المنفى_الغريب

CH/11

دخلنا لدار بقينا أنا وزاهية غير حالين فمنا .. بحالا عمرنا دخلنا ليها وااو تبدلات وعمرها بالأتات بعد مكانت خربة مهجورة .. ودابا كتسمى داااار.. تا من لحيوطة تصبغو .. مشيت بغيت نحط حوايجي فبيتي وانا نلقاه متاخدها مقر رئيسي ليه شيء لي كب زيت عل العافيه
- جمع عليا شطايطك من بيتي
- عاودي أش قلتي ماسمعتش .. بيتك ؟؟
- اه بيتي ملي تزاديت وانا عايشة فيه
- هادي راها داري وهاد البيت راه من ممتلكاتي ..والى ماعجبكش لحال زدحي راسك مع الحيط
- (خديت نفس طويل باش نبرد ..عليت رجليا وهزيت راسي لفوق ) واخا .. هاد لبيت راه جا حدا لكوزينة .. ولي كيعيش حدا لكوزينة غير الخدمات .. ولكن عادراك قاري فزحام ..ومولف عيشة دل .. ربح بيه .. زيدو فراسك
ضرت هزيت ميكتي لي فيها حوايجي فيدي ومشيت كنقلب على فين نبات أما هو بقا نص ساعة فبلاصتو كيجمع قطع كرامتو .. لقيت واحد البيت فن حسن من هداك لي كنت فيه مهوي ومشمش .. ومفرش بالفراش جديد .. ها ماقلنا الله كيعوض غا بما حسن .. أما هو خليه يبات حدا لكوزينة خصو غير شي زيف حياتي محزم عند جبهة وشي طابلية بالكاروات ويولي كي عويشة .. مهم خلينا منو براكة عليا غير حالتي لي رجعات كي قنفد صحرا كلي مغبرة بتراب مع طلعنا لجبل سيرا على الأقدام .. جبدت ميكتي نشوف باش غانبدل لقيت الحوايج كاملين موسخين وماهز ليا الواليد الله يعطيه ماعطا غير ديشي وراشي .. مشيت عند زاهية عطاتني واحد الكسوة كي الزمان كلها ورد ونواوش كالك ديالها ملي كانت فعمري .. عليها أزاهية بقيتي بايرة لازواج لا ولاد ... قلت ليها الله يخلف وزدت ...مشيت لبيتي جديد بغيت نبدل فيه يالله قلت بسم الله وهما يفكروني ملايكتي بالكاميرا.. أما كن فضيحتي فضيحة .. بديت كندور عيني تا لقيتها غطيتها وبقيت شي ساعة وانا كنقلب على شي كاميرا واخرى ملي مالقيتش عاد قلت بسم الله .. وانا باقا فدقيقة تسعين من تبدال وهي تفرع عليا الباب .. يسحابني غا جنون زاهية .. ولكن واش كاين شي جن كبر من داك بوراص
- أشكاديري ؟
- كان.. (أستغفر الله) كانصيد الحوت فالبحر .. واش مكاتشوفش ألبعر
- وعلاش مغطية لكاميرا ؟؟
- لا ولاش لكاميرا .. نجي تال لعندك ونبدل على عويناتك مباشرة لهلا يحوجك
- براكة من ضسارة
- ضسارة ؟؟ شكون لي كايدير فيها دابا
- ديتها غا فيك
- وديها غافراسك
- تفو على بنادمة ... شوفي لكاميرا مابغيتهاش تقاس .. وإلى بغيتي تبدلي خرجي لخلا .. ولا غاتباتي تا فيه .. وداك لهضرة لخاوية ديالك حيديها حيت ماشي من مصلاحتك .. وأنا هنا هو السيد وانتي غير حشرة رشة من فليطوكس تجري على ايامك ... وبقاي مبرقة فيا عينك
قال هضرتو وخرج لا هرب حيت كن بقا كن نقيت بيه سناني .. لحقير .. داير فيها سي سيد الله يعطيه سخانة سيمانة · · ·
داز النهار غير بمشقة الأنفس .. أي حركة كنديروها كنحسو بعينيه بلاصة لكاميرات الله يتبعو البلا .. نهار كلو وحنا كنسيقو .. لا أنا لي كنسيق أما زاهية غير هازا عليا عكازها .. دوزي من هنا دوزي من لهيه ..الله يدوز عليكم طراكس بجوج ..أهم فائدة جات معا هداك لي مايتسماش هو جاب لملحة لدار .. وهو تعشا بوحدو كي جن فصالة مونجي .. وأنا وزاهية كلينا فالكوزينة كي الخدامات .. فينك أميمتي تشوفي كيبدتك كتشوا بين جوج مساخط مكايعرفو لا رحمة لا محنة ..وأخيرا حطيت راسي للأرض .. كانت شتا مجهدة وخيط من سما كنحماق على هاد الجو ..دايرة بحال ديال أفلام الرعب .. دوماج جنون ديال زاهية مزالين جنون الكارطون .. كيفقصو كتر ما يخلعو .. داني نعاس تال جوج ديال صباح وضرباتني الفيقة وانا كنلهت بسباب الكوابيس المزعجة .. الزمرة والزمر كيسوطو فيا بالمسوط ديال البغلة وانا كي البغلة كانخدم ليهم شقا وكل مرة واحد يغوت من جيه تا تصمكو ودنيا .. صافي أنا غايخرج ليا لعقل .. إلى بقيت معهم .. نضت للكوزينة كنقلب على لما ومالقيت تاقطرة.. كاع لما لي كان سيقت بيه هاد الخربة ..وبما أن فيا الموت ديال لعطش قررت نمشي نسقي من البير وحيت كانت شتا باقا كاتنقط درت واحد درة ديال زاهية وعقدتها عند العنق بحال كي كادير ليها .. ودرت واحد الميكة ديال طبلة عليا وتوكلت على الله وانا مطمئنة حيت جنون يكونو مكسلين حدا زاهية ... خرجت من دار ومع البير كان برا سور ماسديتش الباب ديال برا .. حيدت لغطا للبير ولحت سطل ومعا شتا كانت كاطيح حصلت غير فالميكة لي عليا .. شوية شوية بديت كنسمع شي صوت جاي من قاع لبير
- ويلي أش هادشي
ماعرفت نجر عندي سطل ولا نطلقو .. تكوفرت .. ولي زاد بلوكاني هو صوت كيقول " دنيااااا دنيااااا قربــــــي" يديا جمدو على لكوردة .. لعطش لي كان فيا بحالا تكبات عليه الملحة
- بنت شارفة أش كاديري هنا فهاد ليل؟
جاني هاد صوت من لور بحال البرق .. بكترة الخلعة طلقت سطل فالبير .. جاب الله كان باقي مشدود بالكوردة .. ضرت عندو وأنا كلي كنقفقف
- انت لي كنتي كاتعيط ليا من البير دنياااا دنيااا
- بسم الله عليك .. أنا قدامك أش غاندير فلبير .. شكون دنيا بعدا ؟؟
- أنا
- هههه حلفي بالله .. دنيا ؟؟ هه مجاتش معاك
- براكة من ضحك حلف بلي ماشي انت لي كنتي كاتعيط من لبير
- واسولي عقلك يقولك .. واش انتي مريضة لا ؟؟
- شي حد كتن كيعيط ليا من لبير والله
- أودــــــي بحالك بحال شارفة مك غير كتهترتو.. حيدي عليا نشوفو أش كاين فهاد البير
بدا كيجرب بحال شي ديسكور 'طيسطيس' مولف بالعراسات ولكن غير صدى لي كيرد عليه
- هاانت مكاين والو .. مكاين لا شارفة لا بنتها
- جبد سطل
- ومالو يغلبني
مع جبدة لي جبدها وهو كايبان لينا واحد راس لفعى لكبرى مخرجة راسها ولسانها .. طلق سطل وعيط جبد .. واااا لحفيظ الله .. واسيد نسى واش من موراه شي ولية .. أودي أودي على رجلة .. أنا بلا شعور نفضت عليا الميكة وتا أنا عيطت جبد .. ما حبسنا تا وصلنا لباب سور لي لقيناها مسدودة ...
- وجه زلط علاش سديتيها
- على شكون لي خرج لول
- شكون ؟؟
- أنا
- على فين كنتي ؟؟
- كنت فجايحة لي ضربك .. انتي مالك ؟؟
- آآآه .. عيات زاهية ماتقوليك ما تغلقش فالهندية .. وانت داير فيها باطمان جوع لكحل وها انت وقفتي علي هضرتها
- هضرتك زيديها فراسك .. دابا كي نديرو ندخلو
- تبعني تبعك التابعة قول أمين
- للمدعين
مشينا دخلنا من لور منين دخلاتني زاهية نهار سرقت القرآن ..
- هاي هاي على سليحفانة .. خصني نسد هاد تقبة
- واسدها ووشوف منين تقبها أأأ زعمة دخل .. ماعندكش شي ما ؟؟
- لا عندي غير الما القاطع إلى بغيتيه
- فيا لعطش
- سيري للبير .. باش نتهناو منك فمرا
- بالحرام لا عاودت عتبتو
مشا وخلاني وانا مشيت لبيتي كنتلوى بالعطش .. وعقلي كلو مع شكون لي كان كايعيط ليا من لبير بسميتي واااع ...سمعت دقان فالباب نضت حليتو لقيت غير واحد القرعة ديال الماء المعدني حدا الباب ... ماسولتش فشكون مولاها جغمتها جغمة وحدة ومشيت كملت نعاسي · · · 
فوق العمارية كندير باباي وانا حشمانة وخدودي حمر .. وكرموشتي لابس واحد القبية على من زيناتو واقف حدا الواليد كايسيفط ليا قبلات في الهواء :*.. الماسخ لا خور .. حشمني .. وماما كتمحي دميعاتها من الفرحة .. وحمزة النجار كايفرق لمونادا ..وديسكور كيغني عليا ♪♫♬ .. والقاعة كلها مزوقة بالورد ✿✿.. ومتلألئة بالمصابيح ✬ ✭ ✮ ✰.. وأخيرا أصبح الحلم حقيقة .. لا بلاتي أش كانشوف ؟؟ زاهية البشعة جايا بعكازها ضربات بيه العمارية وجيت على راسي مزدوخة لااااااااااااااا .. حليت عيني فالواقع لقيت زاهية مطيحاني من ناموسية ودايرة ليا عكازها على عنقي ..وداك العرس مكان غير أحلام وردية ... نضت عند جدها بديت كنقج فيها
- فيناهو كريم ؟؟فين هي العمارية؟؟ فين هو با ؟؟فين أنا ؟؟
- (بصوت مخنوق) طلقـــــــــي
- علاش نزلتيني من العمارية ألمجرمة ؟؟
- واش تشيرتي ؟؟
- أنا لي غانشير بوك من هاد جبل إلى مارجعتينيش فين كنت
شي حاجة شداتني من لور وزدحاتني مع الأرض عاد توكدت .. والله ومكانو جنونها معاها تاتبات ليوم مغطية بتراب .. قليلة الحيا خارجة ليا تافحلامي بغيت ليها العكّر
- واش حماقيتي ؟؟
- بعدي مني .. لي فيا يكفيني (بديت كنبكي ) كريــــــــــــــــــم اهئ
- لا لا هادي تشيرات .. نوضي ابنيتي نوضي جمعي الوقفة وجمعي دار وطيبي لفطور وكملي بكاك إلى بغيتي .. راه إلى ناض هاداك ومالقى والوا.. مغانبقى لاأنا لا انت
- (بالبكا) اهاه وانت أشغاديري بسلامة ؟
- انا غانمشي لسوق
- ديني معاااك عفااااااك
- لا
قالت هضرتها وخرجات .. وانا جلست نكمل بكايا مليت هاد العيشة والله .. حرب بين جوج ونا ماعندي تادخل فيها .. مكايهمني لا دار لا صداع .. بغيت غير شي نهار نعس مرتاحة .. ملي جابني با لهنا وانا فالعداب ماحرتي للجن ولا الإنس .. ولي بقا فيا هو تا حد من عائلتي مارجع سول فيا واش حية ولا ميتة .. واش واكلة ولا فيا جوع .. وليت شاكة بلي كانو كيقلبو ليا على سبة ومقالو ربي يتهناو مني .. لهاد درجة تا حد مكيبغني وتا حد ماحملني .. خطأ صغير دفعت ثمنو كبيـــر .. تنهدت ومحيت دموعي ولكن الخنقة باقا فيا ..جمعت داكشي لي خصو يتجمع .. وملي جيت نطيب لفطور مالقيتش لما .. ومشيت لبير نسقي .. وانا كلي أمل يخرج عندي شي جن ويدفعني ويغرقني فيه ولا تخرج عندي داك الكبرى ديال البارح تقتلني وتهنيني ولكن ماخرج عندي والو ... عييييت ..وتا لموت مابغاتني... أش ندير ؟؟؟؟
رجعت لدار بيأس و طيبت لفطور وحطيتو وبديت كنفطر فصالة مونجي راه واخا حزينة ودموعي كيطلو من عيني وباغا نموت ولكن كرشي مانفرطش فيها .. حيت تا حد مايحرزني وسول فيا واش واكلة ولا شاربة .. أصلا تاحد ماسوق ليا وتا حد مكايبغيني ..نفسيتي متأزمة وزاد تدمرات ملي شفت داك القندوح جاي
- بنت شارفة قلت ليك مانبقاش نشوف وجهك
مارديتش عليه وجمعت الوقفة مافيا لي يهضر ويصدع معاه راسي
- جلسي جلسي تجلسي عل الشوك
رجعت جلست وانا كاع مامسوقة ليه عارفة باغي يجبد الصداع
- شارفة مشات لسوق ؟؟
- ملي عارف لاش كتسول
- علم الله أش غاتجيب منو ... خصني نصكانيها قبل ماتحط رجليها فدار.. حيت البلا مكيجبد غير البلا .. تفو ..
بغا يقول شي حاجة ورجعها .. بدا كيحك فراسو باين عليه كاع مشابع نعاس غير من عينيه لي دايرة عليهم الكحولة
- الله يعطيك صحة بعدا
- ؟؟؟؟
- عجبتيني فشارفة فصباح .. كن غير قتلتيها هي تمشي لقبر وانتي تمشي لحبس وانا نبيع دار ونمشي نتفطح فشي قنت
بديت كنشوف فيه باستحقار وعدم للامبالاة وحنيت راسي على ماكلتي
- شكون هاد كريم ؟؟ ندفع الغالي والنفيس باش نجيبو ليك .. باينة من داك لبكا لي بكيتي قبايلة ديري على ودو المستحيل .. تا زاهية تقدري تصفيها ليها على ودو ياك ؟
- دخل سوق راسك .. واش ماعندش شغل غير مقرق فدار ؟
- ماشي شغلك
- أجي ماتكونش شي فقيه بحجاباتك؟؟ .. حيت بكل احترام انت الوحيد لي كمل فهاد الدار نهار وزاد عليها سيمانة من الفوق
- لواه نبك من نهار جيت لهاد دار مابقى كايجيني نعاس ولا كنشوفو.. ولكن أنا ماشي خواف باش نهرب وداك شارفة بيا ولا بيها
- علاش أش كادير ليك .. فخباري استسلمات ؟؟
- غابلاتي عليها .. وعلى هاديك لي كاظل تصيفطها ليا كل ليلة
- شكون ؟؟
- مانعرف لجدرها شي وحدة بحالها الله يعطيهم لخلا .. كل مكانغمض عيني كاتبان ليا وكانحس بها قريبة مني وغادخل فيا .. ولكن غير كنحل عيني كتغبر ..لداكشي ليل كلو وانا مبرق عيني .. وحتى لكاميرات مكايبينو والوا .. والقرآن لي كان عندي غبروه الله يعطيهم الموت
- مادعيش مادعيش ... احم هذاك غير المس العاشق ههه .. راها عاشقاك مسكينة ههههههه تا جنون ماسلموش من جمالك الفتاك ... عليك غناو : ذنبك إيه ذنبك بحبك .. ومالك راه لي كايتزوج جنية كايولي غني مليونير.. غير توكل على الله .. باش تولد شي خنافش بحالك نشبعو غير زين فهاد دار
- آآآه كون كان الخوخ كايداوي كن داوا راسو كن غايرجعوني غني .. كن ضبرو ليكم على فين تسكنو وهما لي ولاو تقريبا من عائلتكم .. مايخليوكمش دلو على واحد بحالي
- صافي صافي ..بلا ماتجبد سينتا تاني · · ·