البلان فبطلنا العزيز لي غير شافني قلب دورة ولكن هاد الحيل ماشي معايا تبعتو كي زاواق .. وبديت نحزر فيه ونتملحس عليه ونتمسكن ليه
- اهااااه باش نمشي معاك وداك ساعة إلى كان زاهية جابت شي بخيرات من سوق تقضي الغرض ... ياكما بنت ليك عندي الكرون
- وياك كاينين الكاميرات
- اهاه إلى دارت شي حاجة مانوصل لدار تاكون دارت لي دارت
- عااااافاك كلبك كاين وحنا دغيا نرجعو ياك عندك طونوبيل .. الله يخلي لك ماعزيز عليك .. الله يزوجك بالبنت لي كاتبغي ويحرق داك جنية لي كاظل مطيرة عليك النعاس .. الله يحن عليك .. راني مهاوشة
- وأنا مالي ؟؟
- أجر كبيـــــــــــــــــــــــر في سبيل الله غايتزاد فميزان حسنااااتك
بدا كيطلع فيا ويهبط .. يسحابني كيضبر على شي معيور جديد .. ولكن صدمني ملي وافق ..آآآآآآآآآآآآخ على فرحة ... وحيت ماعندي مانلبس جادت عليا زاهية بأحسن ما عندها واخا جاني شوية عريض ولكن فالعرس غانحزم هه وعطاتني واحد الطريكو ديال صوف نلبسو من الفوق على البرد...
- زاهيـــة
- نعم
- سمحي ليا على كلشي
- على مالكي ماغاترجعيش .. راه غير غاتحضري وترجعي
- اه عندك صح هه .. غانرجع وندير ليك القباحات تاني هه
خرجت من بيتها وانا عيني عامرين بالدموع .. لا صافي واقلة زدت فيه ليوم بالبكا ..منين حلمت براسي عروسة وانا ماشي تا لهيه .. خرجت أنا ومول دار (مزال ماعرفت سميتو هه) وانا مخبية فيه على ود الكلب ركبت معاه فطنوبيل ومشينا ومع كانت الأرض مروية بالشتا ديال البارح كانت خطيرة ولكن تا سيد لي راكبة معاه خطييير هه عرف يسلكها ... وأخيرا وليس أخرا وصلنا لخيمة العرس والحيدوس كان على برا بلا مانفكر دخلت مع الحيدوس ديال العيالات وبديت كنغني ونتمايل معاهم ..مول دار تاهوا دخلوه مع رجالا ههه ضحكني وهو كايهز رجليه وكتافو هه.. مهم بردت غدايدي وخرجت كاااااع داك الخلعة والفقصة لي دوزت .. من بعد الحيدوس دزت ركزت ليهم واخا مكانعرفش مزيان ولكن لقيت إستحسان فعينين ناس .. ومن بعد دزنا لشعبي داك ساعة أرااااك الفراجة ماحبست تا رجلي مابقاوش قادرين يهزوني ..ماسالينا تا 8 ديال ليل تعشينا وخبيت لحلوى و شوية ديال لحم لزاهية .. أما خونا فالله كل مرة يطل عليها من تليفون يشوف أش كادير ...سالينا ويا ريتنا مسالينا لجو كان بارد ولكن سخناها بتطبال وتدرديك وحان وقت العودة لي يالاه شدينا طريق وبدات شتا كاطيح
- طريق ولات صعيبة ... نحبسو ولا نكملو ؟؟
- لي بغيتي
- مخايفاش نكملو ؟؟
- لا ياك انت كاتسوق وأنا كنتيــــــــــــق فيك
- آه باينة ..واخا ... شفتك حيدتي الهوايش .. أنا صدمتيني فيك
- (بحشمة) هههه غير شوية وصاف
- (بصدمة) شوية ؟؟؟؟ علم الله شنو هي بزاااف عندك
- (بشوية) كن بقينا تال فجر عاد نقول بزاف شوية هه
دار واحد ضحكة مكبوتة مابغاش يبين راسو كيضحك .. ولكن مكاين باس..بقينا ساكتين تاسمعنا صوت رويضة وحلات وحلات فواحد الحفرة عامرة بالما
- كاتعرفي تسوكي ؟؟
- لا
- إيوا خرجي دفعي ؟؟
- أويلي على ندفع ... جهدي كلو عطيتو فركزة
- داكشي فاش حادكة ...يالاه أجي لهنا لبلاصتي
وراني منين نكسيري ومنين نفراني ووراني كيفاش ندير .. خرج هو وبدا كايدفع وبديت كندير داكشي لي قال ليا .. وبعد عدة محاولات خرجات رويضة من الحفرة ولكن لي مكانش فالحسبان هو طنوبيل زاااادت وخا فرانيت مابغاتش توقف .. بحالا شي حد كيدفعها بقوة خيالية ... ماحسيت براسي تا دخلت فواحد شجرة كبيـــرة حتى طاح واحدالغصن ديالها هرس جاج القدامي .. أما أنا تكوفرت حسيت براسي محبوسة وراسي بحالا تهرس .. نفس تقطعات فيا .. ودمي بحالا جمد وجسدي مابقيتش حاسة بيه .. وبين عيني كادوز حياتي كاملة قدامي بحال شي مقاطع ديال الفيديو..ملي كنت ساكنة فدار جدي وملي وليت ساكنة مع والديا ونهار جرا عليا با من دار ونهار وصلت عند زاهية وحلمي وأنا عروسة .. الفرحة .. الخلعة .. البكا كلشي حسيت بيه .. سيمتي كنت كانسمعها مجهدة وغادة وكاينقص فالفوليم تا مابقيت كنسمع والو .. سالات صور ديال حياتي وغمضت عيني على جوج دمعات دافيين
لله ما أعطى ولله ما أخد وإن لله وإن إليه راجعون .. دنيا مامتيقش ليوم كايلوحو عليك التراب .. مامتيقش جسدك ما بقاتش فيه داك الروح المرحة ... مامتيقش قلبك مابقاش كايضرب ولسانك مابقاش كاينطق ... مامتيقش وليتي جتة هامدة ... رجعي عافاك .. رجعي وسبيني وعايرني كيف موالفة ... رجعي ونمشي أنا رجعي ونحيد لكلب من حدا الباب .. رجعــــي نقولك غير سميتي ونقوليك شحال كنتي زوينة وواخا لسانك سليط ولكن عينيك كانت البراءة كاطل منهم وقلبك كان بيض .. ندمت علاش خليتك تسوكي ندمت علاش ديتك لداك لعرس ندمت لي خليتكم ترجعو لدار .. ندمت لي أنا جيت من الأساس ...دنيا واش بصح متي واش صافي مشيتي عند مولانا .. واش عمركي مغاترجي .. شوفي واليديك الحقيقيين جاو ... شوفي شحال كايتعدبو فغيابك ماماك مكرهاتش تدفن معاك أما باباك نكدب إلى قلت ليك بلي شفت شي راجل منكسر بحالو فحياتي ... شوفي زاهية المرأة شارفة لي كانت واخا كاتمشي على العكاز ووقفتها باقا مقادة ليوم مقاداش توقف على رجليها .. ووجهها شرير دموع مابغاوش ينشفو منو .. شوفيني أنا لمتكبر لي كنكره العيالات ليوم ماكرهتش نكون بلاصتك .. ماكنتش كنعرفك مزيان ولكن كنرتاح ملي كنشوفك وواخا مكنبينش ولكن الله بوحدو لي عالم .. ليوم غانرجع منين جيت عطيت لزاهية ساروت ديال دار ولكن رفضات ومابقاتش باغا تسكن فيها وتا أنا مابقيتش باغي ندخل ليها حيت ريحتك وجهك ضحك بكاك غواتك معيورك كاينين فكل جزء من داك الدار لداكشي بعناها لناس جداد..دنيا واي دنيا بعدك الله يرحمك عمري مانساك غاتبقى دكراك محفورة فالقلب ... وعلى فكرة سلفياتك جاو زوينين هه مزيان لي محيتي تصاوري ودخلتي تصاورك حيت انتي لي غاتبقاي حيا فقلوبنا أما أنا بدكراك غانعيش .
- واااااااااااااااااااااااااااااااااا مي
نضت من لفراش بحالا كنت غاطسة فشي بحر .. لقيت زاهية ومول دار واقفين ليا عند راسي وكيطلو ليا على وجهي .. وانا كانغوت كي شي حمقة
- أنا : فيناهو ؟؟ فيناهو ؟؟
- هو وزاهية : شكوووون ؟؟
- أنا : لفقيه ...لفقيه لي كان كايدفني مول جلابة لبيضة وعندو لحية خفيفة والغمازات .. فين هو؟؟
- زاهية : بسم الله عليك راك كنتي غير كاتحلمي
- أنا :على مامتش ؟؟؟
- هو : (بغضب ولغوات من لفوق) مصاب كن متي وهنيتينا .. الله يخليك بالخلا .. طنوبيلتي كاملة شخشختيها .. منين انتي منين .. واش أنا قلت ليك خرجيها من الحفرة ولا زدحيها مع شجرة
- ياك أسليحفان وانت لي كنتي كاتبكي عليا فاش كانو كايدفنوني .. وكاتقوليا كنتي زويونة وقلبك بيض وماكرهتش نكون بلاصتك
- انا ؟؟ كنبكي عليك انت ؟؟؟.. وانت زوينة .؟؟ وأنا لي قلتها؟؟ (دار عند زاهية ) .. شارفة دي بنت تزور راها بدات تخرف ..(عاود دار عندي ) وانت والله ونعاود نشوفك قدامي ياتا ندفنك بيدي وهانا فين قلتها لك
بدا كايخنزر فيا وخرج .. الله يخرج ليه تونية فداك الغوفالة
- زاهية أش وقع ؟؟
- والو .. غير من بعد داك ركزة لي دردكتي وشطيح لي درتي جاب الله حبساتك شجرة أما كن ريبتي علينا جبل .. وجاب الله مول الدار كان طبيب شحال هادي .. أما كن مشيتي خلا .. يومين وانت مغيبة يالمسخوطة
- وكون غير خليتوني نمشي .. راه كن شفتي لفقيه تبقاي غير حالة فمك .. على الأقل كنت غانختم حياتي على زين .. حسن ما نصبح على وجهك انتي وياه
- والله إلى كن غير مشيتي .. ندير زردة لمشاش وكسوسو لزاوش
- ياك أزاهية ؟؟ هو إلى قالها جات معاه أما انت شدرت ليك
- قطعتي ليا الكسوة زوينة لي كانكساب
- وصافي تا انت يخلف الله .. واش مابقيتش فيكم زعمة راه كنت بين الحياة والموت ؟ واش مافقلوبكم رحمة ؟
- كنا غانموتو بالخلعة
- واش بصح أزهزوهتي (دورة وجها ويالاه بغات تخرج بديت كنغوت) زاااهيــــــــــــــــــــــــــــــــــة مابقيتش كانحس برجلي أزاهية
رجعات عندي وعطاتني بواحد القرصة لرجليا .. وصراحة مابقيتش غير حاسة برجليا حسيت تا بروح باغا تخرج مني ... ضربتها بواحد لغوتة ناس دوار يكونو سمعوني .. أما هي خرجات ومشات بحالها .. بقيت كنحك فالقرصة وانا كلي عظامي مدكدكين عليا .. رجعت حطيت راسي على المخدة وبقيت كنتفكر فالحلم وكنفرنس ملي كانتفكر وجه لفقيه .. باينة هداك ماشي ديال هنا ..غايكون غير راجلي ديال لهي
وليت دايرة ليهم موتة حمارة فدار ..أصلا أنا ففترة نقاهة وخا كناكل بشراهة .. ولات زاهية هي لي كاتجيب ليا الماكلة لفراش .. وانا دايرة فيها عبد الحليم حافظ على فراش الموت .. أصلا كلي مضرورة والعكز هو أكبر ضرر .. تال واحد نهار زاهية مجابت ليا لا غدا لا عشا وانا كنشم بعويناتي ريحت صوبا .. حيت نيفي تخشخش من الحادتة .. تاوليت كانشك فيها نساتني .. حيدت عليا بوعكزون ونضت كنعرج وطليت عليها من الباب كانت هي و مولاي السلطان كايقصيو فصوبا وانا مخليني بجوع والهيمري كايضرب فيا .. تالماكلة مامسامحاش... ماحسو بيا تا لقاوني واقفة ليهم عند راس
- فين هي زلافتي ؟؟
- فالكوزينة
- أهء ... ومانقدرش نمشي ليها .. شي حد ينوض ؟
- نزلتي من الفوق لهنا وماقدرتيش تزيدي جوج خطوات للكوزينة الله ينعلك
بداو كايحمرو فيا عينيهم ..
- ياك قلبتو عليا وجهكم .. بديتو تافقو عليا
دورة عليهم وجهي بالنفخة وبسرعة البرق جبت زلافة وبديت نكب لراسي ونشرب
- كي بقيتي ؟؟
- جوج خطوات باقا لي للموت أزاهية . عيانة بلا قياس .. قلبي مرة يضرب مرة يسكت .. قيسي قيسي جبهتي العافية نايضة تكون واصلة ل100 درجة هذا إلى مكانتش فايتة .. دم مابقاش كيتحرك فيا كانحس بيه رجع خاتر .. رجعت بياس دي طاشي علــــى تقليدي ...(غمزت لاخور) زين فين مانشوفوكش ؟؟ .. داك صوبة إلى ماغاتكملهاش عطيها ليا
- لا مغاديش نكملها .. ومغاديش نعطيها ليك .. غانعطيها لكارلو
- كارلو ؟ حسن مني ؟؟ وعلى كارلو كيشرب صوبة ديال زاهية ههههه .. فخبارك عارفة سميت الكلب ومعارفاش سميتك.. ماذا يدل على ذالك ياعزيزي؟
- الكلاب مكاتعرف غير الكلاب
- احم (وحلات ليا) حاشاك .. إيوا شوفي أزاهية على عينيك ..
- سميتي غالي
- (بتمعن) غالي (بتعجب) غاالي ؟؟؟ (دورت وجهي عند زاهية) غااااااالي
لأول مرة كنشوف زاهية كتبتسم .. أما أنا تشتت بالضحك .. صافي تا بداو جنابي كايحرقوني .. أما هو هز يدو وخبطها على طبلة .. رجعات ضحكتي شهقة
- اهئ .. شحال فيك من غرام أغالي ؟؟ زاهية معانا غالي فطبلة وحنا كنتعشاو بصوبا .. وجوه الفقر ... غالي ههههه إسم ليس على مسمى
ناض مشا بحالو وخلاني كنبلبل بوحدي ... خلاتني زاهية تاساليت هضرتي وتقشابي على سمية
- دنيا ؟؟
- يا عيون دنيا
- تبعيني نهضرو برا
خرجات ولبست كبوطي وتبعتها مع كان زفزوفي وشتا كتنقط
- دنيا أنا غدا غانمشي
- لين ؟؟ واش صافي دغيا بغيتي تخوي ليه دار
- لا .. أنا كل بحال هاد سيمانة من العام كنمشي نزور واحد سيد شريف
- زاهية مافخباريش كتيقي هادشي .. ولكن غاتديني معاك ياك ؟ مغاتخلينيش بوحدي
- انتي مريضة مغاديش نقدر نديك ومغاتبقايش بوحدك غالي معاك
- أويلي واش تسطيتي غانبقى مع راجل بوحدنا .. وزايدون أنا راه بارية راه غير كنتبوحط عليك باش مانديرش شغل هه
- انت باقا مريضة .. وجهد لي عندك فدار ماشي هو دجبال مهم حيت دنيا وزمان هادي غادي نقوليك 3 ديال لحوايج .. باك جابك لهنا حيت بغا يحميك ...قلبك ماتفتحيهش لغالي .. وداك البير هو قلب هاد دار بعدي منو · · ·