المنفى_الغريب

ch/3

بقينا غادين شي ساعتين وحنا فطريق .. كاع الأفكار الخايبة طاحو عليا .. وخا هكاك الواليد حنين غير خص شوية ديال لوقت باش ينسى .. وداك لوقت هو لي فيه المشكل .. أنا بصح فليفلة وكنطير من المقلى ولكن عمري فت الحدود .. كانهضر مع دراري ولكن من غير الهضرة عمري درت شي حاجة واخرى .. أصلا عمر شي واحد ما دخل لقلبي وحسيت بشي حاجة اتجاههم .. فقط تدواز الوقت من طرفين .. ورجال كلهم فعيني بحال بحال .. شحال من مرة حصلت كدوبهم وتجاهلت أخطائهم ولكن كايخلصهم فلوس وتعبئات هه حيت يستاهلو .. ضحك والهضرة لخاوية كيعطيو ليها حكة وديما أون لاين وملي تدكر زواج يسبقو ليك الميم ماناويش ..ماوجدش .. ماعنديش باش ..ومن بعد ماتفارقي معاه بسيمانة يوصلك خبر زواجو من بنت طاسيلتو .. أودي لي ضحكتي عليه يضحك ليك ولي ضحكتي ليه يهجرو ليك ..أوف أش هاد الزمر لي طيحت فيه راسي ..... وصلنا لواحد العروبية مكحطة فيها شي بعالك كيجريوا وديور ديال تراب ونعاج والمعيز كل واحد فين سارح
- با واش غاتسكني فالعروبية ؟؟
- لا .. وتا داك العروبية والله لا حلمتي بيها .. أنا غانديك لبلاصة مافيهاش حس الرجال .. باش تعلمي
- تا راجل واحد ؟؟
- ريحتهم ماتشميهاش
- وانت أبا ؟؟
- ماتعاوديش تشوفيني .. ومن ليوم ما أنا باك ما انت بنتي
- بااااا .. واش جبت ليك كرش من زنقة .. وماتزيدش فيه .. عمرك شفتيني مع شي حد .. راه غير كنهضر وصاف وكاع البنات كيهضرو
- ماشي كاع البنات .. وبنات الأصل كاع مكايطلبو من البراني لفلوس .. وشكون ضمن ليا بلي الهضرة ليوم ماترجعش حاجة واخرى غدا
- وبالنسبة ليك تنفيني هدا هو الحل
- اه
بصح غالطة ولكن ماشي تا لهاد درجة نتعاقب .. حنيت راسي وسكت .. بان ليا با زاد فيه شوية .. كليت العصا وماقلت والو جاب اول راجل لقاه قدامو وبغا يزوجني ليه وماقلت والو .. ولكن باش يبعدني عليه وعلى مي حبيبتي وخوتي ودار لي كبرت فيها وصحاباتي وحياتي كاملة راه بزااف صراحة أول مرة نتعصب منو .. وأنا من طبعي مكانغوتش فاش كنتعصب كانخبيها فقلبي بحالا ماطرا والو .. ولكن أنا لعافية شاعلة فيا وربي لي عالم بيا .. طلعنا فواحد جبل طريق كانت كلها حفاري وضيقة .. تا وليت خايفة لا نموتو بجوج .. ولكن باينة كان عارف أش كايدير .. ماوقفنا تا وصلنا لواحد دار فراس جبل ..صراحة ماشي دار فييييلا كبيييرة وعندها جردة .. كانت بحال الديور ديال أفلام الرعب ... دقينا عل الباب وبقينا شي ربع ساعة واحنا كانتسناو وعاد تحلات الباب وكانت من موراها واحد المرا شااارفة دايرة بحال ماما غولة الله يسمح ليا باين ليها شر ونحس فلوجه .. بدات كتشوف فينا واحد بواحد .. بحالا باغا تاكلنا أنا من لخلعة تخبيت من مورا الواليد ... هاد الأخير لي بدا كيهضر معاها بشلحة وصراحة مافهمت تا لعبة ولكن من وجها بان بلي عاد عرفاتو شكون ..
- دخلي معاها
- وانت أبابا
- ( بنفخة) أنا غانمشي بحالي
عطاني لميكة لي جمع ليا فيها حوايجي ومشا بلا مايتلفت عندي .. أما أنا بقيت غير جامدة فبلاصتي من صدمة .. بهاد سهولة تخلى عليا .. وبلا مايسمعني ولا حتى يعطيني فرصة واخرى .. أهم حاجة هي سمعتو .. أما بنتو ؟.. بقيت كانشوف تا غبرات طنوبيلتو وأنا كلي أمل يرجع ولا نفيق من هاد الكابوس .. ولكن فقت على الخيبات وعلى الواقع المر ملي سمعت داك المرا كاتقول
- ملي تدخلي ردي معاك الباب
واحد الراس كايقول ليا دربيها بشي كعطة ماتوقفي تاتوصلي عند مك.. ولكن فين غانعطيها فهاد جبال .. والصدمة فشات ليا ركابي .. تبعتها بحالا دايرة ليا تنويم المغنطيسي .. وأش فيدي ندير من غير نتبعها .. ورديت الباب ودخلت موراها لدار .. كانت دار فيها سفلي والفوقي .. وحدا لكوزينة لي فسفلي كاين واحد البيت شيرات ليا ليه وقالت ليا مرحبا بواحد اللهجة غريبة حسيت بيها ماشي من القلب وقالت ليا نمشي نرتاح فيه .. مارديتش عليها الهضرة ومشيت كنطير.. ملي دخلت ليه غير دفعت الباب طاحت وتسمعات بااااق والمشكل صدى كايتعاود بحالا طاحت عشرة ديال لمرات مع دار خاوية .. شديت فراسي من الخلعة .. ودورة وجهي غير بشوية نشوف ردة فعلها ..كانت كاع مامسوقة .. رجعت وجهي للمنفى الأبدي زطمت عل الباب ودخلت لبيت .. عفوا ماشي بيت كوووووووري ...عامر خناشي ديال زرع ..والحيط كلو مقشر وتبن مغطي الأرض وواحد البونجة ملمطة بالخيوط ديال رتيلة (العنكبوت) واواحد الفيترينا جاجها مشخشخ أما خشبها اللهم صل عالنبي .. أما الجيش ديال النمل واخد البيت هو القشلة ديالهم ..وواحد جوج تاتات (بوبرصة) كيشطحو فالحيط أما الغبرة فهي تسبح في المكان.. واااع واحد الحالة يرثى لها والله... الحاجة الوحيدة الإيجابية هي عندو سرجم على برا .. وواحد البولة خفت غير ندوز من جهتها تشقف ليا على راسي .. ناري أش هاد الزمر .. رجلي فشلو عليا ملي كملت تحنزيز فالبيت .. من شكل ديال دار من برا تخيلتها غاتكون من لداخل بحال ديور ديال ناس الألبة .. طزز على حالة .. تفو شي نويمرات فتليفون قلبو ليا حياتي وجاب الله ماكملش القرايا أما كن صيفطني لاخرة بلا وراق بلا ستة حمص ... توشحشت مــــــــــــــــــي :'( ... اليأس وندم ماعندو باش يفيدني دابا .. خديت نفس طويل و حيدت جلابتي وحطيتها فالميكة مع حوايجي .. وشمرت على دراعي وعليت شعري الفوق وبديت فعملية التنظيف والتنظيم ·